MAHUNGU A MANENE O BHALWA NGU MARKU

1 Makhato a mahungu a manene* mayelano ni Jesu Kristu Mwanana wa Txizimu. 2 Nga ti ti nga bhalwa ngu mprofeti Isaya a txi khene: “(Wona! Na rumela m’thu masoni kwako kasiku e ya ku lulamisela nzila.) 3 Ku pfala dipswi txiwulani di txi: ‘Lulamiselani nzila ya Jehovha.* Basisani tinzila takwe.’” 4 Johani M’bhabhatisi a ti txiwulani, e txhumayela ti to vathu ve bhabhatiswa, kasi ku ve kombisa ku ti sola ka sionho sawe ve mana kudivalelwa. 5 Vathu va Jerusalema ni va Judheya ni vathu vamwani va nga ti akile hafuhi ni mnambo wa Jordhani va txi ya kwakwe, vona va txi bhabhatiswa ngu ngene ka mnambo wa Jordhani ve hoka ve wombetela sionho sawe. 6 Johani a txi ambala siambalo so mahwa ngu matoya a makamelo ni libhande lo mahwa ngu didhowo, ene a txi dya humbi* ni wulombe. 7 A txi txhumayela a txi khene: “Awu a tako a ni mtamo ngutu ku ni pala, nem kha ni faneleki kunama ni txhatxha tingoti ta masandalia akwe. 8 Ani ni mi bhabhatisa ngu mati, kambe ene a na ta mi bhabhatisa ngu moya wo sawuleka.

9 Ka masiku onewo, Jesu a hokile Nazareta ka Galileya e ya bhabhatiswa ngu Johani mnamboni ka Jordhani. 10 Msana ko bhabhatiswa, mbimo yi Jesu a nga huma ngu matini, nzuma yi to tuleka, e wona moya wu txi txhika txitimwi kwakwe, nga dituva wu txi ta kwakwe. 11 Se ku to pfala dipswi do ta ngu nzumani di txi: “Awe u Mwanana wangu, khoni-khoni yangu, na xalala ngu ngawe.”

12 Se moya wo sawuleka wu to tekela kumaha ti to Jesu e ya txiwulani. 13 Ene a to ya zumba txiwulani kudingana 40 wa masiku, se Sathani a to m’duka. Jesu a ti kumweko ni sihari sa txitinga kambe tingilozi ti txi m’thumela.

14 Se msana kova Johani a ti betilwe jele, Jesu a to wulela Galileya, na a txi txhumayela mahungu a manene a Txizimu, 15 a txi khene: “Yi hokile mbimo ayi yi nga vekwa, Mfumo wa Txizimu wu hafuhi. Ti soleni ka sionho sanu mi kholwa ka mahungu a manene.”

16 Mbimo yi a nga txi tsimbila mabambe ka linene la Galileya, ene a to wona Simoni ni mnanda wakwe Andreya, va txi riya tikoka nguko i ti vadoti. 17 Se Jesu a to va gela ku khene: “Ni londiseni, ni na mi maha vadoti va vathu.” 18 Se va to tekela kuleka tikoka tawe ve m’londisa. 19 Mbimo yi a nga txi pinda e ya masoni, a to wona Jakobe ni mnanda wakwe Johani, vanana va Zebhedhewu va di mu ka ngalava va txi runga tikoka tawe. 20 Se a to tekela ku va dhana, vona va to siya tate wawe Zebhedhewu ni sithumi sakwe amu ka ngalava ve m’londisa. 21 Se va to bela Kapernawume.

Neti ku nga hoka ditshiku da Sabata, ene a to bela disinagogani e khata kugondisa. 22 Se vathu va to xamala ngutu ngu kupfa magondiselo akwe, nguko a txi va gondisa timhaka ta Txizimu, a si va gondisi kufana ni vamabhalani vale vawe. 23 Ka yoneyo mbimo, disinagogani kheya kwawe ku ti ni wamwamna a nga ti ni didhimoni, ene a txi kwangula a txi khene: 24 “Hi to ku onhela txani, awe Jesu wa Nazareta? U tete ku ta hi lovisa kani? Ani na ti ziva bhem to ngawe mani, awe u Msawuleki wa Txizimu.” 25 Kambe Jesu a to di bhongela a txi khene: “Malala, u tshumela u huma kwakwe.” 26 Se didhimoni dile di to wisa awule wamwamna hahatshi, di m’ginyalatela, e kwangula ngutu di gwita di m’leka. 27 Ngu toneto, votshe va to xamala ngutu ve khata kuwomba-wombisana ngu ti ti nga ti mahekile va txi kha vona: “Ti lava kuwomba txani tiya? I gondo ya yiphya! Ene wa bhongela hambi mimoya ya nzambwa ni ku yona ya mu engisa.” 28 Mhaka yoneyo yi to hangalaka ngu txikuluveta madhawani kotshe ka ditiko da Galileya.

29 Msana keto va to huma disinagogani ve tsula mtini ka Simoni ni Andreya va di ni Jakobe ni Johani. 30 Mkokati* wa Simoni a ti otete nguko a ti ni feveri, se va to tekela kugela Jesu mhakeyo. 31 Ene a to m’yela e ya bwaka e m’nõla ngu diwoko e m’wusa se feveri yi to hangalaka, e khata ku va thumela.

32 Mbimo yi di nga swa, se kuphuma, vathu va txi m’yisela votshe valwati ni va madhimoni. 33 Se vathu va dotshe didhoropa va ti ko fii haditimbani. 34 Ngu toneto, ene a to hanyisa valwati vavangi va nga ti ni malwati o hambana-hambana, e hinga madhimoni a mangi kambe a si ma leki me womba-womba nguko ma txi ti ziva to ene i ti Kristu.*

35 Ni mixo, ku di ngadi phum, a to wuka e huma e ya ka wukhalo wakwe ekhelela, e ya khata kumaha mkombelo. 36 Ngu toneto, Simoni ni va a nga ti navo va to huma ve tsimbila ve m’lavetela. 37 Mbimo yi va nga m’mana va to kha vona: “Vathu va ku lavetela mkoma.” 38 Kambe ene a to khene: “He tsimbileni ka wukhalo wumwani, ka madhoropa a hafuhi kasiku ni ya txhumayela ni kona, nguko ani ni tete toneto.” 39 Ene a to tsimbila ditikoni kotshe ka Galileya e txhumayela masinagogani kwawe, ni kuhinga madhimoni.

40 Se wamwamna wo kari wa tshekela a to m’tshuketela e m’kombela e veka ni kukhizama a txi khene: “Mkoma, ngako u txi ti lava, u nga ni basisa.” 41 Ngu toneto, ene a to m’pfela wusiwana e nawuluta diwoko dakwe e gwesa wule wamwamna a txi khene: “Na ti lava! Basiswa.” 42 Se tshekela yi to tekela hangalaka e basiswa. 43 Jesu a to khata ngu ku m’laya e m’leka e tsula. 44 E m’gela tiya: “Ni kombela u si geli m’thu, aniko tsula u ya ti kombekisa ka mprista, u humisa mningelo wa kubasiswa kwako awu wu nga gemwa ngu Mosi, kasiku ve ti wona.” 45 Mbimo yi wamwamna wule a nga txi tsula a to khata kuhuwelela totshe ati ti nga maheka, e hangalasa mhaka yile yotshe. Di walo didhoropa adi Jesu a nga txi wulela ti si ziwi to a tile, ngu toneto ene a txi tolovela kuzumba ka makhalo aya ku nga si zumbi vathu, kambe vathu va txi ta kwakwe ngu ka otshe makhalo.

2 Ku di pindile masiku o kari, Jesu a to tshumela Kapernawume, se thenga ya ti to waho mtini yi to hangalaka. 2 Vathu va vangi va to sengeletana aha koza ni hatxikeni ku pwateka ni wukhalo. Jesu a to khata ku va txhumayela dipswi da Txizimu. 3 Va to m’tisela m’thu wa paraliziya* a di rwatwe ngu mune wa majaha. 4 Kambe vona va si na kusikota kubela ve ya hale Jesu a nga ti kona, ngu mhaka ya txitshungu. Se va to kwela txitimwi ka nyumba ve tula ditshoko ngu hale Jesu a nga ti kona, ve txhikisa txipadhiyola atxi wamwamna wule wa paraliziya a nga ti ka txona. 5 Mbimo yi Jesu a nga wona kukholwa, kwawe a to gela wamwamna wule wa paraliziya a txi khene: “Mwanangu, sionho sako si divaletwe.” 6 Ku ti ni vamabhalani vo kari va nga ti zumbile va txi pimisa tiya timbiluni kwawe: 7 “Ngu kutxani wamwamna wuwa a txi womba-wombisa tiya kani? Phela o ruketela. I mani awu a nga divalelako sionho hahanze ka wammweyo dwe i ku Txizimu?” 8 Ngu toneto, Jesu a to tekela kutiziva to va pimisa txani timbiluni kwawe, se a to va gela a txi khene: “Ngu kutxani mi pimisako eto timbiluni kwanu? 9 Ngu tihi ti hehukako kugela wule wa paraliziya. Ngu khawe: ‘Sionho sako si divaletwe,’ mwendo ngu khawe: ‘Khukha u ema u teka txipadhiyola txako u tsimbila?’ 10 Kambe kasiku mi ti ziva to Mwanana wa M’thu a ni mtamo wo divalela sionho hamafuni, ene a to gela dijaha dile da paraliziya a txi khene: 11 “Konkuwa ani ni khani: Khukha u txi ema u teka txipadhiyola txako u tsula mtini.” 12 Ene a to khukha e ema e teka txipadhiyola txakwe e tsula a txi wonwa ngu vathu votshe. Ngu toneto, votshe va to xamala ngutu ve dhumisa Txizimu, va txi kha vona: “Kha hi khali kuwona to nga tiya.”

13 Jesu a to tsula kambe mabambe ka linene, se txitshungu txotshe txi to khata ku m’londisa, se ene e khata ku txi gondisa. 14 Mbimo yi a nga txi pinda a to wona Levhi mwanana wa Alfewu a di khalahatshile ka wukhalo wo hakelisa resa, a txi khene kwakwe: “Va na m’londeteli wangu.” Neti a nga womba toneto, ene a to khukha e m’londisa. 15 Ngu mbimo yimwani, Jesu a txi dya mtini ka Levhi. Ku ti ni vakhupisi vo tala ni vaonhi va nga txi dya ni Jesu kumweko ni vagondiswa vakwe, nguko ku ti ni vakhupisi ni vaonhi vo tala va nga txi m’londisa. 16 Mbimo yi vamabhalani ava i nga ti Vafarisi va nga wona to Jesu a txi dya ni vaonhi ni vakhupisi va to wotisa vagondiswa vakwe va txi kha vona: “Ngu kutxani a txi dya ni vakhupisi ni vaonhi kani?” 17 Mbimo yi Jesu a nga ti pfa a to khene kwawe: “Ava va si lwaliko kha va lavi dhokodhela, aniko dhokodhela a lawa ngu va va lwalako. ‘Kha na tela ku ta dhana vo lulama, kambe ni tete vaonhi.”

18 Vagondiswa va Johani ni Vafarisi va ti jejuwara. Ngu toneto, va to tshuketela Jesu va txi m’wotisa ku kha vona: “Ngu kutxani vagondiswa va Johani ni vagondiswa va Vafarisi va txi jejuwara, kambe vagondiswa vako va si jejuwari kani?” 19 Jesu a to va gela a txi khene: “Ina vangana va noivho va nga jejuwara kuveti noivho a ngadi navo kani? Ngu toneto, ngako noivho a ti ngadi navo kha va jejuwari. 20 Kambe, ma ta masiku aya noivho a no tekwa, ngu yo mbimo va no jejuwara. 21 Kha ngaho awu a rungako txiziva txa txiphya ka nguwo yo sakala, nguko a txi maha eto txi na engetela kusakata, nguwo se yi sala i di txinvanvi. 22 Kambe kha ngaho awu a nga thelako vhinya ya yiphya ka misava ya kale, nguko a txo maha toneto, misava yi na bhandeka se vhinya yi thekelela, kambe vhinya ya yinene yi thelwa ka misava ya yiphya.”

23 Dikhambi do kari, Jesu a txo pinda ngu thembweni ka trigu ngu Sabata, se vagondiswa vakwe va to khata kuhaphela trigu ve dya. 24 Aha koza Vafarisi va txi kha vona: “Hi nga wona! Ngu kutxani vagondiswa vako va txi maha ati ti si tumelelwi kumahwa ngu Sabata kani? 25 Ene a to va gela ku khene: “Kha ma gonda ati Dhavhidha ni vavamna ava a nga ti navo va nga maha mbimo yi va nga txi pfa nzala? 26 To Dhavhidha a bete nyumbani ka Txizimu ka mbimo yile Abhiyatari i nga ti mprista wa hombe e dya mapawa a dithempeleni, aya ma nga si tumelelwi kudyiwa ngu mmwani m’thu, hahanze ka vaprista dwe e tshumela e ninga ni vale a nga ti navo.” 27 Se a to gwita a txi khene: “Sabata yi manekile ngu mhaka ya m’thu, hi nga m’thu a nga mahwa ngu mhaka ya Sabata. 28 Se Mwanana wa M’thu, Mkoma hambi wa Sabata.”

3 Jesu a to tshumela e wulela disinagogani, se ku ti ni wamwamna a nga ti khwanyete diwoko. 2 Vafarisi va txi wonetela ngutu Jesu kasi kuwona to a na hanyisa wamwamna wule ngu Sabata kasi ku ve m’ninga mnandu. 3 Ene a to gela wamwamna wule wo khwanyela diwoko a txi khene: “Khukha u ta ema ngu hagari hawa.” 4 Se ene a to gwita e va wotisa ku khene: “Ina ta tumelelwa kumaha tatinene mwendo to biha, kuhanyisa mwendo kudaya ngu Sabata kani?” Kambe vona va to malala. 5 Ene a to va wonetela a di swirekile ngutu ni kupandiseka, ngu mhaka ya kubiha ka timbilu tawe, se ene a to gwita e gela awule wamwamna a txi khene: “Nawuluta diwoko dako.” Se ene a to di nawuluta, se diwoko di to hanya. 6 Ngu toneto, Vafarisi va to huma ngu txikuluveta ve ya manana ni vaseketeli va Herodha ve ya luka tipulani to va na m’dayisa kutxani Jesu.

