MAHUNGU A MANENE O BHALWA NGU MATEWU

1 Adiya dibhuku da matimu* a Jesu Kristu,* mwanana wa Dhavhidha, mwanana wa Abrahamu.

17 Kukhukhela ka Abrahamu kala ka Dhavhidha ku vile ni 14 wa tiveleko.* Kukhukhela ka Dhavhidha kala mbimo yi Vaisrayeli va nga yiswa Bhabhilona ku vile ni 14 wa tiveleko. Kukhukhela mbimo yi Vaisrayeli va nga yiswa Bhabhilona kala ka Kristu ku vile ni 14 wa tiveleko.

18 Kuvelekwa ka Jesu Kristu ku mahisile tiya: Mariya a ti wutilwe* ngu Josefa, kambe va sinzi kutxhadha a manekile a di ni txirumbu ngu mtamo wa moya wo sawuleka.* 19 Hambiketo, aku Josefa i nga ti wamwamna wo lulama* a txi lava ku ti gwitela kwawe dwe. Se a woni i di tshuku ku m’leka ti si ziwi ngu vavangi. 20 Kambe, msana kova Josefa a di pimisile ngu mhaka yoneyo, ngilozi ya Jehovha* yi to ta kwakwe ngu mloro yi m’gela tiya: “Josefa, mwana Dhavhidha, u nga thave kuteka Mariya nguko txirumbu atxi a ku natxo txi tisilwe ngu moya wo sawuleka.” 21 Ene a na veleka mwanana wa mfana, awu u no m’raya ditina do i Jesu nguko ene a na ponisa vathu vakwe ka sigoho sawe. 22 Totshe tiya ti humelete kasi ku kutatiseka ati Jehovha a nga womba ngu kuthumisa mprofeti wakwe, atxi khene: 23 “Hi nga wona! Mbiri* yi na mana txirumbu yi veleka mwanana wa mfana awu a no raywa ditina do i Emanuweli”, ati ti wombako ku “Txizimu txi ni nathu.”

24 Josefa a to wuka ngu wukoheni e maha nga ti ngilozi ya Jehovha* yi nga m’gelisa tona. Se a to teka Mariya msikati wakwe e m’wuyisa mtini. 25 Kambe kha maha nayo ta mataho kala kuza e veleka mwanana wa mfana, awu a nga m’raya ditina do i Jesu.

2 Jesu a veleketwe Bhetlehema khe Judheya, ka mbimo yi ku nga txi fuma mkoma Herodha. Ka mbimo yoneyo Jerusalema ku to ta vahuti ava va thumisanako ni tinyeleti, va txi ta ngu Wutxani. 2 Va to ta wotisa mkoma Herodha va txi kha vona: “A hani wule a nga velekelwa ku va mkoma wa Vajudha? Hi woni nyeleti yakwe hi di ngadi wutxani, se hi tile kasi ku ta bayetha.”* 3 Mbimo yi mkoma Herodha ni votshe vathu va didhoropa da Jerusalema va nga ti pfa va to wika msana. 4 Se ene a to dhana totshe tinduna ta vaprista ni vamabhalani a txi va wotisa aha Kristu a no velekelwa kona. 5 Se va to mxamula va txi: “A na velekelwa Bhetlehema wa Judheya, nguko mprofeti a wombile tiya: 6 ‘Awe Bhetlehema wa ditiko da Judha khu nga wa m’dotho hagari ka vakoma va Judha, nguko kwako ku na velekwa mkoma awu a no dyisa vathu vangu, Vaisrayeli.’”

7 Herodha a to dhana vahuti vale va thumisanako ni tinyeleti ngu txihunja e va wotisa mbimo yi nyeleti yi nga humelela ngu yona. 8 Mbimo yi a nga va rumela kuya Bhetlehema a to va gela ku khene: “Tsulani mi ya lavetela kwati mwananeyo, mi txi m’mana wuyani mi ta ni gela kasiku nani ni tsula ni ya bayetha.”* 9 Msana ko womba-womba ni mkoma va to khukha ve tsula. Se va to wona to nyeleti yile va nga yi wona va di ngadi Wutxani yi txi thangela masoni kwawe, yi tsula yi ya ema aha mwanana a nga di kona. 10 Mbimo yi va nga wona to nyeleti yi emile, va to tsaka ngutu. 11 Se va di bete nyumbani, va to wona mwanana a di ni mame wakwe Mariya, va to khizama ka mwanana. Se va to tula mikwama yawe ve ninga mwanana prezenti ya oru, olibhano,* ni mafura a mira. 12 Kambe, aku Txizimu txi nga ti va gete ngu mloro to va si pindi ngu ka Herodha, va to tshumela ngu yimwani nzila ve ya ditikoni kwawe.

13 Neti va nga khukha, ngilozi ya Jehovha* yi to humelela ka Josefa ngu mloro yi txi m’gela tiya: “Wuka u teka mwanana ni mame wakwe mi pfhuka mi ya Egipta, kala mbimo yi ni no mi gela to mi wuya, nguko Herodha a lava kudaya mwanana.” 14 Se Josefa a to wuka wona wusikuwo, e teka mwanana ni mame wa kona ve tsula Egipta. 15 Ene a zumbile kona khe kala Herodha e fa. Atiya ti humelete kasi kutatiseka ati Jehovha* a nga ti ti wombile ngu kuthumisa mprofeti wakwe ti to khene: “Ni dhani mwanana wangu e huma Egipta.”

16 Mbimo yi Herodha a nga wona to vahuti va ti m’kanganyisile a to henya ngutu, e rumisa to ku dawelwa votshe vanana va vafana vo khukhela malembe mambidi kuya hahatshi, khe Bhetlehema ni ka sotshe sidhoropana sa kona. Herodha a pimile tanga yiya mayelano ni mbimo ayi a nga ti getwe ngu vahuti. 17 Ngu nzila yoneyo ti tatisekile ati mprofeti Jeremiya a nga womba to khene: 18 “Ku pfate huwa ni kudila khe Rama. I ti Rakeli a nga txi dila vanana vakwe, a si lavi kuthavelelwa* nguko se va ti dawetwe.”

19 Msana kova Herodha a di fite, ngilozi ya Jehovha yi to humelela ka Josefa ngu mloro a di Egipta 20 yi txi: “Teka mwanana ni mame wa kona u tsula ditikoni ka Israyeli, nguko avale va nga txi lava kudaya mwanana va fite.” 21 Se a to khukha e teka mwanana ni mame wa kona ve tshumelela ditikoni ka Israyeli. 22 Mbimo yi a nga ziva to Arkelawu mwana Herodha ngene a nga vhaleta wukoma wa tate wakwe,* a to thava kuya kheya. I si nga eto basi, Txizimu txi m’zivisile ka mloro, se a to thavela kuya ditikoni ka Galileya. 23 Se Josefa a to ya zumba ka didhoropa da Nazareta, kasi kutatiseka mapswi a vaprofeti va nga khona: “Ene a na dhanwa ku M’nazareta.”*

3 Ka masiku oneyo, Johani M’bhabhatisi a to tsula e ya txhumayela txiwulani* ka Judheya 2 a txi khene: “Ti soleni nguko Mfumo wa nzumani wu hafuhi.” 3 Phela awuwa ngene a nga wombwa ka mapswi a mprofeti Isaya aya ma ku “ku pfala dipswi txiwulani di txi: ‘Lulamiselani nzila ya Jehovha! Basisani tinzila takwe.’” 4 Johani a txi ambala siambalo so mahwa ngu matoya a makamelo ni libhande lo mahwa ngu didhowo. Ene a txi dya humbi* ni wulombe. 5 Vathu va Jerusalema, va Judheya ni vathu vamwani va nga ti akile hafuhi ni mnambo wa Jordhani va txi ya kwakwe. 6 Vona va txi bhabhatiswa ngu ngene ka mnambo wa Jordhani. Ve hoka ve wombetela sigoho sawe.

7 Mbimo yi a nga wona Vafarisi ni Vasadhusi va txi tshuketela wukhalo awu a nga txi bhabhatisa kona a to va gela ku khene: “Anu vanana va timamba, mi getwe ngu mani to mi na huluka ka kuloviswa ku ku tako kani? 8 Ngu toneto, kombisani mithumo ya kutisola kwanu. 9 Mi nga ti xengeni mi txi khanu: ‘Athu hi vanana va Abrahamu.’ Nguko na mi gela to Txizimu txi nga sikota kutxitxa marigwi yawa me maha vanana va Abrahamu. 10 Ditxhapu di to gee hahatshi ka mndonga. Yotshe mindonga ayi yi si velekiko mihando ya yinene yi na gangwa yi hiswa. 11 Ani ni mi bhabhatisa ngu mati ngu mhaka ya ku mi ti solako ka sigoho sanu, kambe awu a no ta ngu msana kwangu, a ni mtamo ku ni pala, nem kha ni faneleki kuthavisa masandaliya akwe. Ene a na mi bhabhatisa ngu moya wo sawuleka ni mndilo. 12 Ene a ñote difoxola dakwe da makwasa ti to e hula ngu dona fulaho, futhi a na basisa wukhalo wo hulela ka wona. A na sengeleta fulaho txisangalani kwakwe, kambe matshanga a kona a na ma hisa ngu mndilo, awu ti si kotekiko ku wu tima.”

13 Msana keto, Jesu a to khukha Galileya e ya Jordhani kasiku ya bhabhatiswa ngu Johani. 14 Kambe Johani a to zama kulamba, a txi khene: “Ani ngani ni fanelako kubhabhatiswa ngu ngawe, se ngu kutxani i di awe u tako kwangu kani?” 15 Se Jesu a to m’xamula a txi khene: “Konkuwa, awe tumela, kasiku ti hetiseka totshe ati i ku to lulama.” Se Johani a to tumela. 16 Msana ko bhabhatiswa, mbimo yi Jesu a nga huma ngu matini, nzuma yi to tuleka e wona moya wa Txizimu wu txi txhika nga dituva, wu txi ta kwakwe. 17 Se wa ti wo! Ku to pfala dipswi di txi khukhela nzumani di txi: “Awuwa i Mwanana wangu, khoni-khoni yangu,* awu a ni xalalisako ngutu.”

4 Se moya wo sawuleka wu to maha ti to Jesu e ya txiwulani kasiku e ya dukwa ngu Dhawulosi. 2 Msana ka 40 wa masiku a si dyi txilo ene a to pfa nzala. 3 Se Dhawulosi a to m’tshuketela e ta m’duka a txi khene: “Ngako awe u di mwanana wa Txizimu, gela marigwi yawa me txitxa me maha mapawu.” 4 Aniko Jesu a to m’xamula a txi khene: “Ti bhatwe ti to: ‘M’thu kha hanyi ngu sakudya basi, aniko ngu otshe mapswi aya ma wombwako ngu Jehovha.’”

5 Se Dhawulosi a to m’teka e m’yisa ka didhoropa do sawuleka e m’emisa txitimwi khe ka dithempele, 6 a txi khene: “Ngako u di mwanana wa Txizimu ti rinze hahatshi, nguko ti bhatwe ti to: ‘Ene a na rumela tingilozi takwe kasi ti ta ku khamukela ti to u si ti gumuli hambi mnenge wako ka dirigwi.’” 7 Jesu nene a to khene: “Ku bhatwe ti to: ‘U nga thuki u duka Jehovha* Txizimu txako.’”

8 Dhawulosi a to m’teka kambe e m’yisa ka mmango wo lapha ngutu e m’komba otshe matiko* a hamafuni ni tithomba ta ona. 9 A txi khene: “Ni nga ku ni nga sotshe siya ngako u txi khizama u ni khozela kumweko dwe.” 10 Se Jesu a to khene: “Suka Sathani! Nguko ti bhatwe to: ‘U fanete kukhozela Jehovha Txizimu txako, ngene basi u fanelako ku m’mahela mthumo wo sawuleka.’” 11 Dhawulosi a to khukha, se ku to ta tingilozi ti ta khata kuthumela Jesu.

12 Mbimo yi Jesu a nga pfa to Johani a bete jele, a to khukha e ya Galileya. 13 Msana ko va a di khukhile ngu Nazareta, a to ya zumba Kapernawume, hafuhi ni sidhoropana sa Zebhuloni ni Naftali si manekako mabambe ka linene, 14 kasiku ti tatiseka ati ti nga wombwa ngu mprofeti Isaya, to khene: 15 “Madhoropa a Zebhuloni ni Naftali, ma manekako ka nzila ya mabambe a linene, khe mtxhatuko ka Jordhani, Galileya wa matiko. 16 Vathu vale va ku mtemani, va woni dilambu do woninga ngutu, ni vale va ku txidemani ko phum, va layithetwe dilambu.” 17 Kukhukhela ka mbimo yoneyo, Jesu a to khata kutxhumayela a txi: “Ti soleni ka sionho sanu nguko Mfumo wa nzumani wu hafuhi.”

18 Mbimo yi a nga txi tsimbila mabambe ka linene la Galileya, ene a to wona Simoni awu a dhanwako ku i Pedro ni mnanda wakwe Andreya va txi riya tikoka nguko vona i ti vadoti. 19 Ene a to va gela ku khene: “Ni londiseni, ni na mi maha vadoti va vathu.” 20 Se va to tekela kuleka tikoka tawe ve m’londisa. 21 Mbimo yi a nga txi pinda e ya masoni a to wona majaha mambidi, i ku Jakobe ni mnanda wakwe Johani va di mu ka ngalava va txi runga tikoka ni tate wawe Zebhedhewu. Se ene a to va dhana. 22 Vona va to tekela ku m’londisa, ve siya ngalava ni tate wawe.

23 Jesu a to tsimbila ditikoni kotshe ka Galileya, a txi gondisa masinagogani kwawe ni kutxhumayela mahungu a manene a Mfumo e hanyisa vathu ka otshe malwati ni mipando yawe. 24 Ati a nga txi maha ti to hangalaka ni dotshe ditiko da Siriya. Se va txi m’yisela votshe vathu va malwati a tixaka-xaka ni mipando ya hombe, va madhimoni, va malwati o tshanuka ni vo oma sihango.* Se ene a to va hanyisa. 25 Ngu toneto, a txi londetelwa ngu txitshungu txa hombe txo ta ngu Galileya, Dhekapoli, Jerusalema, Judheya ni mtxhatuko ka Jordhani.

5 Mbimo yi a nga wona txitshungu txi txi m’londisela, a to kwela ka mmango e khalahatsha, vagondiswa vakwe va to ta aha a nga ti kona. 2 Se ene a to khata ku va gondisa, a txi khene:

3 “Ava va ku ni ditora do lava kuziva Txizimu va tsaka, nguko Mfumo wa nzumani mbwawe.

4 “Ava va dilako va tsaka, nguko va na thavelelwa.

5 “Ava vo rula va tsaka, nguko va na dya thomba ya mafu.

6 “Ava va ku ni nzala ni ditora da timhaka to lulama va tsaka, nguko va na khura.

7 “Ava va pfelako wusiwana vamwani va tsaka, nguko ni vona va na pfelwa wusiwana.

8 “Ava va ku ni mbilu yo basa va tsaka, nguko va na wona Txizimu.

9 “Ava va xotako kurula va tsaka, nguko va na dhanwa ku vanana va Txizimu.

10 “Ava va lwelako to lulama va tsaka, nguko Mfumo wa nzumani mbwawe.

11 “Ngako vathu va txi mi ruka, ve mi xanisa, ve mi hembela, ve womba-womba kubiha ngu nganu ngu mhaka yangu, tsakani. 12 Tsakani ngutu mi nengela, nguko hakelo yanu nja hombe nzumani, nguko hambi vaprofeti va kale va va xanisile ni vona.

13 “Anu mi fana ni sawuti hamafuni hawa, ngako sawuti yi txi luza mtamo wa yona, ina yi nga tshumela yi lunga kani? Kha yi na mbi vhuna txilo, yi na tekwa yi ya tshotswa yi kandetelwa ngu vathu.

14 “Anu mi fana ni liwoningo haditikoni. Didhoropa adi di ku txitimwi ka mmango* kha di sisaleki. 15 Vathu kha va layithi dilambu ve di khubhunyeta ngu txirundo, aniko va di veka txitimwi kasiku di woningeta votshe ava va ku nyumbani. 16 Nananu woningani masoni ka vathu, kasiku ve wona mithumo yanu ya yinene ve dhumisa Tate wanu a ku nzumani.

17 “Mi nga pimiseni to ni tete ku ta fuvisa Mlayo mwendo ati ti nga wombwa ngu vaprofeti, kambe ni tete ku ta maha ni kuhetisisa ati wu wombako. 18 Ani na mi gela ti to hambi ti txo koteka ku nzuma ni mafu si nyamalala, ti nge koteki ku hambi txindendana txa txidotho txa mu ka Mlayo txi nyamalala, na ku si se maheka ati wu wombako tona. 19 Ngu toneto na mi gela ku khani awu a ndakako wumwewo wa milayo ya yidotho e tshumela e gondisa vamwani kumaha toneto, a nge beli ka Mfumo wa nzumani. Kambe awu a mahako ati Mlayo wu gondisako e tshumela e gondisa vamwani a na bela ka Mfumo wa nzumani. 20 Nguko na mi gela ti to, ngako kululama kwanu ku si pali ka vamabhalani ni ka Vafarisi, kha ti na mbi koteka ku mi bela ka Mfumo wa nzumani.

21 “Anu ma ti ziva ati ti nga wombwa kale ti to: ‘U nga daye, ngako u txi daya mhaka yako yi na yiswa tribhunali.’ 22 Kambe ani na mi gela ti to awule a simamako e henyela mwanawe, mhaka yi na ya xuxwa tribhunali. Se awule a txhipisako mwanawe, mhaka yakwe yi na yiswa tribhunali ka hombe. Ni wule a gelako mkwawe a txi khene: ‘Txiphukuphukuwe’, a na hiswa Gehena.*

23 “Ngako u txi ya ningela miningelo yako altarini, se u khumbula koneho to u ni mhaka yo kari ni mwananu, 24 siya miningelo yako masoni ka altari u khata ngu ku ya bhulisana ni mwananu mi va ni kurula. Se u wuya u ta ningela miningelo yako.

25 “Kuluveta u xuxa timhaka ni wu u nga mangalana nayo, kasiku a si ku ningeli ka juwiji, se juwiji e ku ningela ka maphoyisa, se u betwa jele. 26 Ngu ditshuri, na ku gela ti to khu na mbi huma jele u si se hakhela yotshe male.

27 “Ma ti ziva ati ti nga wombwa ta ku: ‘U nga mahe wugango.’ 28 Kambe ani na mi gela ku khani, awule a wonetelako wamsikati aha koza e m’navela, se a mahile nayo wugango mbiluni kwakwe. 29 Ngako diso dako da txinene di txi kumaha u onha, di xokole u di rinza kule nguko i tshuku kuluza diso dimwedo kupinda ku wotshe mmidi wako wu lova Gehena.* 30 Ni ku ngako diwoko dako da txinene di txi kumaha u onha di gange u di tshotsha kule ni nawe, nguko i tshuku kuluza diwoko dimwedo kupinda ku wotshe mmidi wako wu lova Gehena.

31 “Ti wombilwe kambe ti to: ‘Awu a lekako msikati wakwe a na m’ninge diphepha da dhivhorsio.’ 32 Kambe ani na mi gela ku khani, awule a dhivhorsiyarako msikati wakwe i singa ngu mhaka ya ku va a di mahile wubhemba, a m’veka ha txidukoni txo maha wugango. Ni wule a mtxhadhako ni wamsikati awu a nga dhivhorsiyarwa, a maha wugango.

33 “Anu ma ti ziva kambe ati ti nga wombwa ka vakale ti to: ‘U nga xambanye u si mahe, kambe maha ati u nga xambanya ka Jehovha.’* 34 Kambe ani na mi gela ku khani: U nga thuki u xambanya ngu nzuma nguko txikhalo txa wukoma wa Txizimu, 35 nem ngu mafu nguko txikhigeto txa mikondo yakwe, hambi ngu Jerusalema nguko didhoropa da Mkoma wa hombe. 36 U nga xambanye ngu ngawe upune, nguko khu na kusikota kutxitxa msisi wumwewo wako wu va wo basa mwendo wa mtima. 37 Aniko ta enela ku mi txi ‘Ina’ e va ina; mi txi khanu ‘Ahim-him’ e va ahim-him, nguko to pinda eto ti ta ngu ka M’bihi.

38 “Ma ti ziva ati ti nga wombwa to: ‘Diso ngu diso, dikwasa ngu dikwasa.’ 39 Kambe ani na mi gela ku khani, mi nga lwisaneni nayo awu a mi mahelako to biha, kambe ngako m’thu a txi kupeka mpama, tshembereka u mninga dimwani dithama. 40 Ngako m’thu a txi lava ku ku yisa tribhunali ngu kulava ku ku tekela dibhaji, m’ninge dijasi ni dona. 41 Ngako awu i ku manyane a txi ku sinzisa ku m’heleketa dikilometro dimwedo, tsula nayo a mambidi. 42 U nga lambe va txi ku kombela, ni ku ngako m’thu a txi lomba txo kari, u nga m’tone.

43 “Ma ti ziva ati ti nga wombwa to: ‘Randa wa ka kwanu u nyenya mlala wako.’ 44 Aniko ani na mi gela ku khani, simamani mi randa valala vanu, mi khongelela avale va mi xanisako. 45 Mi txi maha eto mi na kombisa ti to mi vanana va Tate wanu a ku nzumani, nguko ene wa humisa ditambo ka va vanene ni ka vabihi ni kuwisa mati ka vo lulama ni ka vo mbi lulama. 46 Nguko mi na ganya txani ngako mi txi randa ava va mi randako basi? Ina hi nga tona tiya va mahako vakhupisi kani? 47 Ngako mi txi losa vananu basi, nji txani mi txi mahako txo pinda vamwani? Hi nga tona tiya vathu vamatiko va mahako kani? 48 Ngu toneto, vanani vathu vo lulama kufana ni Tate wanu wa nzumani i ku wo lulama.

6 “Mi nga maheni ta tinene ngu kulava kuwonwa ngu vathu, nguko mi txi maha eto Tate wanu aku nzumani kha na mbi mi katekisa. 2 Ngu toneto, ngako u txi ninga txo kari txisiwana u nga peke mpundu kufana ni ti va mahako vakanganyisi masinagogani ni mu tiruwani ngu kulava kukhuzelwa ngu vathu. Nguko na mi gela ku khani se va yi mani hakelo yawe. 3 Kambe awe, ngako u txi ninga txo kari txisiwana, u nga tumelele ti to a ti mahwako ngu diwoko dako da txinene ti ziwa ngu da txibhabha. 4 Kasiku asi mi si ningelako si si ziwi ngu m’thu. Se Tate wanu awu a wonako ta txihunjani a na mi hakela.

5 “Ni ku, ngako mi txi maha mikombelo, mi nga faneni ni vakanganyisi nguko vona va dhunda kumaha mikombelo masinagogani va di emile, ni mu tiruwani ka hombe, kasiku ve wonwa ngu vathu. Ani na mi gela ku khani: Vona se va yi mani yotshe hakelo yawe. 6 Se ngako u txi lava kumaha mkombelo, bela nyumbani kwako u seka ditimba, u maha mkombelo ka Tate wako awu a si wonekiko. Se Tate wako awu a wonako ta txihunjani a na kuhakela. 7 Ngako mi txi maha mkombelo, mi nga phinda-phindeni mapswi a mamwewo nga ha va mahako ngu kona vamatiko, nguko va alakanya ti to va na pfiwa ngu kutatela mapswi. 8 Mi nga va tekeleleni, nguko Tate wanu wa nzumani wa ti ziva ati mi ti lavako mi si se kombela.

