MAHUNGU A MANENE O BHALWA NGU JOHANI

1 Makhatoni ku ti ni Dipswi, Dipswi di ti ni Txizimu ni ku Dipswi i ti txizimu. 2 Ene makhatoni a ti ni Txizimu. 3 Txizimu txi thumisile ene kasi kuvanga sotshe.

Kha txi nga ho ni txa tximwetxo txi nga vangwa i si nga ngu kwakwe. 4 Ngu kuthumisa ene kuvangilwe wutomi, ni ku wutomi i ti liwoningo ka vathu. 5 Liwoningo la woninga txidemani, kambe txidema kha txa li xula.

6 Kuhumelete wamwamna awu i nga ti muemeli wa Txizimu, ditina dakwe i ti Johani. 7 Wamwamna wuwa a tile kota fakazi, kasi kuta ningela wufakazi mayelano ni liwoningo, kasiku vathu va tixaka totshe ve kholwa ngu kona ha kwakwe. 8 Ene i si nga liwoningo, kambe a tile kasi kuta ningela wufakazi mayelano ni liwoningo.

9 Liwoningo la ditshuri ali li woningako totshe tixaka ta vathu li ti hafuhi ni kuta hamafuni. 10 Ene a ti ti ho haditikoni, adi di nga vangwa ngu kona ha kwakwe, kambe ditiko kha da m’ziva. 11 Ene a tile ka va ka kwawe, kambe vona kha va mu amukela. 12 Kambe votshe ava va nga mu amukela, a va ningile fanelo yo ve va vanana va Txizimu, nguko va kombisile kukholwa ka ditina dakwe. 13 Nguko vona kha va velekwa ngu nyama ni mnoha mwendo ngu kuranda ka vathu, kambe va velekilwe ngu kuranda ka Txizimu.

14 Ngu toneto, Dipswi di to va m’thu e hanya hagari kwathu, ni ku athu hi woni wudhumo wakwe, awu wu fanelako mwanana wammweyo ekha ka tate wakwe, ni ku ene a ti tate ngu makatekwa a Txizimu ni ngu ditshuri. 15 (Johani a fakazile ngu ngene mbimo yi a nga khene: “Awuwa ngene ni nga womba ngu ngene ni txi khani: ‘Awu a tako msana kwangu a thangete masoni, kwangu nguko ene a ti ti ho kukhukhela kale.’”) 16 Aku a nga talelwa ngu wuxinji ni ditshuri, ene a hi kombile wuxinji wa hombe txitimwi ka wuxinji wa hombe. 17 Mlayo wu ningetwe ngu kuthumisa Mosi, kambe wuxinji wa hombe ni ditshuri wu manekile ngu kona ha ka Jesu Kristu. 18 Kha nga ho wu a khalako kuwona Txizimu kambe mwanana wammweyo ekha awu a fanako ni Txizimu awu a ku didhawani ka Tate, ngene a nga txhamusela to i mani Txizimu.

19 Awuwa ngu wona wufakazi awu Johani a nga wu ningela mbimo yi Vajudha va nga rumela Vaprista ni Valevhi ngu Jerusalema kasi ku ta m’wotisa to: “Ngawe mani?” 20 Kambe ene kha lamba, a xamute a txi khene: “Ani hi ngani Kristu.” 21 Vona va to m’wotisa va txi kha vona: “Ngawe mani? Ngawe Elija?” Ene a to xamula a txi khene: “Ahim-him.” “Mwendo wo va Mprofeti?” Ene a to xamula kambe a txi khene: “Ahim-him.” 22 Se va to kha vona: “Ngawe mani? Hi gele kasiku hi ya ningela xamulo ava va nga hi ruma. Hi nga hi gela, kasi ngawe mani?” 23 Ene a to khene: “Ani ngani dipswi di di pfalako txiwulani di txi: ‘Basisani tinzila ta Jehovha,’ nga ha a nga womba ngu kona mprofeti Isaya.” 24 Vathu evo va ti rumetwe ngu Vafarisi. 25 Se va to m’wotisa va txi kha vona: “Ngu kutxani u txi bhabhatisa kuveti khu nga Kristu, nem khu nga Elija mwendo Mprofeti?” 26 Johani a to va xamula a txi khene: “Ani ni bhabhatisa ngu mati. Ku ni wu a ku hagari kwanu kambe mi si m’ziviko, 27 i ku wu a tako msana kwangu, ni ku ani kha ni fanelwi ngu ku txhatxha tingoti ta masandaliya akwe.” 28 Atiya ti mahekile Bhetaniya, mtxhatuko ka Jordhani aha Johani a nga txi bhabhatisa kona.

29 Mangwanani ka kona, Johani a to wona Jesu a txita kwakwe, se a txi khene: “Wonani Txinvutana txa Txizimu atxi txi thavisako sionho sa ditiko! 30 Awuwa ngene wu ni nga womba-womba ngu ngene ni txi khani: ‘Awu a tako msana kwangu a thangete masoni kwangu nguko ene a ti ti ho kukhukhela kale.’ 31 Hambi ani ni si m’zivi, ngu toneto ni bhabhatisako ngu mati kasiku e ziwa ditikoni ka Israyeli.” 32 Johani a fakazile kambe a txi khene: “Ni woni moya wu txi txhika ngu nzumani, nga dituva wu txita txitimwi kwakwe. 33 Nanani ni si m’zivi, kambe Awu a nga ni ruma ti to ni ta bhabhatisa ngu mati a ni gete a txi khene: ‘Awu u no wona moya wu txi ta kwakwe ni kusimama kwakwe, ngeneyo a bhabhatisako ngu moya wo sawuleka.’ 34 Ani ni ti woni ngu maso angu, se na fakaza ti to ene Mwanana wa Txizimu.”

35 Mangwanani ka kona, Johani a ti ho kambe kona hale ni vagondiswa vakwe vavambidi. 36 Mbimo yi a nga wona Jesu a txi pinda, a to khene: “Wonani Txinvutana txa Txizimu!” 37 Mbimo yi vagondiswa vakwe vavambidi va nga m’pfa a txi womba toneto, va to khata kulondisa Jesu. 38 Mbimo yi Jesu a nga tshembereka a to wona to va txi m’londisa, a txi khene: “Mi lava txani?” Vona va to kha vona: “Rabhi (ti wombako ku: “Mgondisi”), u maneka hani?” 39 Se ene a to va gela a txi khene: “Ngonani mi na kuwona.” Se va to tsula nayo ve ya wona ha a nga ti zumba kona, va to zumba nayo ditshiku dile, i ti kona mu ka ma 16. 40 Andreya mnanda wa Simoni Pedro, i ti mmweyo wa va vavambidi ava va nga pfa ti Johani a nga txi womba-womba e khata kulondisa Jesu. 41 Ene a khatile ngu kumana mkoma wakwe Simoni e m’gela ku khene: “Hi mani Mesiya” (a ti ti wombako ku: “Kristu”). 42 Se ene a to m’teka e m’yisa ka Jesu. Mbimo yi Jesu a nga m’wona a to m’gela ku khene: “Awe u Simoni, mwanana wa Johani, u na dhanwa ku u “Khefasi” (ti wombako ku: “Pedro”).

43 Mangwanani ka kona, Jesu a to lava kuya Galileya. Se a to mana Filipi a txi m’gela ku khene: “Va na m’londeteli wangu.” 44 Filipi i ti wa Bhetsayidha didhoropa di ku nga ti maneka kona Andreya ni Pedro. 45 Filipi a to mana Nataniyeli e m’gela ku khene: “Hi mani awu Mosi a nga bhala ngu ngene ka Mlayo awu Vaprofeti ni vona va nga bhala ngu ngene, i ku Jesu wa Nazareta, mwanana wa Josefa.” 46 Kambe Nataniyeli a to khene: “Ina txi nga huma txilo txa txinene ngu Nazareta?” Se Filipi a to m’xamula a txi khene: “Tsimbila u na ya ti wona.” 47 Jesu a to wona Nataniyeli a txi m’tela, se ene a to womba a txi khene: “Wonani Muisrayeli wa ditshuri awu a si ngako ni wukanganyisi.” 48 Nataniyeli a to m’wotisa a txi khene: “U ni zivela hani Mkoma?” Jesu a to m’xamula a txi khene: “Na Filipi a si se ku kudhana, ani ni ku woni u di hahatshi ka mndonga wa mkuwu.” 49 Nataniyeli a to m’gela a txi khene: “Rabhi, awe u Mwanana wa Txizimu, Mkoma wa Israyeli.” 50 Jesu a to m’xamula a txi khene: “Awe u kholwa ngu ku ni nga kugela ti to ni ku woni hahatshi ka mndonga wa mkuwu kani? Awe u na wona timhaka to xamalisa to pinda tiya.” 51 Ene a to engeta e m’gela a txi khene: “Ngu ditshuri na mi gela ni txi khani, mi na wona nzuma yi di tulekile ni tingilozi ta Txizimu ti txi txhika ni ku kwela ti txita ka Mwanana wa M’thu.”

2 Ngu ditshiku da wuraru, kumahilwe fexta ya mtxhadho khe Kana ka Galileya, se mame wa Jesu a ti koneyo. 2 Se Jesu ni vagondiswa vakwe ni vona va ti rambilwe ka mtxhadho.

3 Mbimo yi vhinya yi nga txi guma, Mariya a to gela Jesu a txi khene: “Kha va nga ni vhinya.” 4 Se Jesu a to m’xamula a txi khene: “He wamsikati, ani ni nawe hi bela hani ka toneto? Kha yi se hoka mbimo yangu.” 5 Se mame wakwe a to gela vale va nga txi servhira a txi khene: “Mahani ati a no mi gela.” 6 Ku ti tsikaretilwe 6 wa tifuku* ti nga txi laveka ngu ku ya ngu mlayo wa kubasisa wa Vajudha, fuku* yimwani ni yimwani yi ti dingana kuthela mipimo* yimbidi mwendo yiraru ya mati. 7 Jesu a to va gela a txi khene: “Tatani tifuku* ngu mati.” Se vona va to ti tata ngu mati. 8 Se ene a to va gela ku khene: “Rekani a madotho mi ya ninga mthangeli wa fexta.” Vona va to maha toneto. 9 Mbimo yi mthangeli wa fexta a nga tshuruta* mati ya ma nga ti txitxilwe me va vhinya a si ti zivi ti to yi manekisile kutxani (hambiku va servhenti ava va nga theletela mati va nga txi ti ziva), mthangeli wa fexta a to dhana noivho 10 e m’gela ku khene: “Vathu va khata ngu kuservhira vhinya ya yinene, msana kova va di levile va servhira ayile i si nga ya yinene ngutu, kambe awe u vekile vhinya ya yinene kala kuwa.” 11 Jesu a mahile tiya Kana ka Galileya, ayawa ku vite makhato a sidiwukiso sakwe e kombekisa wudhumo wakwe ni ku vagondiswa vakwe va to kholwa kwakwe.

12 Msana keto, ene, mame wakwe ni vananda vakwe kumweko ni vagondiswa vakwe va to relela ve ya Kapernawume, kambe vona kha va zumba masiku o tala.

13 Yi txi tshuketela Paxkwa ya Vajudha, se Jesu a to kwelela Jerusalema. 14 Ene a to bela dithempeleni e mana vaxavisi va tihomu, tinvuta, matuva ni vatxitxisi va timale va di ka situlu sawe. 15 Msana ko maha txisepu ngu tingoti a to hinga votshe dithempeleni, ava va nga txi xavisa tihomu, tinvuta e wavalasela male ya vatxitxisi va timale ni kuhangalasela timeza tawe. 16 Ene a to gela ava va nga txi xavisa matuva a txi khene: “Thavisani silo sanu hawa! Lekani kuteka nyumba ya Tate wangu mi yi maha merkadhu.” 17 Vagondiswa vakwe va to khumbula ti ti nga bhalwa to: “Kuhiseka ngu nyumba yako ka tura mbiluni kwangu.”

18 Ti di nga eto, Vajudha va to m’wotisa va txi kha vona: “Hi nga hi komba txidiwukiso txi kombako ti to u ni mtamo wo maha timhaka tiya.” 19 Jesu a to va xamula a txi khene: “Khundumusani dithempele diya, ngu masiku mararu ni na di wuseta.” 20 Se Vajudha va to kha vona: “Dithempele diya di hetile 46 wa malembe di txi akwa, se awe u na di wuseta ngu masiku mararu?” 21 Kambe dithempele di a nga txi womba-womba ngu dona i ti mmidi wakwe. 22 Mbimo yi a nga wuswa ngu ka vakufa, vagondiswa vakwe va to khumbula ti to a ti wombile timhaka tiya, se vona va to kholwa ka mibhalo ni ka ti Jesu a nga ti wombile.

23 Hambi keto, vavangi ava va nga ti Jerusalema ka m’buso wa Paxkwa va to kholwa ka ditina dakwe ngu kuwona sidiwukiso asi a nga ti si maha. 24 Kambe Jesu a si va thembi nguko a txi ziva ta mbiluni, 25 ni ku ti si lavi ku m’thu e mtxhamusela mayelano ni vathu nguko a txi ziva mipimiso ya vathu.

3 Hagari ka Vafarisi, ku ti ni wamwamna a nga ti dhanwa ku i Nikodhemo i nga ti mthangeli wa Vajudha. 2 A to ya ka Jesu ni wusiku a txi ya khene: “Rabhi, athu ha ti ziva ti to awe u M’gondisi awu a tako ngu ka Txizimu, nguko kha nga ho wu a mahako sidiwukiso so nga siya hahanze kova Txizimu txi di ni nene.” 3 Jesu a to m’xamula a txi khene: “Na kugela ditshuri ni txi khani, hahanze ko m’thu a txo veleketwa, kha ti nge koteki ku e wona Mfumo wa Txizimu.” 4 Nikodhemo a to khene: “Ti nga kotekisa kutxani ku m’thu e veleketwa i di wa hombe? Ina a nga tshumela e ya mndani ka mame wakwe e ya veleketwa kani?” 5 Jesu a to m’xamula a txi khene: “Na kugela ditshuri ni txi khani, hahanze ko m’thu e velekwa ngu mati ni moya, kha na ku si kota kubela ka Mfumo wa Txizimu. 6 Nyama yi veleka nyama, moya wu veleka moya. 7 U nga xamali a ku ni nga kugela ku khani: Anu mi fanete kuveleketwa. 8 Moya wu futeta wu ya mu wu lavako kona, se u pfa txiwuti txa wona, aniko kha ti ziwi ti to wu ta ngu hani ni ku wu ya hani. Ngu toneto ti mahekako ngu wule a velekwako ngu moya.”

