-
¿Achike ri ru-Reino ri Dios?¿Xtawïl rat ri kʼaslem ri man kʼisel ta? Tawetamaj achike nubʼij ri Biblia
-
-
TANAJ 31
¿Achike ri ru-Reino ri Dios?
Ri Biblia janila nchʼon chi rij ri ru-Reino ri Dios. Rikʼin ri Reino riʼ, ri Jehová xtitikïr xtubʼän ri xrajoʼ pa ruwiʼ ri Ruwachʼulew pa nabʼey. ¿Achike ri Reino riʼ? ¿Achike ruma qetaman chi najin nqʼaton tzij? ¿Achike samaj rubʼanon pe? ¿Chuqaʼ achike xtubʼän chi qawäch apo? Re kʼutunïk reʼ xkeqʼalajrisäx chupam re tanaj reʼ chuqaʼ chupam ri kaʼiʼ chik tanaj.
1. ¿Achike ri ru-Reino ri Dios chuqaʼ achike ri nqʼaton tzij?
Ri ru-Reino ri Dios jun qʼatbʼäl tzij ri xuyaʼ kan ri Jehová. Ri Ruqʼatöy Tzij ja ri Jesucristo rijaʼ nqʼaton tzij chi laʼ chi kaj (Mateo 4:17; Juan 18:36). Ri Biblia nubʼij chi: «Ri ruqʼatbʼäl tzij [ri Jesús] richin tbʼe qʼij tbʼe säq» (Lucas 1:32,33). Ruma rijaʼ ri nqʼaton tzij pa ru-Reino ri Dios, xtuqʼät tzij pa kiwiʼ konojel ri winaqiʼ chuwäch ri Ruwachʼulew.
2. ¿Achike yeqʼaton tzij rikʼin ri Jesús?
Ri Jesús man ruyon ta nqʼaton tzij. Rikʼin rijaʼ e kʼo winaqiʼ ri «jalajöj ijatzul, chʼabʼäl, tinamït y ri ruwachʼulew» (Apocalipsis 5:9, 10). ¿Jampeʼ winäq xkeqʼaton tzij rikʼin ri Jesús? Toq rijaʼ xpe chuwäch ri Ruwachʼulew kʼa wakami, pa millón chi winaqiʼ xkitzeqelibʼej rijaʼ. Ja kʼa xa xe e 144.000 chi ke ri winaqiʼ riʼ xkebʼe chi laʼ chi kaj richin xtkiqʼät tzij rikʼin ri Jesús (tasikʼij Apocalipsis 14:1-4). Ri chʼaqa chik cristianos xkeʼok ruwinaq ri ru-Reino ri Dios waweʼ chuwäch ri Ruwachʼulew (Salmo 37:29).
3. ¿Achike ruma ri ru-Reino ri Dios más ütz chuwäch ri kiqʼatbʼäl tzij ri winaqiʼ?
Stapeʼ e kʼo qʼatöy taq tzij ri nkajoʼ nkibʼän ri ütz, man yetikïr ta nkibʼän ronojel ri nkajoʼ. Toq yeqʼax ri junaʼ e kʼo chʼaqa chik ri yekanäj kan pa kikʼexel, man kan ta nkiyaʼ rejqalem ri kiwinaq. Ja kʼa ri Jesús, ri Qʼatöy Tzij chupam ri ru-Reino ri Dios, majun jun ta ri xtkʼojeʼ pa rukʼexel. Ri Dios xubʼän chi ri Qʼatbʼäl Tzij riʼ «majun xtwulan richin» (Daniel 2:44). Toq ri Jesús xtuqʼät tzij pa ruwiʼ ri Ruwachʼulew, rijaʼ man xkeruchaʼ ta ri winaqiʼ. Ri Jesús jebʼël runaʼoj, janila najowan chuqaʼ kan pa rubʼeyal nubʼän chi re ronojel y rijaʼ xtukʼüt chi ke ri winaqiʼ achike rubʼanik xtkikʼüt ri naʼoj riʼ chuqaʼ (tasikʼij Isaías 11:9).
TQANIKʼOJ RIJ
Tqatzʼetaʼ achike ruma ri ru-Reino ri Dios más ütz chi kiwäch ri kiqʼatbʼäl tzij ri winaqiʼ.
