Dipasi da wumbidi di yako ka Vakorinto
1 Ani Paulo, mpostoli wa Kristu Jesu ngu kudhunda ka Txizimu ni Timoti mwanathu, na bhalela dibanza da Txizimu adi di ku Korinto kupata ni votshe vasawuleki va ku khe Akaya, ni txi khani:
2 Wuxinji wa hombe ni kurula asi si tako ngu ka Txizimu i ku Tate wathu ni Mkoma Jesu Kristu si nave ni nanu.
3 Txi na dhumiswe Txizimu, Tate wa Mkoma wathu Jesu Kristu, Tate wa wumbilu ni Txizimu txa kotshe kuthavelela. 4 Atxi txi hi thavelelako ka sotshe siduko asi hi tshanganako naso, kasiku hi kota kuthavelela vamwani ka sotshe siduko si va tshanganako naso, ngu thavelelo ayi hi yi manako ngu ka Txizimu. 5 Nguko, aku hi xanisekako ngutu ngu mhaka ya Kristu, kuthavelelwa ku hi ku manako ngu kona ha ka Kristu ni kona nga hombe ngutu. 6 Ngako hi txi tshangana ni siduko, hi tshangana naso kasiku anu mi thavelelwa ni kuponiswa, ngako athu hi txi thavelelwa nananu ma thavelelwa, eto ti mi vhuna ku mi timisela sikarato asi nathu hi tshanganako naso. 7 Ni ku themba yi hi ku nayo ngu nganu yi tsani, nguko ha ti ziva ti to aku mi patekako ka sikarato, nananu mi na tshumela mi pateka ko thavelelwa.
8 Vanathu, kha hi lavi ku mi sisela sikarato asi hi nga tshangana naso khe ka provhinsiya ya Aziya, hi wonisanile ni kuxaniswa kupinda mtamo wathu, ahawa hi nga pimisa ti to kha hi na mbi hanya. 9 Ngu ditshuri hi ti pfite nga hi to ko sikelwa lifo, eto ti mahekile kasiku hi si ti thembi hipune, kambe hi themba Txizimu atxi txi wusako vakufa. 10 Mbimo yi hi nga di ka phango ya lifo, txona txi hi hulukisile, ni ku ngu toneto txi na hi hulukisa ni ku hi ni themba ya ti to txi na simama txi hi hulukisa. 11 Nananu mi nga hi vhuna ka mikombelo yanu kasiku vavangi ve bonga Txizimu, ngu kona ha ka kuxamulwa ka mikombelo ayi yi mahwako ngu vathu vavangi.
12 Ha ti guleta, nguko livhalo lathu la ningela wufakazi ditikoni muwa, ngutu-ngutu hagari kwanu, ti to hi ni mahanyelo a manene, o basa ni ya ditshuri aya ma tako ngu ka Txizimu, i si nga ngu wuzivi wa vathu, kambe ngu wuxinji wa hombe wa Txizimu. 13 Nguko kha hi mi bhaleli timhaka ti mi si ngako ni wusikoti wo ti lera ni ku ti pfisisa, ni emela ti to mi simama mi ti pfisisa kwati timhaka tiya. 14 Nga ha mi nga ti pfisisa nyana ngu kona ti to athu hi txivangelo txo mi ti guleta, nananu mi na va txivangelo txathu txo ti guleta ka ditshiku da Mkoma wathu Jesu.
15 Ngu mhaka ya toneto, ni ti pimisile kukhata ngu ku mi endela kasiku mi va ni txivangelo txa wumbidi txa ti to mi tsaka, 16 nguko ni txi lava kupinda ni mi wona ni txiya Makedhoniya, ni tshumela ni pinda ni mi wona mbimo yi ni wuyako ngu kona, kasiku mi ni heleketa mbimo yi ni tsulako Judheya. 17 Ina mbimo yi ni nga maha makungo yawa ni ti woni i si nga ta txilo kani? Mwendo mo pimisa ti to ni mahile ngu mamahelo a vathu, aha koza ni txi: “Ina” ni gwita ni txi khani: “Ahim-him”? 18 Kambe, kufana ni ku Txizimu i ku txo thembeka, ati hi mi gelako kha ti na ku va “Ina ni ahim-him” ngu mbimo ya yimweyo. 19 Nguko Mwanana wa Txizimu Jesu Kristu awu ani, Silivhano ni Timoti hi nga txhumayela kha va “Ina” ngu mbimo ya yimweyo e va “Ahim-him”, kambe kwakwe ku vite “Ina.” 20 Nguko ti si nga ni mhaka ni ti to sithembiso si Txizimu txi nga hi thembisa singi kuhokela hani, sona sa va “Ina” ngu kona ha kwakwe, ngu toneto ngu kona ha kwakwe ha womba hi txi khathu “Amen” ka Txizimu, ati ti mu ningako wudhumo ngu kona ha kwathu. 21 Kambe, awule a hi tsanisekisako ti to athu ni nanu hi lumba Kristu ni wule a nga hi sawula Txizimu. 22 A hi ginjile txitambo, e tshumela e hi ninga moya mbiluni kwathu kasi kuva txitsanisekiso ka ti ti tako.
23 Txizimu txa ni fakazela ti to ngako ni si ti kheyo Korinto no mi tsetsa. 24 Hi nga ti to ho va vanyamne va likholo lanu, kambe hi vathumi kulothi kasi ku mi mana litsako ni ku mi maneka mi di tsani ngu kona ha ka likholo lanu.