9 Nikodhemo a to m’wotisa a txi khene: “Ti kotekisa kutxani eto?” 10 Jesu a to m’xamula a txi khene: “Awe u m’gondisi wa Israyeli, kambe khu ti pfisisi timhaka tiya? 11 Na kugela ditshuri ni txi khani, athu hi womba-womba ati hi ti zivako, ni ku hi ningela wufakazi wa ti hi nga ti wona, kambe anu kha mi amukeli wufakazi wathu. 12 Aku ni nga mi gela timhaka ta hamafuni mi si kholwi, se mi na kholwisa kutxani ni txo mi gela timhaka ta nzumani? 13 Kha ku nga ni m’thu wu a nga kwela nzumani, hahanze ka wule a nga txhika ngu nzumani, i ku Mwanana wa M’thu. 14 Kufana ni ku Mosi a nga hayeka mnyoka txiwulani, ngu toneto, Mwanana wa M’thu nene a na hayekwa, 15 kasiku votshe va va no kholwa kwakwe ve mana wutomi wo mbi guma.

16 “Nguko Txizimu txi randile ngutu ditiko ha koza txi ningela Mwanana wa txona wammweyo ekha, kasiku votshe ava va no kombisa likholo kwakwe va si loviswi kambe ve mana wutomi wo mbi guma. 17 Nguko Txizimu kha txa rumela Mwanana wa txona hamafuni kasi ku ta lamula ditiko, kambe txi m’rumete kasiku vathu ve mana kuhanyiswa ngu ngene. 18 Awu a kombisako likholo kwakwe kha na mbi lamulwa. Kambe awu a si kombisiko likholo se a lamutwe, nguko kha kombisa likholo ka ditina da Mwanana wammweyo ekha wa Txizimu. 19 Atxiya ngu txona txiseketelo txa wulamuli: Nguko liwoningo li tile hamafuni, kambe vathu va randile txidema hahanze ka liwoningo, nguko mithumo yawe i ti yo biha. 20 Nguko awu a mahako to biha a nyenya kuwonekela, ni ku kha sikoti ku ku hokelela kasiku mithumo yakwe yi si landulwi. 21 Kambe awu a mahako ta tinene wa tshuketela liwoningo kasiku mithumo yakwe yi woneka to yi mahwa ngu kuya ngu kudhunda ka Txizimu.”

22 Msana keto Jesu a to teka vagondiswa vakwe e tsula navo Judheya e ya zumba navo a txi bhabhatisa vathu. 23 Kambe Johani a txi bhabhatisa a di Enoni hafuhi ni Salimi, nguko ku ti ni mati a mangi, ni ku vathu va txi ya kwakwe ve ya bhabhatiswa. 24 Ka mbimo yoneyo, Johani a si nzi kubetwa jele.

25 Se vagondiswa va Johani va to kanetisana ni M’judha wo kari mayelano ni kubasiswa. 26 Ngu toneto va to ta ka Johani va txi ta kha vona: “Rabhi, wamwamna wu u nga ti nayo mtxhatuko ka Jordhani, awu u nga fakaza ngu ngene, wa bhabhatisa ni ku vathu votshe va ya kwakwe.” 27 Johani a to xamula a txi khene: “M’thu kha amukeli txilo ni txa tximwetxo, hahanze ko si txita ngu nzumani. 28 Anu mi tifakazi ta ti ni nga womba to: ‘Ani kha ni nga Kristu, kambe ni rumetwe masoni kwakwe.’ 29 Awu a ku ni noivha, i noivho. Kambe mbimo yi mngana wa noivho a ku hafuhi e mu engisela wa tsaka ngutu ngu kupfa dipswi da noivho. Ngu toneto, ani ni tsakile ngutu. 30 Ene a fanete kusimama e kula, ani ni ya hahatshi.”

31 Awu a tako ngu txitimwi, a txitimwi ka votshe, kambe awu a tako ngu hamafuni, mbwa hamafuni ni ku a womba-womba ta hamafuni. Awu a tako ngu nzumani a txitimwi ka votshe. 32 Ene a ningela wufakazi wa ti a nga tipfa ni ku ti wona kambe kha nga ho wu a amukelako wufakazi wakwe. 33 Awu a amukelako wufakazi wakwe wa tsaniseka ti to Txizimu txi ni ditshuri. 34 Nguko awu a nga rumelwa ngu Txizimu a womba-womba timhaka ta Txizimu, nguko Txizimu txi ningela moya wa txona na txi si pimeli. 35 Tate wa randa Mwanana ni ku a ningete sotshe manzani kwakwe. 36 Awu a kholwako ka Mwanana a ni wutomi wo mbi guma, awu a si engisiko Mwanana kha na mbi mana wutomi aniko kuhenya ka Txizimu ku nava txitimwi kwakwe.

4 Mbimo yi Jesu a nga ziva to Vafarisi va pfite to ene wa maha ni kubhabhatisa vagondiswa vo tala kupinda Johani, 2 (hambiku i nga singa Jesu apune a nga txi bhabhatisa, kambe i nga ti vagondiswa vakwe). 3 Jesu a to khukha Judheya e tshumela Galileya. 4 Kambe a ti fanete kupinda ngu Samariya. 5 Ene a to hoka ka didhoropa da Samariya di dhanwako ku i Sikari, hafuhi ni thembwe ayi Jakobe a nga ninga mwanana wakwe Josefa. 6 Koneho ku ti ni txisima txa Jakobe, se aku Jesu a nga ti karate ngu kutsimbila a to khalahatsha hafuhi ni txisima txonetxo. I ti kona mu ka ma 12.

7 Ku to ta wamsikati wo kari wa Msamariya a txi ta reka mati, se Jesu a to khene kwakwe: “Ni kombela mati o sela.” 8 (Vagondiswa vakwe va ti tsute didhoropani kuya xava sakudya.) 9 Wamsikati wule wa Msamariya a to m’xamula a txi khene: “Ti mahisa kutxani ku awe u ku M’judha u kombela mati kwangu ni ku Msamariya?” (Nguko Vajudha kha va pfani ni Vasamariya.) 10 Jesu a to m’xamula a txi khene: “I ti ku wo yi ziva ningo ya mahala ya Txizimu ni wu a ku khene: ‘Hi nga ni ha mati o sela,’ u di m’kombete ti to e ku ninga mati a wutomi.” 11 Ene a to khene: “Mkoma, khu nga ni txo reka ngu txona mati o sela ni ku txisima txi hokomile,* se u ma mana hani mati a wutomi kani? 12 Ina awe wo va wa hombe kupinda tate wathu Jakobe awu a nga hi ninga txisima atxi ene ni vanana vakwe kumweko ni sifuyo sakwe va nga sela ka txona?” 13 Jesu a to m’xamula a txi khene: “Awule a selako mati yawa a na tshumela e pfa ditora, 14 kambe, awu a no sela mati aya ni no m’ninga kha na mbi pfa kambe ditora, nguko mati aya ni no m’ninga ma na maha txisima mndani kwakwe atxi txi vhelako kasi ku m’ninga wutomi wo mbi guma.” 15 Awule wamsikati a to khene: “Mkoma, ni ninge mati eyo kasiku ni si thuki ni pfa kambe ditora ni wuya hawa ni ta reka kambe mati.”

16 Ene a to m’gela a txi khene: “Tsula u ya dhana mwamna wako mi wuya hawa.” 17 Wamsikati wule a to xamula a txi khene: “Kha ni nga ni wamwamna.” Jesu a to khene: “U womba ditshuri u txi khawe: ‘Kha ni nga ni wamwamna.’ 18 Nguko awe u vite ni mtxhanu wa vavamna ni ku dijaha adi u ku nado konku hi nga mwamna wako. U wombile ditshuri.” 19 Wamsikati a to khene: “Mkoma, na ti wona ti to u mprofeti. 20 Vatate vathu va txi khozela ka mmango wuwa, kambe anu mi khanu amu vathu va fanelako kukhozela kona i Jerusalema.” 21 Jesu a to khene: “He wamsikati, engisa ti ni kugelako, ya ta mbimo yi mi no mbi swa mi khozela Tate wangu ka mmango wuwa nem Jerusalema. 22 Anu mi khozela txi mi si txi ziviko, kambe athu hi khozela txi hi txi zivako, nguko kuhanyiswa kuta ngu ka Vajudha. 23 Ya ta mbimo ni ku se yi hokile, ayi vakhozeli va ditshuri va no ta khozela Tate ngu moya ni ditshuri, nguko Tate a xola vonevo kasiku ve m’khozela. 24 Txizimu i moya, ni ku ava va txi khozelako va fanete ku txi khozela ngu moya ni ditshuri.” 25 Awule wamsikati a to khene: “Ani na ti ziva ti to wa ta Mesiya, awu a dhanwako ku i Kristu. Mbimo yi a no ta, a na ta hi txhamusela totshe.” 26 Jesu a to m’gela ku khene: “Ani wu ni womba-wombako ni nawe, ni ene.”

27 Ka mbimo yoneyo ku to hoka vagondiswa, se vona va to xamala ngu ku Jesu a nga ti womba-womba ni wamsikati, kambe kha nga ho a nga m’wotisa ti to: “U lava txani?” mwendo ku: “Ngu kutxani u nga txi womba-womba nayo?” 28 Se awule wamsikati a to leka fuku* yakwe ya mati e tsula didhoropani a txi ya gela vathu ku khene: 29 “Ngonani mi ta wona wamwamna wu a nga ni gela totshe ti ni nga ti maha, ina hi nga ene Kristu?” 30 Vona va to huma didhoropani ve tsula ku ya wona Jesu.

31 Ka mbimo yoneyo, vagondiswa vakwe va txi msinzisa va txi kha vona: “Rabhi, dyana.” 32 Se ene a to khene kwawe: “Ni ni sakudya simwani asi anu mi si si ziviko.” 33 Se vagondiswa va to wotisana va txi kha vona: “Ina o vaho wu a nga m’tisela sakudya kani?” 34 Jesu a to khene kwawe: “Sakudya sangu ngu maha kuranda ka wu a nga ni ruma ni kuhetisisa mthumo wakwe. 35 Ina anu kha mi wombi ti to kusate mune wa mitxima kasi kuhoka kuelula kani? Engisani ti ni mi gelako: Guletani maso mi wona tithembwe ti nga xwee, ti lavako kuelulwa. 36 Mueluli wa amukela hakelo ni kusengeleta mihando ya wutomi wo mbi guma, kasiku m’phayi ni mueluli ve tsaka kumweko. 37 Nguko ma womba ditshuri mapswi ya ma ku: Mmweyo m’phayi mmwani mueluli. 38 Ani ni mi rumete kasi kuya elula asi mi nga mbi thuma, nguko vamwani va thumile se anu mi wuyetwe ngu mthumo wawe.”

39 Kutala ka Vasamariya va didhoropa dile va khotwe kwakwe ngu ku va nga pfa wufakazi wa wamsikati wu a nga khene: “A ni gete totshe ti ni nga maha.” 40 Mbimo yi Vasamariya va nga hoka ka Jesu, va to m’kombela ku e zumba navo, se a to zumba navo masiku mambidi. 41 Vamwani va to kholwa kwakwe ngu mhaka ya ti a nga womba, 42 va to gela wule wamsikati va txi kha vona: “Kha hi kholwi ngu mhaka ya ti u nga womba dwe, nguko nanathu hi ti pfite ni ku ha ti ziva ti to wamwamna wuwa m’hanyisi wa ditiko.”

43 Msana ka masiku mambidi a to khukha hale e tsula Galileya. 44 Jesu apune a wombile ti to mprofeti kha amukelwi ditikoni kwakwe. 45 Kambe mbimo yi a nga hoka Galileya, Vagalileya va mu amukete kwati nguko va ti woni ti a nga maha Jerusalema ka m’buso, nguko ni vona va ti tsute ka m’buso.

46 Ene a to tshumela kambe e ya Kana ka Galileya aha a nga txitxa mati me va vhinya. Kona khe ku ti ni nduna ya mkoma ayi mwanana wa kona a nga txi lwala khe Kapernawume. 47 Mbimo yi wamwamna wule a nga pfa ti to Jesu a khukhile Judheya e ya Galileya, ene a to tsula e ya m’kombela ti to e hanyisa mwanana wakwe awu a nga ti hafuhi ni kufa. 48 Kambe Jesu a to m’gela ku khene: “Anu ngako mi si woni sixamaliso ni sidiwukiso kha mi na mbi kholwa.” 49 Nduna yile yi to gela Jesu yi txi kha yona: “Mkoma, kuluveta u ta na mwanana a si se fa.” 50 Jesu a to m’gela a txi khene: “Tsula, mwanana wako a hanyile.” Wamwamna wule a to kholwa ka mapswi aya Jesu a nga m’gela e tsula. 51 Mbimo yi a nga txi tsula, sithumi sakwe si to m’hingeta kasi ku m’gela ti to mwanana wakwe a ti kalamukile. 52 Se ene a to si wotisa ti to i mbimo muni a nga kalamuka ngu yona. Si to m’xamula si txi kha sona: “A kalamukile nyamnova amu ka ma 13.” 53 Se nduna yile ya tate wa mwanana yi to ti pfisisa ti to ku vite yona mbimo yile Jesu a nga m’gela ku khene: “Mwanana wako a hanyile.” Se ene ni votshe va mtini kwakwe, va to kholwa ka Jesu. 54 Adiya dikhambi da wumbidi adi Jesu a nga maha txidiwukiso msana ko wuya ngu Judheya e tsula Galileya.

5 Msana keto, ku to va ni m’buso wa Vajudha, se Jesu a to tsula Jerusalema. 2 Khe Jerusalema hafuhi ni Digedhe da Tinvuta, ku ni pesina* yo sambela ka yona yi nga ti ni mtxhanu wa tivharanda, ngu Txihebheru wu dhanwako ku i Bhetesdha. 3 Ka wukhalo wule ku ti zumba vathu vavangi vo lwala, mabhofu, silima, ni vathu ava va nga ti khwanyete siro. 4 —— 5 Ka wona wukhalo wule ku ti ni wamwamna wo kari a nga ti ni 38 wa malembe a txi lwala. 6 Mbimo yi a nga wona wamwamna wule a di otete, ni kuziva ti to a txi lwala kudingana mbimo yo lapha, Jesu a to khene kwakwe: “Ina wa ti lava kuhanyiswa?” 7 Se wamwamna wule wo lwala a to xamula a txi khene: “Mkoma, kha ni nga ni wo ni yisa ka pesina* mbimo yi mati ma vhilukako, nguko mbimo yi ni yako, no thangelwa ngu mmwani.” 8 Jesu a to m’gela ku khene: “Khukha, u teka ditaho dako u tsula.” 9 Wamwamna wule a to tekela kuhanyiswa e teka ditaho dakwe e tsula.