7 Jesu a to tsula lineneni ni vagondiswa vakwe, se txitshungu txa hombe txo ta ngu Galileya ni Judheya txi to m’londeta. 8 Txitshungu txa txingi txi to m’londeta ngu kupfa ati Jesu a nga txi maha, kuteka ni va va nga txi ta ngu Jerusalema, Idhumeya, mtxhatuko ka Jordhani ni mabambe ka Tiro ni Sidhoni. 9 Se ene a to gela vagondiswa vakwe ti to ve m’lungisela txingalavana to e zumba ka txona kasiku txitshungu txi si m’kamareteli. 10 Aku a nga txi hanyisa vavangi, votshe ava va nga ti ni malwati a hombe va txi kamana kwakwe kasiku ve m’gwesa. 11 Hambi va va nga ti ni mimoya ya nzambwa, kova ha va nga txi m’wona kona, va txo khizama masoni kwakwe ve kwangula va txi:“Awe u Mwanana wa Txizimu.” 12 Kambe Jesu a to gela mimoya yile ti to yi si thuki yi gela vamwani to ene i ti mani.

13 Se ene a to kwela txitimwi ka mmango e dhana ava a nga txi va lava, se vona va tsula. 14 Ene a to maha mtxawa wa 12 wa vathu, ava a nga va dhana ku vapostoli, kasi kutsimbila-tsimbila navo ni ku va ruma ti to ve txhumayela. 15 Ene a to va ninga mtamo wo hinga madhimoni.

16 Ka mtxawa wonewo wa 12 ku ti ni Simoni awu a nga mu raya to i Pedro, 17 ni Jakobe mwanana wa Zebhedhewu, ni Johani mnanda wa Jakobe (ava ene a nga va raya ditina da ku Bhowanerjesi, ti wombako ku “vanana va txingwala-ngwanda”), 18 ni Andreya, ni Filipi, ni Bhartolomewu, ni Matewu, ni Tomasi, ni Jakobe mwanana wa Alfewu, ni Tadhewu, ni Simoni wa Mukanana 19 ni Judhasi Iskariyoti, awu a nga gwita e m’xavisa.

Jesu a to gwita e tsula ka mti wo kari. 20 Txitshungu txi to tshumela txi sengeletana kambe, aha koza ti si koteki ku e susula. 21 Kambe, mbimo yi maxaka akwe ma nga ti pfa, ma to tsimbila me m’lava nguko ma txi pimisa ti to Jesu ti sate matshinani.* 22 Vamabhalani va nga txi ta ngu Jerusalema va to kha vona: “Ene a thuma ngu Bhelzebhule ni ku a hinga madhimoni ngu mtamo wa xefe ya madhimoni. 23 Se a to va dhana e gwita e va gela txidinganiso a txi khene: “Ti nga kotekisa kutxani ku Sathani e ti hinga apune kani? 24 Ngako mfumo wu txi ti abanisa, wu txi ti wukela wupune, mfumo wonewo wu na mbi tsana. 25 Ni ku, ngako mwaya wo kari wu txi ti abanisa wu txi ti wukela wupune wu na mbi tiya. 26 Ngako Sathani a txi ti abanisa a txi ti wukela, ene kha na mbi tsana ni ku a na gwitisela kulova. 27 Phela kha ku nga ni m’thu awu a ti kotako kudhumela mtini ka m’thu wa mitamo e m’tekela silo sakwe a sa khata ngu ku m’sunga. Ngako a di m’sungile, ngu kona a no m’tekela simaha sakwe. 28 Kambe na mi gela ditshuri, ni khani: “Sotshe sionho asi vathu va si mahako ni sotshe siruko asi va si wombako, va na divalelwa. 29 Aniko, awu a rukako moya wo sawuleka kha na mbi divalelwa, kambe mnando wakwe mbwa kala kupinduka.” 30 Jesu a wombile tiya nguko va txi khona ene a ni didhimoni.

31 Se mame wakwe ni vananda vakwe va to ema hahanze ve ruma m’thu to e ya m’dhana. 32 Se aku txitshungu txi nga ti khalahatshile txi m’randela txi to m’gela ku kha txona: “Mkoma, mame wako ni vananda vako va ho hahanze kheya va ku lava.” 33 Se ene a to va xamula a txi khene: “I mani mame wangu ni vananda vangu kani?” 34 Se a to wonetela ava va nga ti khalahatshile hafuhi nayo, a txi khene: “Mame wangu ni vananda vangu ngu vava! 35 Nguko awu a mahako kuranda ka Txizimu, eyo ngene mfowethu, ndiyangu ni mame wangu.”

4 Jesu a to tshumela e khata kugondisa a di lineneni, a di randetwe ngu txitshungu txa hombe. Se a to khukha e ya bela ngalavani e khalahatsha, e yi txhovhanyana yi bela matini, se txitshungu txi ti khalahatshile mabambe ka linene. 2 Se ene e to khata ku va gondisa ta tingi ngu kuthumisa sidinganiso. A txi va gondisa a txi khene: 3 “Engisani tiya: Mphayi wo kari a to huma e ya kuphayani. 4 Mbimo yi a nga txi phaya, timbewu timwani ti wete hanzila, se ku to ta sinyana si ta dya. 5 Timbewu timwani ti wete ka marigwi, amu ku nga si nga ni mafu a mangi, se ti to kuluveta ti kula nguko mafu ma sa tshima.* 6 Aniko, mbimo yi ditambo di nga khata kuhisa ti to pfa kuhya ti wuna nguko ti si nga ni mikuluti. 7 Timwani timbewu ti to wela ka mwasi wa mipa, se mwasi wu to kula wu kura timbewu tile se tona kha ta veleka mihando. 8 Timbewu timwani ti to wela ka mafu a manene, se mbimo yi ti nga mila ti to khata kuveleka mihando; timwani ti velekile 30, timwani 60, timwani ti veleka 100.” 9 Ene a to tshumela a txi khene: “Awu a ku ni tinzeve a na engise.”

10 Mbimo yi vamwani va nga tsula, vagondiswa vakwe va 12 ni vamwani va to ta kwakwe ve ta lava kuziva txhamuselo ya sidinganiso sakwe. 11 Ene a to va xamula a txi khene: “Anu mi ningilwe kupfisisa txihunja txo sawuleka txa Mfumo wa Txizimu, aniko vamwani va gelwa totshe ngu kuthumisa sidinganiso. 12 Ni maha toneto kasiku hambi va txi tula maso, va si woni txilo, ve engisa kambe va si pfisisi txilo, nem va na mbi ti sola kasiku ve mana kudivalelwa.” 13 Ene a to tshumela e va gela ku khene: “Anu kha mi txi pfisisi txidinganiso txiya, se mi na si pfisisa njani sidinganiso simwani kani?

14 “Mphayi a phaya dipswi da Txizimu. 15 Se atile ti nga phaywa hanzila, aha dipswi da Txizimu di nga phaywa kona, ngu vale va pfako dipswi se Sathani e ta e ta thavisa dipswi adi di nga phaywa timbiluni kwawe. 16 Ngu kufana, ayi yi nga phaywa ka wukhalo wa marigwi, ngu vale va nga engisa mahungu a manene ve tekela ku ma amukela ngu litsako. 17 Kambe vona kha va mili mikuluti, hambi keto va simama ngu mbimonyana, aniko ku txi humelela sikarato ni kuxaniswa ngu mhaka ya mahungu a manene vona va na pshwetemuka ve wa. 18 Se ku ni timwani ati ti nga phaywa hagari ka mwasi wa mipa, evo ngu vale va engisako mahungu a manene. 19 Aniko kuvilela ngu sa mafu yawa ni kuxengwa ngu kulava kuganya ni kulava silo simwani ku kura dipswi se di si veleki mihando. 20 Ngu magwito, atile ti nga phaywa ka mafu a manene ngu vale va nga engisa mahungu a manene ve ma tumela se ve veleka mihando ka 30, ka 60 ni 100 wa sikhati.”

21 Ene a to tshumela kambe a txi khene: “Ina dilambu da layithwa di vekwa hahatshi di khubhunyetwa ngu txirundo, mwendo kuvekwa hahatshi ka m’bhedhu kani? Ina kha di layithwi di vekwa txitimwi kani? 22 Nguko kha txi ngaho atxi txi nga siswa txi no mbi humiswa hahanze, nem kha txi ngaho atxi txi nga siswa bhem txi no mbi tumbulwa. 23 Awu a ku ni tinzeve a na engise.”

24 Se a to engeta e va gela ku khene: “Mpimo wu mi pimelako vamwani ngu wona mi na pimelwa ngu wona ni ku nanu mi na tshumela mi engetelwa.” 25 Nguko awu a ku naso a na engetelwa simwani, kambe awule a si ngako naso a na tekelwa hambi ni sile a ku naso.”

26 A to engeta a txi khene: “Ngu toneto, Mfumo wa Txizimu wu nga fananiswa ni m’thu wule a phayako mbewu thembweni kwakwe. 27 Ene wa otela ni wusiku, di txi txa e wuka, se timbewu ta mila ti tshumela ti kula kambe ene kha ti zivi to kasi ti kulisa kutxani. 28 Mafu ma humisa mihando mapune kudotho-kudotho; kukhata ku mila ditshanga, ngu msana di rumbuka, ngu magwito di humisa mbewu yo khwara. 29 Kambe ngako timbewu ti txi khwara, ene wa teka sikela e wila nguko se yi hokile mbimo yo elula.”

30 Ene a to engeta a txi khene: “Mfumo wa Txizimu, hi nga wu fananisa ni txani? Ngu txihi txidinganiso hi nga txi thumisako kasi ku wu txhamusela? 31 Wu fana ni mbewu ya txinapi, mbimo yi yi phaywako, yona yidotho kupinda totshe timbewu ta hamafuni. 32 Kambe yi txi phaywa, yona ya kula yi maha ya hombe yi txi pinda yotshe mindonga yimwani, yi humisa madhavi a hombe aha sinyana sa nzumani si manako wukhalo ka mtsudi wa kona.”

33 Ngu kuthumisa sidinganiso sa singi so nga tiya, ene a txi va txhumayela mahungu a manene kala ku za ve ti pfisisa bhem. 34 Ngu ditshuri, ti walo ati a nga txi ti womba a si thumisi sidinganiso, kambe ene a txi gwita e txhamusela vagondiswa vakwe ngu didhawa.

35 Ka donedo ditshiku, mbimo yi di nga swa ene a to va gela ku khene: “A hi tshawunyeteni hi ya mtxhathuko.” 36 Mbimo yi va nga satisana ni txitshungu va to tsula nayo ngu ngalava. Ku ti ni timwani tingalava ti nga txi va heleketa. 37 Se ku to vhukuka txihuhuri txa hombe, mavimbi ma txi peka ngalava, aha ko za ngalava yi talelwa ngu mati. 38 Kambe ene a txo otela msana ka ngalava aha ka txikhigelo.* Se vona va to m’wusa va txi kha vona: “M’gondisi, wo mbi ti wona to ho lava kufa?” 39 Se ene a to wuka e kawuka txihuhuri e gela linene ku khene: “Malala u txi dwe!” Se moya wu to ema, ku va ni kuzenga ka hombe. 40 Se a to va gela ku khene: “Ngu kutxani mi txi thava ngutu? Kala kuwa kha mi se va ni likholo?” 41 Kambe vona va to thava ngutu,* ve gelana ku kha vona: “Kasi i mani ene wuwa, wo hambi txihuhuri ni linene sa m’engisa?”

5 Se va to hoka mtxhatuko ka linene ka wukhalo wa Vajerasa. 2 Neti a nga huma ngalavani, wamwamna wo kari a nga ti ni didhimoni a nga txi zumba simitera a to huma e yela Jesu. 3 Ene a txi zumba simitera ni ku kala mbimo yoneyo, a walo a nga txi sikota ku m’sunga hambi ngu titxhini. 4 Sikhati so tala va txi m’sunga mawoko ni minenge ngu titxhini. Kambe ene e txi bhenula titxhini ta mawokoni, e bhenulela ati ta minengeni, a walo a nga txi si kota ku m’sunga. 5 Wusiku ni mitshikari ene a txi kwangula amu simitera ni mimangoni, a txi ti kurumutela ngu marigwi. 6 Kambe mbimo yi a nga wona Jesu a ti kule ene a to tutuma e ta m’khizamela. 7 Se ene a to kwangula a txi khene: “Ni to ku onhela txani awe Jesu, Mwanana wa Txizimu Nyatxitimwi kani? Xambanya ngu Txizimu ti to u na mbi ni xanisa.” 8 Nguko Jesu a ti gete didhimoni dile a txi khene: “Moyawe wa nzambwa, huma ka m’thu wuwa.” 9 Kambe Jesu a to di wotisa ku khene: “Ngawe mani ditina dako?” Di so xamula di txi kha dona: “Ngani txikwata, nguko hi vangi.” 10 Se di kombela Jesu ti to a si ma toveli me huma ka ditiko dile.

11 Ku ti ni mtxhambi wa hombe wa tikhumba ti nga txi dyiswa mmangoni. 12 Se madhimoni ma to m’kombela ma txi: “Hi leke hi ya bela ka tikhumba.” 13 Se ene a to ma tumelela, ngu toneto madhimoni ma to tsula me ya bela ka tikhumba, mtxhambi wotshe wa tikhumba wu to tutuma wu ya bela lineneni. Kona mu ka 2.000 wa tikhumba ti to bwabwamela matini. 14 Se vafuyi va tikhumba va to thava ve tutuma ve ya womba mhaka yoneyo didhoropani ni hahanze ka didhoropa, se vathu va to tsula ve ya wona ati ti nga ti humelete. 15 Ngu toneto, va to tshuketela Jesu ve wona wule a nga ti ni madhimoni a txikwata a di khalahatshile. Ene a ti ambate bhem ni ku se ti txi teka, se vona va to thava. 16 Ava va nga ti ti woni tiya, va to kontarela vamwani ati ti nga mahekisa tona ta wamwamna wule wa madhimoni ni ta tikhumba. 17 Se va to khata kukombela Jesu ti to e huma didhoropani mule kwawe.

18 Mbimo yi Jesu a nga txi bela ngalavani, wamwamna wule a nga ti ni madhimoni a to m’kombela ti to e m’tumelela e tsula nayo. 19 Kambe, Jesu kha tumela, ene a to m’gela ku khene: “Tsula mtini, u ya gela maxaka ako totshe ati Jehovha a nga ku mahela ni wuxinji wu ene a nga ku komba wona.” 20 Se wule wamwamna a to tsula e ya khata kuhuwelela kotshe Dhekapoli, totshe ati Jesu a nga m’mahela, se votshe va to xamala ngutu.

21 Msana kova Jesu a di txhatukile kambe ngu ngalava, txitshungu txa hombe txi to sengeletana mabambe ka linene. 22 Ku to hoka wamwamna wo kari i nga ti mthangeli wa disinagoga, a nga txi dhanwa ku i Jayiro. Mbimo yi a nga wona Jesu a to khizama mikondoni kwakwe. 23 Se a to m’kombela sikhati sa singi a txi khene: “Mwanana wangu wa txihoranana wa lwala ngutu, na kombela u ta m’sanzeka manza kasiku e hanya.” 24 Ngu toneto, Jesu a to tsula nayo, se a to londiswa ngu txitshungu txa hombe txi txi m’kama.

