Másutiña gürigia afiñera

Lun gayara lan wagundaaragüdüni Heowá lunti wafiñerun luagu. Gama lumoun, ariñagatu Bíbülia: ‘Másutiña lan gürigia afiñera’ (2 Tesa. 3:2). Dan le labürühanbalin apostolu Pábulu dimurei burí le, layanuhaña meha hawagu “wügüriña salufuritiña”, ha meha éibaahabalin, lun gayaraabei lan lesefurun hawéi. Lau sun lira, dimurei le lariñagubei luagu afiñeni gayaraati layusuruniwa lun layanuhóun hawagu amu gürigia. Kei hénpulu, añahein máhatiña hafiñerun anihein lan aban Bungiu le adügübalin sun katei (Rom. 1:20). Añahein afiñerutiña anihein lan somu katei gabafutimati hawéi gürigia. Lau sun lira, mama ligía luwuyeri afiñeni lamuriahabei Heowá wámagiñe.

Lun gayara lan wagundaaragüdüni Bungiu lunti wachoururuni luagu anihein lan, ani líchugubei lan afayeiruahaü houn ha wéiribei hafiñerun luagu (Ebü. 11:6). Afiñeni, ligía aban lídangiñe igaburi le líchugubei sífiri sandu. Ligíati, anhein busén wabéi weresibiruni sífiri le, lunti wamuriahani luma Heowá lidan furíei (Luk. 11:​9, 10, 13). Súdiniti giñe lun waliihanu Bíbülia —líburu to labürügüdüboun lau lani sífiri sandu— ani lárigiñe lunti giñe wararamagun asaminara luagu le waliihabei ani áfaagua wagíame wawinwanduni le wafurendeirubei. Ítarati, larihíba lubafu lani Heowá sífiri sandu lidan wabagari ani líderagubadiwa lun wagamadun aban afiñeni le aubei lagundaara Heowá.