TANAJ 10
¿Achike ruma ütz namöl awiʼ kikʼin ri testigos de Jehová?
¿La bʼin chawe chi ütz yatapon pa kimolojriʼïl ri testigos de Jehová? We majun bʼey at bʼenäq ta, rikʼin bʼaʼ ri nabʼey mul naxibʼij bʼa awiʼ. Rikʼin bʼaʼ nakʼutuj qa chawäch: «¿Achike nkibʼän ri testigos toq nkimöl kiʼ? ¿Achike ruma nkiyaʼ janila kejqalem ri kimoloj? ¿La rukʼamon chi yibʼe yin chuqaʼ?». Chupam re jun tanaj reʼ xtawetamaj chi ri molojriʼïl riʼ xtubʼän chi xtkowïr ri awachibʼilanik rikʼin ri Dios chuqaʼ xkarutoʼ pa akʼaslem.
1. ¿Achike ruma nkimöl kiʼ ri testigos de Jehová?
Jun chi ke ri xtzʼibʼan ri Biblia xubʼij achike ruma kʼo janila rejqalem ri nqamöl qiʼ, xubʼij: «Kan xtinyaʼ aqʼij Jehová chi kiwäch ri nuwinaq» (Salmo 26:12). Wakami, chuqaʼ ri testigos de Jehová nkimöl kiʼ, y reʼ janila nukikotisaj ri kanima. Chuwäch ronojel Ruwachʼulew, rijeʼ ronojel semanas nkimöl kiʼ richin nkiyaʼ ruqʼij ri Dios, richin yebʼixan chi re chuqaʼ richin yechʼon rikʼin. Chuqaʼ e kʼo jujun mul pa jun junaʼ nkibʼän pa nimaʼq taq moloj.
2. ¿Achike xtawetamaj pa qamolojriʼïl?
Ri qamolojriʼïl yechʼon chi rij ri Ruchʼabʼäl ri Dios, chuqaʼ nqʼalajrisäx chi kiwäch ri winaqiʼ achike nel chi tzij (tasikʼij Nehemías 8:8). We rat xkabʼe, xtawetamaj más chi rij ri Jehová chuqaʼ chi rij ri utziläj taq runaʼoj. Toq más xtqʼalajin chawäch chi rijaʼ yarajoʼ, más xtarayibʼej xkatok rachibʼil. Chuqaʼ xtqʼalajin chawäch achike rubʼanik rijaʼ ntikïr yarutoʼ richin ütz yabʼe pa akʼaslem (Isaías 48:17, 18).
3. ¿Achike rubʼanik xkatkitoʼ ri winaqiʼ ri xtawetamaj kiwäch pa qamoloj?
Ri Jehová nrajoʼ chi «tqakanoj kʼa achike rubʼanik nqabʼän richin nqatolaʼ qiʼ qonojel, richin nqetamaj yojajowan, y más ta nqarayij nqabʼän ri utziläj taq bʼanobʼäl. [...] Nkʼatzin nqamöl qiʼ» (Hebreos 10:24, 25). Chupam ri qamolojriʼïl, xtawetamaj kiwäch winaqiʼ ri janila nkajoʼ kiʼ y, achiʼel rat, rijeʼ nkajoʼ nketamaj más chi rij ri Dios. Chi riʼ xtawakʼaxaj naʼoj ri elesan chupam ri Biblia ri xtkikuqubʼaʼ akʼuʼx (tasikʼij Romanos 1:11, 12). Chuqaʼ xkatikïr xkatzijon kikʼin winaqiʼ ri e kʼulan o ri man e kʼulan ta ri kikʼowisan kʼïy kiwäch kʼayewal pa kikʼaslem. Y reʼ jujun achoj ruma ri nrajoʼ ri Jehová chi nqamöl qiʼ.
TQANIKʼOJ RIJ
Tqatzʼetaʼ achike nkibʼän ri testigos de Jehová pa kimolojriʼïl chuqaʼ achike ruma janila ütz ri namöl awiʼ kikʼin.
4. Ri kimolojriʼïl ri testigos de Jehová
Ri pa nabʼey siglo, ri cristianos rukʼulun wi chi ke nkimöl kiʼ richin nkiyaʼ ruqʼij ri Jehová (Romanos 16:3-5). Tisikʼij Colosenses 3:16 chuqaʼ kixchʼon chi rij reʼ:
¿Achike wi rubʼanik nkiyaʼ ruqʼij ri Jehová ri nabʼey taq cristianos?
Wakami, chuqaʼ ri testigos de Jehová jutaqïl nkimöl kiʼ richin nkiyaʼ ruqʼij ri Jehová. Richin nawetamaj achike yebʼan pa kimolojriʼïl, titzʼetaʼ ri VIDEO. Chi rij riʼ titzʼetaʼ jun wachibʼäl chi rij jun molojriʼïl chuqaʼ kixchʼon chi rij reʼ:
¿Achike junan yebʼan pa kimolojriʼïl ri Testigos rikʼin ri nubʼij ri Colosenses 3:16?
