Imita con el Maga Fiel Angel

1-2. (a) Na cosa manera diferente kita na maga angel? (b) Na cosa manera semejante kita na maga angel?

CUANDO ya guinda tu na verdad, ya invita contigo si Jehova para queda parte del de suyu amable familia. Incluido alli el diaton maga hermano y hermana na todo parte del mundo y el millones de maga angel. (Dan. 7:9, 10) Si acerca na maga angel, posible ta pensa kita que bien diferente sila kanaton. Por ejemplo, mas tarda ya sila ta existi contra kanaton. (Job 38:4, 7) Mas poderoso tambien sila. Puera con ese, mas sagrao y mas recto sila kanaton cay imperfecto kita.—Luc. 9:26.

² Pero maskin pa diferente sila kanaton na cuanto aspeto, tiene tambien kita cosa semejante kanila. Por ejemplo, igual na maga angel, puede kita imita con el maga buen calidad de Jehova. Tiene tambien kita el libertad para decidi. Tiene tambien kita maga personal nombre, otro-otro personalidad y diferente responsibilidad. Y igual na maga angel, necesita kita el guia del diaton Creador.—1 Ped. 1:12.

3. Cosa kita puede aprende na maga fiel angel?

³ Ciendo semejante kita na maga angel, puede ayuda kanaton el diila buen ejemplo. Gane, manada kita cosa puede aprende kanila. Na este articulo, considera kita si paquemodo kita puede imita con el diila humildad y el diila amor para na maga gente. Discuti tambien kita si paquemodo continua aguanta igual kanila y si paquemodo mentena limpio con el congregacion.

HUMILDE EL MAGA ANGEL

4. (a) Paquemodo ya dale mira humildad el maga angel? (b) Porque humilde el maga angel? (Salmo 89:7)

⁴ Humilde el maga fiel angel. Maskin pa experienciao sila, poderoso y sabio, ta obedece sila con el maga instruccion de Jehova. (Sal. 103:20) Si ta hace sila diila maga assignment, gendeh sila tan hambug con ese o ta usa con el diila poder para saca el atencion del maga gente. Alegre sila ta hace con el voluntad del Dios maskin pa no sabe el maga gente si cosa el diila nombre.a (Gen. 32:24, 29; 2 Rey 19:35) Gendeh sila ta acepta alabanza que conviene lang para con Jehova. Porque bien humilde el maga angel? Cay ta ama sila con Jehova y ta respeta gayot con ele.—Le con el Salmo 89:7.

5. Paquemodo ya dale mira humildad el un angel cuando ya corecta le con apostol Juan? (Mira tambien con el letrato.)

⁵ Considera un suceso que ta dale mira el humildad del maga angel. Del maga 96 C.E., el un angel que nuay nombra na Biblia ya dale mira un bien bonito vision con apostol Juan. (Rev. 1:1) Cosa ya hace si Juan despues le mira con el vision? Yan hapa le para adora era con el angel. Pero, ya sangga con ele ese angel y ya habla: “No tu hace ansina cay un muchacho lang yo igual contigo y con todo el dituyo maga hermano y hermana. . . . Con Dios lang adora.” (Rev. 19:10) Humilde gayot el angel! No quierre le que alaba con ele. Ya habla dayun le con Juan que adora con Dios Jehova. Pero, nuay tambien hace de menos el angel con Juan. Maskin pa mas tarda ya ta sirvi el angel con Jehova y mas poderoso contra con Juan, ya refiri le con el apostol como muchacho o esclavo igual con ele. Y maskin pa necesita le corecta con Juan, nuay le regaña con este. Sino, amable le yan cuento con Juan. Posible, ya realiza el angel que gendeh intencion de Juan que adora con ele sino efecto lang quel del vision que ya mira el apostol.

6. Paquemodo kita puede imita con el humildad del maga angel?

⁶ Paquemodo kita puede imita con el humildad del maga angel? Puede kita imita kanila si hace kita con el diaton maga assignment que gendeh tan hambug. Gendeh tambien kita hace manera para dale mira con otro que tiene kita cosa ya puede cumpli. (1 Cor. 4:7) Mas pa, gendeh kita debe sinti que mas bueno kita que con otro cay mas tarda ya kita ta sirvi con Jehova o cay tiene kita cuanto privilegio. Gane, si mas manada el diaton responsibilidad, debe mas humilde kita. (Luc. 9:48) Igual con el maga angel, quierre kita que sirvi con otro. No quierre kita hace maskin cosa que manda sinti con otro que mas importante kita que kanila.

