MAHUNGU A MANENE O BHALWA NGU LUKA

1 Vo tala va zamile kuxolisisa ni kutshumela ve bhala timhaka tiya hotshethu hi ti kholwako, 2 tona hi ti mani ka vale kukhukhela makhatoni va nga va tifakazi ta mhaka yiya, ni ku va vatxhumayeli va Dipswi da Txizimu. 3 Tata Teyofilo, nanani msana kova ni di khatile ngu kuxolisisa ditshuri da totshe timhaka kukhukhela makhatoni, ni sungile ku ti bhala ngu kuya ngu m’longameto wa tona, 4 kasiku u tsaniseka ka ti to atiya hi nga gondiswa* nda ditshuri.

5 Ka masiku a Herodha i nga ti mkoma wa Judheya, ku ti ni mprista a nga ti dhanwa ku i Zakariya a nga txi thuma ka mtxawa wumwewo ni Abhiya. Msikati wakwe i ti Elizabheti, ene i ti wa lixaka la Aroni. 6 Votshe mwamna ni msikati i ti vo lulama masoni ka Txizimu, vona va txi londeta yotshe milayo ni sirumo sa Jehovha.* 7 Hambiketo, vona va si nga ni vanana nguko Elizabheti i ti txifule, i si nga eto basi, vona va ti kumbile ngutu.

8 Zakariya a ti thuma masoni ka Txizimu kota mprista kumweko ni mtxawa wakwe. 9 Se ku di hokile mbimo yakwe yo hisa dibaselo, a to wulela ka wukhalo wo sawuleka dithempeleni ka Jehovha* ngu kuya ngu ti va nga txi mahisa tona vaprista. 10 Txotshe txitshungu atxi txi nga ti ngu hahanze txi txo maha mikombelo mbimo ayi ku nga txi ningelwa dibaselo. 11 Ku to humelela ngilozi ya Jehovha* yi ta ema ngu txineneni* ka altari yo hisela dibaselo. 12 Kambe mbimo yi Zakariya a nga yi wona a to karateka e thava. 13 Hambiketo, ngilozi yile yi to m’gela ku khene: “Zakariya, u nga thave nguko mikombelo yako yi engisilwe, se msikati wako Elizabheti a na veleka mwanana wa mfana ni ku u na m’raya ditina da ku i Johani. 14 Awe u na tsaka ni kutshumela u nengela ni ku vo tala va na tsaka ngu kona ha ka kuvelekwa kwakwe. 15 Nguko ene a na va wa hombe masoni ka Jehovha.* Kambe kha fanela kusela vhinya mwendo wumwani wusuke, ene a na tala ngu moya wo sawuleka hambi a si se kuvelekwa* 16 ni ku a na maha ti to vathu vo tala va ka Israyeli ve wuyela ka Jehovha,* Txizimu txawe. 17 Ene a na thangela masoni kwakwe a di ni moya ni mtamo wa Elija. A na phindula timbilu ta vaveleki ti fana ni ta vanana, ni kumaha ti to sindaka-milayo si va ni wutxhari ni kuva vathu vo lulama kasi kumaha ti to Jehovha* e ta mana vathu ava va nga lulamiselwa.”

18 Zakariya a to wotisa ngilozi a txi khene: “Nji txani txi no ni kholwisa toneto u wombako? Nguko ani se ni kumbile ni ku msikati wangu nene se a kumbile.” 19 Ngilozi yi to xamula yi txi kha yona: “Ani ngani Gabriyeli, ni emako masoni ka Txizimu, ni rumetwe kasi kuta womba-womba ni nawe ni ku kugela mahungu yawa a manene. 20 Kambe awe u na va txiduma, khu na mbi sikota kuwomba-womba kala kuza ti maheka atiya ni nga ti womba, nguko awe khwa kholwa ka mapswi angu aya ma no tatiseka ngu mbimo ya kona. 21 Kambe txitshungu txi txi rinzela Zakariya hahanze, se txi to xamala ngutu ngu ku a nga txi swela kuhuma dithempeleni. 22 Mbimo yi a nga huma, ene a si ti koti kuwomba-womba navo, se vona va to tumbula ti to a ve ni m’woniso wo kari mule dithempeleni. Ene a si ti koti kuwomba-womba, a txo maha ngu kuxungametela dwe. 23 Mbimo yi a nga tshanganisa masiku akwe a mthumo wo sawuleka, a to tsula mtini.

24 Ku di pindile masikunyana o kari, msikati wakwe Elizabheti a to mana txirumbu, kudingana mtxhanu wa mitxima a si khukhi mtini ni ku a txi womba tiya: 25 “Hi nga wona ati Jehovha* a nga ni mahela masiku yawa. A ni khumbute kasiku nani ni wonwa ni di wamsikati.”*

26 Mbimo yi txirumbu txa Elizabheti txi nga va ni 6 wa mitxima, ngilozi Gabriyeli yi to rumelwa ngu Txizimu yi ya ka didhoropa da Nazareta di manekako Galileya. 27 Yona yi to ya ka divhirjem* do kari di nga txi dhanwa ku i Mariya, di nga ti wutilwe ngu dijaha di nga txi dhanwa ku i Josefa wa linyumba la Dhavhidha. 28 Yona yi to bela aha a nga ti kona yi txi kha yona: “Xeweni awe u nga katekiswa, Jehovha* a ni nawe!” 29 Kambe ene a to karateka ngutu ngu mapswi a ngilozi yile, se e lava kupfisisa ti to maloselo yale ma lava kuwomba txani. 30 Se ngilozi yi to m’gela ku khene: “U nga thave Mariya, nguko awe u mani dithomo* masoni ka Txizimu. 31 Wona! Awe konkuwa u na mana txirumbu ni ku u na veleka mwanana wa mfana, u na m’raya ditina da ku i Jesu. 32 Ene a na va wa hombe ni ku a na dhanwa ku i Mwanana wa Nyatxitimwi, ni ku Jehovha* Txizimu a na m’ninga txikhalo txa wukoma txa tate wakwe Dhavhidha. 33 A na va Mkoma ka nyumba ya Jakobe ngu ha ku si gumiko, ni ku Mfumo wakwe kha wu na mbi va ni magwito.”

34 Se Mariya a to wotisa ngilozi a txi: “Ti na mahekisa kutxani toneto nguko ani kha ni khali kuotela ni wamwamna?” 35 Ngilozi yi to xamula yi txi: “Moya wo sawuleka wu na ta kwako ni ku mtamo wa Nyatxitimwi wu na ku fenengeta. Ngu toneto, awu a no velekwa a na dhanwa ku msawuleki, Mwanana wa Txizimu. 36 Phela hambi Elizabheti dixaka dako, a ziwako i di txifule a na veleka mwanana wa mfana hambiku a nga kumba, konkuwa a ka mtxima wa wu 6, 37 nguko kha ti ngaho ati Txizimu txi ti wombako ti si maheki.* 38 Se Mariya a to khene: “Ani ni txithumi txa Jehovha,* ti na maheke nga ha u nga womba ngu kona.” Se ngilozi yi to khukha yi tsula.

39 Msana keto, Mariya a to khukha ngu txikuluveta e ya ka ditiko da mimangoni ka didhoropa da Judha. 40 A to hoka mtini ka Zakariya e ya losa Elizabheti. 41 Se mbimo yi Elizabheti a nga loswa ngu Mariya, mwanana awu a nga ti mndani a to txhukuma ngutu,* se Elizabheti a to tala ngu moya wo sawuleka, 42 e kwangula a txi khene: “U katekile awe hagari ka vavasikati, ni ku a katekile mwanana awu a ku mndani kwako. 43 Phela ani kha ni fanelwi ngu lungelo yiya, ti mahisa kutxani ku ni endelwa ngu mame wa Mkoma? 44 Nguko mbimo yi u nga ni losa mwanana awu a ku mndani kwangu a to txhukuma* ngu litsako. 45 U katekile awe u nga kholwa, nguko totshe atiya ti nga wombwa ngu Jehovha* ti na maheka.”

46 Mariya a to khene: “Ani na dhumisa Jehovha,* 47 ni ku moya wangu wa tsaka ngutu masoni ka Txizimu, i ku m’hayisi wangu. 48 Nguko txi woni wusiwana wa txithumi txa txona. Konkuwa votshe vathu va na womba ti to ni katekile.* 49 Nguko Nyamitamo a ni mahete timhaka to xamatisa ni ku ditina dakwe di sawulekile, 50 wuxinji wakwe mbwa kala kupinduka ka votshe ava va m’lavako. 51 Ene a ni lwete ngu diwoko dakwe da mtamo, a xowokisile avale vo ti gela mbiluni. 52 A wisile hahatshi tinduna ka sikhalo sa tona sa wukoma e guleta sisiwana, 53 a khurisile ava va nga ti ni nzala ngu silo sa sinene e hinga ava vo ganya va si nga ni txilo. 54 Ene a tete ku ta vhuna txithumi txakwe Israyeli, e khumbula kumaha wuxinji wakwe 55 ka Abrahamu ni ka liveleko lakwe, nga ha a nga thembisa ngu kona ka vakokwani vathu.” 56 Mariya a zumbile ni Elizabheti kudingana mitxima yiraru, msana keto a to wuya mtini kwakwe.

57 Se ku to hoka mbimo yo Elizabheti e hefemula,* ene a to veleka mwanana wa mfana. 58 Mbimo yi vaakelani kumweko ni maxaka va nga pfa ti to Jehovha* a mu mahete wuxinji wa hombe va to tsaka nayo. 59 Ka ditshiku da wu 8, va to teka mwanana wule ve m’yisa wukwerani* ni ku va txi lava ku m’raya ditina da tate wakwe Zakariya. 60 Kambe mame wa kona a to khene: “Ahim-him! Ene a na dhanwa ku i Johani.” 61 Se vona va to m’gela ku kha vona: “Khu nga ni dixaka ni da dimwedo di ku ni ditina diya.” 62 Vona va to maha ngu kuxungametela ve wotisa tate wa kona ti to ngu dihi ditina adi va no raya mwanana. 63 Se ene a to kombela ti to ve m’ninga txipulangwana, e bhala tiya: “Ditina dakwe i Johani.” Se votshe va to xamala. 64 Txisofu txakwe txi to tekela kutuleka, lidimi lakwe li txhatxheka, e khata kuwomba-womba e dhumisa Txizimu. 65 Se votshe ava va nga txi hanya ka wukhalo wule va to thava ngutu ve khata kuwomba-womba ngu timhaka tiya kotshe mimangoni ka ditiko da Judheya. 66 Votshe ava va nga ti pfa tiya va to ti vekisa timbiluni kwawe va txi ti wotisa va txi kha vona: “Kasi ene mwanana wuwa o lava ku va m’thu wo zumbisa kutxani?” Nguko diwoko da Jehovha* di ti ni nene.

67 Se tate wakwe Zakariya a to tala ngu moya wo sawuleka e khata kuprofeta a txi khene: 68 “A na dhumiswe Jehovha,* Txizimu txa Israyeli, nguko a khumbute vathu vakwe e ta kasi ku ta va khulula. 69 Ene a tumbuluxile m’hanyisi* wa mtamo nyumbani ka Dhavhidha txithumi txakwe, 70 nga ha a nga womba ngu kona ngu kuthumisa vaprofeti vakwe vo sawuleka va kale. 71 Kasi ku hi hulukisa manzani ka valala vathu ni ku hi hulukisa manzani ka votshe va va hi nyenyako. 72 Kasi ku hi komba wuxinji ngu mhaka ya vakokwani vathu ni kukhumbula txitumelelano txakwe txo sawuleka, 73 i ku txixambanyo atxi a nga maha ka Abrahamu kokwani wathu. 74 Ti to msana ko va a di hi hulukisile manzani ka valala e hi ninga lungelo yo hi m’ mahela mthumo wo sawuleka hi si thavi txilo, 75 hi maha toneto hi di thembekile ni ku lulama masoni kwakwe otshe masiku a wutomi wathu. 76 Kambe awe mwanangu, u na dhanwa ku u mprofeti wa Nyatxitimwi ni ku u na thangela masoni ka Jehovha* kasi kululamisela tinzila takwe, 77 kasi kukomba vathu vakwe wuzivi awu wu yisako kuhanyiswani ngu kudivalela sionho sawe, 78 asi si divalelwako ngu kona ha ka wuxinji wa hombe wa Txizimu txathu. Ngu mhaka ya wuxinji wonewo hi na telwa ngu kuambuluka* ku txi khukhela txitimwi, 79 kasi kuninga kuwoninga ka vale va nga khalahatsha txidemani ni mtsudini ka lifo ni kukongomisa mikondo yathu ka nzila ya kurula.

80 Mwanana a txi ya a txi kula ni ku a txi tsana moyani. Ene a simamile a txi zumba txiwulani kala ditshiku di a nga ti kombekisa apune ka votshe vathu va Israyeli.

2 Ka masiku oneyo, Khezari Augustu a to veka mthetho wa ti to vathu votshe* ve tsula ve ya maha bhalela. 2 (Bhalela yoneyo yo khata yi mahekile mbimo yi Kirino i nga ti mkoma wa Siriya.) 3 Votshe vathu va to ya ti bhalisa, m’thu ni m’thu didhoropani kwakwe. 4 Josefa nene a to khukha ngu Nazareta didhoropa di di manekako Galileya e ya Judheya ka didhoropa da Dhavhidha, di nga txi dhanwa ku i Bhetlehema, nguko i ti wa lixaka la Dhavhidha. 5 Ene a to ya ti bhalisa ni Mariya, awu a nga ti txhadhile nayo, nga ha va nga di thembisanile ngu kona, se Mariya a ti hafuhi ni kuhefemula.* 6 Va di nga di kheya, ku to hoka mbimo yo Mariya e hefemula.* 7 Ene a to veleka mwanana wa matiwula, e m’phutela ngu tinguwo, e m’veka ka wukhalo wo dyela ka wona sihari nguko va sa mana wukhalo ka tinyumba to amukela vapfumba.

8 Ka wukhalo wule, ku ti ni vadyisi va nga txi zumba libalani ve wonelela tinvuta tawe ni wusiku. 9 Ngu txidhukisa, ku to humelela masoni kwawe ngilozi ya Jehovha,* se kuwoninga ka Jehovha* ku to layitha ahale va nga ti kona, se vona va to thava ngutu. 10 Ngu toneto, ngilozi yi to va gela tiya: “Mi nga thaveni, ni mi tisela mahungu a manene aya ma no ninga litsako vathu votshe. 11 Nguko nyamsi, didhoropani ka Dhavhidha kuvelekilwe m’hanyisi wanu, i ku Kristu, Mkoma. 12 Mi txi nga ya mana txibhebhetana txi di phutetwe ngu tinguwo, txi di otelisilwe aha kudyelako kona sihari. Ngene eyo! 13 Se ku to woneka tingilozi ta tingi ti di ni ngilozi yile ti txi dhumisa Txizimu ti txi: 14 “Txi na dhumiswi Txizimu nzumani, kurula hamafuni hagari ka vathu ava Txizimu txi va tsakelako.”

15 Neti tingilozi ti nga tsula nzumani, vadyisi vale va to gelana va txi kha vona: “He tsuleni Bhetlehema hi ya wona ati ti nga maheka, ati Jehovha* a nga hi gela. 16 Se vona va to tsula ngu txikuluveta ve ya mana Mariya ni Josefa ni txibhebhetana txi di otelisilwe aha kudyelako kona sihari. 17 Mbimo yi va nga ti wona tiya, vona va to txhamusela vamwani ti va nga ti getwe mayelano ni txibhebhetana. 18 Votshe ava va nga ti pfa ati ti nga txi txhamuselwa ngu vadyisi vale va to xamala ngutu. 19 Kambe Mariya a txi ti vekisa totshe timhaka tiya ni ku a txi zumba a txi alakanyisisa ngu tona. 20 Ngu toneto, vadyisi vale va to bonga Txizimu ni ku txi dhumisa ngu totshe ati va nga ti pfa ni ku ti wona, ve mahisa nga ti va nga ti gelisilwe tona.

21 Ku di pindile 8 wa masiku va to m’yisa wukwerani, se va to m’ninga ditina do i Jesu, i ku ditina adi a nga raywa ngu ngilozi, na Mariya a si se mana txirumbu.

22 Ku di hokile mbimo yo ve ya ti basisa ngu kuya ngu Mlayo wa Mosi, va to tsula Jerusalema kasi ku ya m’kombekisa ka Jehovha.* 23 Nga ha ti nga bhalwa ka Mlayo wa Jehovha* to: “Matiwula otshe a mazambi* ma fanete kuningelwa ka Jehovha.”* 24 Va to ya ningela digandelo nga ha Mlayo wa Jehovha* wu rumako ngu kona wu txi: “Matuva mambidi mwendo situvani simbidi.”

25 Jerusalema ku ti ni wamwamna a nga txi dhanwa ku i Simiyoni, wamwamna eneyo a ti lulamile ni ku a txi thava Txizimu. Ene a txi rinzela mthaveleli wa ditiko da Israyeli ni ku moya wo sawuleka wu ti ni nene. 26 I si nga eto dwe, ene a ti xawutetwe ngu moya wo sawuleka ti to a si na kufa a si se kuwona Kristu awu a nga sawulwa ngu Jehovha.* 27 Se ene a to tsula dithempeleni ngu kususumetwa ngu moya wo sawuleka, kona kheya Josefa ni Mariya va to teka Jesu ve bela nayo kasiku ti mahwa ati i nga ti mtoloveto wa kona ngu kuya ngu Mlayo. 28 Simiyoni a to teka mwanana e m’nõla ngu manza, e dhumisa Txizimu a txi khene: 29 “Se awe Mkoma wa hombe, akuwa ni nga wona mwanana wuwa ngu ku ya ngu ti u nga wombisa tona, konkuwa ni nga fa ngu kurula. 30 Nguko maso angu ma woni nzila yako yo ponisa, 31 nzila ayi u nga yi lulamisela vathu votshe va txi ti wona, 32 i ku liwoningo ali li thavisako mphume ka vathu va matiko, i ku li li phatimako ka vathu vako va ka Israyeli.” 33 Se tate ni mame wa txibhebhetana va txi xamala ngu ti vathu va nga txi womba ngu txona. 34 Se Simiyoni a to va katekisa e tshumela e gela Mariya, mame wa txibhebhetana a txi khene: “Mwanana wuwa i na va kuwuka ni kuwa ka vathu vo tala amu Israyeli, ni ku a na va txikombiso atxi vathu vo tala va no txi kaneta. 35 Se awe Mariya u na tholwa ngu ditxhari da hombe kasiku ati ti ku timbiluni ka vathu va vangi ti wonwa.

36 Ku ti ni wamsikati wo kari i nga ti mprofeti a nga txi dhanwa ku i Ana, mwanana wa Fanuweli, wa lixaka la Aseri. Wamsikati wule a ti txhadhile ni mwamna wakwe ve hanya votshe 7 wa malembe dwe e gwita e felwa, ene se a ti kumbile 37 ni ku a ti ni 84 wa malembe. U si m’pwati dithempeleni a txi thumela Txizimu wusiku ni mitshikari ni kujejuwara ni ku maha mikombelo. 38 Ka mbimo yile a to tshuketela mwanana e khata kubonga Txizimu ni kuwomba-womba ngu mwanana ka votshe vale va nga txi emela kukhululwa ka Jerusalema.

39 Se mbimo yi va nga gwita kumahetela totshe ta Mlayo wa Jehovha,* va to tshumela Galileya ve ya didhoropani kwawe ka Nazareta. 40 Se mwanana a txi kula ni kutala ngu wuzivi ni ku a txi ya masoni a txi tsakelwa ngu Txizimu.

41 Dilembe ni dilembe, vaveleki va Jesu va txi tolovela kuya Jerusalema ka m’buso wa Paxkwa. 42 Mbimo yi a nga ti ni 12 wa malembe, va to ya ka m’buso ngu kuya ngu mtolovelo. 43 Mbimo yi m’buso wu nga gwita, va to teka nzila yo wuya mtini, se Jesu a to sala Jerusalema, kambe vaveleki vakwe va sa ti tumbula. 44 Vona va to tsimbila mpfuka wo dingana ditshiku na va txi pimisa ti to a ka mtxawa wa vale va nga txi tsimbila navo, se va to khata ku m’xola ka maxaka ni ka va va nga txizivana navo. 45 Kambe vona kha va m’mana, se va to tshumela ve ya Jerusalema ve ya m’xoletela. 46 Ku di pindile masiku mararu va txi m’xola, va to ya m’mana dithempeleni a di khalahatshile hagari ka vagondisi, a txi va engisela ni ku va maha siwotiso. 47 Kambe votshe ava va nga txi mu engisela va txi xamala ngu nzila ayi a nga txi pfisisa ngu yona ni tixamulo takwe. 48 Mbimo yi va nga m’wona, va to xamala ngutu, se mame wa kona a to khene: “Mwanangu, u hi mahete txani tiya? Phela ani ni tate wako hi xanisekile ngutu para kuza hi ku mana.” 49 Se ene a to va xamula a txi khene: “Ngu kutxani mi txi ni lavetela, kani? Kha mi ti zivi ti to ani mi ngo ni mana nyumbani ka Tate wangu, kani?” 50 Hambiketo, vona kha va ti pfisisa ati ene a nga txi va gela tona.

51 Ene a to tshumela navo Nazareta ni ku a to simama e ti veka hahatshi kwawe. Mame wakwe a txi vekisa kha kwati totshe timhaka tiya mbiluni kwakwe. 52 Jesu a txi kula ka wuzivi ni tshemo* yakwe, ni ku a txi dhundwa ngu Txizimu ni ngu vathu.

3 Ka dilembe da wu 15 da kufuma ka Khezari Tibheriyo, mbimo yi Ponsio Pilato i nga di mkoma wa Judheya, Herodha i di Adhimixtradhori wa ditiko da Judheya, mkoma wakwe Filipi i di Adhimixtradhori wa ditiko da Itureya ni Trakonita ni ku Lisaniya i di mkoma wa ditiko da Abhileni. 2 Ka masiku a tinduna ta vaprista Anasi ni Kayifasi, dipswi da Txizimu di tile ka Johani mwanana wa Zakariya, mbimo yi a nga di txiwulani.

3 Se ene a to tenderuka otshe matiko a Jordhani, e txhumayela ti to vathu ve bhabhatiswa, kasi ku ve kombisa ku ti sola ka sionho sawe ve mana kudivalelwa. 4 Nga ha ti nga bhalwa ngu kona ka mapswi a mprofeti Isaya aya ma ku kha ona: “Kupfala dipswi txiwulani di txi: ‘Lulamiselani nzila ya Jehovha basisani tinzila takwe. 5 Otshe maphala a tinzilani ma fanete kuvhaletelwa, yotshe mimango ni sotshe situnga si fanete kunivhelarwa,* totshe tinzila ti ti nga jika-jika ti fanete kululamiswa ni totshe tinzila to khwela ti fanete kubasiswa. 6 Votshe vathu va na kuwona kuhanyisa ka Txizimu’”*

7 Se Johani a txi gela txitshungu atxi txi nga txi tshuketela kwakwe kasi kuta bhabhatiswa a txi khene: “Anu vanana va timamba, mi getwe ngu mani ti to mi na huluka ka kuloviswa ku ku tako kani? 8 Ngu toneto, kombisani mithumo ya ku ti sola kwanu, mi nga ti geleni mi txi khanu: ‘Athu hi vanana va Abrahamu.’ Nguko na mi gela to Txizimu txi nga si kota kutxitxa marigwi yawa me va vanana va Abrahamu. 9 Ngu ditshuri ditxhapu di to gee hahatshi ka mndonga. Yotshe mindonga ayi yi si velekiko mihando ya yinene yi na gangwa yi hiswa.”

10 Se txitshungu txi to m’wotisa txi txi kha txona: “Hi fanete kumaha txani”? 11 Se ene a to va xamula a txi khene: “Awule a ku ni mabhaji mambidi* a na abane ni wule a si ngako ni txilo ni wule a ku ni sakudya nene a na mahe toneto.” 12 Hambi vakhupisi va txi tsula kasi ku ve ya bhabhatiswa va txi m’wotisa va txi kha vona: “M’gondisi hi fanete kumaha txani?” 13 A to khene kwawe: Mi nga hakeliseni* vathu resa yo pinda yi yi nga vekwa.” 14 Se masotxhwa ni ona ma txi m’wotisa ma txi kha ona: “Hi fanete hi maha txani?” Ene a to ma xamula a txi khene: “Mi nga xaniseni vathu* vo mbi na mnando ni ku mi nga lumbeti makuhu m’thu, kambe tsakani ngu si mi si manako.”*

15 Aku vathu va nga txi emela Kristu, va txi pimisa timbiluni kwawe ti to ti nga maha Johani i di ene Kristu. 16 Se Johani a to gela votshe a txi khene: “Ani ni mi bhabhatisa ngu mati ngu mhaka ya ku mi ti solako ka sionho sanu. Kambe awu a no gwita e ta, a ni mtamo ku ni pala, nem kha ni faneleki kutxhatxha tingoti ta masandaliya yakwe. Ene a na mi bhabhatisa ngu moya wo sawuleka ni mndilo. 17 Ene a nõte difoxola dakwe da makwasa ti to e hula ngu dona fulaho, futhi a na basisa wukhalo wo hulela ka wona. A na sengeleta fulaho txisangalani kwakwe, kambe matshanga a kona a na ma hisa ngu mndilo awu ti si kotekiko ku wu tima.”