4. Jun Qʼatbʼäl Tzij ri xtukʼwan bʼey pa ruwiʼ ronojel Ruwachʼulew
Ri Jesucristo kʼo más ruchuqʼaʼ richin nqʼaton tzij chuwäch xa bʼa achike na qʼatöy tzij chi Ruwachʼulew. Tisikʼij Mateo 28:18 chuqaʼ kixchʼon chi rij reʼ:
¿Achike ruma ri ruqʼatbʼäl tzij ri Jesús más ütz chuwäch ruqʼatbʼäl tzij jun winäq?
Ri qʼatbʼäl taq tzij xa xe pa kiwiʼ jujun taq tinamït yeqʼaton tzij ja kʼa man jantapeʼ ta xkeqʼaton tzij chi riʼ. ¿La ke riʼ chuqaʼ xtbʼanatäj rikʼin ri ru-Reino ri Dios? Tisikʼij Daniel 7:14 chuqaʼ kixchʼon chi rij reʼ:
¿Achike ruma janila ütz ri nqetamaj chi ri ru-Reino ri Dios majun xtchüp ta ruwäch?
¿Achike ruma janila ütz chi xtqʼaton tzij pa ruwiʼ ronojel Ruwachʼulew?
5. Ri kiqʼatbʼäl tzij ri winaqiʼ kʼo chi yejal
¿Achike ruma nkʼatzin chi ri ru-Reino ri Dios nkʼojeʼ pa rukʼexel ri kiqʼatbʼäl tzij ri winaqiʼ? Titzʼetaʼ ri VIDEO chuqaʼ kixchʼon chi rij reʼ:
¿Achike kʼayewal kiyaʼon pe ri kiqʼatbʼäl tzij ri winaqiʼ?
Tisikʼij Eclesiastés 8:9 chuqaʼ kixchʼon chi rij reʼ:
¿Nabʼij rat chi ri ru-Reino ri Dios kʼo chi nkʼojeʼ pa rukʼexel ri kiqʼatbʼäl tzij ri winaqiʼ? ¿Achike ruma?
6. Ri yeqʼaton tzij chupam ri ru-Reino ri Dios ketaman ri nqanaʼ röj
Ruma ri Jesús, ri Qaqʼatöy Tzij, xok winäq chuqaʼ xkʼojeʼ chuwäch ri Ruwachʼulew kan retaman ri nqanaʼ (Hebreos 4:15). Ri Jehová e ruchaʼon e 144.000 achiʼaʼ chuqaʼ ixoqiʼ richin yeqʼaton tzij rikʼin ri Jesús. Re winaqiʼ reʼ e richin «jalajöj ijatzul, chʼabʼäl, tinamït y ri ruwachʼulew» (Apocalipsis 5:9).
¿La nukuqubʼaʼ akʼuʼx chi ri Jesús chuqaʼ ri xkeqʼaton tzij rikʼin ketaman achike yeqaqʼasaj pa qakʼaslem? ¿Achike ruma?
Ri Jehová e ruchaʼon achiʼaʼ chuqaʼ ixoqiʼ ri jalajöj kijatzul richin nkiqʼät tzij rikʼin ri Jesús chi laʼ chi kaj.
7. Ri rupixaʼ ri ru-Reino ri Dios nukʼäm pe utzil pa qawiʼ
Ri qʼatbʼäl taq tzij nkiyaʼ pixaʼ richin yekitoʼ chuqaʼ yekichajij ri kiwinaq. Ri ru-Reino ri Dios kʼo chuqaʼ rupixaʼ y ri ruwinaq kʼo chi nkinimaj. Tisikʼij 1 Corintios 6:9-11 chuqaʼ kixchʼon chi rij reʼ:
¿Achike rubʼanik xtubʼän ri qakʼaslem toq konojel ri winaqiʼ xtkinimaj rupixaʼ ri Dios?a
¿Nabʼij rat chi ri Jehová kʼo achoj ruma ri nrajoʼ chi ri xkekʼojeʼ chupam ri ru-Reino nkinimaj ri rupixaʼ? ¿Achike ruma nabʼij ke riʼ?
¿Achike ruma qetaman chi ri winaqiʼ ri man nkinimaj ta re pixaʼ reʼ yetikïr nkijäl kikʼaslem? (Titzʼetaʼ ri versículo 11).
Ri qʼatbʼäl taq tzij yekiyaʼ pixaʼ richin yekitoʼ chuqaʼ yekichajij ri kiwinaq. Ri ru-Reino ri Dios e ruyaʼon pixaʼ ri más kejqalem chuwäch ri nkiyaʼ ri qʼatbʼäl taq tzij, re pixaʼ reʼ yekitoʼ chuqaʼ yekichajij ri winäq.
