TANAJ 21
¿Achike rubʼanik najin ntzijöx ri utziläj taq rutzijol?
Xa bʼa chik apo ri Jehová xtukʼïs kiwäch ronojel ri kʼayewal ri e kʼo chuwäch ri Ruwachʼulew rikʼin ri ru-Reino. ¡Ruma riʼ röj nqajoʼ nqayaʼ ri utziläj rutzijol riʼ chi ke ri winaqiʼ! Ri Jesús xubʼij chi ke ri rutzeqelibʼey chi tkitzijoj ri utziläj rutzijol riʼ chi ke konojel ri winaqiʼ (Mateo 28:19, 20). ¿Achike najin nkibʼän ri testigos de Jehová richin nkinimaj rutzij ri Jesús?
1. ¿Achike rubʼanik nbʼan ri nubʼij chupam ri Mateo 24:14?
Ri Jesús xubʼij chi: «xttzijöx re utziläj rutzijol reʼ richin ri Ajawaren [o Reino] chuwäch ronojel ruwachʼulew» (Mateo 24:14 CR). Ri testigos de Jehová janila ütz nqanaʼ nqabʼän re jun samaj reʼ ri kʼo janila rejqalem. Nqatzijoj ri utziläj taq rutzijol pa más 1.000 chʼabʼäl chuwäch ronojel Ruwachʼulew. Reʼ kʼïy samaj rukʼwan. Ja kʼa xa xe rikʼin rutoʼik ri Jehová najin nbʼan re nimaläj samaj reʼ.
2. ¿Achike nqabʼän richin nqatzijoj ri Biblia chi ke ri winaqiʼ?
Nqatzijoj ri Biblia xa bʼa akuchi na e kʼo winaqiʼ. Y, achiʼel wi xkibʼän ri nabʼey taq cristianos, röj yojbʼe «chi taq jay» (Hechos 5:42). Reʼ jun rubʼanik ri yojtzijon kikʼin pa millón chi winaqiʼ junaʼ chi junaʼ. Ja kʼa ruma kʼïy bʼey majun e kʼo ta ri winaqiʼ pa taq kachoch chuqaʼ nqatzijoj ri Biblia xa bʼa akuchi yeʼikʼo ri winaqiʼ. Jantapeʼ nqakanoj rubʼanik richin nqatzijoj chi ke ri winaqiʼ chi rij ri Jehová chuqaʼ ri xtubʼän rijaʼ chi qawäch apo.
3. ¿Achoj chi ke yaʼon ri samaj richin ntzijöx ri utziläj taq rutzijol?
Konojel ri qitzij taq cristianos kʼo chi nkitzijoj ri utziläj taq rutzijol. Re samaj reʼ kʼo janila rejqalem chi qawäch. Ruma riʼ jampeʼ na ri yojtikïr nqabʼän röj nqatzijoj ri Biblia chi ke ri winaqiʼ ruma qetaman chi ja riʼ ri xtyaʼon ri kikʼaslem (tisikʼij 1 Timoteo 4:16). Ri samaj nqabʼän man ntoj ta chi qe, ruma ri Biblia nubʼij: «chi utzil xikʼül, chi utzil tiyaʼ» (Mateo 10:7, 8 CR). Stapeʼ man konojel ta ri winaqiʼ nkiyaʼ kixkïn chi qe, röj man nqayaʼ ta kan rutzijoxik ri Biblia ruma ja riʼ jun rubʼanik richin nqayaʼ ruqʼij ri Jehová chuqaʼ richin nqakikotisaj ranima.
TQANIKʼOJ RIJ
Tqatzʼetaʼ achike najin nkibʼän ri testigos de Jehová richin nkitzijoj ri Biblia chuwäch ronojel Ruwachʼulew chuqaʼ ri rubʼanik yojrutoʼ ri Jehová.
Nqatzijoj ri Biblia chuwäch ronojel Ruwachʼulew: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia.
4. Nqaxïkʼ qiʼ richin nqatzijoj ri Biblia chi ke konojel ri winaqiʼ
Ri testigos de Jehová nqaxïkʼ qiʼ richin nqatzijoj ri utziläj taq rutzijol chi ke ri winaqiʼ xa bʼa akuchi na e kʼo wi. Titzʼetaʼ ri VIDEO chuqaʼ kixchʼon chi rij reʼ:
¿Achike ri nqa más chawäch ri nqabʼän röj ri testigos de Jehová richin nqatzijoj ri Biblia?
Tisikʼij Mateo 22:39 chuqaʼ Romanos 10:13-15, chuqaʼ kixchʼon chi rij reʼ:
¿Achike ruma nqabʼij chi toq nqatzijoj ri Biblia nqakʼüt chi yeqajoʼ ri winaqiʼ?