18 Ngu toneto Johani a txi ningela silayelo sa singi ni kusimama e txhumayela mahungu ya manene ka vathu. 19 Kambe Johani a txi sola Herodha adhimixtradhori wa dhistritu, ngu mhaka ya Herodhiya msikati wa mkoma wakwe ni ngu timhaka totshe to biha a ti Herodha a nga ti mahile. 20 Ngu toneto, Herodha a to engetela wubihi wakwe ngu kubeta Johani jele.

21 Se Johani a bhabhatisile vathu vavangi e tshumela e bhabhatisa ni Jesu, mbimo yi a nga txi khongela nzuma yi to tuleka. 22 Se moya wo sawuleka wu to txhika txitimwi kwakwe wu txi nga dituva se ku to pfala dipswi do ta ngu nzumani di txi kha dona: “Awe u Mwanana wangu, khoni-khoni yangu, na xalala ngu ngawe.”

4 Se Jesu a to tala ngu moya wo sawuleka, e khukha Jordhani, se wona wu to m’yisa txiwulani. 2 Ene a to heta 40 wa masiku, a txi dukwa ngu Dhawulosi ka masiku oneyo ene a si dyi txilo. Se ku di pindile 40 wa masiku, a to pfa nzala. 3 Dhawulosi a to khene: “Ngako awe u di Mwanana wa Txizimu hi nga gela marigwi yawa me maha sakudya.” 4 Aniko Jesu a to xamula a txi khene: “Ti bhatwe ti to m’thu kha hanyi ngu sakudya basi.”

5 Sathani a to tshumela e m’teka e m’yisa ka mmango wo lapha ngutu e ya m’komba otshe matiko a hamafuni. 6 Se Sathani a to khene: “Ni na ku ninga wotshe wukoma, wudhumo ni mifumo, nguko si manzani kwangu, ni ninga awu ni m’lavako. 7 Ngu toneto, ngako u txo khizama u ni khozela kumweko dwe ni na ku ninga sotshe siya. 8 Se Jesu a to m’gela ku khene: “Ti bhatwe to u fanete kukhozela Jehovha* Txizimu txako, ngene basi u fanelako ku m’mahela mthumo wo sawuleka.’”

9 Se a to m’teka e m’yisa Jerusalema, e mu emisa txitimwi khe ka dithempele, a txi khene: “Ngako u di mwanana wa Txizimu ti rinze hahatshi hawa, 10 nguko ti bhatwe to: ‘Ene a na rumela tingilozi takwe kasi ku ti ta ku vhikela, 11 tona ti na ku khamukela ngu manza kasi ku u si gumuli hambi mnenge wako ka dirigwi.’” 12 Jesu nene a to khene: “Ti wombilwe ti to u nga thuki u duka Jehovha* Txizimu txako.” 13 Se msana kova Sathani a di m’dukile a to khukha kwakwe e ya emela mbimo yimwani ya yinene yo e m’duka ngu yona.

14 Se Jesu ngu kususumetwa ngu moya wo sawuleka a to tshumela e ya Galileya. Mahungu a manene mayelano ni nene ma to hangalaka ka dotshe ditiko ni makhalo mamwani. 15 Ene a to khata kugondisa masinagogani kwawe ni ku vathu votshe va txi m’xonipha.

16 Se ene e to tsula Nazareta, amu a nga kulela kona. Ngu Sabata a to tsula disinagogani nga ha i nga ti mtolovelo wakwe, se a to ya khukha e ema kasi ku e lera. 17 Va to m’ninga dibhuku da mprofeti Isaya, se a to tula e mana aha ku nga ti bhatwe ti to: 18 “Moya wa Jehovha* wu txitimwi kwangu, ene a ni sawute kasi kuhuwelela mahungu a manene ka sisiwana, a ni rumete kasi ku ta huwelela ni kutxhumayela kukhululwa ka va va nga sungwa, ni kumaha ti to maso a mabhofu me tshumela me wona ni kuhanyisa ava va xaniswako, 19 ni kutxhumayela ti to i mbimo yo Jehovha* e hanyisa vathu.”* 20 Neti a nga gwita a to vhala dibhuku e di ningela ka vawoneleli e gwita e ya khalahatsha, votshe va nga ti disinagogani va txi m’wonetela. 21 Se ene a to khene: “Mapswi a m’bhalo awu mi nga wu pfa nyamsi se ma tatisekile.”

22 Se votshe va to khata kuwomba-womba kwati ngu ngene ni kuxamaliswa ngu mapswi o tangalisa aya a nga txi ma womba. Vona va txi kha vona: “Ina hi nga mwanana wa Josefa wuwa?” 23 Se ene a to va xamula a txi khene: “Na ti ziva ti to mi na ni gela diwombo adi di ku: ‘Dhokodhela ti hanyise upune. Ati hi nga ti pfa to u ti mahile Kapernawume ti mahe kambe amuwa ditikoni kwako.’” 24 Se ene a to khene kwawe: “Na mi gela ditshuri ni txi khani: Kha ku nga ni mprofeti wammweyo awu a amukelwako ditikoni kwawe. 25 Kambe ani na mi gela ditshuri ni txi ku ti ni tinoni* ta tingi ditikoni ka Israyeli ka masiku a Elija, mbimo yi nzuma yi nga vhaleka ku si wi mati kudingana malembe mararu ni 6 wa mitxima ku va ni nzala ya hombe ditikoni kotshe. 26 Hambiketo, Elija kha rumelwa ni ka mmweyo wa vavasikati vonevo, kambe ene a rumetwe ka wamsikati wo felwa ngu wamwamna khe Serepta ditikoni ka Sidhoni. 27 Ni ku kambe ku ti ni vathu vo tala va tshekela ditikoni ka Israyeli ka mbimo ya mprofeti Elixa, hambiketo, kha ngaho a nga basiswa, ku to basiswa Nahamani dwe awu wa M’siriya.” 28 Votshe vale va nga ti disinagogani mbimo yi va nga ti pfa va to henya ngutu. 29 Se vona va to khukha ve m’ruruvisa ve m’humisa hahanze ka didhoropa, ve m’yisa hafuhi ni mmango amu di manekako kona didhoropa dawe. 30 Kambe Jesu a to pinda ngu hagari kwawe e tsula.

31 Ene a to relela e ya Kapernawume i ku didhoropa da Galileya. A txi va gondisa ngu Sabata. 32 Se vathu va to xamala ngutu ngu kupfa magondiselo akwe, nguko ene a txi va gondisa timhaka ta Txizimu. 33 Se disinagogani ku ti ni wamwamna wo kari a nga ti ni didhimoni, ene a to kwangula a txi khene: 34 “Hi to ku onhela txani awe Jesu wa Nazareta? U tete ku ta hi lovisa kani? Ani na ti ziva bhem to ngawe mani, awe u Msawuleki wa Txizimu.” 35 Kambe Jesu a to di bhongela a txi khene: “Malala, u tshumela u huma kwakwe.” Msana ko m’rinza hahatshi, didhimoni di to huma kwakwe di sa m’dayisa. 36 Ngu toneto, votshe va to xamala ve gelana tiya: “Hi nga wona mtamo wa mapswi akwe, ene wa sikota ni kubhongela ni madhimoni me huma.” 37 Se nduma yakwe yi txi hangalaka madhawani kotshe ka ditiko.

38 A di humile disinagogani a to ya mtini ka Simoni, mkokati* wa Simoni a ti ni feveri ya hombe, se va to m’kombela ti to e m’vhuna. 39 Ene a to nama e m’hanyisa ka feveri. Ngu toneto, a to tekela kuwuka e khata ku va thumela.

40 Mbimo yi di nga swa, votshe vathu ava va nga ti ni malwati a tixaka-xaka va to tekwa ve yiswa kwakwe. Se ene a to va txhateka manza e hanyisa votshe. 41 Madhimoni ni ona ma txi huma ka vavangi ma txi kwangula ma txi kha ona: “Awe u Mwanana wa Txizimu.” Kambe ene a txi ma bhongela a si ma leki me womba-womba, nguko ma txi ti ziva to ene i ti Kristu.

42 Mbimo yi di nga txa, Jesu a to khukha e ya ka wukhalo wakwe ekha. Aniko txitshungu txi to tsimbila txi mu lavetela kala kuza txi mu mana aha a nga ti kona. Va to m’tsimba to a si tsuli e va siya. 43 Kambe ene a to khene: “Ni fanete kutsula ni ya huwelela mahungu a manene a Mfumo wa Txizimu ka mamwani matiko, nguko ngu ti ni nga rumelwa tona.” 44 Se ene a to simama e txhumayela masinagogani ka Judheya.

5 Ka dikhambi dimwani Jesu a di mabambe ka mnambo wa Genezareta, txitshungu txi to kamana txi txi lava kupfa dipswi da Txizimu. 2 Ene a to wona tingalava timbidi ti di vekilwe mabambe ka mnambo, vanyane va kona va ti humile ve kuwula tikoka tawe. 3 Ene a to bela ka yimweyo ya ti ngalava ayi i nga ti ya Simoni, e m’kombela ku e yi txhovhanyana matini, se a to zumba mu ka ngalava e khata kugondisa txitshungu. 4 Mbimo yi a nga gwita kuwomba-womba a to gela Simoni a txi khene: “Tsula hagari ka mati* u ya beta tikoka tako u na daya sihaka. 5 Se Simoni a to m’xamula a txi khene: “M’gondisi, hi thumile wusiku wotshe kha ha mana txilo, kambe aku u ni rumako na tsula ni ya beta tikoka.” 6 Mbimo yi va nga maha toneto vona va to mana sihaka sa singi aha koza tikoka tawe ti lava ni ku vharuka. 7 Se va to dyoweta vangana vawe va nga ti ka yimwani ngalava ti to va ta va vhuna. Mbimo yi va nga hoka va to tata tingalava totshe ta timbidi aha koza ti lava kubhwa-bhwamela. 8 Mbimo yi Pedro a nga wona toneto a to khizamela Jesu a txi khene: “Mkoma tsula kule ni nani ngu ku ani ni muonhi.” 9 Nguko Simoni ni va a nga ti navo va to xamala ngutu, ngu mhaka ya m’tengo wa sihaka si va nga ti si mane. 10 Hambi Jakobe ni Johani vanana va Zebhedhewu, ava va nga txi thuma kumweko ni Simoni ni vona va xamate, se Jesu a to khene ka Simoni: “U nga thave nguko kukhukhela ka konku u na phasa* vathu.” 11 Ngu toneto va to humesa tingalava matini ve siya sotshe ve m’londisa.

12 Ka dikhambi dimwani a di ka dimwedo da madhoropa, ku to ta wamwamna a nga ti pometwe ngu tshekela, mbimo yi a nga wona Jesu a to khizama, mbanza yakwe yi gwesa hahatshi a txi m’kombela a txi khene: “Mkoma, ngako u txi ti lava u nga ni basisa.” 13 Se Jesu a to nawuluta diwoko dakwe e gwesa wule wamwamna a txi khene: “Na ti lava! Basiswa.” Neti a nga womba toneto tshekela yi to hangalaka. 14 Se ene a to m’ruma to a si geli vamwani, e engetela a txi khene: “Kambe tsula u ya ti kombekisa ka mprista, u humisa mningelo wa kubasiswa kwako awu wu nga gemwa ngu Mosi kasiku ve ti wona.” 15 Hambiketo, mahungu mayelano ni Jesu ma to simama me hangalaka ni ku txitshungu txa hombe txi txi sengeletana ti to txi mu engisela ni ku hanyiswa malwati awe. 16 Kambe, ene a txi tolovela kuya txiwulani e ya khongela.

17 Ka dimwani ditshiku na a txi gondisa, Vafarisi ni vagondisi va Mlayo vo ta ngu ka sotshe sidhoropana sa Galileya, Judheya ni Jerusalema va ti khalahatshile koneho. Se mtamo wa Jehovha* wu ti ni nene kasiku e hanyisa vathu. 18 Ku to hoka vavamna vo kari va nga ti rwate wamwamna wa paraliziya ngu ha ka txipadhiyola, vona va to zama ku m’beta mndani ve m’veka aha Jesu a nga di kona. 19 Ngu toneto, aku va nga txi tandeka kubela ngu mhaka ya txitshungu, va to kwela txitimwi ka nyumba, ve releta txipadhiyola ve txi txhikisa masoni ka vale va nga ti hafuhi ni Jesu. 20 Mbimo yi a nga wona likholo lawe a to khene: “He mawe, sionho sako si divaletwe.” 21 Se Vamabhalani ni Vafarisi va to khata kuwomba-wombisana va txi kha vona: “I mani eneyo a rukako? I mani awu a nga divalelako sionho, i si nga Txizimu kani?” 22 Mbimo yi Jesu a nga tumbula ti va nga txi bhula ngu tona a to va xamula a txi khene: “Mo pimisa txani timbiluni kwanu? 23 Ngu tihi ti hehukako: ‘Ku khawe sionho sako si divaletwe mwendo ku khawe khukha u txi tsimbila?’ 24 Ngu toneto, atiya ti maheka kasi ku anu mi txi ti ziva to Mwanana wa M’thu ani mtamo wo divalela sionho hamafuni. Ene a to gela dijaha dile da paraliziya a txi khene: “Konkuwa ani ni khani: Khukha u txi ema u teka txipadhiyola txako u tsula mtini.” 25 Ene a to teka a txi a nga ti otete ka txona e tsula mtini a txi dhumisa Txizimu. 26 Votshe va to xamala ve dhumisa Txizimu va txi thava ngutu, va txi kha vona: “Nyamsi hi woni timhaka to xamalisa.”

27 Mbimo yi a nga txi tsimbila a to wona mkhupisi wo kari a dhanwako ku i Levhi a di khalahatshile ka wukhalo wo hakelisa resa, e m’gela ku khene: “Va na mlondeteli wangu.” 28 Se Levhi a to khukha e leka sotshe si a nga ti naso e khata ku m’londisa. 29 Ene a to m’mahela fexta ya hombe mtini kwakwe, ku ti ni txitshungu txo tala txa vakhupisi ni vamwani a va va nga txi dya kumweko nayo. 30 Se Vafarisi ni vamabhalani va to khata kungungurukela ve gela vagondiswa va Jesu va txi kha vona: “Ngu kutxani anu mi dyako ni kusela kumweko ni vakhupisi ni vaonhi kani?” 31 Kambe Jesu a to khene kwawe: “Ava va si lwaliko kha va lavi dhokodhela, aniko dhokodhela a lawa ngu va va lwalako.” 32 Kha na tela ku ta dhana vo lulama, kambe ni tete vaonhi kasi ku ve ti sola.

33 Va to kha vona kwakwe: “Vagondiswa va Johani va zumbela kujejuwara ni kumaha mikombelo, ava va Vafarisi ni vona va maha toneto, kambe vagondiswa vako vo dya ni kusela.” 34 Jesu a to va gela a txi khene: “Ina mi nga maha ti to vangana va noivho ve jejuwara, na noivho a ti ngadi navo kani?” 35 Kambe ma ta masiku, aya noivho a no tekwa se ve sala vokha, nguyo mbimo va no jejuwara.

36 A to va gela tximwani txidinganiso a txi khene: “Kha ngaho a wilako txiziva txa txiphya e txi runga ka nguwo ya kale, nguko a txi maha eto, txiziva txa txiphya txi na vharula nguwo ya kale ni ku txiziva txonetxo kha txi na mbi kombinara ni nguwo ya kale. 37 Ni ku, kha ngaho awu a thelako vhinya ya yiphya ka misava ya kale, nguko a txi maha toneto vhinya ya yiphya yi na bhanda misava, se vhinya yi thekela ni ku misava yoneyo yi na moxeka. 38 Kambe vhinya ya yiphya yi fanete kuthelwa ka misava ya yiphya. 39 Kha ngaho awu a selako vhinya ya kale e gwita a txi khene: ‘Ni lava ya yiphya nguko a khene: ‘Ya kale ngu yona ya yinene.’”

6 Ngu ditshiku dimwani da Sabata, Jesu a ti ko pinda ngu tithembweni ka trigu, se vagondiswa vakwe va to haphela trigu ve yi phswerusela ngu manza ve dya. 2 Mbimo yi Vafarisi vo kari va nga ti wona va to kha vona: “Ngu kutxani mi txi maha ati ti si tumelelwiko kumahwa ngu Sabata?” 3 Kambe Jesu a to va xamula a txi khene: “Ina kha ma gonda ati Dhavhidha ni vavamna ava a nga ti navo va nga maha mbimo yi va nga txi pfa nzala kani? 4 Ene a to bela nyumbani ka Txizimu e amukela mapawa a dithempeleni, e dya e ninga ni va a nga ti navo, hambiku eto ti nga si tumelelwi, nguko mapawa eyo ma ti fanete kudyiwa ngu vaprista dwe?” 5 Se a to gwita a txi khene: “Phela Mwanana wa M’thu Mkoma wa Sabata.”

6 Ngu Sabata yimwani ene a to wulela disinagogani e khata kugondisa. Se ku ti ni wamwamna a nga ti khwanyete diwoko da txinene.* 7 Vamabhalani ni Vafarisi va txi wonetela ngutu Jesu kasi kuwona to a na hanyisa m’thu ngu Sabata, kasiku ve mana txivangelo txo m’ninga mnando. 8 Kambe ene a txi ti ziva ati va nga txi pimisa tona, ngu toneto, a to gela wamwamna wule wo khwanyela diwoko a txi khene: “Khukha u ta ema ngu hagari hawa.” Se ene a to khukha e ema. 9 Jesu a to khene: “Ani na mi wotisa ku khani: Ina ta tumelelwa kumaha tatinene mwendo to biha, kuhanyisa mwendo kudaya ngu Sabata kani? 10 Msana ko wona votshe ava va nga ti tiho, a to gela wamwamna wule a txi khene: “Nawuluta diwoko dako.” Se ene a to maha toneto, se diwoko di to hanya. 11 Vafarisi va to kwalala ngu kuhenya ve khata kuluka tipulani to va nga m’maha txani Jesu.

12 Ngu ditshiku dimwani, ene a to tsula ka mmango kasiku e ya maha mkombelo, se a to heta wusiku wotshe a txi khongela ka Txizimu. 13 Mbimo yi di nga swa a to dhana vagondiswa vakwe e sawula 12 wa vona, ava a nga va dhana ku vapostoli, i ku: 14 Simoni, awu a nga tshumela e m’raya ku i Pedro, ni mnanda wakwe Andreya, Johani, Filipi, Bhartolomewu, 15 Matewu, Tomasi, Jakobe mwana Alfewu, Simoni, awu a nga txi ziwa ku mbwa mithumo, 16 Judhasi mwana Jakobe ni Judhasi Iskariyoti awu a nga gwita e m’xavisa.

17 Se ene a to txhika navo e ema ka wukhalo wa ndandala,* ku ti ni vathu va vangi ava i nga ti vagondiswa vakwe ni txitshungu txa hombe txa vathu vo ta ngu Judheya ni Jerusalema ni mabambe ka linene khe Tiro ni Sidhoni, va nga txi tela ku ta mu engisa a txi gondisa ni ku ve hanyiswa ka malwati. 18 Phela hambi ava va nga txi xaniswa ngu madhimoni va txi hanyiswa. 19 Se txitshungu txotshe txi txi lava ku m’gwesa, nguko ku txi huma mtamo kwakwe awu wu nga txi hanyisa votshe.

20 Se ene a to gula maso e wona vagondiswa vakwe a txi khene:

“Anu sisiwana ma tsaka, nguko Mfumo wa Txizimu mbwanu.

21 “Ava va ku ni nzala va tsaka, nguko va na khura.

“Ava va dilako va tsaka, nguko va na sekelela.

22 “Anu mbimo yotshe yi mi vengwako ngu vathu ve mi nyenya ni ku mi ruketela, ve womba-womba kubiha ngu nganu, ngu mhaka ya Mwanana wa M’thu, tsakani. 23 Ngako ti txi maheka toneto, tsakani mi ndaka-ndaka, nguko hakelo yanu nja hombe nzumani, phela ngu tonti ta timweto vakokwani vawe va nga maha ka vaprofeti.

24 “Kambe anu vo ganya mi na ti wona, nguko mi yi mani yotshe hakelo ayi yi mi dinganako.

25 “Anu konkuwa mi nga khura, mi na ti wona, nguko mi na pfa nzala.

Anu konkuwa mi sekako mi na ti wona, nguko mi na pandiseka ni kudila.

26 “Anu mi wombwako ku mi vavanene ngu vathu mi na ti wona, nguko ngu tonti vakokwani vawe va nga txi womba ngu vaprofeti va makuhu.

27 “Kambe, anu mi engiselako ni mi gela khani: Simamani mi randa valala vanu ni kumahela tatinene ava va mi vengelako. 28 Katekisani avale va mi rukako mi khongelela avale va mi txhepetako. 29 Awule a ku pekako mpama, m’ninge dimwani dithama, ni wule a ku tekelako dijasi u nga lambe a txi ku tekela dibhaji ni dona. 30 Votshe avale va ku kombelako so kari va ninge, ni ku ngako m’thu a txi ku honyola so kari m’leke naso.

31 Mahelani vakwanu ati mi lavako ku ni vona ve mi mahela.

32 “Ngako mi txi randa ava va mi randako, mi na wuyelwa ngu txani kani? Nguko hambi vaonhi va va dhunda vangana vawe. 33 Se ngako mi txi mahela ta tinene ava va mi mahelako tatinene, mi na wuyelwa ngu txani kani? Phela hambi vaonhi va maha toneto. 34 Ngako mi txi txenekisa avale va no mi tshumetela, mi na wuyelwa ngu txani kani? Phela hambi vaonhi va txenekisa ka vaonhi kulowe, kasiku ve va tshumetela. 35 Kambe anu simamani mi randa valala vanu ni ku va mahela ta tinene, ni kulombisa mi si rinzeli kuhakelwa, nguko hakelo yanu yi na va ya hombe ni ku mi na va vanana va Nyatxitimwi, nguko ene wa mahela tatinene avale vo mbi ziva kubonga kumweko ni vabihi. 36 Simamani mi kombisa wuxinji kufana ni ku Tate wanu a ku ni wuxinji.

37 “I si nga eto basi, lekani kulamula vamwani kasiku nanu mi si lamulwi; lekani kuninga minando vamwani kasiku nanu mi si ningwi minando. Simamani mi divalela kasiku mi na divalelwa. 38 Vanani ni wuha kasiku nanu mi na hiwa. Va na thela amu ka titshulu* ta tinguwo tanu mpimo wa hombe ngutu, wu nga zindetwa ni ku khusungelwa wu thekelela. Nguko ati mi nõlisako tona vamwani nanu va na mi nõlisa toneto.”

39 A to simama e va gela tximwani txidinganiso a txi khene: “Ina dibhofu di nga ñoleta lisole* dibhofu kulowe? Ngu wumbidi wawe ina kha va na mbi hojomela diphalani? 40 M’gondi kha pali m’gondisi wakwe kambe votshe vale va gondiswako khakwati va na fana ni m’gondisi wawe. 41 Se ngu kutxani u txi wona txizokoro ka diso da mwananu, kuveti awe u ni txigodho ka diso dako kani? 42 U nga sikotisa kutxani kugela mwananu u txi khawe: ‘Ema ni ku thavisa txizokoro disoni kwako, kuveti awe upune khu txi woni txigodho txi ku disoni kwako. M’kanganyisiwe! Khata ngu kuthavisa txigodho disoni kwako, ngu kona se u no sikota kuwona khakwati kuthavisa txizokoro txi txi ku disoni ka mwananu.

43 Nguko kha wu ngaho mndonga wa wunene awu wu velekako mihando yo biha,* nem mndonga wo biha kha wu veleki mihando ya yinene. 44 Nguko yotshe mindonga yi ziwa ngu mihando ya yona. Ngu txikombiso, vathu kha va eluli makuwu ka mindonga ya mipa, nem kha va eluli mauvha ka mindonga ya mipa. 45 M’thu wamnene a humisa ati i ku tatinene ngu txisangalani txa mbiluni kwakwe, kambe m’thu wo biha a humisa to biha ngu txisangalani kwakwe, nguko txisofu txa m’thu txi womba-womba ngu ti ti nga tala mbiluni kwakwe.