Ditshiku donedo i ti Sabata. 10 Se Vajudha va to gela wamwamna wule a nga ti hanyisilwe va txi kha vona: “Nyamsi i Sabata, kha ti tumelelwi ku u rwala ditaho.” 11 Kambe ene a to va gela a txi khene: “Wamwamna wu a nga ni hanyisa a ti khene kwangu: ‘Teka ditaho dako, u tsula.’” 12 Vona va to m’wotisa va txi kha vona: “I mani a nga kugela to: ‘Teka ditaho dako, u tsula’?” 13 Kambe wamwamna wule a nga ti hanyisilwe a si ti zivi ti to i ti mani, nguko Jesu a ti nyamalate hagari ka txitshungu.

14 Msana keto, Jesu a to m’mana dithempeleni e m’gela ku khene: “Akuwa wa ti wona to u hanyisilwe, u nga phinde kambe u onha, kasiku u si humelelwi ngu to biha kupinda tile.” 15 Dijaha dile di to tsula di ya gela Vajudha ti to i Jesu a nga m’hanyisa. 16 Ngu toneto, Vajudha va ti wukela Jesu ngu ku a nga ti maha timhaka tiya ngu Sabata. 17 Se ene a to va gela ku khene: “Tate wangu a nga txi thuma kala kuwa, nanani ni nga txi thuma.” 18 Ngu toneto Vajudha va nga ti lava ku m’daya, nguko ene a si njo ndaka mlayo wa Sabata basi, kambe nguko a txi khene Txizimu Tate wakwe ni ku ti fananisa ni Txizimu.

19 Ngu toneto, Jesu a to khene kwawe: “Na mi gela ditshuri ni txi khani: Mwanana kha na kusikota kumaha txilo ngu kutisukela, kambe a maha tile a nga wona Tate a txi maha. Nguko totshe ti Tate a mahako, Mwanana nene wa maha ngu kufana. 20 Nguko Tate wa randa Mwanana, se wa m’komba totshe tile a mahako, ni ku a na m’komba mithumo ya hombe kupinda yiya kasiku anu mi xamala. 21 Kufana ni ku Tate a wusako vakufa e va ninga wutomi, Mwanana nene wa ninga wutomi ava a va lavako. 22 Nguko Tate kha lamuli m’thu, kambe a ningete wulamuli manzani ka Mwanana, 23 kasiku votshe ve dhumisa Mwanana nga ha va dhumisako ngu kona Tate. Awu a si dhumisiko Mwanana, kha dhumisi Tate awu a nga ni rumela. 24 Na mi gela ditshuri ni txi khani, awu a engisako mapswi angu e kholwa ka Wu a nga ni ruma a ni wutomi wo mbi guma ni ku kha na mbi lamulwa, aniko a na hulukiswa ka lifo e mana wutomi.

25 “Na mi gela ditshuri ti to, ya ta mbimo ni ku se yi hokile, aha votshe va va nga fa va no pfa dipswi da Mwanana wa Txizimu, ava va nga m’engisa va na mana wutomi. 26 Kufana ni ku Tate a ku ni mtamo wo ninga wutomi, a ningile Mwanana nene mtamo wo ninga wutomi. 27 Ni ku ene a mningile mtamo wo lamula nguko ene Mwanana wa M’thu. 28 Mi nga xamaleni ngu tiya, nguko ya ta mbimo ayi votshe ava va ku masirani* va no engisa dipswi dakwe 29 se ve huma, ava va nga maha ta tinene ve wukela ku ta mana wutomi, se ava va nga maha to mbi lulama ve wukela ku ta lamulwa. 30 Ani kha ni na kusikota ku ti mahela txilo ngu kutisukela. Ni lamula nga ti ni nga rumiswa tona ni ku kulamula kwangu kululamile, nguko kha ni lavi kumaha kuranda kwangu, kambe ni lava kumaha kuranda ka wule a nga ni ruma.

31 “Ngako ni txi ningela wufakazi wangu nipune, wufakazi wangu hi nga wa ditshuri. 32 Kambe ku ni wu a ningelako wufakazi ngu ngani, ni ku na ti ziva ti to wufakazi wu a wu ningelako ngu ngani mbwa ditshuri. 33 Anu mi rumete vathu ka Johani, se ene a ningete wufakazi mayelano ni ditshuri. 34 Kambe ani kha ni lavi kufakazelwa ngu m’thu, kambe ni mi gela timhaka tiya kasiku mi mana kuhanyiswa. 35 Wamwamna wule i ti dilambu adi di nga layithwa di tura, kambe ngu mbimo nyana ya yidotho anu mi di ti emisete kutsaka ngu mhaka ya kuwoninga kwakwe. 36 Kambe ani ni ni wufakazi wa hombe kupinda wa Johani, nguko mithumo yi Tate a nga ni ninga ku ni yi maha i ku mithumo yi ni yi mahako ya ninga wufakazi wa ti to ni rumetwe ngu Tate. 37 Nene Tate wu a nga ni rumela a ningete wufakazi ngu ngani. Anu kha mi khali kupfa dipswi dakwe hambi ku m’wona, 38 ni ku dipswi dakwe kha di ngaho kwanu nguko anu kha mi kholwi ka wu a nga ni rumela.

39 “Anu mi xolisisa Mibhalo mi txi pimisa ti to mi na mana wutomi wo mbi guma ngu kona ha ka yona, kuveti ngu yona yi ningelako wufakazi ngu ngani. 40 Kambe anu kha mi ti lavi kuta kwangu kasiku mi ta mana wutomi. 41 Ani kha ni tumeli kudhumiswa ngu vathu, 42 kambe na ti ziva kwati ti to kha mi txi randi Txizimu timbiluni kwanu. 43 Ani ni tile ngu ditina da Tate wangu, kambe anu kha ma ni amukela. Ngako a txita m’thu ngu ditina dakwe apune anu mi na mu amukela. 44 Mi na sikotisa kutxani kukholwa mi txi lava wudhumo wa vathu i si nga kulava wudhumo wa Txizimu txatximwetxo txa ditshuri kani? 45 Mi nga pimiseni ti to ani na mi mangalela ka Tate, kambe waho wu a mi mangalelako i ku Mosi awu anu mi m’thembako. 46 I ti ku ngu ditshuri mo kholwa ka Mosi, anu mi ndi na kholwa ni kwangu nguko ene a bhate mayelano ni nani. 47 Kambe ngako mi si kholwi ka ti ene a nga bhala, mi na kholwisa kutxani ati ni mi gelako?”

6 Msana keto, Jesu a to tsula mtxhatuko ka linene la Galileya, mwendo Tibheriya. 2 Ku ti ni txitshungu txa hombe txi nga ti m’londisa, nguko txi txi wona sidiwukiso sa singi asi a nga txi si maha ni ku hanyisa valwati. 3 Jesu a to kwela ka mmango e khalahatsha ni vagondiswa vakwe. 4 Yi txi tshuketela Paxkwa, i ku m’buso wa Vajudha. 5 Mbimo yi Jesu a nga gula maso e wona txitshungu txa hombe txi txi m’tshuketela, a to wotisa Filipi a txi khene: “Hi na ya xava hani mapawa o ve ta dya?” 6 Kambe a txi wotisa eto kasi ku m’duka nguko a txi ti ziva ti to a na maha txani. 7 Filipi a to m’xamula a txi khene: “Hambi hi txo xava mapawa a 200 wa madhenari* hi va ninga ngu sikhwemu, ma si na kuenela.” 8 Mmweyo wa vagondiswa vakwe i ku Andreya, mnanda wa Simoni Pedro a to m’gela ku khene: 9 “Ku ni mfana hawa a ku ni mtxhanu wa mapawa ni sihaka simbidi. Kambe ina si na eneta txitshungu txotshe txiya kani?”

10 Jesu a to khene: “Gelani txitshungu txi khalahatsha.” Ku ti ni mwasi wa wungi ka wukhalo wule, se kona mu ka 5.000 wa majaha ma to khalahatsha. 11 Jesu a to teka mapawa e bonga e phakela txitshungu txi nga ti khalahatshile hale, a mahile toneto ni ngu sihaka, vona va to dya ve khura. 12 Mbimo yi va nga dya ve khura, Jesu a to gela vagondiswa vakwe a txi khene: “Sengeletelani sikhwemu si si nga sala kasi ku si luzeki txilo.” 13 Ngu toneto vona va to sengeleta sikhwemu ve tata 12 wa tithavangu ngu sikhwemu si si nga ti sate mbimo yi vathu va nga dya mtxhanu wa mapawa.

14 Mbimo yi txitshungu txi nga wona txidiwukiso txi a nga maha, txi to khata ku kha txona: “Ngu ditshuri, awu ngene Mprofeti wu a nga ti fanete ku ta hamafuni.” 15 Mbimo yi Jesu a nga ziva ti to va txita kasi ku ta mmaha mkoma a to khukha hale e ya zumba ekha mmangoni.

16 Mbimo yi di nga swa, vagondiswa vakwe va to tsula lineneni, 17 va to bela ka ngalava ve tshawunyeta linene va txiya Kapernawume. Se di ti phumile ni ku Jesu a si nzi kutsula e ya manana navo. 18 Se linene li to vhiluka nguko ku txi peka moya wa hombe. 19 Msana kova va di txungile* mtxhanu mwendo 6 wa makilometro, va to wona Jesu a txi tsimbila txitimwi ka mati a txi tshuketela ngalava, se vona va to thava. 20 Se ene a to khene: “Mi nga thaveni txilo, ngani!” 21 Se vona va to mu amukela ngalavani, se ngalava yi to kuluveta yi hoka mabambe amu yi nga txiya kona.

22 Mangwanani ka kona, txitshungu txi txi nga ti sate mtxhatuko ka linene txi woni ti to ku sa sala yimwani ngalava ya hombe, ku to ko sala txingalavana, kambe Jesu a sa bela ka txona kumweko ni vagondiswa vakwe, nguko vagondiswa vakwe va ti tsute vokha. 23 Hambiketo, tingalava ta Tibheriya ti to hoka hafuhi ni wukhalo wu va nga ti dyite mapawa mbimo yi Mkoma a nga ma katekisa. 24 Mbimo yi txitshungu txi nga wona ti to Jesu kumweko ni vagondiswa vakwe va si ngaho hale, vona va to bela ka tingalava tawe ve tsula Kapernawume ve ya m’xoletela.

25 Mbimo yi va nga mana Jesu mtxhatuko ka linene va to m’gela ku kha vona: “Rabhi, u hokile ditshiku hawa?” 26 Jesu a to va xamula a txi khene: “Na mi gela ditshuri ni txi khani, anu kha ma ni xoletela ngu mhaka ya ku mi nga wona sidiwukiso, kambe ngu ku mi nga dya mapawa mi khura. 27 Mi nga thumeleni sakudya asi si sinako, kambe thumelani sakudya asi si ku ni wutomi wo mbi guma, i ku si Mwanana wa M’thu a no mi ninga sona, nguko Tate i ku Txizimu txa m’tumelela kumaha toneto.”

28 Se vona va to m’wotisa ku kha vona: “Hi fanete hi maha txani kasiku mithumo yathu yi amukeleka ka Txizimu?” 29 Jesu a to va xamula a txi khene: “Txizimu txi lava ku mi kholwa ka wu txi nga m’ruma.” 30 Txitshungu txi to kha txona: “Txidiwukiso muni u no hi mahela kasiku hi kholwa kwako? Njitxani u no hi mahela? 31 Vatate vathu va dyite manna txiwulani nga ha ti nga bhalwa ngu kona to: ‘Ene a va ningile dipawa do ta ngu nzumani kasiku ve dya.’” 32 Se Jesu a to va gela ku khene: “Na mi gela ditshuri ti to Mosi kha va ninga dipawa do ta ngu nzumani, kambe Tate wangu a na mi ninga dipawa da ditshuri do ta ngu nzumani. 33 Nguko dipawa da Txizimu ngu di di txhikako ngu nzumani di ningela wutomi hamafuni.” 34 Va to m’gela ku kha vona: “Mkoma hi ninge dipawa donedo yotshe mbimo.”

35 Jesu a to khene kwawe: “Ani ngani dipawa da wutomi. Awu a tako kwangu kha na mbi pfa nzala, ni wu a kholwako kwangu kha na mbi pfa kambe ditora. 36 Nga ha ni nga womba ngu kona, anu mi ni woni kambe kha mi kholwi. 37 Votshe ava Tate a ni ningako va na ta kwangu, se ani ni nge thuki ni mwalata ava va tako kwangu, 38 nguko ni tile ngu nzumani i si nga ku ta maha kuranda kwangu kambe ku ta maha kuranda ka wule a nga ni rumela. 39 Kambe kuranda ka wu a nga ni rumela ngu ti to ni si mwalati ni wammweyo wa votshe va a nga ni ninga, ti to ni va wusa ngu ditshiku do gwita. 40 Nguko kuranda ka Tate wangu ngu ti to wuhi ni wuhi a zivako mwanana e kholwa kwakwe e mana wutomi wo mbi guma, se ani na ta m’wusa ngu ditshiku do gwita.”

41 Se Vajudha va to khata ku ngungurukela ngu ku a nga ti wombile to: “Ani ni dipawa do ta ngu nzumani.” 42 Va txi kha vona: “Awuwa hi nga Jesu mwanana wa Josefa, ina kha hi m’zivi tate wakwe ni mame wakwe kani? Ti kotekisa kutxani ku a womba a txi, ‘Ani ni ta ngu nzumani’?” 43 Jesu a to va xamula a txi khene: “Lekani ku ngungurukela ngu txanu. 44 A walo wu a tako kwangu a sa dhanwa ngu Tate awu a nga ni rumela ni ku ani na ta m’wusa ngu ditshiku do gwita. 45 Ti bhatwe ngu vaprofeti ti to: ‘Votshe va na gondiswa ngu Jehovha.’* Awule a engisako Tate ni kugonda kwakwe wa ta kwangu. 46 Kha ngaho wu a nga wona Tate, i si nga wu a tako ngu ka Txizimu, eyo ngene wu a nga wona Tate. 47 Na mi gela ditshuri ni txi khani, awu a kholwako a ni wutomi wo mbi guma.

48 “Ani ni dipawa da wutomi. 49 Vatate vanu va dyite manna khe txiwulani, hambiketo va fite. 50 Adiya dipawa di tako ngu nzumani kasiku awu a dyako a si fi. 51 Ani ni dipawa di di hanyako di tako ngu nzumani. Awu a dyako dipawa diya a na hanya ngu ha ku si gumiko, ngu ditshuri, dipawa di ni no mi ninga i nyama yangu kasi kuhanyisa vathu.”

