¿Ta lhjunash ti isjop ĉa shtac’uyelha pa Dios?

1. ¿Yipe’ya t’e pa Dios lhaĉom’a pava vat’alhĵayash?

Pa Dios tônei lhaĉom’a papi nivaĉle ti yamsha’esh ĉa natc’uya pa lhech tôlh’ejop pa vat’alhĵayash (Salmo 65:2). Taĵ ti ninpe’ya ĉa’taĵesha ti ninanshamesh lhaĉom’a pava vat’alhĵayash. Yi’ei pa lhjunash, na Biblia yit’esh ti ninteesh ĉa nipe’ya pa Dios pa nivaĉle ti niysa’ pa lhfanishesh lhpa lhch’aĉfa (1 Pedro 3:7). Papi israelitas aĉloĵesh’in ti yisnatesh pa niysa’ lhe’naa pa Dios ti ninpe’ya papi lhech. Vooi ti yipe’ya pa Dios papi yisnatesh uĵ pa niysa’ ĉa nitatvaich’aĉlaĵ. Etônch’e na Proverbios 15:29 chi’ na Isaías 55:7.

Aĉlôvalhesh na video ¿Yipe’ya t’e pa Dios lhaĉom’a pava vat’alhĵayash?

2. ¿Ta lhjunash ĉa nitajulhei ĉa sht’aalh?

Pa vat’alhĵayash yishi’ pa vatôĉlôĵqueyash lhe’naa ti nasheesh ti tajulhei ĉa sht’alhei pa Jeova (Mateo 4:10; 6:9). Ĉaslhaĉom’a ti nishtanvo’yeshch’e taĵ ti tajulhei ĉa shtetônjop ca lhei pa Jesús ĉa sht’aalh lhayaash ti vafeshjoom pava ĉassasch’esha’ne (Juan 14:6). Pa Jeova ninen ĉa shtetônch’e chi’ ĉa shtachaĵeshch’een atesha nava ĉasĉlishai ti sht’aalh vooi ti yen ĉa shtetônem pava shtancha’vayei tasham. Etônch’e na Mateo 6:7 chi’ na Filipenses 4:6, 7.

Pan Shinavĉlanĵat shinpe’yaelh ti ĉasĉanomesh ti sht’alhei pa lhech (1 Samuel 1:12, 13). Tônjooi yitsha ĉa sht’aalh yaĵatesh, yi’ei pa lhjunash ti nich’a nalhu chi’ pa yôj’e pa nalhu, ĉa shtatsaĉcunch’e chi’ ĉa niĉaaĵjoom pava tavi’ĵatai. Etônch’e na Salmo 55:22 chi’ na Mateo 15:36.

3. ¿Ta lhjunash ti shinefen pava lhc’ayashva’ne papi niĉacuĵanĵasa?

Ve’lheesh’in ti nic’ôôflhaajoom ĉa shtac’uyelha pa Dios lhayaash ti yich’e ĉasvôôj papi ĉacuesh pa Dios chi’ ti yiĉlôqui pava vanĉape’ĵayinesh pa Dios ti nichaĵei ĵayu pa vatpiiyash yi’ei na cotsĵaat (2 Timoteo 3:1, 4; 2 Pedro 3:3, 13). Lhe’naa ti ĉassuyeshi ĉa ĉasc’aelhva’ne nap’elh niĉacuĵanĵasa ĵaspa shtavatĉ’usinatshelh’invatam. Etônch’e na Hebreos 10:24, 25.

Ĉa ĉasve’lhaaelhsham napi yen pa Jeova shinefenesh ĉa shtac’uyelha pa Dios. Yishi’ nava lhc’ayashva’ne napi nifaqu’in pa Jeova isjop ĉa shtavantôyitsha pa uĵ nilhĉacuĵayasha nap’elh. Etônch’e na Romanos 1:11, 12.

4. ¿Ta lhjunash ti isjop ĉa shtac’uyelha pa Dios?

Isjop ĉa shtac’uyelha pa Jeova ĉa shtaichavalhch’e jô na Biblia. Shtaichavalhesh’e pava lhfanishesh pa Jeova, pava vanĉatôiĵatc’oya pava vanĉape’ĵayinesh shta. Ĉa shtaichavalhei jum chi’ ĉa sht’aalh ti shinefenesh ĵayu ĉa shtasĉlaneshi jô pa lhencheyash chi’ pa lhĉajôisha pa Jeova. Etônch’e na Josué 1:8 chi’ na Salmo 1:1-3.

Nasheesh isjop ĉa shtac’uyelha pa Dios ĉa shtaĉafiyan jum chi’ na niĉasĉacuĵayashaesh pa lhech. Taĵ ti pa nivatĉacuĵayasha lhjunashjulh pa itôĵ ti suyeshi ĉa chinujam pava yeĉlôi ĵaspa tan ĉa nimaĉ. Lhech lhjunash tajulhei ĉa sht’unitĵat yaĵatesh na niĉasĉacuĵayasha ĉa shtaichavalhei jô pa lhtatsuqu’esh nava sht’u’eshch’e. Etônch’e na Mateo 4:4 chi’ na Hebreos 11:1, 6.

5. Ĉa shtac’uyelha pa Dios ¿ta lhjunash ti shinefenesh ĵayu?

Pa Jeova yaichavalha napi yen pa lhech. Isjop ĉa shinujumatsinjulh pava matas suijulh na niĉasĉacuĵayasha chi’ ĉa shtavatjumtic’oya pa vatmônlhaĵayash ôiĵôlhôyech (Salmo 91:1, 2, 7-10). Pa shinujumatsinjulh shta pa niysa’ ti shinsasiyan na ĉasvuvaat chi’ ĉa shintaĉshinĵayan’in. Pa Jeova shineiĵatsĵanesh ĉa isa’ na ĉasfanishĉatsivach. Etônch’e na Salmo 73:27, 28 chi’ na Santiago 4:4, 8.