25 Se ku ti ni wamsikati awu a nga heta 12 wa malembe atxi lwala ngu malwati o humela mnoha. 26 Ene a ti xanisekile ngutu a txi zama kuthumwa ngu vadhokodhela va vangi, e za e gumelwa ngu sotshe asi a nga ti naso kambe kha tshukwala. Hahanze keto a txo piorara. 27 Mbimo yi a nga pfa ati Jesu a nga txi maha, ene a to tshuketa, e khulukutela ka txitshungu e gwesa siambalo sakwe. 28 Nguko ene a txi pimisa tiya: “Ngako ni txo gwesa siambalo sakwe dwe, ni na hanya.” 29 Ngu txikuluveta wu to ema kuhumela mnoha, e ti pfa to a hanyisilwe ka wulwati wule wo karata.

30 Jesu a to tekela kupfa to ku ni mtamo wu nga huma kwakwe, ene a to tshembereka e wotisa txitshungu a txi khene: “I mani a nga gwesa siambalo sangu?” 31 Kambe vagondiswa vakwe va to m’gela ku kha vona: “Mkoma, wa ti wona to txitshungu txo ku kama, kambe u ngadi u txi wotisa u txi khawe: ‘I mani a nga ni gwesa?’” 32 Kambe ene a txi ruma-ruma madhawani kasi kuwona to i mani a nga ti m’gwesile. 33 Awule wamsikati a to dhudhumela ngu kuthava ngu kuziva ati ti nga ti m’humelete, se a to tshuketela Jesu, e khizama e m’gela dotshe ditshuri. 34 Ene a to gela awule wamsikati a txi khene: “Mwanangu, likholo lako li ku hanyisile. Tsula ngu kurula, hanya ka malwati ako o karata.”

35 A txi ngadi a txi womba-womba, ku to hoka vavamna vo kari vo ta ngu mtini ka wule wa mthangeli wa disinagoga va txi ta kha vona: “Mwanana wako a fite, u ngadi u txi m’xuphela txani M’gondisi?” 36 Jesu a to ti pfa, se e gela wule wa mthangeli wa disinagoga a txi khene: “U nga thave, awe kholwa kwangu dwe.” 37 Ene kha lava kulondiswa ngu m’thu mmwani hahanze ka Pedro, Jakobe ni Johani mnanda wa Jakobe.

38 Mbimo yi va nga hoka mtini ka wule wa mthangeli wa disinagoga, Jesu a to wona vathu va txi dila ni kupeka tihuwa. 39 Mbimo yi a nga wulela a to va wotisa a txi khene: “Ngu kutxani mi txi dila ni kukarateka? Dihorana diya kha da fa, di to otela.” 40 Se ava va nga di ho va to khata ku m’seka ve m’poyilela. Kambe msana ko humisa votshe hahanze, a to teka tate wa dihorana dile ni mame wa dona ni va a nga ti navo ve bela ve ya hale dihorana dile di nga ti kona. 41 Se a to ñola diwoko da dihorana dile a txi khene: “Talita kumi,” ti wombako ku: “Dihorana, ni khani kwako, wuka.” 42 Se dihorana dile di to wuka di txi khata kutsimbila. (Dona ti ti ni 12 wa malembe.) Votshe ava va nga ti ti ho va to tsaka ngutu. 43 Ene a to va gela ngu kuphinda-phinda ti to va si thuki ve gela m’thu ati ti nga maheka, e va ruma ti to ve ninga sakudya dihorana dile.

6 Se a to khukha hale e wulela didhoropani kwawe, se vagondiswa vakwe va to m’londisa. 2 Mbimo yi ku nga hoka Sabata a to wulela disinagogani e gondisa. Se kutala ka va a nga txi va gondisa va to xamala va txi kha vona: “Kasi a ti mana hani tona tiya, ngu kutxani i di ene a nga ningwa wuzivi wuwa kani? Ngu kutxani i di ene a mahako mithumo yiya yo xamalisa ngu manza akwe kani? 3 Ina awuwa hi nga ene a wu wa m’vati, mwanana wa Mariya kani? Vananda vakwe hi nga Jakobe, Josefa, Judhasi ni Simoni kani? Tindiyakwe hi nga tona ti ku ho hagari kwathu kani?” Se va to khata kukana-kana. 4 Kambe Jesu a to va gela ku khene: “Mprofeti wa amukelwa ka matiko mamwani, aniko kha amukelwi ditikoni kwawe, hambi i txo va ngu maxaka akwe mwendo ngu va mtini kwakwe.” 5 Ngu toneto, kha maha mithumo yo tala yo xamalisa ahale. Ati a nga maha ngu va sanzeka manza e hanyisanyana vathu vo kari. 6 Ngu ditshuri a to xamala ngu kuwona to va si kholwi kwakwe. Se a to tsimbila-tsimbila ka sidhoropana sa mule a txi gondisa.

7 Ene a to dhana vagondiswa vakwe va 12 e khata ku va rumela vambidi-vambidi e va ninga mtamo wo hinga madhimoni. 8 Ene a to va ninga mthetho wo va si longi txilo, ka liendo lawe nem dipawa nem mkwama wa sakudya, nem txipatxhi txa male hahanze ka ndonga dwe, 9 va si teki simaha so ya txitxa, kambe a va rumile ti to ve ambala masandaliya. 10 Ene a to tshumela e va gela ku khene: “Kwalkeri mti mi no wu mana, zumbani ka wona kala kuza mi khukha ka wukhalo wonewo.” 11 Kotshe amu va no mbi mi amukela mwendo va si mi engisi, mbimo yi mi khukhako, huphutani lithulu mikondoni kwanu kasiku ve ti wona.” 12 Se vona va to khukha ve khata kutxhumayela vathu ti to ve ti sola ka sionho sawe. 13 Vona va txi hinga madhimoni o tala ni kuhanyisa valwati va vangi ngu ku va tota mafura.

14 Se mkoma Herodha a to pfa mhaka yiya, nguko ditina da Jesu di txi ziwa kotshe, se vathu va txi kha vona: “Awuwa i Johani M’bhabhatisi a nga wuswa ngu ka vakufa, ngu toneto a sikotako kumaha mithumo yo xamalisa.” 15 Kambe vamwani va txi kha vona: “I Elija.” Ni ku vamwani va txi kha vona: “I mprofeti nga vaprofeti vale va kale.” 16 Mbimo yi Herodha a nga ti pfa a to khene: “Johani awu ni nga m’daya a wusilwe.” 17 Nguko ngu ditshuri Herodha a ti rumisile to kuñolwa Johani e sungwa e betwa jele ngu mhaka ya Herodhiya msikati wa Filipi mkoma wakwe awu ene a nga ti txhadhile nayo. 18 Nguko Johani a txi gela Herodha a txi khene: “Kha ti tumelelwi ku u tekana ni msikati wa mkoma wako.” 19 Ngu toneto, Herodhiya a txi m’nyenya ngutu Johani ni ku a txi lava ku m’daya, kambe a txi ti tanda. 20 Nguko Herodha a txi m’thava ngutu Johani ngu kuziva ti to i ti m’thu wo lulama ni kusawuleka, se a txi m’vhikela. Yotshe mbimo a nga txi m’pfa a txi womba-womba, a txo thava a si ti zivi to a na maha txani hambi keto a txi ti tsakela ku mu engisela.

21 Se ku to hoka ditshiku adi Herodhiya a nga tulekelwa ngu mkhanjo, i ku ditshiku di Herodha a nga txi tshanganisa malembe, se a to maha fexta e dhana tixefe, vakomandanti va masotxhwa ni sibonda simwani sa Galileya. 22 Se mwanana wa Herodhiya a to bela e sinya, e renderisa* ngutu Herodha ni va a nga ti navo hamezani. Se Herodha a to gela dihorana dile a txi khene: “Kombela atxi u txi lavako ni na ku ninga.” 23 Ene a to veka ni kuxambanya a txi khene: “Kwalkeri txi u no txi kombela ni na ku ninga, hambi u txo lava ni ku pumbela hafu ya wukoma wangu ni na ku ninga.” 24 Se ene a to huma e ya wotisa mame wakwe a txi khene: “Ni m’kombela txani?” Ene a to m’xamula a txi khene: “Kombela msungo wa Johani M’bhabhatisi.” 25 Ngu txikuluveta a to tutuma e ya ka mkoma e ya maha txikombelo txakwe a txi khene: “Mkoma, ni kombela u ni ninga msungo wa Johani M’bhabhatisi amu ka mbiya ngu txikuluveta.” 26 Hambiku mkoma a nga txi karateka ngutu ngu mhaka yiya kha lamba ngu ku a nga ti xambanyile ni ngu mhaka ya vale a nga ti va rambile.* 27 Se ngu txikuluveta, mkoma a to rumela disotxhwa kasiku di ya teka msungo wa Johani. Di to tsula jele di ya wila msungo wa Johani. 28 Se di to tisa msungo wu di mu ka mbiya, di wu ningela ka dihorana dile, se dihorana dile di wu teka di wu ningela ka mame wa dona. 29 Mbimo yi vagondiswa va Johani va nga ti ziva, va to ya teka txirumbi txakwe ve ya txi tshotsha dithithani.*

30 Se vapostoli va to khalahatsha ni Jesu ve m’kontarela totshe ati va nga ti mahile ni ti va nga ti gondisisile tona vathu. 31 Se Jesu a to va gela ku khene: “He tsimbileni ka wukhalo wo mbi na vathu kasiku hi ya humulanyana hi di hokha.” Nguko va txi talelwa ngu vathu. Ku txi ta va, vamwani va txi tsula, ngu toneto va si mani mbimo yo humula hambi yo susula. 32 Se va to khukha ngu ngalava ve ya ka wukhalo wo mbi na vathu kasiku ve ya zumba vokha. 33 Kambe vathu va to va wona mbimo yi va nga txi khukha, se ti to ziwa ngu vathu vo tala, ngu toneto, vathu va otshe madhoropa va to va londisa ngu mikondo ve khata vona ve hoka. 34 Se mbimo yi a nga txhika ngu ngalavani a to wona txitshungu txa hombe e txi pfela wusiwana, nguko txi txi fana ni tinvuta to mbi na m’dyisi. Se a to khata ku va gondisa timhaka to tala.

35 Se i ti wusiku, ngu toneto vagondiswa vakwe va to m’tshuketela va txi ta khona: “Ahawa hi ku kona txiwulani, ni ku se di swite. 36 Va gele ve tsula ve ya ka madhoropa a hafuhi ve ya ti xavela sakudya.” 37 Se ene a to va xamula a txi khene: “Va ningeni anu sakudya.” Se va to m’wotisa va txi kha vona: “Hi fanete hi tsula hi ya xava mapawa a 200 wa madhenari kasiku hi ta ninga vathu vava kani?” 38 Se ene a to khene: “Mapawa mangahi mi ku nawo? Tsulani mi ya wona.” Msana ko wona va to kha vona: “Mtxhanu wa ona ni sihaka simbidi.” 39 Se ene a to va gela ti to ve khalahatsha ngu mitxawa aha ka mwasi. 40 Va to zumba ngu mitxawa ya 100 ni ya 50. 41 Ene a to teka mapawa yale a mtxhanu ni sihaka sile sa simbidi e wona nzumani, e si katekisa. Se a to gwita e khema mapawa e ninga vagondiswa vakwe kasiku ve phakisela vathu ni kuphakisela kambe sihaka sile sa simbidi ka votshe. 42 Se votshe va to dya va txi khura. 43 Ve sengeletela otshe mapawa aya ma nga ti sate ve tata 12 wa tithavangu ku si balwi ni sihaka asi si nga ti sate. 44 Votshe ava va nga dya mapawa i ti 5.000 wa majaha.

45 Neti va nga gwita kudya ene a to gela vagondiswa vakwe ve bela ngalavani ve ya mtxhatuko ka madhawa a Bhetsayidha, a txi ngadi a txi satisana ni txitshungu. 46 Msana ko va satisa ene a to tsula ka mmango wo kari e ya khongela. 47 Mbimo yi di nga swa, ngalava yi ti hagari ka mati, kambe ene a ti ekha hahanze. 48 Mbimo yi a nga wona to ti txi va karatela kutxunga ngalava nguko ku txi peka moya ya hombe, ene a to va yela ngu mbimo ya madrugadha* a txi tsimbila txitimwi ka mati, kambe a txi woneka nga o va pinda. 49 Neti va nga m’wona a txi tsimbila txitimwi ka mati va to pimisa to “txigono!” Ve peka tihuwa. 50 Vona va to m’wona ve dhuka, se Jesu a to tekela ku khene: “Tsanani! Mi nga thaveni txilo, ngani.” 51 Jesu a to bela nene ngalavani se moya wu to ema. Ngu toneto va to xamala ngutu ta tinene. 52 Nguko vona va si se kupfisisa txhamuselo ya txidiwukiso txa mapawa, nguko timbilu tawe ti di ngadi vhalekile ka kupfisisa to maha.

53 Mbimo yi va nga khukha ve hoka Genezareta, va ti ya rikhisa ngalava kona khe. 54 Kambe mbimo yi a nga huma ngu ngalavani, vathu va m’tumbute to ngene mani. 55 Se va to tsimbila ka otshe makhalo a didhoropa dile, ve teketela valwati. Ve va yisa ka Jesu va di va guti ngu sipadhiyola, ova amu va nga txi pfa to a kona. 56 Ka sotshe sidhoropana, madhoropa ni makhalo a hahanze ka didhoropa amu a nga txi wulela va txi m’tisela vathu vo lwala ma merkadhu ni ku va txi m’kombela ti to ve gwesa hambi i txo va tshoka ya siambalo sakwe. Ni ku votshe ava va nga txi gwesa tshoka ya siambalo sakwe va txo so hanyiswa.

7 Jesu a to yelwa ngu Vafarisi ni vamabhalani vo kari va nga ti tile ngu Jerusalema. 2 Va to wona vagondiswa vakwe va txi dya va sa samba manza.* 3 (Nguko Vafarisi ni votshe Vajudha kha va dyi va sa samba manza kala amu ka tikhunguti, ngu kuya ngu sihena sa vakale vawe. 4 Ni ku va txi wuya ngu merkadhu kha va dyi va si se samba. Ku ni sihena simwani so tala asi va si londisako, so fana ni kudhupelisa* tikopo, majaru ni siya simwani sa kobre.) 5 Se Vafarisi ni vamabhalani va to m’wotisa va txi kha vona: “Ngu kutxani vagondiswa vako va si londisi mtumbunuko wa vakale, va dya na manza awe ma di nyamile kani?” 6 Jesu a to khene kwawe: “Mprofeti Isaya a wombile ditshuri mayelano ni nanu vakanganyisino nga ha ti nga bhalwa ngu kona to: ‘Vathu vava va womba ngu txisofu basi to va ni engisa kambe timbilu tawe ti kule ngutu ni nani. 7 Phela vona vo ni khozela mahala nguko ati va ti gondisako milayo ya vathu dwe.’ 8 Anu mi leka mlayo wa Txizimu mi txi khoo ni sihena sa vathu.”