E KʼO JUJUN NKIBʼIJ REʼ: «Ri ru-Reino ri Dios naläx pe pa qanima».
¿Achike xtabʼij chi re?
TQAKAMULUJ
Ri ru-Reino ri Dios jun qitzij qʼatbʼäl tzij ri kʼo chi laʼ chi kaj chuqaʼ xtqʼaton tzij pa ruwiʼ ronojel Ruwachʼulew.
Ri xawetamaj
¿Achike ri xkeqʼaton tzij chupam ri ru-Reino ri Dios?
¿Achike ruma ri ru-Reino de Dios más ütz chuwäch xa bʼa achike qʼatbʼäl tzij ri kʼo pa kiqʼaʼ ri winaqiʼ?
¿Achike nrajoʼ ri Jehová chi nkibʼän ri xkekʼojeʼ chupam ri ru-Reino?
RICHIN NAWETAMAJ MÁS
Tasikʼij akuchi xubʼij ri Jesús chi xtkʼojeʼ ri ru-Reino ri Dios.
«¿La pa qanima kʼo ri ru-Reino ri Dios?» (Reʼ xtawïl pa jw.org)
¿Achike ruma ri testigos de Jehová nkiyaʼ más rejqalem ri nkinimaj rutzij ri ru-Reino ri Dios chuwäch ri kiqʼatbʼäl tzij ri winaqiʼ?
Tatzʼetaʼ achike nubʼij ri Biblia chi kij ri e 144.000 winaqiʼ e ruchaʼon ri Jehová richin xtkiqʼät tzij rikʼin ri Jesús.
¿Achike xbʼanon chi re jun ixöq ri xkʼojeʼ pa cheʼ richin xuyaʼ pa ranima chi xa xe ri Dios ntikïr nusöl ri kʼayewal chuwäch ri Ruwachʼulew?
«Xinwetamaj ri rubʼanik xkesolotäj ri kʼayewal» (¡Despertad!, noviembre de 2011)
a Chupam ri peraj 3 xkeqatzʼët jujun chi ke re naʼoj reʼ.
-
-
¡Ri ru-Reino ri Dios nqʼaton chik tzij!¿Xtawïl rat ri kʼaslem ri man kʼisel ta? Tawetamaj achike nubʼij ri Biblia
-
-
TANAJ 32
¡Ri ru-Reino ri Dios nqʼaton chik tzij!
Ri ru-Reino ri Dios xqʼaton pe tzij chi laʼ chi kaj pa 1914. Chupam ri junaʼ riʼ xetikïr pe ri rukʼisibʼäl taq qʼij chi ke ri kiqʼatbʼäl tzij ri winaqiʼ. ¿Achike ruma qetaman reʼ? Chupam re jun tanaj reʼ xtatzʼët achike rubʼin kan ri Biblia, achike najin yebʼanatäj wakami chuqaʼ achike kinaʼoj xkibʼän pe ri winaqiʼ toq xtikïr pe ri junaʼ 1914.
1. ¿Achike rubʼin kan ri Biblia?
Ri wuj Daniel kan rubʼin wi chik chi ri ru-Reino ri Dios xtqʼaton tzij toq xtkʼis jun tiempo ri nbʼïx chi re «wuquʼ junaʼ» (Daniel 4:16, 17). Kʼïy junaʼ chi rij riʼ, ri Jesús xubʼij chi ri tiempo riʼ ja riʼ «ri ki-tiempo ri winäq» ri man e judíos ta, chuqaʼ xukʼüt chi ri junaʼ riʼ majani wi tkʼis (Lucas 21:24 CR). Achiʼel xtqatzʼët, ri wuquʼ junaʼ xekʼis pa 1914.
2. Toq xtikïr pe ri junaʼ 1914, ¿achike bʼanatajnäq pe chuqaʼ achike kinaʼoj kibʼanon pe ri winaqiʼ?
Ri rutzeqelibʼey ri Jesús xkikʼutuj chi re: ¿Achike retal xtukʼüt chi qawäch chi najin chik yaqʼaton tzij chuqaʼ chi xtuchüp yan ruwäch ronojel? (Mateo 24:3). Ri Jesús xubʼij chi ke chi toq rijaʼ xtqʼaton tzij chi laʼ chi kaj chupam ri ru-Reino ri Dios xkekʼojeʼ chʼaʼoj, wayijal chuqaʼ kabʼraqän (tasikʼij Mateo 24:7). Ri Biblia chuqaʼ xubʼij chi ri kinaʼoj ri winaqiʼ chupam ri «rukisibʼäl taq qʼij» xtubʼän chi xkekʼojeʼ kʼïy kʼayewal (2 Timoteo 3:1-5). Re naʼoj chuqaʼ ri bʼanobʼäl reʼ más xeqatzʼët toq xtikïr pe ri 1914.