9 “Ngako mi txi lava kumaha mkombelo mahisani tiya:

“‘Tate wathu u ku nzumani, ditina dako di na basiswe.* 10 Wu nate Mfumo wako. Ku na maheke kuranda kwako ha mafuni nga nzumani. 11 Hi he sakudya sa ditshiku da nyamsi. 12 Hi divalele minando yathu nga ha nathu hi divalelako minando ya va va hi onhelako. 13 U nga hi leke hi xulwa ngu siduko* aniko hi hulukise ka M’bihi.

14 “Nguko ngako mi txi divalela vathu tiphazamo tawe, Tate wanu wa nzumani nene a na mi divalela. 15 Se ngako mi si va divaleli vamwani tiphazamo tawe, Tate wanu nene kha na mbi mi divalela.

16 “Lekani ku tithuvikisa khohe kufana ni vakanganyisi, kasi kuwonwa to vo jejuwara. Na mi gela ku khani, se va yi mani yotshe hakelo yawe. 17 Kambe awe, ngako u di ka jejuwa, samba khohe u tola mafura. 18 Kasiku u si wonwi ngu vathu to wo jejuwara, kambe u wonwa ngu Tate wako. Se Tate wako awu a wonako ta txihunjani a na ku hakela.

19 “Lekani kusengeletela tithomba hamafuni hawa, aha ti purwako ngu mswa ni kubhirela, ni ha makhamba ma no fayako ditimba me pa. 20 Kuhambana ni toneto, sengeletelani tithomba nzumani, aha ti no mbi purwa ngu mswa ni kubhirela ni ha makhamba ma si fayiko ditimba me pa. 21 Nguko aha yi ku kona thomba yako, mbilu yako yi na va koneho.

22 “Diso dilambu da mmidi. Se, ngako diso dako di txi wona bhem,* wotshe mmidi wako wu na woninga. 23 Ngako diso dako di di ni mabava wotshe mmidi wako wu txidemani. Ngako u txi pimisa to wa woninga kuveti nem, u txidemani ka hombe ngutu.

24 “Kha ngaho m’thu awu a nga thumelako vakoma vambidi, nguko a na dhunda mmweyo e nyenya mmwani, ni ku a na nama-nama ni mmweyo e kanyisa mmwani. Anu kha mi na kusikota kuthumela Txizimu ni kulava kuganya.

25 “Ngu toneto, ani na mi gela ku khani, lekani kuvilela ngu wutomi wanu, ngu kupimisa to mi na dya txani mwendo mi na sela txani, mwendo kukarateka ngu mimidi yanu to mi na ambala txani. Ina wutomi hi nga wa lisima kupinda sakudya kani? Ni wona mmidi hi nga wa lisima kupinda siambalo kani? 26 Wonisisani kwati sinyana, sona kha si phayi nem kha si eluli kha si veketeli sakudya sisangalani, hambiketo Tate wanu wa nzumani wa si dyisa. Ina anu kha mi nga va lisima ku si pinda? 27 I mani kwanu, awu ngu mhaka ya kuvilela a nga sikotako kuengetela hambi meneti yimweyo ka wutomi wakwe kani? 28 Se ngu kutxani mi txi vilela ngu mhaka ya siambalo? Wonani ati ma kulisako tona makhoñwa a txitinga, kha ma thumi nem kha ma rungi. 29 Kambe na mi gela ku khani hambiku Solomoni a nga ti ganyile ngutu kha nga za e ambala kufana ni dimwedo da ona. 30 Se aku Txizimu txi tshuriselako mwasi wa txitinga nga tiya, awu wu kuho nyamsi, mangwana wu hiswa ngu mndilo, ina txi nga tandeka ku mi ninga so ambala, anu va likholo la lidotho? 31 Ngu toneto mi nga thukeni mi txi pimisa ngutu to: ‘Hi na dya txani?’ Mwendo ku: ‘Hi na sela txani?’ Mwendo ku: ‘Hi na ambala txani?’ 32 Nguko a siya ngu sona si vamatiko va si dhunukelako. Tate wanu wa nzumani wa ti ziva ti to ma si lava sotshe silo siya.

33 “Kukhata, simamani mi lava Mfumo wa Txizimu ni kuhanya ngu milayo ya txona, se sotshe siya simwani mi na engetelwa. 34 Ngu toneto, mi nga zumbeni mi txi vilela ngu ta mangwana nguko ditshiku da mangwana di ni ta dona. Ditshiku ni ditshiku da dinganelwa ngu sikarato sa dona.

7 “Lekani kulamula vamwani kasiku Txizimu txi si mi lamuli nananu. 2 Nguko mi na lamulwa nga ti mi lamulisako tona vamwani, ni ti mi ñolisako tona vamwani mi na ñoliswa toneto nanu. 3 Se ngu kutxani u txi wona txizokoro ka diso da mwananu, kuveti awe u ni txigodho ka diso dako kani? 4 Mwendo u nga sikotisa kutxani kugela mwananu u txi: ‘Ema ni ku thavisa txizokoro disoni kwako,’ kuveti awe u ni txigodho disoni kwako kani? 5 M’kanganyisiwe! Khata ngu kuthavisa txigodho disoni kwako ngu kona u no sikota kuwona kha kwati kuthavisa txizokoro txi ku disoni ka mwananu.

6 “Mi nga ningeni timbwa silo so sawuleka, hambi kuningela siketi-keti ka tikhumba. Kasiku ti si si kandeteli ti tshumela ti mi jikela ti mi vhandamula.

7 “Simamani mi kombela mi na ningwa; simamani mi xota mi na si mana. Simamani mi peka dhalisensa* mi na tulelwa. 8 Nguko votshe vale va kombelako va ningwa; ni votshe vale va xotako va si mana; ni votshe vale va pekako dhalisensa va tulelwa. 9 Kasi i mani kwanu, wo ngako mwanana wakwe a txi kombela dipawa a m’ningako dirigwi kani? 10 Mwendo ngako a txi kombela txihaka a m’ningako mnyoka? 11 Ngu toneto, anu hambiku mi ku vabihi, ma ziva kuninga sa sinene vanana vanu. Se kha ni wombi ngu Tate wanu wa nzumani, ene a na ninga sa sinene ava va m’kombelako.

12 “Ngu toneto, totshe ati mi lavako ku vathu ve mi mahela, va maheleni nanu toneto nguko ngu toneto ti wombwako ngu Mlayo ni Vaprofeti.

13 “Wulelani ngu dipangu do songa, nguko nzila ayi yi yisako kulovani ni dipangu da kona si anamile, se mba vangi va belako ngu dona. 14 Kuveti dipangu ni nzila ayi yi yisako wutomini si songile ni ku vadotho va belako ngu yona.

15 “Ti woneleni ka vaprofeti va makuhu, ava va tako kwanu va di ti kapekile didhowo da tinvuta, kuveti ngu mndani maxolwa* aya ma vhandamulako. 16 Mi na va ziva ngu mithumo yawe. Ina m’thu a nga hapha mauvha amu ka maxexo? Ni makuwu amu ka sihaha kani? 17 Ngu toneto, wotshe mndonga wa wunene wu veleka mihando ya yinene, aniko wotshe mndonga wo biha wu veleka mihando yo biha. 18 Mndonga wa wunene wu nge veleki mihando yo biha, ni mndonga wo biha wu nge veleki mihando ya yinene. 19 Yotshe mindonga ayi yi si velekiko mihando ya yinene yo gangwa yi hiswa. 20 Ngu ditshuri, vaprofeti vonevo va makuhu mi na va ziva ngu mithumo yawe.

21 Hi nga votshe ava va ku: ‘Mkoma, Mkoma va no bela ka Mfumo wa nzumani, kambe ku no bela basi avale va mahako kuranda ka Tate wangu wa nzumani. 22 Ka ditshiku donedo vo tala va na ta khona kwangu: ‘Mkoma, Mkoma kha ha profeta ngu ditina dako kani? Kha ha hinga madhimoni ngu ditina dako kani? Kha ha maha sixamaliso* so tala ngu ditina dako kani? 23 Kambe ani ni na va gela ku khani: ‘Kha ni mi zivi ani, khukhani hawa vabihino.’

24 Ngu toneto, awu a engisako ati ni ti wombako ni kutshumela e ti maha a fana ni wamwamna wa mapimo, awu a akako nyumba yakwe txitimwi ka dirigwi. 25 Mbimo yi ma nga wa mati yi talelwa, kupeka moya wa hombe yona kha ya wa nguko yi akilwe txitimwi ka dirigwi. 26 “Aniko awule a engisako ati ni ti gondisako, kambe a si ti mahi a fana ni wamwamna wule wa txiphuku-phuku a ko khula txivhunyi e aka nyumba yakwe. 27 Se ku to wa mati yi talelwa, yi pekwa ngu moya wa hombe, ngu toneto yi to wa yi txi njaa hahatshi.”

28 A di gwitile kuwomba-womba timhaka tiya, txitshungu txi to xamala txi txi kayee, ngu kupfa magondiselo akwe. 29 Nguko aku a nga txi va gondisa timhaka ta Txizimu, a si va gondisi kufana ni vamabhalani vale vawe.

8 Mbimo yi Jesu a nga txhika ngu mmangoni, txitshungu txi to m’londetela. 2 Se a to telwa ngu wamwamna a nga ti ni tshekela a txi ta bwaka e m’khizamela a txi khene: “Mkoma, ngako u txi ti lava u nga ni hanyisa.” 3 Se a to nawuluta diwoko dakwe e gwesa wule wamwamna, a txi khene: “Na ti lava, basiswa.” Neti a nga womba toneto, ene a to basiswa ka tshekela. 4 Se Jesu a to khene: “U nga geli m’thu, aniko tsula u ya ti kombekisa ka mprista, u humisa mningelo awu wu nga gemwa ngu Mosi kasiku ve ti wona.

5 Mbimo yi a nga bela Kapernawume, komandante wa masotxhwa a to mtshuketela. 6 A txi khene: “Mkoma, txithumi txangu txa lwala khe mtini txi ni paraliziya, phela txo xupheka ngu ditshuri.” 7 Se Jesu a to m’gela ku khene: “Ni na m’hanyisa ni txi hoka mtini kwako.” 8 Se komandante wule wa masotxhwa a to m’xamula a txi khene: “Kha ni faneleki ti to u ta mtini kwangu, womba u di kona hawa, ene a na hanya. 9 Nguko hambi ani ni ni vathu ava ni va rumako, ni txi ti lava na gela disotxhwa dangu ni txi: ‘Tsula,’ di tsula; ni gela dimwani ni txi: ‘Ngono,’ di ta, ni gela txithumi txangu ni txi: ‘Maha tiya,’ txi maha.” 10 Mbimo yi Jesu a nga pfa tiya a to xamala e gela vale a nga ti navo a txi khene: “Na mi gela ngu ditshuri ku khani: Amuwa Israyeli kha ni se mana m’thu wa likholo lo fana ni liya. 11 Kambe na mi gela ku khani vathu va vangi va na ta ngu otshe madhawa a hamafuni, va ta dya hamezani kumweko ni Abrahamu, Izaki ni Jakobe ka Mfumo wa nzumani. 12 Kuveti ava i ku vanana va Mfumo va na rinzwa hahanze txidemani. Kona kheyo va na peka tihuwa ni kugugurusela makwasa. 13 Jesu a to gela komandante wule a txi khene: “Tsula. Ti na maheke nga ti u nga kholwisa tona.” Se txithumi txakwe txi to hanyiswa ka mbimo yoneyo.

14 Se mbimo yi Jesu a nga hoka mtini ka Pedro a to ya mana mkokati* wa Pedro a di otete nguko ati ni feveri. 15 Jesu a to gwesa diwoko dakwe, se feveri yi to hangalaka e khata kuthumela Jesu. 16 Mbimo yi di nga swa, va to m’tisela vathu ava va nga ti ni madhimoni. Ene a to hinga mimoya ngu kuthumisa dipswi ni kuhanyisa valwati, 17 kasi kutatiseka ati ti nga wombwa ngu mprofeti Isaya to khene: “Ene a tekile malwati athu ni kurwala mipando yathu.”

18 Mbimo yi Jesu a nga wona to a randetwe ngu txitshungu, a to txi ruma ti to txi tshawunyeta txi ya mtxhatuko. 19 Se mabhalani wo kari a to ta kwakwe a txi ta khene: “M’gondisi, ni na kulondisa o va hani u no ya kona.” 20 Kambe Jesu a to m’gela a txi: “Tingowo ti ni tiphako, ni sinyana si ni sisaka aniko Mwanana wa M’thu kha nga ni ko sisa msungo.” 21 Se mmweyo wa vagondiswa a to ta e ta khene: “Mkoma no kombela kukhata ngu ku ya tshotsha tate wangu.” 22 Jesu a to m’gela ku khene: “Awe simama u ni londisela, leka vafi ve tshotsha vafi vawe.”

23 Jesu a to bela ngalavani se vagondiswa vakwe va to m’londisa. 24 Ku to khata txihuhuri txa hombe matini ha koza ngalava yi khubhunyetwa ngu mavimbi, kambe Jesu a txo otela. 25 Va to m’tshuketela ve ya m’wusa va txi: “Mkoma hi lamulele, ho lava kufa phela!” 26 Se Jesu a to va gela a txi khene: “Ngu kutxani mi txi thava, anu vathu va likholo la didotho?” Msana keto a to wuka e kawuka txihuhuri ni linene, se ku to zenga ngutu. 27 Avale a nga ti navo va to xamala ngutu va txi: “Kasi m’thu wo zumbisa kutxani wuwa wo hambi sihuhuri ni linene sa m’engisa?”

28 Mbimo yi a nga hoka mtxhatuko wa madhawa a Gadhara a to telwa ngu majaha mambidi ma nga ti ni madhimoni ma nga txi zumba simitera. Majaha eyo ti txi wuya! A walo a nga txi tsana kupinda ngu nzila ayi ma nga txi maneka ka yona. 29 Se ma to khata kukwangula ma txi: “Hi to ku onhela txani awe Mwanana wa Txizimu kani? U tete ku ta hi lovisa ku sise hoka mbimo ya kona kani?” 30 Ngu kulenyana kheya ku ti ni tikhumba ta tingi ti nga ti kudyani. 31 Se madhimoni ma to m’kombela ma txi: “Ngako u txi lava ku hi hinga, hi leke hi ya tikhumbani.” 32 Ene a to ma gela a txi: “Tsulani.” Se ma to huma me tsula tikhumbani, se totshe tikhumba ti to tutuma ti bela matini, ti fela koneho. 33 Vafuyi vale va tikhumba va to tutuma ve ya didhoropani ve ya womba totshe ati ti nga va mahekela ni ti ti nga humelela majaha ale ma nga ti ni madhimoni. 34 Se votshe vathu va didhoropani va to huma ve yela Jesu va txi kombela ti to e huma didhoropani mule.

9 Ngu toneto, ene a to bela ngalavani e tshawunyeta e ya didhoropani kwakwe. 2 Neti a nga hoka va to m’tisela wamwamna a nga ti ni paraliziya, a di otete ka txipadhiyola. Mbimo yi a nga wona likholo ali va nga ti nalo, Jesu a to gela wamwamna wule a txi: “U nga thave mwanangu! Sigoho sako si divaletwe.” 3 Mbimo yi va nga wona tiya, vamabhalani vo kari va ditiko va to pimisa tiya: “Mamo wuwa wa ruka.” 4 Aku Jesu a nga txi ziva ta mbiluni, a to va gela ku khene: “Ngu kutxani mi txi pimisa timhaka to biha kani? 5 Mi ti wonisa kutxani? Ngu tihi ti hehukako? Ku khawe ‘sigoho sako si divaletwe’ mwendo ku khawe ‘khukha u txi tsimbila’? 6 Ngu toneto, atiya ti maheka kasiku anu mi txi ti ziva to Mwanana wa M’thu a na ni mtamo wo divalela sigoho hamafuni.” Ene a to gela dijaha dile da paraliziya a txi: “Khukha u txi ema, teka txipadhiyola txako u tsula mtini.” 7 Se ene a to khukha e tsula mtini. 8 Mbimo yi txitshungu txi nga wona tiya txi to thava ngutu, txi dhumisa Txizimu, atxi txi nga ti ningile mtamo wule Jesu hambiku i nga ti m’thu.

9 Msana keto, Jesu a to simama e tsimbila se a tona wona wamwamna awu a nga txi dhanwa ku i Matewu a di khalahatshile ka wukhalo wo hakelisa resa, e m’gela ku khene: “Ngono u ta va m’londeteli wangu.” Se ene a to khukha e m’londisa. 10 Ngu mbimo yimwani a di khalahatshile hamezani a txi dya, ku to hoka vakhupisi ni vaonhi ve ta khata kudya ni Jesu kumweko ni vagondiswa vakwe. 11 Kambe, mbimo yi Vafarisi va nga wona tiya, va to wotisa vagondiswa va Jesu va txi kha vona: “Ngu kutxani m’gondisi wanu a txi dya kumweko ni vakhupisi ni vaonhi kani?” 12 Mbimo yi Jesu a nga ti pfa a to khene: “Ava va si lwaliko kha va lavi dhokodhela, aniko dhokodhela a lawa ngu va va lwalako. 13 Ngu toneto tsulani mi ya gonda to ti womba txani tiya: ‘Ani ni lava wuxinji, i si nga miningelo.’ Nguko kha na tela ku ta dhana vo lulama, kambe ni tete sigohi.”

14 Se vagondiswa va Johani va to tshuketela Jesu ve m’wotisa va txi: “Ngu kutxani vagondiswa vako va si jejuwari kuveti athu ni Vafarisi ha jejuwara kani?” 15 Jesu a to va xamula a txi khene: “Vangana va noivho kha va nga ni txivangelo txo dila kuveti noivho a ngadi a txi hanya. Kambe ma ta masiku aya noivho a no tekwa, se ve sala vokha, ngu yo mbimo va no jejuwara. 16 Kha ngaho awu a rungako txiziva txa txiphya ka nguwo yo sakala, nguko txi na engetela kusakata nguwo yi sala i di txinvanvi. 17 Ina u nga thela vhinya ya yinene ka misava ya kale? Ngako u txi maha toneto, misava yi na bhandeka se vhinya yi thekela ni misava ya kona yi sakala. Kambe, vhinya ya yinene yi fanete kuthelwa ka misava ya yiphya, se vhinya ni misava ya kona si na xayiseka.”

18 A txi ngadi a txi womba toneto, mthangeli wo kari a to tshuketa hafuhi kwakwe e m’khizamela a txi khene: “Ti nga maha mwanana wangu se a di fite, kambe ni kombela u ta m’sanzeka diwoko, ene a na tshumela e hanya.”

19 Se Jesu kumweko ni vagondiswa vakwe va to khukha ve tsula nayo. 20 Ka mbimo yoneyo, ku ti ni wamsikati awu a nga heta 12 wa malembe a txi lwala ngu malwati o huma mnoha. Se a to tshuketela ngu msana ka Jesu e gwesa titshokani ka siambalo sakwe. 21 Nguko a txi pimisa tiya: “Hambi ni txo gwesa siambalo sakwe basi, ni na hanya.” 22 Se Jesu a to tshembereka e wona wule wa msikati, a nje khene: “U nga thavi mwanangu! Likholo lako li ku hanyisile.” Kukhukhela ka yona mbimo yile, awule wa msikati a to hanyiswa.

23 Mbimo yi a nga hoka mtini ka mthangeli wa disinagoga e wona vathu va vangi vamwani va txi veta misengele, vamwani va txi peka tihuwa. 24 Jesu a to khene: “Khukhani hawa, nguko dihorana diya kha da fa, di to otela.” Se va to khata ku m’seka ve m’poyilela. 25 Mbimo yi Jesu a nga va humisa hahanze, a to bela e ya ñola diwoko da dihorana dile, se dona di to wuka di hanya. 26 Ati a nga maha ti to hangalaka ni dotshe ditiko.

27 A txi ngadi a txi tsimbila, ku to humelela majaha mambidi i nga ti mabhofu ma txi kwangula ma txi kha ona: “Hi pfele wusiwana Mwanana wa Dhavhidha.” 28 Msana ko bela nyumbani, majaha ale a mabhofu ma to ta ka Jesu, se Jesu e ma wotisa to: “Ina ma kholwa to ni nga mi hanyisa kani?” Ona ma to xamula ma txi: “Ina Mkoma.” 29 Se a to gwesa maso awe a txi khene: “Ti na maheke ngu ku ya ngu likholo ali mi nga li kombisa.” 30 Se maso awe ma to tuleka, ni ku Jesu a to va gela ku khene: “Mi nga geleteleni vathu mhaka yiya.” 31 Kambe, neti va nga khukha va to khata kuhangalasa mhaka ka dotshe didhoropa dile.

32 Mbimo yi va nga txi tsula, ku to humelela vathu va txi m’tisela wamwamna wo kari wa txiduma, awu a nga ti ni didhimoni. 33 Mbimo yi didhimoni di nga hingwa, dijaha dile da txiduma di to tshumela di womba-womba. Se txitshungu txi to xamala ngutu txi txi: “Kotshe muwa Israyeli kha ku khali kumaheka timhaka to nga tiya.” 34 Kambe Vafarisi va to kha vona: “Phela awuwa a ningwa mtamo wo hinga madhimoni ngu xefe ya madhimoni.

35 Se Jesu a to khata kutsimbila ka otshe madhoropa ni sidhoropana sa kona e gondisa masinagogani kwawe. A txi txhumayela mahungu a manene a Mfumo, e hanyisa vathu ka totshe tixaka ta malwati, ni ka totshe tixaka ta mipando ayi va nga ti nayo. 36 Mbimo yi a nga wona txitshungu a to txi pfela wusiwana nguko txi ti txheka ni kudyiswa khayi-khayi nga tinvuta to mbi na m’dyisi. 37 Se a to gela vagondiswa vakwe a txi khene: “Kuelula ngu ditshuri nga hombe, kambe vathumi vadotho.” 38 Ngu toneto, kombelani Nyamne wa kuelula ti to e rumela vathumi ka mthumo Wakwe wa kuelula.

10 Se ene a to dhana vagondiswa vakwe va 12 e va ninga mtamo wo hinga madhimoni, ve hanyisa vathu ka totshe tixaka ta malwati ni ka totshe tixaka ta mipando.

2 Matina a 12 wa vapostoli vakwe ngu yawa: Wo khata i Simoni, awu a nga txi dhanwa ku i Pedro, ni mnanda wakwe Andreya kumweko ni Jakobe, mwanana wa Zebhedhewu ni mnanda wakwe Johani, 3 Filipi ni Bhartolomewu, Tomasi ni Matewu awu i nga ti mkhupisi, Jakobe mwanana wa Alfewu ni Tadhewu, 4 Simoni i nga ti wa mithumo ngutu, ni Judhasi Iskariyoti awu a nga gwita e xavisa Jesu.

