¿Ta t’e lhayaash ti naiĵatva’ne pa Dios papi lhchifas ĉa nasnatesh pa yen?

1. ¿Ta t’e lhayaash ti yeneishi pa Dios papi Israel lhavos lhapesh ĉa lhchifaseesh?

Pa Dios yisĉlanvatich’e papi tô’lha pa Abraham pa yijutem cava lhayôjiĵates. Lhavaatsha yeyiyanesh Israel papi lhchifas. Papi lhech tajulheitaĵ ĉa niĉlôvalh pa tavayem shta pa vatôĉlôĵqueyash yijô’ chi’ nava Dios Lhasinôĉ (Salmo 147:19, 20). Tôlh’ejop côque aĉloĵ papi nivaĉle yishi’ lhaĉom’a pava yitsates isjop ĉa niĉaatĵatem pa is. Etônch’e na Génesis 22:18.

Pa Dios yeneishi papi Israel lhavos ĉa nanfaĉleem pap’elh pava isis. Pa lhjunashch’e lhapesh papi israelitas nôĉlit ti niqu’ishamesh nava lhayôjiĵates pa Dios pa tô’lhesha pava isis (Deuteronomio 4:6). Pap’elh nivaĉle isjop ĉa nantôfaĉlesh pa Dios yijô’ tôlh’ejop papi Israel lhavos. Etônch’e na Isaías 43:10, 12.

2. ¿Ta t’e lhayaash papi cristianos yijô’qu’e ti ve’lhaelhsham ĉa nasnatesh pa yen pa Dios?

Pa Israel lhapesh yaĉ’oyesh pa lhshamitĵayash pa Dios lhe’naa ti yeneishi papi cristianos yijô’qu’e (Mateo 21:43; 23:37, 38). Navôque nalhus napi cristianos yijô’qu’e ti nifaqu’in pa Jeova vooi papi israelitas ôme. Etônch’e na Hechos 15:14, 17.

Pa Jesús yisĉlanvatich’e papi voqu’eetsham ĉa nivanqu’eiĵatsĵan chi’ ĉa nasnatesh papi t’eiĵatsĵanĵas yi’ei nan tuc’ae na cotsĵaat (Mateo 10:7, 11; 24:14; 28:19, 20). T’esheitaĵ ĉa chinvaĉlhitesh jô na vatvanqu’eiĵatsĵanĵayash navôque yôj’esha’ne nalhus. Nich’a ti naiĵatva’ne pa Jeova aĉloĵ napi nivaĉle yi’ei nan tuc’ae na cotsĵaat ĉa ve’lhaaelhsham pa religión yivo’yeshch’e (Apocalipsis 7:9, 10). Ve’lhaelhsham napi cristianos yijô’qu’e ti tanefenelh chi’ ti vatfaicut. Yishi’ nava lhc’ayashva’ne lhaĉom’a papu lhetlhataĵ pava vantôyitesh na Biblia. Etônch’e na Hebreos 10:24, 25.

3. ¿Ta lhjunash ti nich’a ti vataasĉlanesha’ne napi nifaqu’in pa Jeova navôque nalhus?

Ti 1870 napu’ papi vat’eiĵatsĵanĵasesh na Biblia ti tô’lhesham ti yitôic’oya pava yijô’qu’e na Biblia ti chiyfiich ĉlech’e. Lhe’naa ti vanqu’eiĵatsĵanesh pa Dios Lhanvaĉleyash lhaĉom’a pava yitsates lhayaash ti yitô’ya papi lhech pa Jesús ti yisĉlanvatich’e papi voqu’eetsham ĉa nivanqu’eiĵatsĵan. Ti 1931 papi lhech nich’a ti lhqueyesh napi nifaqu’in pa Jeova. Etônch’e na Hechos 1:8, na 2:1, 4 chi’ na 5:42.

4. ¿Ta lhjunash ti yisĉlanvatich’e na lhavanqu’eiĵatsĵan­ĵayash napi nifaqu’in pa Jeova?

Pa nijooilha ti vaf pa Jesús ĉaaĵ papi vanôyineshc’oya lhaĉom’a papi voqu’eetsham pa lhech. Yitôic’oya shta pa Jesús ti lhshatech’esh papi ve’lheelhsham pa nilhĉacuĵayasha (Hechos 16:4, 5). Lhjunashjulh navôque nalhus ĉaaĵ napi Vanôyinc’oya napi nifaqu’in pa Jeova. Napuque nitaôvĉlasaesh uĵ pa nilhĉacuĵayasha yiĉlôvalh ĉa chinôyôĵqu’e ti 1.000 vena t’ônashch’e chi ĉa chinjutch’e pava vatqu’isĵayanĵas yi’ei nan tuc’ae na cotsĵaat. Lhech lhjunash napi Vanôyinc’oya yicheneshjop na Biblia ĉa nanfayuĵat’in chi’ ĉa nefen lhaĉom’a napi ve’lheelhsham pa nilhĉacuĵayasha. Yishi’ napi lhech ĉaaĵ napi yitô’yish jum na Biblia ti vanujumatsinesh ti yen shta pa Dios pava lhĉlôi tashinshtas. Etônch’e na 1 Pedro 5:2, 3.

Napi nifaqu’in pa Jeova vataasĉlanesha’ne ĉa nanfaĉleem pap’elh nava isis tô’lha na Biblia chi’ ĉa nasnatesh papi vat’eiĵatsĵanĵas. Nan lhjunash papi vatĉachenĵas vanqu’eiĵatsĵan ti yi’ei pava jpôiĵei (Hechos 20:20). Yen ĉa nefenesh ĉa nivantôyitesh na Biblia papi yen pa yijô’. Ninasheesh yishi’ pa tc’ashamsha’ne vooi ti lhjunashjulh papi lhave’lhavot ti vanensha’ne chi ti ĉaaĵem pava isis tô’lha pa Lhtata (2 Tesalonicenses 1:3). Napi nifaqu’in pa Jeova uĵ ti ĉ’usemvatsham’in lhayaash ti vataasĉlanesha’ne ĉa nanshamitĵat pa Dios chi’ ĉa nefen pap’elh. Etônch’e na Salmo 33:12 chi’ na Hechos 20:35.