3. ¿Achike ruma toq xqʼaton pe tzij ri ru-Reino ri Dios más xekʼiyïr ri kʼayewal chuwäch ri Ruwachʼulew?
Toq ri Jesús xok Qʼatöy Tzij chupam ri ru-Reino ri Dios, kʼo jun oyowal xbʼanatäj chi laʼ chi kaj, rijaʼ xubʼän oyowal rikʼin ri Satanás chuqaʼ ri ru-demonios. Ri Satanás xchʼakatäj, ri Biblia nubʼij chi ri Satanás «xkʼaq kʼa pe chuwäch ri ruwachʼulew, e rachibʼilan ri itzel taq ru-ángel» (Apocalipsis 12:9, 10, 12). Ri Satanás yakatajnäq royowal ruma retaman chi xa bʼa chik apo xtchüp ruwäch. Ruma riʼ najin yeruyaʼ pa tijoj poqonal ri winaqiʼ chuwäch ri Ruwachʼulew. ¡Ruma riʼ kʼïy kʼayewal e kʼo wakami! Ja kʼa ri ru-Reino ri Dios xtukʼïs kiwäch ronojel ri kʼayewal reʼ.
TQANIKʼOJ RIJ
Tqatzʼetaʼ achike ruma qetaman chi pa 1914 xqʼaton pe tzij ri ru-Reino ri Dios chuqaʼ achike kʼo chi nqabʼän röj toq nqetamaj reʼ.
4. Ri profecías ri e kʼo chupam ri Biblia yojkikʼwaj pa 1914
Ri Dios xubʼän chi ri Nabucodonosor, jun qʼatöy tzij pa Babilonia, xubʼän jun achïkʼ ri kʼo nel chi tzij. Ri achïkʼ riʼ chuqaʼ ri xubʼij ri Daniel rukʼwan riʼ rikʼin ri ruqʼatbʼäl tzij ri Nabucodonosor chuqaʼ rikʼin ri ru-Reino ri Dios (tisikʼij Daniel 4:17).a
Tisikʼij Daniel 4:20-26. Chi rij riʼ tikusaj ri achibʼäl richin nuqʼalajrisaj re kʼutunïk reʼ:
A) ¿Achike xrachikʼaj ri Nabucodonosor? (Titzʼetaʼ ri versículos 20 chuqaʼ 21).
B) ¿Achike xtbʼanatäj rikʼin ri cheʼ? (Titzʼetaʼ ri versículo 23).
C) ¿Achike xtbʼanatäj toq xtkʼis ri «wuquʼ junaʼ»? (Titzʼetaʼ ri versículo 26).
Ri cheʼ ri xutzʼët ri Nabucodonosor chuqaʼ ri ru-Reino ri Dios
RI PROFECÍA (Daniel 4:20-36)
Qʼatbʼäl Tzij
A) Jun nimaläj cheʼ
Toq xqʼat ri Qʼatbʼäl Tzij
B) Tichoy ri nimaläj cheʼ chuqaʼ tiyaʼ qʼij chi keqʼax wuquʼ junaʼ
Toq xpabʼäx jun bʼey chik ri Qʼatbʼäl Tzij
C) Jun bʼey chik xkaqʼaton pe tzij
Ri nabʼey mul ri xtzʼaqät ri profecía:
D) ¿Achoj rikʼin nqajunumaj ri cheʼ? (Titzʼetaʼ ri versículo 22).
E) ¿Jampeʼ toq majun chik xqʼaton pe tzij? (Tisikʼij Daniel 4:29-33).
F) ¿Achike xbʼanatäj rikʼin ri Nabucodonosor toq xeqʼax yan ri «wuquʼ junaʼ»? (Tisikʼij Daniel 4:34-36).