5 Jesu a to rumela vale va 12 e va ninga sileleto siya: “Mi nga tekeni nzila yo ya ka vamatiko nem mi nga beleni ka didhoropa da Samariya, 6 kambe tsulani ka tinvuta ati ti nga mwalala ta ditiko da Israyeli. 7 Mi txi tsula, txhumayelani mi txi khanu: ‘Mfumo wa nzumani wu hafuhi.’ 8 Hanyisani valwati, wusani vakufa, basisani ava va tshekela, mi hinga madhimoni. Ningelani mahala nguko nanu mi si mani mahala. 9 Mi nga longeni txipatxhi txi ku ni oru, prata mwendo kobre. 10 Nem mkwama wa timbuva, nem siambalo so txitxa nem masandaliya, nem ndonga, nguko awu a thumako a fanelwa ngu kuningwa sakudya.

11 “Ni ka dihi didhoropa mwendo txidhoropana mi belako, xotani awu a ti lavako kupfa mahungu anu, mi txi zumba koneho kala mi khukha. 12 Ngako mi txi bela mtini ko kari, va loseni. 13 Ngako vanyamne va mti va txi tsakela, kurula aku mi va navelelako ku na zumbe navo. Aniko ngako va si tsakeli, kurula kwanu ku na tshumeleli kwanu. 14 Kotshe amu va no mbi mi amukela mwendo va si mi engisi, mbimo yi mi khukhako mtinimo, mwendo didhoropanimo, huphutani lithulu mikondoni kwanu. 15 Ngu ditshuri, na mi gela ku khani ka Ditshiku da Kulamulwa ti na ta panda ngutu ka didhoropa donedo kupinda hambi ni Sodhoma ni Gomora.

16 “Ni mi ruma nga tinvuta hagari ka vanyapwe, ngu toneto txharihani nga minyoka, mi va vo rula kufana ni matuva. 17 Ti woneleni ka vathu, nguko va na mi ningela matribhunali ni ku mi kwapela masinagogani kwawe. 18 Mi na ningelwa ka vakoma ni ka vathangeli kasiku mi ya ni fakazela masoni kwawe ni ka vamatiko. 19 Kambe ngako va txi mi ningela, mi nga karatekeni ngu ku pimisa to mi na womba txani mwendo kuwomba-wombisa kutxani, nguko ati mi no ti womba mi na ti ziva ka yona mbimo yoneyo. 20 Nguko kha mi na mbi womba-womba mokha, aniko, moya wo sawuleka wa Tate wanu wu na mi ninga ati mi no womba. 21 Nguko m’thu a na ningela mwanawe kasiku e dawa, tate a na ningela mwanana wakwe, ni vanana va na wukela vaveleki vawe ni ku va ningela ve dawa. 22 Se mi na nyenywa ngu vathu votshe ngu mhaka ya ditina dangu, aniko awu a no timisela kala magwito a na poniswa. 23 Ngako va txi mi xanisa ka didhoropa do kari, tutumani mi ya ka dimwani nguko na mi gela ku khani: Kha mi na mbi heta kutenderuka otshe madhoropa a Israyeli a si nzi kuhoka Mwanana wa M’thu.

24 “M’gondi kha pali m’gondisi wakwe, ni txithumi kha txi pali nyamne wa txona. 25 Ta dingana ku m’gondi e fana ni m’gondisi wakwe. Ni txithumi txi fana ni nyamne wa txona. Se ngako va di dhani nyamne wa mti to i Bhelzebhule,* kha hi wombi ngu va hamwayani kwakwe. 26 Kambe mi nga va thaveni, nguko kha txi ngaho txi nga kelelwa txi no mbi fukulwa, ni ku kha txi ngaho txi nga siswa txi no mbi tumbulwa. 27 Ati ni mi gelako ni di nokha, ti huweleleni. Ni ti ni mi lengelako, ti maheni ti ziwa ngu vathu votshe. 28 Mi nga thaveni awu a dayako mmidi, i si nga wutomi, aniko thavani awu a ku ni mtamo wo lovisa mmidi ni wutomi Gehena. 29 Sindili simbidi kha si xaviswi ngu simaleana sa sidotho kani? Kambe txi walo txi wako hahatshi na Tate wanu asi ti zivi. 30 Hambi yotshe misisi ya hamsungo kwanu yi batwe. 31 Ngu toneto, mi nga thaveni txilo nguko anu mi va lisima ngutu kupinda sindili so tala.

32 “Se awu a no ni tumela masoni ka vathu, nani ni na m’tumela masoni ka Tate wangu a ku nzumani. 33 Kambe awu a no ni lamba masoni ka vathu, nani ni na m’lamba, masoni ka Tate wangu a ku nzumani. 34 Mi nga pimiseni to ni nehile kurula hamafuni, aniko ni tisile ditxhari, i si nga kurula. 35 Nguko ni tete ku ta hambanisa mfana ni tate wakwe, dihorana ni mame wa dona, ni mamanyani ni masale wakwe. 36 Phela m’thu a na nyenywa ngu va hamwayani kwakwe. 37 Awu a dhundako ngutu tate wakwe mwendo mame wakwe ku ni pinda, kha fanelwi ku va m’gondiswa wangu. Nem awule a dhundako ngutu mwanana wakwe wa mfana mwendo wa dihorana ku ni pinda, kha fanelwi ku va m’gondiswa wangu. 38 Ni wule a lambako kurwala phande yakwe ya xanisa* e ni londisa, kha fanelwi ngu ku va m’gondiswa wangu. 39 Awule a lwelako kuxayisa wutomi wakwe, a na wu luza, aniko awule a luzako wutomi wakwe ngu mhaka yangu a na wu mana.*

40 “Awule a mi amukelako, a amukela ni nani, ni wule a ni amukelako a amukela ni Wule a nga ni ruma. 41 Awule a amukelako mprofeti ngu ku va i di mprofeti, a na mana hakelo yo dingana mprofeti. Ni wule a amukelako m’thu wo lulama ngu ku va i di m’thu wo lulama, a na mana hakelo yo dingana m’thu wo lulama. 42 Awule a ningako hambi i txo va kopo ya mati yo tima ditora, mmweyo wa va va vadotho ngu ku va i di m’gondiswa, na mi thembisa ngu ditshuri to a na mana hakelo yakwe.

11 Mbimo yi Jesu a nga gwita kuningela sileletelo ka vagondiswa vakwe va 12, a to khukha ahale va nga ti kona, e ya gondisa ni kutxhumayela madhoropani kwawe.

2 Ka mbimo yoneyo, Johani a ti jele. Se a to pfa mithumo yo xamalisa ayi yi nga txi mahwa ngu Kristu. Ngu toneto a to rumela vagondiswa vakwe ve ya ka Jesu, 3 va txi ya m’wotisa ku kha vona: “Ina ngawe hi nga thembiswa ku u na ta mwendo hi fanete kurinzela mmwani kani?” 4 Se Jesu a to va xamula a txi khene: “Tsulani mi ya gela Johani ati mi ti pfako ni ti mi ti wonako ngu maso anu. 5 Mabhofu ma wona, silima sa tsimbila, va tshekela va basiswa, maphanzeve ma engisa, vakufa va wuswa, ni mahungu a manene ma txhumayelwa ka sisiwana. 6 Awule a no mbi mana txivangelo txo ni kana-kana* a na tsaka.

7 Mbimo yi va nga txi tsimbila, Jesu a to khata kuwomba-womba ka txitshungu mayelano ni Johani a txi khene: “Mbimo yi mi nga tsula txiwulani mi txi ya wona txani? Ina mi txi ya wona litshava ali li nga txi zinginiselwa ngu moya? 8 Se mi txi ya wona txani? Ina mi txi ya wona wamwamna awu a nga ambala siambalo so tshura? Phela ava va ambalako siambalo so tshura ngu va va zumbako tinyumbani ka wukoma. 9 Se mi yete txani kheya? Mi txi ya wona mprofeti, hi nga tona? Ani na mi gela ku khani, awule mi nga m’wona wa pinda hambi mprofeti. 10 Eyo ngu wu ti nga bhalelwa ene to: ‘Wonani! Na rumela m’thu masoni kwako, awu a no thangela kasiku e ku lulamisela nzila.’ 11 Ani na mi gela ku khani: “Ka votshe ava va nga velekwa hamafuni kha ngaho wa hombe kupinda Johani M’bhabhatisi. Kambe awule i ku wa m’dotho ka Mfumo wa nzumani mbwa hombe ku m’pinda. 12 Kukhukhela ka mbimo ya Johani M’bhabhatisi kala kuwa vathu vo tala va ti karatela kulava Mfumo wa nzumani. Se ava va ti karatelako ku wu lava va wu mana. 13 Nguko votshe Vaprofeti ni Mlayo va profetile kala Johani. 14 Se ma kholwa mwendo kha mi kholwi, Johani ngene ‘Elija awu a no ta.’ 15 Awu a ku ni tinzeve a na engise.

16 “Ni nga va fananisa ni txani vathu vava? I nga tile ta vanana va di khalahatshile merkadhu ve dhana vanana kulowe, va txi: 17 ‘Hi mi txhayete muzika ngu misengele, kambe kha ma sinya, hi dite kambe kha ma kombisa kudila kwanu.* 18 Ngu kufana, Johani a tile a si dyi nem a si seli, kambe vathu va kha vona: ‘A ni didhimoni.’ 19 Mwanana wa M’thu wa dya ni kusela, kambe vona va kha vona: ‘Hi nga wonani nyalimito wuwa, didevi do sela ngutu vhinya, mngana wa vakhupisi ni vaonhi.’ Hambiketo wuzivi wu ti komba ngu mithumo ya wona.”

20 Se a to khata kukawuka vahanyi va madhoropa ale a nga mahetela ngutu maxori* kambe va si tisoli a txi khene: 21 “Dikhombo danu anu va Korazini. Dikhombo danu anu va Bhetsayidha. I ti ku maxori aya ma nga mahwa amuwa kwanu ma ti ko mahwa Tiro ni Sidhoni vona va di tisote kale, ve ambala masaka ni kutola dikhuma. 22 Kambe ani na mi gela ku khani: Ka Ditshiku da Kulamulwa ti na ta mi pandela ngutu kupinda hambi Tiro ni Sidhoni. 23 Anu ko, va Kapernawume? Ina mi pimisa to mi na guletwa kala nzumani? Phela anu mi ya dithithani.* Nguko maxori aya ma nga maheka kwanu i ti ko ma to maheka Sodhoma, didhoropa dile nga di diho kala nyamsi. 24 Kambe ani na mi gela ku khani: Ka Ditshiku da Kulamulwa ti na ta mi pandela ngutu hambi kupinda Sodhoma.”

25 Msana ko womba toneto, Jesu a to khene: “Na kudhumisa awe Tata, Nyamne wa nzuma ni mafu, nguko u sisile timhaka tiya ka va vo ziva ni kugonda ngutu, kambe u mahile to ava va vadotho va kona ve ti pfisisa. 26 Awe Tata, ti mahisa tiya nguko akuwa ngu kona kuranda kwako. 27 Sotshe si ningilwe ani ngu Tate. Kha ngaho awu a zivako kwati Mwanana i si nga Tate. Ni ku kha ngaho awu a zivako kwati Tate i si nga Mwanana ni wule a no gondiswa ngu Mwanana kasiku e m’ziva Tate. 28 Motshenu mi thumako mi si humuli, ni nanu mi nemelwako, ngonani kwangu ani ni na ta mi humuta. 29 Pakatani dikange dangu, mi gonda kwangu nguko ani ni m’thu wo rula ni kutiveka hahatshi. Mi txi maha toneto mi na mana kupepa moyani. 30 Nguko dikange dangu da rwaleka ni mrwalo wa kona wa hehuka.”

12 Ka mbimo yoneyo, Jesu a to tsimbila ngu tithembweni ka trigu ngu Sabata. Se vagondiswa vakwe va to pfa nzala, ve khata kuhaphela trigu ve dya. 2 Mbimo yi Vafarisi va nga wona eto va to m’gela ku: “Hi nga wona, vagondiswa vako vo maha ati ti si tumelelwi kumaha ngu Sabata.” 3 Ene a to va gela ku khene: “Ina kha ma gonda ati Dhavhidha ni vavamna va a nga ti navo va nga maha mbimo yi va nga txi pfa nzala kani? 4 To a bete nyumbani ka Txizimu ni va a nga ti navo ve dya mapawa a dithempeleni. Aya ti nga si tumelelwi ku me dyiwa ngu ngene ni va a nga ti navo, kambe ma ti fanete kudyiwa ngu vaprista dwe? 5 Mwendo kha ma gonda ka Mlayo to vaprista va ndaka mlayo wa Sabata dithempeleni, kambe va si mani mnando. 6 Kambe na mi gela to ahawa ku ni txo pinda dithempele. 7 I ti ku mo ti pfisisa ati ti ku: ‘Ani ni lava wuxinji i si nga miningelo’, nga mi sa ninga mnando vathu vo lulama. 8 Nguko Mwanana wa M’thu, i Mkoma wa Sabata.

9 Mbimo yi a nga khukha ngu haleya a to wulela disinagogani kwawe. 10 Se ku ti ni wamwamna a nga ti khwanyete diwoko. Kasiku ve mana kulumbeta Jesu va to m’wotisa ku kha vona: “Ina ta tumelelwa kuhanyisa ngu Sabata?” 11 Ene a to va gela ku khene: “Ngako yimweyo ya tinvuta tanu yi txi wa diphalani ngu Sabata ina mi na mbi yi humisa ngu ku va i di Sabata kani? 12 Ina m’thu hi nga wa lisima kupinda nvuta kani? Ngu toneto, ti lulamile kumaha ta tinene ngu Sabata.” 13 A to gela wamwamna wule a txi khene: “Nawuluta diwoko dako.” Se a to di nawuluta, di so tekela kuhanya di fana ni dile dimwani. 14 Aniko Vafarisi va to huma ve khata kuluka tipulani to lava kudaya Jesu. 15 Mbimo yi a nga ziva mhakeyo, Jesu a to khukha hale. Se vo tala va to m’londisa e ya va hanyisa votshe. 16 Kambe ene a to va gela ku va si thuki ve gela vamwani to ene i ti mani. 17 Kasiku ti tatiseka ati mprofeti Isaya a nga ti womba a txi:

18 “Wonani dilanda dangu adi ni nga di sawula, adi ni di dhundako ngutu, adi di ni xalalisako. Ni na thela moya wangu txitimwi kwakwe, ene a na txhamusela matiko ti to kululama ti womba txani. 19 Ene kha na mbi phikizana ni m’thu, kha na mbi kwangula hambi dipswi dakwe kha di na mbi pfiwa ngu m’thu tiruwani. 20 Kha na mbi funya litshava ali li nga thidyaka, hambi kutima lingoti la dilambu ali li lavako kutimeka, kala kuza e tisa kululama. 21 Ngu ditshuri, otshe matiko mana veka themba ya ona kwakwe.”

22 Va to m’tisela wamwamna awu a nga ti ni didhimoni, ene i ti dibhofu ni ku i ti txiduma, se Jesu a to m’hanyisa e tshumela e si kota kuwomba-womba ni kuwona. 23 Se txotshe txitshungu txi to xamala txi txi womba tiya: “Ina hi nga ene wuwa Mwanana wa Dhavhidha kani?” 24 Mbimo yi Vafarisi va nga pfa tiya va to kha vona: “Awuwa a hinga madhimoni ngu mtamo wa Bhelzebhule mkoma wa madhimoni.” 25 Se aku Jesu a nga txi yi ziva mipimiso yawe a to va gela ku khene: “Ngako mfumo wo kari wu si na wumwewo wu na xulwa. Hambi didhoropa mwendo mwaya awu wu singako ni mpfanano wu na mbi tiya.” 26 Ngu toneto, ngako Sathani a txi ti hinga o ti jikela apune, se ti nga kotekisa kutxani ku mfumo wakwe wu tiya? 27 Aku mi ku khanu ni hinga madhimoni ngu kuthumisa mtamo wa Bhelzebhule vanana vanu ko, va wu mana hani mtamo wo ma hinga? Ngu toneto va no mi lamula ngu tona. 28 Se i di ti to ni hinga madhimoni ngu mtamo wa Txizimu, Mfumo wa Txizimu wu mi hokete.* 29 Ti nga kotekisa kutxani ku m’thu e dhumela mtini ka m’thu wa mitamo e ya m’tekela simaha sakwe a sa khata ngu ku m’sunga? Ngako a di m’sungile ngu kona a no m’tekela simaha sakwe. 30 Awu a si emiko ni nani a kontra ani, awu a si sengeletiko ni nani o hangalasela.

31 “Ngu toneto ani na mi gela ku khani,totshe tixaka ta sionho ni siruko asi vathu va si wombako ni ku si maha va na divalelwa. Aniko wu a rukako moya wo sawuleka kha na mbi divalelwa. 32 I ku tiya, awu a womba-wombako kubiha ngu Mwanana wa M’thu a na divalelwa. Kambe awu a womba-wombako kubiha ngu moya wo sawuleka kha na mbi divalelwa nem konkuwa hambi ka timbimo ati ti tako.

33 “Ngako mi txi phaya mndonga wa wunene mi na elula mihando ya yinene. Kambe ngako mi txi phaya mndonga wa walo mi na elula mihando ya walo. Nguko mndonga wu ziwa ngu mihando ya wona. 34 Vanananu va timamba, ina mi nga sikota kuwomba-womba timhaka ta tinene kuve mi vabihi? Nguko txisofu txi womba-womba ati ti nga tala mbiluni. 35 M’thu wamnene a humisa timhaka ta tinene ngu txisangalani kwakwe, kambe m’thu wo biha a humisa so biha ngu txisangalani kwakwe. 36 Na mi gela ku khani, vathu va na ta ti xamulela ka Ditshiku da Kulamulwa ngu totshe ati va nga wombetela ta nyamwombe. 37 Nguko ati mi ti wombako ngu tona ti no mi maha mi va vo lulama mwendo mi va ni mnando.

38 Ti di ngeto, vamabhalani ni Vafarisi va to kha vona: “M’gondisi, hi kombela u hi mahela txidiwukiso txo kari.” 39 Se ene a to va xamula a txi khene: “Anu vathu va wubihi ni kwa mbi thembeka, ngu kutxani mi txi simama mi lava txidiwukiso? Anu kha mi na mbi wona txidiwukiso tximwani i si nga txile txa mprofeti Jona. 40 Nguko kufana ni ku Jona a nga heta masiku mararu a di mndani ka txihaka, ngu toneto Mwanana wa M’thu nene a na heta masiku mararu a di mafuni. 41 Ka ditshiku da kulamulwa, vahanyi va Ninivha va na ta mi lamula ni ku mi ninga mnando nguko vona va tisote mbimo yi Jona a nga va txhumayela. Kambe ahawa ku ni wo pinda Jona. 42 Ka ditshiku da kulamulwa mfumeli wa txisikati wa wulambwe a na ta wuswa e mi komba ti to anu mi vabihi ni ku va mi di ni mnando, nguko a tile ngu mageneta-mitshi kasi kuta engisa wuzivi wa Solomoni. Kambe ahawa ku ni wo pinda Solomoni.

43 “Ngako moya wo biha wu txi huma ka m’thu, wona wa tsimbila txiwulani wu lava wukhalo wo ya humula wu wu pwata. 44 Se wu txi khene: ‘Ni na tshumela ni ya amu ni nga khukhela kona’, mbimo yi wu hokako wu ta mana to nyumba diphanga yi di hiyetwe yi tshuriselwa. 45 Se wona wu tsula wu ya teka sete wa mimoya ya mtamo ngutu kupinda wona. Ngu msana yi to bela yi khata kuzumba haleya. Mazumbelo a m’thu eneyo ma na va o biha ngutu kupinda makhatoni. Ngu toneto ti no maheka ka vathu vava vo hanya ngu wubihi.”

46 A txi ngadi a txi womba-womba ni txitshungu, mame wakwe ni vananda vakwe va ti emile hahanze va txi lava kuwomba-womba nayo. 47 M’thu wo kari a to m’gela ku khene: “Mame wako ni vananda vako va khe hahanze va lava kuwomba-womba ni nawe.” 48 Se ene a to xamula m’thu wule a txi khene: “I mani mame wangu, ni vananda vangu mba mani?” 49 Ene a to gwimba diwoko e xungameta vagondiswa vakwe a txi khene: “Mame wangu ni vananda vangu ngu vava. 50 Nguko awu a mahako ati Tate wangu a ku nzumani a ti lavako, eyo ngene mfowethu, ndiyangu ni mame wangu.”

13 Ka dona ditshiku dile, Jesu a to khukha mtini e ya khalahatsha mabambe* ka linene. 2 Txitshungu atxi txi nga ti m’randete i ti txa hombe ngutu, se a to khukha e ya bela ngalavani e khalahatsha, se txitshungu txi maneka mabambe ka linene. 3 Ene a to va gondisa timhaka to tala, ngu kuthumisa sidinganiso. E va gela ku khene: “Mphayi wo kari a to huma e ya kuphayani. 4 Mbimo yi a nga txi phaya, timbewu timwani ti wete hanzila, se ku to ta sinyana si ta dya. 5 Timbewu timwani ti wete ka marigwi amu ku nga singa ni mafu a mangi, se ti to kuluveta ti kula nguko mafu ma sa tshima.* 6 Aniko, mbimo yi ditambo di nga khata kuhisa ti to pfa kuhya, ti wuna nguko ti si nga ni mikuluti. 7 Timwani ti to wela ka mwasi wa mipa, se mwasi wu to kula wu kura timbewu tile. 8 Timbewu timwani ti to wela ka mafu a manene, se ti to khata kuveka mihando, timwani 100, timwani 60, timwani 30. 9 Awule a ku ni tinzeve, a na engise.”

10 Se vagondiswa vakwe va to ta va txi ta m’wotisa va txi: “Ngu kutxani awe u txi va gondisa ngu kuthumisa sidinganiso kani?” 11 Ene a to va xamula a txi khene: “Anu mi ningilwe kupfisisa sihunja so sawuleka sa Mfumo wa nzumani, aniko vona kha va ningwa.” 12 Nguko awule a ku naso a na ningwa simwani ni ku a na engetelwa si tala ngutu, kambe awule a si ngako naso, a na tekelwa hambi ni sona asi a ku naso. 13 Ni va gondisa ngu kuthumisa sidinganiso, nguko vona va wona, kambe va ti maha mabhofu. Va engisa, kambe vo engisa mahala nguko kha va pfisisi txilo. 14 Se kutatiseka ati ti nga wombwa ngu mprofeti Isaya to khene: ‘Mi na engisa kambe kha mi na mbi pfisisa txilo, mi na khanu mo wona, kuve kha mi woni txilo. 15 Nguko timbilu tawe ti mahile marigwi. Vona va ti vhate tinzeve ni maso, kasiku va si woni ngu maso nem va si engisi ngu tinzeve tawe. Nem timbilu tawe kha ti pfisisi txilo kasiku ve ti sola ve mana kuhanyiswa.’

