¿Achike ruma rukʼamon natijoj na awiʼ chi rij ri Biblia?

1. ¿Achike rubʼanik yarutoʼ ri natijoj awiʼ chi rij ri Biblia?

Qitzij na wi, ri naʼoj chi rij ri Biblia ri xeʼawetamaj chupam re wuj reʼ xubʼän chawe chi xkʼiyïr ri awajowabʼäl chi rij ri Jehová. Wakami, nkʼatzin kʼa chi man ntewür ta qa ri ajowabʼäl riʼ (1 Pedro 2:2). Ri kʼaslem man kʼisel ta xa xe xtawïl we yakʼojeʼ chunaqaj ri Jehová. Ri tijonïk chi rij ri Biblia yarutoʼ rikʼin riʼ. Tasikʼij Juan 17:3; Judas 21.

Toq más nawetamaj chi rij ri Dios nkʼojeʼ más akuqubʼabʼäl kʼuʼx. Ri kuqubʼabʼäl kʼuʼx riʼ yarutoʼ richin nabʼän ri nrajoʼ rijaʼ (Hebreos 11:1, 6). Ri kuqubʼabʼäl kʼuʼx nubʼän chawe chi ntzolin pe akʼuʼx chuqaʼ chi najäl rubʼanik ri akʼaslem. Tasikʼij Hechos 3:19.

2. ¿Achike rubʼanik yeʼatoʼ ri chʼaqa chik winaqiʼ?

Rikʼin bʼaʼ rat narayibʼej natzijoj chi ke chʼaqa chik winaqiʼ ri awetaman. Qitzij na wi, qonojel ütz nqanaʼ nqatzijoj ri nqetamaj. Toq najin nawetamaj chi rij ri Ruchʼabʼäl ri Dios nawetamaj chuqaʼ nakusaj ri Biblia richin natzijoj ri Jehová chuqaʼ ri utziläj taq rutzijol. Tasikʼij Romanos 10:13-15.

Ütz natikirisaj el kikʼin awachʼalal chuqaʼ awachibʼil. Choj pa rutzil tatzijoj, chuqaʼ man taqasaj kiqʼij ri winaqiʼ. Pa rukʼexel nabʼij chi ke chi man ütz ta ri naʼoj kiniman, tatzijoj ri urtusanïk xkerukʼäm pe ri Dios pa qawiʼ. Toqa chawe chi ja ri anaʼoj ri más xtkitzʼët ri winaqiʼ, man ja ta ri atzij. Tasikʼij 2 Timoteo 2:24, 25.

3. ¿Achike rubʼanik más ütz xtakʼwaj awiʼ rikʼin ri Dios?

Ri natijoj awiʼ chi rij ri Biblia yarutoʼ richin kow yakʼojeʼ pa ruchʼabʼäl ri Dios chuqaʼ nubʼän chi más ütz nakʼwaj awiʼ rikʼin ri Dios. Rat xkatikïr xkatok jun chi ke ri ruwinaq ri Dios. Tasikʼij 2 Corintios 6:18.

4. ¿Achike yatoʼon richin nkʼojeʼ más awetamabʼal?

Mani nayaʼ kan ri atijonïk chi rij ri Biblia (Hebreos 5:13, 14). Tabʼij chi re jun testigo de Jehová chi tuyaʼ jun atijonïk rikʼin ri wuj ¿Achike qas nukʼüt ri Biblia? Toq nkʼojeʼ más awetamabʼal, más kikotem xtanaʼ pa akʼaslem. Tasikʼij Salmo 1:1-3; 73:27, 28.

Ri utziläj taq rutzijol e petenäq rikʼin ri Jehová, ri Dios ri kʼo kikotem rikʼin. Rat yatikïr yajel apo rikʼin rijaʼ we yabʼe ri pa taq kimolojriʼïl ri rusamajelaʼ (Hebreos 10:24, 25). We xa xe retal xtabʼän ri rurayibʼal ri Jehová xtawïl ri qitzij kʼaslem ri man kʼisel ta. Qitzij na wi, ri más ütz ri yatikïr nabʼän ja ri yajel apo rikʼin ri Dios. Tasikʼij 1 Timoteo 1:11; 6:19.