46 Se ngu kutxani mi txi ni dhana to ‘Mkoma! Mkoma!,’ kuveti kha mi mahi ati ni mi gelako kani? 47 Votshe vale va tako kwangu ve ta engisa ti ni ti wombako ni kutshumela ve ti maha, ni na mi komba ti to va fana ni mani. 48 Vona va fana ni wamwamna awu mbimo yi a lavako kuaka nyumba yakwe, a khatako ngu kukela maphala a hombe e maha fundasawu ya nyumba yakwe txitimwi ka dirigwi. Se mbimo yi ku tako ndambi, mati me peka nyumba yile ngu mtamo, yona kha ya wa nguko yi akilwe kha kwati. 49 Awu a engisako, kambe a si mahi txilo, a fana ni wamwamna awu a akako nyumba yakwe ka txivhunyi, a si mahi fundasawu. Me ta mati me yi peka yi tekela kuwa, yi wa aha koza yi si nga ni provhetu.

7 Msana ko gwita kuwomba ati nga a txi lava kugela txitshungu, ene a to bela Kapernawume. 2 Ku ti ni txithumi txa mthangeli wo kari wa masotxhwa atxi txi nga txi lwala ngutu ni ku txi ti hafuhi ni kufa. Txithumi txonetxo txi ti dhundwa ngutu ngu nyamne wa txona. 3 Mbimo yi mthangeli wa masotxhwa a nga pfa ku txi wombwa-wombwa ngu Jesu a to rumela madhota o kari a Vajudha, ma txi ya kombela Jesu ti to e ta e ta hanyisa txithumi txakwe. 4 Se vona va to tsula ka Jesu ve ya m’kombela va txi kha vona: “Mkoma ta dingana ku u m’vhuna. 5 Nguko ene wa di dhunda ditiko diya dathu ni ku ngene a nga aka disinagoga dathu.” 6 Se Jesu a to tumela kutsula navo. Kambe mbimo yi a nga ti hafuhi ni mti, komandante wule wa masotxhwa a to rumela vangana vakwe ve ya gela Jesu va txi kha vona: “Mkoma, u nga ti karati, nguko ani kha ni faneleki ti to u ta mtini kwangu. 7 Ngu toneto ni nga ti wona ni si fanelwi kuta kwako Mkoma, kambe womba dipswi dwe se txithumi txangu txi na hanya. 8 Nguko hambi ani ni ni vathu va ni va rumako, ni txi ti lava na gela disotxhwa dangu ni txi: ‘Tsula!’ Di tsula, ni gela dimwani ni txi: ‘Ngono!’ Di ta, ni gela txithumi txangu ni txi: ‘Maha tiya!’ Txi maha. 9 Mbimo yi Jesu a nga pfa tiya a to xamala e tshembereka e wonetela txitshungu atxi txi nga ti m’londisela a txi khene: “Na mi gela ngu ditshuri ku khani, hambi Israyeli kha na mana m’thu wa likholo lo fana ni liya.” 10 Mbimo yi va nga tshumela mtini, va to ya mana txithumi txile txi di hanyisilwe.

11 Msana keto, Jesu kumweko ni vagondiswa vakwe va to khukha ve tsula ka didhoropa adi di nga txi dhanwa ku i Nayimi, kumweko ni txitshungu txa hombe txi nga txi m’londisela. 12 Mbimo yi a nga txi tshuketela hafuhi ni digedhe da didhoropa, a to wona vathu va di rwate m’thu wo fa va txi huma nayo hahanze. Ene i ti mwanana wa mfana awu i nga ti ene ekha mndani ka mame wakwe, futhi mame wa kona a di fetwe ngu mwamna ni ku ku ti ni txitshungu txo tala txa didhoropani txi nga ti m’pangalata. 13 Mbimo yi Mkoma Jesu a nga wona noni yile a to yi pfela wusiwana, se a yi gela tiya: “U nga dile.” 14 A to tshuketa e gwesa txipadhiyola,* ava va nga ti guti va to ema se a njo ku khene: “He mfana, ani ni khani wuka.” 15 Mfana wule wo fa a to wuka e khalahatsha e khata kuwomba-womba, Jesu a to m’ningela ka mame wakwe. 16 Se votshe va to khata kuthava ve dhudhumela ve dhumisa Txizimu, va txi kha vona: “Kuhumelete mprofeti hagari kwathu,” ve tshumela va txi, “Txizimu txi khumbute vathu va txona.” 17 Se thenga ya ti Jesu a nga ti maha yi to hangalaka kotshe Judheya ni ka otshe makhalo ya hafuhi.

18 Se vagondiswa va Johani va to ya m’txhamusela totshe ati Jesu a nga ti maha. 19 Ngu toneto Johani a to dhana vagondiswa vakwe va vambidi e va rumela ka Mkoma kasi ku ve ya m’wotisa ku kha vona: “Ina ngawe hi nga thembiswa ku u nata mwendo hi fanete kurinzela mmwani kani?” 20 Mbimo yi va nga hoka vavamna vale va to kha vona: “Johani M’bhabhatisi a hi rumete kwako Mkoma kasi ku ta kuwotisa tiya: ‘Ina ngawe hi nga thembiswa ku u nata mwendo hi fanete kurinzela mmwani kani?’” 21 Ka yona mbimo yile ene a to hanyisa vathu vo tala ka malwati, vathu vo lwala ngutu, va mimoya ya nzambwa, ni ku mabhofu ma to tshumela me wona. 22 Se Jesu a to va xamula a txi khene: “Tsulani mi ya gela Johani a ti mi nga tipfa ni ti mi nga ti wona ngu maso anu, mabhofu ma wona, silima sa tsimbila, tshekela ya basiswa, maphanzeve ma engisa, vakufa va wuswa ni ku mahungu a manene ma txhumayelwa ka sisiwana. 23 Awule a no mbi mana txivangelo txo ni kana-kana* a na tsaka.”

24 Mbimo yi vagondiswa va Johani va nga tsula, Jesu a to khata kuwomba-womba ni txitshungu mayelano ni Johani a txi khene: “Mbimo yi mi nga tsula txiwulani mi txi ya wona txani? Ina mi txi ya wona litshava ali li nga txi zinginiselwa ngu moya? 25 Se mi txi ya wona txani? Ina mi txi ya wona wamwamna awu a nga ambala siambalo so tshura? Phela ava va ambalako siambalo so phatima ni kuhanya do thamba va zumba tinyumbani ka wukoma. 26 Se mi txi ya wona txani kheya? Mi txi ya wona mprofeti, hi nga tona? Ani na mi gela ku khani, awule mi nga m’wona wa pinda hambi ni mprofeti. 27 Eyo nguyo ti nga bhalelwa ene to: ‘Wona! Na rumela m’thu masoni kwako, awu a no thangela kasiku e kululamisela nzila. 28 Ani na mi gela ku khani: Ka votshe ava va nga velekwa hamafuni, kha ngaho wa hombe kupinda Johani. Kambe awule i ku wa m’dotho ka Mfumo wa Txizimu mbwa hombe ku m’pinda. 29 (Mbimo yi va nga tipfa toneto, votshe vathu ni vakhupisi va to huwelela ti to Txizimu txi lulamile, nguko va ti bhabhatisilwe ngu bhabhatiso ya Johani. 30 Nguko Vafarisi ni vagondisi va Mlayo va si khatali ngu ti Txizimu txi nga ti ti lava kwawe, nguko va sa bhabhatiswa ngu ngene.)

31 “Ni nga va fananisa ni mani vathu va nguva yiya, ni nga khani va fana ni mani? 32 I nga tile ta vanana va di khalahatshile merkadhu ve dhana vanana kulowe va txi: ‘Hi mi txhayete muzika ngu misengele, kambe kha ma sinya, hi dite kambe anu kha ma dila. 33 Ngu kufana mbimo yi Johani a nga ta a si dyi dipawa nem a si seli vhinya mi ti khanu: ‘Ani didhimoni.’ 34 Mwanana wa M’thu wa dya ni kusela kambe mi khanu: ‘Hi nga wonani nyalimito wuwa, didevi do sela ngutu vhinya, mngana wa vakhupisi ni vaonhi.’ 35 Hambiketo wuzivi wu ti komba ngu mithumo ya wona.”*

36 Mmweyo wa va Vafarisi a txi m’kombela ngu kusinzisa ti to e ya susula mtini kwakwe, se ene a to bela nyumbani ka Mfarisi wule e khalahatsha ha mezani. 37 Wamsikati wo kari a nga txi ziwa ngutu didhoropani to txionhi, mbimo yi a nga ziva to Jesu a ti mtini ka Mfarisi wo kari, a to teka difraxku* da alabhastru di nga ti ni mafura o bhumula. 38 Ene a to khizama msana minengeni ka Jesu e khata kudila e m’nakanisa minenge ngu mirongo yakwe a txi yi bahulela ngu misisi yakwe e tshumela e nyuta minenge yakwe ni ku m’tota mafura ale o bhumula. 39 Mbimo yi a nga wona toneto Mfarisi wule a nga ti m’rambile a to pimisa tiya: “Dijaha diya i ti ku ngu ditshuri do va mprofeti di ndi na ti ziva ti to awu wamsikati a zumbisile kutxani, nguko ene txionhi.” 40 Ngu toneto Jesu a to khene Simoni ni lava ku kugela to maha se ene a to khene: “Womba M’gondisi!”

41 Ku ti ni majaha mambidi ma nga ti dhevha dijaha do kari di nga txi lombisa timale, mmweyo a txi dhevha 500 wa madhenari, mmwani a txi dhevha 50. 42 A ku va nga si nga ni male yo m’hakela ene a to divalela votshe. Se i mani kwawe awu a no m’dhunda ngutu? 43 Simoni a to xamula a txi khene: “Ni pimisa to ngu wule a nga txi m’dhevha male ya yingi.” Se ene a to khene: “Ngu tona, khwa phazama”. 44 Ene a to tshembereka e wonetela wule wamsikati a gela Simoni a txi khene: “Wa m’wona wamsikati wuwa? Ani ni bete mtini kwako, kambe khwa ni ninga mati o samba minenge, kambe awu wa wamsikati, a nakanisile mikondo yangu ngu mirongo yakwe e yi bahulela ngu misisi yakwe. 45 Awe khwa ni nyuta, kambe wamsikati wuwa kukhukhela mbimo yi ni nga bela hawa ene kha ema kunyuta mikondo yangu. 46 Awe khwa tota mafura ka msungo wangu, kambe awu wamsikati ani totile mafura o bhumula mikondoni kwangu. 47 Ngu toneto na mi gela ku khani, hambiku sionho sakwe i ku sasingi si divaletwe nguko ene a kombisile lirando la hombe. Awu a divalelako ka kudotho lirando lakwe nda lidotho.” 48 Se Jesu a to khene kwakwe: “Sionho sako si divaletwe.” 49 Se avale a nga txi dya navo hamezani va to khata kugelana va txi kha vona: “I mani ene wuwa wo hambi sionho wa divalela?” 50 Kambe Jesu a to gela wule wa msikati a txi khene: “Likholo lako li ku hanyisile, tsula ngu kurula.”

8 Msana ka mbimonyana, ene a to khata kutsimbila ngu didhoropa ni didhoropa ni ka txidhoropana ni txidhoropana, e txhumayela ni kuhuwelela mahungu a manene a Mfumo wa Txizimu, a ti ni va va 12, 2 kumweko ni vavasikati vo kari va nga ti hanyisilwe ka madhimoni ni ka malwati mamwani. Mmweyo wawe i ti Mariya a nga txi dhanwa ku i Magdhala awu ku nga khukha kwakwe 7 wa madhimoni, 3 ni Joana msikati wa Kuza muwoneleli wa nyumba ya Herodha, ni Suzana ni vamwani vavasikati ava va nga txi va vhunetela ngu silo sawe.

4 Mbimo yi txitshungu txa hombe txi nga ta txi ta ti pata ni vale va nga txi ta kwakwe va txi khukhela madhoropani, a to khata kugondisa ngu kuthumisa txidinganiso a txi khene: 5 “Mphayi wo kari a to huma e ya kuphayani ka mbewu yakwe. Mbimo yi a nga txi phaya, timbewu timwani ti wete hanzila ti kandetelwa, se sinyana si to dya. 6 Timwani ti to wa ka marigwi, msana ko mila ti to oma, nguko ku si nga ni thomu.* 7 Se timwani timbewu ti to wela ka mwasi wa mipa, se mwasi wule wu nga kula nato wu to ti kura. 8 Kambe timbewu timwani ti to wela ka mafu a manene, msana ko mila ti to veleka 100 wa mihando. Msana ko womba tiya ene a to kwangula a txi khene: “Awu a ku ni tinzeve, a na engise.”

9 Kambe vagondiswa vakwe va to m’wotisa to txidinganiso txile txi txi lava kuwomba txani. 10 Ene a to va gela ku khene: “Anu mi ningilwe kupfisisa sihunja so sawuleka sa Mfumo wa Txizimu, aniko ava vamwani va gondiswa ngu kuthumisa sidinganiso kasi ku hambi va txi tula maso, va si woni txilo, ni ku hambi va txi engisa va si pfisisi txilo. 11 Txhamuselo ya txidinganiso ngu yiya: Mbewu dipswi da Txizimu. 12 Ati ti nga wa hanzila ngu vale va engisako dipswi, kambe Dhawulosi e ta thavisa dipswi timbiluni kwawe, kasiku va si kholwi ve mana kuhanyiswa. 13 Atile ti nga phaywa ka marigwi ngu vale va engisako dipswi ve di amukela ngu litsako, kambe kha va mili mikuluti. Vona va kombisa kukholwa ngu mbimonyana, kambe ngu mbimo ya siduko vona va hambuka. 14 Atile ti wako hagari ka mwasi wa mipa, ngu vale va engisako, kambe ve khulumetwa ngu kuvilela ngu sa mafu yawa, ni ngu kulava kuganya ni kutsakisa nyama aha ko za ve kameka va si veleki mihando kala yi vitwa. 15 Atile ti nga wela ka mafu a manene, ngu vale va engisako dipswi ngu mbilu yo lulama ni ya yinene, ve di veketa ve gwita ve veleka mihando ngu kutimisela.

16 “Kha ngaho awu a layithako dilambu e tshumela e di fenengeta mwendo ku di veka hahatshi ka m’bhedhu, aniko a di veka txitimwi ka txo kari kasi ku ava va wulelako ve wona kuwoninga. 17 Nguko kha txi ngaho atxi txi nga siswa txi no mbi kombiswa, nem kha txi ngaho atxi txi nga siswa bhem txi no mbi ziwa mwendo kutumbulwa. 18 Ngu toneto, riyani nzeve ka ti ni mi gelako, nguko awu a ku naso a na engetelwa simwani, kambe awule a si ngako naso a na tekelwa hambi asi a pimisako to a naso.”

19 Se ku to hoka mame wakwe ni vananda vakwe, kambe kha va ti kota ku m’tshuketela ngu mhaka ya txitshungu. 20 Se va to m’gela ti to: “Mame wako ni vananda vako va khe hahanze va lava kuwonana ni nawe.” 21 Ene a to va xamula a txi khene: “Mame wangu ni vananda vangu ngu va va engisako dipswi da Txizimu ni ku di londisa.”

22 Ka ditshiku do kari, ene ni vagondiswa vakwe va to wulela amu ka ngalava e va gela ku khene: “He tshawunyeteni hi ya mtxhatuko ka mnambo.” Se va to maha toneto. 23 Kambe mbimo yi va nga txi kawunyeta, ene a to otela. Ku to vhutuka txihuhuri txa hombe ka mnambo wule, ngalava yi talelwa ngu mati, se yi khata kubhwa-bhwamela. 24 Va to m’wusa ve m’gela ku kha vona: “M’gondisi, M’gondisi, phela ho lava kufa. Ene a to wuka e kawuka txihuhuri ni linene, se si to ema ku va ni kuzenga. 25 Se ene a to va wotisa ku khene: “Ku hani kukholwa kwanu?” Kambe vona va to telwa ngu dizowa ni kuxamala, ve gelana ku kha vona: “Kasi i mani ene wuwa wo kawuka hambi sihuhuri ni mati si mu engisa?”

26 Se va to hoka mtxhatuko wa madhawa a Gerasa, ku manekako ngu didhawa dimwani ka Galileya. 27 Mbimo yi Jesu a nga huma ngu ngalavani, wamwamna wo kari a nga ti ni didhimoni, a nga txi ta ngu didhoropani a to ya kwakwe. Ku txi pinda mbimo yo lapha a si ambali simaha ni ku a si zumbi mtini, kambe a txi zumba simitera. 28 Mbimo yi a nga wona Jesu a to kwangula e m’khizamela e womba ngu dipswi do guleka a txi khene: “Ni to ku onhela txani awe Jesu Mwanana wa Txizimu Nyatxitimwi kani? Na ku kombela ti to u si ni xanisi.” 29 Nguko Jesu a ti rumile didhimoni dile ti to di huma ka wamwamna wule. Dona di txi zumbela ku m’xanisa ni ku wamwamna wule a txi tolovela kusungwa ngu titxhini mawokoni ni minengeni ni ku a txi wonelelwa, hambiketo a txi bhenula titxhini di m’yisa ka wukhalo wa txiwula. 30 Jesu a to di wotisa ku khene: “Ngawe mani ditina dako?” Dona di to kha dona: “Ngani txikwata,” nguko wamwamna wule a ti beletwe ngu madhimoni o tala. 31 Se ona ma txi m’kombela ti to a si ma toveli me ya ka diphala do hokoma. 32 Ku ti ni mtxhambi wa hombe wa tikhumba ati ti nga txi dyiswa mmangoni, madhimoni ma to m’kombela ti to e ma leka me ya ka tikhumba toneto, se ene a to ma tumelela. 33 Madhimoni ma to huma ka wamwamna wule me ya ka tikhumba, se mtxhambi wule wa tikhumba wu to tutuma wu ya bela matini wu bhwabhwamela. 34 Mbimo yi vafuyi vale va tikhumba va nga wona ati ti nga maheka, va to tutuma ve ya womba mhaka eyo didhoropani ni hahanze ka didhoropa.

35 Vathu va to huma kasi ku ta wona ati ti nga ti mahekile. Mbimo yi va nga txi tshuketela Jesu va to wona wamwamna wule ku nga ti humile 7 wa madhimoni, a di ambate bhem ni ku se ti txi teka a di khalahatshile minengeni ka Jesu, se vona va to thava. 36 Ava va nga ti wona tile va to kontarela vamwani ati wamwamna wule a nga ti ni madhimoni a nga hanyisiswa tona. 37 Se vathu vo tala va ditiko da Vajerasa va to kombela ti to Jesu e khukha hale, nguko va txi thava ngutu se ene a to bela ngalavani e tsula. 38 Wamwamna wule ku nga ti humile kwakwe madhimoni a txi kombela Jesu ti to e simama nayo, kambe ene a to m’tshumeta a txi khene: 39 “Tsula mtini u ya womba-womba ngu ti Txizimu txi nga ku mahela, se ene e to tsula mtini a txi huwelela ka dotshe didhoropa ati Jesu a nga m’mahela.

40 Mbimo yi Jesu a nga wuya, txitshungu txi mu amukete ngu litsako, nguko votshe va ti mu emete. 41 Ku to hoka wamwamna wo kari a nga txi dhanwa ku i Jayiro, wamwamna eyo i ti mthangeli wa disinagoga. Se ene a to khizama masoni ka Jesu, e m’kombela ti to e tsula nayo mtini kwakwe. 42 Nguko mwanana wakwe wa dihorana wammweyo a nga ti ni 12 wa malembe a ti hafuhi ni kufa.

Mbimo yi Jesu a nga txi tsula txitshungu txi txi m’kamareta. 43 Ku ti ni wamsikati awu a nga heta 12 wa malembe a txi lwala ngu malwati a kuhumela mnoha ni ku ku si nga ni m’thu awu a nga si kota ku m’hanyisa. 44 Ene a to tshuketa ngu msana ka Jesu e gwesa titshokani* ka siambalo sakwe, se mnoha wu to tekela kuema kuhuma. 45 Jesu a to wotisa a txi khene: “I mani a nga ni gwesa?” Kha ngaho a nga txi tumela, se Pedro a to khene: “M’gondisi, khu ti woni ti to txitshungu txa ku talela ni ku ku kama kani?” 46 Kambe Jesu a to khene: “Ku ni wu a nga ni gwesa, nguko na ti ziva ti to ku humile mtamo ngu kwangu. 47 Mbimo yi awule wamsikati a nga wona ti to ati a nga maha ti tumbutwe, a to m’tshuketela a txi dhudhumela e khizama, e womba ka votshe ti to ngu kutxani a nga ti mu gwesile ni nzila ayi a nga hanyiswa ngu yona ngu txikuluveta. 48 Kambe, ene a to m’gela ku khene: “Mwanangu, likholo lako li ku hanyisile, tsula ngu kurula.”

49 A txi ngadi a txi womba-womba ku to hoka muemeli wa mthangeli wa disinagoga e ta womba tiya: “Mwanana wako se a fite. U nga xuphi M’gondisi.” 50 Mbimo yi Jesu a nga pfa eto a to m’gela ku khene: “U nga thave, kholwa kwangu dwe, mwanana wako a na hanya.” 51 Mbimo yi va nga hoka mtini, kha tumelela ti to vamwani ve wulela nayo hahanze ka Pedro, Johani ni Jakobe kumweko ni vaveleki va dihorana dile. 52 Kambe votshe va txi dila ni kupeka tihuwa ngu kukarateka ngu mhaka ya dihorana dile, se Jesu a to va gela ku khene: “Mi nga dileni, nguko dihorana diya kha da fa, di to otela. 53 Se va to khata ku m’seka, ve m’poyilela nguko va txi ti ziva ti to dihorana dile di ti fite. 54 Se ene a to di nõla ngu diwoko a txi womba a txi khene: “Dihorana, wuka!” 55 Dona di to wuka di hanya* di tekela kukhukha, se Jesu a to va gela ti to ve di ninga sakudya. 56 Vaveleki vakwe va to tsaka ngutu. Kambe ene a to va kombela ti to va si geli m’thu ati ti nga ti mahekile.

9 Se ene a to dhana ava va 12 e va ninga mtamo wo hinga madhimoni ni kuhanyisa vathu ka malwati. 2 A to va rumela ti to ve ya txhumayela Mfumo wa Txizimu, ni kuhanyisa valwati. 3 E va gela ku khene: “Mi nga longeni txilo ka liendo lanu, hambi ndonga, mkwama wa sakudya, dipawa mwendo male, hambi siambalo so ya txitxa.” 4 Kambe kwalkeri mti mi no bela, zumbani koneho kala kuza mi khukha. 5 Kotshe amu vathu va no mbi mi amukela, mbimo yi mi khukhako didhoropanimo huphutani lithulu mikondoni kwanu kasiku ve ti wona. 6 Se va to khukha ve khata kutxhumayela ngu txidhoropana ni txidhoropana, ve huwelela mahungu a manene ni kuhanyisa vathu ka otshe makhalo.

7 Herodha* adhimixtradhori wa Galileya a to pfa ati ti nga txi maheka, se a to karateka ngutu, nguko vamwani va txi womba to Johani a wusilwe ngu ka vakufa. 8 Kambe vamwani va txi womba ti to i Elija a nga humelela, aniko vamwani va txi womba ti to mmweyo wa vaprofeti va kale a nga wuswa. 9 Herodha a to khene: “Ani ngani ni nga wila msungo wa Johani, i mani eneyo a mahako ati ni ti pfako ti txi wombwa?” Ngu toneto ene a txi lava ku m’wona.

10 Mbimo yi va nga wuya, vapostoli va to kontarela Jesu totshe ti va nga ti mahile, ene a to va teka ve khukha hale va nga ti kona ve ya ka didhoropa di dhanwako ku i Bhetsayidha. 11 Kambe mbimo yi txitshungu txi nga ti ziva txi to m’londisa, ene a to va amukela ngu litsako e khata ku va gondisa ngu ta Mfumo wa Txizimu, ni kuhanyisa ava va nga ti lwala. 12 Mbimo yi di nga swa, ava va 12 va to m’tshuketela va txi ya m’gela ku kha vona: “Gela txitshungu kasiku txi tsula ka sidhoropana ni ka makhalo mamwani a hafuhi kasiku ve ya mana makhalo o otela ni sakudya, nguko aha hi ku kona hi txiwulani.” 13 Kambe ene a to va gela tiya: “Va ningeni anu sakudya.” Se vona va to kha vona: “Kha hi nga ni txilo, ho va ni mtxhanu wa mapawa ni sihaka simbidi dwe, hahanze ko hi txo tsula hipune hi ya xava sakudya kasi ku ta ninga votshe vathu vava.” 14 Ku ti ni kona mu ka 5.000 wa majaha, se Jesu a to gela vagondiswa vakwe a txi khene: “Va geleni ve zumba ngu mitxawa ya 50, 50.” 15 Se vona va to maha toneto, ve kombela ti to votshe ve khalahatsha. 16 Jesu a to teka mapawa yale a mtxhanu ni sihaka sile sa simbidi e wona nzumani e si katekisa, msana keto a to khema e ninga vagondiswa vakwe kasiku vona ve abanisela txitshungu. 17 Se votshe va to dya va txi khura, ve sengeletela asi si nga sala si nga tata 12 wa tithavangu.