16 “Aniko tsakani anu, nguko maso anu ma wona ni tinzeve tanu ta engisa. 17 Nguko na mi gela ditshuri ni txi khani, vaprofeti vo tala ni vathu vo lulama va txi ti lava ngutu kuwona ati mi ti wonako, aniko kha va ti wona; va txi ti lava kupfa ati mi ti pfako aniko kha va ti pfa.

18 “Konkuwa engisani txhamuselo ya txidinganiso txa wu a nga phaya mbewu. 19 Ngako m’thu atxi engisa mahungu a Mfumo aniko a si ma pfisisi, ku ta M’bihi e ta dula asi si nga phaywa mbiluni kwakwe, eyo i mbewu ayi yi nga phaywa hanzila. 20 Ayi yi nga phaywa ka wukhalo wa marigwi ngu wule a nga engisa mahungu a Mfumo e tekela ku ma amukela ngu litsako. 21 Kambe ene kha mili mikuluti, hambiketo, a na simama ngu mbimonyana, kambe ngako ku txi humelela sikarato ni kuxaniswa ngu mhaka ya mahungu a manene, ene a na tshwetemuka e wa. 22 Ayi yi nga phaywa hagari ka mwasi wa mipa, ngu wule a engisako didungula da Mfumo, aniko ngu kuvilela ngu sa mafu awa ni kuxengwa ngu kulava kuganya, ku kura dipswi se yi si* veleki. 23 Ayi yi nga phaywa ka mafu a manene, ngu wule a engisako mahungu a Mfumo e ma pfisisa, se mbewu yoneyo yi veleka mihando, yimwani yi veleka 100, yimwani yi veleka 60, yimwani 30.”

24 A to va ninga tximwani txidinganiso a txi khene: “Mfumo wa nzumani wu nga fananiswa ni m’thu wule a phayako mbewu ya yinene thembweni kwakwe. 25 Mbimo yi vadimi va nga txi otela, ku to ta mlala e ta txhutxheta nyamsavari hagari ka trigu e gwita e tsula. 26 Mbimo yi trigu yi nga rumbuka yi veleka, ku to tumbuleka nyamsavari.* 27 Se sithumi sakwe si to m’wotisa si txi kha sona: ‘Mkoma, ina khwa phaya mbewu ya yinene basi thembweni kwako, nyamsavari a ta ngu hani? 28 Ene a to va xamula a txi khene: ‘M’lala a nga maha eto.’ Se sithumi si to m’wotisa si txi: ‘Mkoma, u lava hi ya dulela nyamsavari* kani?’ 29 Ene a to va gela ku khene: ‘Ahim-him. Mi nga yeni mi ya dulela nyamsavari, nguko mi nga phazama mi dula trigu ni yona. 30 Si lekeni sotshe si kula, kala ka mbimo ya kuelula, ka mbimo ya kuelula ni na gela sithumi sangu ni txi, khatani ngu kudulela nyamsavari mi m’sungelela ngu tinyanda kasiku e ya hiswa; msana keto mi na elula trigu mi ya yi veka txisangalani kwangu.’”

31 A to va gela tximwani txidinganiso a txi khene: “Mfumo wa nzumani wu fana ni mbewu ya txinapi ayi m’thu a nga teka e yi phaya thembweni kwakwe. 32 Ngu yona ya yidotho ya kona ka totshe timbewu, aniko mbimo yi yi kulako yi maha ya hombe kupinda mindonga yimwani aha koza sinyana sa nzumani si mana wukhalo wo aka ka wona.”

33 A to va gela kambe txidinganiso tximwani a txi khene: “Mfumo wa nzumani wu fana ni mtshumbelo awu wamsikati a wu tekako e wu patanisa ni trigu ya yingi kala kuza yotshe trigu yi kukumuka.”

34 Jesu a ti womba-womba ni txitshungu ngu kuthumisa sidinganiso. Ngu ditshuri, txi walo atxi a nga txi txi womba a si thumisi txidinganiso, 35 Kasiku ti tatiseka ati ti nga wombwa ngu mprofeti to khene: “Mkanani kwangu ku na huma sidinganiso. Ni na huwelela ati ti nga ti baramile kukhukhela makhatoni.”

36 Msana ko leka txitshungu txi tsula, ene a to wulela nyumbani. Se vagondiswa va to m’tshuketela va txi ya kha vona: “Hi kombela u hi gela txhamuselo ya txidinganiso txa nyamsavari wa thembweni.” 37 Ene a to va xamula a txi khene: “Mphayi wa mbewu ya yinene i Mwanana wa M’thu, 38 aniko thembwe ditiko. Mbewu ya yinene ngu vanana va Mfumo, kambe nyamsavari ngu vanana va M’bihi. 39 Mlala awu a nga phaya i Dhawulosi. Kuelula ngu gumani ka timbimo* ni ku vaeluli tingilozi. 40 Kufana ni ku nyamsavari a dulelwako e ya hiswa, ti na mahisa toneto kugumani ka timbimo. 41 Mwanana wa M’thu a na rumela tingilozi takwe, tona ti na ta thavisa Mfumoni kwakwe sotshe asi si mahako vathu ve onha ni va va mahako to biha. 42 Tona ti na va rinza mdhikilani ka mndilo. Ngu eho va no ya peka tihuwa ni ku ya gugurusela makwasa. 43 Ka mbimo yoneyo, ava vo lulama va na phatima ngutu kufana ni ditambo Mfumoni ka Tate wawe. Awu a ku ni tinzeve a na engise.

44 “Mfumo wa nzumani wu fana ni txuma atxi txi nga siswa thembweni, atxi wamwamna wo kari a ku ya txi tumbula, e txi siseta; e tsaka ngutu aha koza eya xavisa sotshe asi a ku naso e ya xava thembwe yile.

45 “Mfumo wa nzumani wu nga fana kambe ni mxavisi wule a tsulako e ya xavisa siketi-keti sa lisima. 46 Mbimo yi a nga mana txiketi-keti txo dhula ngutu, a to tsula e ya xavisa sotshe asi a nga ti naso e ya txi xava.

47 Mfumo wa nzumani wu nga fana kambe ni likoka lo kukuta ali li betwako matini kasi kuzweta sihaka sa totshe tixaka. 48 Mbimo yi li talako vo li humisa hahanze, ve ta khalahatsha ve sawulela sihaka sa sinene ve si beta ka txiya, aniko asile so mbi vhuna txilo ve si tshotsha. 49 Ti na mahisa toneto kugumani ka timbimo. Tingilozi ti nata ti ta hambanisa vabihi ka va vo lulama. 50 Tona ti na rinza vabihi mdhikilani ka mndilo. Ngu eho va no ya peka tihuwa ni kugugurusela makwasa awe.

51 “Mi ti pfisisile ati ni nga mi txhamusela?” Vona va to xamula va txi: “Ina, hi ti mani.” 52 Se ene a to va gela ku khene: “Ngu toneto, m’gondisi wuhi ni wuhi awu a gondisako ngu ta Mfumo wa nzumani a fana ni wamwamna awu i ku patrawu awu a humisako ngu txisangalani kwakwe sa siphya ni sa kale.”

53 Mbimo yi Jesu a nga gwita kutxhamusela sidinganiso soneso a to khukha e tsula. 54 Mbimo yi a nga hoka didhoropani kwakwe a to khata kugondisa txitshungu disinagogani ka txona, aha koza ve xamala va txi: “Mamo wuwa a wu mana hani wuzivi ni mtamo wo maha mithumo yiya yo xamalisa kani? 55 Kasi hi nga ene wuwa mwanana wa m’vati? Mame wakwe hi nga wule a dhanwako ku i Mariya? Vananda vakwe hi nga Jakobe, Josefa, Simoni ni Judhasi? 56 Ni tindiyakwe hi nga tona ti ku ho hagari kwathu kani? Se ene a ti mana hani totshe tiya?” 57 Se va to khata kukana-kana* va si kholwi kwakwe. Kambe Jesu a to va gela ku khene: “Mprofeti wa amukelwa ka matiko mamwani, aniko kha amukelwi ditikoni kwawe, hambi i txo va ngu va mtini kwakwe.” 58 Se kha maha ngutu mithumo yo xamalisa didhoropani mule, nguko va si kholwi kwakwe.

14 Ka mbimo yoneyo, Herodha i nga ti adhimistradhori wa Galileya, a to pfa nduma ya ti Jesu a nga txi maha. 2 Ene a to gela sithumi sakwe a txi khene: “Eyo i Johani M’bhabhatisi. Ene a to wuswa ka vakufa, ngu toneto a sikotako kumaha mithumo yo xamalisa.” 3 Nguko masiku msana Herodha a ti nõte Johani e m’sunga e m’beta jele ngu mhaka ya Herodhiya msikati wa Filipi, mkoma wa Herodha. 4 Nguko Johani atxi m’gela ku khene, kha ti tumelelwi ku u m’teka e va msikati wako. 5 Kambe hambiku a nga txi lava ku m’daya a txi thava txitshungu nguko txi txi wona Johani i di mprofeti. 6 Kambe ka ditshiku di Herodha a nga maha fexta yo tshanganisa malembe akwe, mwanana wa dihorana wa Herodhiya a to sinya ngutu hagari ka va a nga ti va rambile, se Herodha a to tsaka ngutu ta tinene. 7 Ene a to xambanya e m’thembisa ku m’ninga sotshe si a ndi no si lava. 8 Ngu kukuzetelwa ngu mame wakwe, ene a to gela Herodha tiya: “Ni kombela u ni ninga msungo wa Johani M’bhabhatisi a mu ka mbiya.” 9 Hambiku Herodha a nga sa tsaka ngu tona, a sungekile ku ti maha ngu mhaka ya txixambanyo atxi a nga ti mahile, ni ngu kuthava ava a nga ti va rambile. 10 Se, a to rumisa ku ya wilwa msungo wa Johani khe jele. 11 Va to teka msungo, ve wu beta ka mbiya ve ya ningela dihorana dile, se dona di to teka di ya ningela ka mame wa dona. 12 Msana keto, vagondiswa va Johani va to ta va ta teka txirumbi txakwe, ve ya kelela ve gwita va teka mhaka va yi hokisa ka Jesu. 13 Mbimo yi Jesu a nga ti pfa eto, a to khukha hale a nga di kona e bela ngalavani eya txiwulani kasi ku ya zumba ekha. Kambe, mbimo yi txitshungu txi nga ti ziva txi to khukha madhoropani mu txi nga ti kona txi londisa ngu mikondo.

14 Mbimo yi a nga huma ngu ngalavani, a to wona txitshungu txa hombe a txi pfela wusiwana, se e hanyisa valwati. 15 Kambe, mbimo yi di nga swa ditambo vagondiswa va to tshuketela ka Jesu va txi kha vona: “Wukhalo wuwa txiwulani ni ku se wusiku, gela txitshungu txi tsula kasi ku txi ya ti xavela sakudya madhoropani.” 16 Kambe Jesu a to va gela ku khene: “Kha ti lavi kuza ve tsula, va ningeni anu sakudya.” 17 Vona va to m’xamula va txi kha vona: “Kha hi nga ni txilo, ho va ni mtxhanu wa mapawa ni sihaka simbidi dwe.” 18 Se ene a to khene: “Si wuyiseni kheno.” 19 Ene a to rumisa ku txitshungu txi khalahatsha hamwasini. A to teka mapawa yale a mtxhanu ni sihaka sile sa simbidi e wona nzumani, e bonga* e si katekisa. E gwita e khema mapawa e ningeta vagondiswa vakwe, se vagondiswa vakwe ve phakisela ka txitshungu. 20 Se votshe va to dya va txi khura si veka ni kusala asi si nga tata 12 wa tithavangu. 21 Ava va nga dya i di vo dingana kona mu ka 5.000 wa majaha ku si balwi vavasikati ni vanana. 22 Neti va nga gwita kudya, ene a to gela vagondiswa vakwe ve bela ngalavani, ve thangela ve ya mtxhatuko ene a txi ngadi a txi satisana ni txitshungu.

23 Mbimo yi txitshungu txi nga tsula, ene a to kwelela ekha e ya mmangoni kasi ku ya khongela. Di to swa a di ngadi kona kheya ekha. 24 Ngalava se yi ti hagari ka mati* ni ku va txi lwisana ni mavimbi, nguko ku txi peka moya wa hombe. 25 Kambe ngu madrugadha, Jesu a to va yela a txi tsimbila ngu txitimwi ka mati. 26 Mbimo yi vagondiswa vakwe va nga wona Jesu a txi tsimbila ngu txitimwi ka mati va to dhuka va txi kha vona: “Txigonoo!”* Ve peka tihuwa ngu kuthava. 27 Se Jesu a to khene: “Tsanani! Mi nga thaveni txilo, ngani.” 28 Pedro a to xamula a txi khene: “I di awe Mkoma ni dhani ni tsimbila txitimwi ka mati ni ta kwako.” 29 Se Jesu a to khene: “Ngono!” Se Pedro a to huma ngu ngalavani e ya ka Jesu. 30 Kambe, mbimo yi a nga khata kuwonetela txihuhuri a to thava, e khata kubhwabhwamela e kwangula a txi: “Ni lamulele Mkoma.” 31 Jesu a to tekela kunawuluta diwoko dakwe e m’ñola a txi khene: “Awe wo kholwa ka kudotho, ngu kutxani u txi kana-kana?” 32 Msana kova va di bete ngalavani, moya wu to ema. 33 Se ava va nga ti ngalavani va to m’khizamela va txi kha vona: “Awe ngu ditshuri u Mwanana wa Txizimu.” 34 Se va to txhatuka ve ya ka ditiko da Genezareta.

35 Mbimo yi va nga ziva to i Jesu a nga hoka, ku to rumelwa m’biko ka wotshe wukhalo wule, se vathu va to yisela Jesu votshe vathu ava va nga txi lwala. 36 Vona va to m’kombela ti to ve gwesa hambi tshoka ya siambalo sakwe. Se votshe ava va nga txi m’gwesa va txo so hanyiswa.

15 Se Vafarisi ni vamabhalani vota ngu Jerusalema va to ya ka Jesu va txi ya kha vona: 2 “Ngu kutxani vagondiswa vako va si londisi mtumbunuko wa vakale kani? Ngu kutxani va txi lava kudya va si sambi manzani?”

3 Se ene a to va xamula a txi khene: “Ngu kutxani anu mi ndakako mlayo wa Txizimu ngu kulondisela mtumbunuko wanu kani? 4 Nguko Txizimu txi ti khene: ‘Kombisa txithavo ka tate wako ni mame wako,’ futhi ‘awule a no ruketela tate wakwe ni mame wakwe a na dawa.’ 5 Kambe anu mi khanu: ‘Awu a wombako ka tate wakwe ni ka mame wakwe a txi khene: “Sotshe asi ni ku naso i nga ti para ni mi vhuna ngu sona, se ni si ningetete ka Txizimu.” 6 Kha ti sungi ku eyo e kombisa txithavo ka vaveleki.’ Ngu toneto, anu mi maha to dipswi da Txizimu di si vhuni txilo ngu mhaka ya mtumbunuko wanu. 7 Anu vakanganyisino, mprofeti Isaya a wombile ditshuri ngu nganu mbimo yi a nga khene: 8 ‘Vathu vava va womba ngu txisofu basi to va ni engisa kambe timbilu tawe ti kule ngutu ni nani. 9 Phela vona vo ni khozela mahala nguko ati va ti gondisako milayo ya vathu dwe.’” 10 Se ene a to dhana txitshungu txi tshuketa hafuhi a txi txi gela ku khene: “Engisani ni kupfisisa tiya, 11 asi si nyamisako m’thu hi nga si si belako mkanani kwakwe, kambe a nyamiswa ngu si si humako ngu mkanani kwakwe.”

12 Se vagondiswa vakwe va to ta kwakwe va txi ta khona: “Ina wa ti ziva to ati u nga womba ti henyisile Vafarisi?” 13 Ene a to va xamula a txi khene: “Yotshe mindonga ayi yi nga mbi phaywa ngu Tate wangu wa nzumani yi na dulwa. 14 Va lekeni vale, vona mabhofu ma thangelako mabhofu kulowe. Ngako dibhofu di txi thangela* dibhofu kulowe ngu wumbidi wawe va na hojomela diphalani.” 15 Se Pedro a nje khene: “Hi txhamusele txidinganiso txiya.” 16 Se ene a to va xamula a txi khene: “Kasi nananu kha ma pfisisa txilo? 17 Kha mi ti zivi to asi si belako mkanani si pinda si ya mndani si ya humela txitingani* kani? 18 Nguko asi si humako ngu mkanani si khukhela mbiluni, eso ngu sona si nyamisako m’thu. 19 Ngu txikombiso, kudaya, wugango, wubhemba, kupa, kulumbeta vamwani ni kuruketela si huma ngu mbiluni. 20 Eso ngu sona si nyamisako m’thu, kambe kudya sakudya u sa samba manza kha ti nyamisi m’thu.”

21 Se Jesu a to khukha koneho e ya Tiro ni Sidhoni. 22 Wamsikati wo kari wa M’finikiya a nga txi zumba mazona yale, a to tshuketa a txi khene: “Mkoma, Mwana Dhavhidha, ni pfele wusiwana nguko mwanana wangu wa dihorana a ni didhimoni di m’xanisako ngutu.” 23 Kambe ene a to malala a txi dwe. Aha ko za vagondiswa vakwe ve ta m’kombela va txi kha vona: “M’tshumete nguko ene o hi londetela a txi hi mahela diguwa.” 24 Se ene a to va xamula a txi khene:“Ani ni rumetwe kuya ka tinvuta ati ti nga mwalala ta ditiko da Israyeli.” 25 Se awule wa msikati a to ta e ta m’khizamela a txi: “Mkoma, ni kombela u ni vhuna.” 26 Ene a to m’xamula a txi khene: “Kha ti dingani kuteka sakudya sa vanana si ningwa siwana.” 27 Se ene a to m’xamula a txi: “Ina Mkoma, ditshuri, kambe hambi siwana sa dya titshenda ati ti wako ngu hamezani ka va nyamne va sona.” 28 Jesu a to m’xamula a txi: “Kukholwa kwako nga hombe. Ti na maheke nga ti u ti lavisako tona.” Ka mbimo yoneyo dihorana dakwe di to hanyiswa.

29 Jesu a to khukha e ya hafuhi ni linene la Galileya. Msana keto a to kwela txitimwi ka mmango e ya khalahatsha. 30 Se txitshungu txo tala txi txi tshuketela kwakwe txi m’tisela silima, vo dawiswa, mabhofu, siduma, ni vamwani va nga ti ni malwati o hambana-hambana, ve va veka masoni kwakwe e va hanyisa. 31 Ngu toneto, txitshungu txi to xamala ngutu ngu kuwona siduma si txi womba-womba, sikhwala si txi hanyiswa, silima si txi tsimbila ni mabhofu ma txi wona. Se vathu va to dhumisa Txizimu txa Israyeli.

32 Se Jesu a to dhana vagondiswa vakwe a txi khene: “Na txi pfela wusiwana txitshungu txiya, nguko txi zumbile ni nani masiku mararu txi sidyi txilo. Kha ni ti lavi ku va leka ve tsula va di ni nzala, nguko va nga tsimbila ve jiyela hanzila.” 33 Se vagondiswa va to m’wotisa va txi kha vona: “Hi na ma mana hani mapawa o khurisa txotshe txitshungu txiya txa hombe, kuve hi txiwulani?” 34 Se Jesu a to va wotisa a txi: “Mapawa mangahi mi ku nawo kani?” Se vona va to kha vona: “I 7 wa mapawa ni sihakanyana.” 35 Ngu toneto ene a to kombela ku txitshungu txi khalahatsha hahatshi. 36 Ene a to teka sete wa mapawa ni sihaka e si katekisa e khema e ninga vagondiswa vakwe, vagondiswa vakwe ve abanisela txitshungu. 37 Votshe va to dya ve khura si tshumela si sala so dingana kutata 7 wa tithavangu ta hombe. 38 Ava va nga dya i ti 4.000 wa majaha ku si balwi vavasikati ni vanana. 39 Msana ko leka txitshungu txi tsula, Jesu a to bela ngalavani e ya ditikoni da Magadhani.

16 Vafarisi ni Vasadhusi va to ya ka Jesu va txi ya m’duka ngu ku m’kombela to e va mahela txikombiso txo ta ngu nzumani. 2 Ene a to va xamula a txi: “Mbimo yi diswako mi wona nzuma yi di bhilivite nga mndilo, mi womba to di na txa bhem. 3 Ni mixo mi khanu: ‘Nyamsi ku na titila ni kuwa mati nguko nzuma yi bhilivite ni ku ku ni madhuvi.’ Anu ma ti kota kuwomba ati di no txisa tona, kambe kha mi ti koti kutxhamusela sikombiso sa timbimo. 4 Anu vathu va wubihi ni kwa mbi thembeka. Ngu kutxani mi txi simama mi txi kombela txikombiso? Phela mi na mbi kombwa tximwani txikombiso i si nga txile txa Jona. Ti di nga eto ene a to huma kwawe e tsula.

5 Se vagondiswa va to tshawunyeta ve divala kuteka mapawa. 6 Jesu a to va gela ku khene: “Tulani maso, ti woneleni ka mtshumbelo wa Vafarisi ni Vasadhusi. 7 Se va to khata kubhula ngu txawe va txi kha vona: “Hi divate mapawa manuweno.” 8 Mbimo yi Jesu a nga ti pfa a to va gela ku khene: “Anu vathu va kukholwa ka kudotho, ngu kutxani mi txi karateka ngu ku mi nga divala mapawa.” 9 Ina mi nga txi kana-kana? Mo divala mhaka yile ya mtxhanu wa mapawa ma nga dyisa 5.000 wa vathu ni ti to tithavangu tingahi mi nga tata ngu si si nga sala? 10 Mwendo ni ka mhaka yile ya 7 wa mapawa aya ma nga dyisa 4.000 wa vathu ni ti to tithavangu tingahi ta hombe ti nga tala ngu si si nga sala? 11 Ngu kutxani anu mi nga mbi ti pfisisa to kha ni womba-wombi ngu mapawa? Kambe na mi gela ku khani, ti woneleni ka mtshumbelo wa Vafarisi ni Vasadhusi.” 12 “Vona va to pfisisa to a si womba-wombi ngu mtshumbelo wa mapawa, kambe a txi womba-womba ngu ku ti wonela ka tigondo ta Vafarisi ni Vasadhusi.

13 Mbimo yi va nga hoka Khezareya ka Filipi, Jesu a to wotisa vagondiswa vakwe a txi khene: “Vathu va khona i mani Mwanana wa M’thu?” 14 Va to m’xamula va txi kha vona: “Vamwani va womba to u Johani M’bhabhatisi, vamwani va womba to u Elija vamwani va womba to u Jeremiya mwendo mprofeti mwani.” 15 Se ene a txi khene: “Anu ko, mi khanu ngani mani?” 16 Simoni Pedro a to m’xamula a txi khene: “Awe u Kristu, Mwanana wa Txizimu atxi txi hanyako.” 17 Se Jesu a to gela Pedro a txi khene: “U katekile Simoni, mwanana wa Jona, nguko hi nga m’thu a nga kugela, kambe i Tate wangu awu a ku nzumani. 18 Na ku ninga ditina do u Pedro. Txitimwi ka dirigwi diya ni na aka dibanza dangu ni ku dona di na mbi xulwa ngu lifo. 19 Ni na ku ninga tikhiya ta Mfumo wa nzumani. Se totshe ati u no ti sunga hamafuni hawa ti nava ti di sungilwe ni kona nzumani. Ni totshe ati u no ti txhatxha hamafuni hawa ti nava ti di txhatxhilwe ni nzumani.” 20 Ene a to laya vagondiswa vakwe ti to va si thuki ve gela m’thu to ene i Kristu.