9 Jesu a to tshumela a txi khene: “Anu mi leka mlayo wa Txizimu ngu tipulani mi londisa sihena sa vathu. 10 Nguko Mosi a wombile tiya: ‘Kombisa txithavo ka tate wako ni mame wako,’ futhi ‘awule a no ruketela tate wakwe ni mame wakwe a na dawa.’ 11 Kambe anu mi khanu: ‘Ngako m’thu a txi gela tate wakwe ni mame wakwe a txi khene: “Sotshe asi ni ku naso i nga ti para ni mi vhuna ngu sona i korbhani (i ku tiya, ni si ningete ka Txizimu).”’ 12 Se anu kha mi m’tumeleli ku e maha txo kari kasi kuvhuna tate wakwe ni mame wakwe. 13 Ngu toneto, anu mi maha to dipswi da Txizimu di si vhuni txilo ngu mhaka ya mtumbunuko wanu ni ku mi maha ni timwani to fana ni toneto.” 14 Ene a to tshumela e gela txitshungu a txi khene: “Engisani motshenu, mi pfisisa txhamuselo ya ti ni mi gelako. 15 Hi nga txi txi belako mndani txi mahako m’thu e nyama, kambe asi si nyamisako m’thu ngu si si tako ngu ka mbilu ya m’thu.” 16 ——

17 Mbimo yi a nga hambana ni txitshungu e bela nyumbani ko kari, vagondiswa vakwe va to khata ku m’wotisa mayelano ni txidinganiso txile. 18 Se Jesu a to va wotisa a txi khene: “Kasi nanu kha mi pfisisi kufana ni vona? Ina kha mi pfisisi to kha txi ngaho txa hahanze a txi txi nga wulelako ka m’thu txi m’nyamisa? 19 Nguko sona si wulela si ya mndani i singa mbiluni si gwita si ya humela txitingani.” Ngu mapswi yawa Jesu a to womba to sotshe sakudya si basile. 20 Ene a to tshumela a txi womba tiya: “Asi si humako ngu ka m’thu ngu sona si m’nyamisako. 21 Ngu mndani ka mbilu ya m’thu kuhuma mialakanyo yo biha, wugelegele, kupa, kudaya, 22 wugango, makolo, wubihi, wukanganyisi, mahanyelo a walo, mabava, kuruka, kutigela ni wubhemba. 23 Nguko sotshe si si humako ngu ka m’thu ngu sona si m’nyamisako.”

24 Ene a to khukha e ya ka matiko a Tiro ni Sidhoni, kona kheya a to ya wulela nyumbani ko kari, nguko a si lavi ti to ti ziwa, hambi keto ti zivilwe. 25 Se wamsikati wo kari awu mwanana wakwe a nga ti ni didhimoni a to pfa to Jesu ati kona kheya, se a to tsula e ya khizama masoni kwakwe. 26 Awule wamsikati i ti Mugriki, wa lixaka la Vasiro-Fenikiya, se a to ta ka Jesu e ta m’kombela ngu kuphinda-phinda to e hinga didhimoni di nga ti ni mwanana wakwe. 27 Se Jesu a to gela wule wamsikati a txi khene: “Kukhata leka vanana ve dya ve khura, nguko kha ti dingani kuteka sakudya sa vanana si ningwa siwana.” 28 Kambe a wule wamsikati a to khene: “Ina mkoma, ditshuri, kambe hambi siwana sa dya titshenda ati vanana va ti lekako ti wa ngu hamezani.” 29 Se Jesu a to khene: “Aku u nga womba tiya, tsula nguko didhimoni se di khukhile ka mwanana wako.” 30 Se ene e to tsula mtini e ya mana mwanana wakwe a di otete ni ku didhimoni se di ti humile kwakwe.

31 Mbimo yi Jesu a nga wuya ngu Tiro a to pinda ngu Sidhoni e ya lineneni ka Galileya e pinda ngu ka ditiko da Dhekapoli. 32 Koneyo va to m’tisela wamwamna wa diphanzeve na a di ni txidimiti,* se ve m’kombela ti to e m’sanzeka diwoko. 33 A to m’teka e ya ngu didhawa, kule ni txitshungu, e ya beta titiho tinzeveni kwakwe e thura e gwita e gwesa lidimi lakwe. 34 Ene a to wona nzumani, e hefemuteka ngu mtamo e m’gela tiya: “Efata,” ti wombako ku: “Tuleka!” 35 Se tinzeve takwe ti to tuleka, lidimi lakwe li txhatxheka e khata kuwomba-womba. 36 Ene a to va gela ti to va si bhuleli m’thu ati ti nga maheka. Kambe hambiku a nga ti va gela, vona va txo engetela ngutu. 37 Ngu ditshuri, vathu va to xamala ngutu va txi kha vona: “Ene a maha totshe kwati. A maha ni ti to maphanzeve me engisa ni siduma si bwabwata.”

8 Ka masiku oneyo ku ti ni txitshungu txa hombe ni ku txi si nga ni txilo txa kudya. Se Jesu a to dhana vagondiswa vakwe e va gela ku khene: 2 “Na txi pfela wusiwana txitshungu txiya, nguko se kupinda masiku mararu txi di ni nani, ni ku kha txi nga ni sakudya. 3 Ngako ni txi va leka ve tsula ni nzala va na jiyela hanzila nguko vamwani kwawe va ta ngu kule.” 4 Se vagondiswa vakwe va to m’xamula va txi kha vona: “Hi na ma mana hani mapawa txiwulani muwa hi ku kona o dingana kuninga vathu vava ve dya ve khura?” 5 Se Jesu a to va wotisa a txi khene: “Mapawa mangahi mi ku nawo kani?” Vona va to xamula va txi kha vona: “I 7.” 6 Se a to gela txitshungu ti to txi khalahatsha hahatshi, se a to teka mapawa ale a 7 e bonga, e ma khema e ninga vagondiswa vakwe, se vona ve phakela txitshungu. 7 Ku ti ni sihakanyana kambe, msana ko maha mkombelo a to va gela to ve si phakisela ni sona. 8 Votshe va to dya ve khura si tshumela si sala so dingana kutata 7 wa tithavangu ta hombe. 9 Ku ti ni kona mu ka 4.000 wa majaha, se a to gwita e va leka ve tsula.

10 Jesu a to tekela kubela ngalavani kumweko ni vagondiswa vakwe ve ya ka ditiko da Dhalmanuta. 11 Koneyo, Vafarisi va to m’tshuketela ve khata kuwomba-wombisana nayo, ve m’duka va txi a na mahe txikombiso txo ta ngu nzumani. 12 Se ene a to hefemuteka ngutu e va gela ku khene: “Ngu kutxani vathu vava va txi lava txikombiso kani?” Ani na mi gela ku khani: “Kha mi na mbi kombwa txikombiso ni txa tximwetxo.” 13 Ti di nga eto, a to va leka e bela ngalavani ve txhatuka.

14 Kambe vagondiswa va to bela mu ka ngalava ve divala kuteka mapawa, va to kova ni dimwedo dwe. 15 Se Jesu a to va txharihisa e va gela ku khene: “Tulani maso, ti woneleni ka mtshumbelo wa Vafarisi ni ka mtshumbelo wa Herodha.” 16 Se vona va to khata kukanetisana ngu kule va nga si nga ni mapawa. 17 Mbimo yi Jesu a nga ti tumbula eto a to va gela ku khene: “Ngu kutxani mi kanetisanako ngu ku mi singako ni mapawa kani? Ina kha mi pfisisi txilo? Ina timbilu tanu ti nga di vhalekile ko pfisisa kani? 18 Hambiku mi ku ni maso, ina kha mi woni? Hambiku mi ku ni tinzeve ina kha mi engisi kani? Ina mi to divala? 19 Akule ni nga khwemulela mtxhanu wa mapawa ni ningela ka 5.000 wa majaha, ina ma khumbula to tithavangu tingahi mi nga tata ngu mapawa aya ma nga sala? Vona va to xamula va txi: “I 12.” 20 Mbimo yi ni nga khwemulela 7 wa mapawa kudya 4.000 wa majaha, tithavangu tingahi ta hombe ti nga tala ngu si mi nga rolela kani? Se va to xamula va txi kha vona: “I 7.” 21 Ene a njo ku va wotisa ku khene: “Kha mi se ti pfisisa ni konkuwa?”

22 Va to hoka Bhetsayidha, kona khe ve m’yisela dijaha da dibhofu, ve kombela Jesu ti to e di gwesa. 23 Ene a to ñola dijaha dile da dibhofu ngu diwoko e di humisa hahanze ka txidhoropana. Msana ko thura ka maso a dona a to di wotisa ku khene: “Ina ku ni txi u txi wonako?” 24 Dijaha dile da dibhofu di to wona txitimwi di txi kha dona: “Ni wona vathu, kambe vo nga mindonga yi tsimbilako.” 25 Ene a to tshumela e sanzeka kambe mawoko akwe ka maso a dijaha dile, se di to khata kuwona kha kwati. Maso akwe ma to hanyiswa, se e khata kuwona totshelele kwati. 26 Ngu toneto a to m’gela to e tsula mtini, a txi khene: “U nga bele ka txidhoropana.”

27 Jesu kumweko ni vagondiswa vakwe va to khukha ve ya ka sidhoropana sa Khezareya ka Filipi. Va di ngadi hanzila ene a to va wotisa a txi khene: “Vathu va kha vona ngani mani?” 28 Vona va to m’xamula va txi kha vona: “Vamwani va womba to u Johani M’bhabhatisi, vamwani va womba to u Elija, vamwani va womba to u mmweyo wa vaprofeti.” 29 Se Jesu a to va wotisa a txi khene: “Anu ko, mi khanu ngani mani?” Pedro a to m’xamula a txi khene: “Awe u Kristu.” 30 Se ene a to gela vagondiswa vakwe ti to va si thuki ve bhulela m’thu ti to ene i ti mani. 31 Ni ku ene a to khata ku va gondisa ti to Mwanana wa M’thu a ti fanete kuxaniswa ni kulambwa ngu madhota, tinduna ta vaprista ni vamabhalani e dawa ni kutshumela e wuswa ku di pindile masiku mararu. 32 Jesu a wombile toneto votshe va txi ti pfa. Se Pedro a to m’ndinda ve ya didhawani e ya m’kawuka. 33 Se Jesu a to tshembereka e wona vagondiswa vakwe, e kawuka Pedro ngu ku m’gela ku khene: “Suka Sathani! Nguko ati u ti pimisako hi nga ta Txizimu, kambe nda vathu.”

34 Jesu a to dhana txitshungu kumweko ni vagondiswa vakwe e va gela ku khene: “Ngako m’thu a txi lava ku ni londisa a na ti leke e rwala phande* yakwe ya xanisa, e simama e ni londisa.” 35 Awu a lwelako kuxayisa wutomi wakwe a na wu luza, aniko awu a luzako wutomi wakwe ngu mhaka yangu ni ngu mhaka ya mahungu a manene a na wu mana. 36 Nguko ti vhuna txani ku m’thu e ganya ditiko dotshe, aniko e luzekelwa ngu wutomi wakwe kani? 37 M’thu a nga ningela txani kasi kuhulukisa wutomi wakwe kani? 38 Nguko awu a no va ni tingana ngu mhaka yangu ni ngu mhaka ya ti ni ti gondisako ka vathu vava vo mbi thembeka ni kumaha sionho, Mwanana wa M’thu nene a na ta va ni tingana ngu ngene mbimo yi a no ta ni wudhumo wa Tate wakwe a di ni tingilozi to sawuleka.”

9 Ene a to tshumela a txi khene: “Ngu ditshuri na mi gela ku khani: ‘Hagari kwanu vaho va no mbi fa kala kuza ve wona Mfumo wa Txizimu awu wu no va wu txi fuma.’” 2 Ku di pindile 6 wa masiku, Jesu a to teka Pedro ni Jakobe ni mnanda wakwe Johani e tsula navo ka mmango va di vokha. A to phinduka* va txi m’wona. 3 Se siambalo sakwe si to khata kuphatima si basa si txi jaa, aha ko kha ku nga ni m’thu hamafuni a nga kuwulako simaha si basa kufana ni sona. 4 Se ku to humelela Elija ni Mosi va txi bhula ni Jesu. 5 Se Pedro a to gela Jesu a txi khene: “Rabhi, ta tsakisa kuva hawa. He gwimbeni matenda mararu: Dimwedo dako, dimwedo da Mosi ni dimwedo da Elija.” 6 Phela va si ti zivi to va na maha txani nguko va txi thava ngutu. 7 Ku to humelela direfu di txi va fenengeta, ku njo kupfala dipswi direfuni mule di txi kha dona: “Awuwa i Mwanana wangu, khoni-khoni yangu, mu engiseni.” 8 Vona va to wona madhawani ve wona to ku si nga ni mmwani m’thu hahanze ka Jesu.

9 Mbimo yi va nga txi txhika ngu mmangoni, Jesu a to vagela ti to va si thuki ve gela m’thu ati va nga ti wona, kala Mwanana wa M’thu e wuswa ngu ka vakufa. 10 Vona va ti vekile hakhana ati a nga womba, se va txi wotisana ngu txawe ti to ti txi womba txani to a na wuswa ngu ka vakufa. 11 Ngu toneto vagondiswa va to m’wotisa ti to: “Kasi ngu kutxani vamabhalani va txi womba ti to ku na khata kuta Elija kani?” 12 Jesu a to va xamula a txi khene: Ngu ditshuri, kukhata a na ta Elija awu a no ta mi gondisa totshe. Kambe ngu kutxani ti di bhatwe to Mwanana wa M’thu a na xaniseka e tshumela e txhipiswa kani? 13 Ngu toneto, na mi gela ku khani Elija se a tile. Kambe va mahile totshe ti va nga ti lava ngu ngene ngu kuya ngu ti ti nga bhaliswa tona mayelano ni nene.”