18 Ngu msana, mbimo yi a nga txi khongela a di ekha, vagondiswa vakwe va to m’tshuketela, se ene a to va wotisa a txi khene: “Txitshungu txi kha txona ngani mani?” 19 Vona va to xamula va txi kha vona: “Vamwani va womba to u Johani M’bhabhatisi, vamwani va womba to u Elija, ani vamwani va womba ti to u mmweyo wa vaprofeti va kale a nga wuswa.” 20 Se a to va wotisa a txi khene: “Anu ko, mi khanu ngani mani?” Se Pedro a to xamula a txi khene: “Awe u Kristu wa Txizimu.” 21 Msana keto, Jesu a to va kawuka e va gela ti to va si geli m’thu mhaka yiya. 22 Kambe ene a to khene: “Mwanana wa m’thu a na xaniswa ngutu ni kunyenywa ngu madhota, tinduna ta vaprista, vamabhalani, ni kutshumela e dawa, kambe ngu ditshiku da wuraru a na wuswa.”

23 Se ene a to gela votshelele a txi khene: “Ngako m’thu a txi lava ku va m’londeteli wangu a na ti leke e rwala phande* yakwe ya xanisa ditshiku ni ditshiku e ni londisa.” 24 Nguko awule a lwelako kuxayisa wutomi wakwe a na wu luza, aniko awule a luzako wutomi wakwe ngu mhaka yangu a na wu mana. 25 Nguko ti vhuna txani ku m’thu e ganya ditiko dotshe aniko e luzekelwa ngu wutomi wakwe mwendo ku ti lovisa apune kani? 26 Nguko awu a no va ni tingana ngu mhaka yangu ni ngu mhaka ya ti ni ti gondisako, Mwanana wa M’thu nene a na ta va ni tingana kwakwe, mbimo yi a no ta ni wudhumo wakwe ni wa Tate kumweko ni tingilozi to sawuleka. 27 Ngu ditshuri na mi gela ku khani: Hagari kwanu vaho va no mbi fa kala kuza ve wona Mfumo wa Txizimu.”

28 Msana kova ku di pindile 8 wa masiku a di wombile timhaka tiya, Jesu a to teka Pedro, Johani ni Jakobe ve kwela mmangoni kasi ku ya maha m’kombelo. 29 Mbimo yi a nga txi khongela, khohe yakwe yi to txitxa ni ku siambalo sakwe si to basa si txi jaa! 30 Ku to humelela vavamna vambidi va txi bhula nayo, i ti Mosi ni Elija. 31 Vona va to humelela va ti ni wudhumo ve khata kubhula nayo ngu kutekwa kwakwe aku ku no tatiseka Jerusalema. 32 Pedro kumweko ni vale a nga ti navo va to pekwa ngu wukohe, se mbimo yi va nga wuka va to wona wudhumo wa Jesu ni vavamna vale va vambidi va nga ti emile nayo. 33 Mbimo yi vavamna vale va nga txi khukha, Pedro a to gela Jesu a txi khene: “Mgondisi, ta tsakisa ku va hawa se athu hi nga gwimba matenda mararu, dimwedo dako, dimwedo da Mosi ni dimwedo da Elija.” Kambe ene a si ti pfisisi ti to a txi womba txani. 34 A txi nga di a txi womba-womba, direfu di to khata ku va fenengeta. Mbimo yi direfu di nga ti va fenengetile va to thava ngutu. 35 Se ku to pfala dipswi direfuni di txi kha dona: “Awuwa Mwanana wangu awu ni nga m’sawula mu engiseni.” 36 Mbimo yi dipswi di nga txi pfala, Jesu a ti ekha. Kambe otshe masiku yale, vona va to malala nato va si geli m’thu timhaka ti va nga ti wona.

37 Mangwanani ka kona, mbimo yi va nga ti txhika ngu mmangoni, txitshungu txa hombe txi to hingeta Jesu. 38 Se wamwamna wo kari a nga ti ka txitshungu a to kwangula a txi khene: “M’gondisi na kukombela, ngono u ta vhuna mwanana wangu, nguko ngene ekha ni ku nayo. 39 Ku ni didhimoni di m’xanisako e kwangula ta kona ha ni kona ha ni ku didhimoni donedo di m’maha e tshanuka e pupuma mkanani, kha di m’leki di sa khata ngu ku m’dayisa. 40 Ni kombete vagondiswa vako ti to ve di hinga, kambe va ti tandi. 41 Jesu a to xamula a txi khene: “Anu vathu vo biha* vo mbi na likholo, ni na va ni nanu kala mbimo muni ni ku mi timisela kani? M’wuyiseni hawa kwangu.” 42 Mbimo yi a nga txi tshuketela didhimoni dile di to rinza mfana hahatshi e tshanuka, kambe Jesu a to bhongela didhimoni dile e tshumela e hanyisa mfana wule e m’ningela ka tate wakwe. 43 Se votshe va to kayee, ngu kuwona mtamo wa Txizimu.

Mbimo yi votshe va nga txi xamala ngu kuwona a ti Jesu a nga txi ti maha, ene a to gela vagondiswa vakwe a txi khene: 44 “Engisani kha kwati mi khumbula mapswi awa, Mwanana wa M’thu a na ningelwa ka vathu.” 45 Kambe vona va si ti pfisisi ti to a ti lava kuwomba txani, nguko va ti sisetwe timhaka tiya kasiku va si ti pfisisi, kambe va txi thava ku m’wotisa mhaka yiya.

46 Se va to khata kukanetisana ngu txawe ve lava kuziva ti to i mani i nga ti wa hombe kwawe. 47 Aku Jesu a nga txi ziva mialakanyo ya timbilu tawe, a to teka tximwanatana e txi emisa didhawani kwakwe, 48 e va gela ku khene: “Awu a amukelako tximwanatana txiya ngu mhaka ya ditina dangu a amukela ni nani, ni awu ani amukelako a amukela ni Wule a nga ni rumela, nguko awu a ti mahako wa m’dotho ngene wa hombe ka votshe.”

49 Se Johani a to khene: “M’gondisi, hi woni m’thu a txi hinga madhimoni ngu kuthumisa ditina dako, se hi zama ku m’tsimbisa, nguko a si nga kumweko ni nathu.” 50 Kambe Jesu a to khene: “Mi nga m’tsimbeni nguko awu a si lwisaniko ni nanu wa mi seketela.”

51 Aku masiku akwe o e tekwa ma nga txi tshuketela ene a to maha txisungo txo tsula Jerusalema. 52 Se ene a to rumela vamwani ka va gondiswa vakwe kasiku ve ya maha malulamiselo a kuhoka kwawe ni ku vona va to tsula ve phinda ngu Samariya. 53 Kambe Vasamariya kha va mu amukela nguko ene a di ti emisete ku ya Jerusalema. 54 Mbimo yi Jakobe ni Johani va nga wona tiya va to kha vona: “Mkoma u lava ti to hi rumisa mndilo ngu nzumani ti to wu ta va lovisa kani?” 55 Jesu a to tshembereka e va kawuka. 56 Ngu toneto vona va to tsula ka tximwani txidhoropana.

57 Va di ngadi hanzila, dijaha do kari di to khene: “Mkoma ani na kulondisa kotshe mu u yako kona.” 58 Aniko Jesu a to m’gela tiya: “Tingowo ti ni tiphako ni sinyana si ni sisaka, aniko Mwanana wa M’thu kha nga ni ko sisa msungo.” 59 Se ene a to gela dimwani dijaha a txi khene:“Vana m’londeteli wangu.” Se dijaha dile di to kha dona: “Mkoma no kombela kukhata ngu ku ya tshotsha tate wangu.” 60 Kambe ene a to m’gela ku khene: “Leka vafi ve tshotsha vafi vawe, aniko awe tsula u ya huwelela Mfumo wa Txizimu.” 61 Se mmwani a to khene: “Ani ni na kulondisa Mkoma kambe ni tumelele ku khata ni ya satisa va ha mwayani kwangu.” 62 Kambe Jesu a to khene: “Awu a zimako digejo a txi nga ema a wona msana, kha fanelwi ngu Mfumo wa Txizimu.”

10 Msana keto, Mkoma a to sawula vamwani va 70 e va rumela vambidi-vambidi e va thangetisa veya ka dotshe didhoropa ni makhalo ya ene a nga txi lava kuya kona. 2 Se a to va gela a txi khene: “Kuelula ngu ditshuri nga hombe, kambe vathumi vadotho. Ngu toneto, kombelani Nyamne wa kuelula ti to e rumela vathumi ka mthumo wakwe wa kuelula. 3 Tsulani! Kambe ti woneleni, nguko ni mi rumela nga tinvuta hagari ka vanyapwe. 4 Mi nga longeni txipatxhi txa male, mkwama wa sakudya mwendo masandaliya, ni ku mi nga khambiseni thenga m’thu hanzila. 5 Kova ka wuhi mti mi no bela khatani ngu kuwomba tiya: ‘Kurula ku na ve ni nanu.’ 6 Ngako ku di ni m’thu wo dhunda kurula, kurula kwanu ku nave txitimwi kwakwe. Kambe ngako adi walo, kona ku na tshumelela kwanu. 7 Zumbani ka mti wonewo, mi sela ni kudya si va no mi ninga, nguko awu a thumako wa fanelwa ngu m’holo wakwe. Mi nga txitxa-txitxeni miti.

8 “Ni ka dihi didhoropa di mi no bela va txi mi amukela, dyanani asi va no mi ninga. 9 Hanyisani valwati va ku ka dona didhoropa edo mi va gela ku khanu: ‘Mfumo wa Txizimu wu hafuhi kwanu.’ 10 Aniko ka didhoropa dihi ni dihi mi no bela va si mi amukeli, humani mithandani kwawe mi va gela ku khanu: 11 ‘Hi na huphuta hambi lithulu la didhoropa danu li nga namara ka mikondo yathu kasi ku ti va wufakazi kwanu. Kambe zivani ti to Mfumo wa Txizimu wu hafuhi.’ 12 Na mi gela ku khani, ka ditshiku donedo ti na ta panda ngutu ka didhoropa donedo kupinda Sodhoma.

13 “Dikhombo danu anu va Korazini! Dikhombo danu anu va Bhetsayidha! I ti ku mithumo yo xamalisa ayi yi nga mahelwa muwa kwanu yi ti ko mahelwa Tiro ni Sidhoni, vona va di ti sote kale ve ambala masaka ni kuzumba dikhumani. 14 Ngu toneto, ditshiku da kulamulwa di na ta mi pandela ngutu kupinda Tiro ni Sidhoni. 15 Anu ko, Vakapernawume? Ina mi nga pimisa ti to mi na guletwa kala nzumani, phela anu mi ya dithithani.*

16 “Awule a mi engisako, a engisa ni nani. Ni wule a mi eyisako, a eyisa ni nani. I si nga eto basi, awule a mi kanyisako, a kombisa kukanyisa ni Wule a nga ni ruma.”

17 Avale va 70 va to wuya va di tsakile va txi kha vona: “Mkoma, hambi madhimoni ma hi engisa ngu kuthumisa ditina dako.” 18 A to va gela ku khene: “Ni wona Sathani se a di wite hahatshi nga txingwala-ngwanda txa nzumani. 19 Wonani ti to ni mi ningile mtamo wo kandetela minyoka ni tihume, ni kuxula valala ni ku kha txi nga ho txi no mi dayisa. 20 Hambi keto, mi nga tsakeni ngu ku madhimoni ma mi engisako, kambe tsakani nguko matina anu ma bhatwe nzumani.” 21 Ka mbimo yoneyo, Jesu a to tala ngu litsako ni moya wo sawuleka a txi khene: “Na kudhumisa awe Tata, Nyamne wa nzuma ni mafu, nguko u sisile timhaka tiya ka va vo ziva ni kugonda ngutu, kambe u mahile ti to a va va vadotho va kona ve ti pfisisa. Awe Tata, ti mahisa tiya nguko akuwa ngu kona kuranda kwako. 22 Sotshe si ningilwe ani ngu Tate. Kha ngaho wu a zivako Mwanana i si nga Tate. Ni ku kha nga ho wu a zivako Tate i si nga Mwanana ni wule a no gondiswa ngu Mwanana kasiku e m’ziva Tate.”

23 Se a to tshembereka e dhana vagondiswa vakwe ngu didhawa e va gela ku khene: “Va tsaka ava maso awe ma wonako ati anu mi ti wonako. 24 Nguko na mi gela ni txi khani, vaprofeti vo tala ni vakoma va txi ti lava ngutu kuwona ti mi ti wonako, aniko kha va ti wona, va txi ti lava ngutu kupfa ti mi ti pfako, aniko kha va ti pfa.”

25 Se di to ta dijaha do kari di nga txi ziva ta Mlayo di ta m’duka di txi kha dona: “Mgondisi, ngu tihi ti ni fanelako kumaha kasi ku ni mana wutomi wo mbi guma?” 26 Ene a to khene: “Ngu tihi ti nga bhalwa ka Mlayo? U khala ku ti lera?” 27 Ene a to m’xamula a txi khene: “‘Randa Jehovha* Txizimu txako ngu mbilu yako yotshe, ngu wotshe wutomi wako, ngu wotshe mtamo ni ngu otshe mapimo ako’ ni ku ‘randa muakelani wako nga ti u ti randisako tona awe upune.’” 28 A to m’gela ku khene: “U xamute kwati, simama u maha tiya u na mana wutomi.”

29 Ngu kulava ku ti komba ti to ene mbwo lulama a to wotisa Jesu a txi khene: “I mani muakelani wangu?” 30 Jesu a to m’xamula a txi khene: “Wamwamna wo kari a txi relela Jerusalema a txi ya Jeriko, se e manwa ngu makhamba, aya ma nga m’honyola sotshe si a nga ti naso, me m’peka me tsula me m’siya a di tsivate. 31 Ku to maheka ti to ku txi pinda mprista ngu yona nzila yile, kambe mbimo yi a nga m’wona a to m’vayilela. 32 Se ku to pinda M’levhi wo kari a nga txi tsimbila nene ngu nzila yile, kambe mbimo yi a nga m’wona a to m’vayilela nene. 33 Ngu msana ku to pinda kona hale Msamariya wo kari mbimo yi a nga m’wona a to m’pfela wusiwana. 34 A to m’tshuketela e ya bhanditxha silonda sakwe, msana ko si thela mafura ni vhinya. E gwita e m’veka ka mbongola yakwe e mteka e m’yisa ka nyumba yo amukela vapfhumba e m’khatalela. 35 Mangwanani ka kona, a to humisa madhenari mambidi e ninga nyamne wa nyumba e m’gela ku khene: ‘M’khatalele, ngako u txi thumisa male yo pinda yiya, na ta ku hakela mbimo yi ni no wuya.’ 36 Se ka vale va vararu i mani a nga va muakelani wa dijaha dile di nga manwa ngu makhamba? 37 Ene a to xamula a txi khene: “Ngu wule a nga m’mahela wuxinji.” Se Jesu a to khene: “Tsula u ya maha toneto nanawe.”

38 Mbimo yi va nga txi tsimbila, va to wulela ka txidhoropana txo kari. Kona kheya va to ya mana wamsikati a nga txi dhanwa ku i Marta, awu a nga mu amukela mtini kwakwe. 39 Ene a ti ni mnanda a nga txi dhanwa ku i Maria, awu a nga khalahatsha hafuhi ni Mkoma a engisela ti a nga txi womba-womba. 40 Kambe, Marta a ti ñolekile ngu mithumo yo tala. Se a to tshuketa ka Jesu e m’gela ku khene: “Mkoma kha ti ku karati aku mnanda wangu a ni lekako ni thuma mithumo yo tala nokha kani? M’gele e ta ni vhuna.” 41 Mkoma a to m’xamula a txi khene: “Marta, Marta, u vilela ni kukarateka ngu so tala. 42 Kambe kha ku laveki sa singi, hambi i ti kova txa tximwetxo dwe. Maria a sawute txi i ku txa txinene, atxi a no mbi tekelwa ngu m’thu.”

11 Ditshiku dimwani Jesu a ti ka wukhalo wo kari a txi maha mkombelo, mbimo yi a nga gwita, mmweyo wa vagondiswa a to ta a txi khene: “Mkoma hi kombela u hi gondisa kumaha mkombelo kufana ni Johani a nga gondisa vagondiswa vakwe.”

2 Se ene a to va xamula a txi khene: “Mbimo yotshe mi lavako kumaha mkombelo mi na khongelisa tiya: ‘Tata, ditina dako di na basiswe.* Wu na te Mfumo wako. 3 Hi he sakudya sa ditshiku ni ditshiku ngu kuya ngu silaveko sa dona. 4 Hi divalele sionho* sathu, nguko nanathu ha divalela vale va hi gohelako,* ni ku u nga hi leke hi xulwa ngu siduko*.’”

5 Ene a to va gela ku khene: “Alakanyani ngu loko mmweyo wanu a di ni mngana, se e tsula mtini kwakwe hagari ka wusiku, e ya m’gela a txi khene: ‘He mngana, ni kombela u ni lomba mapawa mararu, 6 nguko ni endetwe ngu mngana wangu awu a ku ngadi kuhoka konku, kambe kha ni nga ni txo m’ninga.’ 7 Kambe ene a to xamula a di nyumbani a txi khene: ‘U nga ni karati. Ditimba se di khotilwe ni ku vanana se va otete. Ni nge humi ni kuninga txilo.’ 8 Na mi gela ku khani, ene a na wuka a txi m’ninga sotshe si a si lavako, i si nga nguko i ku mndoni wakwe, kambe ngu mhaka ya kusinzisa kwakwe ni kutsana kwakwe. 9 Ngu toneto na mi gela ku khani, simamani mi kombela mi na ningwa, simamani mi xota mi na si mana, simamani mi peka dhalisensa* mi na tulelwa. 10 Nguko votshe vale va kombelako va ningwa, votshe vale va xotako va si mana, ni votshe vale va pekako dhalisensa va tulelwa. 11 I tate muni awu ngako mwanana wakwe a txi mkombela txihaka a mningako mnyoka kani? 12 Mwendo e mkombela dianda e mninga hume* kani? 13 Ngu toneto, anu hambiku mi ku vabihi ma ti ziva kuninga sa sinene vanana vanu, se kha ni wombi ngu Tate wanu wa nzumani, ene a na ninga moya wo sawuleka avale va m’kombelako.

14 Msana keto, a to hinga ka wamwamna wo kari didhimoni di nga txi m’maha a si womba-wombi. Msana ko didhimoni di huma ka wamwamna wule ene a to khata kuwomba-womba, se txitshungu txi to xamala. 15 Kambe vamwani va txi kha vona: “Ene a hinga madhimoni ngu mtamo wa Bhelzebhule, xefe wa madhimoni.” 16 Vamwani va to m’kombela ti to e maha txidiwukiso txo ta ngu nzumani kasi ku m’duka. 17 Se aku Jesu a nga txi ziva mipimiso yawe, a to va gela ku khene: “Ngako mfumo wo kari wu si na wumwewo wu na xulwa, hambi mwaya awu wu si ngako ni mpfanano wu na wa. 18 Ngu toneto, ngako Sathani a txi ti hinga apune o ti jikela apune, se ti nga kotekisa kutxani ku mfumo wakwe wu tiya? Nguko mi womba ti to ani ni hinga madhimoni ngu mtamo wa Bhelzebhule. 19 Aku mi ku khanu ni hinga madhimoni ngu kuthumisa mtamo wa Bhelzebhule, vanana vanu ko, va wu mana hayi mtamo wo ma hinga? Ngu toneto va no mi lamula ngu tona. 20 Se i di ti to ni hinga madhimoni ngu mtamo wa Txizimu, Mfumo wa Txizimu wu mi hokete.* 21 Ngako wamwamna wa mtamo a di xomile matxhari e wonelela nyumba yakwe, silo sakwe si na va si di xayisekile. 22 Se ngako ku txi ta mmwani wa mtamo ku m’pala e m’dhumela, a nga m’honyola otshe matxhari ya a nga ti ma themba e tshumela e abana ni vamwani a si a nga m’tekela. 23 Awu a si emiko ni nani a kontra ani, awu a si sengeletiko ni nani o hangalasela.

24 Ngako moya wo biha wu txi huma ka m’thu, wona wa tsimbila txiwulani wu lava wukhalo wo ya humula, ngako wu txi wu pwata wona wu khene: ‘Ni na tshumela ni ya mtini kwangu amu ni nga khukhela kona.’ 25 Mbimo yi wu hokako wu ta mana to nyumba yile yi hiyetwe ni ku tshuriselwa. 26 Se wona wu to tsula wu ya teka 7 wa mimoya ya mtamo ngutu kupinda wona, se ngu msana yi to bela yi khata kuzumba haleya. Phela mazumbelo a m’thu eneyo ma na va o biha ngutu kupinda makhatoni.”

27 A txi ngadi a txi womba-womba tiya, wamsikati wo kari a nga ti hagari ka txitshungu a to kwangula a txi khene: “Wa tsaka wamsikati wu a nga ku veleka ni titshumbu ti ti nga ku mamisa.” 28 Kambe ene a to khene: “Ahim-him, awu a engisako dipswi da Txizimu ni ku di xayisa, ngene a tsakako.”

29 Mbimo yi txitshungu txi nga ti sengeletana kwakwe, ene a to khene: “Vathu vava mbathu va wubihi, vona va xola txikombiso kambe kha va na mbi kombwa tximwani txikombiso i si nga txile txa Jona. 30 Nguko kufana ni ku Jona a nga va txidiwukiso ka va Ninivha, Mwanana wa M’thu nene a na va txidiwukiso ka vathu va liveleko liya. 31 Ka ditshiku da kulamulwa, mfumeli wa txisikati wa wulambwe a na ta wuswa e mi komba ti to anu mi vabihi, ni ku va mi di ni mnando nguko a tile ngu magemeta-mitshi kasi ku ta engisa wuzivi wa Solomoni. Kambe ahawa ku ni wo pinda Solomoni. 32 Ka ditshiku da kulamulwa, vahanyi va Ninivha va na ta mi lamula, ve mi ninga mnando nguko vona va tisote mbimo yi Jona a nga txhumayela, kambe ahawa ku ni wo pinda Jona. 33 M’thu kha layithi dilambu e gwita e di veka ka wukhalo wo sisaleka mwendo hahatshi ka txirundu, aniko a di veka txitimwi ka txo kari kasiku ava va wulelako ve wona kuwoninga. 34 Nguko diso dilambu da mmidi. Se ngako diso dako di txi wona bhem, wotshe mmidi wako wu na woninga, kambe ngako diso dako di di ni mabava wotshe mmidi wako wu na va txidemani. 35 Ti wonele ti to kuwoninga ku u ku nako ku si ve txidema. 36 Ngu toneto, ngako wotshe mmidi wako wu txi woninga wu si nga ni txidema, wu na woninga kufana ni dilambu adi di ningako kuwonekela ka dona.”

37 Msana ko womba eto, Mfarisi wo kari a to mkombela ti to e ya dya nayo. Se ene a to bela e ya khalahatsha hamezani. 38 Kambe, Mfarisi wule a to xamala mbimo yi a nga wona to Jesu kha khata ngu kusamba manza* a si nzi kudya. 39 Kambe Mkoma a to m’gela ku khene: “Anu Vafarisi mi kuwula tikopo ni timbiya ngu hahanze, kuveti timbiluni kwanu ku tate ngu makolo ni wubihi. 40 Mabhembano! Awu a nga maha ta hahanze, hi nga ene wu a nga maha ni ta mndani kani? 41 Ningani sisiwana ti txi khukhela mbiluni, mi txi maha toneto, totshe tanu ti na va ti di basile. 42 Anu Vafarisi mi na ti wona, nguko mi ningela sa wugumi, sa nyatximbowane, sa diarudha* ni sa yotshe mindiwo ya mazokoro kambe mi txhipisa kululama ni kuranda Txizimu. Eto ngu tona ti mi nga ti fanete ku ti maha aniko mi si leki kumaha atile timwani. 43 Anu Vafarisi mi na ti wona, mi di masinagogani mi dhunda kuzumba ka situlu sa masoni ni kulava kuloswa mu ko tala vathu. 44 Mi na ti wona, nguko mi fana ni mathitha ale ma si wonekiko kwati aya vathu va ma kandetelako va si ma tumbuli.”

45 Se mmweyo wa vagondisi va Mlayo a to khene ka Jesu: “Mgondisi, se wa hi ruka nanathu ngu ti u ti wombako.” 46 Jesu a njo kukhene: “Mi na ti wona nanu vagondisi va Mlayo, nguko mi rweka vathu mithwalo yo nemela, aniko anu kha mi ti lavi nem ni ku yi gwesa ngu litiho.