21 Kukhukhela ka mbimo yile, Jesu a txi txhamusela vagondiswa vakwe ti to a ti fanete kuya Jerusalema e ya xaniswa ngu madhota, ngu tinduna ta vaprista ni vamabhalani. Ni ku ve m’daya ni kutshumela e wuswa ngu ditshiku da wuraru. 22 Mbimo yi Pedro a nga pfa eto a to m’ndinda ngu didhawa e ya m’kawuka a txi: “U nga wombi eto Mkoma!* Eto kha ti na mbi thuka ti di mahekile ngu ngawe.” 23 Se Jesu a to tshuralela Pedro a txi khene: “Hambana ni nani Sathani! Nguko awe u txitsha.* Ati u ti pimisako hi nga ta Txizimu, kambe nda vathu.”

24 Msana keto, Jesu a to gela vagondiswa vakwe a txi khene: “Ngako m’thu a txi lava ku ni londisa a na ti leke e teka phande yakwe ya xanisa e ni londisela. 25 Awule a lwelako kuxayisa wutomi wakwe a na wu luza, aniko awule a luzako wutomi ngu mhaka yangu a na wu mana.* 26 Nguko ti vhuna txani ku m’thu e ganya ditiko dotshe aniko e luzekelwa ngu wutomi wakwe kani? M’thu a nga ningela txani kasi kuhulukisa wutomi wakwe kani? 27 Nguko Mwanana wa M’thu a na ta ni tingilozi takwe a di ka wudhumo wa Tate wakwe, ka mbimo yoneyo a na ta hakela mmwani ni mmwani ngu kuya ngu mithumo yakwe. 28 Ngu ditshuri na mi gela ku khani: “Hagari kwanu va ho va no mbi fa kala kuza ve wona Mwanana wa M’thu a txi ta ngu Mfumoni kwakwe.”

17 Ku di pindile 6 wa masiku, Jesu a to teka Pedro ni Jakobe ni mnanda wakwe Johani e tsula navo mmangoni wo lapha va di vokha. 2 A to phinduka* va txi m’wona, khohe yakwe yi phatima kufana ni ditambo ni siambalo sakwe si phatima kufana ni liwoningo. 3 Ku to humelela Mosi ni Elija va txi bhula nayo. 4 Se Pedro a to gela Jesu a txi khene: “Mkoma ta tsakisa ku va hawa, ngako u txi ti lava ni nga gwimba matenda mararu: Dimwedo dako, dimwedo da Mosi ni dimwedo da Elija.” 5 A txi ngadi a txi womba-womba va to fenengetwa ngu direfu do phatima. Se ku to pfala dipswi direfuni mule di txi kha dona: “Awuwa i Mwanana wangu, khoni-khoni yangu, awu a ni xalalisako ngutu. Mu engiseni.” 6 Mbimo yi va nga pfa eto, vagondiswa va to khizama ve namisa tikhohe tawe ve thava ngutu. 7 Jesu a to va tshuketela e va gwesa e va gela ku khene: “Wukani. Mi nga thaveni txilo.” 8 Mbimo yi va nga wuka kha va wona mmwani m’thu i si nga Jesu dwe. 9 Mbimo yi va nga txi txhika ngu mmangoni, Jesu a to va gela a txi: “Mi nga geleni m’thu muwoniso wuwa kala Mwanana wa M’thu e wuswa ngu ka vakufa.”

10 Ngu toneto, vagondiswa va to m’wotisa ku kha vona: “Kasi ngu kutxani vamabhalani va txi womba to ku na khata kuta Elija kani? 11 Jesu a to va xamula a txi khene: “Ngu ditshuri Elija wa ta ni ku a na ta mi gondisa totshe. 12 Phela na mi gela to Elija se a tile kambe kha va m’ziva, va mahile totshe ati va nga ti lava ngu ngene. Ngu ha ku fanako, Mwanana wa M’thu nene a na xaniseka manzani kwawe.” 13 Se vagondiswa va to ti pfisisa to a womba-womba ngu Johani M’bhabhatisi.

14 Mbimo yi va nga hoka aha ku nga ti ni txitshungu, wamwamna wo kari a to m’tshuketela e m’khizamela a txi khene: 15 “Mkoma pfela wuxinji mwanana wangu, a ni malwati o tshanuka* ma m’xanisa ngutu. Sikhati so tala ene wa wa hamndiloni ni matini. 16 Ni m’tisile ka vagondiswa vako, kambe vona va ti tandi ku m’hanyisa.” 17 Se Jesu a to xamula a txi khene: “Anu vathu vo* biha ni kwa mbi na likholo, ni na va ni nanu kala mbimo muni kani? Ni na mi timisela kala ditshiku muni kani? M’tiseni kheno.” 18 Jesu a to hinga didhimoni dile di nga ti ka txifanyana, kukhukhela ka mbimo yoneyo txona txi to hanya. 19 Se vagondiswa va Jesu va to m’yela ngu didhawa va txi ya kha vona: “Ngu kutxani athu hi nga tandeka ku di hinga?” 20 Ene a to va gela a txi khene: “Nguko mi ku ni likholo la lidotho. Na mi gela ditshuri ku, i ti ku mo va ni likholo lo dingana ni mbewu ya txinapi,* mi nga gela mmango wuwa mi txi khanu: ‘Khukha hawa u ya hale,’ se wona wu khukha, txi walo mi no txi tanda.” 21 ——

22 Mbimo yi va nga di tshanganile Galileya, Jesu a to gela vagondiswa vakwe a txi khene: “Mwanana wa M’thu a na ningelwa ka vathu. 23 Se vona va na m’daya, aniko a na wuswa ka ditshiku da wuraru.” Se vona va to pandiseka ngutu.

24 Va di hokile Kapernawume, majaha mambidi o hakelisa resa ya madrakma mambidi* a dithepeleni ma to yela Pedro me ya m’wotisa ku khene: “M’gondisi wanu wa hakela resa ya dithepeleni kani? 25 Se ene a to xamula a txi khene: “Ina, wa hakela.” Mbimo yi va nga bela nyumbani, Jesu a to khata ene e womba-womba a txi khene: “He mo Simoni, u ti wonisa kutxani? Vakoma va ditiko va yi mana hani nduwo* ni resa kani? Va hakelisa vanana vawe mwendo vathu vamwani?” 26 Se Pedro a to xamula a txi: “Ka vathu va vamwani,” Jesu a nje khene: “Ngu toneto, vanana vawe kha va hakeli resa. 27 Kambe, kasiku va si hi pimiseli to biha, teka ndowo,* tsula lineneni u ya dota. Txihaka txo khata u no txi mana, tula ka txisofu txa txona, u na mana male ya simbi ya prata, yi teke u ya ti hakelela u hakelela ni nani.”

18 Ka mbimo yoneyo, vagondiswa va Jesu va to m’tshuketela ve ta m’wotisa ku kha vona: “Kasi i mani awu i ku wa hombe ka Mfumo wa nzumani?” 2 Jesu a to dhana tximwanatana e txi emisa hagari kwawe. 3 A txi khene kwawe: “Na mi gela ditshuri: Loko mi txo mbi hunduluka mi fana ni vanana kha mi nge thuki mi bela ka Mfumo wa nzumani. 4 Ngu toneto, awu a ti vekako hahatshi kufana ni tximwanatana txiya ngene wa hombe ka Mfumo wa nzumani. 5 Ni wule a amukelako tximwanatana txo fana ni txiya ngu mhaka ya ditina dangu, a amukela ni nani. 6 Kambe, awu a mahako ti to mmweyo wa vanana vava va kholwako kwangu ve onha, i di tshuku ku e sungelelwa dirigwi da hombe* hathamuni kwakwe e rinzwa lineneni.

7 Dikhombo ka ditiko diya, nguko di maha vathu ve onha. Ditshuri to si nge pwateki asi si mahako vathu ve onha, aniko dikhombo di ka wule si tako ngu kwakwe. 8 Ngu toneto, ngako diwoko mwendo mnenge wako si txi kumaha u onha, si gange u tshotsha kule. Nguko i tshuku kumana wutomi u di txilima mwendo u di txikhwala kupinda ku u tshotshwa ka mndilo wo mbi guma u di ni yotshe minenge ni mawoko ako. 9 Ni ku, ngako diso dako di txi kumaha u onha di xokole u di tshotsha kule nguko i tshuku kumana wutomi u di ni diso dimwedo kupinda ku u rinzwa Gehena ka mndilo ni maso aku a mambidi. 10 Ngu toneto, ti woneleni ti to mi si kanyisi ni wamweyo wa va va vadotho nguko na mi gela ku khani tingilozi tawe ati ti ku nzumani, ti zuma masoni ka Tate* wangu a ku nzumani. 11 ——

12 “Se anu mi ti wonisa kutxani? Ngako m’thu a di ni 100 wa tinvuta yi mwalala yimweyo, ina kha na mbi siya atile ta 99 mimangoni e tsula e ya xola ayile yi nga mwalala kani? 13 Ngako a txi yi mana, ani na mi gela to a na tsaka ngutu ngu yile yi nga ti mwalate kupinda atile ta 99 ti nga mbi mwalala. 14 Ngu ha ku fanako, Tate wangu* a ku nzumani kha tsaki ngako ku txi mwalala hambi i txo va mmweyo wa va va vadotho.

15 “Ku engetela ka toneto, ngako mwananu a txi maha txigoho, tsula wekha u txi ya bhulisana* nayo ngu txigoho txonetxo. Ngako a txi ku engisa, u na va u di hanyisile mwananu. 16 Kambe ngako a si ku engisi, tsula ni m’thu mmweyo mwendo vambidi kasiku mhaka yanu yi ya va ni wufakazi wa vathu vambidi mwendo vararu. 17 Ngako a si ku engisi, gela dibanza. Ngako a si engisi dibanza ni dona, m’thu eyo m’teke nga m’thu wa matiko ni mkhupisi.

18 “Na mi gela ditshuri ni txi khani, totshe ati mi ti sungako hamafuni ti na va ti di sungilwe nzumani, ni totshe ati mi ti txhatxhako hamafuni ti nava ti di txhatxhilwe nzumani. 19 Kambe ani ni tshumela ni mi gela ditshuri diya, ngako vambidi kwanu va txi pfana ko kombela kwalkeri txilo txa lisima ka Tate wangu a ku nzumani ene a na mi ninga. 20 Ngako vathu vambidi mwendo vararu va di tshanganile ngu mhaka ya ditina dangu na ho hagari kwawe.”

21 Pedro a do ta ka Jesu a ta m’wotisa to: “Mkoma ngako mwanathu a txi ni onhela, sikhati singahi ni fanelako ku m’divalela? I 7 wa sikhati hi nga tona?” 22 Se Jesu a to m’xamula a txi: “Hi nga 7 wa sikhati, kambe i 77 wa sikhati.

23 “Ngu toneto, Mfumo wa nzumani wu fana ni mkoma awu a vilako sikweneti ka sithumi sakwe. 24 Va to khata ngu ku m’tisela dijaha do kari di nga txi m’dhevha 10.000 wa matalenta. 25 Aku a nga si nga ni so hakela ngu sona, nyamne wakwe a to rumisa to ene, msikati wakwe, vanana vakwe ni sotshe asi va nga ti naso, ve xaviswa kasi kumana male yo hakela. 26 Se txithumi txi to khizamela nyamne wa txona txi m’gela ku khene: ‘Nyamne wangu, ni pfele wuxinji ni na ku hakela sotshe asi ni ku dhevhako.’ 27 Se nyamne wa kona a to m’pfela wusiwana, e pfhuta txikweneti e m’leka e tsula. 28 Mbimo yi a nga txi tsula a to tshangana ni txithumi kulowe atxi txi nga txi m’dhevha 100 wa madhenari. Se ene a to txi ñola a txi khene: ‘Ni hakeli asi u ni dhevhako.’ 29 Se txithumi kulowe txi to m’khizamela txi txi: ‘Ni pfele wuxinji, ni na kuhakela.’ 30 Kambe ene a to lamba e rumisa to txithumi kulowe txi vhalelwa jele, kala kuza txi m’hakela sotshe asi txi nga txi m’dhevha. 31 Se mbimo yi sithumi kulowe si nga wona totshe ati ti nga maheka, si to henya ngutu si tsula siya gela nyamne wa sona. 32 Se nyamne wa txona a to rumisa kudhanwa txithumi txile a txi ta khene: ‘Txithumiwe txo biha, ani ni pfhutile sotshe sikweneti asi u nga ti naso mbimo yi u nga ta ni dilela. 33 Se ngu kutxani u nga mbi kombisa wuxinji ka txithumi kuloni, kufana ni nani ni nga ku mahela wuxinji kani?’ 34 Se nyamne wa txona a to henya ngutu e txi vhalela jele, kala kuza txi m’hakela sotshe asi txi nga txi m’dhevha. 35 Tate wangu wa nzumani a na maha ngu ha ku fanako ka mmweyo ni mmweyo wanu, ngako mi si divaleli vananu ngu mbilu yotshe.”

19 Mbimo yi Jesu a nga gwita kuwomba-womba tiya a to khukha ngu Galileya e ya mihinganoni ka Judheya, mtxhatuko ka Jordhani. 2 Txitshungu txa hombe txi to m’londisa kambe, se ene a to hanyisa ava va nga txi lwala.

3 Vafarisi vo kari va to m’tela va ta m’wotisa va txi kha vona: “Ina ta tumeleleka ku wamwamna e leka msikati wakwe ngu txivangelo txihi ni txihi kani?” 4 Ene a to va xamula to khene: “Kha ma gonda to makhatoni, Mvangi a mahile wamwamna ni wamsikati kani? 5 Se e gwita a txi khene: ‘Ngu toneto, wamwamna a na siya mame vakwe ni tate wakwe a txi ya namarela msikati wakwe, votshe va vambidi va na va nyama yimweyo.’ 6 Ngu toneto, hi nga ngadi vambidi, kambe nyama yimweyo. Ngu konaho, asi Txizimu txi nga si patanisa, m’thu a nga thuke e si hambanisa.” 7 Va to m’wotisa va txi kha vona: “Se ngu kutxani Mosi a nga womba to wamwamna a fanete kuninga msikati wakwe diphepha do pfhuta mtxhadho, e m’tshumeta mtini kwawe?” 8 Se ene a to va gela a txi khene: “Mosi a tumete to mi leka vasikati vanu ngu mhaka ya kutxanyala ka timbilu* tanu, kambe makhatoni ti si ngaho eto. 9 Aniko na mi gela ku khani awule a mahako dhivhorsio ni msikati wakwe i si nga ngu wubhemba* e txhadha ni mmwani, eyo o maha wugango.”

10 Vagondiswa va to m’gela va txi kha vona: “Ngako mhaka ya wukati yi di zumbisile eto, i tshuku kwambi txhadha.” 11 Se ene a txi khene: “Hi nga votshe vathu va ti kotako kumaha eto, kambe ti kotwa ngu va va nga ningwa. 12 Nguko vaho va nga velekwa i di mithenwa, vaho va nga mahwa mithenwa ngu vathu ni ku vaho va nga ti maha mithenwa ngu mhaka ya Mfumo wa nzumani. Awu a ti kotako kumaha eto a na ti mahe.

13 Msana keto, va to tisa vanana kwakwe ti to e ta va sanzeka manza ni ku va khongelela, aniko vagondiswa va to va bhongela. 14 Hambi keto, Jesu a to va gela a txi khene: “Lekani vanana, mi nga va tsimbiseni kuta kwangu, nguko Mfumo wa nzumani wu lumba vathu vo fana ni vanana.” 15 Ngako a di sanzekile manza vanana, ene a to khukha e tsula.

16 Dijaha do kari di to m’yela di ya m’wotisa di txi: “M’gondisi, ni fanete ni maha txani txa txinene kasiku ni mana wutomi wo mbi guma kani?” 17 Ene a txi khene kwakwe: “Ngu kutxani u txi ni wotisa ngu ta tinene kani? Ko va ni wamweyo dwe i ku wa mnene. Hambi keto u txi lava wutomi wo mbi guma, engisa milayo.” 18 Ene a to m’wotisa a txi khene: “Ngu yihi ya kona? Jesu a to m’xamula a txi khene: “U nga daye, u nga mahe wugango, u nga pe, u nga ningele wufakazi wa makuhu, 19 kombisa txithavo ka tate wako ni mame wako, dhunda muakelani wako nga ti u ti dhundisako tona awe upune.” 20 Se dijaha dile di to xamula di txi khene: “Totshelele eto na ti maha. Ni nga di ni txi kelelelwa ngu txani kambe?” 21 Se Jesu a to m’xamula ku khene: “Ngako u txi lava ku va wo pelela ka totshe, tsula u txi ya xavisa sotshe asi u ku naso u teka male ya kona u ninga sisiwana thomba yako yi na va nzumani, se msana keto ngono u ta va m’londeteli wangu. 22 Mbimo yi dijaha dile di nga pfa eto, di do khukha di tsula di di pandisekile nguko di ti ganyile ngutu. 23 Se Jesu a to gela vagondiswa vakwe a txi khene: “Na mi gela ditshuri, ti na karata ku m’thu wo ganya e bela ka Mfumo wa nzumani. 24 Na tshumela ni mi gela kambe ku khani: Ti nga hehuka ku dikamelo di pinda ngu ha ka ditshoko da txhingani kupinda ku m’thu wo ganya e bela ka Mfumo wa Txizimu.”

25 Mbimo yi vagondiswa va Jesu va nga pfa eto, va to xamala ngutu va txi: “Ina wa ho a no huluka?” 26 Jesu a to va wonetela bhem a txi: “Ka vathu kha ti koteki, aniko ka Txizimu totshe ta koteka.”

27 Pedro a to khene: “Phela hi lekile sotshe hi ku londisela, se hi na wuyelwa ngu txani? 28 Se Jesu a to va gela a txi khene: “Na mi gela ditshuri ni txi khani, ka mbimo yi sotshe si no wusetwa si va sa siphya, Mwanana wa M’thu a na zumba ka txiluvelo txakwe txo phatima, se anu mi nga ni londisela mi na zumba ka 12 wa siluvelo mi lamula 12 wa tinyumba ta Israyeli. 29 Ni votshe ava va nga siya miti, vananda mwendo vakoma, tindiya, tate, mame, vanana mwendo tithembwe ngu mhaka ya ditina dangu va na mana so engeteleka ka e so ngu 100 wa sikhati ni kupinda ni kutshumela ve mana wutomi wo mbi guma.

30 “Kambe vavangi ava i ku vo khata va na maha vo gwitisa. Se ava vo gwitisa va na va vo khata.

20 Nguko Mfumo wa nzumani ngu nga tile ta nyamne wa dipulasi awu a humako ni mixo e tsimbila e katxha vathu kasiku e ta va ninga bhixkatu. 2 Msana ko va a di bhute navo ti to e va holela didhenari dimwedo ngu ditshiku, a to va ninga bhixkatu thembweni kwakwe. 3 Ngu mbimo ya kutshatsheka ka mwando,* ene a to khukha e wona vamwani merkadhu va nga txi lava mthumo. 4 Ene a to va gela ku khene: ‘Nananu tsulani mi ya thuma thembweni, ni na mi ninga m’holo wa wunene.’ 5 Se vona va to tsula. A to khukha kambe ngu mbimo ya dhina ni ngu mbimo ya mphindelo* e maha tonatiya ta timweto. 6 Ngu magwito, ngu mbimo ya minova* a to khukha kambe e ya mana vamwani va di emile kona hale e va wotisa ku khene: ‘Ngu kutxani mi txi zumba ahawa mi si thumi txilo kani?’ 7 Vona va to xamula va txi: ‘Nguko kha ha tholwa ngu m’thu.’ Se a to khene: ‘Tsulani nanu mi ya thuma thembweni* kwangu.’

8 “Mbimo yi di nga swa nyamne wa thembwe a to gela xefe ya vathumi vakwe a txi khene: ‘Dhana vathumi kasiku u ta va holela, khatisa ngu vale vo gwita, u gwitisa ngu vale vo khata.’ 9 Mbimo yi va nga hoka avale va nga bwaka ni minova, mmweyo ni mmweyo wawe a holetwe didhenari dimwedo. 10 Se mbimo yi va nga hoka avale va nga khata vona va txi bwaka, va ti gete to va na holelwa ya yinginyana, kambe ni vona va to holelwa didhenari dimwedo. 11 Mbimo yi va nga holelwa va to khata kukhala ka mlungu wawe. 12 Va txi kha vona: ‘Athu hi hyite ngu lisani hi txi thuma dotshe ditshiku, kambe ava vo gwita kuhoka va to thuma diora dimwedo dwe, se ngu kutxani u txi hi holela kufana navo kani?’ 13 Aniko a to xamula mmweyo wawe a txi khene: ‘He mfo, ani kha na ku mahela to biha, ina kha ha langana ku ku holela didhenari dimwedo kani? 14 Teka sako u tsula. Ni lava kuholela awu wo gwita kubwaka m’holo wo fana ni wako. 15 Ina kha ni nga ni fanelo yo maha ati ni ti lavako ngu silo sangu kani? Khu njo m’bavela ngu ku ni nga m’mahela ta tinene kani? 16 Ngu toneto, ava vo gwitisa va na va vo khata, ani va vo khata va na va vo gwitisa.”

17 Mbimo yi va nga txi kwelela ku ya Jerusalema, va di ngadi hanzila, Jesu a to dhana vagondiswa vakwe va 12 ngu didhawa a txi va gela ku khene: 18 “Phela akuwa hi yako Jerusalema, Mwanana wa M’thu a na ningelwa ka tinduna ta vaprista ni ka vamabhalani. Vona va na m’ninga mnando wo e dawa. 19 Va na m’ningela ka vamatiko kasiku ve m’ruketela, ve m’kwapela ni ku m’daya ka phande ya xanisa, aniko ngu ditshiku da wuraru ene a na wuswa.”

20 Mame wa vanana va Zebhedhewu a to tshuketela Jesu a di ni vanana vakwe e m’khizamela e m’kombela to maha. 21 Se Jesu a to m’wotisa a txi khene: “U lava txani?” Ene a to xamula a txi: “No kombela ku vanana vangu ava va vambidi, ka Mfumo wako mmweyo e zumba ka didhawa dako da txinene mmwani e zumba ka didhawa da txibhabha.” 22 Se Jesu a to va xamula a txi: “Anu kha mi txi zivi atxi mi txi kombelako. Ina mi nga sela kopo ayi ni lavako ku yi sela kani?” Se vona va to kha vona: “Hi nga sela.” 23 Jesu a to va xamula a txi khene: “Ngu ditshuri mi nga sela, aniko mhaka yo i mani a no zumba txineneni kwangu ni txibhabha kwangu, kha yi lumbi ani, kambe sikhalo soneso si lumba avale va nga longiselwa ngu Tate wangu.”