14 Mbimo yi va nga hoka aha ku nga ti ni vamwani vagondiswa, va to va wona va di randetwe ngu txitshungu na ku ti ni vamabhalani ava va nga txi kanetisana navo. 15 Mbimo yi txitshungu txi nga m’wona txi to xamala ngutu txi tutuma txi ya m’losa. 16 Se Jesu a to va wotisa a txi khene: “Mi txi kanetisana navo ngu txani?” 17 Mmweyo wa va va nga ti hagari ka txitshungu a to xamula a txi khene: “M’gondisi, ni tisile mwanana wangu kwako nguko ene a na ni didhimoni di m’mahako txiduma. 18 Didhimoni donedo di txi nga ti lava do m’rinza hahatshi e pupuma mkanani, e gugurusela makwasa, e guma mtamo. Ni kombete vagondiswa vako ti to ve di hinga, kambe kha va ti kota kumaha toneto.” 19 Ene a to va xamula a txi khene: “Anu vathu vo mbi na likholo, ni na va ni nanu kala mbimo muni kani? Ni na mi timisela kala ditshiku muni kani? M’tiseni kheno. 20 Se va to m’teka ve m’yisa ka Jesu. Mbimo yi di nga wona Jesu, didhimoni dile di to rinza mfana wule hahatshi e tshanuka. Msana ko m’wisa hahatshi ene a to wumbulukela e pupuma mkanani. 21 Se Jesu a to wotisa tate wa mfana wule a txi khene: “Ti m’khatile mbimo muni tiya?” Ene a to xamula a txi khene: “Kukhukhela i di ngadi mwanana. 22 Didhimoni diya di tolovela ku m’rinza hamndiloni ni matini sikhati so tala kasi ku m’daya. Kambe ngako ti txi koteka kumaha to kari mkoma, hi pfele wusiwana u hi vhuna.” 23 Jesu a to khene: “Ngu kutxani u txi womba ku khawe: ‘Ngako ti txi koteka? Phela totshe ta koteka ka wu a ku ni likholo.” 24 Koneho, tate wa mwanana wule a to tekela kukwangula a txi khene: “Ani na kholwa. Ni vhune u ni engetela kukholwa.”

25 Mbimo yi Jesu a nga wona to txitshungu txo tshuketela hafuhi kwakwe, a to bhongela didhimoni dile a txi khene: “Awe moya wa wuduma ni wuphanzeve, na ku gela ku u huma kwakwe u si tshumeli u bela kambe.” 26 Msana ko mfana wule e kwangula ni kutshanuka ngutu, didhimoni di to huma kwakwe, se mfana wule a to nga a to fa, aha koza kutala ka vathu va txi kha vona: “A fite.” 27 Se Jesu a to m’ñola ngu diwoko e m’wusa, se ene a to ema. 28 Msana kova va di bete ka mti wo kari, vagondiswa vakwe va to m’wotisa va di vokha va txi kha vona: “Ngu kutxani athu hi nga tandeka ku di hinga?” 29 Ene a to va gela ku khene: “Aya madhimoni mo kotwa ngu mkombelo.”

30 Se va to khukha koneho ve kongoma Galileya, kambe Jesu a si ti lavi ti to ti ziwa ngu m’thu. 31 Nguko ene a txi gondisa vagondiswa vakwe a txi khene: “Mwanana wa M’thu a na ningelwa ka vathu, se va na m’daya, hambiku a no dawa a na wuswa msana ka masiku mararu.” 32 Hambi keto, vona va si ti pfisisi ati a nga txi va gela, kambe va txi thava ku m’wotisa.

33 Vona va to hoka Kapernawume, mbimo yi va nga wulela nyumbani ko kari ene a to va wotisa ku khene: “Mi txi kanetisana ngu txani hahanze khe?” 34 Se vona va to malala nguko mbimo yi va nga ti hanzila va txi kanetisana ngu kulava kuziva to i mani i nga ti wa hombe hagari kwawe. 35 Se ene a to khalahatsha e dhana vagondiswa vakwe va 12 a txi khene: “Ngako mmweyo wanu a txi lava ku va wo khata a na mahe wo gwita ka votshe ni kuva txithumi txa votshe.” 36 Ene a to teka tximwanatana e txi emisa hagari, e txi khutarela e va gela ku khene: 37 “Awu a amukelako mmweyo wa vanana vava ngu mhaka ya ditina dangu a amukela ni nani. Awu a ni amukelako kha amukeli ani dwe, kambe a amukela ni Wule a nga ni rumela.”

38 Johani a to m’gela ku khene: “M’gondisi, hi woni m’thu a txi hinga madhimoni ngu kuthumisa ditina dako, se hi zama ku m’tsimbisa nguko a si nga kumweko ni nathu.” 39 Jesu a to khene: “Mi nga m’tsimbeni, nguko a walo a mahako mithumo yo xamalisa ngu ditina dangu e gwita e tekela kuwomba-womba kubiha ngu ngani. 40 Nguko awu a si lwisaniko ni nathu wa hi seketela. 41 Ni ku ani na mi thembisa ni txi khani: Awu a mi ningako mati o sela ngu ku mi lumbako Kristu, ngu ditshuri ene kha na mbi luza hakelo yakwe. 42 Kambe, awu a mahako ti to mmweyo wa vanana va va kholwako kwangu ve onha, i tshuku ku e sungelelwa hathamuni kwakwe dirigwi da hombe* e rinzwa lineneni.

43 “Ngu toneto, ngako diwoko dako di txi kumaha u onha, di gange. Nguko i tshuku ku mana wutomi* u di txilima kupinda kutshotshwa u di ni mawoko ako a mambidi Gehena* ka mndilo wo mbi guma. 44 —— 45 Ngu toneto, ngako mnenge wako wu txi kumaha u onha, wu gange, nguko i tshuku kumana wutomi u di txikhwala kupinda ku u tshotswa Gehena* ni minenge yako ya yimbidi. 46 —— 47 Ngako diso dako di txi kumaha u onha dixokole u di tshotsha kule. Nguko, i tshuku kuwulela ka Mfumo wa Txizimu u di ni diso dimwedo kupinda ku u rinzwa Gehena u di ni maso ako a mambidi. 48 Aha timbungu ti si fiko ni ha mndilo wa kona wu si timekiko.

49 “Nguko mmwani ni mmwani a fanete e lungwa ngu mndilo. 50 Sawuti njinene kambe ngako yi txi luza mtamo wa yona, ina ti nga koteka ku yi wuseta? Ngu toneto, ti lava ku mi va vathu va va nga lungwa, mi va ni kurula ni vathu vamwani.”

10 Jesu a to khukha ngu hale e ya mihinganoni ka Judheya, mtxhatuko ka Jordhani, se txitshungu txi to m’londisa, se ene a to khata ku va gondisa kota mtolovelo wakwe. 2 Vafarisi vo kari va to m’tshuketela kasi ku ya m’duka, ve m’wotisa ti to: “Ina ta tumelelwa ku wamwamna e leka msikati wakwe kani?” 3 Ene a to va xamula a txi khene: “Ngu wuhi mlayo awu Mosi a nga mi ninga?” 4 Vona va to kha vona: “Mosi a tumelete ti to wamwamna e bhalela diphepha da dhivhorsiyo msikati wakwe e gwita e m’tshumeta mtini kwawe.” 5 Kambe Jesu a to va xamula a txi khene: “Mosi a bhate mlayo ewo ngu mhaka ya kutxanyala ka timbilu* tanu. 6 Kambe makhatoni ‘Ene a va vangile wamwamna ni wamsikati. 7 Ngu toneto, wamwamna a na siya tate wakwe ni mame wakwe. 8 Vona va na va nyama yimweyo,’ ngu toneto hi nga ngadi vambidi, kambe nyama yimweyo. 9 Ngu toneto, asi Txizimu txi nga si patanisa, m’thu a nga thuke e si hambanisa.” 10 Mbimo yi va nga tshumela ve ya mtini, vagondiswa va to ya m’wotisa ngu mhaka yiya. 11 Ene a to va gela ku khene: “Awule a mahako dhivhorsiyo ni msikati wakwe e ya txhadha ni mmwani, o maha wugango se e gohela msikati wakwe. 12 Ni wamsikati awu a lekako mwamna wakwe e ya txhadha ni mmwani a maha wugango nene.

13 Se vathu va to khata ku tisa vanana ka Jesu, kasiku e va gwesa, kambe vagondiswa vakwe va txi va tsimbisela. 14 Mbimo yi Jesu a nga wona tiya a to swireka e va gela ku khene: “Lekani vanana ve ta kwangu. Mi nga va tsimbiseni, nguko Mfumo wa Txizimu wu lumba vathu vo fana ni vanana. 15 Ani na mi gela ditshuri ti to: Awule a si amukeliko Mfumo wa Txizimu kufana ni mwanana, kha na mbi sikota kuwulela ka wona.” 16 Se Jesu a to teka vanana vale e va khutarela e va sanzeka manza e va katekisa.

17 Mbimo yi a nga txi huma, ku to hoka dijaha do kari di txi tutuma di khizama masoni kwakwe di m’wotisa tiya: “M’gondisi wamnene, ngu tihi ati ni fanelako ku ti maha kasiku ni mana wutomi wo mbi guma?” 18 Se Jesu a to m’gela ku khene: “Ngu kutxani u txi ni dhana ku ni wamnene kani? Kha nga ho i ku wamnene, hahanze ka mmweyo dwe, i ku Txizimu. 19 Awe wa yi ziva milayo ayi yi ku: ‘U nga daye, u nga mahe wugango, u nga pe, u nga ningele wufakazi wa makuhu, u nga drabhari, kombisa txithavo ka tate wako ni mame wako.’” 20 Dijaha dile di do kha dona: “M’gondisi, ani na londisa yotshe milayo eyo kukhukhela wananani kwangu.” 21 Jesu a to m’wona, ngu ku m’pfela wusiwana a to khene: “U kelelelwa ngu txa tximwetxo dwe: Tsula u ya xavisa sotshe asi u ku naso u teka male ya kona u ninga sisiwana, thomba yako yi na va nzumani, msana keto, ngono u ta va m’londeteli wangu.” 22 Kambe mbimo yi dijaha dile di nga pfa eto, di do khukha di tsula di di pandisekile, nguko di ti ganyile ngutu.

23 Msana ko va a di woni madhawani, Jesu a to gela vagondiswa vakwe a txi khene: “Ti na karata ku m’thu wo ganya e bela ka Mfumo wa Txizimu.” 24 Kambe vagondiswa vakwe va to dhuka ngu mapswi akwe, se Jesu a to khene: “Vanavangu, phela ta karata kubela ka Mfumo wa Txizimu! 25 Ta hehuka ku dikamelo di pinda ngu ha ka ditshoko da txhingani, kupinda ku m’thu wo ganya e bela ka Mfumo wa Txizimu.” 26 Vona va to xamala ngutu va txi kha vona: “Ina waho a no huluka?” 27 Jesu a to wonetela vagondiswa vakwe a txi khene: “Ka vathu kha ti koteki, kambe kha ti mahisi tona ka Txizimu, nguko ka Txizimu totshe ta koteka.” 28 Pedro a to khene: “Phela hi lekile sotshe hi ku londisela.” 29 Jesu a njo khene: “Na mi gela ditshuri ni txi khani, kha ngaho awu a nga leka mti, vakoma, vananda, tindiya, mame, tate, vanana mwendo tithembwe ngu mhaka yangu ni ngu mhaka ya mahungu a manene, 30 awu a no mbi amukela ngu 100 wa sikhati ni kupinda ka timbimo tiya, tinyumba, vakoma, ni vananda, tindiya, vamame, vanana, ni tithembwe kumweko ni sixaniso, se ka mbimo yi yi tako e ta mana wutomi wo mbi guma. 31 Kambe, vavangi ava i ku vo khata va na maha vo gwitisa, se ava vo gwitisa va na va vo khata.”

32 Mbimo yi va nga txi kwelela ve ya Jerusalema, Jesu a ti thangete se vagondiswa vakwe va to xamala ngutu, kambe ava va nga txi va londisa va to thava. Se Jesu a to tshumela e dhana ava va 12 ngu didhawa e va gela timhaka ati ti no m’humelela, a txi khene: 33 “Phela akuwa hi yako Jerusalema Mwanana wa M’thu a na ningelwa ka tinduna ta vaprista ni ka vamabhalani. Vona va na m’ningela ku e dawa ni ku m’ningela ka vathu va matiko. 34 Vona va na m’poyilela ni ku m’thurela, ni ku m’daya, aniko msana ka masiku mararu ene a na wuswa.”

35 Jakobe ni Johani vanana va Zebhedhewu va to tshuketela Jesu va txi m’gela ku kha vona: “M’gondisi, hi lava u hi mahela ni txihi hi no ku kombela.” 36 Ene a to va wotisa ku khene: “Mi lava ti to ni mi mahela txani?” 37 Vona va to xamula va txi: “Hi kombela ti to mmweyo wathu e ya khalahatsha txineneni mmwani ngu txibhabha kwako mbimo yi u no amukela wudhumo.” 38 Kambe Jesu a to va xamula ku khene: “Anu kha mi txi zivi a txi mi txi kombelako. Ina mi nga sela kopo ayi ni lavako ku yi sela kani? Ina mi na bhabhatiswa ngu bhabhatiso ayi ni lavako kubhabhatiswa ngu yona kani?” 39 Vona va to kha vona: “Ina!” Se Jesu a to va gela ku khene: “Kopo ayi ni yi selako nananu mi na yi sela. Ni bhabhatiso ayi ni bhabhatiswako ngu yona nananu mi na bhabhatiswa ngu yona. 40 Aniko, mhaka ya ti to i mani a no zumba txineneni kwangu ni txibhabha kwangu kha yi lumbi ani. Aniko sikhalo soneso si lumba avale va nga lungiselwa sona.”

41 Mbimo yi avale vamwani va 10 va nga ti ziva, va to henyela Jakobe ni Johani. 42 Se Jesu a to va dhana e va gela ku khene: “Anu ma ti ziva ti to ava va wonwako i di vakoma va matiko va fuma vamwani ngu ku va karatela.” 43 Anu kha ma fanela kumaha eto, aniko awule a lavako kumaha wa hombe hagari kwanu a na thumele vamwani. 44 Awu a lavako ku va wo khata hagari kwanu a na ve txithumi txa votshe. 45 Nguko hambi Mwanana wa M’thu kha tela ku ta thumelwa, kambe a tete ku ta thumela vamwani ni kuningela wutomi wakwe kasi kutirula va vangi.”

46 Vona va to wulela Jeriko. Kambe mbimo yi ene kumweko ni vagondiswa vakwe ni txitshungu txo kari txa hombe txi nga txi huma, Bhartimewu (mwanana wa Timewu) i nga ti dibhofu, a nga txi zumbela kukombela jimola, a ti khalahatshile hafuhi ni nzila. 47 Mbimo yi ene a nga pfa to i Jesu wa Nazareta, a to khata kukwangula a txi khene: “Jesu, Mwana Dhavhidha, ni pfele wusiwana.” 48 Se vathu va to khata ku m’kawuka va txi m’gela ti to e malala, kambe ene a to simama e kwangula a txi khene: “Mwana Dhavhidha, ni pfele wusiwana.” 49 Se Jesu a to ema a txi khene: “M’dhaneni e ta hawa.” Se vona va to m’dhana va txi m’gela ku kha vona: “Khukha u txi ema, Jesu wa ku dhana.” 50 Se ene a to tshotsha txiambalo txakwe, e ndaka e ya ka Jesu. 51 Jesu a to m’wotisa a txi: “U lava ti to ni ku mahela txani?” Wamwamna wule wa dibhofu a to khene: “Rabhoni,* maha ti to ni tshumela ni wona.” 52 Se Jesu a to khene kwakwe: “Tsula, likholo lako li ku hanyisile.” Wamwamna wule a to tekela kuwona, e khata ku m’londisa.