52 Se Vajudha va to khata kukanetisana ngu txawe va txi kha vona: “A na hi ningisa kutxani nyama yakwe kasiku hi dya?” 53 Se Jesu a to va gela ku khene: “Na mi gela ditshuri ni txi, hahanze ko mi dya nyama ya Mwanana wa M’thu ni kusela mnoha wakwe, anu kha mi nga ni wutomi. 54 Awu a dyako nyama yangu ni kusela mnoha wangu a na mana wutomi wo mbi guma ni ku ani ni na tshumela ni m’wusa ngu ditshiku do gwita, 55 nguko nyama yangu nza kudya sa ditshuri, ni mnoha wangu nza kusela sa ditshuri. 56 Awu a dyako nyama yangu ni kusela mnoha wangu a ni wumwewo ni nani, ni ku nani ni ni wumwewo nayo. 57 Kufana ni ku Tate wu a hanyako a nga ni rumela, ni ku ni hanyako ngu mhaka yakwe, ti ngu kufana ni wule a dyako nyama yangu, nene a na hanya ngu mhaka yangu. 58 Adiya dipawa adi di tako ngu nzumani. Kha di fani ni di vatate vanu va nga dya ve tshumela ve fa. Awu a dyako dipawa diya a na hanya ngu ha ku si gumiko.” 59 Ene a wombile timhaka tiya mbimo yi a nga txi gondisa disinagogani khe Kapernawume.

60 Mbimo yi va nga pfa tiya, kutala ka vagondiswa vakwe va to kha vona: “Timhaka tiya ta nemela, i mani a no ti engisela kani?” 61 Mbimo yi a nga tumbula ti to vagondiswa vakwe va txi ngura-ngura ngu mhaka yiya, Jesu a to khene: “Mhaka yiya ya mi khuvekisa? 62 Se mi na txani ngako mi txi wona Mwanana wa M’thu a txi kwela e tsula amu a nga ti kona makhatoni? 63 Moya ngu wona wu hanyisako kambe mmidi kha wu vhuni txilo. Se mapswi ya ni mi gelako ma huma ngu ka moya wo sawuleka ni ku ma na mi ninga wutomi. 64 Ku ni vamwani kwanu ava va si kholwiko.” Nguko Jesu a txi ti ziva ku khukhela makhatoni ti to mba mani ava va no mbi kholwa ni ku i mani a ndi no m’xavisa. 65 A to engeta a txi khene: “Ngu toneto ni nga mi gela ni txi khani, kha ngaho wu a tako kwangu hahanze kova a di dhanwi ngu Tate.”

66 Ngu mhaka ya toneto, kutala ka vagondiswa vakwe va to tshumelela ka silo sawe va nga ti si lekile ni ku va si nga ngadi ve m’londetela. 67 Se Jesu a to gela vagondiswa vakwe va 12 a txi khene: “Nananu mi lava kutsula?” 68 Simoni Pedro a to m’xamula a txi khene: “Mkoma hi na ya ka mani? Nguko awe u ni mapswi aya ma ningako wutomi wo mbi guma. 69 Athu ha kholwa ni ku ha ti ziva ti to awe u Msawuleki wa Txizimu.” 70 Jesu a to va xamula a txi khene: “Hi nga ani ni nga mi sawula anu va 12 kani? Kambe mmweyo wanu mxengeteli.”* 71 Ngu ditshuri ene a txi womba Judhasi, mwanana wa Simoni Iskariyoti, nguko ngene a ndi no m’xavisa hambiku i nga ti mmweyo wa va va 12.

7 Msana keto Jesu a to simama e tsimbila-tsimbila Galileya, a si ti lavi kutsimbila Judheya, nguko Vajudha va ti lava ku m’daya. 2 Kambe wu ti hafuhi M’buso wa Midhuti wa Vajudha. 3 Se vananda vakwe va to m’gela ku kha vona: “Khukha hawa u tsula Judheya kasiku vagondiswa vako ve ya wona mithumo yi u yi mahako. 4 Nguko kha ngaho wu a mahako to maha txihunjani kuveti wa ti lava kuwonwa ngu vathu. Ngako u txi maha mithumo yoneyo, ti kombise ka ditiko.” 5 Nguko vananda vakwe va si kholwi kwakwe. 6 Se Jesu a to va gela ku khene: “Mbimo yangu kha yi se kuhoka, kambe kwanu mbimo yimwani ni yimwani yinene. 7 Ditiko kha di nga ni txivangelo txo mi vengela, kambe di vengela ani nguko ni fakaza ti to mithumo ya dona yi bihile. 8 Tsulani anu m’busoni, ani kha ni na mbi tsula ka m’buso wuwa, nguko ani mbimo yangu kha yi se kuhoka.” 9 Msana kova gela eto a to sala Galileya.

10 Kambe, mbimo yi vananda vakwe va nga khukha ve tsula m’busoni, ene a to sala e va londisa kambe ti si ziwi ngu m’thu. 11 Se Vajudha va to khata ku m’lavetela kona m’busoniyo va txi kha vona: “A hani wamwamna eyo?” 12 Se txitshungu txi txi lengelana txi txi kha txona: “Awuwa m’thu wamnene.” Vamwani va txi kha vona: “Hi nga wamnene. Ene o kanganyisa vathu.” 13 Kambe va si womba-wombi ngu ngene hakubasani nguko va txi thava Vajudha.

14 Mbimo yi m’buso wu nga ti hagari, Jesu a to kwela dithempeleni e ya khata kugondisa. 15 Se Vajudha va to xamala va txi kha vona: “Ti kotekisa kutxani ku wamwamna wuwa e va ni wuzivi wo nga tiya wa Mibhalo ku ve kha gonda?” 16 Jesu a to va xamula a txi khene: “Ati ni ti gondisako hi nga tangu kambe ti lumba awu a nga ni rumela. 17 Ngako m’thu wo kari a txi xuva kumaha kuranda ka Wu a nga ni rumela, a na ti ziva ti to ati ni ti gondisako ti ta ngu ka Txizimu, ni ku hi nga to no ti sukela. 18 Awu a womba-wombako to kari kuveti o ti sukela, a lava ku ti dhumisa apune. Kambe awu a lavako kudhumisa wu a nga m’ruma, mbwa ditshuri ni ku ene mbwa wululami. 19 Anu mi ningilwe Mlayo ngu Mosi hi nga tona? Kambe, kha ngaho ni wammweyo wanu a wu engisako. Se ngu kutxani mi txi lava ku ni daya?” 20 Txitshungu txi m’xamula txi txi kha txona: “Awe u ni didhimoni. I mani a lavako ku kudaya?” 21 Se Jesu a to va xamula a txi khene: “Ni to maha txidiwukiso tximwetxo dwe, kambe motshenu mi to xamala. 22 Wonani ti to mi ningilwe mlayo wa wukwera ngu Mosi (i si nga ti to mlayo wo ta ngu ka Mosi, kambe ngu ka vakokwani), hambiketo anu mi yisa vathu wukwerani ngu Sabata. 23 Aku anu mi yisako vathu wukwerani hambi i di Sabata kasiku wu si ndakwi Mlayo wa Mosi, ngu kutxani anu mi txi ni henyela ngu ku va ni di hanyisile m’thu ngu Sabata kani? 24 Lekani kulamula ngu kuwona khohe, aniko lamulani ngu nzila yo lulama.”

25 Vahanyi vamwani va Jerusalema va to khata kuwomba va txi kha vona: “Hi nga ene wamwamna wuwa va lavako ku m’daya? 26 Phela ene a womba-womba hakubasani kambe kha va mmahi txilo. Ina vathangeli vathu va kholwa ti to ene i Kristu? 27 Kambe athu ha kuziva mu a tako ngu kona, kambe mbimo yi a no ta Kristu kha ngaho wu a no kuziva mu a tako ngu kona.” 28 Se mbimo yi Jesu a nga txi gondisa dithempeleni a to kwangula a txi: “Anu ma ni ziva ni ku ma kuziva mu ni tako ngu kona. Hi nga ku ni to ti sukela nipune ku ni ta, aniko Awu a nga ni rumela mbwa ditshuri, kambe anu kha mi m’zivi. 29 Ani na m’ziva nguko ni mu emeli wakwe, ni ku Ngene a nga ni rumela.” 30 Ngu toneto va txi lava ku m’ñola, kambe kha ngaho wu a nga txi tsana ku m’tshuketela nguko mbimo yakwe yi si nzi kuhoka. 31 Se vathu vo tala va txi kholwa kwakwe va txi kha vona: “Mbimo yi a no ta Kristu, kha na mbi ta maha sidiwukiso so pinda si wamwamna wu a nga maha, hi nga tona?”

32 Mbimo yi Vafarisi va nga pfa txitshungu txi txi lengelana timhaka tiya mayelano ni Jesu, tinduna ta vaprista ni Vafarisi va to rumela vathu kasi ku ya m’ñola. 33 Se Jesu a to khene: “Na zumba ni nanu ta mbimo nyana ni si nzi kutsula ka Wu a nga ni rumela. 34 Anu mi na ni xola kambe kha mi na mbi ni mana, ni ku amu ni yako kona kha mi na mbi sikota kuta.” 35 Ngu toneto Vajudha va to ti wotisa va txi kha vona: “Wamwamna wuwa a lava kuya hani ha koza hi si mmani? Ina a lava kutsula ka Vajudha ava va nga hangalaka hagari ka Vagriki ni kugondisa Vagriki kani? 36 A lava kuwomba txani ngu mapswi ya ma ku: ‘Anu mi na ni xola, kambe kha mi na mbi ni mana, ni ku amu ni yako kona kha mi na mbi sikota kuta’?”

37 Ka ditshiku do gwitisa da m’buso wa hombe, Jesu a to khukha e ema e kwangula a txi khene: “Awu a ku ni ditora a nate kwangu a ta sela mati. 38 Awule a kholwako kwangu nga ha mibhalo yi wombako ngu kona: ‘Ngu kwakwe li na khulunga lidhonga la mati a wutomi.’” 39 Kambe a txi womba-womba ngu moya wo sawuleka awu ava va kholwako kwakwe va no wu amukela, nguko ka mbimo yoneyo va si nzi ku wu amukela nguko Jesu a si nzi ku amukela wudhumo. 40 Vamwani ava va nga ti ti ho ka txitshungu va to kha vona: “Awuwa ngu ditshuri, Mprofeti.” 41 Vamwani va txi kha vona: “I Kristu.” Kambe vamwani va txi kha vona: “Kha ti na ku koteka ku Kristu e huma ngu Galileya. 42 Mibhalo yi womba ti to Kristu a ndi na va wa liveleko la Dhavhidha ka txidhoropana txa Bhetlehema atxi Dhavhidha a nga velekelwa ka txona, hi nga tona?” 43 Se txitshungu txi to khata ku kanetisana ngu mhaka yakwe. 44 Vamwani kwawe va txi lava ku m’ñola kambe kha nga ho a nga txi tsana ku m’tshuketela.

45 Ava va nga rumelwa va to wuya ka tinduna ta vaprista ni Vafarisi, se va to wotiswa ku: “Ngu kutxani mi nga mbi wuya nayo kani?” 46 Va to xamula va txi kha vona: “Kha hi khali kuwona m’thu wo gondisisa tiya.” 47 Se Vafarisi va to va wotisa va txi kha vona: “Kasi nananu mi kanganyisilwe? 48 Ina kova ni mthangeli mwendo Mfarisi a kholwako kwakwe koko? 49 Txitshungu txiya txo pata ni kwa mbi ziva Mlayo txi ruketetwe.” 50 Nikodhemo i nga ti mmweyo wawe, awu a nga ti tsute ka Jesu a to khene kwawe: 51 “Ina Mlayo wathu wa tumela ti to m’thu e lamulwa hi sa khata ngu kupfa ngu ngene mwendo kuxolisisa ati a nga ti maha?” 52 Se va to m’xamula va txi kha vona: “Nanawe u ta ngu Galileya? Xolisisa u na wona ti to kha kuhumi mprofeti ngu Galileya.”*

8 12 Jesu a to tshumela a txi khene kwawe: “Ani ni liwoningo haditikoni. Wuhi ni wuhi wu a ni londisako kha na mbi tsimbila txidemani, kambe a na va ni liwoningo la wutomi.” 13 Vafarisi va to m’gela va txi kha vona: “Awe u ti fakazela upune, wufakazi wako hi nga wa ditshuri.” 14 Jesu a to va xamula a txi khene: “Hambiku ni ti fakazelako nipune wufakazi wangu mbwa ditshuri, nguko na kuziva mu ni tako ngu kona ni mu ni yako kona. Kambe anu kha mi ku zivi amu ni tako ngu kona nem amu ni yako kona. 15 Anu mi lamula ngu kuya ngu kuwona khohe, kambe ani kha ni lamuli m’thu. 16 Hambi i di ti to na lamula, kulamula kwangu nga ditshuri, nguko kha ni nga nokha, Tate wu a nga ni rumela a ni nani. 17 Ka Mlayo wanu kubhatwe ti to: ‘Wufakazi wa vathu vambidi, mbwa ditshuri.’ 18 Ani na ti fakazela nipune, ni Tate wu a nga ni rumela, nene wa ni fakazela.” 19 Se va to m’wotisa va txi kha vona: “A hani Tate wako?” Jesu a to va xamula a txi khene: “Anu kha mi ni zivi nem Tate wangu kha mi m’zivi. I di ku mo ni ziva, ni Tate wangu mi ndi na m’ziva.” 20 Ene a wombile eto a di ka wukhalo wa makaxa a miningelo mbimo yi a nga txi gondisa dithempeleni. Kambe kha ngaho wu a nga m’ñola nguko mbimo yakwe yi si nzi kuhoka.