24 Mbimo yi avale vamwani va 10 va nga ti ziva, va to va henyela avale va vambidi. 25 Se Jesu a to va dhana a txi: “Anu ma ti ziva to vafumeli va fuma vamwani ni ku vakoma va fuma vamwani ngu ku va karatela. 26 Anu kha ma fanela kumaha eto, aniko awule a lavako kuva wa hombe hagari kwanu a na mahe txithumi. 27 Awu a lavako ku va wo khata hagari kwanu a na mahe txithumi txanu. 28 Kufana ni ku Mwanana wa M’thu a nga mbi tela ku ta thumelwa, kambe a nga tela ku ta thumela vamwani ni kuningela wutomi wakwe kasi kutirula vavangi.”

29 Mbimo yi va nga txi khukha ngu Jeriko, txitshungu txo tala txi txi londisela Jesu. 30 Ku ti ni majaha mabimdi i nga ti mabhofu, ma nga ti khalahatshile hafuhi ni nzila, mbimo yi ma nga pfa to Jesu wa pinda ngu nzila ma to kwangula ma txi: “Mkoma, Mwana Dhavhidha, hi pfele wusiwana.” 31 Se txitshungu txi to va kawuka txi txi, hi nga malalani. Hambi keto va to kwangula ngutu va txi: “Mkoma, Mwana Dhavhidha, hi pfele wusiwana.” 32 Se Jesu a to ema, e va dhana, e va wotisa a txi: “Mi lava ku ni mi mahela txani?” 33 Se vona va to m’xamula va txi: “Mkoma hi kombela u hanyisa maso athu me wona.” 34 Jesu a to va pfela wusiwana, e gwesa maso awe va so tekela kuwona ve khata ku m’londisa.

21 Mbimo yi Jesu va nga ti hafuhi ni kuhoka Jerusalema, va to wulela Bhetfaje Mmangoni ka Miolivha, se a to ruma vagondiswa vakwe va vambidi, 2 a txi va gela ku khene: “Tsulani ka txidhoropana txi ku hafuhi hawa, mi na ya mana mbongola yi ku ni tximbongolana yi di sungilwe. Yi txhatxheni mi ta nayo kwangu ni tximbongolana txa yona. 3 Ngako m’thu a txi mi wotisa to kari, m’geleni ku khanu: ‘Mkoma ngene a ti lavako.’ Se a na mi leka mi wuya nato.”

4 Totshe eto ti mahekile kasiku ti tatiseka ati ti nga wombwa ngu mprofeti a txi khene: 5 “Gelani dihorana da Siyoni mi txi khanu: ‘Wonani! Mfumeli wako wa ta kwako, ene mbwo rula, a ta a di gadhile tximbongolana i ku mwanana wa mbongola.’”

6 Vagondiswa va to tsula va txi ya maha nga ha Jesu a nga va leleta ngu kona. 7 Se va to m’tisela mbongola ni tximbongolana txa yona, ve atetela tinguwo txitimwi ka tona, se ene a to gadha tximbongolana. 8 Kutala ka vathu va txi ateta siambalo sawe hanzila, vamwani va txi wilela matshanzu a mindonga ve veketela hanzila. 9 I singa eto basi, txitshungu atxi txi nga ti masoni kwawe ni txi txi nga ti m’londisa ngu msana, txi txi kwangula txi txi: “Txizimu ha ku kombela, hanyisa Mwanana wa Dhavhidha. A katekile awu a tako ngu ditina da Jehovha. Ha ku kombela, m’hanyise Awe u ku txitimwi nzumani.”

10 Mbimo yi a nga wulela Jerusalema, didhoropani kotshe ku to wuka guje-guje, va txi kha vona: “I mani wuwa?” 11 Txitshungu txi to xamula txi txi: “Awuwa mprofeti Jesu, wa Nazareta ka Galileya.”

12 Jesu a to bela dithempeleni e hinga votshe avale va nga txi xavisa ni kuxava dithempeleni, e hangalasa timeza ta vatxitxisi va timale ni situlu sa vale va nga txi xavisa matuva. 13 Se a to va gela ku khene: “Ti bhatwe ti to: ‘Nyumba yangu yi na va nyumba ya mikombelo,’ kambe anu mi yi maha txikina txa makhokhokho.” 14 A to telwa kambe kona dithempeleni mule ngu mabhofu ni silima, se ene e va hanyisa.

15 Mbimo yi tinduna ta vaprista ni vamabhalani va nga wona timhaka to xamalisa ati Jesu a nga txi ti maha, ni ti vanana va nga txi womba dithempeleni va txi kha vona: “Txizimu ha kombela, hanyisa* Mwanana wa Dhavhidha.” Va to swireka. 16 Va txi m’gela ku kha vona: “Ina wa ti pfa ati va wombako?” Jesu a to khene: “Ina. Na tipfa. Kasi anu kha ma lera ti to: ‘Sisofu sa vanana ni sa sibhebhetana si na ni dhumisa’?” 17 Se ene a to khukha hale e hambana navo, a to ya ka didhoropa da Bhetaniya e ya otela kona.

18 Mbimo yi a nga wuya didhoropani ni mixo, a to pfa nzala. 19 Ene a to wona mkuwu wu nga ti hafuhi ni nzila, se a to wu yela e ya wona to wu si nga ni txilo, wu to ko va ni mazokoro dwe, se a to wu gela ku khene: “U nga swi u veleka txilo.” Neti a nga womba toneto, wona wu to oma. 20 Mbimo yi vagondiswa va nga ti wona va to xamala va txi: “Ti mahisile kutxani ku mkuwu wu tekela kuoma ngu txikuluveta?” 21 Se Jesu a to va xamula a txi khene: “Ngu ditshuri na mi gela ku khani: Ngako mi di ni likholo mi si kanakani, anu mi na maha to pinda ati ani ni nga maha ka mkuwu wuwa, hambi mi txo khanu ka mmango wuwa: ‘Khukha u ya wa linene,’ eto ti na maheka. 22 Ngako mi di ni likholo, sotshe asi mi no si kombela mi na ningwa.”

23 Msana kova a di bete dithempeleni, tinduna ta vaprista ni madhota a ditiko va to tshuketa kwakwe mbimo yi a nga txi gondisa, va txi m’wotisa ku kha vona: “U wu mana hani mtamo wo maha totshe tiya? I mani a nga ku txhusa kasiku u maha tiya?” 24 Jesu a to va gela ku khene: “Nanani ni na mi wotisa to maha, se ngako mi txi ni xamula nani ni na mi gela to i mani a nga ni txhusa kasiku ni maha totshe tiya. 25 Mtamo wa Johani wo bhabhatisa wu txi ta ngu hani? Wu ta ngu nzumani mwendo ngu ka vathu?” Kambe vona va to khata kualakanyisisa ngu txawe va txi kha vona: “Ngako hi txo khathu: ‘Wu ta ngu nzumani’, ene a na khene: ‘Se ngu kutxani mi nga mbi kholwa kwakwe?’ 26 Aniko hi txo khathu: ‘A wu mana ka vathu’ hi na khathu txani ka txitshungu nguko va wona Johani kota mprofeti.” 27 Se va to xamula Jesu va txi: “Kha hi ti zivi.” Jesu nene a to va xamula a txi: “Nanani kha ni mi geli ti to mtamo wu ni ku nawo wo maha tiya wu ta ngu hani.

28 “Mi khanu txani ngu tiya? Wamwamna wo kari a ti ni vanana vambidi. Se a to tsula ka wo khata e ya m’gela ku khene: ‘Mwanangu, nyamsi ni lava u tsula thembweni.’ 29 Ene a to xamula a txi khene: ‘Kha ni tsuli.’ Kambe a to gwita e ti laya e tsula. 30 A to gwita e tsula kambe ka wa wumbidi a txi ya womba tonti ta timweto. Se ene a to m’xamula a txi: ‘Ina, ni na tsula tata,’ kambe kha gwitisa kutsula. 31 I mani ka vava va vambidi a nga tumela kurumwa ngu tate wakwe kani? Vona va to khona: “Ngu wu wo khata.” Jesu a nje khene: “Na mi gela ku khani vakhupisi ni magelegele va na mi thangela kuwulela ka Mfumo wa Txizimu. 32 Nguko Johani a tile kwanu ngu nzila yo lulama, aniko anu kha ma kholwa kwakwe, kambe vakhupisi ni magelegele va khotwe kwakwe, hambi msana kova mi di ti woni totshe ati ti nga maheka, anu kha ma ti sola mi kholwa kwakwe.

33 “Nditxe tximwani txidinganiso: Ku ti ni wamwamna wo kari awu a nga ti ni mapulasi se a to dima thembwe ya mivhinya e yi bhiyela, e aka ni txitezi,* e lulamisela wukhalo wo kamela ka wona vhinya e gwita e yi ningela ka vadimi se e enda. 34 Mbimo yi ku nga hoka nguva ya kuelula, a to rumela sithumi sakwe si ya ka vadimi kasiku si ya amukela mauvha aya ma nga bhindulwa. 35 Kambe, vadimi vale va to ñola sithumi sileya, tximwetxo ve txi peka, tximwani ve txi daya, tximwani ve txi balisela ngu marigwi. 36 Ene a to tshumela e rumela kambe sithumi so pinda asile so khata, kambe ni sona si ti ya yi wona mihumbo. 37 Ngu magwito, ene a to rumela mwanana wakwe e ti gela ku khene: ‘Mwanana wangu va na ya m’xonipha.’ 38 Mbimo yi va nga wona ti to i ti mwanana wa kona, vadimi valeya va to ti gela ku khene: ‘Awuwa ngene a no sala ni thomba, a hi m’dayeni hi na kota kusala ni thomba yakwe.’ 39 Se vona va to m’ñola ve m’humisa thembweni, ve ya m’daya. 40 Se mbimo yi a no wuya nyamne wa thembwe, a na ta maha txani ngu vadimi vale? 41 Vona va to kha vona: “Aku i ku vabihi, ene a na ta va lovisa, e teka thembwe yile e yi ningela ka vadimi vamwani ava va no ningela mihando ngu mbimo ya kona.”

42 Jesu a to va gela ku khene: “Ina kha ma lera ati ti nga bhalwa ka Mibhalo ati to khene: ‘Dirigwi adiya vaaki va nga di eyisa, ngu dona di nga va dirigwi da lisima ka otshe. Atiya ta xamalisa ngutu ni ku ti ta ngu ka Jehovha’? 43 Ngu toneto, na mi gela ku khani: Mfumo wa Txizimu wu na thaviswa kwanu wu ningelwa ka ditiko dile di velekako mihando. 44 Ni ku, awu a no wa ka dona a na khatukela. Ni wule a no welwa ngu dona a na phwaraswa.”

45 Mbimo yi tinduna ta vaprista ni Vafarisi va nga pfa sidinganiso sakwe, va ti zivile to a txi womba vona. 46 Hambiku va nga txi lava ku m’ñola, vona va txi thava txitshungu, nguko txi ti m’wona kota mprofeti.

22 Jesu a to tshumela e womba-womba ngu kuthumisa sidinganiso a txi khene: 2 “Mfumo wa nzumani wu nga fananiswa ni mkoma, awu a mahelako fexta ya mtxhadho mwanana wakwe. 3 Se ene a to ruma sithumi sakwe kudhana votshe vale a nga ti va rambile ka mtxhadho, se vona va si ti lavi kuta. 4 A to tshumela e ruma simwani sithumi si ya womba tiya: “Phela sotshe ja si lungile, ni date tihomu tangu ni sihari sangu asi so nona sa kona. Ngonani ka m’buso wa mtxhadho.”’ 5 Kambe ava va nga rambwa kha va khatala va to hangalaka, mmwani e ti tsulela thembweni kwakwe kasi mmwani e ti tsulela ka mabhindu akwe. 6 Kambe vamwani va to ñola sithumi sile sakwe ve si dyisa khayi-khayi ve tshumela ve si daya.

7 “Mkoma wule a to henya ngutu e rumela masotxhwa akwe ti to me ya daya sigevenga sile, me tshumela me hisa ni didhoropa da kona. 8 Se mkoma a to gela sithumi sakwe a txi khene: ‘M’buso wa mtxhadho se wu pronto, kambe ava va nga rambwa va ti handile. 9 Ngu toneto, humani hahanze ka didhoropa mi ya ramba votshe ava mi no va mana ve ta ka m’buso wa mtxhadho.’ 10 Se sithumi si to tsula si ya ramba votshe ava si nga va mana, vabihi kumweko ni vavanene, se ahale ku nga ti ni mtxhadho ku to tala ngu va va nga ti rambilwe.

11 “Mbimo yi mkoma a nga bela kasi ku ta wona ava va nga rambwa, a to wona wamwamna wo kari awu a nga sa ambala siambalo so ta ngu sona mtxhadhoni.* 12 Se ene a to khene: ‘He mo, ngu kutxani u nga ta hawa u si nga ni siambalo so ta ngu sona mtxhadhoni?’ Ene a to kayee! 13 Mkoma a to gela sithumi sakwe a txi khene: ‘Ñolani mamo wuwa, mi msunga mi m’yisa hahanze khe txidemani, ngu kona kheyo a no ya dila ni kugugurusela makwasa.’

14 “Nguko, vangi va rambwako kambe mbadotho va sawulwako.”

15 Se Vafarisi va to tsula ve ya luka tipulani to riyela Jesu ka ti a nga txi ti womba. 16 Ngu toneto vona va to rumela vagondisi vawe kumweko ni vaseketeli va Herodha ve ya kha vona: “M’gondisi, athu ha ti ziva to awe u wa ditshuri ni ku u gondisa nzila ya Txizimu ngu ditshuri. Ni ku eto khu ti mahi ngu kulava kuwonwa ngu m’thu, nguko awe khuyi ngu kuwona khohe. 17 Hi nga hi gela: U ti wonisa kutxani? Ina ta pfala* kudiha resa ka Khezari mwendo nem?” 18 Aku Jesu a nga txi ziva wubihi wawe a to va gela ku khene: “Vaxengetelino! Ngu kutxani mi txi ni duka kani? 19 Hi nga ni kombani male yi mi resako ngu yona.” Se va to m’tisela didhenari dimwedo. 20 Se ene a to khene: “Mfota wuwa ni si si nga bhalwa hawa nza mani?” 21 Va to xamula va txi kha vona: “Nza Khezari.” Se ene a to khene: “Ngu toneto, ningelani ka Khezari asi i ku sa Khezari, ni ka Txizimu asi i ku sa Txizimu.” 22 Mbimo yi va nga pfa eto va to xamala ngutu, ve khukha ve tsula.

23 Ka ditshiku donedo, Vasadhusi va nga txi womba ti to kha ku na kuwuswa ka vafi va to m’wotisa va txi kha vona: 24 “M’gondisi, Mosi a wombile to: ‘Ngako wamwamna a txi fa a si nga ni vanana, mnanda* wakwe a na txhadha ni kunyadha wakwe, kasi ku vanana ava a no veleka ve lumba mkoma wakwe. 25 Ku to maheka to ku ti ni sete wa majaha i nga ti vaka mkoma ni mnanda. Awu wa mkoma a to txhadha, se a to fa a si nga ni vanana, mnanda wakwe a to sala e txhadha ni kunyadha wakwe. 26 Ti mahisile toneto ka wa wumbidi ni ka wa wuraru kala kuza votshe va sete ve fa. 27 Ngu magwito a to fa awule wa msikati. 28 Mbimo yi vafi va no wuswa, a na ta va msikati wa mani? Nguko votshe va sete va tekanile nayo.”

29 Se Jesu a to va xamula a txi khene: “Phela anu mi timete ngutu nguko kha mi yi zivi Mibhalo nem mtamo wa Txizimu. 30 Nguko mbimo yi ku no wuswa vafi, vathu kha va nambi teka nem kutekwa, nguko va na fana ni tingilozi ta nzumani. 31 Mayelano ni kuwuswa ka vafi, ina kha ma gonda ati Txizimu txi nga womba txi txi khene: 32 ‘Ani ni Txizimu txa Abrahamu, Txizimu txa Izaki, ni Txizimu Jakobe? Ene hi nga Txizimu txa va vakufa, kambe Txizimu txa va va hanyako.” 33 Mbimo yi txitshungu txi nga pfa eto txi to xamala ngutu ngu mhaka ya ti a nga txi gondisa.

34 Mbimo yi Vafarisi va nga pfa to Jesu a konile Vasadhusi, vona va to patana. 35 Mmweyo wawe awu i nga ti m’gondisi wa Mlayo a to duka Jesu ngu ku m’wotisa tiya: 36 “Ngu wuhi mlayo wa hombe ka Mlayo wa Mosi?” 37 Ene a to m’gela ku khene: “Randa Jehovha Txizimu txako ngu mbilu yako yotshe, ngu wotshe wutomi wako, ni ngu otshe mapimo ako.’ 38 Awuwa ngu wona mlayo wa hombe ni wo khata. 39 Wa wumbidi wo fana ni wuwa wo khata ngu wuwa: ‘Randa muakelani wako nga ti u ti randisako tona awe upune.’ 40 Milayo yiya ya yimbidi ngu yona ditshina da Mlayo wa Mosi ni otshe mapswi a vaprofeti.”

41 Mbimo yi Vafarisi va nga ti tshanganile, Jesu a to va wotisa a txi khene: 42 “Ngu tihi mi ti pimisako ngu Kristu? I mwanana wa mani?” Vona va to xamula va txi: “I mwanana wa Dhavhidha.” 43 Jesu a to va wotisa a txi khene: “Ngu kutxani Dhavhidha, ngu kususumetwa ngu moya wo sawuleka a m’dhanako ku Mkoma, a txi khene: 44 ‘Jehovha a womba tiya ka Mfumeli wangu: “Zumba ka didhawa dangu da txinene kala kuza ni veka valala vako hahatshi ka mikondo yako”’? 45 Se aku Dhavhidha a m’dhanako ku i Mkoma, ti mahisa kutxani ku va i di mwanana wakwe?” 46 Kha ka maneka ni wamweyo a nga sikota kuxamula. Kukhukhela ka koneho, kha ngaho a nga txi tsana ku mmaha siwotiso.

23 Jesu a to gela vagondiswa vakwe ni txitshungu a txi khene: 2 “Vamabhalani ni Vafarisi va ti vekile wukhaloni ka Mosi. 3 Ngu toneto, totshe ati va mi gelako ti maheni, aniko mi nga faneni navo nguko ati va ti wombako kha va ti mahi. 4 Vona va sunga mithwalo yo nemela ve yi sanzeka makatani ka vathu aniko vona kha va ti lavi nem ni ku yi gwesa ngu litiho. 5 Totshe ati va ti mahako va ti maha kasi kuwonwa ngu vathu, va kulisa sikaxana sa mlayo asi va si sungako kasi ku ti vhikela. Ve laphisa makhatxa a siambalo sawe. 6 Amu ka mibuso va dhunda kuzumba timezani, va di masinagogani va dhunda kuzumba ka situlu sa masoni. 7 Ni kulava kuloswa mipipini ni kudhanwa ku ‘Rabhi’* ngu vathu. 8 Kambe anu mi nga dhanwi ku mi va ‘Rabhi,’ nguko m’gondisi wanu mmweyo, anu ngu txanu mi vananu. 9 I singa eto basi, mi nga dhaneni m’thu hamafuni hawa ku i tate, nguko Tate wanu mmweyo dwe aku nzumani. 10 Nem mi nga dhanenwi ku mi vathangeli nguko mthangeli wanu mmweyo dwe, i ku Kristu. 11 Kambe, awu i ku wa hombe hagari kwanu a fanete kuthumela vamwani. 12 Awu ati guletako a na vekwa hahatshi, aniko awu a ti vekako hahatshi a na guletwa.

13 “Anu vamabhalani ni Vafarisi, vaxengetelino! Mi na ti wona, nguko mi vhalela vathu ku ve bela ka Mfumo wa nzumani kuve anu kha mi beli ka wona, ni ku hambi ava va nga mana nzila yo bela ka wona, mo va vhalela. 14 ——

15 “Anu vamabhalani ni Vafarisi, vaxengetelino! Mi na ti wona, mi veka ni kudhawula makene-kene mi txi ya hundula m’thu mmweyo e va mgondiswa wanu, se mi di mmani mi maha ti to e fanelwa ngu kubela Gehena kupinda anu.

16 “Anu mi thangela vamwani kuve mi mabhofu. Mi na ti wona. Nguko mi khanu: ‘Ngako m’thu a txi xambanya ngu dithempele, eto hi nga ta txilo, kambe a txi xambanya ngu oru ya dithempeleni to sunga kumaha ati a nga ti xambanya.’ 17 Anu siphuntano sa mabhofu. Kasi nji txani i ku txa lisima, i oru mwendo dithempele di sawulekisako oru kani? 18 Mi tshumela mi txi khanu: ‘Ngako m’thu a txi xambanya ngu altari hi nga ta txilo, kambe a txi xambanya ngu mningelo wa kona to sunga kumaha ati a nga ti xambanya.’ 19 Mabhofuno! Kasi nji txani i ku txa lisima? Mningelo mwendo i altari ayi yi sawulekisako mningelo? 20 Ngu toneto, awu a xambanyako ngu altari kha njo xambanya ngu yona dwe, kambe a xambanya ngu sotshe asi si ku ka yona. 21 Ni wule a xambanyako ngu dithempele kha njo xambanya ngu dithempele dwe, kambe a xambanya ni ngu Wule a zumbako ka dona. 22 Awule a xambanyako ngu nzuma, a xambanya ngu txiluvelo txa Txizimu ni ngu Wule a nga khalahatsha ka txona.

23 “Anu vamabhalani ni Vafarisi, vaxengetelino! Mi na ti wona. Nguko mi ningela sa wugumi, sa nyatximbowane, sa dianeta ni kominyo, kambe mi txhipisa ati i ku ta lisima ngutu ka Mlayo i ku wululami, wumbilu ni kuthembeka. Eto ngu tona ati mi nga ti fanete ku ti maha aniko mi si leki kumaha atile timwani. 24 Anu mi thangela vamwani kuve mi mabhofu. Mi sefa tshuna mi mita dikamelo.

25 “Anu vamabhalani ni Vafarisi, vaxengetelino! Mi na ti wona. Nguko mi kuwula tikopo ni timbiya ngu hahanze, kuveti ngu mndani mi tate ngu makolo ni kwa mbi ti pimela. 26 M’farisiwe wa dibhofu, khata ngu kuwula mndani ka kopo ni mbiya, kasiku hahanze ka sona ni kona ku na basa.

27 “Anu vamabhalani ni Vafarisi, vaxengetelino! Mi na ti wona. Mi fana ni mathitha aya ma nga pendwa ngu hahanze, kuveti ngu mndani ku tate ngu marambu ni nzambwa. 28 Nananu, vathu va mi wona mi di vo lulama, kuveti timbiluni kwanu ku tate ngu wukanganyisi ni wubihi.

29 “Anu vamabhalani ni Vafarisi vaxengetelino! Mi na ti wona. Nguko mi aka mathitha a vaprofeti ni kutshurisela mathitha a va vo lulama. 30 Mi txi khanu: ‘I di ku athu hi di hanyile ka timbimo ta vakale, athu hi sa pateka ko dayela vaprofeti.’ 31 Phela mo ti landula mipune ti to mi vanana va vale va nga dayela vaprofeti. 32 Ngu toneto, hetisani mthumo wu vakokwani vanu va nga wu khata.