11 Mbimo yi va nga ti hafuhi ni Jerusalema, va to hoka Mmangoni ka Miolivha, amu si manekako sidhoropana sa Bhetfaje ni Bhetaniya se Jesu a to rumela vagondiswa vakwe va vambidi. 2 A txi va gela ku khene: “Tsulani ka txidhoropana txi ku hafuhi hawa, mi di bete mi na ya mana tximbongolana atxi txi si khali kugadhwa ngu m’thu txi di sungilwe. Txi txhatxheni mi ta natxo kheno. 3 Ngako m’thu a txi mi wotisa a txi khene: ‘Nji txani mi mahako?’ Nda ni khanu: ‘Mkoma ngene a txi lavako, a na txi tshumeta i si nga kale.’” 4 Vona va to tsula ve ya mana tximbongolana txi di sungilwe ka ditimba hafuhi ni nzila, se va to txi txhatxha. 5 Kambe vamwani ava va nga ti koneho va to va wotisa va txi kha vona: “Kasi mi txi txhatxhela txani tximbongolana etxo?” 6 Vona va to va xamula ati Jesu a nga ti va gete, se va to va leka ve tsula.

7 Se va to tisa tximbongolana ka Jesu, ve atetela tinguwo tawe txitimwi ka txona, se ene a to txi gadha. 8 Vo tala va to atetela siambalo sawe hanzila, kambe vamwani va txi bela tithembweni ve wilela matshanzu. 9 Se ava va nga ti masoni ni va va nga ti msana va to kwangula va txi kha vona: “Txizimu ha ku kombela, hanyisa. A katekile awule a tako ngu ditina da Jehovha. 10 Wu katekile Mfumo awu wu tako wa tate wathu Dhavhidha. Ha ku kombela, hanyisa awe u ku txitimwi nzumani. 11 Se ene a to wulela Jerusalema e tsula dithempeleni, a to ya wonisisa totshe kambe aku di nga ti swite a to jika ni va va 12 ve ya Bhetaniya.

12 Mangwanani ka kona, mbimo yi va nga txi khukha Bhetaniya, Jesu a to pfa nzala. 13 A di ngadi kule a to wona mkuwu wu di ni mazokoro, se a to wu tshuketela, nguko a txi pimisa to a na ya mana makuwu. Kambe mbimo yi a nga wu hokela, a to wona to ku si nga ni txilo, wu to ko va ni mazokoro dwe nguko i singa nguva ya makuwu. 14 Se ene a to wu gela ku khene: “Ku nga swi ku va ni wo dya makuwu ako mndongawe!” Vagondiswa vakwe va txo engisela.

15 Va to hoka Jerusalema, se Jesu a to bela dithempeleni e hinga votshe avale va nga txi xavisa ni kuxava dithempeleni. E hangalasa timeza ta vatxitxisi va timale ni situlu sa vale va nga txi xavisa matuva. 16 Ni ku a si tumeleli m’thu e pinda ngu dithempeleni a di rwate so maha. 17 Ene a txi va gondisa a txi khene: “Ina kha ta bhalwa ti to: ‘Nyumba yangu yi na va nyumba ya mikombelo ya vathu va matiko otshe kani?’ Kambe anu mi yi maha txikina txa makhokhokho.” 18 Tinduna ta vaprista ni vamabhalani va to tipfa, se ve khata kulava tipulani to va na m’dayisa kutxani, kambe vona va txi m’thava nguko txitshungu txotshe txi txi tsakiswa ngu ti a nga txi ti gondisa.

19 Mbimo yi di nga swa, Jesu ni vagondiswa vakwe va to huma didhoropani. 20 Ni mixo ya kona, mbimo yi va nga txi pinda ngu hale ka mkuwu wule, va to wona ti to wu ti omile ni mikuluti. 21 Pedro a to khumbula ati ti nga di mahekile, e m’gela ku khene: “ Rabhi. Hi nga wona, mkuwu wule u nga wu ruka wu omile.” 22 Jesu a to m’xamula a txi khene: “Kholwani ka Txizimu. 23 Ngu ditshuri na mi gela ku khani: Awu a no gela mmango wuwa a txi khene: ‘Khukha u ya wa lineneni,’ na a si kanakani mbiluni kwakwe, kambe e kholwa ka ti a wombako, tona ti na maheka. 24 Ngu toneto na mi gela ku khani: Totshe ati anu mi ti kombelako ngu mkombelo, kholwani ti to mi ti mani, se mi na ti mana. 25 Ni ku, mbimo yi mi khukhako mi ema mi maha mkombelo, divalelani votshe ava va nga mi onhela, kasiku Tate wanu awu a ku nzumani nene e mi divalela sionho sanu.” 26 ——

27 Va to tshumela ve wuya kambe Jerusalema. Mbimo yi a nga txi tsimbila-tsimbila dithempeleni, tinduna ta vaprista, vamabhalani ni madhota va to m’yela. 28 Se va to m’wotisa va txi kha vona: “U wu mana hani mtamo wo maha totshe tiya? I mani a nga ku txhusa kasiku u maha tiya, kani?” 29 Jesu a to khene: “Nani ni na mi maha txiwotiso, ni xamuleni, se na mi gela ti to i mani a nga ni txhusa kasiku ni maha totshe tiya. 30 Mtamo wa Johani wo bhabhatisa, wu ta ngu nzumani mwendo wu ta ngu ka vathu kani? Ni xamuleni.” 31 Se vona va to khata kualakanyisisa va txi kha vona: “Ngako hi txo khathu: ‘Wu ta ngu nzumani,’ ene a na khene: ‘Ngu kutxani mi nga mbi kholwa kwakwe?’ 32 Aniko ngako hi txo khathu: ‘A wu mana ka vathu ko? ’” Phela vona va txi thava kuwukelwa ngu txitshungu, nguko votshe va txi kholwa ti to Johani ngu ditshuri i ti mprofeti. 33 Se va to xamula Jesu va txi kha vona: “Kha hi ti zivi.” Jesu a to va xamula a txi khene: “Nanani kha ni mi geli ti to mtamo wu ni ku nawo wo maha tiya wu ta ngu hani.

12 Se a to khata kuwomba-womba navo ngu kuthumisa sidinganiso, a txi khene: “Wamwamna wo kari a to dima thembwe ya mivhinya e yi bhiyela e aka ni txitezi. E lulamisela wukhalo wo kamela ka wona vhinya e gwita e yi ningela ka vadimi se e enda. 2 Ngu mbimo ya kuelula a to rumela txithumi txakwe txi ya ka vadimi kasiku txi ya amukela mihando ya mivhinya. 3 Kambe vona va to txi ñola ve txi peka, ve txi tshumeta txi si nga ni txilo. 4 Se a to rumela tximwani txithumi, se vona va to ya txi balisela msungo ve tshumela ve txi poyilela. 5 Ene a to rumela tximwani, ve ya txi daya. A to rumela kambe simwani sithumi sa singi, simwani ve si peketela, simwani ve si daya. 6 Se ene a ti ngadi ni mmwani wo m’ruma, i ku mwanana wakwe wo randeka. Ngu magwito a to m’rumela ka sithumi sileya a txi ti gela ku khene: ‘Mwanana wangu, va na ya m’xonipha.’ 7 Kambe vadimi vale va to gelana va txi kha vona: ‘Awuwa ngene a no sala ni thomba. A hi m’dayeni hi na sala ni thomba yakwe.’ 8 Se vona va to m’ñola ve m’daya, ve m’tshotsha hahanze ka thembwe. 9 Se nji txani a no maha nyamne wa thembwe? Ene a na wuya e ta daya vadimi vale, e ningela thembwe yile ka vamwani. 10 Ina kha mi khali kulera amu ka Mibhalo ati ta ku: ‘Dirigwi adiya vaaki va nga di eyisa ngu dona di nga va dirigwi da lisima ka otshe. 11 Atiya ta xamalisa ngutu ni ku ti ta ngu ka Jehovha? ’”

12 Ngu toneto, va txi lava ku m’ñola nguko va txi ti ziva to txidinganiso txile txi ya kwawe. Kambe va txi thava txitshungu, se va to m’leka ve tsula.

13 Va to rumela ka Jesu Vafarisi ni vaseketeli va Herodha kasi kuya riyela Jesu ka ti a nga txi ti womba. 14 Mbimo yi va nga hoka, va to mu wotisa tiya: “M’gondisi, athu ha ti ziva ti to awe u wa ditshuri, ni ku eto khu ti mahi ngu kulava kuwonwa ngu m’thu, nguko awe khuyi ngu kuwona khohe, kambe u gondisa nzila ya Txizimu ngu ditshuri. Ina ta pfala* kudiha resa ka Khezari mwendo nem? 15 Ina hi nga diha mwendo ahim-him?” Aku a nga txi ziva wubihi wawe, Jesu a to khene: “Ngu kutxani mi txi ni duka? Hi nga ni wuyisani didhenari dimwedo ni ta di wona.” 16 Se va to m’tisela didhenari, ene e va wotisa a txi khene: “Mfota wuwa ni si si nga bhalwa hawa nza mani?” Vona va to xamula va txi kha vona: “Nza Khezari.” 17 Jesu a to khene: “Ningelani ka Khezari asi i ku sa Khezari, ni ka Txizimu, asi i ku sa Txizimu.” Se vona va to xamala ngutu.

18 Vasadhusi va nga txi womba ti to kha ku na kuwuswa ka vafi va to m’wotisa va txi kha vona: 19 “M’gondisi, Mosi a bhate ti to: Ngako wamwamna a txi fa e si ya msikati a si nga ni vanana, a na txhadha ni kunyadha wakwe, kasi ku vanana ava a no veleka ve lumba mkoma wakwe. 20 Ku ti ni 7 wa majaha i nga ti vaka mkoma ni mnanda. Wo khata a to teka msikati, kambe a to fa a si nga ni vanana. 21 Se wa wumbidi a to txhadha nayo, se nene a to fa a si nga ni vanana, ti mahisile toneto ni ka wule wa wuraru. 22 Se votshe va 7 va to fa va sa velekisa vanana wule wamsikati. Ngu magwito, nene wule wamsikati a to fa. 23 Mbimo yi vafi va no wuswa, i na va msikati wa mani? Nguko votshe va 7 va tekanile nayo. 24 Se Jesu a to va gela ku khene: “Ngu toneto ti mi timetako, nguko kha mi yi zivi Mibhalo nem mtamo wa Txizimu. 25 Nguko mbimo yi vathu va no wuswa ngu ka vakufa kha va na mbi txhadha. Nguko va na fana ni tingilozi ta nzumani. 26 Mayelano ni kuwuswa ka vakufa, ina kha ma gonda ati Mosi a nga bhala mayelano ni txipopo atxi txi nga tura mbimo yi Txizimu txi nga womba tiya: ‘Ani ni Txizimu txa Abrahamu, Txizimu txa Izaki, ni Txizimu txa Jakobe? ’ 27 Ene hi nga Txizimu txa vakufa kambe Txizimu txa va va hanyako. Anu mi timete stereka.”

28 Mmweyo wa vamabhalani a nga ti ti ho kona hale awu a nga pfa Jesu a txi womba-wombisana navo, mbimo yi a nga wona to a va xamute kwati a to m’wotisa tiya: “Ngu wuhi mlayo awu i ku wa hombe ka yotshe?” 29 Jesu a to xamula a txi khene: “Wo khata ngu wuwa: ‘Engisa, awe Israyeli: Jehovha Txizimu txathu, i Jehovha mmweyo dwe. 30 Randa Jehovha Txizimu txako ngu mbilu yako yotshe, ngu wotshe wutomi wako, ngu otshe mapimo ako ni ngu wotshe mtamo wako.’ 31 Se wa wumbidi ngu wuwa: ‘Randa muakelani wako nga ti u ti randisako tona awe upune.’ Kha wu ngaho wumwani mlayo wa hombe wo pinda yiya.” 32 Mabhalane wule a to m’gela ku khene: “M’gondisi, awe u womba ati i ku tona ngu kuya ngu ditshuri: ‘Ene mmweyo dwe, ni ku kha ku nga ni mmwani hahanze kwakwe.’ 33 Ni ku, ku m’randa ngu yotshe mbilu, ni wotshe mtamo, ni kuranda muakelani nga ti u ti randisako tona nda lisima ngutu kupinda yotshe miningelo yo hiswa.” 34 Se Jesu, ngu kuwona to a ti xamute ngu nzila ya wuzivi a to m’gela tiya: “Awe khu nga kule ni Mfumo wa Txizimu.” Kambe kha ngaho a nga txi tsana ku m’maha simwani siwotiso.

35 Kambe mbimo yi Jesu a nga txi gondisa dithempeleni a to wotisa tiya: “Ngu kutxani vamabhalani va txi womba ti to Kristu i mwanana wa Dhavhidha kani? 36 Dhavhidha apune, ngu kususumetwa ngu moya wo sawuleka, a ti khene: ‘Jehovha a gete Mfumeli wangu a txi khene: “Khalahatsha txineneni kwangu, kala kuza ni veka valala vako hahatshi ka mikondo yako.”’ 37 Se aku Dhavhidha apune a m’dhanako ku Mfumeli, ti mahisa kutxani ku i di mwanana wakwe?”

Se txitshungu txi txi pfa kutshamba ku m’engisela. 38 Ene a txi va gondisa a txi khene: “Ti woneleni ka vamabhalani, vona va dhunda kuambala siambalo so lapha ni kuloswa amu ko tala vathu. 39 Va di masinagogani va dhunda kuzumba ka situlu sa masoni, va di mibusoni, va dhunda kuzumba timezani. 40 Vona va honyola tinyumba* ta va vo felwa ngu vavamna, ve maha mikombelo yo lapha kasi kuwonwa ngu vathu. Vona va na ta punirwa ta bhom.”