21 Ene a to tshumela e va gela kambe a txi khene: “Ani na tsula, ni ku mi na ni lava, kambe mi na fela sionhoni kwanu. Amu ni yako kona anu kha mi na mbi sikota kuta.” 22 Se Vajudha va to khata ku ti wotisa va txi: “Ina o lava ku ti daya? Nguko a khene, ‘Aha ni yako kona kha mi na mbi sikota kuta.’” 23 Jesu a to tshumela e va gela a txi khene: “Anu mi va hahatshi, kuveti ani ni wa txitimwi. Anu mi va mafu awa, kambe ani kha ni nga wa mafu awa. 24 Ngu toneto ni nga mi gela ni txi khani: Anu mi na fela sionhoni kwanu. Aku mi si kholwiko ti to ngani, mi na fela sionhoni kwanu.” 25 Se vona va to m’wotisa va txi kha vona: “Ngawe mani?” Jesu a to va xamula a txi khene: “Ngu kutxani ni txi ti karata ni lava kuwomba-womba ni nanu? 26 Ni ni ta tingi to womba-womba ngu nganu ni kulamula. Kambe Awu a nga ni rumela mbwa ditshuri ni ku a ti ni nga ti pfa kwakwe na ti womba ka ditiko.” 27 Vona kha va ti pfisisa ti to a ti womba-womba ngu Tate. 28 Se Jesu a to khene: “Msana kova mi di hayekile Mwanana wa M’thu, ngu kona mi no ti ziva ti to ni ene, nguko ani kha ni mahi txilo ngu ku ti sukela kambe ni womba ti ni nga gondiswa ngu Tate. 29 Awu a nga ni rumela a ni nani, kha ni leka nokha nguko mbimo yotshe ni maha ti ti m’tsakisako.” 30 Mbimo yi a nga womba eto, vavangi va to kholwa kwakwe.

31 Jesu a to gela Vajudha va va nga ti khotwe kwakwe a txi khene: “Ngako mi txi engisa mapswi angu, mi na va vagondiswa vangu ngu ditshuri, 32 anu mi na ziva ditshuri ni ku ditshuri di na mi khulula.” 33 Se vona va to m’xamula va txi kha vona: “Athu hi vanana va Abrahamu kha hi khali ku va ti khumbi ta m’thu. Ngu kutxani u txi womba to, ‘Hi na khululwa’?” 34 Jesu a to va xamula a txi khene: “Ngu ditshuri ani ni khani, wuhi ni wuhi wu a mahako txionho i khumbi ya txionho. 35 I si nga eto basi, khumbi kha yi zumbi mtini ka nyamne wa yona otshe masiku, kambe mwanana ngene a zumbako otshe masiku. 36 Ngu toneto ngako mwanana a txi mi khulula mi na va mi di khululekile ngu ditshuri. 37 Na ti ziva ti to anu mi vanana va Abrahamu. Kambe mi lava ku ni daya nguko kha mi tumeli mapswi angu.* 38 Ni womba-womba ngu ti ni nga ti wona ni di ngadi ni Tate wangu, kambe anu mi maha ti mi nga ti pfa ni tate wanu.” 39 Vona va to m’xamula va txi kha vona: “Tate wathu i Abrahamu.” Se Jesu a nje khene kwawe: “I di ku mo va vanana va Abrahamu mi ndi na kombisa mithumo ya Abrahamu. 40 Kambe anu mi lava ku ni daya, ani ni mi gelako ditshuri a di ni nga di pfa ka Txizimu, Abrahamu kha maha eto. 41 Anu mi maha mithumo ya tate wanu.” Se va txi kha vona: “Athu ka ha velekelwa wugangoni, hi ni Tate mmweyo, i ku Txizimu.”

42 Jesu a to va gela ku khene: “I di ku Txizimu o va Tate wanu, anu mi ndi na ni dhunda nguko ni ta ngu ka Txizimu. Ani kha na ta ngu ku ti sukela, kambe ngu txona txi nga ni rumela. 43 Ngu kutxani mi si pfisisi ati ni wombako kani? Nguko kha mi sikoti kuengisa mapswi angu. 44 Anu mi vanana va tate wanu Dhawulosi, ni ku mi lava kumaha kunavela ka tate wanu, nguko ene m’dayi kukhukhela makhatoni ni ku kha simama ditshurini, nguko ditshuri kha di nga ho kwakwe, ngako a txi hemba a kombisa ati ene i ku tona, nguko m’hembi ni ku i tate wa makuhu. 45 Kambe aku ani ni mi gelako ditshuri, anu kha mi kholwi kwangu. 46 I mani kwanu a nga ni kombisako to ni muonhi? Se ngako ni txi womba ditshuri, ngu kutxani mi si kholwi kwangu? 47 Awu a tako ngu ka Txizimu, wa engisa timhaka ta Txizimu. Ngu toneto anu mi si engisiko, nguko kha mi ti ngu ka Txizimu.”

48 Se Vajudha va to m’xamula va txi kha vona: “Ngu toneto hi wombako hi txi khathu, ‘Awe u Msamariya ni ku u ni didhimoni.’” 49 Jesu a to xamula a txi khene: “Ani kha ni nga ni didhimoni, ani ni dhumisa Tate wangu, kambe anu mo ni txhipisa. 50 Ani kha ni ti laveli wudhumo nipune, ku ni Wu a wu lavako ni ku eyo wa lamula. 51 Na mi gela ditshuri ni txi khani, wuhi ni wuhi wu a engisako ati ni ti gondisako, kha na mbi wona lifo.” 52 Se Vajudha va to kha vona kwakwe: “Konku ngu ditshuri ha ti wona ti to u ni didhimoni. Abrahamu a fite, vaprofeti ni vona va fite, kambe awe u khawe: ‘Wuhi ni wuhi wu a engisako ti ni ti gondisako kha na mbi danza lifo.’ 53 Ina awe wo va wa hombe kupinda tate wathu Abrahamu awu a nga fa kani? Vaprofeti ni vona va fite. Wo va mani awe?” 54 Jesu a to va xamula a txi khene: “Ngako ni txi ti dhumisa nipune, wudhumo wangu hi nga wa txilo. Kambe i Tate wangu wu a ni dhumisako, awu anu mi ku khanu Txizimu txanu. 55 Hambiketo, anu kha mi m’zivi, kambe ani na m’ziva. Ngako ni txi khani kha ni m’zivi, ani ni ndi na hemba kufana ni nanu. Kambe ani na m’ziva ni ku na engisa dipswi dakwe. 56 Abrahamu tate wanu a tsakete ngutu kuwona ditshiku dangu, se a di woni e tshumela e nengela.” 57 Se Vajudha va to m’gela ku kha vona: “Awe nem khu nga ni 50 wa malembe, se u khawe u woni Abrahamu?” 58 Jesu a to khene kwawe: “Na mi gela ditshuri ni txi khani, na Abrahamu a si se ku va ho, ani se ni ti ti ho.” 59 Se vona va to rola marigwi kasi ku m’faya ngu ona, kambe Jesu a to sisala e huma dithempeleni.

9 Mbimo yi Jesu a nga txi pinda a to wona wamwamna a nga velekwa i di dibhofu. 2 Se vagondiswa va to m’wotisa va txi kha vona: “Rabhi, i mani a nga onha hawa, wamwamna wuwa mwendo vaveleki vakwe kasiku e velekwa i di dibhofu?” 3 Jesu a to xamula a txi khene: “Hi nga wamwamna wuwa a nga onha mwendo vaveleki vakwe, kambe atiya ti mahekile kasiku vathu ve wona mithumo ya Txizimu. 4 Hi fanete kumaha mthumo wa Wu a nga ni rumela i di ngadi mixo, nguko wa hoka wusiku aha ti si kotekiko kuthuma. 5 Ngako ni di nga diho haditikoni ni liwoningo la dona.” 6 Msana kova a di mahile tiya, a to thura hahatshi e maha ndope ngu lure lakwe e tota ngu yona maso a wamwamna wule. 7 Se ene a to m’gela ku khene: “Tsula u ya samba khohe ka pesina* ya Silowame” (ti ti wombako ku “Txo rumelwa”). A to ya samba se e wuya a txi wona.

8 Se vaakelani ni va va nga txi m’ziva a txi kombela jimola va to kha vona: “Hi nga ene wu a nga txi khalahatsha a txi kombela jimola kani?” 9 Vamwani va txi kha vona: “Ngene.” Aniko vamwani va txi kha vona: “Hi nga ene, o fana nayo.” Kambe ene a txi womba to: “Ngani.” 10 Se vona va to m’wotisa ku kha vona: “Ti mahisile kutxani ku u wona?” 11 Ene a to xamula a txi khene: “Wamwamna wu a dhanwako ku i Jesu a to maha ndope e ni tota ka maso, e gwita e ni gela ku khene: ‘Tsula u ya samba khohe Silowame.’ Ngu toneto ni to tsula ni ya samba khohe ni so khata kuwona.” 12 Vona va to kha vona: “A hani wamwamna wa kona?” Ene a to khene: “Kha ni ti zivi.”

13 Vona va to teka wamwamna wule i nga ti dibhofu ve m’yisa ka Vafarisi. 14 Phela ditshiku di Jesu a nga maha ngu dona ndope e tula maso ya wamwamna wule, i ti Sabata. 15 Vafarisi ni vona va to m’wotisa ti to ti mahisile kutxani ku u wona? Ene a to xamula ku khene: “Ene a to ni tota ndope ka maso angu ni ya samba khohe, se akuwa na sikota kuwona.” 16 Vamwani ka Vafarisi va to kha vona: “Wamwamna wuwa kha ti ngu ka Txizimu, nguko kha veketi Sabata.” Vamwani va txi kha vona: “Ti nga mahisa kutxani ku m’thu wu i ku txionhi e kota kumaha txidiwukiso txo nga txiya?” Se va to khata ku kanetisana ngu txawe. 17 Se va to tshumela ve m’wotisa ku kha vona: “Awe u khawe txani. Nguko maso ako ma nga tulwa?” Ene a to khene: “Ene i mprofeti.”

18 Kambe Vajudha va si kholwi ti to ene i ti dibhofu ni ku a to tulwa maso, ha koza ve dhana vaveleki vakwe. 19 Vona va to va wotisa ku kha vona: “Ngene wuwa mwanana wanu mi ku khanu a velekilwe i di dibhofu? Ti mahisa kutxani ku konku e wona?” 20 Se vaveleki vakwe va to xamula va txi kha vona: “Athu ho ziva ti to awuwa mwanana wathu ni ku a velekilwe i di dibhofu. 21 Kambe ti to ti mahisile kutxani ku e za e wona, kha hi ti zivi nem ku i mani a nga m’tula maso. M’wotiseni, ene m’thu wa hombe, a na ti xamulela apune.” 22 Vaveleki vakwe va wombile tiya nguko va txi thava Vajudha, nguko Vajudha va ti sungile txikungo txo hinga disinagogani wuhi ni wuhi a kholwako ti to Jesu i Kristu. 23 Ngu toneto vaveleki vakwe va nga kha vona: “Ene m’thu wa hombe, m’wotiseni.”

24 Se va to dhana da wumbidi wamwamna wule i nga ti dibhofu ve ta m’gela ku kha vona: “Dhumisa Txizimu,* ha ti ziva ti to wamwamna wuwa muonhi.” 25 Ene a to va xamula a txi khene: “Ti to ene muonhi, ani kha ni ti zivi. Ati ni ti zivako ngu ti to ani ni ti dibhofu, kambe konkuwa se na wona.” 26 Se va to m’wotisa ku kha vona: “A mahisile kutxani kasiku e tula maso ako?” 27 Ene a to va xamula a txi khene: “Ani se ni mi gete, kambe anu kha ma engisa. Ngu kutxani mi txi lava ku ti pfa kambe? Mo lava ku va vagondiswa vakwe nanu kani?” 28 Va to m’xamula ngu nzila yo m’txhipisa va txi kha vona: “Awe ngawe u ku mgondiswa wa mamo wule, kambe athu hi vagondiswa va Mosi. 29 Athu ha ti ziva ti to Txizimu txi womba-wombile ni Mosi, kambe kha hi ti zivi ti to mamo wuwa a ta ngu hani.” 30 Se wamwamna wule a to va xamula a txi khene: “Ngu ditshuri ta xamatisa aku anu mi si ti ziviko ti to a ta ngu hani, kambe ene a ni tute maso. 31 Ha ti ziva ti to Txizimu kha txi engisi sionhi, kambe ngako m’thu a txi thava Txizimu ni kumaha kuranda ka txona, txona txa m’engisa. 32 Kukhukhela kaleko, kha hi khali kupfa ti to waho a nga nga tula maso ya m’thu wu a nga velekwa i di dibhofu. 33 I di ku kha ti ngu ka Txizimu a si na ku sikota kumaha txilo.” 34 Vona va to m’xamula va txi kha vona: “Awe u veleketwe txionhoni, se u nga txi lava ku hi gondisa kani?” Se vona va to m’hinga.

35 Jesu a to pfa ti to va ti m’hingile. Mbimo yi a nga m’mana, a to m’wotisa ku khene: “Wa kholwa ka Mwanana wa M’thu?” 36 Wamwamna wule a to xamula a txi khene: “I mani Mwanana wa M’thu kasiku ni kholwa kwakwe?” 37 Jesu a to m’gela ku khene: “Awe u m’woni, ngu ditshuri ngene wu a womba-wombako ni nawe.” 38 Ene a to khene: “Na kholwa kwakwe Mkoma.” Se a to m’khizamela. 39 Se Jesu a to khene: “Ni tile hamafuni kasiku vathu ve lamulwa, ni ku ava va si woniko ve wona ni ku ava va wonako ve va mabhofu.” 40 Vafarisi vo kari va nga ti nayo va to ti pfa tiya, se va to kha vona: “Ina nathu ho va mabhofu?” 41 Jesu a to va xamula a txi khene: “I ti ku mo va mabhofu, mi si nga ni txionho. Kambe aku mi ku khanu, ‘Ha wona.’ Se mo simama txionhoni kwanu.”

10 “Ngu ditshuri na mi gela ku khani, awu a si beliko txibalani ka tinvuta ngu ditimba, kambe e bela ngu wumwani wukhalo, dikhamba ni ku txigevenga. 2 Kambe awu a belako ngu ditimba, ngene m’dyisi wa tinvuta. 3 Ngako m’woneleti wa txibala a txo m’tulela ditimba, tinvuta ta engisa dipswi dakwe. Ene wa dhana tinvuta takwe ngu matina a tona, tona ti huma hahanze. 4 Msana ko humisa totshe tinvuta takwe, ene wa thangela masoni ka tona, se tinvuta ti na m’londeta nguko ta di ziva dipswi dakwe. 5 Tona kha ti na mbi londisa m’thu wu ti si m’ziviko, kambe ti na m’tutuma nguko kha ti di zivi dipswi da nyamthuyoyo.” 6 Jesu a va gete txidinganiso txiya kambe vona kha va ti pfisisa ati a nga va gela.

