TANAJ 20
¿Achike rubʼanik yebʼan ri samaj pa congregación?
Ri Jehová ütz nutzʼët ri kan pa rubʼeyal nbʼan ronojel (1 Corintios 14:33). Ruma riʼ kan ja riʼ chuqaʼ najowatäj chupam ri rutinamit. ¿Achike rubʼanik yebʼan ri samaj pa congregación? ¿Achike rubʼanik yojtikïr yojtoʼon richin kan pa rubʼeyal nbʼan ri samaj?
1. ¿Achike ukʼwayon bʼey pa ruwiʼ ri congregación?
«Ri Cristo ja riʼ ri kʼo pa ruwiʼ ri congregación» (Efesios 5:23 TNM). Ri Jesús nutzʼët chi laʼ chi kaj ronojel ri samaj ri nubʼän ri rutinamit ri Jehová chuwäch ronojel Ruwachʼulew. Rijaʼ xuchaʼ ri «kuqül rukʼuʼx samajel ri kan kʼo runaʼoj»: reʼ jun koʼöl molaj e ukʼwäy taq bʼey ri kʼïy yan junaʼ kiyaʼon ruqʼij ri Jehová, rijeʼ chuqaʼ nbʼïx chi ke ri Molaj Ukʼwäy Bʼey (tasikʼij Mateo 24:45-47). Achiʼel ri xkibʼän ri apóstoles chuqaʼ ri ukʼwäy taq bʼey ri xekʼojeʼ pa Jerusalén chupam ri nabʼey siglo, ri Molaj Ukʼwäy Bʼey ja riʼ ri e ukʼwayon bʼey pa kiwiʼ ri congregaciones chuwäch ri Ruwachʼulew (Hechos 15:2). Ja kʼa re achiʼaʼ reʼ man ja ta ri e rajaw ri rutinamit ri Dios. Rijeʼ nkikanoj rutoʼik ri Jehová chupam ri Ruchʼabʼäl, chuqaʼ nkinimaj ri rutzij ri Jesús.
2. ¿Achike samaj nkibʼän ri ukʼwäy taq bʼey?
Ri ukʼwäy taq bʼey, achiʼaʼ ri kan kʼïy chik junaʼ kiyaʼon ruqʼij ri Dios, nkikʼüt ri naʼoj ri e kʼo chupam ri Biblia chuqaʼ nkikuqubʼaʼ kikʼuʼx ri e kʼo chupam ri congregación. Re achiʼaʼ reʼ man e tojon ta. Pa rukʼexel riʼ, kan rikʼin kʼa ronojel kanima nkibʼän; man xa xe ta ruma kʼo chi nkibʼän, ni man xa xe ta chuqaʼ ruma chakoj (1 Pedro 5:1, 2). Ri ukʼwäy taq bʼey chuqaʼ yetoʼöx kuma ri toʼonelaʼ, rijeʼ chuqaʼ yetikïr yebʼeʼok ukʼwäy taq bʼey we nkibʼän ronojel ri najowatäj.
Ri Molaj Ukʼwäy Bʼey yeruchaʼ ukʼwäy taq bʼey richin yebʼekitzʼetaʼ ri congregaciones. Rijeʼ nkiyaʼ kitoʼik ri qachʼalal chuqaʼ nkikuqubʼaʼ kikʼuʼx. Chuqaʼ, rijeʼ yetikïr nkichaʼ achiʼaʼ richin yeʼok ukʼwäy taq bʼey chuqaʼ toʼonelaʼ we nkitzʼët chi rijeʼ najin chik nkibʼän ri nubʼij ri Biblia (1 Timoteo 3:1-10, 12; Tito 1:5-9).
3. ¿Achike chi samaj nkibʼän jujun Testigo?
Konojel chupam ri congregación nkiyaʼ ruqʼij «ri rubʼiʼ ri Jehová» toq nkimöl kiʼ. Chuqaʼ nkibʼän reʼ toq nkitzijoj ri Biblia chi ke ri winaqiʼ, ri jampeʼ na ramaj ri yetikïr nkibʼän (tasikʼij Salmo 148:12, 13).
TQANIKʼOJ RIJ
Tqatzʼetaʼ achike rubʼanik ri Jesús nukʼwaj qabʼey, achike rubʼanik ri ukʼwäy taq bʼey nkikʼäm kinaʼoj chi rij rijaʼ chuqaʼ achike rubʼanik yojtikïr yojsamäj junan rikʼin ri Jesús chuqaʼ kikʼin ri ukʼwäy taq bʼey.
4. Ri Jesús jun ukʼwäy bʼey ri nuyaʼ chʼuchʼujil
Ri Jesús nubʼij reʼ chi qe. Tisikʼij Mateo 11:28-30 chuqaʼ kixchʼon chi rij reʼ:
¿Achike nrajoʼ ri Jesús chi nqanaʼ röj ruma ri rubʼanik nukʼwaj qabʼey?
¿Achike rubʼanik nkikʼäm kinaʼoj chi rij ri Jesús ri ukʼwäy taq bʼey? Titzʼetaʼ ri VIDEO.
Ri Biblia nuqʼalajrisaj achike rubʼanik ri ukʼwäy taq bʼey kʼo chi nkibʼän ri kisamaj.