41 Jesu a to khalahatsha hafuhi ni ha ma manekako kona makaxa a miningelo, se e khata kuwona vathu va txi betela male amu ka makaxa onewo, vathu va vangi vo ganya va txi betela male ya yingi. 42 Se ku to hoka wamsikati wo kari wa txisiwana a nga felwa ngu mwamna wakwe, e ta beta simaleyana simbidi so va i si nga sa boti.* 43 Se ene a to dhana vagondiswa vakwe e va gela tiya: “Na mi gela ditshuri ni txi khani: Wamsikati wuwa wa txisiwana wo felwa ngu mwamna, a ningete male ya yingi ngutu kupinda votshe vale vamwani. 44 Kambe vale vamwani va betile asi va nga hungula ka si va ku naso. Kambe ene, ka wusiwana wakwe, a betile sotshe asi a nga ti naso, i ku sotshe asi a nga ti naso kasi ku ti hanyisa ngu sona.”

13 Mbimo yi a nga txi huma ngu dithempeleni, mmweyo wa vagondiswa vakwe a to m’tshuketela a txi ta khene: “M’gondisi, hi nga wona kutshura ka marigwi ale ni tinyumba ta kona.” 2 Ngu toneto, Jesu a to khene: “Wa ti wona tinyumba tiya ta hombe, kani? Ku na hoka mbimo yi dirigwi di no mbi va txitimwi ka dimwani ngu ku va ma di khundumusilwe.”

3 Mbimo yi a nga di khalahatshile ka Mmango wa Miolivha va txi wonetela dithempele, Pedro, Jakobe, Johani ni Andreya va to m’yela va di vokha ve ya m’wotisa ku kha vona: 4 “Hi nga hi gela: Atiya ti na maheka ngu mbimo muni, ni ku ngu txihi txi no va txikombiso txa ti to timhaka tiya totshe ta hoka magwito?” 5 Ngu toneto, Jesu a to khata ku va gela a txi khene: “Ti woneleni kasiku mi si kanganyiswi ngu m’thu. 6 Vavangi va na ta ngu ditina dangu, va txi kha vona: ‘Ani ngani Kristu’, se va na kanganyisa vathu vo tala. 7 I singa eto basi, mi na pfa madungula a tiyimbi ta hafuhi ni ta makhalo a kule. Hambi keto, ti woneleni ti to mi si dhuki, nguko eto ti fanete kumaheka kambe, hi nga ku o va magwito.

8 “Nguko ditiko di na wukela ditiko dimwani, ni mifumo yi na wukelana. Ku na va ni kuzinginikela ka mafu ka makhalo o tala, ku na tshumela ku va ni tinzala. Totshe tiya makhato a kuxaniseka.

9 “Kasi anu, ti woneleni. Nguko va na mi ningela matribhunali ni ku mi ningela masinagogani kwawe, ni ku mi na yiswa ka vakoma ngu mhaka yangu kasiku mi ya ni fakazela masoni kwawe. 10 Ni ku, ku fanete kukhata ngu kutxhumayelwa mahungu a manene ka matiko otshe. 11 Se ngako va txi mi ningela, mi nga karatekeni, mi txi pimisa ti to mi na womba txani, kambe mi na womba ati mi no ningwa ka mbimo yoneyo. Nguko awu a womba-wombako hi nga anu, i moya wo sawuleka. 12 M’thu a na ningela mwanawe kasiku e dawa, tate a na ningela mwanana wakwe, ni vanana va na wukela vaveleki vawe ni ku va ningela ve dawa. 13 Mi na nyenywa ngu vathu votshe ngu mhaka ya ditina dangu, aniko awu a no timisela kala magwito a na poniswa.

14 “Ngu toneto, ngako mi txi wona tximaha txo nyenyeza atxi txi onhetelako txi di ka wukhalo awu txi nga si faneli ku va ka wona, (kasi ku ti pfisisa tiya m’gondi ti lava e va ni mapimo) ava va ku Judheya va na tutumi ve ya mimangoni. 15 Awu a ku txitimwi ka nyumba a nga txhike nem a nga bele nyumbani kasi kuteka silo sakwe. 16 Awu a ku thembweni a nga wuyi e ta teka siambalo sakwe. 17 No tsetsa vavasikati ava va no ta manwa va di ni sirumbo, ni va va no ta manwa va txi mamisa ka masiku oneyo. 18 Simamani mi khongela kasiku masiku eyo ma si mi teli ngu wuxika.* 19 Ka masiku oneyo ku na va ni kuxaniseka ka hombe, ko kha ku khali kumaheka kukhukhela Txizimu txi nga vanga mafu kala mbimo yoneyo.* Ni ku, kha ku na mbi swa ku humelela kambe. 20 Phela, i si nga ngu ku Jehovha a nga komisa masiku eyo, ni wamweyo a ndi no huluka. Kambe ngu mhaka ya va a nga va langa, masiku eyo ma komisilwe.

21 “Se ngako m’thu a txi mi gela ku khene: ‘Ndiyo Kristu, waho hawa,’ mwendo ku ‘Akheya,’ mi nga kholweni. 22 Nguko ku na humelela vakristu ni vaprofeti va makuho, ava va no maha sikombiso ni sidiwukiso kasi kutimeta vathu, hambi ava va nga langwa, ngako va si ti woneli va na timetwa. 23 Ngu toneto, anu zumbani mi di rinzete, nguko ni mi gete totshe tiya na ti si se humelela.

24 “Kambe, ka masiku oneyo, msana ka kuxaniseka kuleya, ditambo di na pfupeliswa, ni mtxima kha wu na mbi woninga. 25 Se tinyeleti ti na wa ngu nzumani, ni sotshe asi si ku nzumani si na zuzwa. 26 Se ngu mbimo yoneyo, va na wona Mwanana wa M’thu a txi ta ngu marefuni, adi ni mtamo ni wudhumo wa hombe. 27 Se ene a na rumela tingilozi ni kusengeleta ava va nga langwa ka mune wa makhona a mafu,* kukhukhela magemeta-mitshi ka mafu kala magemeta-mitshi ka nzuma.

28 “Gondani ngu txidinganiso txa mkuwu: Ngako mi txi wona madhavi a maphya ma txi thunga linyepfu ni mazokoro a maphya anu ma ti ziva to malanga* ma hafuhi. 29 Kufana ni toneto, ngako mi txi wona tiya ti txi humelela, ti ziveni ti to Mwanana wa M’thu a hafuhi, a to ema ditimbani. 30 Ngu ditshuri na mi gela ku khani, vathu va nguva yiya* kha va na mbi guma, totshe tiya ti si se maheka. 31 Nzuma ni mafu si na pinda, kambe mapswi angu kha ma na mbi pinda.

32 Mayelano ni ditshiku donedo, mwendo diora da kona, kha ngaho a di zivako, nem tingilozi nzumani, nem Mwanana, do ziwa ngu Tate dwe. 33 Ngu toneto, zumbani mi di rinzete nguko anu kha mi yi zivi mbimo ayi yi nga vekwa. 34 Ngu nga tile ta wamwamna awu a lavako kuenda, a si se tsula a khata ngu kudhana sithumi sakwe e si ninga mithumo, m’thu ni m’thu ni mthumo wakwe, se e gela muwoneleti wa ditimba ti to e zumba a di rinzete. 35 Ngu toneto, zumbani mi di rinzete, nguko kha mi di zivi ditshiku adi nyamne wa mti a no wuya ngu dona, mwendo minova, mwendo hagari ka wusiku, mwendo madrugadha,* mwendo ni mixo ngutu. 36 Kasiku, ngako a txo dhuka e humelela, a si mi mani mi di otete. 37 Ati ni gelako anu, ni gela votshe: Zumbani mi di rinzete.”

14 Ku di sate masiku mambidi kasi kumahwa Paxkwa ni M’buso wa Mapawa o mbi Tshumbelwa, tinduna ta vaprista ni vamabhalani va txi lavetela nzila yo ñola Jesu ve m’daya 2 Kambe va txi kha vona: “Hi nga m’ñoleni ngu ditshiku da m’buso ti to vathu va si mahi nyima-nyima.”

3 Mbimo yi ene a nga ti Bhetaniya mtini ka Simoni awu wa tshekela, ku to hoka wamsikati a nga ti ni fraxku da alabhastru yi nga ti ni mafura o bhumula, i ku nardho ya orijinali o dhula ngutu se ene a to tula fraxko ya alabhastru e khata kuthela hamsungo ka Jesu. 4 Mbimo yi va nga wona tiya, vagondiswa va to swireka va txi kha vona: “Hi nga wona mafura o bhumula ma xakelwako. 5 Phela mafura awa o bhumula ma di xavisilwe ngu 300 wa madhenari, male ya kona yi ningwa sisiwana. Ngu toneto, va to henyela ngutu awule wamsikati. 6 Se Jesu a to khene: “M’lekeni. Kasi mi m’karatela txani awu wamsikati? Ati a nga ni mahela timhaka ta tinene ngutu. 7 Nguko sisiwana mi naso yotshe mbimo, mi nga si mahela ta tinene mbimo yi mi yi lavako. Kambe hi nga yotshe mbimo mi no va ni nani. 8 Ene a mahile ati a nga ti kota, akuwa a nga ni thela mafura awa o bhumula hammidini kwangu, nguko a longisela kutshotshwa kwangu. 9 Ani na mi gela ditshuri, ni khani: “Ni hani aha ku no txhumayelwa mahungu a manene hamafuni kotshe, ati awu wamsikati a nga maha ti na wombwa kasiku e khumbulwa ngu tona.

10 Se Judhasi Iskariyoti, mmweyo wa vale va 12 a to yela tinduna ta vaprista kasi ku ya m’ningela kwawe. 11 Mbimo yi va nga ti pfa va to tsaka ngutu, ve mu thembisa ku m’ninga male ya prata. Ngu toneto a to khata kulavetela m’khanjo wo m’ningela kwawe.

12 Ka ditshiku do khata da M’buso wa Mapawa o mbi Tshumbelwa aha ku tolovelako kuningelwa miningelo ya Paxkwa, vagondiswa va to tshuketela Jesu ve ta m’wotisa ku kha vona: “Mkoma,ngu hayi u lavako ti to hi lulamisela kona kasiku hi ya dyela kona Paxkwa kani? 13 Se ene a to ruma vagondiswa vakwe va vambidi a txi khene: “Tsulani didhoropani, mi na ya mana wamwamna wo kari a di rwate fuku* ya mati, m’londiseni. 14 Ova ha a no bela kona, gelani nyamne wa mti to: ‘Mkoma a khene: “Yi hayi nyumba ya vapfhumba ayi ni no dyela ka yona Paxkwa ni vagondiswa vangu, kani?”’ 15 A na mi komba sala ya hombe yi ku txitimwi, yi nga tshuriselwa. Lungiselani konemo.” 16 Se vagondiswa va to tsula ve ya wulela didhoropani, ve ya mana nga ti Jesu a nga ti va gelisile tona, se va to longisela Paxkwa.

17 Mbimo yi di nga swa, ene a to hoka a di ni va va 12. 18 Mbimo yi va nga ti khalahatshile hamezani va txi dya, a to khene: “Na mi gela ditshuri, ni khani: Mmweyo wanu a dyako ni nani a na ni xavisa.” 19 Se va to khata kupandiseka ngutu, mmweyo ni mmweyo wawe a txi m’wotisa a txi khene: “I ngava i di ani?” 20 Ene a to va xamula a txi khene: “I mmweyo wanu, anu va 12, awule hi betako diwoko ngu mkama wumwewo amu ka mbiya. 21 Nguko Mwanana wa M’thu wa tsula, nga ha timhaka takwe ti nga bhaliswa tona, kambe awu a xavisako Mwanana wa M’thu a na ti wona. I di tshuku ku m’thu eneyo a sa velekwa.”

22 Va txi ngadi va txi dya, a to teka dipawa, e di katekisa, e di khema e gwita e va ninga, a txi khene: “Tekani, dipawa diya di emela mmidi wangu.” 23 A to teka kopo, e maha mkombelo, e va ninga, se votshe ve sela. 24 Ene a to khene: “Vhinya yiya yi emela mnoha wangu wa txitumelelano awu wu no theketwa kasi kuwuyelwa vavangi. 25 Kambe ani na mi gela ku khani: Kha ni na mbi swa ni sela kambe vhinya yiya ya mauvha kala ka ditshiku dile ni no ta sela vhinya ya yiphya ka Mfumo wa Txizimu.” 26 Ngu magwito, msana kova va di embelete tindando to dhumisa Txizimu, va to khukha ve tsula Mmangoni ka Miolivha.

27 Se Jesu a to va gela ku khene: “Motshenu mi na ni leka* ngu mhaka ya ti ti no ni humelela, nguko ti bhatwe ti to: ‘Ni na peka m’dyisi, se tinvuta ti na hangalaka.’ 28 Kambe, msana kova ni di wusilwe ni na thangela ni txi ya Galileya.” 29 Kambe Pedro a to xamula a txi khene: “Hambi votshe va txo ku leka ani kha ni na mbi ku leka.” 30 Ngu toneto, Jesu a to m’gela a txi khene: “Ngu ditshuri ni khani: Ka wona wusiku wuwa, na mkuku wu si se emba kumbidi, awe u na ni lamba sikhati siraru.” 31 Kambe ene a to kaneta a txi khene: “Hambi ti txo lava ni fa kumweko ni nawe, ani ni nge thuki ni ku leka.” Se votshe ava vamwani va to womba toneto ni vona.

32 Va to hoka ka wukhalo awu wu dhanwako ku i Getsemani, ene a to gela vagondiswa vakwe a txi khene: “Zumbani hawa, ni nga txi ya hale ni txi ya khongela.” 33 Ene a to teka Pedro, Jakobe ni Johani, se a to khata kuxukuvala ni kupandiseka ngutu. 34 A to va gela ku khene: “Ni karatekile ngutu aha ko hambi kufa ni nga fa. Zumbani hawa mi rinzela.” 35 Se a to tshuketa kulenyana e khizama a txi khongela ti to ngako ti txi koteka, txiduko txile* txi tshuketa kule nayo. 36 Se ene a to khene: “Abba,* Tata, totshe kwako ta koteka, tshuketisa kopo yiya kule ni nani. Hambiketo, ti nga maheke ati ani ni ti lavako, ti na maheke ati awe u ti lavako.” 37 Ene a to tshumela e ta va mana va di otete, se a to khene ka Pedro: “Simoni, wo otela? U pwati mtamo wo rinzela kumweko ni nani, hambi ngu diora dimwedo? 38 Zumbani mi di rinzete, mi khongela mbimo yotshe kasiku mi si xulwi ngu txiduko. Ngu ditshuri, moya wa ti lava, aniko nyama yi karate.” 39 Se a to tsula e ya khongela a txi womba mapswi ona ya a mamwewo. 40 A to tshumela e wuya e ta va mana va di otete nguko maso awe ma txi nemela ngu wukohe, se va si ti zivi to va na xamula txani. 41 A to wuya ngu dikhambi da wuraru, a txi ta khene: “Ka mbimo yo nga yiya anu mo otela ni kuhumula. Xega, yi hokile mbimo yo Mwanana wa M’thu e ningelwa manzani ka vaonhi. 42 Khukhani hi tsula, awu a lavako ku ni xavisa a hokile.”

