Yojroyoj ri Tataʼixel richin yojok rachibʼil

Ri Tataʼixel nurayij yojok rachibʼil. ¿Awetaman wi rat chi yatikïr yatok rachibʼil ri nimaläj Winäq kʼo chuwäch ri kaj chuqaʼ Ruwachʼulew? Ri Abrahán, jun achin xkʼojeʼ ojer kan riʼ, xbʼix rachibʼil ri Tataʼixel chi re (Santiago 2:23, Ri Cʼacʼaʼ Retal tzij richin ri Kanimajaval Jesucristo). Ri Ruchʼabʼäl ri Ajaw nchʼon chuqaʼ chi kij chʼaqa chik (nikʼaj chik) achiʼaʼ, ixoqiʼ ri xeʼok chuqaʼ rachibʼil ri Tataʼixel. Rijeʼ kʼïy urtusanïk xyaʼöx chi ke ruma ri Tataʼixel. Wakami, ronojel ruwachʼulew, e kʼïy winäq e okinäq rachibʼil ri Tataʼixel. Rat chuqaʼ yatikïr yatok rachibʼil.

Ri achibʼilanïk nuyaʼ ri Tataʼixel nïm ruqʼij chuwäch ri nuyaʼ jun winäq. Ri Tataʼixel majun bʼey xkeruqʼol ta ri choj taq rachibʼil (Salmo 18:25). Yatok rachibʼil ri Tataʼixel, nïm ruqʼij chuwäch ri nkʼojeʼ abʼeyomäl. Toq yekäm ri bʼeyomaʼ xa jun chik winäq nukʼwan ri kipwäq. Ja kʼa ri e rachibʼil ri Tataʼixel, kʼo kʼa jun kibʼeyomäl ke majun achike ta xtmajon chi ke (Mateo 6:19).

Rikʼin jubʼaʼ e kʼo winäq man nkajoʼ ta nawetamaj chi rij ri nukʼüt ri Tataʼixel. Rikʼin jubʼaʼ jujun chi ke ri awachibʼil chuqaʼ awachʼalal xkebʼanon (Mateo 10:36, 37). We kʼo ta jun ntzeʼen chawij, chuqaʼ yaruxibʼij ta, tabʼanaʼ qa chawäch re jun kʼutunïk reʼ: «¿Achike kʼa ninwajoʼ ninnimaj, ja ri Tataʼixel o ja ri winäq?». Tachʼobʼoʼ (tanukuʼ) na pe reʼ: we kʼo ta jun nbʼin chawe, mani chik yawaʼ, ¿nanimaj re tzij reʼ? Manäq na wi. Ruma richin oj kʼäs kʼo chi yojwaʼ. Ri Tataʼixel ntikïr nuyaʼ akʼaslem richin jantapeʼ (chi jumul). Ruma kʼa riʼ mani natanabʼaʼ kan ri atijonik; ke riʼ nawetamaj kʼa achike rubʼeyal yatok rachibʼil ri Tataʼixel. Majun kʼa achike tqʼaton awichin (Juan 17:3).