Maga Mayores​—Ayuda con el De Ustedes Maga Anak que Ama con Jehova

1-2. Explica si paquemodo el maga principio na Biblia posible queda mas importante para kanaton si cambia el diaton circumstancia.

NA DIA del diila casamiento, el hombre y mujer ta oi enbuenamente con el talk que base na Biblia acerca na matrimonio. Gendeh nuevo para kanila el maga principio que ta discuti na talk. Pero ahora, este maga principio hay queda mas importante para kanila. Porque? Cay aplica se sila como man maridable.

² Semejante se si el un Cristiano man maridable queda maga mayores. Por manada año, posible ya puede ya sila oi manada maga talk acerca si paquemodo hace engranda con el maga anak. Pero, este maga principio hay queda mas importante para kanila ciendo hay hace sila engranda con el diila mismo anak. Un grande responsibilidad se! Poreso si ta cambia el diaton circumstancia na vida, el cuanto maga principio na Biblia ta queda mas importante para kanaton. Uno este na maga razon si porque el maga siervo de Jehova ta le con el Biblia y como cosa ya manda na maga rey de Israel, ta medita con ese na diila “entero vida.”​—Deut. 17:19.

3. Cosa kita hay discuti na este articulo?

³ Maga mayores, tiene ustedes uno na de con todo grande privilegio que el un Cristiano puede tene​—enseña con el de ustedes maga anak acerca con Jehova. Pero, gendeh lang ustedes quierre que enseña kanila acerca con el diaton Dios. Quierre tambien ustedes que ayuda kanila para ama gayot con ele. Cosa ustedes puede hace para ama sila con Jehova? Na este articulo, hay discuti kita cuatro principio na Biblia que puede ayuda con ustedes como maga mayores. (2 Tim. 3:16) Hay mira tambien kita si paquemodo ya beneficia el cuanto maga Cristiano mayores cay ya aplica sila con el consejo na Biblia.

CUATRO PRINCIPIO QUE PUEDE AYUDA NA MAYORES

4. Cosa el un principio que puede ayuda con el maga mayores para ayuda con el diila maga anak que ama con Jehova? (Santiago 1:5)

⁴ Principio 1: Pidi el guia de Jehova. Pidi con Jehova que dale contigo el sabeduria que necesita tu para ayuda con el de tuyu maga anak que cultiva amor para con ele. (Le con el Santiago 1:5.) Ele el de con todo cualificao Persona para dale consejo. Manada razon si porque. Considera kita dos de ese. Una, si Jehova el de con todo experienciao mayores. (Sal. 36:9) Segundo, el maga consejo que ta dale le pirmi tiene maga beneficio.​—Isa. 48:17.

5. (a) Cosa ya dale el organizacion de Jehova para ayuda con el maga mayores? (b) Como cosa ya dale mira na video, cosa tu ya aprende na manera si paquemodo ya hace engranda si Hermano y Hermana Amorim con el diila maga anak?

⁵ Por medio na de suyu Palabra y na de suyu organizacion, ya dale si Jehova abundancia de espiritual comida que base na Biblia para ayuda contigo hace engranda con el de tuyu maga anak que ama con Jehova. (Mat. 24:45) Por ejemplo, puede tu incuntra maga practical consejo na serie “Ayuda Para na Familia” que puede le na magasin Awake! por cuanto año ya el ya pasa y ahora puede mira na diaton website. Tiene tambien manada maga video na jw.org que puede ayuda con el maga mayores aplica con el consejo de Jehova mientras ta hace sila engranda con el diila maga anak.b​—Prov. 2:4-6.

6. Cosa ta sinti el un tata acerca na guia que ya ricibi le y de suyu mujer estaba na organizacion de Jehova?

⁶ Manada mayores ya habla que ta aprecia sila el ayuda que ya dale si Jehova por medio na de suyu organizacion. El un tata que si Joe ya habla: “Gendeh facil hace engranda tres anak na verdad. Iyo y el de mio mujer pirmi ta reza con Jehova que ayuda kanamon. Y pirmi kame ta sinti que ya hace con el un articulo o video na exacto tiempo para ayuda kanamon enfrenta con el un situacion que ta experiencia kame. Pirmi kame ta confia na consejo de Jehova.” Si Joe y de suyu mujer ya puede discubri que este maga provision ya puede ayuda con el diila maga anak para queda cerca con Jehova.

7. Porque importante para na maga mayores que hace el todo para dale mira buen ejemplo? (Roma 2:21)

⁷ Principio 2: Queda buen ejemplo. El maga anak ta mira con el diila mayores y ta imita kanila. Siempre, nuay perfecto mayores. (Roma 3:23) Maskin pa ansina, el maga mayores debe hace el todo para dale mira buen ejemplo na diila maga anak. (Le con el Roma 2:21.) Acerca na maga anak, el un tata ya habla: “Dol igual sila na maga esponja que tan absorb maskin cosa.” Ele ya omenta: “Hay habla sila kanaton si nuay kita hace el maga cosas que ya enseña kita kanila.” Poreso si quierre kita que ama el diaton maga anak con Jehova, el diaton mismo amor para con ele necesita queda fuerte y claro ta puede mira el otro.