43 A txi ngadi a txi womba-womba ku to hoka Judhasi i nga ti mmweyo wa vale va 12, a ti ni txitshungu txa hombe txi nga ti ni matxhari ni migomba. Txona txi ti rumetwe ngu tinduna ta vaprista, ngu vamabhalani ni madhota. 44 Judhasi a ti langanile navo a txi khene: “Awule ni no m’nyuta, ngene eyo, m’ñoleni mi txi m’wonelela.” 45 Se a to tsimbila e kongoma Jesu, e m’tshuketela a txi khene: “Rabhi!” Se e m’nyuta. 46 Se vona va to ñola Jesu ve m’sunga. 47 Mmweyo wa va va nga ti ni Jesu a to somola ditxhari e lwisana ni txithumi txa mprista wa hombe, e txi wila nzeve. 48 Se Jesu a to va gela ku khene: “Mi ta ni nõla mi di ni matxhari ni migomba,no va dikhamba kani? 49 Ditshiku ni ditshiku ni ti ni nanu dithempeleni ni txi gondisa, hambi keto kha ma ni nõla, kambe totshe atiya ti mahekile kasiku ti tatiseka ati ti nga wombwa ka Mibhalo.”

50 Votshe va to tutuma ve m’siya. 51 Kambe dijaha do kari di nga to ko va ni nguwo dwe di sa ambala txilo, di to khata ku m’londisa ngu hafuhi, ve zama ku di nõla ni dona. 52 Se dona di to tshwetemusa nguwo ayi di nga ti nayo di tutuma di sa ambala txilo.

53 Se va to teka Jesu ve m’yisa ka mprista wa hombe. Totshe tinduna ta vaprista, madhota ni vamabhalani va ti tshanganile kona hale. 54 Kambe Pedro a txo m’londisa ngu kule kala mthandani ka mprista wa hombe, se ene a to zumba kumweko ni sithumi va txi ora mndilo. 55 Tinduna ta vaprista ni yotshe Sanedri, va txi lava wufakazi wa makuhu kasi kulumbeta Jesu ti to ve m’daya, kambe va si wu mani. 56 Vathu vo tala va txi ningela wukafazi wa makuhu, kambe wufakazi wonewo wu si pfani. 57 Ni ku vamwani va txi khukha ve ningela wufakazi wa makuhu, va txi womba tiya: 58 “Athu hi m’pfite a txi khene: ‘Ani ni na khundumusa dithempele diya di nga mahwa ngu manza a vathu, se ngu masiku mararu ni na aka dimwani adi di no va di sa akwa ngu manza a vathu.’” 59 Hambi ka mhaka yiya wufakazi wawe wu si pfani.

60 Se mprista wa hombe a to khukha e ema e wotisa Jesu a txi khene: “Wo malala u txi dwe u si xamuli txilo? Wo mbi ti pfa ati majaha yawa ma ku lumbetako tona?” 61 Kambe Jesu a to simama e malala a txi dwe a si xamuli txilo. Se mprista wa hombe a to tshumela kambe e m’wotisa ku khene: “Ina awe u Kristu, Mwanana wa Txizimu kani?” 62 Jesu a to xamula a txi khene: “Ngani, ni ku anu mi na wona Mwanana wa M’thu a di khalahatshile txineneni ka Nyamitamo a txi ta ngu marefuni a nzumani.” 63 Ngu toneto, mprista wa hombe a to bhanda siambalo sakwe a txi khene: “Wufakazi muni hi ku ngadi hi txi wu lava? 64 Mi m’pfite mipune a txi ruka. Se mi khanu txani ngu m’thu wuwa?” Se vona va to womba to a ti fanete kudawa. 65 Se vamwani va to khata ku m’thurela ve m’fenengeta khohe, ve m’peka ngu sibhakela, va txi kha vona: “Hi nga profeta.” Se msana ko m’peketela, maphoyisa ma to m’teka.

66 Mbimo yi Pedro a nga ti khalahatshile hahanze khe mthandani, ku to hoka mmweyo wamsikati i nga ti txithumi txa mprista wa hombe. 67 Mbimo yi txithumi txile txi nga wona Pedro a txi ora mndilo txi to m’wonetela txi txi: “Nanawe u ti ni Jesu wa Nazareta.” 68 Kambe ene a to lamba a txi khene: “Kha ni m’zive eyo ni ku kha ni ti pfisisi to u lava kuwomba txani,” se ene a to huma hahanze e ya ema ditimbani. 69 Wamsikati wule wa txithumi a to tshumela e wona kambe Pedro, se e gela ava va nga ti hale a txi khene: “Awuwa nene i mmweyo wawe.” 70 Ene a to simama e lamba, msana keto, ava va nga ti ho hale va to yela Pedro va txi ya kha vona: “Ngu ditshuri, awe u mmweyo wawe, nguko awe ngu ditshuri u M’galileya.” 71 Kambe ene a to khata kuxambanya e gima ni hahatshi a txi khene: “Ngu ditshuri, kha ni m’zivi m’thu wu mi womba-wombako ngu ngene.” 72 Kunukunuko mkuku wu to emba da wumbidi se Pedro a to khumbula ati Jesu a nga ti wombile a to khene: “Na mkuku wu si se emba kumbidi, awe u na ni lamba sikhati siraru.” Se Pedro a to huma hahanze e ya dila ngutu ngu txiviti.

15 Neti di nga txa, tinduna ta vaprista, madhota, vamabhalani kumweko ni tribhunali ya hombe va to tshangana kasi kusunga to va na maha txani. Msana ko sunga Jesu va to m’teka ve m’heleketa ka Pilato. 2 Se Pilato a to m’wotisa a txi khene: “Ina awe u Mkoma wa Vajudha?” Se Jesu a to m’xamula a txi khene: “Awe upune u womba toneto.” 3 Kambe tinduna ta vaprista ti txi m’lumbeta timhaka to tala. 4 Se Pilato a to tshumela e m’wotisa a txi khene: “Ina wo mbi na to xamula kani?” Wo mbi ti pfa totshe tiya va ku lumbetako tona.” 5 Jesu kha xamula txilo kambe, aha koza Pilato a txi kayee.

6 Se aku i nga di mbimo ya m’buso, Pilato a ti ni txihena txo txhatxha txibotxhwa txile vathu va txi sawulako. 7 Ka mbimo yoneyo ku ti ni txigevenga tximwetxo txi nga ti ñotwe txi khotelwa txi nga txi dhanwa ku i Bharabhasi, awu a nga ti wukete wukoma, e hokela aha ko daya. 8 Ngu toneto, txitshungu txi to tshuketela Pilato txi txi ya m’kombela ti to e maha ati a tolovelako kumaha. 9 Ene a to va wotisa a txi khene: “Mi lava ti to ni txhatxha Mkoma wa Vajudha kani?” 10 Nguko Pilato a txi ti ziva to tinduna ta vaprista ti ti m’ñolisile ngu ku va nga txi m’bavela. 11 Kambe tinduna ta vaprista ti to kuzetela txitshungu ti to txi kombela kutxhatxhwa Bharabhasi. 12 Pilato a to tshumela e va wotisa a txi khene: “Mi lava ti to ni maha txani ngu wule anu mi ku khanu mkoma wa Vajudha?” 13 Vona va to tshumela kambe va txi kha vona: “A na hayekwe haphandeni eyo.” 14 Kambe Pilato a to ya masoni a txi va wotisa ku khene: “Ngu kutxani? Kasi a to onha txani?” Hambi keto va to engetela kumaha diguwa va txi kha vona: “A na hayekwe haphandeni eyo.” 15 Ngu toneto, ngu kulava kutsakisa txitshungu, Pilato a to txhusa Bharabhasi. Msana ko rumisa ti to Jesu e kwapelwa, a to m’ningela ti to e dawa ka phande.

16 Masotxhwa ma to m’teka me m’yisa mtini ka Pilato, se ve dhana wotshe mtxawa wa masotxhwa. 17 Vona va to mu ambekisa nguwo ya kori ya mkhure ve m’sanzeka m’bhoti* wa mipa ha msungo. 18 Se vona va to khata kukwangula va txi kha vona: “Xeweni, Mkoma wa Vajudha!” 19 Vona va txi m’peketela hamsungo ngu litshava ve m’thurela, ve tshumela ve m’khizamela. 20 Ngu magwito, msana ko va va di m’poyilete, va to m’thavisa siambalo sile sa kori ya mkhure va nga di mu ambekile, ve mu ambekisa siambalo sakwe, ve gwita ve m’teka ve ya m’gogotela haphandeni. 21 Ku to pinda wamwamna wo kari ngu kona hale, a txi ta ngu hahanze ka didhoropa. I ti Simoni wa Kirene, i nga ti tate wa Alexandre ni Rufo. Va to m’sinzisa ku e rwala phande ya xanisa.*

22 Se vona va to m’teka ve m’yisa ka wukhalo awu wu dhanwako ku i Golgota, ati ti wombako ku “wukhalo wa txikwakwa.” 23 Se va to zama ku m’ninga vhinya yo patelwa ni mira,* kambe ene kha tumela ku yi sela. 24 Se vona va to m’gogotela haphandeni, ve abana siambalo sakwe, msana ko xaxuva tixolo kasi kuziva to ngu sihi siambalo si no tekwa ngu mmwani ni mmwani. 25 I ti kona mu ka ma 9 ora mbimo yi va nga m’gogotela haphandeni. 26 Mapswi aya ma nga ti bhatwe ngu txitimwi a mnando wakwe ngu ya ma nga txi kha ona: “Mkoma wa Vajudha.” 27 Ku ti bethetwe makhamba mambidi madhawani kwakwe, dimwedo ngu didhawa da txinene, dimwani ngu didhawa da txibhabha.* 28 —— 29 Ava va nga txi pinda va txi m’ruketela, va txi zinginisa misungo va txi kha vona: “Ayuwee, awe u nga khawe u nga khundumusa dithempele u di aketa ngu masiku mararu. 30 Hi nga ti hanyisa ka, u txhika ka phande eyo.” 31 Ni tona tinduna ta vaprista ni vamabhalani va to khata ku m’poyilela va txi kha vona: “Ene a hanyisile vamwani, kambe kha ti koti ku ti hanyisa. 32 Kristu, Mkoma wa Israyeli, txhika konkuwa ngu ha phandeniho, kasiku hi ti wona, hi kholwa.” Kuteka ni vale va nga ti gogotetwe madhawani kwakwe va txi m’ruketela.

33 Mbimo yi ku nga txhaya 12, ku to va ni txidema txa hombe kala ma 15. 34 Kona mu ka ma 15, Jesu a to kwangula a txi: “Eli, Eli, lama sabhaktani?” Ti wombako ku: “Txizimu txangu, Txizimu txangu, u ni lekela txani?” 35 Vamwani va nga ti koneho va to tipfa, se va txi kha vona: “Hi nga pfani, a dhana Elija.” 36 Se mmweyo wawe a to tutuma e ya teka txiponji e txi beta ka vhinya yo tsavela, e txi veka ka litshava, e m’ninga ti to e sela, a txi womba tiya: “M’lekeni, hi na nga wona mwendo Elija a nata e ta m’lamulela.” 37 Jesu a to tshumela kambe e kwangula, se e fa. 38 Dikortina da dithempeleni di to vharuka ngu hagari, kukhukhela txitimwi kala hahatshi. 39 Se mbimo yi mthangeli wa masotxhwa a nga ti kona haleya a nga wona ati ti nga maheka mbimo yi Jesu a nga fa, a to khene: “Ngu ditshuri, awuwa Mwanana wa Txizimu.”

40 Ku ti ni vavasikati vo kari ava va nga txi wonetela ngu kulenyana. Ka vona ku ti ni Mariya Magdhala kumweko ni Mariya mame wa Jakobe awu wa M’dotho ni Joseti ni Salome. 41 Vavasikati vonevo va txi londisela Jesu ni ku m’thumela mbimo yi a nga ti Galileya. Ku ti ni vavasikati vamwani vo tala ava va nga ti tile ni Jesu Jerusalema.

42 Aku di nga txo swa ditambo ni ku i nga ti ditshiku da Kululamisela, i ku ditshiku adi di gametwako ngu ditshiku da Sabata. 43 Ku to hoka Josefa wa Arimateya, i nga ti m’thu wa nduma ka Tribhunali ya Vajudha, nene a txi rinzela Mfumo wa Txizimu. Se a to tsana e tsula ka Pilato e ya kombela txirumbi txa Jesu. 44 Kambe Pilato a txi lava kuziva to Jesu a ti fite kani. Se a to dhana mthangeli wa masotxhwa e ta m’wotisa ti to ina Jesu a ti fite ngu ditshuri kani. 45 Msana kova mthangeli wa masotxhwa a ti m’gete ti to Jesu a fite, Pilato a to tumelela ti to kuningelwa txirumbi txakwe ka Josefa. 46 Josefa a to teka txirumbi txa Jesu e txi phutela ka nguwo yo basa yo dhula. Ngu msana a to txi teka e ya txi veka ka dithitha dakwe da diphya adi di nga di tutwe ka dirigwi, e gwita e rindilita tampa e di vhala. 47 Kambe Mariya Magdhala ni Mariya mame wa Joseti, va to simama ve wonetela aha Jesu a nga ti tshotshilwe kona.

16 Msana ka Sabata Mariya Magdhala ni Mariya mame wa Jakobe ni Salome, va to xava mafura o bhumula kasiku ve ya thela mmidi wa Jesu. 2 Ka ditshiku do khata ka divhiki, va to hoka dithithani ni mixo ngutu, msana ko di di humile ditambo. 3 Se va txi wotisana va txi kha vona: “I mani a no hi rindilitela dirigwi dile di nga vhala dithitha?” 4 Kambe, va txi gu maso va to wona to dirigwi dile, hambiku i nga ti da hombe di ti rindilitilwe. 5 Mbimo yi va nga wulela, va to wona dijaha di ti khalahatshile ngu didhawa da txinene di di ambate nguwo yo lapha yo basa, se va to xamala ngutu. 6 Dijaha dile di to va gela di txi kha dona: “Mi nga thaveni. Na ti ziva ti to mi lava Jesu wa Nazareta, awu a nga dawa ha phandeni. Ene a wusilwe kha ngaho hawa. Ngonani mi ta wona aha a nga di tshotshilwe kona. 7 Konkuwa, tsulani mi ya gela vagondiswa vakwe ni Pedro mi txi khanu: ‘Ene a thangete e ya Galileya, mi na ya m’wona kona kheya, nga ha a nga womba ngu kona.’” 8 Ngu toneto, vona va to khukha va txi thava ni kudhudhumela, kambe va di tsakile. Hambiketo kha va gela m’thu nguko va ti ñotwe ngu dizowa.*