7 Ngu toneto Jesu a to va gela kambe a txi khene: “Na mi gela ditshuri ni txi khani, ani ngani ditimba da tinvuta. 8 Votshe va va nga ta ka wukhalo wangu makhamba ni ku sigevenga, kambe tinvuta kha ta va engisa. 9 Ani ni ditimba, votshe ava va belako ngu kwangu va na hanyiswa, va na bela ni kuhuma ve mana sakudya. 10 Dikhamba di tela ku ta pa, kudaya ni ku moxa. Kambe ani ni tete ku ta ninga wutomi wo hetiseka tinvuta. 11 Ani ni m’dyisi wamnene, m’dyisi wamnene wa ningela wutomi wakwe ngu mhaka ya tinvuta. 12 Txithumi atxi i si ngako m’dyisi ni txi i si ngako nyamne wa tinvuta, ngako txi txi wona nyapwe txo tutuma, se nyapwe e ñola tinvuta ni ku ti hangalasa, 13 txona txi tutuma nguko njithumi ni ku kha txi nga ni mhaka ni tinvuta. 14 Ani ni m’dyisi wamnene, ani na ti ziva tinvuta tangu ni ku ni tona ta ni ziva, 15 kufana ni ku Tate a ni zivako, nanani na m’ziva ni ku ni ningela wutomi ngu mhaka ya tinvuta.

16 “Ni ni tinvuta timwani ti si lumbiko txibala txiya, ni tona na ti sengeleta ni ku tona ti na engisa dipswi dangu, ti va mtxhambi wumwewo ni ku va ni m’dyisi mmweyo. 17 Ani ni ningela wutomi wangu kasiku ni tshumela ni wu mana kambe, ngu toneto Tate a ni randako ngu tona. 18 Kha nga ho wu a nga ni tekelako wona, kambe ni wu ningela ngu ku ti lava. Ni ni fanelo yo wu ningela ni ku tshumela ni wu mana, txirumo txiya ni txi mani ka Tate wangu.”

19 Vajudha va to kanetisana kambe ngu kona ha ka mapswi aya Jesu a nga ma womba. 20 Kutala kwawe va txi kha vona: “Ene a ni didhimoni ni ku wa xanga. Ngu kutxani mi txi m’engisela?” 21 Se vamwani va txi kha vona: “Mapswi yawa hi nga o huma ngu ka m’thu wu a ku ni didhimoni. Ina didhimoni di nga sikota kutula maso a mabhofu?”

22 Ku to va ni M’buso wa kuhenjeleta dithempele khe Jerusalema, i ti mbimo ya wuxika.* 23 Jesu a txo tsimbila ka Vharanda ya Solomoni khe dithempeleni. 24 Se Vajudha va to m’randela va txi kha vona kwakwe: “U na hi leka hampfhukani kala mbimo muni kani? Ngako u di Kristu, womba hakubasani.” 25 Jesu a to va xamula a txi khene: “Ani ni mi gete, kambe kha mi ti lavi ku kholwa. Mithumo yi ni yi mahako ngu ditina da Tate wangu ya ni fakazela. 26 Kambe anu kha mi kholwi nguko kha mi nga tinvuta tangu. 27 Tinvuta tangu ta engisa dipswi dangu, tona na ti ziva ni ku ta ni londisela. 28 Ani na ti ninga wutomi wo mbi guma se ti na mbi thuka ti loviswa, ni ku a walo a no ni honyola. 29 Tinvuta ti Tate a nga ni ninga nda lisima ngutu kupinda sotshe, ni ku kha nga ho wu a nga sikotako ku ti honyola ka Tate wangu. 30 Ani ni Tate hi vamwevo.”

31 Vajudha va to tshumela ve rola marigwi kasi ku m’faya ngu ona. 32 Se Jesu a to va gela ku khene: “Ani ni mi kombile mithumo yo tala yo xamatisa ya Tate wangu. Se mi lava ku ni faya ngu marigwi ngu mhaka ya wuhi m’thumo wa kona kani?” 33 Vajudha va to m’xamula va txi kha vona: “Kha hi lavi ku kufaya ngu marigwi ngu mhaka ya mthumo wo tshura kambe ngu mhaka yo ruketela, nguko awe, hambiku u ku m’thu u ti maha txizimu.” 34 Jesu a to va xamula a txi khene: “Ina kha ta bhalwa ka Mlayo wanu to khene: ‘Anu mi sizimu’? 35 Aku a nga va dhana ku ‘sizimu’ ava dipswi da Txizimu di va lamulako ni ku mibhalo kha yi na kutxitxwa, 36 mi gela ani ni nga sawulwa ni ku rumelwa ngu Tate ku ta haditikoni mi txi khanu, ‘Na ruketela,’ ngu ku ni wombako ti to, ‘Ni Mwanana wa Txizimu kani’? 37 I di ti to kha ni mahi mithumo ya Tate wangu, mi nga kholweni kwangu. 38 Ngako ni txi maha mithumo ya Tate wangu, hambi mi si kholwi kwangu, kholwani ka mithumo kasi mi ti ziva ni ku kholwa ti to Tate a kumweko ni nani ni ku nanani ni kumweko ni Tate.” 39 Se vona va to zama ku m’ñola, kambe ene a to tshwonyowoka.*

40 Se a to tsula kambe mtxhatuko ka Jordhani aha Johani a nga ti bhabhatisa kona makhatoni, se a to ya zumba kona. 41 Vathu vavangi va txi tsula kwakwe va txi ya kha vona: “Johani kha maha nem txidiwukiso ni txa tximwetxo, kambe totshe ti a nga womba mayelano ni wamwamna wuwa ditshuri.” 42 Kutala ka va va nga ti kona hale va to kholwa kwakwe.

11 Ku ti ni wamwamna wo kari a nga txi dhanwa ku i Lazaro a nga txi lwala, ene a txi zumba Bhetaniya ka txidhoropana txi a nga txi zumba Mariya ni mkoma wakwe Marta. 2 Ngene Mariya wu a nga thela mafura mkoma ni ku bahula mikondo yakwe ngu misisi, Lazaro wu a nga txi lwala i ti ndiyakwe. 3 Se tindiyakwe ti to rumela vathu ve ya gela Jesu va txi kha vona: “Mkoma! Awule awe u mdhundako wa lwala.” 4 Kambe mbimo yi Jesu a nga ti pfa tiya a to khene: “Malwati yawa kha ma na mbi m’yisa ka lifo, kambe ti mahekile kasiku Txizimu txi dhumiswa ni kumaha ti to Mwanana wa Txizimu e dhumiswa ngu kona ha ka ona.”

5 Jesu a txi dhunda ngutu Marta, mnanda wa kona ni Lazaro. 6 Hambiketo, mbimo yi a nga pfa ti to Lazaro a txi lwala, ene a to simama amu a nga ti kona kudingana masiku mambidi. 7 Msana keto, a to gela vagondiswa vakwe a txi khene: “He tshumeleni hi tsula Judheya.” 8 Se vagondiswa vakwe va to m’gela ku khene: “Rabhi, hi nga kale vathu va Judheya va nga ti lava ku kufaya ngu marigwi, aniko awe u lava kutshumela u tsula kheya?” 9 Jesu a to va xamula a txi khene: “Ditshiku di ni 12 wa maora di si se swa hi nga tona? Se ngako m’thu a txi tsimbila ku txi woneka, kha na mba humbwa ngu txilo nguko ene wa wona liwoningo la ditiko diya. 10 Kambe ngako m’thu a txi tsimbila ni wusiku a na humbwa, nguko kha ku na liwoningo kwakwe.”

11 Msana ko womba eto, ene a to engeta a txi khene: “Mngana wathu Lazaro a to otela, aniko ani na tsula ni ya m’wusa.” 12 Se vagondiswa vakwe va to m’gela ku kha vona: “Mkoma i di ti to a to otela, a na kalamuka.” 13 Aniko Jesu a txi womba-womba ngu lifo. Kambe vona va txi pimisa ti to a txi womba-womba ngu ku otela ka ditshuri. 14 Se Jesu e ti veka hakubasani to khene: “Lazaro a fite, 15 ni ku na tsaka ngu ku ni nga si nga ho khe ngu mhaka yanu, kasiku anu mi kholwa. Kambe he tsimbileni amu a ku kona.” 16 Kambe Tomasi awu a nga ti dhanwa ku Dihasa, a to gela vamwani vagondiswa a txi khene: “He tsimbileni nathu kasiku hi ya fa nayo.”

17 Mbimo yi Jesu a nga hoka a to ya mana ti to Lazaro se a ti dithithani kudingana mune wa masiku. 18 Bhetaniya i ti hafuhi ni Jerusalema, ka mpfhuka wa makilometro mararu. 19 Vajudha vo tala va ti tsute kasi ku ya thavelela Marta ni Mariya, ngu kona ha ko felwa ngu ndiyawe. 20 Mbimo yi Marta a nga pfa ti to Jesu a txi ta, a to m’hingeta, kambe Mariya a to sala mtini. 21 Marta a to gela Jesu a txi khene: “Mkoma, i ti ku u ti hawa, ndiyangu a sa fa. 22 Kambe hambi konku na ti ziva ti to totshe ati u ti kombelako ka Txizimu, txona txi na kuninga.” 23 Jesu a to m’gela ku khene: “Ndiyako a na wuka.” 24 Marta a to xamula a txi khene: “Ani na ti ziva ti to ene a na wuka ngu ditshiku do gwita.” 25 Jesu a to m’gela ku khene: “Ani ngani kuwuka ni wutomi. Awu a kholwako kwangu, hambi a txi fa, a na tshumela e hanya. 26 Wuhi ni wuhi a hanyako ni ku kholwa kwangu, kha na mbi thuka e fa. Ina wa kholwa ka toneto?” 27 Ene a to m’xamula a txi khene: “Ina Mkoma, ani na kholwa ti to awe u Kristu, Mwanana wa Txizimu, awule a nga ti fanete ku ta hamafuni.” 28 Msana ko womba tiya, a to tsula e ya dhana mnanda wakwe Mariya, e m’gela va di vokha ku khene: “Mgondisi waho hawa, wa ku dhana.” 29 Mbimo yi a nga pfa eto, a to khukha ngu txikuluveta e m’yela.

30 Jesu a si nzi kuhoka ka txidhoropana txile, kambe a ti ngadi ka wukhalo wule Marta a nga m’manela kona. 31 Mbimo yi Vajudha ava va nga ti tile ka Mariya kasi kuta m’thavelela va nga m’wona a txi khukha ngu txikuluveta e huma va to m’londisa va txi pimisa ti to a txo tsula dithithani kasi ku ya dila. 32 Mbimo yi Mariya a nga hoka ka wukhalo wu Jesu a nga ti ka wona e m’wona, a to khizama masoni kwakwe e m’gela ku khene: “Mkoma, i ti ku u ti hawa, ndiyangu a sa fa.” 33 Mbimo yi Jesu a nga m’wona kumweko ni Vajudha ava va nga txi m’pangalata va txi dila, a to gweseka mbilu a txi karateka. 34 Ene a to wotisa ku khene: “Mi m’vekile hayi?” Vona va njo kha vona: “Mkoma, ngono u ta wona.” 35 Se Jesu a to dila. 36 Mbimo yi va nga wona eto, Vajudha va to kha vona: “Jesu a txi m’randa ngu ditshuri!” 37 Se vamwani va to kha vona: “Aku a nga sikota kutula maso a wamwamna wa dibhofu, ngu kutxani a nga mbi tsivela ku wamwamna wuwa e fa?”

38 Se Jesu a to tshumela e gweseka kambe mbilu, e tsula dithithani. Phela dithitha da kona i ti diphala adi di nga ti vhatwe ngu dirigwi. 39 Jesu a to khene: “Thavisani dirigwi.” Kambe Marta ndiya ya m’fi a to khene: “Mkoma, ene se wa nunga nguko kupinda mune wa masiku a di fite.” 40 Jesu a to xamula a txi khene: “Ina kha na kugela ti to ngako u txi kholwa u na wona wudhumo wa Txizimu?” 41 Se va to thavisa dirigwi. Jesu a to gula maso e wona nzumani a txi khene: “Tata, na kubonga nguko u ni engisile. 42 Phela ani na ti ziva ti to mbimo yotshe wa ni engisa, kambe ni wombile tiya ngu mhaka ya vathu ava va nga ni randela, kasiku ve kholwa ti to awe u ni rumete.” 43 Msana ko womba tiya, ene a to kwangula a txi khene: “Lazaro, huma hahanze!” 44 Wamwamna wule a nga ti fite a to huma hahanze, minenge yakwe ni mawoko akwe si di tombetetwe ngu tinguwo ni ku khohe yakwe yi ti fenengetilwe ngu difadhuko. Jesu a to khene kwawe: “M’txhatxheleni e tsula.”

45 Ngu toneto Vajudha vo tala ava va nga ti yite ka Mariya mbimo yi va nga wona ati Jesu a nga maha va to kholwa kwakwe, 46 kambe vamwani ka vona va to tsula ve ya geletela Vafarisi ati Jesu a nga ti mahile. 47 Se tinduna ta vaprista ni Vafarisi va to tshangana ni Sanedri va txi kha vona: “Hi na maha txani aku wamwamna wuwa a mahako sidiwukiso so tala? 48 Ngako hi txi m’lekisa tiya, vathu vo tala va na kholwa kwakwe, se Varoma va na ta ve ta hi tekela wukhalo wathu wo sawuleka* kumweko ni ditiko dathu.” 49 Kambe Kayifasi awu i nga ti mprista wa hombe dilembedo a to khene kwawe: “Anu kha mi zivi txilo. 50 Nguko anu kha mi ti woni ti to ti vhuna anu ku m’thu wammweyo e fa ngu mhaka ya votshe vathu kupinda ku dotshe ditiko di loviswa.” 51 Kambe ene kha womba tiya ti txi khukhela ka mapimo akwe, kambe ngu ku i nga ti mprista wa hombe dilembe donedo, se a profetile ti to Jesu a ndi na fela ditiko, 52 i si nga kufela Vajudha dwe, kambe kasi kusengeleta vanana va Txizimu ava va nga hangalaka ni ditiko kasiku ve va mtxawa wumwewo. 53 Se kukhukhela ka ditshiku dile vona va txi luka tipulani to lava ku m’daya.

54 Ngu toneto Jesu a si swi a txi tsimbila-tsimbila a txi wonwa hagari ka Vajudha, se a to khukha ngu hale e ya txiwulani amu ku manekako ka txidhoropana txi txi dhanwako ku i Efrayime, e ya zumba kona kumweko ni vagondiswa vakwe. 55 Paxkwa ya Vajudha yi ti hafuhi, se vathu vo tala vo ta ngu hahanze ka didhoropa va to kwela ve ya Jerusalema yi si nzi kuhoka Paxkwa kasiku ve ya ti basisa ngu ku ya ngu mlayo. 56 Vona va txi lavetela Jesu, se va to gelana va di dithempeleni va txi kha vona: “Mi ti wonisa kutxani? Ina mi pimisa ti to a na ta m’busoni ngu ditshuri?” 57 Tinduna ta vaprista kumweko ni Vafarisi va to ningela txirumo txa ti to o va wu a no ziva mu Jesu a ku kona, a ti fanete ku ta zivisa kasiku ve ya m’ñola.