47 “Anu mi na ti wona, nguko mi aka mathitha a vaprofeti ava va nga dawa ngu vakale vanu. 48 Anu mi tifakazi ta mithumo ya va vhovho vanu, hambi keto mi yi tsakete nguko vona va date vaprofeti ava anu mi akako mathitha awe. 49 Ngu toneto wuzivi wa Txizimu wu nga womba to: ‘Ni na rumela vaprofeti ni vapostoli, kambe va na va daya ni kuxanisa vamwani kwawe. 50 Kasiku wotshe mnoha wa vaprofeti awu wu nga theketwa kukhukhela ku nga mahwa mafu wu txi vilwa ka liveleko liya, 51 kukhukhela ka mnoha wa Abhele kala ka mnoha wa Zakariya awu a nga dawa hagari ka altari ni nyumba.* Ina, na mi gela ti to wu na vilwa ka liveleko liya.

52 “Mi na ti wona anu vagondisi va Mlayo, nguko mi honyote khiya ya wuzivi. Anu kha mi wuleli, mi tshumela mi maha ti to vamwani va si wuleli.”

53 Mbimo yi a nga khukha hale, vamabhalani ni Vafarisi va to khata ku m’karata ni ku mmaha siwotiso so tala, 54 va txi m’riyela kasiku m’zweta ka ti a no ti womba.

12 Mbimo yi txitshungu txa mazana-zana a vathu txi nga ti sengeletanile aha koza txi kandetelana, Jesu a to khata ngu kuwomba-womba ni vagondiswa vakwe a txi khene: “Ti woneleni ka mtshumbelo wa Vafarisi, i ku wukanganyisi. 2 Kha txi ngaho atxi txi nga siswa bhem txi no mbi fukulwa, ni ku kha txi ngaho txi nga siswa txi no mbi tumbulwa. 3 Ngu toneto, totshe ati mi wombako txidemani ti na engiswa kuwonekelani ni totshe ati mi lengelanako txihunjani ti na huwelelwa ka votshe vathu. 4 I si nga eto basi vangana vangu, na mi gela ku khani: Mi nga thaveni avale va dayako mmidi kambe va si ti kotiko kumaha to pinda eto. 5 Ani ni na mi komba awu mi fanelako ku m’thava: Thavani Awule msana ko daya mmidi a ku ni mtamo wo wu rinza Gehena.* Ina, na mi gela ku khani thavani Eneyo. 6 Mtxhanu wa sindili kha si xaviswi ngu simaleana simbidi sa sidotho kani? Kambe ni txa tximwetxo kha txi divalwi ngu Txizimu. 7 Nguko hambi yotshe misisi ya hamsungo kwanu yi batwe. Ngu toneto, mi nga thaveni txilo nguko anu mi va lisima ngutu kupinda sindili so tala.

8 “Na mi gela ku khani: Awu a no ni tumela masoni ka vathu, Mwanana wa M’thu nene a na m’tumela masoni ka tingilozi ta Txizimu. 9 Kambe awu a no ni lamba masoni ka vathu ni na m’lamba masoni ka tingilozi ta Txizimu. 10 Awu a womba-wombako kubiha ngu Mwanana wa M’thu a na divalelwa, kambe awu a rukako moya wo sawuleka kha na mbi divalelwa. 11 Ngako va txi mi yisa habanza, ka vathangeli, ni ka vakoma mi nga thaveni ngu ti to mi na womba txani mwendo ngu ti to mi na wombisa kutxani kasi ku ti emela, 12 nguko ka mbimo yoneyo, moya wo sawuleka wu na mi gondisa ati mi fanelako kuwomba.”

13 Se mmweyo a nga ti hagari ka txitshungu a to khene: “M’gondisi, gela mkoma wangu e abana thomba ni nani.” 14 Jesu a to m’xamula a txi khene: “He mawe, i mani a nga ni sawula kota m’lamuli mwendo muabanisi wa tithomba kwanu va vambidi kani?” 15 Se a to va gela ku khene: “Zumbani mi txi wonelela mi ti wonela ka totshe tixaka ta makolo nguko hambi m’thu a di ni tithomba ta tingi wutomi wakwe kha wu ti ngu ka si a ku naso.” 16 Se a to va gela txidinganiso txo kari a txi khene: Dijaha do kari do ganya di ti ni thembwe yi nga ti pfuni ngutu. 17 Ngu toneto di to khata kupimisa di txi kha dona: ‘Ni na maha txani aku ni si ngako ni wukhalo wo veka silo sangu?’ 18 Di txi kha dona ni na maha tiya: ‘Ni na vhandamusa* sisangala sangu ni aka sa hombe, ni na veketela kona yotshe fulaho yangu ni sotshe silo sangu, 19 ni na ti gela ku khani: “Ni ni silo sa singi so dingana malembe o tala, ni na humula, ni dya, ni sela, ni ti tsakisa.”’ 20 Kambe Txizimu txi to m’gela ku khene: ‘Dibhembawe, wusiku wuwa u na fa. I mani a no sala ni silo asi u nga si sengeleta? 21 Atiya ngu ti ti mahekelako m’thu wule a sengeletelako tithomba takwe kambe ka Txizimu txisiwana.”

22 Se a to gela vagondiswa vakwe a txi khene: “Ngu toneto ni mi gelako ku khani: Lekani kuvilela ngu wutomi wanu ngu kupimisa to mi na dya txani, mwendo ngu mmidi wanu to mi na ambala txani. 23 Nguko wutomi mbwa lisima kupinda sakudya ni mmidi mbwa lisima kupinda siambalo. 24 Wonisisani magwana, ona kha ma phayi mwendo kuelula, kha ma na mathala mwendo sisangala, hambiketo Txizimu txa ma dyisa. Ina anu kha mi nga va lisima kupinda sinyana. 25 I mani kwanu awu ngu mhaka ya kuvilela a nga si kotako kuengetela hambi meneti yimweyo ka wutomi wakwe kani? 26 Se aku mi tandwako ngu kumaha timhaka tiya ta tidotho ngu kutxani mi txi karateka ngu tile timwani? 27 Wonani ati ma kulisako tona makhoñwa ona kha ma thumi nem kha ma rungi kambe na mi gela ku khani hambiku Solomoni a nga ti ganyile ngutu kha nga za e ambala kufana ni dimwedo da ona. 28 Se aku Txizimu txi tshuriselako mwasi wa txitinga nga tiya, awu wu kuho nyamsi mangwana wu hiswa ngu mndilo, ina txi nga tandeka ku mi ninga so ambala anu va likholo la lidotho? 29 Lekani kuvilela ngu ti to mi na dya txani ni ku mi na sela txani, ni ku lekani kuvilela ko pinda mpimo, 30 nguko asiya ngu sona asi vamatiko va si dhunukelako, kambe Tate wanu wa ti ziva to ma si lava silo siya. 31 Hahanze keto simamani mi lava Mfumo wakwe se sotshe asiya simwani mi na engetelwa.

32 “Mi nga thaveni, anu va mtxhambi wa wudotho, nguko tate wanu a ti tsakete ku mi ninga Mfumo. 33 Xavisani silo sanu mi ninga sisiwana. Ti maheleni sipatxhi so mbi sakala, i ku thomba yo mbi guma nzumani, aha dikhamba di si hokiko hambi mswa wu si dyiko. 34 Nguko aha yi ku kona thomba yanu, mbilu yanu yi na va koneho.

35 Sungani tibhande siwununi kwanu,* mi layitha malambu anu. 36 Fanani ni majaha yale ma rinzelako nyamne wa ona awu a wuyako ngu mtxhadhoni, kasiku mbimo yi a hokako e peka ditimba me tekela ku m’tulela. 37 Si na tsaka sithumi sile si ku ta manwa ngu nyamne wa sona si txi wonelela. Na mi gela ditshuri ni khani: Ene a na ti lungisela kasi kuthuma e si khalahatshisa hamezani e si serivhira. 38 Hambi a txi hoka hagari ka wusiku mwendo ngu mbimo ya kuemba ka m’kuku e ta va mana va di lungekile va na tsaka. 39 Kambe ti ziveni ti to i ti ku nyamne wa mti a txi yi ziva mbimo yi dikhamba di no ta ngu yona nga a si leki nyumba yakwe yi pfodolwa. 40 Nananu, zumbani mi di lungekile nguko Mwanana wa M’thu a na ta ngu mbimo ayi mi nga mbi yi emela.

41 Pedro a nje ku khene: “Mkoma txidinganiso txiya u gela athu basi mwendo votshelele?” 42 Se Mkoma a njo ku khene: “I mani awu i ku muwoneleti wo thembeka, wo txhariha, awu nyamne wakwe a nga m’veka kasi kuthangela sithumi sakwe kasiku e si ninga sakudya ngu mbimo ya kona? 43 Txa tsaka txithumi txonetxo, atxi nyamne wa kona a wuyako a ta txi mana txi txi maha toneto. 44 Ngu ditshuri na mi gela ku khani: Ene a na txi ninga mthumo wo wonelela sotshe asi a ku naso. 45 Aniko, ngako txithumi txonetxo txi txi khata ku ti gela mbiluni txi txi kha txona: ‘Nyamne wangu wa swela’, se txi khata kupeketela sithumi sa txiwamna ni sa txisikati, txi dya, txi sela, ni kuleva, 46 nyamne wa txithumi txile a na wuya ngu ditshiku do kha txi di zivi, ni ngu mbimo yo nem kha txa yi rinzela ene a na txi punira ta bhom, e txi patanisa kumweko ni va vo mbi thembeka. 47 Se txithumi txile txi nga pfisisa kuranda ka nyamne wa txona, kambe kha txa ti lulamisela nem kumaha ati txi nga kombelwa txi na kwapelwa ngutu. 48 Kambe awule a nga mbi ti pfisisa se e maha timhaka to fanelwa ngu kutsayiswa a na kwapelwa ka kudotho. Ngu ditshuri awule a nga ningwa sasingi a na ta vilwa sa singi, ni wule a nga vekwa kasi kuthangela so tala a na ta vilwa so pinda asi si nga toloveleka.

49 Ni tete ku ta layitha mndilo hamafuni, se ni nga lava txani kambe kuveti se wu layithilwe? 50 Ngu ditshuri ku ni bhabhatiso ayi ni fanelako kubhabhatiswa ngu yona, ni na simama ni di karatekile kala kuza yi pinda. 51 Mi pimisa ti to ni tisa kurula hamafuni? Ahim-him, kha na tisa kurula kambe ni nehile kuhambana. 52 Nguko kukhukhela akuwa, ka mti awu wu ku ni mtxhanu wa vathu va na abaniswa, vararu va txi wukela vambidi, vambidi va txi wukela vararu. 53 Va na abaniswa: Tate a na wukela mwanana wakwe wa mfana, mwanana wa mfana a na wukela tate, mame a na wukela mwanana wakwe wa dihorana, mwanana wa dihorana a na wukela mame, masale a na wukela mamanyani, ni mamanyani a na wukela masale wakwe.

54 Ene a to gela txitshungu a txi khene: “Ngako mi txi wona direfu di txi huma ngu mswa ditambo mi khanu: ‘Ku na va ni txihuhuri,’ se ti mahisa toneto. 55 Ngako ku txi peka moya ya wulambwe mi khanu: ‘Ku na va ni lisani la hombe,’ se ti mahisa toneto. 56 Vaxengetelino! Ma ti ziva kuxolisisa mazumbelo a mafu ni nzuma, se ngu kutxani mi si ti kotiko kuxolisisa mbimo yiya? 57 Ngu kutxani mi si ti ziviko mipune ati i ku to lulama? 58 Ngu txikombiso, ngako awe ni awu u nga mangalana nayo mi txi ya wukomani, lulamisa timhaka mi di ngadi hanzila kasiku a si ku ningeli ka juwiji, se juwiji e ku ningela ka maphoyisa, se me ku beta jele. 59 Na ku gela ku khani: Khu na mbi huma jele u si se hakela yotshe male.”

13 Ka mbimo yoneyo, vamwani va nga ti kona hale va to gela Jesu ngu va Galileya ava Pilato a nga va daya va txi ningela miningelo. 2 Jesu a to va wotisa a txi khene: “Ina mi pimisa ti to Vagalileya vava va nga humelelwa ngu tiya o va sionhi sa hombe kupinda va vamwani kani? 3 Ahim-him, kambe na mi gela ku khani; ngako mi si tisoli na nanu mi na loviswa kufana ni vona 4 A ni va va 18 va nga welwa ngu txitezi txa Silowame txi va daya, ina mi pimisa to vo va ni mnandu kupinda votshe vahanyi va Jerusalema kani? 5 Ahim-him, kambe na mi gela ku khani, ngako mi si tisoli, na nanu mi na loviswa kufana navo.”

6 Msana keto a to va gela txidinganiso a txi khene: “Wamwamna wo kari a ti ni mkuwu thembweni kwakwe ka mivhinya, se a to tsula kuya lava mihando ka wona, aniko kha yi mana. 7 Se a to gela mxayisi wa thembwe a txi khene: ‘Kupinda malembe mararu ni txi ta ni ta lava mihando ka mkuwu wuwa aniko kha ni yi mani. Wu wileni, nguko wo xakela wusavi mahala.’ 8 Mxayisi wule wa thembwe a to m’xamula a txi khene: ‘Mkoma, wu leke kudingana dilembe dimwedo na kela madhawani ka wona ni thela txitromu. 9 Ngako wu txi veleka mihando ngu kutsimbila ka mbimo kha ku na mhaka, kambe ngako wu si veleki wu gange.’”

10 Jesu a txi gondisa ka disinagoga do kari ngu Sabata. 11 Koneho, ku ti ni wamsikati wo kari a nga ti ni didhimoni di nga txi m’lwalisa kudingana 18 wa malembe, ene a ti dombekile ni ku a si ti koti kuololoka. 12 Mbimo yi Jesu a nga m’wona a to m’gela ku khene: “U hanyisilwe ka malwati ako ndiyangu.” 13 Se a to sanzeka manza ka wule wamsikati, koneko a to ololoka e khata kudhumisa Txizimu. 14 Kambe ngu kuwona tiya, mthangeli wa disinagoga a to swireka ngu ku Jesu a nga hanyisa m’thu ngu Sabata, se a to gela txitshungu a txi khene: “Ku ni 6 wa masiku aya vathu va tumelelwako kuthuma, ngonani ka masiku oneyo kasi ku ta hanyiswa i si nga ngu Sabata.” 15 Kambe, Mkoma a to m’xamula a txi khene: “Vakanganyisino, ina anu kha mi txhatxhi homu yanu mwendo mbongola yanu ngu Sabata mi yi teka yi ya sela mati kani? 16 Ina awu wamsikati i ku mwanana wa Abrahamu, awu a nga ti sungilwe ngu Sathani kudingana 18 wa malembe kha fanelwi kukhululwa ngu ditshiku da Sabata kani?” 17 Mbimo yi a nga womba eto, vakaneti va to theleka tingana kambe txitshungu txi to tsaka ngu kuwona mithumo yo xamalisa ayi a nga txi yi maha.

18 A to engeta a txi khene: “Mfumo wa Txizimu wu fana ni txani, wona ni nga wu dinganisa ni txani? 19 Wu fana ni mbewu ya txinapi ayi wamwamna wo kari a nga yi teka e ya yi phaya thembweni kwakwe, yi kula yi maha mndonga wa hombe aha sinyana si nga aka sisaka ka madhavi a wona.”

20 A to engeta a txi khene: “Mfumo wa Txizimu ni nga wu fananisa ni txani? 21 Wu fana ni mtshumbelo awu wamsikati a wu tekako e wu patanisa ni trigu ya yingi kala kuza yotshe trigu yi kukumuka.”

22 Ene a txi tsimbila ngu didhoropa ni didhoropa ni txidhoropana ni txidhoropana a txi gondisa a txi kongoma Jerusalema. 23 Se dijaha do kari di to m’wotisa di txi kha dona: “Mkoma ina mbadotho va hanyiswako kani?” Jesu a to khene 24 “Ti karateleni kubela ngu ditimba do songa nguko na mi gela ni txi, vavangi va na zama kubela kambe kha va na mbi sikota. 25 Msana ko nyamne wa mti a di khotile ditimba mi na ema ngu hahanze mi gogota mi txi, ‘Mkoma hi kombela u hi tulela.’ Kambe ene a na mi xamula a txi khene: ‘Kha ni ti zivi ti to mi ta ngu hayi.’ 26 Se anu mi na khanu, ‘Hi txi dya ni kusela ni ku u txi hi gondisa mithandani ka madhoropa athu.’ 27 Se ene a na khene kwanu: ‘Kha ni mi zivi mu mi tako ngu kona. Khukhani hawa vamahino va to biha.’ 28 Ngu kona kheyo mi no peka huwa ni kugugurusela makwasa mbimo yi mi no wona Abrahamu, Izaki, Jakobe ni votshe vaprofeti Mfumoni wa Txizimu kambe anu mi rinzwa hahanze. 29 I si nga eto basi, vathu vo ta ngu wutxani ni mswa-ditambo ni wuphemba ni wulambwe, va na ta dya hamezani Mfumoni wa Txizimu. 30 Kambe ku ni va vo gwita va no maha vo khata, ni va vo khata va no maha vo gwita.”

31 Ka mbimo yoneyo, Vafarisi vo kari va to m’tshuketela va txi kha vona: “Khukha hawa u tsula nguko Herodha a lava ku ku daya.” 32 Se Jesu a txi khene: “Tsulani mi ya gela lingowolo mi txi khanu: ‘Nyamsi ni mangwana ni hinga madhimoni ni kuhanyisa vathu se ngu ditshiku da wuraru nava ni di gwitile.’ 33 Kambe nyamsi, mangwana, ni wutawu ni fanete kusimama ni thuma nguko kha ti tumelelwi ti to mprofeti e dawa hahanze ka Jerusalema. 34 Anu vathu va Jerusalema vadayi va vaprofeti, ni kubalisela ngu marigwi ava va rumelwako kwanu. Sikhati singahi ni nga mi dhana kufana ni khukhu ayi yi dhanako sisondo sa yona kasi ku ta si fundamela, aniko anu kha ma tumela. 35 Ngu toneto, m’ti wanu wu na va marumbi. Na mi gela ku khani, kha mi na mbi ni wona kambe kala ka mbimo yi mi no khanu: ‘A katekile awu a tako ngu ditina da Jehovha!’”*

14 Jesu a to tsula kuya susula mtini ka mmweyo wa Vafarisi ngu Sabata, se vona va to khata ku m’ronokela. 2 Masoni kwakwe ku ti ni wamwamna a nga ti ni malwati o simbela mmidi. 3 Se Jesu a to wotisa vagondisi va Mlayo ni Vafarisi a txi khene: “Ina ta tumelelwa kuhanyisa ngu Sabata mwendo ahim-him?” 4 Kambe, vona va to malala. Se ene a to gwesa dijaha dile e di hanyisa e gwita e di leka di tsula. 5 Se a to va wotisa ku khene: “Ngako mwanana wanu mwendo homu yanu yi txi wa txisimani, ina kha mi tekeli ku yi humisa ngu kuva i di ditshiku da Sabata kani?” 6 Se va to pwata to m’xamula.

7 Jesu a to mahela txidinganiso avale va nga ti rambilwe ngu kuwona to va txi ti sawulela makhalo a lisima. A txi khene kwawe: 8 “Ngako u txi rambwa ka fexta ya mtxhadho u nge ya langa situlu sa lisima, nguko ku nga thuka a di rambilwe m’thu mmwani wo xonipheka kupinda awe. 9 Awule a nga mi ramba a na hoka e ta kugela ku khene: ‘Khukha u ningela txitulu ka wuwa.’ Se awe ngu tingana u na khukha u tsula ka txitulu txo gwitisa. 10 Kambe ngako u txi rambwa, tsula u ya khalahatsha ka txitulu txo gwitisa kasiku awu a nga kuramba a txita a na ta khene: ‘He mndoni tsula u ya khalahatsha ka txitulu txa lisima.’ Se votshe vale va nga rambwa va na kuxonipha. 11 Nguko wuhi ni wuhi a ti guletako a na vekwa hahatshi, aniko awu a ti vekako hahatshi a na guletwa.”

12 Msana keto ene a to gela wamwamna wule a nga m’ramba a txi khene: “Ngako u txi ramba vathu ku ta susula mwendo ku ta lalela, u nga dhani vangana vako, vananu, maxaka ako, mwendo vaakelani vako vo ganya. Nguko ni vona va nga thuka ve ku dhana, se eto va nava va txi ku tshumetela. 13 Kambe ngako u txi maha m’buso, ramba sisiwana, silima, sikhwala ni mabhofu, 14 se awe u na tsaka nguko vona kha va nga ni so kutshumetela ngu sona. Kambe u na ta hakhelwa kuwukani ka vo lulama.”

15 Mbimo yi va nga pfa tiya, mmweyo wa va va nga ti rambilwe a to khene: “Awule a patekako ka m’buso Mfumoni wa Txizimu a na tsaka.”

16 Jesu a to m’gela ku khene: “Wamwamna wo kari a to maha m’buso wa hombe e ramba vathu vo tala. 17 A to ruma txithumi txakwe ngu mbimo ya m’buso kasi kuya gela avale a nga va ramba a txi khene, ‘Ngonani nguko sotshe se si lungile.’ 18 Va to lamba ve jika-jika. Wo khata a to khene, ‘Ni xavile thembwe ni lava kuya yi wona, ni divalele.’ 19 Mmwani a to khene, ‘Ni xavile 10 wa tikavi* se ni lava kuya ti duketa, ni divalele.’ 20 Mmwani a to khene, ‘Ni ngadi kutxhadha, ngu toneto ni nge si koti kutsula.’ 21 Se txithumi txi to tshumela txi ya txhamusela nyamne wa txona timhaka eto. Se nyamne wa mti a to henya e gela txithumi a txi khene: ‘Kuluveta u tsula tiruwani ni makhonani ka didhoropa u ya teka sisiwana, silima, mabhofu ni sikhwala.’ 22 Msana keto, txithumi txi to kha txona: ‘Mkoma ni mahile ti u nga ni ruma, kambe wukhalo wu nga diho.’ 23 Se mkoma a to gela txithumi txile a txi khene: ‘Tsula tiruwani ni tinzilani u ya va kurumeta ku veta kasiku nyumba yi tala. 24 Nguko na mi gela ku khani, ni mmweyo wa va va nga rambwa kha na mbi danza txilalelo* txangu.’”

25 Txitshungu txa hombe txi ti londetela Jesu, se a to tshembereka e txi gela ku khene: 26 “Ngako m’thu a txi ta kwangu na a si vengeli* tate wakwe, mame wakwe, msikati wakwe, vanana vakwe, vananda ni vakoma vakwe, tindiyakwe hambi ni wutomi wakwe, kha na ku si kota ku va mgondiswa wangu. 27 Awu a si rwaliko phande yakwe ya xanisa a txi ni londisa, kha na ku si kota ku va m’gondiswa wangu. 28 Ngu txikombiso, i mani kwanu awu ngako a txi lava kuaka txitezi* a si khatiko ngu kukhalahatsha e konta mali kasi kuwona ti to yi na enela ku txi heta kani? 29 Kasiku a si khati ku yi aka kambe a si ti koti ku yi heta se vapindi va nzila ve khata ku m’seka, 30 va txi kha vona, ‘Mamo wuwa a khatile kuaka aniko a tandekile kuheta.’ 31 Mwendo ku mkoma muni wo a si se kuxoma ku yalwa ni mmwani mkoma a si khatiko ngu kukhalahatsha e wona ti to a nga ya sikota ku yalwa ni wule a tako ni 20.000 wa masotxhwa na ene a di ni 10.000 kani? 32 Se ngako a txi wona ti to kha ti dingani, wa rumela vaemeli vakwe kasi kuya maha kurula na mkoma wule mmwani a di ngadi kule. 33 Ngu kufana, zivani ti to wuhi ni wuhi kwanu awu a si tumeliko kuleka sotshe asi a ku naso, kha na ku sikota ku va mgondiswa wangu.

34 Ngu ditshuri, sawuti njinene. Kambe ngako yi txi luza mtamo wa yona, ti nga kotekisa kutxani ku yi wuseta? 35 Kha yi ngadi yi vhuna txilo, hambi kunonisa mafu mwendo kumaha txitromu. Yona yo tshotshwa hahanze. Awu a ku ni tinzeve a na engise.”