¿Achike rubʼanik yerutzʼët ri Jehová ri nkitzijoj ri utziläj taq rutzijol? (Titzʼetaʼ ri versículo 15).
5. Yojtoʼon rikʼin ri Dios
Kʼo ri nbʼanatäj ri nkikʼüt chi qawäch chi ri Jehová rukʼwan bʼey pa ruwiʼ ri rutzijoxik ri Biblia. Tqatzʼetaʼ ri xbʼanatäj pa Nueva Zelanda. Kʼo jun tiqaqʼij, jun Testigo ri rubʼiʼ Paul xrïl jun ixöq toq najin wi nutzijoj ri Biblia chi taq jay. Ri nimaqʼaʼ riʼ, ri ixöq xchʼon rikʼin ri Dios chuqaʼ xukusaj ri rubʼiʼ, y xubʼij chi re chi tutoʼ richin nretamaj ruwäch. Ri Paul nubʼij: «oxiʼ horas chi rij riʼ yin xikʼojkʼot chuchiʼ ruxan».
Tisikʼij 1 Corintios 3:9 chuqaʼ kixchʼon chi rij reʼ:
¿Achike rubʼanik nukʼüt re tzʼetbʼäl reʼ chi ri Jehová najin rukʼwan bʼey pa ruwiʼ ri rutzijoxik ri Biblia?
Tisikʼij Hechos 1:8 chuqaʼ kixchʼon chi rij reʼ:
¿Achike ruma nkʼatzin rutoʼik ri Jehová richin nqatzijoj ri Biblia?
¿La awetaman rat reʼ?
Chupam ri molojriʼïl ri nbʼan chukojöl ri semana nikʼüt chi qawäch achike rubʼanik nqatzijoj ri Biblia. We rat at bʼenäq chupam jun chi ke ri qamoloj, ¿achike nabʼij rat chi rij ri rubʼanik ri nyaʼöx ri tijonïk chi qe?
6. Toq nqatzijoj ri Biblia nqakʼüt chi nqanimaj rutzij ri Dios
Ri pa nabʼey siglo, xekʼojeʼ winaqiʼ ri xkajoʼ xkiqʼät ri kisamaj ri rutzeqelibʼey ri Jesús. Ri cristianos riʼ xebʼe pa taq qʼatbʼäl tzij richin nyaʼöx qʼij chi ke ri nkitzijoj ri Biblia (Filipenses 1:7). Wakami, chuqaʼ ri testigos de Jehová kan ke riʼ chuqaʼ nkibʼän.a
Tisikʼij Hechos 5:27-42 chuqaʼ kixchʼon chi rij reʼ:
¿Achike ruma man xtqayaʼ ta kan rutzijoxik ri Biblia? (Titzʼetaʼ ri versículos 29, 38 chuqaʼ 39).
E KʼO JUJUN NKIKʼUTUJ REʼ: «¿Achike ruma ri testigos de Jehová yeʼel chi taq jay?».
¿Achike xtabʼij rat?
TQAKAMULUJ
Ri Jesús xubʼij chi ke ri rutzeqelibʼey chi tkitzijoj ri utziläj taq rutzijol chuwäch ronojel Ruwachʼulew. Ri Jehová najin nutoʼ ri rutinamit richin nkibʼän re samaj reʼ.
Ri xawetamaj
¿Achike najin nbʼan richin ntzijöx ri utziläj taq rutzijol chuwäch ronojel Ruwachʼulew?
¿Achike ruma nqabʼij chi toq nqatzijoj ri Biblia nqakʼüt chi yeqajoʼ ri chʼaqa chik?
¿Nabʼij rat chi ri rutzijoxik ri Biblia nubʼän chi yojkikot? ¿Achike ruma?
RICHIN NAWETAMAJ MÁS
Tatzʼetaʼ achike rubʼanik ri testigos de Jehová nkitzijoj ri Biblia pa taq nïm tinamït.
¿Achike rubʼanik ri testigos de Jehová nkitzijoj ri Biblia chi ke ri winaqiʼ ri e animajnäq pe pa kitinamit?
Tawakʼaxaj achike rubʼanik jun qachʼalal ixöq rukusan ronojel rukʼaslem richin nuyaʼ ruqʼij ri Jehová.
Ri testigos de Jehová e apoynäq chi kiwäch ri qʼatbʼäl taq tzij y kʼïy bʼey e chʼakoynäq. Tatzʼetaʼ jujun tzʼetbʼäl chi rij reʼ.
a Ja ri Dios rubʼin chi qe chi tqatzijoj ri Biblia. Ruma riʼ ri testigos de Jehová man nkʼatzin ta chi nyaʼöx qʼij chi qe kuma ri qʼatbʼäl taq tzij richin nqatzijoj ri utziläj taq rutzijol.