¿Ta lhjunash ti shinefenesh nava vanĉatôiĵatc’oya na Biblia?

1. ¿Ta lhayaash ti ĉassuyeshi ĉa chinôyinjoc’oya?

Pa Jeova, pan Shinavĉlanĵat, ya’sheshjotapee ti yitô’yish. Nan lhjunash pa vatata ti nitsopaesh pa lhaôs ti naichavalhjoo. Ninteesh ĉa shtaijop pa lhech (Jeremías 10:23). Papi taôvĉlas tiqu’iĉsha’ne suishemshi papi lhnavot ĉa ninôyinemc’oya. Lhjunashjulh ĉaslhaĉom’a ti ĉassuyeshi ĉa ninôyinjoc’oya pa Dios (Isaías 48:17, 18). Pa vatanefenĵayash tô’lha nava vanĉatôiĵatc’oya na Biblia ti shintisesh pa Dios. Etônch’e na 2 Timoteo 3:16.

Nava lhayôjiĵates chi’ nava vanĉatôiĵatc’oya pa Jeova ti shineiĵatsĵanesh ĉa isa’ na ĉasfanishĉatsivach. Shinôôĉlhanitch’e shta pa lhjunash ĉa shtatô’lhesha yinjôt aĉloĵ pava isis. Lhayaash pa Dios ti shinavĉlanĵat ti tajulhei ĉa shtanshamesha ĉa shtach’ana pa vanôyinjoc’oya. Etônch’e na Salmo 19:7, 11 chi’ na Apocalipsis 4:11.

2. ¿She t’e nava vanĉatôiĵatc’oya na Biblia?

Nava vanĉatôiĵatc’oya na Biblia yijô’qu’e pa suyeshi ĉa shtacheneshjop pava vaĉlanjoom ĵayu. Vooi nava vatyôjiĵates nasheesh ti isjop ĉa shtacheneshjop pa ve’lha pa lhjunash (Deuteronomio 22:8). Tajulhei ĉa shtaichavalhjop’in jum ĉa ĵaspa shtantôic’oya pa t’aplhu’ yivo’yeshch’e ĉa sht’ôfisĵatch’e nava vanĉatôiĵatc’oya (Proverbios 2:10-12). Yi’ei pa lhjunash, na Biblia vanqu’eiĵatsĵanesh pa vatmônlhaĵayash lhetaĵeshch’e pa vatôts’ôt tô’lha pa Dios. Côque vanĉatôiĵatc’oya isjop ĉa shintôiĵata yi’ei na ĉascumĵat, na ĉatsijpôyich chi’ ĉa shtachenesh lhpa vatôvĵatshiy. Nôque lhjunash isjop ĉa shtanujumatsinesh na ĉasmônlhaĵayash chi’ pap’elh. Etônch’e na Salmo 100:3.

3. ¿She t’e pava napu’ yaash vanĉatôiĵatc’oya?

Pa Jesús yinôôĉlhanitch’e jô nava napu’ vanĉatôiĵatc’oya. Na vatjutsa’ nôĉlit pa yôyinch’ejoom pa Dios: ĉa shtantôfaĉlesh, ĉa shten chi’ ĉa shtavoiĵateshemch’e pa lhech. Tajulheitaĵ ĉa sht’ôfisĵatch’e côque vanĉatôiĵatc’oya ĉa shteneishiĉatsitam lhaĉom’a pava matas (Proverbios 3:6). Papi yôfisĵatch’e cavôque ti yômeshvatjulh ĵayu pa Dios, ĉ’usemvatsham’in ĵayu chi’ ti mônlhasha’ne ĵayu yinjôt. Etônch’e na Mateo 22:36-38.

Na napu’eishi vanĉatôiĵatc’oya shinefenesh ĉa ĉasĉanoelhvach pap’elh (1 Corintios 13:4-7). Isjop ĉa sht’ôfisĵatch’e nôque vanĉatôiĵatc’oya ĉa ĉasfanisheesh pap’elh nan lhjunash pa Jeova ti lhfanishesh papu. Etônch’e na Mateo 7:12 chi’ na 22:39, 40.

4. ¿Ta lhjunash ti shinefenesh nava vanĉatôiĵatc’oya na Biblia?

Nava vanĉatôiĵatc’oya na Biblia yefenesh ĉa niĉaaĵ pa vatencheyash chi’ pa vatve’lhaĵayasham ĉa niĉaaĵ yi’ei pa vatjôôjam (Efesios 4:32; Colosenses 3:12, 14). Ĉaaĵ neelh vanĉatôiĵatc’oya t’ajuya papi lhtach’aĉfas lhayaash ti t’ônashesh ĉa mônlhaavatcop yinjôt. Etônch’e na Génesis 2:24.

Ĉa shtanĉ’ashamtaĵesh nava vanĉatôiĵatc’oya na Biblia pa vaĉlanjoom ĵayu pa vatpiiyash pa ĉaaĵ ĵayu shta ĉasnefenĵayash. Nan lhjunash pa vanĉacumĵat uĵ ti nitôfaĉlesha’ne papi lhĉavos yi’ei pan lhcumĵayanesh’in lhayaash ti yôfisĵatch’e ts’ivee na yit’esh na Biblia (Proverbios 10:4, 26; Hebreos 13:18). Nava Dios Lhasinôĉ shineiĵatsĵanesh ĉa shtanshamesh ĉa niĉaaĵjoom nava ĉassuyeshi. Isjop ĉa sht’ashĵat pa Dios nanjooilha nava yi’ei na cotsĵaat. Etônch’e na Mateo 6:24, 25, 33 chi’ na 1 Timoteo 6:8-10.

Ĉa sht’ôfisĵatch’e nava vanĉatôiĵatc’oya na Biblia shinujumatsinjulh pava vataiyashaĉ (Proverbios 14:30; 22:24, 25). Yi’ei pa lhjunash, na lhayôjiĵat pa Dios yit’esh ĉa yaaĵ ĉa shtanetsessha’ne ĵaspa shinujumatsinjulh pava suijulh chi’ ĉa shinteshiyan (Proverbios 23:20). Vooi pa Jeova yivashan ĉa sht’iyô’ji tiqu’inesh pa cumĵôtaĵ (Salmo 104:15; 1 Corintios 6:9-10). Nava vanĉatôiĵatc’oya na Biblia ti shinisiyan lhayaash ti shineiĵatsĵanesh ĉa shtavatĉlôvalheshc’oya na ĉasfanishĉatsivach chi’ nava ĉatsaichavalhĵayash (Salmo 119:97-100). Napi cristianos yijô’qu’e ninasheesh tach’ana pan tôlh’ejop pava yuiĵat’acfi pa’na vooi jô napi lhech yivi’ĵatana nava vanĉatôiĵatc’oya na Biblia lhayaash ti yen ĉa nôĉlôĵei pa Jeova. Etônch’e na Mateo 5:14-16.