¿Ta lhayaash ti yivashan pa Dios pa niysa’?

1. ¿Ta lhjunash ti tô’lhesham pa niysa’?

Pa niysa’ ti tô’lhesham ti nich’a ti yôôlhjôn’in pa Satanás. Lhapesh ti issha’ne pa Satanás taĵ ti “ninôvji’ pa yijô’” (Juan 8:44). Yen jum pa lhech ĉa chinôĉlôĵei taĵ ti nasheesh ti yitsôt’aĵshi pa Dios pa vatôĉlôĵqueyash. Pa Satanás lhei Tsich’e’ shta ti teĵshiin lhpa Eva ĵaspa nanĉ’ashamem pa lhech vooi pa Dios ôme. Pa Adán ve’lhaelhsham lhpa lhech ti ninanĉ’ashamem pa Dios. Pa yisnatesh pa Adán tô’lha pava tavi’ĵatai pa vatvafi’ shta. Etônch’e na Génesis 3:1-6, 19.

Pa Tsich’e’ vatjuiĵatjulh pa Dios ti yit’esha lhpa Eva ĉa ninanĉ’ashamem pan Yaashchisham. Ninanĉ’ashamem pa yitsôt’aĵshi pa Dios ti lhĉaanvaĉleesh. Lhjunashjulh pa Satanás t’esheitaĵ ĉa lhaĉom’aa papi nivaĉle t’ajuijulh pa Dios ti yijô’ ti lhĉaanvaĉleesh. Lhech lhjunash pa Satanás ti “lhanvacleesh napi yie’ na cotsjaat”. Etônch’e na Juan 14:30 chi’ na 1 Juan 5:19.

2. ¿Ninvo’yeshch’e t’e pava yivĉlanĵat pa Dios?

Lhaĉom’a nava yivĉlanĵat pa Dios yivo’yeshch’e jum. Pa Dios yivĉlanĵat papi nivaĉle chi’ papi ángeles ĉa isa’jop ĉa nanĉ’ashamem jô (Deuteronomio 32:4, 5). Pa lhech shinavĉlanĵat ĉa isa’jop ĉa shteneishiĉatsitam pa is ĵa’taĵesha pa niysa’. Ĉa shtanĉ’ashamem pa Dios isjop ĉa shtanôĉlitem na ĉatsencheyasha. Etônch’e na Santiago 1:13-15 chi’ na 1 Juan 5:3.

3. ¿Ta t’e lhayaash ti yivashan pa Dios pa niysa’?

Naaĉloĵa pava nalhus pa Jeova yivashan ĉa chinatĵuijulh pa yitsôt’aĵshi ti Lhĉaanvaĉleesh. ¿Ta t’e lhayaash ti yivashan côque? Lhayaash ti chinôĉlit ti chisuyeshi pa t’efencheyash pa Dios ĵaspa nanvaĉleyan jô papi nivaĉle (Eclesiastés 7:29; 8:9). Chiyivanch’e jum papi nivaĉle ti lhĉaanvaĉlesesh sasjop ĉa nivômĵatshi jô nava ninvo’yeshch’e, nava vatĉômĉlayash, nava vatvatĉlônĵayash chi’ nava vataiyashaĉ. Etônch’e na Jeremías 10:23 chi’ na Romanos 9:17.

Vooi pa Dios Lhanvaĉleyash yiisiyan ĵayu papi yen ĉa nôpeĉshichamc’oya (Isaías 48:17, 18). Tatsha ĵayu pa Jeova yivômĵatshi pa lhanvaĉleyash papi nivaĉle. Nasheesh ti mônlhasha’ne ĵayu yi’e na cotsĵaat papi yefench’esham pa Dios Lhanvaĉleyash (Isaías 11:9). Etônch’e na Daniel 2:44.

Aĉlôvalhesh na video ¿Ta lhayaash ti yivashan pa Dios pa niysa’?

4. Tô’lha pa lhnichaĉlanĵayash pa Dios ¿she pa isjop ĉa shtasnatshem?

Pa Satanás yit’esh papi nivaĉle nasheesh ti t’acumem’in pa Dios lhayaash ti yijutem pa is. Chinshamesha pa lhnichaĉlanĵayash pa Dios isjop ĉa isa’ na ĉasfanishĉatsivach. Lhech lhjunash ti shtanôĉlit pa Tsich’e’ ti yôôlhjôn’in jum pa shtôpeĉlelhshichamc’oya pa Dios Lhanvaĉleyash vooi pa lhanvaĉleyash papi nivaĉle ôme. Etônch’e na Job 1:8-12 chi’ na Proverbios 27:11.

5. ¿Ta lhjunash ti isjop ĉa shtavoqu’eetsham pa Dios?

Tajulhei ĉa shtavantôyitesh pa lhjunash ti yijô’ ĉa shtôĉlôĵei pa Dios pa shnôcjaam shta pa religión yivo’yeshch’e, yich’e pa chiyishi’ yivo’yeshch’e, ti tôlhshaam pava lhneiĵatsĵanĵayash yishi’ na Biblia (Juan 4:23). Tajulhei ĉa shtavôôtjônch’e pa Jesús pa yaaĵ ĉa shnôcjaam pa política ĉa’taĵesha pava vatvatĉlônĵayash. Nôque lhjunash shtaĉavoijulh jô pa Satanás ĉa ĉasĉaanvaĉleesh. Etônch’e na Juan 17:14.

Pa Satanás yômĵatsham papi nivaĉle ĉa nifaiĵanesh ĉa nasnatesh pa niysa’ ti aôvteĵem jum. Ĉa shtaĉavoijulh cavôque isjop napi ĉatsic’utsfas chi’ napi ĉasve’lhavot ĉa shinlhôquiin ĉa shinĉôvfachi shta (1 Pedro 4:3, 4). Pa lhechesh tajulhei ĉa shteneishiĉatsitam. ¿Shnôvelhvatcop ĵayu t’e papi ti yen pa Dios? ¿Shtanĉ’ashamesh ĵayu nava isis lhayôjiĵates pa lhech? Ĉa shtasnatesh cavôque shtanôĉlit pa Satanás ti yôôlhjôn’in ti yit’esh ĉa natvi’ĵatayem papu tan ĉa nanĉ’ashamem pa Dios. Etônch’e na 1 Corintios 6:9, 10 (TNM) chi’ na 15:33.

Isjop ĉa yijô’ajoom pa Dios yivômĵatshi ĵayu lhaĉom’a pava niysisa lhayaash ti shinen. Ĉa shtanôĉlit ĉa sht’ueshch’e côque isjop ĉa ĉasmônlhaasha’ne ĵayu yinjôt yi’ei na cotsĵaat. Etônch’e na Juan 3:16.