8-9. Cosa tu ya puede aprende na cosa ya habla si Andrew y si Emma?

⁸ Tiene manada manera que el maga mayores puede enseña con el diila maga anak que ama con Jehova. Nota si cosa ya habla el un 17 año hermano que si Andrew: “El de mio mayores pirmi ta enseña conmigo que bien importante que reza. Cada noche, si Papang ta reza junto conmigo maskin ya reza ya yo. El diamon maga mayores pirmi ta manda acorda kanamon: ‘Puede ustedes man cuento con Jehova maskin cuanto beses ustedes quierre.’ Por causa con ese, el rezo ya queda bien importante para conmigo. Ahora, facil ya lang conmigo para reza y sinti que si Jehova amo un Tata quien ta ama conmigo.” Maga mayores, no hace de menos con el influencia del de ustedes amor para con Jehova na de ustedes maga anak.

⁹ Considera tambien con el ejemplo de Emma. Cuando ya abandona el de suyu tata con el diila familia, manada le maga debe que ya deja que necesita paga el nana de Emma. Si Emma ya habla: “Manada tiempo que tan dificil si Mamang na financial pero pirmi le tan cuento acerca si paquemodo si Jehova ta cuida y ta dale el necesidad del de suyu maga siervo. Claro yo ta puede mira na manera si paquemodo le ta vivi que ta creé gayot le con ese. Ta aplica si Mamang con el cosa le ta predica.” El leccion? El maga mayores puede queda buen ejemplo maskin na maga dificil situacion.​—Gal. 6:9.

10. Cosa maga oportunidad tiene el maga Israelita mayores para man cuento con el diila maga anak? (Deuteronomio 6:6, 7)

¹⁰ Principio 3: Regular man cuento con el de tuyu maga anak. Ya manda si Jehova con el maga Israelita de antes que regular enseña con el diila maga anak acerca con ele. (Le con el Deuteronomio 6:6, 7.) Aquel maga mayores tiene manada oportunidad na entero dia para man cuento con el diila maga anak y ayuda kanila que ama con Jehova. Por ejemplo, el un bata Israelita hombre posible ayuda con el de suyu tata por cuanto hora na siembrada o cosecha. El de suyu hermana posible ayuda con el diila nana por manada hora que cuci camisa, teje y hace con el otro pa trabajo na casa. Mientras el maga mayores y anak ta trabaja junto, puede sila man cuento acerca na manada importante cosas. Por ejemplo, puede sila man cuento acerca si paquemodo de bueno si Jehova y si paquemodo le ta ayuda con el diila familia.

11. Cosa el un oportunidad que tiene el maga Cristiano mayores para man cuento con el diila maga anak?

¹¹ Ahora, diferente ya el vida contra de antes. Na manada lugar, el maga mayores y maga anak gendeh ta puede man junto na entero dia. El maga mayores posible talli na trabajo y el maga anak posible talli na escuela. Poreso, el maga mayores debe busca maga oportunidad para puede sila man cuento con el diila maga anak. (Ef. 5:15, 16; Fil. 1:10) Uno ya alli el de familia adoranza. El un joven hermano que si Alexander ya habla: “El de mio tata pirmi ta dale tiempo para na de familia adoranza y gendeh le ta permiti que tiene cosa sangga kanamon para hace se. Si acaba ya el de familia adoranza, tan cuento lang kame.”

12. Cosa debe acorda el cabeza del familia durante el de familia adoranza?

¹² Si etu el cabeza del familia, cosa tu puede hace para queda maka-alegre el de familia adoranza para na de tuyu maga anak? Puede ustedes estudia junto con el diaton nuevo publicacion Queda Alegre Hasta Para Cuando! Este libro ta dale un buen oportunidad para puede ustedes man cuento. Quierre tu que habla el de tuyu maga anak si cosa sila ta sinti y tan lingasa. Poreso, no usa con el tiempo de familia adoranza para man sermon o regaña kanila. Y pricura no rabia si tiene sila cosa habla que gendeh uyun na Biblia. Sino, queda alegre cay honesto sila y anima kanila que habla el cosa sila ta sinti. Puede lang tu ayuda con el de tuyu maga anak si sabe tu si cosa gayot sila ta sinti.

13. Cosa otro maga oportunidad tiene el maga mayores para ayuda con el diila maga anak queda cerca con Jehova?

¹³ Maga mayores, busca maga oportunidad cada dia para ayuda con el de ustedes maga anak queda cerca con Jehova. Gendeh mas ustedes debe espera con el de ustedes sesion de Bible study para enseña kanila acerca con el diaton amable Dios. Nota si cosa ya habla el un nana que si Lisa: “Ta usa kame con el maga creacion para enseña con el diamon maga anak acerca con Jehova. Por ejemplo, si el diamon perro ya hace un cosa que ya manda re con el diamon maga anak, ta habla kame kanila que ta dale este mira que un alegre Dios si Jehova y ya hace tambien le posible para kanaton que queda alegre.”