Tisikʼij Isaías 32:2 chuqaʼ 1 Pedro 5:1-3, chuqaʼ kixchʼon chi rij reʼ:
Ri Jesús nuyaʼ wi chʼuchʼujil chi ke ri chʼaqa chik. ¿Achike nanaʼ rat toq natzʼët chi ri ukʼwäy taq bʼey nkixïkʼ kiʼ richin ke riʼ chuqaʼ nkibʼän?
¿Achike chʼaqa chik rubʼanik nkikʼäm kinaʼoj ri ukʼwäy taq bʼey chi rij ri Jesús?
5. Ri ukʼwäy taq bʼey nkibʼän ri nkikʼüt
¿Achike rubʼanik nrajoʼ ri Jesús chi ri ukʼwäy taq bʼey nkitzʼët ri samaj nkibʼän? Titzʼetaʼ ri VIDEO.
Ri Jesús rubʼin kan achike kinaʼoj kʼo chi nkibʼän ri qachʼalal ri e ukʼwan bʼey pa congregación. Tisikʼij Mateo 23:8-12 chuqaʼ kixchʼon chi rij reʼ:
¿Achike nubʼij ri Biblia chi rij ri kinaʼoj ri kʼo chi nkibʼän ri ukʼwäy taq bʼey? ¿Nabʼij rat chi ri sacerdotes chuqaʼ ri chʼaqa ukʼwäy taq bʼey pa taq religiones nkibʼän achiʼel nubʼij ri Biblia?
Ri ukʼwäy taq bʼey nkikowirisaj ri kachibʼilanïk rikʼin ri Jehová chuqaʼ yekitoʼ ri ki-familia richin junan nkibʼän.
Ri ukʼwäy taq bʼey yekitoʼ konojel ri e kʼo pa congregación.
Ri ukʼwäy taq bʼey nkitzijoj ri Ruchʼabʼäl ri Dios.
Ri ukʼwäy taq bʼey nkikʼüt ri Ruchʼabʼäl ri Dios. Chuqaʼ yetoʼon richin nkichʼajchʼojrisaj akuchi yebʼan ri molojriʼïl chuqaʼ nkibʼän chʼaqa chik samaj.
6. Röj nqayaʼ qatoʼik chi ke ri ukʼwäy taq bʼey
Ri Biblia nubʼij achike ruma kʼo chi nqayaʼ qatoʼik chi ke ri ukʼwäy taq bʼey. Tisikʼij Hebreos 13:17 chuqaʼ kixchʼon chi rij reʼ:
¿Achike ruma nubʼij ri Biblia chi kʼo chi nqanimaj kitzij ri ukʼwäy taq bʼey? ¿La kʼïy samaj rukʼwan reʼ? ¿Achike ruma?
Tisikʼij Lucas 16:10 chuqaʼ kixchʼon chi rij reʼ:
¿Achike ruma kʼo rejqalem nqayaʼ qatoʼik chi ke ri ukʼwäy taq bʼey stapeʼ ri nkʼutüx chi qe xa xti bʼaʼ ok chi qawäch?
E KʼO JUJUN NKIBʼIJ REʼ: «Man nkʼatzin ta chi yabʼe pa jun religión».
¿Achike utzil nukʼäm pe chi qe ri nqayaʼ ruqʼij ri Dios pa jun congregación?
TQAKAMULUJ
Ri Jesús ja riʼ ri rukʼwan bʼey pa ruwiʼ ri congregación. Ri ukʼwäy taq bʼey nkinimaj ri rutzij, y röj rikʼin kikotem nqayaʼ qatoʼik chi ke ruma rijeʼ yojkichajij chuqaʼ nkibʼän ri nkikʼüt.
Ri xawetamaj
¿Achike ri rukʼwan bʼey pa ruwiʼ ri congregación?
¿Achike toʼïk nkiyaʼ ri ukʼwäy taq bʼey pa congregación?
¿Achike samaj nubʼän jujun testigo pa congregacion?
RICHIN NAWETAMAJ MÁS
Tatzʼetaʼ achike rubʼanik nukʼüt ri Molaj Ukʼwäy Bʼey chuqaʼ ri ukʼwäy taq bʼey chi janila yekajoʼ ri chʼaqa chik cristianos.
Nkikuqubʼaʼ kikʼuʼx ri qachʼalal toq yeyaʼöx pa kʼayewal (4:22)
Tawetamaj achike samaj nkibʼän ri ukʼwäy taq bʼey ri yebʼekitzʼetaʼ ri congregaciones.
Ri rukʼaslem jun ukʼwäy bʼey richin circuito pa näj taq tinamït (4:51)
Tasikʼij achike samaj nkibʼän ri ixoqiʼ pa congregación.
«Ri ixoqiʼ e testigos de Jehová, ¿achike samaj nkibʼän?» (La Atalaya, 1 de septiembre de 2012)
Tawetamaj achike rubʼanik ri ukʼwäy taq bʼey nkikanoj rubʼanik richin nkikuqubʼaʼ kikʼuʼx ri qachʼalal pa congregacion.
«Ri ukʼwäy taq bʼey, yojkitoʼ richin yojkikot» (La Atalaya, 15 de enero de 2013)