15 Votshe vakhupisi ni vaonhi va txi tshuketela Jesu kasi ku ta mu engisela. 2 Se Vafarisi ni vamabhalani va txi ngungurukela va txi kha vona: “Mamo wuwa wa amukela vaonhi ni kudya navo.” 3 Koneho a to va mahela txidinganiso txiya: 4 “I mani hagari kwanu awu a ku ni 100 wa tinvuta, se a txi mwalalelwa ngu yimweyo, a si siyiko tile timwani ta 99 txiwulani a txi londeta yile yi nga mwalala kala kuza e yi mana? 5 Se mbimo yi a yi manako wa yi pakata e tsaka. 6 Mbimo yi a wuyako mtini wa ramba vangana vakwe ni vaakelani a txi va gela ku khene: ‘Tsakani ni nani nguko ni mani nvuta yangu ayi yi nga ti mwalate.’ 7 Ngu ha kufanako na mi gela ku khani, ku nava ni litsako la hombe nzumani ngu mhaka ya muonhi mmweyo a ti solako kupinda vale va 99 vo lulama ti si laviko ku ve tisola.

8 “Mwendo ku mbwa wamsikati muni awu ngako a di ni 10 wa madrakma, se e mwalalelwa ngu dimwedo, a si layithiko dilambu a txi hiyela nyumbani a txi xola kha kwati kala kuza e di mana? 9 Se mbimo yi a di manako, ene wa ramba vangana vakwe ni vaakelani a txi khene: ‘Tsakani ni nani, nguko ni mani didrakma di di nga ti mwalate.’ 10 Na mi gela ku khani, ngu ha kufanako, tingilozi ta Txizimu ta tsaka ngu mhaka ya txionhi tximwetxo txi ti solako.”

11 Ene a to tshumela e va gela ku khene: “Wamwamna wo kari a ti ni vanana vambidi va majaha. 12 Se awule wa mnanda a to gela tate wakwe a txi khene: ‘Tata, ni ninge thomba yangu ayi yi ni lumbako.’ Se ene a to va abanisa thomba. 13 Msana ka masiku a madotho awule wa mnanda a to pakela yotshe thundo yakwe e enda e ya ka ditiko da kule a txi ya hangalasa thomba yakwe ngu kuhanyisa kwa mbi ti pimela. 14 Msana kova a di hetile thomba yakwe, ku to va ni nzala ya hombe ka dotshe ditiko dile, se e khata kuxaniseka. 15 A vekile ni kuya kombela mthumo ka mmweyo wa vathu va ditiko dile, awu a nga m’rumela tithembweni kwakwe kasi kuya dyisa tikhumba. 16 A txi navela ni kudya sakudya si si nga ti dyiwa ngu tikhumba, aniko va si m’ningi.

17 “Mbimo yi a nga alakanyisisa a to khene: ‘Ku ni sithumi sa singi sa tate wangu si dyako si txi khura, kuve ani no fa ngu nzala. 18 Ni na khukha ni tshumela ni ya mtini ka tate wangu ni ya m’gela ku khani: “Tata, ni onhete nzuma ni nawe. 19 Kha ni swi ni txi fanelwa kudhanwa ku ni mwanana wako. Ni konte kota tximwetxo txa sithumi sako.’” 20 A to khukha e tsula ka tate wakwe. A di ngadi kule, tate wakwe a to m’wona e m’pfela wusiwana e tutuma e ta m’wukarela e m’nyuta. 21 Se mwanana a to khene: ‘Tata, ni onhete nzuma ni nawe. Kha ni swi ni fanelwa kudhanwa ku ni mwanana wako.’ 22 Kambe tate a to gela sithumi sakwe a txi khene: ‘Kuluvetani mi neha siambalo so tshura ngutu mi mu ambeka, mu ambekeni ringi litihoni kwakwe ni masandaliya mikondoni kwakwe. 23 Tisani kambe dirole do nona mi di daya, hi maha fexta, 24 nguko mwanana wangu a ti fite se a tshumete e hanya, a ti mwalate e tshumela e manwa.’ Se va to khata kubusa.

25 “Mwanana wakwe wa mkoma a ti thembweni, se mbimo yi a nga txi wuya a di hafuhi ni mtini a to pfa wutxenje ni sigingo sa kusinya. 26 Se a to dhana mmweyo wa sithumi e m’wotisa to kuhumelela txani. 27 Ene a m’gete ku khene: ‘Mnanda wako a nga wuya se tate wako a date dirole do nona, nguko a wile a di xayisekile.’ 28 Kambe ene a to henya ngutu e lamba kuwulela. Se tate wakwe a to huma e ya m’khongotela ku e bela. 29 Se ene a to xamula tate wakwe a txi khene: ‘Ni ku thumete malembe o tala, ni ku kha ni khali kueyisa milayo yako, hambi keto khu khali ku ni ninga hambi phongo kasiku ni txi busa ni vangana vangu. 30 Kambe, aku a nga hoka mwanana wuwa wako a nga xakela thomba yakwe ni magelegele u m’dayete dirole do nona.’ 31 Se tate wakwe a to m’xamula a txi khene: ‘Mwanangu, mbimo yotshe u ti ni nani ni sotshe si ni ku naso nzako. 32 Ti ni fanelo kubusa, hi tsaka nguko mnanda wako a ti fite e tshumela e hanya, a ti pengile e tshumela e manwa.’”

16 Msana keto, Jesu a to gela kambe vagondiswa vakwe a txi khene: “Wamwamna wo kari wo ganya a ti ni muwoneleti awu a nga wombelwa ku a xakete thomba ya wamwamna wule. 2 Koneko a to m’dhana a txi m’gela ku khene: ‘Nda txani ti ni ti pfako ngu ngawe? Bhala diphepha u txhamusela ti to u yi thumisisile kutxani male yangu, nguko khu na mbi swa u txi maha muwoneleti wa silo sangu.’ 3 Se muwoneleti a to pimisa a txi khene: ‘Ni na maha txani akuwa nyamne wangu a ni hingako mthumoni? Kha ni na mtamo wo dima ni ku ni ni tingana to kombela jimola. 4 Ya! Na tiziva ti to na maha txani mbimo yi ni no hingwa mthumoni, kasiku vathu ve ni amukela mitini kwawe.’ 5 Se a to dhana a vale va nga txi dhevha nyamne wakwe, e wotisa wo khata a txi khene: ‘Nji txani u dhevhako ka nyamne wangu?’ 6 Se a to xamula a txi khene: ‘I 100 wa mipimo ya mafura.’ Awule wa muwoneleti a to khene: ‘Kuluveta u teka diphepha da txitumelelano u bhala ku i 50.’ 7 Se a to wotisa mmwani a txi khene: ‘Awe ko, u dhevha txani?’ A to xamula a txi khene: ‘I 100 wa mipimo ya hombe ya trigu.’ Awule wa muwoneleti a to m’gela ku khene: ‘Teka diphepha dako da txitumelelano u bhala ku i 80.’ 8 Se nyamne wakwe a to ndunduzela muwoneleti wule nguko hambiku a nga mbi va wo lulama a thumisile wutxhari. Nguko vanana va nguva yiya va txharihile ngutu ka ku thumisana ni va liveleko lawe kupinda vanana va liwoningo.

9 “Na mi gela ku khani: Mahani vangana ngu tithomba to mbi lulama, kasiku mbimo yi ti no mi gumela, ve mi amukela ka makhalo o mbi na magwito. 10 Awu i ku wo thembeka ka sa sidotho mbwo thembeka ni ka sa singi, ni wule a si thembekiko ka sa sidotho kha na mbi thembeka ni ka sa singi. 11 Ngako mi si ti kombi mi di vo thembeka ko thumisa tithomba to mbi lulama, i mani a no mi maha vawoneleti va thomba ya ditshuri? 12 Ni ku ngako mi di tandekile ku va vo thembeka ko thumisa sa vane, i mani a no mi ninga asi si no va sanu? 13 Kha ngaho m’thu wu a nga si kotako kuthumela vakoma vambidi, nguko a na dhunda mmweyo e nyenya mmwani ni ku a na nama-nama ni mmweyo e kanyisa mmwani. Anu kha mi na ku sikota kuthumela Txizimu ni ku lava kuganya.”

14 Vafarisi i ku vathu va va nga txi dhunda male, va txi engisela totshe timhaka eto se ve khata ku m’poyilela. 15 Se a to va gela ku khene: “Anu mi ti maha vo lulama masoni ka vathu, kambe Txizimu txa ti ziva ti ti ku timbiluni kwanu. Nguko asi i ku sa lisima masoni ka vathu, manyala masoni ka Txizimu.

16 “Mlayo ni Vaprofeti si txi thuma kala ka Johani. Kukhukhela koneho, Mfumo wa Txizimu wa txhumayelwa kota mahungu a manene, se vathu va tixaka totshe va ti karatela kuwulela ka wona. 17 Ta hehuka ku nzuma ni mafu si nyamalala kupinda ku txindendana txa txidotho txa mu ka Mlayo txi nyamalala na ku si se maheka ati Mlayo wu wombako tona.

18 “Wuhi ni wuhi a dhivhorsiyarako msikati wakwe e txhadha ni mmwani o maha wugango, ni wule a txhadhako ni wamsikati wu a nga dhivhorsiyarwa a maha wugango.

19 “Ku ti ni wamwamna wo kari wo ganya a nga txi ambala siambalo so dhula, ni ku a txi hanya wutomi wo thamba. 20 Se ku ti ni wamwamna wo kari wa txisiwana a nga txi dhanwa ku i Lazaro va nga txi tolovela ku m’veka hatxikeni ka wule wo ganya ni ku a ti taletwe ngu silonda. 21 Ene a txi navela kudya asi si nga txi wa ngu ha mezani ka wule wo ganya. Hambi timbwa ti txita ti ta danzela silonda sakwe. 22 Ngu kutsimbila ka mbimo, wamwamna wule wa txisiwana a to fa e tekwa ngu tingilozi e yiswa ka Abrahamu.

“Awule wo ganya nene, a to fa e kelelwa. 23 Mbimo yi a nga ti Dithithani* a txi xupheka, a to gula maso e wona Abrahamu a di kule a di ni Lazaro didhawani kwakwe. 24 Ngu toneto wamwamna wule a to kwangula a txi khene: ‘Tata Abrahamu, ni pfele wusiwana, u ruma Lazaro e ya nakanisa tshoka ya litiho ngu mati e ta ni temula lidimi nguko no xaniseka ha mdhikilani hawa ka mndilo.’ 25 Kambe Abrahamu a to khene: ‘Mwanangu, wa khumbula ti to awe u amukete silo sa sinene mbimo yi u nga ti hanya, kambe Lazaro a mani sixaniso. Se konkuwa ene wa mana kuthavelelwa, kambe awe wo mana kuxaniseka. 26 I si nga eto basi, ku ni diphala da hombe hagari kwathu ni nawe, se ngu toneto ava va lavako kutshawunyeta va txi lava kuta kheyo kha va na ku sikota, ni vale va ku kheyo va txi lava kuta kheno kwathu, kha va na ku sikota.’ 27 Wamwamna wule wo ganya a to khene: ‘Ti di nga eto tata, na ku kombela ku m’rumela e ya mtini ka tate wangu, 28 nguko ni ni mtxhanu wa vafowethu, ngu toneto m’leke e ya va txharihisa kasiku ni vona va si ti ka wukhalo wuwa wo ta xaniswa.’ 29 Kambe Abrahamu a to khene: ‘Vona va ni Mosi ni Vaprofeti, va na engise vonevo.’ 30 Se ene a to xamula a txi khene: ‘Ahim-him tata Abrahamu, ngako ku txo wuka mmweyo ngu ka vakufa e ya va txharihisa va na tisola.’ 31 Kambe Abrahamu a to m’gela ku khene: ‘Ngako va si engise Mosi ni Vaprofeti kha va na mbi kholwa hambi ku txo wuswa m’thu ngu ka vakufa.’”

17 Se Jesu a to gela vagondiswa vakwe a txi khene: “Si nge pwateki sivangelo si si mahako m’thu e onha. Aniko, dikhombo di ka wule si tako ngu kwakwe. 2 I ti tshuku ku e sungelelwa dirigwi da hombe hathamoni kwakwe e rinzwa lineneni kupinda kumaha ti to mmweyo wa vanana vava e onha. 3 Ti woneleni, ngako mwananu a di ku onhete m’kawuke, se ngako a txi tisola, m’divalele. 4 Hambi i di ti to o ku onhela 7 wa sikhati ngu ditshiku e gwita e wuya 7 wa sikhati kwako e ta khene: ‘Na tisola,’ awe u fanete ku m’divalela.”

5 Se vapostoli va to gela Mkoma va txi kha vona: “Hi engetele likholo.” 6 Mkoma a to va gela ku khene: “I ti ku mi ti kova ni likholo lo dingana ni mbewu ya txinapi, mi ndi na gela mmora wuwa mi txi khanu: ‘Ti dule u ya ti phaya lineneni.’ Se wona wu ndi na mi engisa.

7 I mani kwanu awu ngako a di ni txithumi txi dimako mwendo txi khatalelako tinvuta a txi gelako mbimo yi txi wuyako ngu thembweni a txi khene: ‘Ngono kheno ngu txikuluveta, u ta khalahatsha hamezani u dya’? 8 Ina kha khati ngu ku txi gela ku khene: ‘Txitxa siambalo u ni lulamisela so lalela ngu sona, u ni thumela kala kuza ni gwita kudya ni kusela, ngu msana u na dya ni kusela nawe’? 9 Ina mi alakanya to a na txi bonga ngu ku txi nga maha ti a nga txi ruma? 10 Ngu ha kufanako, ngako mi di gwitile kumaha totshe ti mi nga rumwa, mi nda khanu: ‘Hi sithumi so mbi vhuna txilo, hi mahile ti hi nga ti fanete kumaha.’”

11 Mbimo yi a nga txi ya Jerusalema, a to pinda ngu hagari ka Samariya ni Galileya. 12 E bela txidhoropanani ko kari, amu a nga manana ni 10 wa majaha ma nga ti ni tshekela, kambe ona ma to ema kule. 13 Se ona ma to kwangula ma txi kha ona: “Jesu, M’gondisi hi pfele wusiwana!” 14 Mbimo yi a nga va wona a to va gela ku khene: “Tsulani mi ya ti kombekisa ka vaprista.” Se mbimo yi va nga txi tsula, va to basiswa. 15 Mmweyo wawe mbimo yi a nga wona to a ti hanyisilwe, a to wuya a txi dhumisa Txizimu ngu dipswi do guleka. 16 Se ene a to ya khizama minengeni ka Jesu e m’bonga, ene i ti Msamariya. 17 Jesu a njo ku khene: “Hi nga 10 wa vathu va nga hanyiswa kani? Se va hani avale va 9?” 18 “Kha ka maneka ni wammweyo a nga wuya e ta dhumisa Txizimu hahanze ka wamwamna wuwa wa ditiko dimwani?” 19 Se a to m’gela ku khene: “Khukha u txi tsula, likholo lako li ku hanyisile.”

20 Vafarisi va to m’wotisa ti to Mfumo wa Txizimu wu na ta ditshiku muni, se ene a to xamula ku khene: “Mbimo yi Mfumo wa Txizimu wu no ta, vo tala va na mbi wu wona, 21 hambi vathu kha va na mbi womba va txi kha vona: ‘Ndiwo hawa!’ mwendo, ‘ndiwole hale!’ Nguko Mfumo wa Txizimu wuho hagari kwanu.”

22 Se a to gela vagondiswa vakwe a txi khene: “Ku na hoka mbimo yi mi no lava kuwona Mwanana wa M’thu, aniko kha mi na mbi m’wona. 23 Se vathu va na kha vona: ‘Wonani, ndiyole hale!’ mwendo, ‘wonani, ndiyo hawa!’ Mi nga tsuleni mwendo ku va londetela. 24 Nguko kufana ni kukeluka ku wonengetako nzuma kukhukhela didhawa dimwani kala didhawa dimwani, ti na mahisa toneto ka ditshiku da Mwanana wa M’thu. 25 Kambe kukhata a fanete kuxaniswa ni kunyenywa ngu liveleko liya. 26 I si nga eto basi, kufana ni ti ti nga mahisa tona ka masiku a Nowa, ti na mahisa toneto ka masiku ya Mwanana wa M’thu: 27 Nguko vathu va txi dya, va txi sela, vavamna va txi teka, vavasikati va txi tekwa kala ka ditshiku di Nowa a nga bela ngalavani, se yi ta ndambi yi ta va lovisa votshe. 28 Ngu toneto kambe ti nga txi maheka ka masiku ya Loti: Vathu va txi dya, ve sela, ve xava, ve xavisa, ve phaya ni kuaka. 29 Aniko ditshiku di Loti a nga huma ngu dona Sodhoma, kuwite mndilo ni txivavula ngu nzumani si va lovisa votshe. 30 Ti na mahisa toneto ka ditshiku di Mwanana wa M’thu a no ti kombekisa ka vathu.

31 “Ka ditshiku donedo, awu a nova a di txitimwi ka nyumba na silo sakwe si di nyumbani a nga txhike e ta si teka, ni wule a nova a di thembweni a nga tshumele msana e ta teka silo sakwe. 32 Khumbulani msikati wa Loti. 33 Awule a lwelako kuxayisa wutomi wakwe a na wu luza, aniko awule a luzako wutomi wakwe a na wu xayisa. 34 Na mi gela ku khani, ka wusiku wonewo, vathu vambidi va nava va di otete ha mbhedhuni kumweko, mmweyo a na tekwa kambe mmwani a na lekwa. 35 Ku na va ni vavasikati vambidi va txi gaya ka txigayo tximwetxo, mmweyo a na tekwa, mmwani a na lekwa.” 36 —— 37 Se va to m’wotisa va txi kha vona: “Mkoma, ti na mahekela hani?” Ene a to va gela ku khene: “Ova ha ku ku ni txirumbi, magama ma na sengeletana koneho.”

18 Msana keto, a to va gela txidinganiso mayelano ni txilaveko txo khongela mbimo yotshe va si karali, 2 a txi khene: “Ka didhoropa do kari, ku ti ni juwiji awu a nga si thavi Txizimu ni ku a si na mhaka ni m’thu. 3 Ka didhoropa donedo ku ti ni wamsikati wo felwa ngu wamwamna a nga txi zumbela ku ya ka juwiji a txi ya khene: ‘Ni kombela ku timhaka tangu ni wu ni nga mangalelana nayo u ti thetha kha kwati.’ 4 Ngu mbimo yo lapha ene kha tumela, se ngu msana, ene a to pimisa a txi: ‘Hambiku ni si thaviko Txizimu ni kwa mbi na mhaka ni m’thu, 5 akuwa awu wamsikati a zumbelako ku ni kulumela na thetha kwati mhaka yakwe kasiku a si swi e simama e ni karata ngu txikombelo txakwe.’” 6 Se Mkoma a to khene: “Hi nga pfani a ti juwiji a nga womba hambiku i si nga ku wo lulama! 7 Ina Txizimu txi nga tandeka kulamulela ava txi nga va langa, ava va dilako wusiku ni mitshikari masoni ka txona kani, i si nga eto basi, Txizimu txa kombisa kutimisela kwawe. 8 Na mi gela ku khani, Txizimu txi na va lamulela ngu txi kuluveta. Hambi keto, kuwuyani ka Mwanana wa M’thu, ina a na ta mana likholo lo fana ni liya hamafuni hawa kani?”

9 A to tshumela kambe e va gela tximwani txidinganiso mayelano ni va va nga txi ti gela ku mbo lulama ni kuwona vamwani i si nga va txilo a txi khene: 10 “Ku ti ni majaha mambidi ma nga tsula dithempeleni kasi ku ya khongela, mmweyo i ti Mfarisi aniko mmwani i ti mkhupisi. 11 Mfarisi a to ema e khata kumaha mkombelo ngu mbiluni kwakwe a txi khene: ‘Txizimu, na kubonga nguko ani kha ni fani ni vathu vamwani i ku sidambu, vabihi ni magelegele, hambi kufana ni mkhupisi wuwa. 12 Na jejuwara kumbidi ngu divhiki, ni kuningela sa wugumi ka sotshe si ni thumako.’ 13 Aniko mkhupisi, a ti emile ngu kule, a si ti koti ni ku guleta maso e wona nzumani, a to ti peka khana a txi khene: ‘Txizimu txangu ni pfele wusiwana nguko ni muonhi.’ 14 Na mi gela ku khani, wamwamna wule a wite ngu dithempeleni i di wo lulama ngutu kupinda Mfarisi. Nguko wuhi ni wuhi a ti guletako a na vekwa hahatshi, aniko awu a ti vekako hahatshi a na guletwa.”

15 Se vathu va txi m’tisela vanana vavadotho kasiku e va gwesa, kambe mbimo yi vagondiswa va nga ti wona va to khata ku va tsimba. 16 Kambe Jesu a to rumisa ku ku tiswa vanana, a txi khene: “Lekani vanana ve ta kwangu, mi nga va tsimbiseni, nguko Mfumo wa Txizimu wu lumba vathu vo fana ni vanana. 17 Ani na mi gela ditshuri ti to: Awule a si amukeliko Mfumo wa Txizimu kufana ni mwanana, kha na mbi sikota kuwulela ka wona.”

18 Mmweyo wa vathangeli wa Vajudha a to m’wotisa a txi khene: “M’gondisi wamnene, ngu tihi ati ni fanelako ku ti maha kasiku ni mana wutomi wo mbi guma?” 19 Se Jesu a to m’gela ku khene: “Ngu kutxani u txi ni dhana ku ni wamnene kani? Kha ngaho wu i ku wamnene hahanze ka mmweyo dwe, i ku Txizimu. 20 Awe wa yi ziva milayo ayi yi ku: ‘U nga mahe wugango, u nga daye, u nga pe, u nga ningele wufakazi wa makuhu, kombisa txithavo ka tate wako ni mame wako.’” 21 Se dijaha dile di to kha dona: ‘Na yi londisa yotshe milayo yiya ku khukhela wuwananani kwangu.” 22 Mbimo yi Jesu a nga pfa eto a to m’xamula ku khene: “U ngadi u txi kelelelwa ngu txa tximwetxo dwe. Tsula u ya xavisa sotshe si u ku naso u teka male ya kona u ninga sisiwana, se thomba yako yi na va nzumani, msana keto, ngono u ta va m’londeteli wangu.” 23 Mbimo yi dijaha dile di nga pfa eto, di to pandiseka ngutu nguko di ti ganyile ngutu.

24 Jesu a to m’wonetela a gwita a txi khene: “Ti na karata ngutu ku ava vo ganya ve bela ka Mfumo wa Txizimu! 25 Ngu toneto, ta hehuka ku dikamelo di pinda ngu ha ka ditshoko da txhingani yo runga ngu yona, kupinda ku m’thu wo ganya e bela ka Mfumo wa Txizimu.” 26 Ava va nga ti pfa eto va to kha vona: “Ina waho a no huluka?” 27 Se ene a to khene: “Ati ti si kotekiko ka vathu ta koteka ka Txizimu.” 28 Kambe Pedro a to khene: “Phela hi lekile sotshe hi nga ti naso hi ku londisela.” 29 Ene a to va gela ku khene: “Na mi gela ditshuri ni txi khani, kha nga ho wu a nga leka mti, msikati, vakoma ni vananda, tate mwendo vanana ngu mhaka ya Mfumo wa Txizimu, 30 awu a no mbi amukela sa singi ka timbimo tiya, se ka mbimo yi yi tako e ta mana wutomi wo mbi guma.”

31 Msana keto a to dhana va va 12 ngu didhawa a txi khene: “Phela akuwa hi yako Jerusalema ti na ya hetiseka totshe ti ti nga bhalwa ngu vaprofeti mayelano ni Mwanana wa M’thu. 32 Ngu txikombiso, ene a na ningelwa ka vamatiko, vona va na m’poyilela, ve m’xanisa ni ku m’thurela. 33 Msana ko m’kwapela, va na m’daya, aniko ngu ditshiku da wuraru ene a na wuswa.” 34 Kambe vona kha va pfisisa txilo, nguko txhamuselo ya mapswi yawa yi ti ngadi sisate kwawe, kha va mana txilo ka ti ti nga wombwa.

35 Mbimo yi Jesu a nga ti hafuhi ni kuhoka Jeriko, ku ti ni wamwamna wa dibhofu a nga ti khalahatshile hafuhi ni nzila a txi kombela jimola. 36 Aku a nga pfa to ku ti pinda txitshungu, a to wotisa to ku ti maheka txani. 37 Se va to m’gela ku kha vona: “I Jesu wa Nazareta a pindako!” 38 Se ene a to kwangula a txi khene: “Jesu Mwanana wa Dhavhidha, ni pfele wusiwana!” 39 Ava va nga ti masoni kwakwe va to khata ku m’kawuka va txi m’gela ti to e malala, kambe ene a to simama e kwangula a txi khene: “Mwana Dhavhidha, ni pfele wusiwana!” 40 Jesu a to ema, e rumisa ti to ku tiswa wamwamna wule. Msana ko m’tshuketela, Jesu a to m’wotisa ku khene: 41 “U lava ti to ni kumahela txani?” Se ene a to khene: “Mkoma, maha ti to ni tshumela ni wona.” 42 Se Jesu a to m’gela ku khene: “Tshumela u wona, likholo lako li ku hanyisile.” 43 Kunukunuko a to tshumela e wona e khata ku m’londisa na a txi dhumisa Txizimu. Se votshe vale va nga ti wona, ni vona va to dhumisa Txizimu.