RI NABʼEY MUL RI XTZʼAQÄT RI PROFECÍA
Qʼatbʼäl Tzij
D) Ri Nabucodonosor, ri qʼatöy tzij richin ri Babilonia
Toq xqʼat ri Qʼatbʼäl Tzij
E) Toq xikʼo ri junaʼ 606 a.c.b ri Nabucodonosor xchʼujïr ruma riʼ majun xtikïr ta xqʼaton tzij wuquʼ junaʼ
Toq xpabʼäx jun bʼey chik ri Qʼatbʼäl Tzij
F) Ri Nabucodonosor nkʼachoj chuqaʼ nqʼaton tzij jun bʼey chik
Ri rukaʼn mul ri xtzʼaqät ri profecía:
G) ¿Achoj kikʼin nqajunumaj ri cheʼ? (Tisikʼij 1 Crónicas 29:23).
H) ¿Jampeʼ toq man xeqʼaton ta chik tzij? ¿Achike ruma qetaman chi rijeʼ man yeqʼaton ta chik tzij toq ri Jesús xkʼojeʼ chuwäch ri Ruwachʼulew? (Tisikʼij Lucas 21:24).
I) ¿Akuchi chuqaʼ jampeʼ xpabʼäx jun bʼey chik re qʼatbʼäl tzij reʼ?
RI RUKAʼN MUL RI XTZʼAQÄT RI PROFECÍA
Qʼatbʼäl Tzij
G) Ri israelitas ri xeʼok qʼatöy taq tzij ri xechaʼöx kuma ri Dios
Toq xqʼat ri Qʼatbʼäl Tzij
H) Ri Jerusalén xuchüp ruwäch chupam ri junaʼ 607 a.c.; 2.520 junaʼ majun chik jun israelita ri xok qʼatöy tzij
Toq xpabʼäx jun bʼey chik ri Qʼatbʼäl Tzij
I) Ri Jesús xok Qʼatöy Tzij chi laʼ chi kaj chupam ri ru-Reino ri Dios pa 1914
¿Jampeʼ nyalöj ri wuquʼ junaʼ?
Jujun peraj chi re ri Biblia yojkitoʼ richin nqetamaj ri chʼaqa chik peraj ri e kʼo chupam. Jun tzʼetbʼäl, ri Apocalipsis nubʼij chi oxiʼ junaʼ rikʼin nikʼaj nel chi tzij 1.260 qʼij (Apocalipsis 12:6, 14). Reʼ nel chi tzij chi ri wuquʼ junaʼ, e 2.520 qʼij. Kʼo bʼey, ri Biblia, nukʼambʼej tzij chi jun qʼij achiʼel jun junaʼ (Ezequiel 4:6). Ja reʼ ri nbʼanatäj rikʼin ri «wuquʼ junaʼ» ri kʼo chupam ri wuj richin Daniel: nel chi tzij 2.520 junaʼ.
5. Pa 1914 xjalatäj ri kʼaslem chuwäch ri Ruwachʼulew
Ri Jesús xubʼij achike xkebʼanatäj chuwäch ri Ruwachʼulew toq rijaʼ xtqʼaton tzij. Tisikʼij Lucas 21:9-11 chuqaʼ kixchʼon chi rij reʼ:
Achiʼel xqasikʼij chupam ri texto, ¿achike ri atzʼeton o awakʼaxan chi najin yebʼanatäj?
Ri apóstol Pablo xubʼij achike kinaʼoj ri winaqiʼ chupam ri rukʼisibʼäl taq qʼij pa kiqʼatbʼäl tzij ri winaqiʼ. Tisikʼij 2 Timoteo 3:1-5 chuqaʼ kixchʼon chi rij reʼ:
Achiʼel xqasikʼij chupam ri texto, ¿achike kinaʼoj ri winaqiʼ atzʼeton rat?
6. Takʼutuʼ pa akʼaslem chi ri ru-Reino ri Dios nqʼaton chik tzij
Tisikʼij Mateo 24:3, 14 chuqaʼ kixchʼon chi rij reʼ:
¿Achike samaj ri kʼo rejqalem nukʼüt chi ri ru-Reino ri Dios nqʼaton chik tzij?
¿Achike ütz nabʼän richin yatoʼon chupam re samaj reʼ?
Ri ru-Reino ri Dios nqʼaton chik tzij, y xa bʼa chik apo xtqʼaton tzij pa ruwiʼ ronojel Ruwachʼulew. Tisikʼij Hebreos 10:24, 25 chuqaʼ kixchʼon chi rij reʼ:
¿Achike kʼo chi nqabʼän wakami ri qetaman chi oj kʼo chupam ri «rukʼisibʼäl taq qʼij»?
