¿La e qitzij taq cristianos ri testigos de Jehová?

Röj ri testigos de Jehová qaniman chi oj qitzij taq cristianos. ¿Achike ruma? Tqatzʼetaʼ ruxeʼel ri qaniman pe chuqaʼ ri bʼiʼaj ri qakʼwan chuqaʼ tqatzʼetaʼ achike rubʼanik nqakʼüt ajowabʼäl chi qawäch.

1. ¿Akuchi kikʼamon el ri kinimanïk ri testigos de Jehová?

Ri Jesús xubʼij chi re ri Dios: «Ri achʼabʼäl ja riʼ ri qitzij» (Juan 17:​17). Röj ri testigos de Jehová nqabʼän achiʼel xubʼän ri Jesús: jantapeʼ chupam ri Ruchʼabʼäl ri Dios nqelesaj pe ri nqanimaj. Tatzʼetaʼ achike xbʼanatäj kikʼin ri testigos de Jehová pa qaqʼij. Chupam ri junaʼ 1870, jun molaj achiʼaʼ ri nkitijoj kiʼ chi rij ri Biblia xkinikʼoj rij ri Ruchʼabʼäl ri Dios. Rijeʼ chupam ri Biblia xkikʼäm el ri nkinimaj, stapeʼ ri nimanïk reʼ man e junan ta kikʼin ri nkikʼüt ri iglesias. Rijeʼ xkitzijoj chi ke ri chʼaqa chik ri najin wi nketamaj.a

2. ¿Achike ruma testigos de Jehová ri qabʼiʼ?

Ri Jehová nubʼij chi ke ri winaqiʼ ri nkiyaʼ ruqʼij chuqaʼ nkitzijoj ri qitzij chi rij rijaʼ chi e ruqʼalajrisanelaʼ o testigos (Hebreos 11:​4-​12:1). Jun tzʼetbʼäl, ojer kan ri Dios xubʼij chi ke ri rutinamit: «Rïx ix nuqʼalajrisanelaʼ [o nu-testigos]» (tasikʼij Isaías 43:​10 TNM). Chuqaʼ chi re ri Jesús nbʼïx chi rijaʼ «nuqʼalajrisaj ri qitzij» (Apocalipsis 1:5). Ruma riʼ pa 1931 xqachaʼ ri bʼiʼaj testigos de Jehová. Janila yojkikot ri qakʼwan ri bʼiʼaj riʼ.

3. ¿Achike rubʼanik nkikʼüt ri testigos de Jehová chi yeʼajowan achiʼel xukʼüt kan ri Jesús?

Ri Jesús janila wi yerajoʼ ri rutzeqelibʼey ruma riʼ chuwäch rijaʼ e achiʼel ri ru-familia (tasikʼij Marcos 3:​35). Ri testigos de Jehová chuqaʼ junan qawäch qabʼanon, oj achiʼel jun nimaläj familia chuwäch ronojel Ruwachʼulew. Y ruma riʼ nqabʼij chi qawäch «qachʼalal» (Filemón 1, 2). Chuqaʼ, nqanimaj re tzij reʼ: «Keʼiwajoʼ konojel ri qachʼalal» (1 Pedro 2:​17 TNM). Röj ri testigos de Jehová jalajöj rubʼanik nqakʼüt ri ajowabʼäl; jun chi ke riʼ ja ri yeqatoʼ ri qachʼalal ri e kʼo chuwäch ronojel Ruwachʼulew toq nkikʼowisaj kʼayewal.

TQANIKʼOJ RIJ

4. Ronojel ri nqanimaj qelesan pe chupam ri Biblia

Ri Jehová rubʼin kan chi ri qitzij chi rij ri Biblia más jebʼël xtapon pa qawiʼ. Tisikʼij Daniel 12:4 chuqaʼ kixchʼon chi rij reʼ:

• ¿Achike ri kan «xtbʼe kʼa pa jotöl» kikʼin ri rusamajelaʼ ri Dios toq xtkinikʼoj rij ri Biblia?

Tatzʼetaʼ achike rubʼanik xkinikʼoj rij ri Ruchʼabʼäl ri Dios jun molaj winaqiʼ ri nkitijoj wi kiʼ ri chi rij ri Biblia, kikʼin rijeʼ xkʼojeʼ ri Charles Russell. Titzʼetaʼ ri VIDEO chuqaʼ kixchʼon chi rij reʼ:

VIDEO: Xilitäj ri qitzij chi rij ri Biblia (7:​45)

• Achiʼel xqatzʼët pa video, ¿achike rubʼanik nkinikʼoj wi rij ri Ruchʼabʼäl ri Dios ri Charles Russell chuqaʼ ri chʼaqa chik rachibʼil?

¿La awetaman rat reʼ?

Kʼo mul, qajalon bʼaʼ jujun naʼoj ri nqanimaj. ¿Achike ruma? Ruma ri Dios eqal eqal nuyaʼ qʼij chi qe richin nqʼax pa qawiʼ ri Ruchʼabʼäl, achiʼel nubʼän ri qʼij nimaqʼaʼ ri eqal eqal nusaqirisaj pe ronojel (tisikʼij Proverbios 4:​18). Stapeʼ ri Biblia man njalatäj ta ri naʼoj e kʼo chupam, röj nqajäl jujun chi ke ri nqanimaj toq más nqʼax pa qawiʼ ri naʼoj riʼ.