12 Ku ti sate 6 wa masiku kasiku yi hoka Paxkwa, Jesu a to hoka Bhetaniya amu a nga ti zumba kona Lazaro awu Jesu a nga ti m’wusile ngu ka vakufa. 2 Va to m’mahela jantari, se Marta ngene a nga txi servhira, aniko Lazaro i ti mmweyo wa va va nga txi dya ni Jesu. 3 Se Mariya a to teka meyu litru ya mafura o bhumula, a nardho ya orijinali o dhula ngutu, e ma thela minengeni ka Jesu e tshumela e bahulela ngu misisi yakwe. Se nyumbani ku to tala ngu m’bhumulo wa mafura. 4 Kambe Judhasi Iskariyoti mmweyo wa vagondiswa vakwe, awu a nga m’xavisa a to khene: 5 “Ngu kutxani mafura yawa o bhumula ma si tekwi me xaviswa ngu 300 wa madhenari, male ya kona yi ningelwa sisiwana kani?” 6 Ene a wombile tiya i si nga ngu ku a nga ti khatala ngu sisiwana, kambe ngu ku i nga ti dikhamba ni ku ngene a nga txi ñola dikaxa da timale, se a txi tolovela kupa male yi yi nga txi betwa ka dikaxa. 7 Se Jesu a to khene: “M’lekeni, nguko ati a nga ti maha, a ti mahile kasi kululamisela ditshiku di ni no tshotshwa ngu dona, 8 nguko sisiwana mi naso yotshe mbimo, kambe hi nga yotshe mbimo mi no va ni nani.”

9 Ka mbimo yoneyo, Vajudha vo tala va to ziva ti to Jesu a ti Bhetaniya, se va to tsula i si nga ngu mhaka ya Jesu dwe, kambe ngu kulava ku ya wona Lazaro wu a nga ti m’wusile ngu ka vakufa. 10 Tinduna ta vaprista ti to luka tipulani to daya Lazaro nene. 11 Nguko i ti ngu mhaka ya Lazaro Vajudha vo tala va nga ti tsula Bhetaniya ve ya kholwa ka Jesu.

12 Mangwanani ka kona, txitshungu txo tala a txi txi nga ti yite m’busoni txi to ziva ti to Jesu a txi ta Jerusalema. 13 Se va to teka matshanzu a mitxhese* ve m’yela ve ya kwangula va txi kha vona: “Txizimu, ha ku kombela, hanyisa. A katekile awu a tako ngu ditina da Jehovha, Mkoma wa Israyeli.” 14 Mbimo yi Jesu a nga mana tximbongolana a to txi gadha, nga ha ti nga bhalwa ngu kona ti to: 15 “U nga thave dihorana da Siyoni: Wonani! Mfumeli wako wa ta a di gadhile tximbongolana.” 16 Vagondiswa vakwe kha va ti pfisisa tiya makhatoni, kambe msana kova Jesu a di dhumisilwe, vona va khumbute ti to totshe ati ti nga maheka ngu tona ti ngu ditshuri ti nga ti bhaletwe ene.

17 Se vathu vo tala ava va nga ti ni Jesu mbimo yi a nga dhana Lazaro dithithani e m’wusa ngu ka vakufa va ti fakaza. 18 Ngu toneto txitshungu txo tala txi nga tsula kwakwe nguko txi ti pfite ti to a ti mahile txidiwukiso txile. 19 Vafarisi va to gelana ngu txawe va txi kha vona: “Ma ti wona ti to kha hi koti kumaha txilo! Phela votshe vathu vo m’londisela.”

20 Ka vale va nga ti tsute m’busoni, ku ti ni Vagriki. 21 Se va to ya ka Filipi awu i nga ti wa Bhetsayidha ka Galileya ve ya m’kombela va txi kha vona: “Hi kombela kuwona Jesu.” 22 Filipi a to ya gela Andreya. Se Andreya ni Filipi va to ya womba-womba ni Jesu.

23 Se Jesu a to va gela ku khene: “Yi hokile mbimo yo Mwanana wa M’thu e dhumiswa. 24 Ani na mi gela ngu ditshuri ni txi khani ngako mbewu ya trigu yi si wi hamafuni yi fa, yi na simama i di mbewu, kambe ngako yi txi fa, yi na veleka mihando yo tala. 25 Awu a dhundako ngutu wutomi wakwe a na wu luza, kambe awu a nyenyako wutomi wakwe ka mafu yawa, a wu xayisela wutomi wo mbi guma. 26 Ngako m’thu a txi lava ku ni thumela a na ni londise, o va ha ni no va kona, nene wule a ni thumelako a na va koneho. Ngako m’thu a txi lava ku ni thumela, Tate a na m’dhumisa. 27 Konku ni karatekile, ni na womba txani? Tata, ni hulukise ka xanisa yiya. Kambe ani ni tete yona xanisa yiya. 28 Tata dhumisa ditina dako.” Se ku to pfala dipswi ngu nzumani di txi kha dona: “Ani se ni di dhumisile, ni ku na tshumela ni di dhumisa kambe.”

29 Txitshungu a txi txi nga ti ti ho hale txi to ti pfa, se txi to kha txona kupekile txingwalangwanda. Kambe vamwani va to kha vona: “I ngilozi yi nga womba-womba nayo.” 30 Jesu a to va gela ku khene: “Dipswi diya kha da pfala ngu mhaka yangu, kambe ngu mhaka yanu. 31 Konkuwa ditiko diya di ku lamulwani ni ku mkoma wa ditiko diya a na hingwa. 32 Hambiketo, mbimo yi ni no hayekwa, ni na ndindela kwangu totshe tixaka ta vathu.” 33 Ene a txi womba tiya kasi ku kombetela ati a no fisa tona. 34 Se txitshungu txi to kha txona: “Mlayo wu womba ti to Kristu a na simama kala kupinduka. Se ti mahisa kutxani ku u txi khawe Mwanana wa M’thu a na hayekwa? I mani Mwanana wa M’thu wu u womba-wombako ngu ngene?” 35 Jesu e va gela ku khene: “Liwoningo li na va ni nanu ngu mbimonyana. Tsimbilani ku txi ngadi ku txi wonekela kasiku txidema txi si mi xuli. Awu a tsimbilako txidemani kha kuzivi mu a yako kona. 36 Mi di ngadi ni liwoningo, kholwani ka liwoningo, kasiku mi va vanana va liwoningo.”

Msana ko womba timhaka tiya Jesu a to tsula e ya barama. 37 Hambiku a nga maha sidiwukiso so tala va txi ti wona, vona kha va kholwa kwakwe. 38 Kasi kutatiseka ati ti nga wombwa ngu mprofeti Isaya to khene: “Jehovha, i mani a nga kholwa ka ti hi nga womba? Mtamo wa diwoko da Jehovha wu ti kombekisile ka mani?” 39 Isaya a tshumete e womba txivangelo tximwani txi nga va maha va si kholwi, a txi khene: 40 “A va mahile mabhofu e bangisa timbilu tawe, ti to va si woni ngu maso awe ni kwa mbi pfisisa ngu timbilu tawe, kasiku ve ti sola ve mana kuhanyiswa.” 41 Isaya a wombile timhaka tiya nguko a woni wudhumo wa Jesu se e womba-womba ngu ngene. 42 Hambiketo, kutala ka vathangeli va Vajudha va txi kholwa kwakwe, kambe va si ti kombi hakubasani ngu mhaka ya Vafarisi, nguko va txi thava kuhingwa masinagogani, 43 nguko va txi dhunda ngutu kudhumiswa ngu vathu kupinda kudhumiswa ngu Txizimu.

44 Se Jesu a to kwangula a txi khene: “Awu a kholwako kwangu, kha kholwi kwangu dwe, kambe a kholwa ni ka wule a nga ni rumela, 45 wuhi ni wuhi a ni wonako, a wona ni Wule a nga ni rumela. 46 Ni tile kota liwoningo haditikoni, kasiku wuhi ni wuhi a kholwako kwangu a si simami txidemani. 47 Kambe ngako m’thu a txi engisa mapswi angu aniko a si ma vekisi, ani na mbi m’lamula nguko kha na tela ku ta lamula ditiko, ni tete ku ta di hanyisa. 48 Awu a ni kanyisako ni kwa mbi engisa mapswi angu, ku ni wu a no m’lamula. Mapswi ya ni nga ma womba, ngu ona ma no m’lamula ka ditshiku do gwita. 49 Nguko ani kha ni womba-wombi ngu ku ti sukela. Kambe Tate awu a nga ni rumela, ngene a nga ni ninga txirumo txa ti ni fanelako kuwomba ni ti ni fanelako kuzivisa. 50 Ani na ti ziva ti to txirumo txakwe txi yisa ka wutomi wo mbi guma. Se totshe ti ni ti wombako, ni womba nga ti Tate a nga ni leletisa tona.”

13 Na wu si se kuhoka m’buso wa Paxkwa, Jesu se a txi ti ziva ti to yi ti hokile mbimo yo e leka ditiko diya e tsula ka Tate, msana kova Jesu a di randile vagondiswa* vakwe ava va ku haditikoni hawa, a va randile kala magwito ka wutomi wakwe. 2 Mbimo yi va nga txi lalela, Dhawulosi se a ti betile ka mapimo a Judhasi Iskariyoti mwanana wa Simoni makungo o xavisa Jesu. 3 Aku Jesu a nga txi ziva ti to Tate a ti m’ningile sotshe silo manzani kwakwe ni ku ene a txi ta ngu ka Txizimu ni ku a txi tshumela ka Txona, 4 Jesu a to khukha ngu hamezani e teka txiambalo txi a nga ti ti kapekile, e teka dithawula e sunga txiwununi. 5 Msana kova a di thete mati mu ka dibhasiya a to khata kusambisa mikondo vagondiswa vakwe e gwita e yi limpa ngu dithawula di a nga ti sungile txiwununi. 6 Mbimo yi a nga hokela Simoni Pedro, ene a to m’wotisa ku khene: “Mkoma, ina wo lava kusambisa mikondo ngu ditshuri?” 7 Se Jesu a to m’xamula ku khene: “Ati ni mahako konkuwa khu ti pfisisi, kambe u na ta ti pfisisa msana kova timhaka tiya ti di pindile.” 8 Pedro a to khene: “Mkoma na mbi thuka ni kuleka u ni sambisa mikondo yangu.” Jesu a to m’gela ku khene: “Ngako ni si sambise mikondo yako khu na mbi amukela txilo ni nani.” 9 Simoni Pedro a to m’gela ku khene: “Mkoma, u nga ni sambise mikondo dwe, ni sambise mawoko ni msungo.” 10 Jesu a to m’gela ku khene: “Awu se a nga samba kha ti lavi e samba kambe hahanze ka mikondo yakwe, nguko se a basile. Anu se mi basile kambe hi nga motshenu.” 11 A wombile eto nguko a txi m’ziva awu a nga txi lava ku m’xavisa. Ngu toneto a nga khene: “Hi nga motshenu mi nga basa.”

12 Msana kova a di va sambisile mikondo yawe, a to ti kapeka txiambalo txakwe e tshumela e khalahatsha hamezani e va gela ku khene: “Ina mi ti pfisisile ati ni nga mi mahela kani?” 13 Anu mi ni dhana ku ni ‘Mgondisi’ ni ‘Mkoma,’ mi womba ditshuri, nguko ni ene. 14 Se aku ani ni ku Mgondisi ni Mkoma ni nga sambisa mikondo yanu, nananu mi fanete kusambisana mikondo ngu txanu. 15 Nguko ani ni mi vekete txikombiso, nga ha ni nga maha ngu kona, nananu mi fanete kumahisa toneto. 16 Na mi gela ngu ditshuri ti to txithumi kha txi pali nyamne wa txona, nem awu a nga rumelwa kha pali wu a nga m’ruma. 17 Aku mi ti zivako timhaka tiya, mi na tsaka ngako mi txi ti maha. 18 Kha ni womba-wombi ngu nganu motshenu, ani na va ziva va ni nga va sawula. Kambe ta laveka ti to yi tatiseka mibhalo ayi yi ku khene: ‘Awu a nga txi dya sakudya sangu a ni jikete.’ 19 Na mi gela tiya konku ti si se kumaheka, kasiku mbimo yi ti no maheka, mi kholwa ti to ngani ene wule. 20 Ngu ditshuri na mi gela ku khani, wuhi ni wuhi a amukelako awu ni m’rumako a amukela ni nani, ni wule a ni amukelako, amukela ni Wule a nga ni ruma.”

21 Msana ko womba tiya, Jesu a to karateka moyani, e fakaza a txi khene: “Na mi gela ditshuri ni khani: Mmweyo wanu a na ni xavisa.” 22 Se vagondiswa va to khata kuwonana, nguko va si ti zivi ti to a txi womba mani. 23 Mmweyo wa vagondiswa vakwe, awule Jesu a nga txi m’randa, a ti khalahatshile hafuhi ni Jesu. 24 Se Simoni Pedro a to kweseta mgondiswa eneyo a txi khene: “Hi gele ti to a womba mani?” 25 Se ene a to khigela hakhana ka Jesu e m’wotisa ku khene: “Mkoma, u womba mani?” 26 Jesu a to xamula a txi khene: “Ngu wule ni no mninga txikhwemu txa dipawa txi ni no txi beta mu ka mbiya.” Se msana ko beta dipawa, ene a to di ningela ka Judhasi, mwanana wa Simoni Iskariyoti. 27 Msana kova Judhasi a di tekile dipawa, Sathani a to bela kwakwe. Se Jesu a to m’gela ku khene: “Ati u ti mahako, kuluveta u txi ti maha.” 28 Kambe ni wammweyo ka vale va nga ti khalahatshile hamezani, kha ti pfisisa ti to ngu kutxani a nga ti m’gete tile. 29 Aku Judhasi a nga ti zumba ni dikaxa da male, vamwani va to pimisa ti to Jesu a ti ko m’gela ti to a ti fanete kuxava asi si no ya laveka m’busoni, mwendo ku a ti fanete kuninga txo kari sisiwana. 30 Se msana ko amukela txikhwemu txile a to tekela kuhuma. I ti wusiku.