We kʼo jun nawetamaj chi xkerutoʼ ri chʼaqa chik chuqaʼ xkeruköl, ¿achike xtabʼän rikʼin riʼ?
E KʼO JUJUN NKIKʼUTUJ REʼ: «¿Achike ruma ri testigos de Jehová janila yechʼon chi rij ri junaʼ 1914?».
¿Achike xtabʼij rat?
TQAKAMULUJ
Ri profecías ri e kʼo chupam ri Biblia chuqaʼ ri nbʼanatäj chuwäch ri Ruwachʼulew nkikʼüt chi ri ru-Reino ri Dios nqʼaton chik tzij. Chuqaʼ qonojel nqakʼüt chi nqanimaj riʼ toq nqatzijoj chi rij ri Reino chuqaʼ toq nqamöl qiʼ pa qamoloj.
Ri xawetamaj
¿Achike xbʼanatäj toq xeqʼax yan ri wuquʼ junaʼ ri nubʼij chupam ri wuj Daniel?
¿Achike nbʼanon chawe chi nanimaj chi ri ru-Reino ri Dios xqʼaton pe tzij pa 1914?
¿Achike rubʼanik nakʼüt chi ri ru-Reino ri Dios nqʼaton chik tzij?
RICHIN NAWETAMAJ MÁS
Tatzʼetaʼ achike nkibʼij ri etamanelaʼ chi rij ri rubʼanik xjalatäj ri kʼaslem pa 1914.
«Ri rubʼanik xjalatäj ri kinaʼoj ri winaqiʼ» (¡Despertad!, abril de 2007)
Tatzʼetaʼ achike rubʼanik xjalatäj rukʼaslem jun achin toq xretamaj chi rij ri profecía ri kʼo chupam Mateo 24:14.
«Ütz wi ninnaʼ yinetzʼan ri béisbol» (La Atalaya, núm. 3 2017)
¿Achike ruma qetaman chi ri profecía ri e kʼo chupam ri capítulo 4 chi re ri wuj Daniel rukʼwan riʼ rikʼin ri ru-Reino ri Dios?
«¿Jampeʼ xqʼaton pe tzij ri ru-Reino ri Dios? (Nabʼey peraj)» (La Atalaya, 1 de octubre de 2014)
¿Achike ruma qetaman chi ri «wuquʼ junaʼ» ri nchʼon chupam ri capítulo 4 chi re ri wuj Daniel xebʼekʼis el pa 1914?
«¿Jampeʼ xqʼaton pe tzij ri ru-Reino ri Dios? (Rukaʼn peraj)» (La Atalaya, 1 de noviembre de 2014)
a Tasikʼij ri rukʼisibʼäl kaʼiʼ tzijonem chupam ri peraj «Richin nawetamaj más» richin re tanaj reʼ.
b Röj nqakusaj ri tzij a.c. richin nqabʼij antes de Cristo. Chuqaʼ ri tzij d.c. richin nqabʼij despúes de Cristo.
-
-
¿Achike xtukʼäm pe ri ru-Reino ri Dios pa qawiʼ?¿Xtawïl rat ri kʼaslem ri man kʼisel ta? Tawetamaj achike nubʼij ri Biblia
-
-
TANAJ 33
¿Achike xtukʼäm pe ri ru-Reino ri Dios pa qawiʼ?
Ri ru-Reino ri Dios nqʼaton yan tzij. Xa bʼa chik apo kʼïy ri xtujäl chuwäch ri Ruwachʼulew. Tqatzʼetaʼ jujun chi ke ri xtukʼäm pe ri ru-Reino ri Dios pa qawiʼ ri nbʼanon chi ke chi nkikot ri qanima.
1. ¿Achike xtubʼän ri ru-Reino ri Dios richin nkʼojeʼ chik ri uxlanem chuqaʼ ri chojmilal chuwäch ri Ruwachʼulew?
Toq xtpe ri Armagedón, ri Jesús, ri Qʼatöy Tzij chupam ri ru-Reino ri Dios, xtukʼïs kiwäch ri itzel taq winäq chuqaʼ ri kiqʼatbʼäl taq tzij (Apocalipsis 16:14, 16). Chupam ri qʼij riʼ, xtitzʼaqät ri nubʼij ri Biblia: «Jubʼaʼ apo chik, ri bʼanöy itzelal kan man xtkʼojeʼ ta chik» (Salmo 37:10). Rikʼin re Reino reʼ, ri Jesús xtuyaʼ ri uxlanem chuqaʼ ri chojmilal chuwäch ri Ruwachʼulew (tasikʼij Isaías 11:4).
