Álügüdahani le hadügübei aliihatiña

Katei san “Herusalén” le uágubei layanuhóua lidan Isaíasi 60:​1, ani ka mini lubéi dimurei “hóuburagu lidan larugounga”?

Ariñagati Isaíasi 60:1: “Saraba, Herusalén, hóuburagu lidan larugounga, lugundun chülühali bilanpun, ani harugoungati luéirigun Bungiu buagu”. Layanuhaña luagu “Herusalén” uburugu le meha súdinitimabei Hudá lidan dan ligía (Isa. 60:14; 62:​1, 2).a Dan le wayanuhan luagu Herusalén, wayanuhaña hawagu sun ísüraelina. Ídabuga ani ida liña lásaarun Herusalén hóuburagu lidan larugounga? Lagunfuliruña san dimurei le lariñagubei Isaíasi lidan dan le? Ariha waméi lóunabagüle bián álügüdahani le.

Ídabuga ani ida liña lásaarun Herusalén hóuburagu lidan larugounga? Ǘrüwañein wein-diisi irumu hau meha huríu adaürǘwa Babilónia. Lidan dan ligía, günringuañu liña meha Herusalén tau sun litenpulun. Dan le hárügüdünbalin médiana hama pérüsiana Babilónia, aba lichugún chansi houn sun ísüraelina ha awinwandubaña lábugiñe lubafu Babilónia, lun hagiribudun hageiroun lunya háhuduragun lun Heowá (Ésüd. 1:​1-4). Lúmagiñe irumu 537 lubaragiñe lidaani Hesusu, aba hagiribudun hádangiñe huríu úaraguatiña ha lídangiñebaña 12 türibu (Isa. 60:4). Aba hagumeserun adagaragüda, adüga burí fedu lun Heowá ani ábaya hábunagunu litenpulun (Ésüd. 3:​1-4, 7-11; 6:​16-22). Ligíati, ábaya ladurangun luéirigun Heowá luagun Herusalén, mini lan lira, hawagun lumutuniña ha meha agiribudubaña. Ligíati, aba hayabin lun aban hamá lanpu le durunguati houn néchanigu ha meha ibidiñebei Bungiu houn.

Lau sun lira, sun burí profesía le meha lariñagubei Isaíasi luáguti láhudurawagunya lun Heowá, magunfulirunti sunsuinagubei luagu binadu Herusalén. Maganbaditiña meha hiibe-agei ísüraelina lun adundehani le líchugubei Heowá houn (Neem. 13:27; Mal. 1:​6-8; 2:​13, 14; Mat. 15:​7-9). Dan lárigiñe, aba giñe hamahadun lun Hesukrístu le Mesíasi (Mat. 27:​1, 2). Ani lidan irumu 70, aba lagünrinchawagun uburugu Herusalén tuma litenpulun luagu libiaman wéiyaasu.

Ariñaga laali meha Heowá lasusereduba lan katei le lun uburugu le (Dan. 9:​24-27). Furanguti ua lan lidan lisaminan Heowá lun lídanba lan uburugu Herusalén le yaabei ubouagu lagunfulira sun le lariñagubei profesía le lídanbei Isaíasi kapítulu 60 luáguti liñuragunya áhuduraguni inarüniti.

Gúnfuliti san profesía le lídanbei Isaíasi lidan aban igaburi le hanarimetimati? Anha, lau sun lira, lidan kesi le, layanuhaña luagu “Herusalén le siéluna”. Kati uagu layanuhóua lau dimurei “Herusalén le siéluna”? Layanuhóuña luagu fánreinti le siélubei tánina lóundarun Bungiu le ñein habéi sífirigu ha úaraguabaña lun. Hesusu ábanbei hádangiñe lirahüñü “Herusalén le siéluna”. Ani ariñagati apostolu Pábulu luagu lirahüñü lan “Herusalén le siéluna” dandu ligía kei amu kristiánugu (Gal. 4:26). Kristiánugu anuadirúaaña ha hóustatiña 144,000 ani aban néchani hagía ha deregeguabaña houngua lun Bungiu. Ani súngubei hagía hemenigitiña hawinwandun sielu (1 Fe. 2:9; Gal. 6:16).

Ida liña lásaarun Herusalén le siéluna hóuburagu lidan larugounga? Susereti lau hídehan kristiánugu anuadirúaaña ha lirahüñübaña ya ubouagu. Góubaguagüda waméi le winwan hamaalibei luma profesía le lídanbei Isaíasi 60.

Mosu meha hásaarun kristiánugu anuadirúaaña lídangiñe luburiga le meha ídanbei takipuraña relihión mama inarünitu lúmagiñe lidan libiaman sígulu, lárigiñebei lounwen lagumuhóun apostolu, dan le hagibedagunbei gürigia ha agarabaagubaña houngua luagun Bungiu (Mat. 13:​37-43). Tidamun meha Babilónia to Wéiriboun hagía, mini lan le, tidamun sun relihión to mámaboun inarünitu. Rédeitiña meha lábugiñe tubafu Babilónia darí irumu 1914, dan le ídanbei lagumesera Hesusu arúeiha (Mat. 13:​39, 40). Murusun dan lárigiñe, lidan irumu 1919, aba hesefurún kristiánugu anuadirúaaña tídangiñe relihión mama inarünitu ani aba hámirigüdüni lileitin inarüni. Ida? Lau híchaagun houngua sunsuinagubei lun hapurichihan.b Lúmagiñe dan ligía, ñǘbuinhaña gürigia ha lídangiñetiña sun néchani áluahei lileitin inarüni, lílana Ísüraeli le lani Bungiu haganagua, urúeigumeme ha uágubaña layanuha Isaíasi 60:3 (Aruf. 5:​9, 10).

Ámuñegü, hámirigüdatimabei kristiánugu anuadirúaaña lileitin Heowá lidan aban igaburi le héretimati. Lárigiñeme hóunwegun, lílanaañame “iseri Herusalén” 144,000 urúeigu hama fádirigu ha únbaña laguarúa ladari Kristu (Aru. 14:1; 21:​1, 2, 24; 22:​3-5).

Súdiniti Iseri Herusalén lidan lagunfulirun profesía le lídanbei Isaíasi 60:1 (ariha huméi le lariñagubei Isaíasi 60:​1, 3, 5, 11, 19, 20 lumoun le lariñagubei Arufudúni 21:​2, 9-11, 22-26). Ítara kei meha Herusalén lan lichügüdinabei binadu Ísüraeli, Krístuba giñe hama lílana Iseri Herusalén arúeihei Ubóu ámuñegü. Kati uagu tayanuha líburu Arufudúni dan le tariñagunbei rarí lan iseri Herusalén “siélugiñe lúmagiñe Bungiu”? Mini lan leteniruba lan lun Ubóu. Dan le tayanuhan Bíbülia luagu uburugu le, ariñagatu héibuguba lan “sun néchanigu ha sálbawaañabaña lidan lilanpun uburugu ligía” ani hesefuruba luéi figóu luma óunweni (Aruf. 21:​3, 4, 24). Ladügüba le lun “laranseruni Bungiu sun katei” kei lariñaguni Isaíasi hama amu profetagu (Adü. 3:21). Gumeseti aransehani le dan le lagumeserunbei Kristu arúeiha ani lagumuchuba danme lásurun Milu Irumu le lánina Larúeihan.