Achiʼel xatzʼët chupam ri video o chupam ri wachibʼäl, ¿la kʼo jun ri janila xqa chawäch chi rij ri qamolojriʼïl?
Tisikʼij 2 Corintios 9:7 chuqaʼ kixchʼon chi rij reʼ:
¿Achike ruma man nkʼutüx ta mero pa kimolojriʼïl ri testigos de Jehová?
Tatzʼetaʼ rikʼin ri nuyaʼ atijonïk, achoj chi rij xtchʼon jun chi ke ri moloj richin re semana reʼ.
¿Achike peraj chi rij ri molojriʼïl xqa más chawäch?
¿La awetaman rat reʼ?
Chupam ri jw.org xtawetamaj akuchi chuqaʼ jampeʼ yebʼan ri qamolojriʼïl chuwäch ronojel Ruwachʼulew.
Pa qamolojriʼïl yeyaʼöx tzijonem, nikʼüt achike rubʼanik ntzijöx ri Biblia chuqaʼ yeyaʼöx videos. Konojel ri molojriʼïl yetikïr chuqaʼ yekʼis rikʼin jun bʼix chuqaʼ jun chʼonïk rikʼin ri Dios.
E kʼo jujun peraj chi re ri qamoloj akuchi qonojel yojtikïr nqatzeqej qaqʼaʼ richin nqabʼij ri xqetamaj.
Konojel yetikïr yeʼapon: ixoqiʼ, achiʼaʼ, ri kʼo chik kijunaʼ chuqaʼ akʼwalaʼ...
Ri kimolojriʼïl ri testigos de Jehová majun natoj ta richin yatok apo. Chuqaʼ man nimöl ta mero.
5. Kʼo chi nqatïj qaqʼij richin yojkʼojeʼ pa qamolojriʼïl
Kojchʼobʼon chi rij ri ru-familia ri Jesús. Rijeʼ e kʼo wi pa Nazaret y richin yebʼe ronojel junaʼ pa templo chi laʼ pa Jerusalén kʼo chi yebʼiyin oxiʼ qʼij pa kʼayewaläj taq bʼey. Tisikʼij Lucas 2:39-42 chuqaʼ kixchʼon chi rij reʼ:
¿Nabʼij rat chi kʼayew xubʼän chi kiwäch ri xebʼe pa Jerusalén?
¿Achike kʼayewal nabʼij rat chi xtakʼowisaj richin xkatikïr xkabʼe pa molojriʼïl?
¿Nabʼij rat chi ütz xtukʼäm pe chawe ri xtaxïkʼ awiʼ richin yabʼe pa moloj? ¿Achike ruma?
Ri Biblia nukʼüt chi kʼo janila rejqalem ri nqamöl qiʼ richin nqayaʼ ruqʼij ri Jehová. Tisikʼij Hebreos 10:24, 25 chuqaʼ kixchʼon chi rij reʼ:
¿Achike ruma janila ütz ri nukʼuluj chi qe ri yojbʼe pa qamolojriʼïl?
E KʼO JUJUN NKIBʼIJ REʼ: «Richin nayaʼ ruqʼij ri Dios man nkʼatzin ta chi namöl awiʼ. Rat nachaʼ yakʼojeʼ pa jun religión o manäq».
¿Achike tzʼetbʼäl o texto nukʼüt ri Biblia chi rij ri nrajoʼ ri Jehová chi nqabʼän röj?
TQAKAMULUJ
Ri yabʼe pa molojriʼïl xtubʼän chawe chi xtawetamaj más chi rij ri Jehová, más xtkowïr awachibʼilanïk rikʼin rijaʼ chuqaʼ xtayaʼ ruqʼij kikʼin chʼaqa chik winaqiʼ.
Ri xawetamaj
¿Achike ruma ri Jehová nrajoʼ chi nqamöl qiʼ?
¿Achike xtawetamaj pa kimolojriʼïl ri testigos de Jehová?
¿Achike chik jun rubʼanik nabʼij rat chi xkarutoʼ ri yabʼe pa qamolojriʼïl?
RICHIN NAWETAMAJ MÁS
¿Naxibʼij bʼa awiʼ ri yabʼe pa molojriʼïl? Tatzʼetaʼ achike ruma jun achin xqa chuwäch ri molojriʼïl stapeʼ pa nabʼey ke riʼ chuqaʼ xunaʼ.
Tawetamaj ruwäch jun alaʼ ri janila ütz nunaʼ nbʼe pa moloj chuqaʼ achike kʼo chi xubʼän richin jantapeʼ xbʼe chupam.
Tasikʼij achike nkibʼij chʼaqa chik chi kij ri molojriʼïl.
«¿Achike ruma ütz namöl awiʼ akuchi nkimöl kiʼ ri testigos de Jehová?» (Reʼ xtawïl pa jw.org)
Tatzʼetaʼ achike rubʼanik xjalatäj rukʼaslem jun pandillero toq xumöl riʼ kikʼin ri testigos de Jehová.
«Jantapeʼ nukʼwalon wi nuqʼaqʼ» (La Atalaya, 1 de julio de 2014)