2. ¿Achike xtubʼän apo ri kʼaslem toq xtbʼanatäj ri rurayibʼal ri Dios pa ruwiʼ ri Ruwachʼulew?
Chupam ri ru-Reino ri Dios, «ri choj kikʼaslem chuwäch ri Jehová xtkichinaj ri ruwachʼulew y kan xkekʼaseʼ kʼa chi riʼ richin jantapeʼ» (Salmo 37:29). ¡Ri qʼij riʼ xa xe utziläj taq winaqiʼ xkekʼojeʼ, xtkajoʼ ri Jehová chuqaʼ xtkajoʼ ri chʼaqa chik! Janila jebʼël ¿pejaʼ? Majun achike ta xtyawäj chuqaʼ konojel xkekʼaseʼ richin jantapeʼ.
3. ¿Achike xtubʼän ri ru-Reino ri Dios toq xtukʼïs kiwäch ri itzel taq winaqiʼ?
Toq xtukʼïs kiwäch ri itzel taq winaqiʼ, ri Jesús xtok Qʼatöy Tzij 1.000 junaʼ. Chupam ri junaʼ riʼ, ri Jesús chuqaʼ ri 144.000 ri winaqiʼ ri xkeqʼaton rikʼin, xkekitoʼ ri winaqiʼ richin xtel qa chi kij ri mak. Toq xkekʼis ri junaʼ riʼ, ri Ruwachʼulew xtbʼeʼok jun Kotzʼijaläj Ulew, y ri winaqiʼ kan xkekikot ruma xtkisamajij ri rupixaʼ ri Jehová. Ke riʼ, ri Jesús xtutzolij ri qʼatbʼäl tzij chi re ri Jehová, ri Rutataʼ. Chuqaʼ xtnimirisäx ri loqʼoläj rubʼiʼ ri Jehová (Mateo 6:9, 10). Chi riʼ xtqʼalajin chi ri Jehová jun utziläj qʼatöy tzij chuqaʼ chi nuchajij ri rutinamit. Chi rij riʼ ri Jehová xtukʼïs kiwäch ri Satanás, ri ru-demonios chuqaʼ xa bʼa achike na winäq ri man xtrajoʼ ta ri Ruqʼatbʼäl Tzij (Apocalipsis 20:7-10). Ronojel ri utzil ri xtukʼäm pe ri ru-Reino ri Dios xkekʼojeʼ richin jantapeʼ.
TQANIKʼOJ RIJ
Tqatzʼetaʼ achike ruma ütz nqakuqubʼaʼ qakʼuʼx chi ri Dios xtukusaj ri ru-Reino richin xtubʼän ronojel ri rusujun chi qe chupam ri Biblia.
4. Ri ru-Reino ri Dios xtukʼïs kiwäch ri qʼatbʼäl taq tzij chuwäch ri Ruwachʼulew
«Ri winaqiʼ nkʼojeʼ kuchuqʼaʼ richin nkibʼän ri itzelal chi ke ri kiwinaq» (Eclesiastés 8:9). Ri Jehová xtukusaj ri ru-Reino richin xtubʼän utzil ronojel ri itzelal ri xkibʼän ri winaqiʼ.
Tisikʼij Daniel 2:44 chuqaʼ 2 Tesalonicenses 1:6-8, chuqaʼ kixchʼon chi rij reʼ:
¿Achike xtkibʼän ri Jehová chuqaʼ ri Jesús, pa kiwiʼ ri kiqʼatbʼäl tzij ri winaqiʼ chuqaʼ ri yetoʼon kichin?
Rikʼin ri awetaman chi rij ri Jehová chuqaʼ ri Jesús, ¿achike nbʼanon chawe chi nanimaj chi rijeʼ kan pa rubʼeyal xkeqʼaton tzij?
5. Ri Jesús ja riʼ ri Qʼatöy Tzij ri más ütz
Toq ri Jesús xtqʼaton tzij pa ruwiʼ ri Ruwachʼulew xtuyaʼ kʼïy utzil pa kiwiʼ ri winaqiʼ. Titzʼetaʼ ri VIDEO richin nqatzʼët achike rubʼanik ri Jesús kan nrajoʼ yerutoʼ ri winaqiʼ chuqaʼ chi ri Dios ruyaʼon ruchuqʼaʼ richin nubʼän riʼ.