14. Porque importante para na maga mayores que ayuda con el diila maga anak que iscuji maga amigo enbuenamente? (Proverbio 13:20)

¹⁴ Principio 4: Ayuda con el de tuyu maga anak que iscuji maga buen amigo. Claro ta habla el Biblia que el diaton maga amigo ta puede influencia kanaton​—na bueno man o malo. (Le con el Proverbio 13:20.) Maga mayores, conoce ba ustedes con el maga amigo del de ustedes maga anak? Yan junto ya ba ustedes kanila? Cosa ustedes puede hace para ayuda con el de ustedes maga anak que tene maga amigo quien ta ama con Jehova? (1 Cor. 15:33) Puede ustedes ayuda kanila que tene maga buen amigo si invita ustedes con aquellos quien tiene buen espiritualidad para man junto na maga actividad del de ustedes familia.​—Sal. 119:63.

15. Cosa puede hace el maga mayores para ayuda con el diila maga anak que tene buen asosacion?

¹⁵ Considera con el experiencia del un tata que si Tony. Ele ya habla si cosa sila ya hace del de suyu mujer para ayuda con el diila maga anak incuntra maga buen amigo: “Por manada año, iyo y el de mio mujer ya invita na casa con el maga hermano y hermana que otro-otro el edad y background. Tan junto sila kanamon come y na diamon de familia adoranza. Un buen manera este para conoce con aquellos quien ta ama y ta sirvi con Jehova con alegria. Un grande privilegio que ya puede kame invita con el maga circuit overseer, misionario y otro pa para esta na diamon casa. Manada cosa ya aprende el diamon maga anak na maga experiencia que ya relata sila, na pagka-activo que ya dale sila mira y na diila maga sacrificio na servicio con Jehova. Todo este ya ayuda con el diamon maga anak para queda cerca con Jehova.” Maga mayores, queda determinao que ayuda con el de ustedes maga anak que tene buen asosacion.

NO PERDE ESPERANZA!

16. Paquemodo si el un anak ya habla que no quierre le sirvi con Jehova?

¹⁶ Paquemodo si ya hace tu el todo esfuerzo pero el uno del de tuyu maga anak ya habla que no quierre le sirvi con Jehova? No pensa que ya falla tu como un mayores. Si Jehova ya dale kanaton todo​—incluido con el de tuyu anak—​el libertad que decidi si sirvi ba kita con Dios o gendeh. Si ya decidi el de tuyu anak que deja con Jehova, no perde esperanza que algun dia hay bira le. Acorda con el ilustracion del un anak que ya sale na diila casa. (Luc. 15:11-19, 22-24) Este joven hombre ya hace manada mal cosas pero na uliji, ya bira le. El cuanto posible habla, “Ilustracion lang man se. Puede ba gayot se sucede?” Si, puede! Gane, amo se el cosa ya experiencia el un joven hombre que si Elie.

17. Paquemodo ya anima contigo el experiencia de Elie?

¹⁷ Acerca na de suyu mayores, si Elie ya habla: “Ya hace sila el todo para ayuda conmigo que ama con Jehova y con el de suyu Palabra, el Biblia. Pero cuando teenager yo, ya principia yo man rebelde.” Ya principia si Elie vivi un doble manera de vida y nuay le acepta el ayuda del de suyu maga mayores na espiritual. Despues le sale na casa, ya principia le hace maga mal cosas. Pero tiene vez, ta puede le man cuento con el uno del de suyu maga amigo acerca na Biblia. Si Elie ya habla: “Si mas tan cuento yo acerca con Jehova na de mio amigo, mas ta puede yo pensa acerca con Jehova. Hinay-hinay, el maga similla de verdad na de mio corazon​—el maga similla que ya pricura siembra el de mio mayores—​ya principia crici.” Despues del cuanto tiempo, ya bira na verdad si Elie.c Imagina si paquemodo de alegre el de suyu maga mayores cay ya pricura sila enseña con ele desde bata que ama con Jehova!​—2 Tim. 3:14, 15.

18. Cosa tu ta sinti acerca na maga mayores quien ta hace el todo para enseña con el diila maga anak que ama con Jehova?

¹⁸ Maga mayores, tiene ustedes un bien bonito privilegio​—hace engranda un nuevo generacion de maga siervo de Jehova. (Sal. 78:4-6) Gendeh este facil y ta comenda kame con ustedes na de ustedes maga esfuerzo para ayuda con el de ustedes maga anak! Si continua ustedes hace el todo para ayuda con el de ustedes maga anak que ama con Jehova y enseña kanila que queda obediente con ele, puede ustedes asigura que el diaton amable Tata na cielo hay queda alegre.​—Ef. 6:4.