19 Jesu a to bela didhoropani ka Jeriko e di tshawunyeta. 2 Ku ti ni wamwamna wo kari a nga txi dhanwa ku i Zakewu, ene i ti mthangeli wa vakhupisi ni ku a ti ganyile. 3 A txi zama kuwona to i ti mani Jesu, kambe a si ti koti ngu mhaka ya txitshungu nguko ene a ti komile. 4 Se a to tutuma e ya masoni, e ya kwela txitimwi ka mkuwu kasi ku m’wona nguko ene a ndi na pinda ngu hale. 5 Mbimo yi Jesu a nga hoka ka wukhalo wule a to gula maso e wona txitimwi e m’gela ku khene: “Zakewu, txhika ngu txikuluveta nguko nyamsi ni fanete kuya zumba mtini kwako.” 6 Se a to txhika ngu txikuluveta e mu amukela ngu kutsaka. 7 Mbimo yi va nga wona eto votshe va to khata kungungurukela va txi kha vona: “Ene a endete nyumbani ka wamwamna wu i ku muonhi.” 8 Kambe Zakewu a to khukha e gela Mkoma a txi khene: “Mkoma ni na ninga sisiwana hafu ya silo sangu, ni ku ngako a diho wu ni nga m’drabhara ni na m’tshumetela ka mune.” 9 Se Jesu a to m’gela ku khene: “Nyamsi kuponiswa ku wulete mtini muwa nguko awuwa nene i mwanana wa Abrahamu. 10 Nguko Mwanana wa M’thu a tete ku ta lava ni kuponisa ava va nga ti mwalate.”

11 Va txi ngadi ve engisela timhaka tiya, Jesu a to va gela tximwani txidinganiso nguko a ti hafuhi ni Jerusalema ni ku vona va ti pimisa ti to Mfumo wa Txizimu wu ndi na ta ngu txikuluveta. 12 A txi khene: “Wamwamna wo kari awu i nga ti mwanana wa mkoma, a to enda e ya ka ditiko da kule kasi kuya ningwa wukoma e tshumela e wuya. 13 Se a to dhana 10 wa sithumi sakwe e si ninga 10 wa tipondo* a txi khene: ‘Mahani mabhindu ngu tona kala kuza ni wuya.’ 14 Kambe vathu va ditiko dakwe va txi m’nyenya, se va to rumela vaemeli kasiku ve ya m’gela ku kha vona: ‘Kha hi ti lavi kufumwa ngu m’thu wuwa.’

15 “Msana kova a di mahilwe mkoma a to wuya e ta dhana sithumi sile a nga ti si ningile male kasi kuziva ti to nji txani txi mmwani ni mmwani a nga bhindula txona. 16 Se txi to ta txo khata txi ta khene: ‘Mkoma, pondo yako yi bhindute 10 wa tipondo.’ 17 Se ene e txi gela ku khene:‘ U mahile tona txithumi txa txinene! Aku u nga thembeka ka simaha sa sidotho, u na fuma 10 wa madhoropa.’ 18 Txi to ta txa wumbidi txi ta khene: ‘Mkoma, pondo yako yi bhindute mtxhanu wa tipondo.’ 19 A to gela txithumi txile a txi khene: ‘Nanawe fuma mtxhanu wa madhoropa.’ 20 Kambe txi to hoka tximwani txithumi txi txi ta kha txona: ‘Mkoma, ndiye pondo yako ni nga ti yi sisile mu ka nguwo. 21 Nguko ni thavile aku awe u ku m’thu wo karata, u teka si u nga mbi veka ni kuelula asi u nga mbi phaya.’ 22 Ene a to txi gela ku khene: ‘Ni na kulamula ngu mapswi ako, awe txithumiwe txo biha. Kasi u txi ti ziva ti to ani ni teka si ni nga mbi veka ni ku elula si ni nga mbi phaya? 23 Ngu kutxani u nga mbi teka male yangu u ya yi veka bhanku kani? Kuwuyani kwangu ni ndi na ta yi teka kumweko ni yi yi nga bhindula.’

24 “Se a to gela vale va nga ti hale a txi khene: ‘M’tekeleni pondo eyo, mi yi ningela ka wule a ku ni 10 wa tipondo.’ 25 Vona va to m’gela ku kha vona: ‘Mkoma, ene se a ni 10 wa tipondo!’ 26 Ene a to xamula a txi khene: ‘Na mi gela ti to wuhi ni wuhi a ku naso, a na engetelwa simwani, aniko awule a si ngako ni txilo, hambi sona sile sa sidotho a ku naso a na tekelwa. 27 Aniko, valala vangu ava va nga mbi lava ku ni va mkoma wawe, va tiseni mi ta va daya masoni kwangu.’”

28 Msana ko womba timhaka tiya, a to simama e kwelela Jerusalema. 29 Mbimo yi a nga hoka hafuhi ni Bhetfaje ni Bhetaniya ka mmango wu wu dhanwako ku mbwa Miolivha, a to rumela vambidi va vagondiswa vakwe, 30 e va gela ku khene: “Tsulani ka txidhoropana txi ku hafuhi hawa, mi di bete mi na ya mana tximbongolana atxi txi si khali kugadhwa ngu m’thu txi di sungilwe. Txi txhatxheni mi ta natxo kheno. 31 Kambe ngako m’thu a txi mi wotisa ku khene: ‘Ngu kutxani mi txi txi txhatxha? Mi nda ni khanu: ‘Mkoma ngene a txi lavako.’” 32 Avale va nga ti rumilwe va to tsula ve ya mana nga ti a nga ti va gelisile tona. 33 Kambe mbimo yi va nga txi txhatxha tximbongolana, va nyamne va to wotisa va txi kha vona: “Ngu kutxani mi txi txhatxha tximbongolana?” 34 Va to xamula va txi kha vona: “Mkoma ngene a txi lavako.” 35 Se va to txi teka ve txi yisa ka Jesu ve kapekela tinguwo tawe txitimwi ka txona ve gwita ve gadhisa Jesu.

36 Mbimo yi va nga txi tsimbila, vona va txi ateta tinguwo tawe hanzila. 37 Mbimo yi va nga hoka ka nzila yi yi tako ngu Mmangoni ka Miolivha, txotshe txitshungu txa vagondiswa txi to khata kutsaka txi dhumisa Txizimu ngu dipswi do guleka ngu mhaka ya yotshe mithumo yo xamalisa yi va nga ti yi woni, 38 va txi kha vona: “A katekile awu a tako i di Mkoma ngu ditina da Jehovha!* Kurula nzumani, txi na dhumiswi Txizimu txi ku txitimwi nzumani!” 39 Se vamwani ka Vafarisi va nga ti ti ho hagari ka txitshungu va to m’gela ku kha vona: “Mgondisi, kawuka vagondiswa vako.” 40 Kambe ene a to va xamula a txi khene: “Na mi gela ti to, ngako vona va txi malala marigwi yawa ma ndi na kwangula.”

41 Mbimo yi a nga hoka hafuhi a to wona didhoropa se e di dilela, 42 a txi khene: “I ti ku awe wo ti pfisisa timhaka ti ti no kumaha u va ni kurula— kambe konkuwa u sisaletwe. 43 Nguko ma ta masiku ya valala vako va no ta kubhiyela ngu tiphande to vatwa ni ku kuranganyeta ngu otshe madhawa. 44 Va na kulovisa awe ni vanana va va ku kwako ni ku kha va na mbi siya kwako dirigwi txitimwi ka dirigwi, nguko khwa yi ziva mbimo yi u ndi no endelwa ngu yona.”

45 Ene a to bela dithempeleni e hinga va va nga txi xavisa, 46 e va gela ku khene: “Ti bhatwe ti to nyumba yangu yi na va nyumba ya mikombelo, kambe anu mi yi maha txikina txa makhokhokho.”

47 Ene a txi simama e gondisa dithempeleni ditshiku ni ditshiku. Kambe tinduna ta vaprista, vamabhalani ni vathangeli va txi lava ku m’daya, 48 A ni ku va si mani nzila yo maha eto nguko txotshe txitshungu txi ti mu engisela kha kwati.

20 Ngu ditshiku do kari na a txi gondisa vathu dithempeleni ni kutxhumayela mahungu a manene, tinduna ta vaprista, vamabhalani ni madhota va to ta kwakwe, 2 va txi ta kha vona: “Hi nga hi gela, u wu mana hani mtamo wo maha totshe tiya? I mani a nga ku txhusa kasiku u maha tiya? 3 Ene a to va xamula a txi khene: “Nanani ni na mi maha txiwotiso, se ni xamuleni: 4 Mtamo wa Johani wo bhabhatisa, wu ta ngu nzumani mwendo wu ta ngu ka vathu kani?” 5 Va to pimisa ngu txawe va txi kha vona: “Ngako hi txo khathu: ‘Wu ta ngu nzumani,’ ene a na khene: ‘Ngu kutxani mi nga mbi kholwa kwakwe?’ 6 Aniko hi txo khathu: ‘A wu mana ka vathu,’ txitshungu txotshe txi na hi balisela* ngu marigwi nguko txi txi kholwa ti to Johani i ti mprofeti.” 7 Se va to kha vona kha va ti zivi to wu txi ta ngu hani. 8 Jesu a to va xamula a txi khene: “Nanani kha ni mi geli ti to mtamo wu ni ku nawo wo maha tiya wu ta ngu hani.”

9 Se a to khata kutxhamusela vathu txidinganiso txiya: “Wamwamna wo kari a to dima thembwe ya mivhinya, e gwita e yi ningela ka vadimi se e enda ngu mbimo yo lapha. 10 Ngu mbimo ya kuelula a to rumela txithumi txakwe ka vadimi kasiku va txi ya m’ninga mihando yo kari ya mivhinya. Aniko, vadimi va to txi peka ve txi tshumeta txi si nga ni txilo. 11 A to rumela kambe txithumi tximwani. Atxiya ni txona va to txi peka, ve txi poyila, ve txi tshumeta txi si nga ni txilo. 12 A to engeta e rumela txithumi txa wuraru. Atxiya ni txona va to ya txi peka ve txi hinga. 13 Se nyamne wa thembwe ya mivhinya a to khene: ‘Ni na maha txani? Ni na rumela mwanana wangu wo randeka, kutilava ene va na ya m’xonipha.’ 14 Mbimo yi vadimi va nga m’wona va to gelana va txi kha vona: ‘Awuwa ngene a no sala ni thomba. He m’dayeni kasiku thomba yakwe yi va yathu.’ 15 Vona va to m’humisa hahanze ka thembwe ve m’daya. Se nyamne wa thembwe a na va maha txani? 16 Ene a na wuya e ta daya vadimi vale, e ningela thembwe yile ka vamwani.”

Mbimo yi va nga pfa eto, va to kha vona: “Eto ti nga thuke ti maheka!” 17 Kambe a to va wonetela a txi khene: “Se ti lava kuwomba txani ti ti nga bhalwa to: ‘Dirigwi adiya vaaki va nga di eyisa ngu dona di nga va dirigwi da lisima ka otshe?’ 18 Wuhi ni wuhi a no wa ka dona a na khatukela. Ni wule a no welwa ngu dona a na phwaraswa.”

19 Vamabhalani ni tinduna ta vaprista va txi lava ku m’ñola ka yona mbimo yile, nguko va ti pfisisile ti to a ti mahela vona txidinganiso txile, aniko va txi thava txitshungu. 20 Msana ko m’wonetela va to rumela vathu va nga ti va xavile txihunjani, va txi ya ti maha vathu vo lulama kasiku ve m’riyela ka ti a nga txi ti womba ti to ve m’ningela ka valamuli ni wukoma. 21 Ve m’wotisa ku kha vona: “Mgondisi, athu ha ti ziva ti to awe u womba-womba ni kugondisa kwati ni ku khu yi ngu kuwona khohe aniko u gondisa nzila ya Txizimu ngu ditshuri: 22 Ina ta pfala* kuhakela resa ka Khezari mwendo nem?” 23 Kambe ngu kuziva wukanganyisi wawe a to va gela ku khene: 24 “Hi nga ni tiselani didhenari. Mfota wuwa ni si si nga bhalwa hawa nza mani?” Va to xamula va txi kha vona: “Nza Khezari.” 25 Se a to khene: “Ngu toneto, ningelani ka Khezari asi i ku sa Khezari, ni ka Txizimu asi i ku sa Txizimu.” 26 Se kha va sikota ku m’zweta ka mapswi ya a nga womba masoni ka txitshungu, kambe va to kayee ngu kuxamatiswa ngu xamulo yakwe.

27 Kambe Vasadhusi vo kari, ava va nga txi womba ti to kha ku na kuwuswa ka vafi va to m’wotisa va txi kha vona: 28 “Mgondisi, Mosi a bhate ti to: ‘Ngako wamwamna a txi fa e siya msikati a si nga ni vanana, mnanda* wakwe a na txhadhe ni kunyadha wakwe, kasi ku vanana ava a no veleka ve lumba mkoma wakwe.’ 29 Ku to maheka to ku ti ni 7 wa majaha i nga ti vaka mkoma ni mnanda. Wo khata a to teka msikati, kambe a to fa a si nga ni vanana. 30 Ti mahisile toneto ka wa wumbidi, 31 ni wa wuraru kala wa wu 7. Se votshe va to fa va sa velekisa vanana wule wamsikati. 32 Ngu magwito, nene wule wamsikati a to fa. 33 Mbimo yi vafi va no wuswa, a na ta va msikati wa mani? Nguko votshe vale va 7 va tekanile nayo.”

34 Se Jesu a to va gela ku khene: “Vanana va nguva yiya va txhadha, 35 kambe ava Txizimu txi va tumelelako ku ta hanya ka mbimo yoneyo ya kuwuswa ka vakufa kha va na mbi ta txhadha. 36 Vona kha va na mbi ngadi ve fa, nguko va fana ni tingilozi ni ku aku va no wuswa ngu ka vakufa va na va vanana va Txizimu. 37 Kambe hambi Mosi a ti kombisile ti to vafi va na wuswa ka mhaka ya txipopo txo tura mbimo yi a nga womba ti to Jehovha* ‘Txizimu txa Abrahamu, Txizimu txa Izaki, ni Txizimu txa Jakobe.’ 38 Ene hi nga Txizimu txa vakufa, kambe Txizimu txa va va hanyako nguko kwakwe votshe vava va hanya.” 39 Vamabhalani vo kari va to xamula va txi kha vona: “Mgondisi u xamute kwati.” 40 Nguko va si tsani ku m’maha tximwani txiwotiso.

41 Se a to va wotisa ku khene: “Ngu kutxani mi txi khanu Kristu i mwanana wa Dhavhidha kani? 42 Nguko Dhavhidha apune a wombile ka dibhuku da Masalmo a txi khene: ‘Jehovha* a womba tiya ka Mfumeli wangu a txi khene: “Khalahatsha txineneni kwangu, 43 kala kuza ni veka valala vako hahatshi, ni va maha txikhigelo txa mikondo yako.’” 44 Se aku Dhavhidha a m’dhanako ku Mfumeli, ti mahisa kutxani ku i va i di mwanana wakwe?”

45 Mbimo yi txitshungu txi nga ti mu engisela, ene a to khene ka vagondiswa vakwe: 46 “Ti woneleni ka vamabhalani, vona va dhunda kuambala siambalo so lapha ni kuloswa mu ko tala vathu, va di masinagogani va dhunda kuzumba ka situlu sa masoni, va di mibusoni va dhunda kuzumba timezani. 47 Vona va honyola tinyumba* ta va vo felwa ngu vavamna, ve maha mikombelo yo lapha kasi kuwonwa ngu vathu. Vona va na ta punirwa ta bhom.”

21 Jesu a to gula maso e wona ava vo ganya va txi beta miningelo yawe ka makaxa a miningelo. 2 A to wona wamsikati wa txisiwana wo felwa ngu wamwamna, a txi beta ka ona simaleana simbidi so va i si nga sa boti.* 3 Se a txi khene: “Na mi gela ditshuri ni txi khani: Wamsikati wuwa wa txisiwana wo felwa ngu mwamna, a ningete sasingi kupinda votshe. 4 Nguko votshe vava, va betile a si va nga hungula ka si va ku naso. Kambe hambiku ene i ku txisiwana a betile sotshe asi a nga ti naso kasi ku ti hanyisa ngu sona.”

5 Msana keto, mbimo yi vathu vamwani va nga txi womba-womba ngu dithempele, nzila yi di nga tshuriselwa ngu yona ngu marigwi o tshura, ni ngu miningelo yi yi nga txi ningelwa ka Txizimu, 6 a to khene: “Mayelano ni si mi si wonako, ya ta mbimo yi dirigwi di no mbi va txitimwi ka dimwani ngu kuva ma di khundumusilwe.” 7 Va to m’wotisa va txi kha vona: “Mgondisi, ti na maheka ngu mbimo muni tiya ni ku txi na va txihi txikombiso txa ti to timhaka tiya ti hafuhi ni kumaheka?” 8 Se ene a to khene: “Ti woneleni kasiku mi si kanganyiswi ngu m’thu, nguko vavangi va nata ngu ditina dangu va txi ta kha vona: ‘Ani ngani Kristu,’ ni kutshumela va txi: ‘Magwito se ma hafuhi.’ Mi nga va londiseni. 9 I si nga eto basi, mbimo yi mi no pfa madungula a tiyimbi ni mazunga,* mi nga thaveni, nguko eto ti fanete kukhata ti maheka, kambe magwito kha ma na mbi tekela kuhoka.”

10 Se a to va gela ku khene: “Ditiko di na wukela ditiko dimwani ni mifumo yi na wukelana. 11 Ku nava ni kuzinginikela ka hombe ka mafu makhalo o tala, tinzala ni mitungu, ni ku vathu va na wona sixamaliso so thisa ni sikombiso sa hombe si txita ngu nzumani.

12 “Kambe na ti sinzi kumaheka totshe tiya, mi na ñolwa ni kuxaniswa, va na mi ningela masinagogani ni majele. Ni ku mi na ningelwa ka vakoma ni vathangeli ngu mhaka ya ditina dangu. 13 Eto ti na mi tulela nzila yo mi ningela wufakazi. 14 Ngu toneto, mi nga karatekeni timbiluni kwanu ngu kupimisa ti to mi na xamulisa kutxani kasi ku ti emela, 15 nguko ani na mi ninga mapswi ni wuzivi awu votshe vakaneti vanu va no mbi sikota ku wu xamula hambi ku wu kaneta. 16 I si nga eto basi, mi na ningelwa hambi ngu vaveleki vanu, vananu,* maxaka hambi ngu vangana ni ku va na ningela vamwani kwanu kasiku ve dawa, 17 mi na nyenywa ngu vathu votshe ngu mhaka ya ditina dangu. 18 Kambe kha ku na mbi mwalala hambi msisi wumwewo ha msungo kwanu. 19 Ngako mi txi timisela, mi na ponisa wutomi wanu.

20 “Mbimo yi mi no wona Jerusalema a di randetwe ngu masotxhwa, ti ziveni ti to kuloviswa kwakwe ku hafuhi. 21 Ava va ku Judheya va na tutumi ve ya mimangoni, ava va nova va di hagari kwakwe va na hume, ni vale va no va di thembweni va nga bele ka dona.* 22 Nguko masiku eyo ngo maha wulamuli kasiku ti tatiseka totshe ti ti nga bhalwa. 23 No tsetsa vavasikati ava va no ta manwa va di ni sirumbo, ni va va no ta manwa va txi mamisa ka masiku oneyo. Nguko ku na va ni xanisa ya hombe ka ditiko, ni ku vathu va na xaniswa. 24 Nguko vona va na dawa ngu ditxhari, va na maha ti khumbi ta otshe matiko ni ku Jerusalema a na kandetelwa ngu vamatiko kala kuza timbimo ta vamatiko ti tatiseka.

25 “Ku na tshumela ku va ni sikombiso ka ditambo, mtxima, ni ka tinyeleti, ni ku vathu vamatiko va na dila va si ti zivi ti to va na maha txani, ngu mhaka ya kudhuma ka linene ni kuhenya ka lona. 26 Vathu va na tsivala ngu kuthava ngu mhaka ya ti ti no maheka hamafuni, nguko sotshe si ku nzumani si na zuzwa. 27 Se ngu mbimo yoneyo va na wona Mwanana wa M’thu a txi ta ngu marefuni a di ni mtamo ni wudhumo wa hombe. 28 Kambe mbimo yi atiya ti no khata kumaheka, khukhani mi ema mi gula tithamo, nguko kuponiswa kwanu ku hafuhi.”

29 Se a to va gela tximwani txidinganiso a txi khene: “Wonani mkuwu ni mindonga yimwani. 30 Mbimo yi yi khatako kuthunga, anu ma ti ziva ti to malanga* ma hafuhi. 31 Kufana ni toneto, ngako mi txi wona tiya ti txi humelela, ti ziveni ti to Mfumo wa Txizimu wu hafuhi. 32 Ngu ditshuri na mi gela ku khani, vathu va nguva yiya* kha va na mbi guma votshe, atiya ti si se maheka. 33 Nzuma ni mafu si na pinda, kambe mapswi angu kha ma na mbi pinda.

34 “Kambe ti woneleni ti to timbilu tanu ti si talelwi ngu kudya ni kusela ngutu, ni kuvilela ngu sa wutomi wuwa ti to ditshiku dile di si ta mi mana mi sa di rinzela 35 nga mlawu. Nguko di na wela votshe avale va hanyako hamafuni. 36 Ngu toneto, zumbani mi txi wonelela ni ku khongela mbimo yotshe, kasiku mi ta sikota kuhuluka ka totshe ti ti no maheka ni kuema mi di tsani masoni ka mwanana wa m’thu.”

37 Mixo ni mitshikari, ene a txi gondisa dithempeleni, kambe ni wusiku ene a txi huma e ya zumba ka mmango wu wu dhanwako ku mbwa Miolivha. 38 Se txitshungu txotshe txi txiya kwakwe ni mixo ngutu kasi ku ya mu engisela dithempeleni.

22 Mbimo yi wu nga txi tshuketela M’buso wa Mapawa o mbi Tshumbelwa wu dhanwako ku i Paxkwa, 2 tinduna ta vaprista ni vamabhalani va txi lavetela nzila ya yinene yo m’daya, nguko va txi thava txitshungu. 3 Se Sathani a to bela ka Judha a nga txi dhanwa ku i Iskariyoti i nga ti mmweyo wa vale va 12. 4 Ene a to yela tinduna ta vaprista ni ka vawoneleli va dithempele kasi ku ya womba-womba navo to a nga m’ningelisa kutxani kwawe. 5 Vona va to tsaka ngutu ngu kupfa eto, ve tumelelana nayo ku m’ninga male ya prata. 6 Judhasi a to tumela e khata kulavetela mbimo ya yinene yo m’ningela kwawe na ku si nga ni txitshungu hafuhi.

7 Di to hoka ditshiku da M’buso wa Mapawa o mbi Tshumbelwa, i ku ditshiku di ku nga ti mahwa mningelo wa Paxkwa. 8 Se Jesu a to rumela Pedro ni Johani e va gela ku khene: “Tsulani mi ya lungisela Paxkwa kasiku hi ta dya.” 9 Vona va to m’wotisa va txi kha vona: “Mkoma, u lava ti to hi ya yi lulamisela hayi?” 10 Ene a to va gela ku khene: “Mbimo yi mi no ya bela didhoropani, mi na mana wamwamna wo kari a di rwate txidhuwana* txa mati, mlondiseni kala mtini mu a no bela kona. 11 Mi ya gela nyamne wa mti mi txi khanu: ‘Mgondisi a khene: “Yi hayi nyumba ya vapfhumba ayi ni no dyela ka yona Paxkwa ni vagondiswa vangu kani? 12 Se a na mi komba sala ya hombe yi ku txitimwi, yi nga tshuriselwa. Lulamiselani konemo.” 13 Se va to tsula ve ya mana nga ti Jesu a nga ti va gelisile tona, se va to lungisela Paxkwa.

14 Yi di hokile mbimo, ene a to khalahatsha hamezani ni vagondiswa vakwe. 15 Se e va gela ku khene: “Kale ni di ti emete kudya Paxkwa yiya ni nanu, ni si nzi kuxaniswa, 16 nguko na mi gela ku khani, na mbi yi dya kambe na totshe ti si nzi kutatiseka ka Mfumo wa Txizimu.” 17 Se a to amukela kopo e bonga a txi khene: “Tekani kopo yi ya mi siyetisana ngu yona, 18 nguko na mi gela ku khani, kha ni na mbi swa ni sela kambe mihando ya mvhinya kala kuza wu ta Mfumo wa Txizimu.”