Ri xubʼän ri Jesús chuwäch ri Ruwachʼulew jun tzʼetbʼäl ri achike xtubʼän ri Reino chi qawäch apo. ¿Achike chi ke re utzil reʼ nawajoʼ nakʼül chi qawäch apo? Tisikʼij ronojel ri textos akuchi nkïl re utzil reʼ.
TOQ RI JESÚS XKʼOJEʼ CHUWÄCH RE RUWACHʼULEW...
TOQ RI JESÚS XTUQʼÄT TZIJ PA RUWIʼ RI RUWACHʼULEW...
... xuqʼät ruchuqʼaʼ ri kaqʼiqʼ jöbʼ (Marcos 4:36-41)
... xtrelesaj ronojel ri kʼayewal ri najin nkitzelaj ri Ruwachʼulew (Isaías 35:1, 2)
... kan pa mil ri winaqiʼ ri xerutzüq (Mateo 14:17-21)
... xtukʼïs ruwäch ri wayijal (Salmo 72:16)
... xerukʼachojrisaj o xeraqʼomaj ri yawaʼiʼ (Lucas 18:35-43)
... xtubʼän chi ri winaqiʼ majun chik xkeyawäj ta (Isaías 33:24)
... xerukʼasoj jujun ri e kaminäq el (Lucas 8:49-55)
... xtukʼïs ruwäch ri kamïk (Apocalipsis 21:3, 4)
6. Ri ru-Reino ri Dios xtuyaʼ jun utziläj kʼaslem
Ri Reino xtubʼän ronojel ri xrajoʼ wi ri Jehová pa kiwiʼ ri winaqiʼ pa nabʼey. Ri winaqiʼ xkekʼojeʼ chuwäch jun Kotzʼijaläj Ulew chuqaʼ xkekʼojeʼ chi riʼ richin jantapeʼ. Titzʼetaʼ ri VIDEO richin niwetamaj achike rubʼanik ri Jehová rukusan ri Rukʼajol, Jesús, richin xtubʼän ri rurayibʼal.
Tisikʼij Salmo 37:4 chuqaʼ kixchʼon chi rij reʼ:
¿Achike nanaʼ rat ri nawetamaj chi ri Jehová «xtuyaʼ chawe ri rurayibʼal ri awanima»?
E KʼO JUJUN NKIBʼIJ REʼ: «We qonojel nqayaʼ chi qawäch, yojtikïr nqachojmirisaj ri kʼayewal chuwäch ri Ruwachʼulew».
¿Achike kʼayewal ri man yetikïr ta nkisöl ri kiqʼatbʼäl tzij ri winaqiʼ xtusöl ri ru-Reino ri Dios?
TQAKAMULUJ
Ri ru-Reino ri Dios xtubʼän ronojel ri nrajoʼ ri Jehová. Xtubʼän chi ri Ruwachʼulew xtbʼeʼok jun Kotzʼijaläj Ulew chuqaʼ xkekʼojeʼ chi riʼ ri utziläj taq winäq ri xtkiyaʼ ruqʼij ri Jehová richin jantapeʼ.
Ri xawetamaj
¿Achike xtubʼän ri ru-Reino ri Dios richin xtuchʼajchʼojrisaj ri rubʼiʼ ri Jehová?
¿Achike ruma qakuqubʼan qakʼuʼx chi ri ru-Reino ri Dios xtubʼän ronojel ri sujun chupam ri Biblia?
Chi ke ronojel ri utzil xtukʼäm pe ri ru-Reino ri Dios, ¿achike nawajoʼ chi nbʼanatäj yan?
RICHIN NAWETAMAJ MÁS
Tawetamaj achike nel chi tzij ri Armagedón.
Tatzʼetaʼ achike xtbʼanatäj chupam ri mil junaʼ ri xtqʼaton tzij ri Jesús chuqaʼ ri xtbʼanatäj toq xkekʼis ri junaʼ riʼ.
¿Achike rubʼanik ri familias yetikïr nkichʼöbʼ achike xtubʼän ri ru-Reino ri Dios chi qawäch apo?
Tasikʼij ri peraj «Kʼïy wi nukʼutunïk» richin natzʼët achike rubʼanik jun político xrïl ri najin wi nukanoj.
«Ri Biblia xujäl kikʼaslem» (La Atalaya, 1 de enero de 2012)
-