33 “Minyokano ya lixaka la timamba, mi pimisa to mi na huluka kulamulwa mi ya Gehena kani? 34 Ngu toneto, ni na mi rumelela vaprofeti, titxhari ni vagondisi. Hambi keto, vamwani mi na va daya aha ka tiphande ni ku vamwani mi na va kwapela masinagogani kwanu. Mi na va xanisa ka didhoropa dimwani ni dimwani, 35 kasiku mi va ni mnando wa votshe vo lulama, ava mi nga va dayela hamafuni kukhukhela ka Abhele i ngati m’thu wo lulama, kala ka Zakariya mwanana wa Bharakiya awu mi nga m’daya, hagari ka wukhalo wo sawuleka ni altari. 36 Aniko, na mi gela ditshuri ku khani, totshe timhaka tiya ti na maheka ka vathu vava.

37 “Anu vathu va Jerusalema vadayi va vaprofeti, ni kubalisela ngu marigwi ava va rumelwako kwanu. Sikhati singahi ni nga mi dhana kufana ni khukhu ayi yi dhanako sisondo sa yona kasi ku ta si fundamela, aniko anu kha ma tumela. 38 Ngu toneto, m’ti wanu wu na va marumbi. 39 Kambe na mi gela tiya: Kukhukhela konkuwa, kha mi na mbi swa mi ni wona, kala kuza mi txi khanu: ‘A katekile awule a tako ngu ditina da Jehovha.’”

24 Mbimo yi Jesu a nga txi huma ngu dithempeleni, vagondiswa vakwe va to mtshuketela va ta m’komba dithempele dotshe ngu hahanze. 2 Se a to va xamula a txi khene: “Mo xamala ngu totshe tiya? Ngu ditshuri na mi gela ku khani, ku na hoka mbimo yi dirigwi di no mbi va txitimwi ka dimwani ngu ku va ma di gundumusilwe.”

3 Mbimo yi a nga di khalahatshile ka Mmango wa Miolivha, vagondiswa va to m’tshuketela va txi ta kha vona: “Hi nga hi gela: Atiya ti na maheka ngu mbimo muni, ni ku ngu txihi txi no va txikombiso txa kuwuya kwako ni kuguma ka timbimo tiya?”

4 Jesu a to va xamula a txi khene: “Ti woneleni kasiku mi si kanganyiswi ngu m’thu. 5 Nguko vavangi va na ta ngu ditina dangu va txi ta kha vona: ‘Ani ngani Kristu,’ va na kanganyisa vathu vo tala. 6 Mi na engisa madungula a tiyimbi ta hafuhi ni ta makhalo a kule. Se mi nga dhukeni ngu tona, nguko eto ti fanete kumaheka, kambe hi nga ku o va magwito.

7 “Nguko ditiko di na wukela ditiko dimwani, ni mifumo yi na wukelana, ku na va ni tinzala ni kuzinginikela ka mafu makhalo o tala. 8 Totshe tiya makhato a kuxaniseka.

9 “Nguko vathu va na mi ningela kasiku mi ya xaniswa ni ku mi daya, mi na vengelwa ngu matiko otshe ngu mhaka ya ditina dangu. 10 Ni ku vathu vavangi kha va na mbi swa ve kholwa, va na ningelana ni kuvengelana. 11 Va na humelela vaprofeti vavangi va makuhu ava va no kanganyisa vathu vo tala. 12 Ngu mhaka ya kuengeteleka ka wubihi, lirando la vo tala li na hunguka. 13 Aniko awule a tsaniselako kala magwito a na ta hulukiswa. 14 Mahungu a manene a Mfumo ma na txhumayelwa hamafuni kotshe, kasiku matiko otshe me ti ziva.* Ngu kona ma no hoka magwito.

15 Ngu toneto, ngako mi txi wona tximaha txo nyenyeza atxi txi onhetelako na txi di ka wukhalo wo sawuleka nga ha ti nga wombwa ngu mprofeti Dhaniyeli (kasi kupfisisa tiya, mgondi ti lava e va ni mapimo), 16 ava va ku Judheya va na tutumi ve ya mimangoni. 17 Awu a ku txitimwi ka nyumba a nga txhike e ta humisa asi si ku nyumbani. 18 Awu a ku thembweni a nga wuyi a ta teka siambalo sakwe. 19 No tsetsa vavasikati ava va no ta manwa va di ni sirumbo, ni va va no ta manwa va txi mamisa ka masiku oneyo. 20 Ngu toneto, simamani mi khongela kasiku masiku eyo a nyima-nyima ma si mi teli ngu wuxika* mwendo ngu ditshiku da Sabata. 21 Nguko ka mbimo yoneyo, ku na va ni kuxaniseka ka hombe, ko kha ku khali kumaheka kukhukhela ma nga vangwa mafu kala kuwa, ni ku kha ku na mbi swa ku humelela kambe. 22 Phela i si nga ngu mhaka ya ku masiku eyo ma no ta komiswa, ni wammweyo a ndi no huluka, kambe ngu mhaka ya va va nga langwa, masiku eyo ma na komiswa.

23 “Se ngako m’thu a txi mi gela ku khene: ‘Ndiyo Kristu, waho hawa’ mwendo ku: ‘Akheya,’ mi nga kholweni. 24 Ku na humelela vakristu ni vaprofeti va makuho, ava va no maha mithumo yo xamalisa kasi kutimeta vathu vo tala, hambi ava va nga langwa, ngako va si ti woneli va na timetwa. 25 Ti woneleni, ani se ni mi zivisile i di nga di mbimo. 26 Ngu toneto, ngako va txi kha vona: ‘Va kha vona a kheya txiwulani,’ mi nga tsuleni mi ya m’xola. Mwendo va txi kha vona: ‘A kona muwa nyumbani,’ mi nga kholweni. 27 Kufana ni kukeluka aku ku khukhelako wutxani kala mswa-ditambo, ti na mahisa toneto ni kuwuya ka Mwanana wa M’thu. 28 Ova ha ku ku ni txirumbi,* magama ma na sengeletana koneho.

29 “Ma txi ngadi ma txi khene mo pinda masiku o xaniseka, ditambo di na pfupeliswa, ni mtxima kha wu na mbi woninga, tinyeleti ti na wa ngu nzumani ni sotshe si ku nzumani si na zuzwa. 30 Msana keto, va na wona txikombiso txa Mwanana wa M’thu khe nzumani. Se vathu va hamafuni kotshe va na dila ngu kukarateka, va na wona Mwanana wa M’thu a txi ta ngu marefuni a di ni mtamo ni wudhumo wa hombe. 31 Ene a na ruma tingilozi takwe ti veta mpundu, kasiku ti sengeleta ava va nga langwa ka makhona a mune a mafu,* kukhukhela aha nzuma yi khatelako kona kala ha yi gwitelako kona.*

32 “Gondani ngu txidinganiso txa mkuwu: Ngako mi txi wona madhavi a maphya ma txi thunga linyepfu ni mazokoro a maphya anu ma ti ziva to malanga* ma hafuhi. 33 Kufana ni toneto, ngako mi txi wona totshe tiya ti txi humelela ti ziveni ti to Mwanana wa M’thu a hafuhi a to ema ditimbani. 34 Ngu ditshuri na mi gela ni txi vathu va nguva yiya,* kha va na mbi guma votshe totshe tiya ti si se maheka. 35 Nzuma ni mafu si nga guma, kambe mhaka yangu yi nge thuki yi di gumile.

36 “Mayelano ni ditshiku donedo, ni diora da kona, kha ngaho awu a di zivako, nem tingilozi ta nzumani, nem Mwanana, do ziwa ngu Tate dwe. 37 Kufana ni ti ti nga mahisa tona ka masiku a Nowa ti na mahisa toneto kuwuyani ka Mwanana wa M’thu. 38 Nguko ka masiku a Nowa ku si se maheka ndambi, vathu va txi dya ni kusela, vavamna va txi teka, vavasikati va txi tekwa kala ka ditshiku adi Nowa a nga bela ngalavani ngu dona. 39 Se vona kha va khatala ngu txilo kala kuza yi ta ndambi yi ta va hiyela votshe, ti na mahisa toneto kuwuyani ka Mwanana wa M’thu. 40 Vavamna vambidi va nava va di thembweni, mmwani a na tekwa, mmwani e lekwa. 41 Vavasikati vambidi va nava va di txigayoni, mmwani a na tekwa, mmwani e lekwa. 42 Ngu toneto, zumbani mi di rinzile nguko kha mi di zivi ditshiku adi Mkoma wanu a no wuya ngu dona.

43 “Ti ziveni ti to: Ngako nyamne wa mti a txi yi ziva mbimo yi dikhamba di no ta ngu yona, a ndi na zumba a di lungile ti to nyumba yakwe yi si pfodolwi. 44 Ngu toneto, zumbani mi di lungile, nguko Mwanana wa M’thu a na ta ngu mbimo yi mi si yi pimisiko.

45 “Kasi i mani txithumi txo thembeka ni txa mapimo atxi nyamne wa txona a nga txi emisa masoni ka sithumi sakwe, kasi kuphamela sakudya ngu mbimo ya kona kani? 46 Txa tsaka txithumi txonetxo, atxi nyamne wa kona a wuyako a ta txi mana txi txi maha toneto. 47 Ngu ditshuri na mi gela ku khani: Ene a na txi ninga mthumo wo wonelela sotshe asi a ku naso.

48 “Aniko, ngako txithumi txonetxo txi txi thuka txi khata kumaha to biha, txi ti gela ku khene: ‘Mkoma wa swela,’ 49 txi khata kupeketela sithumi kulowe, txi dya ni kusela ni madevi, 50 nyamne wa txithumi txile a na wuya ngu ditshiku do kha txi di zivi, ni ngu mbimo yo nem txi sa yi rinzela. 51 Ene a na txi punira ta bhom, e txi patanisa kumweko ni vakanganyisi. Nguho va no ya dila ni kugugurusela makwasa.

25 “Phela Mfumo wa nzumani wu nga fananiswa ni 10 wa mavhirjem,* aya ma nga teka malambu a ona kasi kuya tshangana ni noivho wa ona. 2 Mtxhanu wa ona i ti siphukuphuku kasi aya mamwani a mtxhanu i ti a mapimo. 3 Aya mamwani a siphukuphuku ma to teka malambu, kambe kha ma longa mafura. 4 Se ale a mapimo ma to teka malambu me tshumela me longa mamwani mafura. 5 Aku noivho a nga txi swela, otshe ma to khata kukhudhahela me otela. 6 Se ni hagari ka wusiku ku to pfala dipswi do kwangula di txi: ‘Noivho a bwakile. Humani mi m’hoyozela. 7 Otshe mavhirjem ma to wuka, me teka malambu a ona me ma lulamisela. 8 Mavhirjem ale ya siphukuphuku ma to gela a ale a mapimo ma txi khene: ‘Ho kombela sifurana sa sidotho nguko malambu athu se ma lava kutimeka.’ 9 Se ale a mapimo ma to xamula ma txi: ‘Ti nga maha ma si eneli ku hi mi pumbela, tsulani mi ya ti xavela ka va va xavisako mafura.’ 10 Ma di ngadi kuxavani ka mafura, noivho a to bwaka, se mavhirjem ale ma nga ti lungile ma to bela nayo ka m’buso wa mtxhadho, se ditimba di to vhalwa. 11 Ngu msana ma to bwaka mavhirjem ale mamwani ni ona ma txi kha ona: ‘Mkoma, mkoma, hi kombela u hi tulela.’ 12 Ene a to va xamula a txi khene: ‘Ani na mi gela ditshuri: Kha ni mi zivi.’

13 “Ngu toneto, zumbani mi di rinzete, nguko anu kha mi di zivi ditshiku nem diora.

14 “Mfumo wa Txizimu wu nga tile ta wamwamna awu a lavako kuenda. Na a si se tsula e khata ngu kudhana sithumi sakwe e si siyela silo sakwe. 15 A to ningela mtxhanu wa titalenta ka txa tximwetxo, tximwani e txi ninga ta timbidi, tximwani e txi ninga ya yimweyo ngu kuya ngu makotelo awe. Se a to khukha e enda. 16 Awu a nga amukela mtxhanu wa titalenta a to tekela kutsula e ya maha negosiyo ngu tona, e ganya timwani ta mtxhanu. 17 Nene awu a nga amukela ta timbidi a to ganya timbidi kambe. 18 Aniko txithumi txile txi nga amukela ya yimweyo, txi to tsula txi ya kelela male ya nyamne wa txona.

19 “Msana ka mbimo yo lapha, nyamne wa kona a to wuya se a to lava ku ya wona ati sithumi si nga ti thumisile tona. 20 Se awule a nga ti amukete mtxhanu wa titalenta a to ta ka nyamne wakwe ni timwani ta mtxhanu e ta khene: ‘Mkoma hi nga wona, u ni ningile mtxhanu wa titalenta ni bhindute timwani ta mtxhanu kambe.’ 21 Se nyamne wa kona a to khene: ‘U thumile, awe u txithumi txa txinene, txo thembeka, u thembekile ka silo sa sidotho, konku ni na ku ninga silo sa singi u si khatalela. Ngono u ta tsaka ni nani nyamne wako.’ 22 Se a to ta nene wule a nga ti ningilwe titalenta timbidi se a to ta khene: ‘Mkoma, u ni ningile titalenta timbidi, hi nga wona ni bhindute timwani ta timbidi kambe.’ 23 Se nyamne wakwe a to khene: ‘U thumile, awe u txithumi txa txinene, txo thembeka, u thembekile ka silo sa sidotho, konku ni na ku ninga silo sa singi u si khatalela. Ngono u ta tsaka ni nani nyamne wako.’

24 “Ngu magwito, txithumi atxi txi nga ti ningilwe talenta ya yimweyo txi to tsula ka nyamne wa txona txi txi ya kha txona: ‘Ani na ti ziva to awe u m’thu wo karata, u dhunda kuelula amu u nga mbi phaya ni kusengeleta amu u nga mbi hula. 25 Ngu toneto ni to thava, ni teka talenta ni ya kelela. Se konkuwa, teka asi i ku sako.’ 26 Nyamne wa kona a to txi xamula a txi khene: ‘Txithumiwe txo bhayiza, txa mkara. Kasi u txi ti ziva to ani ni elula asi ni nga mbi phaya, ni ku ni sengeleta asi ni nga mbi hula kani? 27 Nga u di vekile male yangu bhanku, aku ni nga wuya ni di yi mani yi di velekile.

28 “‘Ngu toneto, m’tekeleni talenta eyo ya yimweyo mi yi ningela ka wule a ku ni 10 wa titalenta. 29 Nguko wuhi ni wuhi a ku naso a na engetelwa e va ni sasingi, aniko awule a si ngako ni txilo, hambi sona sile sa sidotho a ku naso a na tekelwa. 30 Humisani hahanze txithumitxo txo bhayiza khe mtemani. Ngu kona kheya txi no ya dila ni kuguguersela makwasa.’

31 “Mbimo yi Mwanana wa M’thu a no wuya a di ni wudhumo a di ni totshe tingilozi ene a na ta khalahatsha txiluveloni kwakwe ko phatima. 32 Otshe matiko ma na tshanganiswa masoni kwakwe, se ene a na abanisa matiko ngu mitxawa yimbidi, nga tile m’dyisi a abanisisako tona tinvuta ka tiphongo. 33 Se ene a na veka tinvuta ngu txinene, tiphongo a txi ti veka txibhabha.

34 “Mkoma a na gela ava va ku txineneni a txi khene: ‘Ngonani, anu mi nga katekiswa ngu Tate wangu, belani ka Mfumo awu wu nga lulamiselwa anu, kukhukhela ku nga vangwa ditiko. 35 Nguko ani ni ti ni nzala, aniko mi ni ningile sakudya, ni ti ni ditora, mi ni ningile so sela. Ni ti mpfhumba, aniko mi ni amukete ngu manza mambidi. 36 Ni si nga ni so ambala, aniko anu mi ni ambekile. Mbimo yi ni nga txi lwala mi ni xayisile, ni di jele mi tile mi ta ni pfuxela.’ 37 Se ava vo lulama va na khona: ‘Mkoma, i mbimo muni hi nga ku wona u di ni nzala, hi ku ninga sakudya? I mbimo muni hi nga ku wona u di ni ditora, hi ku ninga so sela kani? 38 I mbimo muni hi nga ku wona u di mpfhumba, hi ku amukela ngu manza mambidi, mwendo u sa ambala hi ku ambeka kani? 39 I mbimo muni hi nga pfa to wa lwala, mwendo to u jele hi ta hi ta ku pfuxela kani?’ 40 Mkoma a na va xamula a txi khene: ‘Phela na mi gela ditshuri, ati mi nga mahela mmweyo wa vafowethu va vangu, hambi i txo va wa m’dotho wa kona, mi mahete ani.’

41 “Se ava va ku txibhabha kwakwe a na va gela ku khene:‘Khukhani hawa anu mi nga ruketelwa ngu Txizimu, tsulani ka mndilo wo mbi guma awu wu nga lulamiselwa Dhawulosi ni madhimoni akwe. 42 Nguko ani ni ti ni nzala, aniko mi ni toni sakudya, ni ku ni ti ni ditora, kambe mi ni toni so sela. 43 Ni ti mpfhumba, aniko kha ma ni amukela ngu manza mambidi. Ni si nga ni so ambala, aniko anu kha ma ni ambeka. Ni lwate ni kubela jele, aniko kha ma ni xayisa.’ 44 Se ni vona va to kha vona: ‘Mkoma, i mbimo muni hi nga ku wona u di ni nzala u di ni ditora mwendo u sa ambala txilo, u txi lwala mwendo u di jele hi si ku xayisi kani? 45 Se ene a na va xamula a txi khene: ‘Ngu ditshuri na mi gela ku khani: Ati mi nga mbi mahela mmweyo wa va vavadotho, kha ma mahela ani.’ 46 Avava va na loviswa da magwito, aniko ava vo lulama va na mana wutomi wo mbi guma.”

26 Mbimo yi Jesu a nga gwita kuwomba totshe timhaka eto, a to khene ka vagondiswa vakwe: 2 “Anu ma ti ziva to ku to sala masiku mambidi kasiku yi hoka Paxkwa, Mwanana wa M’thu a na ningelwa ti to e dawa haphandeni.”

3 Se tinduna ta vaprista ni madhota a ditiko, va to sengeletana ha mthandani ka mprista wa hombe a nga txi dhanwa ku i Kayifasi. 4 Se va to luka makungo o va nga m’ñolisa kutxani Jesu ve mu daya. 5 Aniko va txi khona: “Hi nga m’ñoleni ngu ditshiku da m’buso ti to vathu va si mahi nyima-nyima.”

6 Mbimo yi Jesu a nga ti Bhetaniya mtini ka Simoni awu wa tshekela, 7 a to tshuketelwa ngu wamsikati a nga ti ni fraxko ya alabhastru yi nga ti ni mafura o bhumula o dhula ngutu, ene a to khata ku m’thela ha msungo kwakwe mbimo yi ene a nga txi lalela. 8 Mbimo yi va nga wona tiya vagondiswa va to henya va txi kha vona: “Hi nga wonani mafura va ko xakela. 9 Phela ma di xavisilwe ngu male ya yingi kasiku male ya kona yi ningwa sisiwana.” 10 Mbimo yi Jesu a nga ti pfa a to khene: “Kasi mi m’dhukisela txani wuwa wa msikati? Atiya a nga ni mahela timhaka ta tinene ngutu. 11 Nguko sisiwana mi naso yotshe mbimo, kambe hi nga yotshe mbimo mi no va ni nani. 12 Aku awuwa wa msikati a nga thela mafura awa o bhumula ha mmidini kwangu ene a mahile eto kasi kulungisela ditshiku adi ni no tshotshwa ngu dona. 13 Ani na mi gela ditshuri, ni khani: Ni hani aha ku no txhumayelwa mahungu a manene ha mafuni kotshe, ati awu wa msikati a nga maha ti na wombwa kasiku e khumbulwa ngu tona.”

14 Se mmweyo wa vale va 12 a nga txi dhanwa ku i Judhasi Iskariyoti, a to yela tinduna ta vaprista 15 a txi ya khene: “Mi na ni ninga txani ngako ni txi m’xavisa kwanu?” Vona va to m’thembisa 30 wa singetxe sa male ya prata. 16 Se kukhukhela koneho, a txi zumba a txi lavetela mkhanjo wa wunene ti to e m’ningela.

17 Ka ditshiku do khata da M’buso wa mapawa o mbi tshumbelwa, vagondiswa va to tshuketela Jesu, veya m’wotisa tiya: “Mkoma, ngu hayi aha u lavako ti to hi lulamisela kona, kasi ku ya dyela kona Paxkwa kani?” 18 Ene a to khene: “Tsulani didhoropani ka wamwamna wo kari mi ya m’gela to: ‘Mkoma a khene: “Yi hokile mbimo ayi yi nga vekwa, ani ni vagondiswa vangu hi lava ku ta dya Paxkwa mtini kwako.”’” 19 Se vagondiswa va to maha nga ti Jesu a nga va leletisa tona, se ve lulamisela Paxkwa.

20 Mbimo yi di nga swa, ene a ti khalahatshile ha mezani ni vagondiswa vakwe va 12. 21 Se va txi nga txi dya a to khene: “Phela na mi gela ditshuri ku khani: Mmweyo wanu a na ni xavisa.” 22 Eto ti va pandile ngutu, se mmweyo ni mmweyo a to wotisa a txi khene: “Mkoma, i ngava i di ani?” 23 Ene a to va xamula a txi khene: “Awule hi betako diwoko ngu mkama wumwewo amu ka mbiya, ngeneyo a no ni xavisa. 24 Ditshuri ti to Mwanana wa M’thu wa tsula nga ti timhaka takwe ti nga bhaliswa tona, kambe awu a xavisako Mwanana wa M’thu a na ti wona, i di tshuko i di ku m’thu eneyo a sa velekwa. 25 Judhasi awu a nga ti mahile makungo o m’xavisa a to m’wotisa a txi khene: “Rabhi, ina ngani?” Jesu a to khene: “U ti wombete upune.”

26 Va txi ngadi va txi dya, Jesu a to teka dipawa, a di mahile mkombelo a to di khema e ninga vagondiswa a txi khene: “Tekani mi dya. Dipawa diya di emela mmidi wangu.” 27 A to teka kopo, e maha mkombelo e va ninga a txi khene: “Selani ngu yona mi siyetisana motshenu. 28 Vhinya yiya yi emela ‘mnoha wangu wa txitumelelano’ awu wu no theketelwa vathu vavangi kasi kumana kudivalelwa sionho. 29 Kambe ani na mi gela ku khani: Kha ni na mbi swa ni sela kambe vhinya yiya ya mauvha, kala ka ditshiku dile ni no ta sela vhinya ya yiphya hi di hotshe ka Mfumo wa Tate wangu.” 30 Ngu magwito, msana kova va di embelete tindando to dhumisa Txizimu va to khukha ve tsula Mmangoni ka Miolivha.