19 A to teka kambe dipawa e bonga e di khema e va ninga a txi khene: “Dipawa diya di emela mmidi wangu awu wu no ningelwa ngu mhaka yanu. Simamani mi maha tiya kasi ku ni khumbula ngu tona.” 20 Msana ka ku va va di dyite, a to mahisa toneto kambe ngu kopo, a txi khene: “Kopo yiya yi emela mnoha wangu wa txitumelelano awu wu no theketwa ngu mhaka yanu.

21 “Kambe zivani ti to awu a no ni xavisa a ni nani hamezani. 22 Ditshuri ti to Mwanana wa M’thu wa tsula nga ha timhaka takwe ti nga bhaliswa tona, kambe awu a xavisako Mwanana wa M’thu a na ti wona!” 23 Se va to khata ku wotisana ngu txawe ku i mani a ndi no maha toneto.

24 Se va to khata kukanetisana ngu txawe va txi lava kuziva ti to i mani i nga ti wa hombe. 25 Kambe a to va gela ku khene: “Vakoma va fuma vamwani ngu ku va karatela, ni vale va thangelako va dhanwa ku mba mahi va ta tinene. 26 Kambe ti nga mahisi eto hagari kwanu. Awu i ku wa hombe a na ti mahe wa m’dotho, ni wule a thangelako a na ti mahi txithumi. 27 Nguko i mani i ku wa hombe? Ngu wule a nga khalahatsha hamezani mwendo awule i ku txithumi? Ina hi nga wule a ku hamezani? Kambe ani ni hagari kwanu kota wule a mi thumelako.

28 “Anu nganu mi nga timisela kumweko ni nani ka siduko sangu, 29 ngu toneto ni maha txitumelelano txa mfumo ni nanu, kufana ni ku Tate wangu a nga maha txitumelelano ni nani. 30 Kasiku anu mi dya ni kusela hamezani ka Mfumo wangu, ni kuta khalahatsha ka sikhalo sa wukoma kasi kulamula 12 wa tihunzu ta Israyeli.

31 “Simoni, Simoni! Sathani a lavile ti to motshenu mi heherwa* nga trigu. 32 Kambe ni ku kombelete kasiku likholo lako li si holi. Se awe mbimo yi u no tshumela, tsanisa vananu.” 33 Se Simoni a to khene: “Mkoma, ani ni ti emisete kutsula ni nawe, hambi i txo va kuya jele mwendo kuya fa ni nawe.” 34 Kambe Jesu a to khene: “Pedro na kugela ku khani, nyamsi mkuku kha wu na mbi emba u si se womba ku khawe khu ni zivi sikhati siraru.”

35 Ene a to engeta a txi khene: “Mbimo yi ni nga mi rumela mi si nga ni txipatxhi txa male, mkwama wa mbuva ni masandaliya, ina txaho txi txi nga mi pwatekela? Vona va to xamula va txi kha vona: “Ahim-him!” 36 Se a to va gela a txi khene: “Kambe konku awu a ku ni txipatxhi txa male, a na txi teke, awu a ku ni mkwama wa mbuva a na wu teke ni wule a si ngaku ni ditxhari a na xavise siambalo sakwe e di xava. 37 Nguko ani na mi gela ku khani, ti fanete kutatiseka kwangu atile ti nga bhalwa to: ‘Ene a batwe kumweko ni vaonhi.’ Eto ta tatiseka kwangu. 38 Se vona va to kha vona: “Mkoma, hi ni matxhari mambidi hawa.” Ene a nje ku khene: “Ma dingana!”

39 A to huma e ya Mmangoni ka Miolivha nga mtolovelo, se vagondiswa vakwe va to mlondisa. 40 Mbimo yi va nga hoka ka wukhalo wule, ene a to va gela ku khene: “Simamani mi khongela kasiku mi si xulwi ngu txiduko.” 41 Se Jesu a to khukha e ya kulenyana, e ya khizama e khata kukhongela, 42 a txi khene: “Tata, ngako u txi ti lava, tshuketisa kopo yiya kule ni nani. Hambiketo, ku nga maheke kuranda kwangu, kambe ku na maheke kuranda kwako.” 43 Ku to ta ngilozi ngu nzumani yi ta m’tsanisa. 44 Kambe ene a to karateka, e khongela ngu mtamo, se mnyuko wakwe wu to nga mathotho a mnoha ma nga txi wa hahatshi. 45 Mbimo yi a nga gwita kukhongela a to tsula ka vagondiswa, e ya va mana va di otete va di gumile mtamo ngu mhaka ya ku karateka. 46 Se a to va gela ku khene: “Ngu kutxani mi txi otela? Wukani mi simama mi khongela kasiku mi si xulwi ngu txiduko.”

47 A txi ngadi a txi womba-womba, ku to hoka txitshungu txi nga ti thangelwa ngu Judhasi mmweyo wa va 12, se ene a to tshuketela Jesu e m’nyuta. 48 Kambe Jesu a to khene: “Judhasi u ningela Mwanana wa M’thu ngu ku m’nyuta?” 49 Mbimo yi ava va nga ti nayo va nga wona tiya ti txi maheka va to kha vona: “Mkoma, ina hi nga va limaza ngu ditxhari kani?” 50 Mmweyo wawe a to swomola ditxhari e lwisana ni txithumi txa mprista wa hombe e txi wila nzeve ya txinene.* 51 Kambe Jesu a to khene: “U nga mahe eto!” Se a to gwesa nzeve e m’hanyisa. 52 Jesu a to gela tinduna ta vaprista, vawoneleli va dithempele ni madhota ya ma nga ti tile kasi ku ta m’ñola a txi khene: “Anu mi ni tela mi di ni matxhari ni migomba nga no va dikhamba. 53 Mbimo yi ni nga ti ni nanu dithempeleni ditshiku ni ditshiku kha ma ni ñola, kambe ayiya i mbimo yanu ni ya kufuma ka txidema.”

54 Va to m’ñola ve tsula nayo mtini ka mprista wa hombe, se Pedro a txi va londisa ngu kule. 55 Mbimo yi va nga dhivela mndilo ha mthandani, va to khalahatsha, se Pedro a to tsula e ya ti pata navo. 56 Txithumi txo kari txa txisikati txi to wona Pedro a txi ora mndilo. Se txi m’wonisisa txi txi khene: “Wamwamna wuwa nene a ti ni Jesu.” 57 Kambe ene a to lamba a txi khene: “He wamsikati, ani eyo kha ni m’zivi.” 58 Msana ka mbimonyana, mmwani m’thu a to m’wona a txi khene: “Nanawe u mmweyo wawe.” Kambe Pedro a to khene: “Hemo, kha ni nga mmweyo wawe ani.” 59 Msana ka ku va ku di pindile diora, wamwamna mmwani a to simama a txi khene: “Ngu ditshuri, dijaha diya di ti ni nene nguko ni dona M’galileya!” 60 Kambe Pedro a to khene: “Hemo, kha ni ti zivi ti u womba-wombako ngu tona.” Se ka mbimo yoneyo, Pedro a txi ngadi a txi womba-womba, mkuku wu to emba. 61 Se Mkoma a to tshembereka e wona Pedro. Pedro a to khumbula mapswi a Mkoma a nga womba a txi khene: “Nyamsi na mkuku wu si se emba, awe u na ni lamba sikhati siraru.” 62 Se a to huma e dila ngutu ngu txiviti.

63 Ava va nga ti ñote Jesu va to khata ku m’poyilela, ve m’peka, 64 ni kutshumela ve m’fenengeta khohe va txi: “Hi nga profeta! I mani a nga ku peka?” 65 Va txi womba-womba mapswi o tala o m’ruketela.

66 Mbimo yi di nga txa, madhota a ditiko, tinduna ta vaprista ni vamabhalani va to sengeletana ve teka Jesu ve m’yisa ka Sanedri va txi kha vona: 67 “Ngako awe u di Kristu, hi gele.” Kambe ene a to va gela ku khene: “Hambi ni txo mi gela anu kha mi na mbi kholwa. 68 “I si nga eto basi, hambi ni txo mi wotisa, anu kha mi na mbi ni xamula. 69 Kambe kukhukhela ka konkuwa, Mwanana wa M’thu a na khalahatsha txineneni ka Txizimu.” 70 Koneho votshe va to m’wotisa va txi: “Se, awe u Mwanana wa Txizimu?” Ene a to xamula a txi khene: “Anu nganu mipune mi wombako ti to ni ene.” 71 Se va to kha vona: “Hi ngadi hi txi lava wufakazi wa txani kambe? Nguko athu hipune hi m’pfite a txi womba ngu txisofu txakwe.”

23 Se txotshe txitshungu txi to khukha txi m’heleketa ka Pilato. 2 Va txi khata ku m’lumbeta va txi kha vona: “Hi mani wamwamna wuwa a txi kuzetela ditiko dathu, a txi tsimbisa vathu kuhakela resa ka Khezari, ni ku a txi khene ene ngene Kristu Mkoma.” 3 Pilato a to m’wotisa a txi khene: “Ina awe u Mkoma wa Vajudha?” Se Jesu a to m’xamula a txi khene: “Awe upune ngawe u wombako.” 4 Pilato a to gela tinduna ta vaprista ni txitshungu a txi khene: “Kha ni woni mnando ka wamwamna wuwa.” 5 Kambe va to sinzisa va txi kha vona: “Ene a wusa vhilinganya hagari ka vathu ngu kugondisa kotshe Judheya kukhukhela Galileya kala muwa.” 6 Mbimo yi a nga pfa eto, Pilato a to wotisa ti to wamwamna wuwa mbwa Galileya kani. 7 Msana ko ziva ti to mbwa didhawa di a nga txi fuma Herodha, a to m’rumela kwakwe, ka masiku yale Herodha a ti maneka Jerusalema.

8 Mbimo yi Herodha a nga wona Jesu a to tsaka ngutu, nguko i ti kale a txi lava kuwona Jesu nguko a ti pfite to tala ngu ngene ni ku a txi verela kuwona txidiwukiso txo mahwa ngu ngene. 9 Se a to khata ku m’maha siwotiso so tala, kambe Jesu kha m’xamula ni txa tximwetxo. 10 Hambi keto tinduna ta vaprista ni vamabhalani va si emi ku m’lumbeta. 11 Se Herodha ni masotxhwa akwe va to m’txhipisa ni ku m’poyilela, ve mu ambeka siambalo so dhula* ve gwita ve m’tshumeta ka Pilato. 12 Kukhukhela ka dona ditshiku dile, Herodha ni Pilato va vite vangana hambiku kale va nga ti nyenyana.

13 Pilato a to dhana tinduna ta vaprista, vathangeli ni txitshungu 14 e va gela ku khene: “Anu mi ni tisete m’thu wuwa mi txi khanu a kuzetela vathu kuwukela mfumo. Ni m’thethisile masoni kwanu kambe kha na mana mnando wu mi m’lumbeta wona. 15 Herodha nene kha mana mnando ngu toneto nene a m’wuyisile kwathu. Ene kha maha txilo txo fanelwa ngu kudawa. 16 Ngu toneto ni na m’tsayisa ni gwita ni m’leka e tsula. 17 —— 18 Se txotshe txitshungu txi to kwangula txi txi: “Teka* eyo u txhatxha Bharabhasi!” 19 (Bharabhasi a ti betilwe jele ngu kuwukela wukoma ni kudaya m’thu.) 20 Pilato a to tshumela e womba-womba ni txitshungu, nguko a ti lava kutxhatxha Jesu. 21 Va to khata ku kwangula va txi kha vona: “A na hayekwe haphandeni eyo! A na hayekwe haphandeni eyo!” 22 Ene a to va wotisa ngu dikhambi da wuraru a txi khene: “Ngu kutxani?” Ngu tihi ti wamwamna wuwa a nga onha? Kha na mana txilo kwakwe txo fanelwa ngu kudawa. Ngu toneto na m’tsayisa ni gwita ni m’txhatxha.” 23 Se va to khata kusinzisa, ve kwangula ngutu ti to a na dawe, va to kwangula ha koza e tumela. 24 Pilato a to sunga kumaha ti va nga kombela. 25 Se a to txhusa m’thu wule va nga m’kombela, awu a nga ti betilwe jele ngu kuwukela wukoma ni kudaya m’thu, e ningela Jesu ti to ve maha kuranda kwawe.

26 Mbimo yi va nga txi tsula va to ñola Simoni wa Kirene, a nga txi ta ngu hahanze ka didhoropa ve m’rweka phande ya xanisa* e londisa Jesu. 27 Ku ti ni txitshungu txa hombe txi nga ti m’londisa kupata ni vavasikati va nga txi ti peka tikhana ngu kupandiseka ve dila. 28 Jesu a to tshembereka e gela vavasikati vale a txi khene: “Mahorana a Jerusalema mi nga dileni ngu mhaka yangu. Dilani ngu mhaka yanu ni ngu vanana vanu, 29 ma ta masiku yale vathu va no kha vona: “Vavasikati ava i ku sifule ni va va nga mbi veleka ni va va nga mbi mamisa va tsaka. 30 Va na khata kugela mimango va txi: ‘Hi weleni!’ Ve gela simangwana va txi: ‘Hi khubhunyeteni!’ 31 Se aku va mahako tiya mndonga wu txi ngadi wu txi thamba ani mbimo yi wu no wuna ko?”

32 Ku ti ni sigevenga simbidi asi ni sona si nga txi ya kudawani kumweko nayo. 33 Mbimo yi va nga hoka ka wukhalo awu wu dhanwako ku Txikwakwa, va to m’gogotela ha phandeni, ngu madhawani ku ti ni sigevenga sile, tximwetxo ngu txinene, tximwani ngu txibhabha.* 34 Se Jesu a txi khene: “Tata, va divalele nguko kha va ti zivi ti va mahako.” Ngu msana va to xaxuva tixolo kasi kuabana siambalo sakwe. 35 Se txitshungu txi to ema txi xalela. Kambe vathangeli va txi m’poyilela va txi kha vona: “Eyo a hanyisile vamwani, se a na ti hanyise apune ngako i di Kristu wu a nga sawulwa ngu Txizimu.” 36 Hambi masotxhwa ma txi m’poyilela, me tshuketa hafuhi kwakwe me m’ninga vhinya yo tsavela, 37 va txi kha vona: “Ngako u di Mkoma wa Vajudha, ti hanyise.” 38 Ngu txitimwi kwakwe ku ti bhatwe mapswi ya ma ku: “Awuwa Mkoma wa Vajudha.”

39 Mmweyo wa sigevenga si si nga ti gogotetwe a to khata kuruketela Jesu a txi khene: “Ni txi khani awe u Kristu! Ti hanyise u tshumela u hanyisa ni nathu!” 40 Txigevenga txile tximwani txi to m’kawuka txi txi kha txona: “Awe khu thavi Txizimu ni ka kudotho, phela athu hi amukela ati ti hi fanelako. 41 Athu hi kutsayiswani ngu mhaka ya mithumo yathu hipune, kambe wamwamna wuwa kha maha txilo txo biha.” 42 Se a to khene: “Jesu, ni khumbule mbimo yi u no bela Mfumoni kwako.” 43 Ene a to m’gela ku khene: “Ani na kugela nyamsi ti to, u na ta va kumweko ni nani Paradhiseni.”

44 I ti ngu mbimo ya ma 12 se ku to va ni txidema txa hombe ka dotshe ditiko dile kala ma 15, 45 nguko ditambo di si woningi, se dikortina da dithempele di to vharuka ngu hagari. 46 Se Jesu a to kwangula a txi khene: “Tata, moya wangu ni wu ningela manzani kwako.” Msana ko womba eto, a to fa.* 47 Mbimo yi a nga ti wona ati ti nga txi maheka, mthangeli wa masotxhwa a to khata kudhumisa Txizimu a txi khene: “Wamwamna wuwa i ti wo lulama ngu ditshuri.” 48 Votshe va va nga ti tshanganile kasi ku ta wona ti ti nga txi maheka va to wuya mtini va txi ti peka tikhana ngu kupandiseka. 49 Votshe va va nga txi m’ziva va ti tiho kona hale va di emile ngu kule. Ku ti ni vavasikati ava va nga ti m’londisela kukhukhela Galileya, ni vona va ti woni timhaka tiya.

50 Ku ti ni wamwamna awu a nga ti dhanwa ku i Josefa, a nga ti lumba Tribhunali ya Vajudha, ene i ti m’thu wamnene ni ku va wo lulama. 51 (Wamwamna wuwa kha seketela makungo awe.) Ene i ti wa Arimateya, didhoropa da Judheya ni ku a txi rinzela Mfumo wa Txizimu. 52 Ene a to tsula ka Pilato e ya kombela txirumbi txa Jesu. 53 A to txi teka e txi phutela ngu nguwo yo basa yo dhula, e ya txi veka mu ka dithitha adi di nga ti ketwe ka dirigwi adi ku nga ti si se tshotshwa m’thu ka dona. 54 I ti ditshiku da Kululamisela ni ku Sabata yi ti hafuhi ni kukhata. 55 Se vavasikati va va nga ti londetela Jesu kukhukhela Galileya ni vona va tsute dithithani kasi ku ya wona ti to txirumbi txa Jesu txi ti vekisilwe kutxani. 56 Vona va to tshumela ve ya lulamisela mafura o bhumula. Kambe ngu ditshiku da Sabata va to humula ngu ku ya ngu mlayo.

24 Ka ditshiku do khata ka divhiki, vavasikati vale va to hoka dithithani ni mixo ngutu va di ni mafura o bhumula aya va nga ti ma lungisete. 2 Kambe va to wona ti to dirigwi di di nga ti vhate dithitha di ti thavisilwe, 3 se mbimo yi va nga wulela kha va mana txirumbi txa Mkoma Jesu. 4 Va txi ngadi va txi xamala ngutu ngu mhaka yiya, ku to humelela majaha mambidi ma di ambate siyambalo so phatima. 5 Vavasikati vale va to thava ngutu ve namisa tithamo, se majaha ale ma to va gela ku khene: “Ngu kutxani mi txi xola wu a hanyako ka vakufa? 6 Ene kha nga ho hawa, a wusilwe. Ina ma khumbula ti a nga mi gela mbimo yi a nga ti Galileya, 7 ta ku Mwanana wa M’thu a na ningelwa manzani ka vaonhi ni kutshumela e dawa ka phande ni ku ka ditshiku da wuraru e wuswa.” 8 Se vona va to khumbula ati Jesu a nga ti wombile. 9 Se va to khukha ngu dithithani ve ya gela vapostoli vale va 11 ni vagondiswa vamwani totshe timhaka tiya. 10 I ti Mariya Madhalena, Joana, ni Mariya mame wa Jakobe. Ku ti ni vamwani vavasikati ava ni vona va nga ti xawutela ka vapostoli timhaka tiya. 11 Kambe ka vapostoli timhaka eto ti si pfali, ni ku vona kha va kholwa ka vavasikati vale.

12 Kambe Pedro a to khukha ngu kututuma e ya dithithani, e ya xolela e wona siambalo sile. Se e tsula a txi ti wotisa ti to ku ngava ku di humelete txani.

13 Ka dona ditshiku donedo, ku to maheka ti to vambidi ka vagondiswa vakwe, va txi endela txidhoropana txi dhanwako ku i Emawusi, kona mu ka 11 wa makilometro kukhukhela Jerusalema, 14 se va ti bhula ngu totshe ti ti nga ti mahekile.

15 Va txi ngadi va txi bhula ni kukanetisana ngu totshe timhaka tiya, a to humelela Jesu e khata kutsimbila navo, 16 kambe kha va m’tumbula to ngene. 17 Se a to va wotisa a txi khene: “Nda txani ti mi bhulako ngu tona?” Se vona va to ema va txi tseem, va di xukuvate khohe. 18 Se mmweyo a nga ti dhanwa ku i Kleyopasi a to m’xamula a txi khene: “Ina awe wo va m’wuyi u zumbako wekha muwa Jerusalema u si ti ziviko ti ti nga humelela masiku yawa kani?” 19 Ene a to va wotisa a txi khene: “Ta txani?” Vona ve xamula va txi kha vona: “Mayelano ni Jesu wa Nazareta, i nga ti mprofeti wa hombe masoni ka Txizimu ni ka vathu i si nga ngu mithumo dwe, hambi ni ngu mapswi. 20 Aniko tinduna tathu ta vaprista ni vafumeli, va mningete ku e dawa ni kugogotelwa ka phande. 21 Kambe athu hi ti emela ti to wamwamna wuwa e va i di ene a ndi no ponisa Israyeli. I si nga eto basi, adiya se ditshiku da wuraru kukhukhela ti nga maheka totshe tiya. 22 Vamwani vavasikati va ka kwathu va hi dhukisile nguko va vindukete kuya dithithani, 23 aku va nga mbi mana txirumbi txakwe, va to wuya ve ta womba ti to va woni muwoniso wa tingilozi ti nga va gela ti to ene wa hanya. 24 Vamwani ka va hi nga ti navo, va tsute dithithani ve ya mana ti to ati vavasikati va nga ti wombile ditshuri, kambe kha va m’wona.”

25 Se ene a to va gela ku khene: “Ngu kutxani mi di vo banga misungo ni kuswela kukholwa ka totshe ti ti nga wombwa ngu vaprofeti! 26 Mo mbi ti ziva ti to Kristu a ti fanete kuxaniswa ni kuwulela ka wudhumo wakwe kani?” 27 Sekoko, a to khata ngu mibhalo ya Mosi ni ya vaprofeti, e va txhamusela totshe ati ti womba-wombako ngu ngene amu ka yotshe Mibhalo.

28 Mbimo yi va nga hoka hafuhi ni txidhoropana txi va nga ti endela txona, ene a to maha nga o lava kupinda. 29 Se vona va to sinzisa ku ve zumba nayo va txi kha vona: “Zumba ni nathu nguko se minova, di na swa i si nga kale.” Ene a to tumela kuzumba navo. 30 Mbimo yi a nga txi dya navo, a to teka dipawa, e di katekisa e di khema e va ninga. 31 Se va to tumbula to i ti Jesu, kambe ene a to nyamalala masoni kwawe. 32 Vona va to gelana ngu txawe va txi kha vona: “Ina kha ha gweseka timbiluni kwathu mbimo yi a nga txi womba-womba ni nathu hanzila, a txi hi txhamusela mibhalo kani?” 33 Vona va to khukha ka yona mbimo yile, ve tshumela ve ya Jerusalema ve ya manana ni vapostoli va 11 kumweko ni vale va nga ti tshanganile navo 34 va txi kha vona: “Ngu ditshuri, Mkoma a wusilwe ni ku a ti kombekisile ka Simoni!” 35 Se va to va gela ati ti nga ti humelete hanzila ni ti va nga m’tumbulisa tona mbimo yi a nga khema dipawa.

36 Va txi ngadi ve womba-womba timhaka tiya, Jesu apune a to humelela hagari kwawe e va gela ku khene: “Kurula ku nave ni nanu.” 37 Kambe vona va to dhuka ni kuthava va txi pimisa ti to va txo wona ngilozi.* 38 Se a to va wotisa a txi khene: “Ngu kutxani mi txi karateka ni kukana-kana timbiluni kwanu? 39 Wonani manza angu ni mikondo mi kholwa ti to ngani, ni gweseni mi ti pfa nguko moya kha wu nga ni nyama ni marambu, nga ha mi ni wonako ngu kona.” 40 Se a di wombile eto, a to va komba manza ni mikondo. 41 Se vona va si kholwi ka ti va nga txi ti wona. Ngu toneto a to va wotisa a txi khene: “Ina mi ni sakudya hawa?” 42 Se va to mningeta txihaka txo bawulwa, 43 ene a to txi teka, e dya va txi m’wona.

44 Ene a to va gela ku khene: “Atiya ngu ti ni nga mi gela mbimo yi ni nga ti ngadi ni nanu, ti to totshe ti ti nga bhalwa mayelano ni nani ka Mlayo wa Mosi, wa Vaprofeti ni ka Masalmo, ti fanete kutatiseka.” 45 Se a to va tula mapimo kasiku ve pfisisa kwati titxhamuselo ta Mibhalo, 46 a txi va gela ku khene: “Ti bhatwe ti to Kristu a ndi na xaniswa ni ku ngu ditshiku da wuraru a ndi na wuswa ka vakufa, 47 ni ku ngu ditina dakwe ku ndi na txhumayelwa ti to vathu va fanete ku ti sola kasi kudivalelwa sionho ka otshe matiko, ku txi khata ngu Jerusalema. 48 Anu mi nava tifakazi ta mhaka yiya. 49 Zivani ti to ni na mi rumelela atxi txi nga thembiswa ngu Tate wangu. Kambe anu zumbani didhoropani muwa kala kuza mi mana mtamo awu wu tako ngu txitimwi.”

50 Msana keto a to tsula navo kala Bhetaniya, e guleta mawoko e va katekisa. 51 A txi ngadi a txi va katekisa, kuno-kunuko, a to tekwa e yiswa nzumani. 52 Se vona va to khizama masoni kwakwe, ve tshumela ve ya Jerusalema va di tsakile ngutu. 53 Yotshe mbimo, va txi maneka dithempeleni va txi dhumisa Txizimu.