7. Paquemodo kita puede dale mira humildad si ta corecta o ta conseja con el un persona?

⁷ Puede tambien kita dale mira humildad maskin pa necesita kita corecta o conseja con el un persona—un hermano o hermana man este o diaton anak. Si ta dale consejo, posible necesita kita queda franca. Pero igual con el angel quien ya corecta con Juan, puede kita hace con ese na manera que gendeh man luya el persona con quien kita ta conseja. Si gendeh kita pensa que mas bueno kita que con otro, puede kita dale consejo estaba na Biblia na amable y respetoso manera.—Col. 4:6.

TA AMA EL MAGA ANGEL CON EL MAGA GENTE

8. (a) Paquemodo ta dale mira el maga angel que ta ama sila con el maga gente? (Lucas 15:10) (b) Paquemodo kanaton ta ayuda el maga angel na predicacion? (Mira tambien con el letrato.)

⁸ Interesao el maga angel y ta ama con el maga gente. Alegre sila si tiene quien ta arripinti. Alegre sila si el un individual ya bira sirvi con Jehova o si el un persona ya hace maga cambio y ya decidi sirvi con Dios. (Le con el Lucas 15:10.) Activo tambien el maga angel para suporta con el trabajo predicacion. (Rev. 14:6) Maskin pa gendeh sila directa ta predica con el maga gente, posible sila guia con el un publisher para predica na un persona quien quierre aprende acerca con Jehova. Siempre, gendeh kita puede asigura que ya guia gayot kanaton el maga angel para na un persona. Porque? Cay ta usa tambien si Jehova otro manera—igual con el de suyu sagrao espiritu—para ayuda con el maga gente o para guia con el de suyu maga siervo. (Act. 16:6, 7) Maskin pa ansina, puede kita asigura que ta usa le con el de suyu maga angel para suporta kanaton. Poreso, si ta predica kita con el buen noticia, puede kita asigura que ta ayuda kanaton el maga angel.—Mira con el cajon “Ya Contesta con el Diila Maga Rezo.”b

9. Paquemodo kita puede imita con el amor del maga angel para na maga gente?

⁹ Paquemodo kita puede imita con el amor del maga angel para na maga gente? Si ya anuncia na congregacion que ya bira ya na organizacion el un persona, puede kita queda alegre igual con el maga angel. Hace manera para man welcome con el hermano o hermana y manda sinti con ele que ta ama kita con ele. (Luc. 15:4-7; 2 Cor. 2:6-8) Puede tambien kita imita con el maga angel si hace kita el todo cosa kita puede hace na predicacion. (Ecl. 11:6) Y igual si paquemodo ta suporta kanaton el maga angel si ta predica kita, puede tambien kita busca manera para suporta con el diaton maga hermano y hermana na diila ministerio. Por ejemplo, puede gaha kita man junto na ministerio con el un nuevo publisher? Puede ba kita ayuda con el maga hermano y hermana quien de edad ya o tiene enfermedad para puede tambien sila participa na ministerio?

10. Cosa kita puede aprende na experiencia de Sara?

¹⁰ Paquemodo si limitao ya el cosa kita ta puede hace por causa na diaton circumstancia? Puede siempre kita busca manera para predica y puede kita asigura que ayuda kanaton el maga angel. Considera con el experiencia de Sara,c un hermana na India. Un pioneer le por maga 20 año pero ya enferma le y ya queda bedridden. Poreso, ya queda gayot le bien triste. Pero, ya puede ayuda con ele el suporta del de suyu espiritual familia y el regular lehida de Biblia para tene otravez positivo mirada. Necesita tambien le busca otro maga manera para puede predica. Ciendo gendeh le puede sinta para escribi carta, ta predica lang le por medio na telefono. Poreso, ya llama le con el de suyu maga return visit y ya habla sila con ele acerca na diila maga conoce quien posible quierre estudia con el Biblia. Cosa el resulta? Adentro lang del cuanto meses, ya tiene 70 Bible study si Sara! Gendeh le puede man Bible study con ese todo poreso ya dale le con el otro na maga publisher na congregacion. Manada kanila el ta atende ya ahora na maga miting. Asigurao que bien alegre el maga angel mientras ta mira con el maga hermano y hermana, igual con Sara, quien ta hace el todo na trabajo predicacion!