31 Se Jesu a to va gela ku khene: “Wusiku wuwa, motshenu mi na ni leka ngu mhaka ya ti ti no ni humelela nguko ti bhatwe ti to: ‘Ni na peka m’dyisi, se tinvuta ti na hangalaka.’ 32 Kambe msana kova ni di wusilwe ni na thangela ni txi ya Galileya.” 33 Se Pedro a to xamula a txi khene: “Hambi votshe va txo ku leka ngu mhaka ya ti ti no ku humelela, ani kha ni na mbi ku leka.” 34 Jesu a to khene: “Ngu ditshuri ni khani: Wona wusiku wuwa na mkuku wu si se emba, awe u na ni lamba sikhati siraru.” 35 Pedro a to khene: “Hambi i di ti to to lava ni fa kumweko ni nawe, ani ni nge thuki ni ku leka.” Se ava vamwani vagondiswa va to womba toneto ni vona.

36 Jesu a to tsula navo ka wukhalo awu wu dhanwako ku i Getsemani, a to khene ka vagondiswa vakwe: “Zumbani hawa, ni nga txiya hale ni txi ya khongela.” 37 Se a to teka Pedro ni vanana vambidi va Zebhedhewu e tsula navo, a to khata kukarateka ni kupandiseka ngutu. 38 A to va gela ku khene: “Ni karatekile ngutu aha ko hambi kufa ni nga fa. Zumbani hawa mi rinzela kumweko ni nani.” 39 Se a to tshuketa kulenyana, e khizama yi za mbanza yakwe yi gwesa ni hahatshi se e khongela a txi khene: “Tata, ngako ti txi koteka, tshuketisa kopo yiya kule ni nani. Hambiketo ku nga maheke ati ni ti lavako, kambe ti na maheke nga ti awe u ti lavisako tona.”

40 Ene a to tshumela e wuya ka vagondiswa vakwe e ta va mana va txi otela, se a to khene ka Pedro: “Anu kha ma si kota kurinzela kumweko ni nani hambi i txo va diora dimwedo? 41 Zumbani mi di rinzete, mi khongela mi si karali kasiku mi si xulwi ngu txiduko. Ngu ditshuri, moya wa ti lava, aniko nyama yi karate.” 42 A to tshumela kambe da wumbidi e ya khongela, a txi khene: “Tata, ngako ti si koteki ku kopo yiya yi tshuketa kule ni nani ni sa yi sela, ku na maheke kuranda kwako.” 43 A to tshumela e wuya e ta va mana va di otete nguko maso awe ma txi nemela ngu wukohe. 44 Se a to va siya kambe e ya khongela da wuraru, a txi womba mapswi a mamwewo. 45 Se a to wuya ka vagondiswa vakwe a txi ta khene: “Ka mbimo yo nga yiya anu mo otela ni kuhumula! Phela yi hokile mbimo yo Mwanana wa M’thu e ningelwa manzani ka vabihi. 46 Khukhani hi tsula, awu a lavako ku ni xavisa a hokile.” 47 A txi ngadi a txi womba-womba, ku to hoka Judhasi i nga ti mmweyo wa vale va 12, ene a ti ni txitshungu txa hombe txi nga ti ni matxhari ni migomba. Txona txi ti rumetwe ngu tinduna ta vaprista ni madhota a ditiko.

48 Judhasi a ti langanile navo a txi: “Awu ni no m’nyuta, ngene eyo, m’ñoleni.” 49 Se a to tsimbila e kongoma Jesu a txi ya khene: “Diswite Rabhi,” se e m’nyuta. 50 Kambe Jesu a to khene: “He mawe, kasi u tela txani hawa?” Se vona va to ñola Jesu ve msunga. 51 Neti ku nga maheka toneto, mmweyo wa va va nga ti ni Jesu a to swomola ditxhari, e lwisana ni txithumi txa mprista wa hombe, e txi wila nzeve. 52 Koneho Jesu a to khene kwakwe: “Tshumeta ditxhari txikhwamani ka dona nguko votshe ava va ñolako ditxhari va na dawa ngu ditxhari. 53 Mwendo wo pimisa to ni nge sikoti kukombela ka Tate wangu e ni wuyisela ka yona mbimo yiya magidhi-gidhi* a tingilozi kani? 54 Kambe ni txo maha toneto, ti na tatisekisa kutxani atile ti nga wombwa ngu Mibhalo ti to ti fanete kumahekisa tiya kani? 55 Jesu a to tekela kugela txitshungu txileya a txi khene: “Anu mi ta ni ñola mi di ni matxhari ni migomba nga no va dikhamba. Ditshiku ni ditshiku ani ni txi khalahatsha dithempeleni ni txi gondisa, hambi keto kha ma ni ñola. 56 Kambe, totshe eto ti maheka kasiku ti tatiseka ati ti nga bhalwa ngu vaprofeti.” Se votshe vagondiswa va to tutuma ve msiya.

57 Ava va nga ti ñote Jesu va to mteka ve m’yisa ka Kayifasi mprista wa hombe, aha va nga ti tshanganile kona madhota ni vamabhalani. 58 Kambe Pedro a txo va londisa ngu kule kala mthandani ka mprista wa hombe. Mbimo yi va nga hoka, a to bela e ya zumba kumweko ni sithumi kasi kuwona to ku na maheka txani.

59 Tinduna ta vaprista ni yotshe Sanedhri va txi lava wufakazi wa makuho kasi kulumbeta Jesu ti to ve m’daya, 60 Kambe kha va wu mana, hambiku vathu va vangi va nga txi ningela wufakazi wa makuhu. Ngu msana va to bwaka vathu vambidi, 61 va txi ta kha vona: “Dijaha diya di ti kha dona: ‘Ani ni nga gindimusa dithempele da Txizimu ni di aketa ngu masiku mararu.’” 62 Mbimo yi a nga pfa toneto, mprista wa hombe a to khukha e ema a txi khene: “Wo malala u txi dwe u si xamuli txilo? Wo mbi tipfa ati majaha yawa ma ku lumbetako tona?” 63 Kambe Jesu a to simama e malala a txi dwe. Se mprista wa hombe a to khene: “Ani ni kuxambanyisa ngu Txizimu atxi txi hanyako, ina u nga hi gela to ngawe Kristu, Mwanana wa Txizimu?” 64 Jesu a to m’xamula a txi khene: “Awe upune u womba toneto. Kambe ani na ku gela ku khani: Kukhukhela ka konkuwa, anu mi na wona Mwanana wa M’thu a di khalahatshile txineneni ka Nyamitamo, a txi ta ngu marefuni a nzumani.” 65 Mprista wa hombe a to bhanda siambalo sakwe, atxi khene: “A rukile Txizimu, wufakazi muni mi ku ngadi mi txi wu lava? Phela mi m’pfite mipune a txi ruka. 66 Se mi khanu txani ngu m’thu wuwa?” Vona va to xamula va txi: “A na dawe eyo.” 67 Se va to m’thurela khoheni ni ku mpeka ngu sibhakela. Vamwani va txi m’peka mipama. 68 Va txi kha vona: “He Kristu, hi nga profeta, i mani a nga ku peka?”

69 Pedro a ti khalahatshile ngu hahanze khe mthandani, se mmweyo wa txithumi txa txisikati a to m’yela e ya khene: “Nanawe u ti ni Jesu wa Galileya.” 70 Kambe ene a to lamba a txi khene: “Kha ni ti zivi ati u womba-wombako tona.” 71 Mbimo yi a nga huma e kongoma dipangoni, dihorana dimwani di to m’wona , di txi gela ava va nga di nado di txi kha dona: “Dijaha diya di ti ni Jesu wa Nazareta.” 72 Ene a to xambanya e lamba a txi khene: “Kha ni m’zivi m’thu wuwa.” 73 Msana keto, ava va nga ti ho hale va to yela Pedro va txi ya kha vona: “Ngu ditshuri awe u mmweyo wawe, hambi ngu mawomba-wombelo a kona ma pfala.” 74 Kambe ene a to khata kuxambanya e gima ni hahatshi a txi khene: “Ngu ditshuri kha ni m’zivi m’thu eyo.” Se mkuku wu to emba. 75 Se Pedro a to khumbula ati Jesu a nga ti wombile a to khene: “Na mkuku wu si se emba, awe u na ni lamba sikhati siraru.” Se a to huma e dila ngutu ngu txiviti.

27 Mbimo yi di nga txa, totshe tinduna ta vaprista ni madhota a ditiko va to sengeletana kasi kulangana to va nga m’dayisa kutxani Jesu. 2 Msana ko m’sunga va to m’teka ve m’heleketa ka Pilato i nga ti mkoma.

3 Mbimo yi Judhasi, awu i ku ene a nga xavisa Jesu, a nga wona to se va txi lava ku m’daya, a to ti sola ngutu e tshumeta male ya 30 wa singetxe sa prata ayi a nga ti yi tekile ka tinduna ta vaprista ni ka madhota a ditiko. 4 A txi khene: “Ni onhile ngu kuxavisa m’thu wo mbi na mnando.” Se vona va nje ku kha vona: “Hi bela hani athu ka toneto, eto ndako.” 5 Se a to wavalasa male yile ya prata kona dithempeleni mule e gwita e tsula e ya ti sunga. 6 Kambe tinduna ta vaprista ti to teka male yile ya prata ti txi kha tona: “Male yiya hi nge yi veki ka txuma txa dithempeleni, nguko i male ya mnoha.” 7 Msana ko bhulisana ni vamwani ngu tona va to teka male yile ve ya xava ngu yona thembwe yo kari,* kasi ku yi maha simitera ya vawuyi. 8 Ngu toneto, thembwe yile yi nga txi dhanwa ku i Thembwe ya Mnoha kala nyamsi. 9 Se ku to tatiseka a ti ti nga wombwa ngu mprofeti Jeremiya to khene: “Va to teka 30 wa singetxe, i ku presu ayi va nga xavisa ngu yona m’thu, awule vanana vo kari va Israyeli va nga gema ti to a na xaviswa ngu yona. 10 Se va to xava ngu yona wukhalo wo maha simitera ya vawuyi nga ti Jehovha a nga ti rumisile tona.”

11 Jesu a ti emisilwe masoni ka Pilato, se Pilato a to m’wotisa a txi khene: “Ina awe u Mkoma wa Vajudha?” Jesu a to xamula a txi khene: Awe upune u womba toneto.” 12 Kambe ene kha womba txilo mbimo yi a nga txi lumbetwa ngu tinduna ta vaprista ni madhota a ditiko. 13 Se Pilato a to m’wotisa a txi khene: “Kasi wo mbi ti pfa totshe timhaka ati va ku lumbetako tona?” 14 Hambi keto, ene kha m’xamula nem hambi dipswi da dimwedo aha koza Pilato e xamala ngutu ta tinene.

15 Aku i nga di mbimo ya m’buso, kale kule i ti txihena ku Pilato e txhatxha txibotxhwa txile vathu va txi sawulako. 16 Se ku ti ni txigevenga tximwetxo txi nga ti ñotwe txi nga txi dhanwa ku i Bharabhasi, etxo txi ti ziwa ngutu. 17 Ngu toneto, va di ngadi koneho, Pilato a to khene: “Ngu wuhi awu mi lavako ku ni m’txhatxha: Bharabhasi mwendo Jesu awu va ku khona i Kristu?” 18 Nguko Pilato a txi ti ziva to va m’ñolisile ngu ku va nga txi m’bavela. 19 Hahanze keto, mbimo yi va nga di ngadi khalahatshile tribhunali, msikati wakwe ati m’rumete dipswi diya: “U nga mmahi txilo wamwamna eyo wo lulama, nguko nyamsi ni xanisekile ngutu ngu kulora timhaka to thisa ngu mhaka yakwe.” 20 Kambe tinduna ta vaprista ni madhota va txi kuzetela txitshungu ti to txi kombela to kutxhatxhwa Bharabhasi, kambe Jesu e dawa. 21 Se Pilato a to khene: “I mani awu mi lavako ti to ni m’txhatxha ka vava va vambidi?” Se vona va to kha vona: “Txhatxha Bharabhasi.” 22 Se Pilato a to khene: “Mi lava ti to ni maha txani ngu Jesu, awu va ku khona i Kristu?” Se votshe va to kha vona: “A na hayekwe ka phande!” 23 Ene a to khene: “Ngu kutxani? Kasi a to onha txani? Hambi keto, va to engetela kuvanga diguwa va txi: “A na hayekwe ka phande eyo!”

24 Mbimo yi a nga wona to kha ti vhuni txilo, kambe vo thumela kumaha diguwa, Pilato a to teka mati e samba manza masoni ka txitshungu, a txi khene: “Ani kha ni nga ni mnando wa mnoha wa dijaha diya, atiya ndanu.” 25 Votshe vathu va to xamula va txi kha vona: “Athu ni vanana vathu ngathu hi xamulako ngu mnoha wakwe.” 26 Ene a to txhatxha Bharabhasi kambe a to rumela to Jesu e kwapelwa ni ku mningela ti to e ya dawa ka phande.

27 Masotxhwa a Pilato ma to teka Jesu me m’yisa mtini kwakwe Pilato, se me ya dhana wotshe mtxawa wa masotxhwa. 28 Msana ko m’thavisa sotshe siambalo sakwe va to m’ambeka nguwo yo bhilivila. 29 Se va to luka tshimbo ya mipa ve m’sanzeka ha msungo, ve gwita ve m’ñolisa litshava ka diwoko da txinene se ve khata ku m’khizamela ve m’poyilela va txi kha vona: “Xeweni Mkoma wa Vajudha!” 30 Se va to m’thurela ve tshumela ve teka litshava lile ve m’peka ngu lona hamsungo. 31 Msana kova va di m’poyilete, va to m’thavisa nguwo ayi a nga ti fenengetilwe. Ve gwita ve m’ambekisa siambalo sakwe se ve m’teka ve m’gogotela ha phandeni.

32 Mbimo yi va nga txi huma va to mana wamwamna wa Kirene a nga txi dhanwa ku i Simoni, va to m’sinzisa ku e rwala phande. 33 Mbimo yi va nga hoka ka wukhalo a wu wu dhanwako ku i Golgota, ngu txihebheru ti wombako ku wukhalo wa txikwakwa. 34 Va to m’ninga vhinya ayi yi nga patwa ni mazokoro o bava ti to e sela, mbimo yi a nga yi duka a to lamba kusela. 35 Mbimo yi va nga gwita ku m’gogotela haphandeni, va to xaxuva tixolo kasi kuziva ti to va na abanisa kutxani siambalo sakwe. 36 Se va to gwita ve zumba koneho ve m’wonelela. 37 Va to bhala mapswi a mnando wakwe ve ma veka ngu txitimwi ka msungo wakwe, aya ma ku: “Awuwa i Jesu Mkoma wa Vajudha.”

38 Ku ti ni makhamba mambidi aya ma nga ti hayekilwe ka tiphande, dimwedo ngu didhawa da txinene, dimwani ngu didhawa da txibhabha. 39 Ava va nga txi pinda va txi m’ruketela va txi zinginisa ni msungo. 40 Va txi kha vona: “Awe u nga khawe u nga gindimusa dithempele u di aka ngu masiku mararu, hi nga ti hanyisa ka. I di ti to awe u mwanana wa Txizimu, txhika ka phande!” 41 Ni tona tinduna ta vaprista kumweko ni vamabhalani ni madhota va to khata ku m’poyilela va txi kha vona: 42 “Ene a hanyisile vamwani, kambe ene kha sikoti ku ti hanyisa. Aku i ku Mkoma wa Israyeli a na txhike ngu ka phande kasiku hi na kota kukholwa kwakwe. 43 Ene a ti ti khene a themba Txizimu txakwe, se i di ti to txa m’dhunda txi na m’hanyise konku, nguko a txi khene: ‘Ani ni Mwanana wa Txizimu.’” 44 Kuteka ni makhamba yale ma nga ti hayekilwe didhawani kwakwe ma txi m’ruka.

45 Kukhukhela ma 12 kala ma 15 ku to va ni txidema txa hombe ka ditiko dile. 46 Kona amu ka ma 15 Jesu a to kwangula a txi: “Eli, Eli, lama sabaktani?” Ti wombako ku: “Txizimu txangu, Txizimu txangu u ni lekela txani?” 47 Mbimo yi vamwani va nga ti koneho va nga tipfa, va to kha vona: Wamwamna wuwa a dhana Elija.” 48 Mmweyo wawe, ngu txikuluveta a to tutuma e ya teka txiponji e txi beta mu ka vhinya yo tsavela, e txi veka ka litshava e ninga Jesu ku e sela. 49 Kambe vamwani va to: “M’lekeni, hi na nga wona mwendo Elija a na ta m’lamulela.” 50 Jesu a to tshumela kambe e kwangula, se e fa.*

51 Se ku to maheka to dikortina da dithempeleni di vharuka ngu hagari kukhukhela txitimwi kala hahatshi ku to va ni kuzinginikela ka mafu, marigwi ma to fayekela. 52 Mathitha ma to tuleka, se sirumbi so tala sa va vo sawuleka asi si nga ti otete kufani si to huma 53 si wonwa ngu vathu. (Se vathu ava va nga txi ta ngu madhawa a mathithani msana kova Jesu a di wusilwe, va to wulela ka didhoropa do sawuleka.) 54 Kambe mbimo yi mthangeli wa masotxhwa kumweko ni va a nga ti navo va txi wonelela Jesu, va nga wona kuzinginika ka mafu ni totshe ati ti nga maheka, va to thava ngutu va txi womba tiya: “Ngu ditshuri awuwa ngene Mwanana wa Txizimu.”

55 Ngu kulenyana ku ti ni vavasikati ava va nga txi wonetela. Vona va ti tile ngu Galileya va txi londetela Jesu ni ku m’thumela. 56 Vamwani va kona i ti Mariya Magdhala, Mariya mame wa Jakobe ni Joseti, mame wa Jakobe ni Johani kata Zebhedhewu.*

57 Se aku di nga txo swa, ku to hoka wamwamna wa Arimateya a nga txi dhanwa ku i Josefa awu nene i nga ti m’gondiswa wa Jesu. 58 Wamwamna eneyo a to tsula ka Pilato e ya kombela txirumbi txa Jesu. Se Pilato a to rumisa ti to ve m’txhusa e ya teka. 59 Josefa a to teka txirumbi txa Jesu e txi phutela ka nguwo yo basa yo dhula. 60 Se a to txi teka e ya txi veka ka dithitha dakwe da diphya adi a nga di di tute ka dirigwi. Ngu msana a to rindilita tampa e vhala e khukha e tsula. 61 Mariya Magdhala ni mmwani Mariya va to simama kona hale va di khalahatshile masoni ka dithitha.

62 Msana ka Ditshiku da Kululamisela, mangwanani ka kona, tinduna ta vaprista kumweko ni Vafarisi va to rambana ve ya tshangana masoni ka Pilato. 63 Va txi kha vona: “Wa hombe, hi khumbula to mbimo yi nyamakuho wuwa a nga txi hanya a wombile a txi khene: ‘Ku di pindile masiku mararu ni na wuswa.’ 64 Ngu toneto, rumisa ti to dithitha dile di ya vhalwa ta tinene kala ditshiku da wuraru kasiku vagondiswa vakwe va si ti ve ta pa txirumbi txakwe ve gwita ve gela vathu va txi: ‘Ene a wusilwe ngu ka vakufa!’ Se makuhu yawa o gwita ma nava a piyori ngutu kupinda o khata.” 65 Se Pilato a to va gela ku khene: “Podhi mi teka masotxhwa. Tsulani mi ya vhala ni kuwonelela nga ti mi no ti kotisa tona.” 66 Se vona va to tsula ve ya di vhala bhem, ve gabanyeta bhem tampa ya dithitha ve tshumela ve veka masotxhwa me wonelela.

28 Msana ka Sabata,* ni mixo ya kona ya ditshiku do khata ka divhiki, Mariya Magdhala ni Mariya awu mmwani va to tsula ve ya wona dithitha.

2 Phela ku ve ni kuzinginikela ka hombe ka mafu ka wukhalo wule, nguko ngilozi ya Jehovha yi ti txhikile ngu nzumani yi ta rindilita dirigwi dile di nga ti vhate dithitha, se yi khalahatsha ka dona. 3 Khohe ya yona yi txi phatima kufana ni kuphatima ka nzuma ni siambalo sa yona i ti so basa ku nga hunguva. 4 Ava va nga txi wonelela dithitha va to tsotsowolo ngu kuthava.

5 Kambe ngilozi yi to gela vavasikati vale yi txi kha yona: “Mi nga thaveni, nguko na ti ziva to mi lava Jesu awu a nga dawa ha phandeni. 6 Ene kha ngaho hawa, nguko a wusilwe nga ti a nga ti wombisile tona. Ngonani kheno, mi ta wona aha a nga ti tshotshilwe kona. 7 Se konkuwa, tsulani ngu txikuluveta mi ya gela vagondiswa vakwe ti to: ‘Ene a wusilwe ngu ka va kufa, ene a thangete e ya Galileya. Mi na ya m’wona kona kheya.’ Ngu ti ni nga txi lava ku ta mi gela tona.”

8 Se va to khukha kona hale ngu txikuluveta va txi dhudhumela kambe va di tsakile ngutu, ve ya gela vagondiswa vakwe thenga yiya. 9 Jesu a to manana navo a txi: “Ditxideni!” Se vona va to tshuketa hafuhi kwakwe ve ya m’dhamarela minenge ve bayetha. 10 Jesu a to va gela ku khene: “Mi nga thaveni txilo! Tsulani mi ya gela vafowethu ti to ve tsula Galileya, ngu kona kheya va no ya ni wona.”

11 Mbimo yi vavasikati vale va nga di ngadi hanzila, vawoneleli vale va to tsula didhoropani ve ya txhamusela tinduna ta vaprista totshe ati ti nga ti mahekile. 12 Msana kova tinduna ta vaprista ti ti tshanganile ni madhota kasi kuwona to va na yi huma njani mhaka yiya, va to ninga masotxhwa ale male ya yingi ya prata. 13 Va txi kha vona: “Ngako va txi mi wotisa nda ni khanu: ‘Vagondiswa vakwe va tile ni wusiku, ve ta pa txirumbi txakwe mbimo yi hi nga txi pekwa ngu wukohe.’ 14 Se ngako mkoma a txi ti ziva, athu hi na m’txhamusela, ngu toneto, mi nga karatekeni ngu tona tiya.” 15 Se vona va to teka male yile va nga ningwa ve maha nga ha va nga leletwa ngu kona, se txitoriya txiya txi to hangalaka ka votshe Vajudha kala ditshiku da nyamsi.

16 Se vagondiswa vale va 11 va to tsula Galileya, ka mmango wule Jesu a nga ti va gete ku ve ya ka wona. 17 Mbimo yi va nga m’wona, va to khizama ve bayetha, kambe vamwani va txi kana-kana ti to ngene. 18 Jesu a to tshuketa hafuhi kwawe e va gela tiya: “Ni ningilwe wotshe wuthangeli nzumani ni hamafuni. 19 Ngu toneto, tsulani mi txi ya maha vathu va matiko otshe ve va vagondiswa, mi va bhabhatisa ngu ditina da Tate, da Mwanana ni da moya wo sawuleka. 20 Mi txi va gondisa kumaha totshe tiya ni nga mi leleta tona. Mi nga divaleni, ni ni nanu otshe masiku, kala kuguma ka timbimo tiya.”