5. Nqatzijoj ri qitzij chi rij ri Jehová

VIDEO: Jun bʼiʼaj ri nchʼon chi rij ri qasamaj (2:​40)

• ¿Achike ruma janila ütz ri bʼiʼaj testigos de Jehová?

¿Achike ruma ri Jehová e ruchaʼon winaqiʼ richin nkiqʼalajrisaj ri rubʼiʼ? Ruma kʼïy tzʼukun taq tzij bʼin chi rij ri Jehová, re winaqiʼ re nkitzijoj ri qitzij chi rij rijaʼ. Tqatzʼetaʼ jujun chi ke ri tzʼukun taq tzij reʼ.

E kʼo jujun religiones nkikʼüt chi ri Dios nrajoʼ chi nikusäx tyoxiʼ richin niyaʼ ruqʼij. Ja kʼa ¿la kan qitzij reʼ? Tisikʼij Levítico 26:1 chuqaʼ kixchʼon chi rij reʼ:

• Achiʼel nubʼij re versículo reʼ, ¿achike ri qitzij? ¿Achike nuchʼöbʼ ri Dios chi kij ri tyoxiʼ?

E kʼo ukʼwäy taq bʼey pa taq religiones ri nkikʼüt chi ri Jesús junan ruwäch rikʼin ri Dios. Ja kʼa ¿la qitzij reʼ? Tisikʼij Juan 20:​17 chuqaʼ kixchʼon chi rij reʼ:

• Achiʼel nubʼij re versículo reʼ, ¿achike ri qitzij? ¿La junan ri Dios rikʼin ri Jesús?

• ¿Achike nanaʼ rat ri nawetamaj chi ri Jehová e rutaqon winaqiʼ richin nkiqʼalajrisaj ri qitzij chi rij rijaʼ chuqaʼ chi rij ri Rukʼajol?

6. Nqajowalaʼ qiʼ chi qawäch

Ri Biblia yerujunumaj ri cristianos rikʼin jujun peraj richin ri qachʼakul. Tisikʼij 1 Corintios 12:​25, 26 chuqaʼ kixchʼon chi rij reʼ:

• ¿Achike najowatäj chi nkibʼän ri qitzij taq cristianos toq ri kachibʼil nkïl jun kʼayewal?

• Rikʼin ri atzʼeton rat, ¿achike rubʼanik nkikʼüt ri testigos de Jehová chi kan nkajoʼ kiʼ?

Toq ri testigos de Jehová ri e kʼo pa jun tinamït nkikʼowisaj jun kʼayewal, ri kachibʼil ri e kʼo pa chʼaqa chik tinamït chanin yekitoʼ. Richin nitzʼët jun tzʼetbʼäl, titzʼetaʼ ri VIDEO. Chuqaʼ kixchʼon chi rij reʼ:

VIDEO: Ri Haití nuköchʼ ri kaqʼiqʼ jöbʼ rubʼiniʼan Matthew (5:​29)

• Ri testigos de Jehová yekitoʼ ri kachibʼil toq nkïl jun nïm kʼayewal, ¿la nukʼüt reʼ chi kan janila nkajoʼ kiʼ? ¿Achike ruma?

TQAKAMULUJ

Ri testigos de Jehová e qitzij taq cristianos. Röj oj jun familia qabʼanon chuwäch ronojel Ruwachʼulew ri nqayaʼ ruqʼij ri Dios, chupam ri Biblia qelesan pe ri nqanimaj chuqaʼ nqakʼüt ri qitzij chi rij ri Jehová.

Ri xawetamaj

• ¿Achike ruma testigos de Jehová ri qabʼiʼ?

• ¿Achike rubʼanik nqakʼüt chi nqajowalaʼ qiʼ chi qawäch?

• ¿Nabʼij rat chi ri testigos de Jehová e qitzij taq cristianos?

RICHIN NAWETAMAJ MÁS

Tawetamaj más chi qij röj.

Los testigos de Jehová: una historia de fe viva. Parte 1: Salen de la oscuridad (1:​00:​53)

Ri testigos de Jehová kiqʼalajrisan kʼïy tzʼukun taq naʼoj ri nkikʼüt ri winaqiʼ. Tatzʼetaʼ jun chi ke riʼ.

Ri rutinamit ri Dios nuyaʼ ruqʼij ri rubʼiʼ ri Jehová (7:​08)

Tawetamaj ri qitzij chi rij jujun chi ke ri akʼutunïk chi kij ri testigos de Jehová.

«Ri kʼutunïk yebʼan chi kij ri testigos de Jehová» (Peraj ri kʼo chupam ri jw.org)

Ri Stephen kʼïy itzelal xerubʼän ruma itzel xerutzʼët ri chʼaqa chik. Tatzʼetaʼ achike xutzʼët chi kij ri testigos de Jehová ri xubʼän chi re chi xujäl rukʼaslem.

«Najin wi ntzelatäj más ri nukʼaslem» (La Atalaya, 1 de julio de 2015)