TA CONTINUA AGUANTA EL MAGA ANGEL

11. Paquemodo ta dale mira el maga fiel angel que ta continua sila aguanta?

¹¹ Ta continua aguanta el maga fiel angel. Miles de año ya sila ta mira que tiene injusticia y maldad. Ya puede tambien sila mira cuando yan rebelde con Jehova si Satanas y el diila maga uban angel. (Gen. 3:1; 6:1, 2; Jud. 6) Gane, ya menciona el Biblia acerca na un fiel angel quien ya experiencia oposicion estaba na un poderoso demonio. (Dan. 10:13) Mas pa, desde el tiempo de Adan y Eva, ya puede mira el maga angel que bien poco lang el ya suporta con el verdadero adoranza. Maskin pa ansina, ya continua sirvi con Jehova el maga fiel angel con alegria. Sabe sila que hay quita el Dios con el todo injusticia na justo tiempo.

12. Cosa puede ayuda kanaton para aguanta?

¹² Paquemodo kita puede imita con el maga angel y continua aguanta? Igual con el maga angel, posible ta puede kita mira maga injusticia o ta enfrenta oposicion. Pero igual kanila, asigurao kita que hay quita el Dios con el todo maldad na justo tiempo. Poreso, igual con el maga fiel angel, “no kita descansa de hace el maga cosa-cosa bueno.” (Gal. 6:9) Ya promete tambien el Dios que ayuda le kanaton para puede kita aguanta. (1 Cor. 10:13) Puede kita pidi el espiritu de Jehova para ayuda kanaton tene paciencia y alegria. (Gal. 5:22; Col. 1:11) Pero paquemodo si ta enfrenta tu oposicion? Confia con Jehova y no tene miedo. Puede tu asigura que pirmi le suporta y hace fuerte contigo.—Heb. 13:6.

EL MAGA ANGEL TA AYUDA MENTENA LIMPIO CON EL CONGREGACION

13. Cosa el especial assignment del maga angel durante el ultimo maga dia? (Mateo 13:47-49)

¹³ Durante el ultimo maga dia, ya dale si Jehova un especial assignment con el maga angel. (Le con el Mateo 13:47-49.) Millones de maga gente el ta queda interesao na buen noticia. El cuanto de ese maga persona ta hace cambio na diila vida para queda maga deverasan Cristiano pero el otro gendeh. Ya dale assignment con el maga angel que “separta con el maga gente bueno y [con] el maga pecador.” Quierre decir de este que ya dale kanila responsibilidad que ayuda mentena limpio con el congregacion. Pero gendeh este quierre decir que gendeh mas puede bira aquellos quien nuay mas man junto kanaton na adoranza. Gendeh tambien este quierre decir que gendeh tene maga problema na congregacion. Pero, puede kita asigura que ta hace esfuerzo el maga angel para ayuda mentena limpio con el diaton congregacion.

14-15. Paquemodo kita puede imita con el maga angel y mentena limpio con el diaton congregacion? (Mira tambien con el maga letrato.)

¹⁴ Paquemodo kita puede imita con el maga angel y mentena limpio con el diaton congregacion? Puede se kita hace si hace kita esfuerzo que mentena limpio el diaton congregacion na moral y na espiritual. Necesita kita hace esfuerzo que protege con el diaton corazon. Puede se kita hace si iscuji kita maga buen amigo y si evita kita con el maskin cosa que puede destroza con el diaton buen relacion con Jehova. (Sal. 101:3) Puede tambien kita ayuda con el maga hermano y hermana que esta fiel con Jehova. Por ejemplo, cosa kita debe hace si ya sabe kita que ya comete serioso culpa el un hermano o hermana? Cay ta ama kita con ele, hay anima kita con ele que atraca con el maga anciano. Si nuay le se hace, kita mismo habla con ese na maga anciano. Quierre kita que puede dayun ricibi ayuda el diaton hermano y hermana quien enfermo na espiritual.—Sant. 5:14, 15.

¹⁵ Pero, maka-triste cay necesita quita na congregacion con el cuanto quien ya comete serioso culpa. Si sucede se, “gendeh [kita] man junto” kanila.d (1 Cor. 5:9-13) Este arreglamiento ta ayuda para mentena limpio con el congregacion. Mas pa, si gendeh kita tan junto con aquellos con quien ya quita na congregacion, ta dale kita mira pagka-bueno kanila. Cay por medio con ese, posible puede sila realiza que necesita sila bira con Jehova. Si hace sila se, hay queda kita alegre junto con Jehova y con el maga angel.—Luc. 15:7.

16. Cosa tu quierre imita na maga angel?

¹⁶ Un grande privilegio gayot que aprende acerca na maga angel y sirvi con Jehova junto kanila! Ojala imita kita con el diila humildad y el diila amor para na maga gente. Continua tambien kita aguanta igual kanila y ayuda mentena limpio con el diaton congregacion na moral y na espiritual. Si imita kita con el maga fiel angel, hay queda kita parte del familia de Jehova hasta para cuando.