31 Msana kova Judhasi a di humile, Jesu a to khene: “Konkuwa Mwanana wa M’thu wa dhumiswa, ni Txizimu txa dhumiswa ngu mhaka yakwe. 32 Txizimu txipune txi na m’dhumisa, txi na m’dhumisa konku. 33 Vanangu ni ngadi ni nananu ngu mbimonyana. Mi na ni xola, kufana ni ku ni nga gela Vajudha, na mi gela nanu ti to: ‘Amu ni yako kona, anu kha mi na ku sikota kuta.’ 34 Na mi ninga txirumo txa txiphya ti to mi randana, nga ti ani ni nga mi randisa tona, randanani nanu ngu txanu. 35 Ngu toneto, votshe va na ti ziva ti to mi vagondiswa vangu ngako mi txi randana.”

36 Simoni Pedro a to khene: “Mkoma u ya hani?”Jesu a to xamula a txi khene: “Amu ni yako kona, awe khu na ku sikota ku ni londisa konku, aniko u na ni londisa mkama wumwani.” 37 Pedro a nje ku khene: “Mkoma, ngu kutxani ni ngo mbi sikota ku kulondisa konku? Ani ni na ningela wutomi wangu ngu ngawe.” 38 Jesu a to xamula a txi khene: “U khawe u na ningela wutomi wako ngu ngani? Ngu ditshuri ni khani, mkuku kha wu na mbi emba u si se ku ni lamba sikhati siraru.”

14 “Mi nga karatekeni timbiluni kwanu. Kholwani ka Txizimu, mi kholwa ni kwangu. 2 Mtini ka Tate wangu ku ni makhalo o tala o zumba ka ona. I si nga eto, ni di mi gete, nguko na tsula ni ya mi lulamisela wukhalo. 3 Se msana kova ni di tsute ni ya mi lulamisela wukhalo, ni na wuya ni ta mi teka, kasiku aha ni no va ni di kona, nananu mi va koneho. 4 Anu ma yi ziva nzila ya mu ni yako kona.”

5 Tomasi a to khene: “Mkoma kha hi kuzivi mu u yako kona, hi nga yi zivisa kutxani nzila?”

6 Jesu to m’gela ku khene: “Ani ngani nzila, ditshuri ni wutomi. Kha ngaho wu a tako ka Tate i si nga ngu ngani. 7 I ti ku mo ni ziva, mi ndi na m’ziva nene Tate wangu. Kukhukhela kuwa, ma m’ziva ni ku ma m’wona.”

8 Filipi a to khene: “Mkoma hi kombe Tate, eto ta enela kwathu.”

9 Jesu a to m’gela ku khene: “Se i kale ni di ni nanu, kambe awe Filipi khu se ni ziva kani? Awu a ni wonako, a woni Tate. Se ngu kutxani u txi khawe: ‘Hi kombe Tate’? 10 Ina khu kholwi ti to ani ni Tate hi vamwevo ni ku Tate a kumweko ni nani? Atiya ni mi gelako hi nga ti to no ti sukela, kambe Tate aku kumweko ni nani, ngene a mahako mithumo yakwe. 11 Kholwani ti to ani ni kumweko ni Tate, ni ku Tate a kumweko ni nani. Ngako mi si kholwi kwangu, kholwani ka mithumo yipune. 12 Ngu ditshuri na mi gela ku khani, wuhi ni wuhi a kholwako kwangu, a na maha mithumo ayi ni mahako ni ku a na tshumela e maha yo pinda yiya, nguko ani na tsula ka Tate. 13 Ni ku totshe ti mi no kombela ngu ditina dangu na maha, kasiku Tate e dhumiswa ngu kona ha ka Mwanana. 14 Txihi ni txihi mi no txi kombela ngu ditina dangu na maha.

15 “Ngako mi txi ni randa mi na veketa sirumo sangu. 16 Ani na kombela Tate ti to e mi ninga mmwani m’vhuneteli* ti to e va ni nanu kala kupinduka, 17 i ku moya wa ditshuri, awu ditiko di si kotiko ku wu amukela, nguko kha di wu woni ni ku kha di wu zivi. Anu ma wu ziva nguko wa simama ni nanu ni ku wu kwanu. 18 Na mbi mi siya mokha nguko na wuya kwanu. 19 I si nga kale ditiko kha di na mbi swa di ni wona, kambe anu mi na ni wona nguko ani na hanya ni ku nanu mi na hanya. 20 Ka ditshiku donedo mi na ti ziva ti to ani ni kumweko ni Tate wangu, ni ku nananu mi kumweko ni nani ni ku ani ni kumweko ni nanu. 21 Wuhi ni wuhi a amukelako sirumo sangu ni ku si vekisa, eyo wa ni randa. Ni ku wuhi ni wuhi a ni randako, a na randwa ngu Tate wangu, ni ku ani na m’randa nene ni ku tshumela ni ti kombekisa kwakwe.”

22 Judhasi, i si nga Iskariyoti a to m’gela ku khene: “Mkoma, njitxani txi kumahako u za u lava ku ti kombekisa kwathu, kambe u si ti kombekisi ka ditiko?”

23 Jesu a to m’xamula a txi khene: “Ngako m’thu a txi ni randa a na engisa dipswi dangu, se Tate wangu a na m’randa nene, se ani ni Tate wangu hi na ta hi ta zumba kumweko nayo. 24 Awu a si ni randiko, kha veketi mapswi angu. Mapswi ya u ma pfako hi nga angu, kambe ma lumba Tate, awu a nga ni ruma.

25 “Ani ni mi gela timhaka tiya ni di ngadi ni nanu. 26 Kambe, m’vhuneteli i ku moya wo sawuleka awu Tate a no wu rumela ngu ditina dangu, wu na ta mi gondisa totshe timhaka ni ku mi khumbuxeta totshe ati ni nga mi gela. 27 Na mi siyela kurula, ni ku na mi ninga kurula kwangu. Kha ni mi ningi nga ti ditiko di ningisako tona. Mi nga karatekeni timbiluni kwanu, nem mi nga rerekeni ngu kuthava. 28 Mi ti pfite ati ni nga mi gela ni txi khani: ‘Na tsula, kambe ni na wuya kwanu.’ I ti ku mo ni randa mi ndi na tsaka aku ni yako ka Tate, nguko Tate mbwa hombe ku ni pinda. 29 Ani ni mi gete tiya ti si nzi kumaheka, kasiku mbimo yi ti no maheka mi kholwa. 30 Kha ni na mbi womba-womba to tala kambe ni nanu, nguko awu a fumako ditiko diya wa ta ni ku a nge ni mahi txilo. 31 Kasiku ditiko di ti ziva ti to ani na m’randa Tate, ni maha nga ha Tate a nga ni ruma ngu kona. Khukhani hi tsula.

15 Ani ngani mvhinya wa ditshuri ni ku Tate wangu ngene mdimi. 2 Otshe madhavi aya ma si velekiko ene wa ma gangela, kasi ayale ma velekako wa ma senda* kasiku me simama me veleka ngutu mihando. 3 Anu se mi basile ngu mhaka ya mapswi ya ni nga mi gela. 4 Simamani mi va kumweko ni nani, se nanani na simama ni va kumweko ni nanu. Kufana ni ku didhavi di si ti kotiko kuveleka di si nga ka mvhinya, nananu mi nge si koti kuveka mihando mi si nga kumweko ni nani. 5 Ani ni mvhinya aniko anu mi madhavi. Awu a simamako kumweko ni nani ni ku ani ni va kumweko ni nene, eyo a na veleka mihando yo tala. Ngako mi si nga kumweko ni nani, mi nge si koti kumaha txilo. 6 Wuhi ni wuhi a si simamiko kumweko ni nani, a na tshotshwa kufana ni didhavi adi di gwitako di oma. Madhavi oneyo ma na sengeletwa me rinzwa hamndiloni, se me hya. 7 Ngako mi txi simama mi di kumweko ni nani ni ku mapswi angu me simama kwanu, mi nga kombela txihi ni txihi mi txi lavako, mi na ningwa. 8 Tate wangu a na dhumiswa ngako mi txi simama mi veleka mihando yo tala ni ku kombisa ti to mi vagondiswa vangu. 9 Kufana ni ku Tate a ni randako, nanani na mi randa, simamani lirandoni kwangu. 10 Ngako mi txi vekisa sirumo sangu mi na simama lirandoni kwangu, kufana ni ku ani ni engisako sirumo sa Tate ni kusimama lirandoni kwakwe.

11 Ani ni mi gela timhaka tiya kasiku mi pfa litsako ali ni li pfako ni kumaha ti to litsako lonelo li va lo hetiseka. 12 Txirumo txangu ngu ti to mi randana nga ti ani ni nga mi randisa tona. 13 Kha ngaho awu a ku ni lirando la hombe, lo pinda la wule a ningelako wutomi wakwe ngu kona ha ka vangana vakwe. 14 Anu mi na va vangana vangu ngako mi txi maha ati ni mi rumako. 15 Kha ni swi ni mi dhana ku mi sithumi, nguko txithumi kha txi ti zivi ati nyamne wa txona a mahako. Kambe ani ni mi dhana ti to mi vangana, nguko ni mi gete totshe timhaka ti ni nga ti pfa ka Tate wangu. 16 Hi nga anu mi nga ni sawula, kambe ngani ni nga mi sawula, ni ku mi rumela ti to mi simama mi veleka mihando ni ku mihando yanu yi si gumi, kasiku totshe ati mi no ti kombela ka Tate ngu ditina dangu e mi ninga.

17 Ani ni mi ninga sirumo siya kasiku mi simama mi randana. 18 Ngako ditiko di txi mi nyenya, khumbulani ti to di khatile ngu ngani di ni nyenya. 19 I di ku mi ti va ditiko, ditiko diya di ndi na mi dhunda ngu ku va mi txi lumba dona. Aku mi si lumbiko ditiko, kambe ni ngo mi sawula ka ditiko diya, dona da mi nyenya. 20 Khumbulani atiya ni nga mi gela, txithumi kha txi pali nyamne wa txona. Aku va nga xanisa ani, nananu mi na xaniswa, i di ti to va vekisile mapswi angu, va na vekisa ni anu. 21 Kambe vona va na mi maha totshe tiya ngu mhaka ya ditina dangu, nguko kha va m’zivi Awule a nga ni rumela. 22 I di ti to ni sa ta ni ta womba-womba navo, vona va si nga ni txionho. Kambe konkuwa, kha va nga ni to ti emela ngu tona ka txionho txawe. 23 Awule a ni nyenyako, a nyenya ni Tate wangu. 24 I di ku va sa ni wona ni txi maha mithumo yiya yi nga mbi mahwa ngu mmwani m’thu, vona va si nga ni txionho. Kambe vona va ni woni ni ku ni nyenya, ve tshumela ve nyenya Tate wangu. 25 Kambe atiya ti mahekile kasiku ti tatiseka ati ti nga bhalwa ka Mlayo wawe, to khene: ‘Vona va ni nyenyile ku si nga ni txivangelo.’ 26 Mbimo yi ku no ta m’vhuneteli awu ni no m’rumela a txi ta ngu ka Tate, i ku moya wa ditshuri awu wu tako ngu ka Tate, ene a na ta ni fakazela. 27 Se nananu mi na ta ningela wufakazi, nguko mi vite ni nani kukhukhela makhatoni.

16 “Ni mi gete timhaka tiya kasiku mi si khuveki.* 2 Vathu va na mi hinga masinagogani. Ngu ditshuri ya hoka mbimo ayi awu a no mi daya a no pimisa ti to a mahela mthumo wo sawuleka Txizimu. 3 Kambe vona va na maha timhaka tiya nguko kha va m’zivi Tate nem ani. 4 Kambe ani ni mi gete timhaka tiya kasiku ngako yi txi hoka mbimo yo ti maheka mi ti khumbula ti to ani ni mi gete.

“Ani kha na mi gela timhaka tiya makhatoni nguko ni ti ngadi ni nanu. 5 Konkuwa ni ya ka Wule a nga ni rumela, kambe kha ngaho wammweyo kwanu a ni wotisako ku, ‘Ni ya hani?’ 6 Kambe timbilu tanu ti karatekile ngu ku ni nga mi gela timhaka tiya. 7 Ani na mi gela ditshuri ti to kutsula kwangu ti wuyelisa anu. Nguko ngako ni si tsuli, m’vhuneteli kha na mbi ta kwanu, kambe aku ni tsulako na mi rumelela ene. 8 Mbimo yi a no ta, ene a na ta ninga ditiko sikombekiso so tsana mayelano ni txionho, wululami ni kulamula. 9 Txo khata mayelano ni txionho nguko kha va kholwa kwangu, 10 kulondisa wululami nguko ani ni ya ka Tate ni ku kha mi na mbi ni wona kambe, 11 ngu magwito kulamulwa nguko awu a fumako ditiko diya a lamutwe.

12 “Ni ngadi ni timhaka to tala kasiku ni mi gela, kambe konkuwa mi nge ti pfisisi. 13 Kambe mbimo yi m’vhuneteli i ku moya wa ditshuri a no hoka, a na ta mi kongomisa ka dotshe ditshuri, ni ku ene kha na mbi womba-womba ngu ku ya ngu ku ti sukela, kambe a na womba ati a no ti pfa ni kutshumela e mi xawutela ati ti no maheka. 14 Ene a na ni dhumisa nguko a na womba-womba ati a no ti amukela ngu kwangu. 15 Sotshe si Tate a ku naso, nzangu. Ngu toneto ni nga mi gela ku khani, m’vhuneteli a na amukela asi i ku sangu e tshumela e ta mi xawutela. 16 I si nga kale kha mi na mbi ni wona, kambe ti na mbi swela mi na tshumela mi ni wona.

17 Mbimo yi va nga ti pfa, vamwani ka vagondiswa va to wotisana va txi kha vona: “A lava kuwomba txani ngu mapswi ya o khene, ‘I si nga kale kha mi na mbi ni wona, kambe ti na mbi swela, mi na tshumela mi ni wona,’ ni ya o, ‘nguko na tsula ka Tate’?” 18 Se va to wotisana va txi kha vona: “A lava kuwomba txani ngu mapswi ya ma ku, ‘i si nga kale’? Kha hi ti zivi ti to a womba-womba ngu txani.” 19 Jesu a to ti ziva ti to va txi lava ku m’maha siwotiso, se a to va wotisa ku khene: “Ina mo wotisana ngu ku ni nga mi gela ku khani: ‘I si nga kale kha mi na mbi ni wona, kambe ti na mbi swela, mi na tshumela mi ni wona?’ 20 Ani na mi gela ditshuri ni txi khani, anu mi na dila ni kupandiseka mbiluni, kambe ditiko di na tsaka, hambiku mi no karateka, kukarateka kwanu ku na txitxa ku va litsako. 21 Ngako wamsikati a txi lava kuhefemula ene wa xaniseka, nguko mbimo yakwe yi hokile, kambe msana kova a di velekile mwanana kha swi e khumbula kukarateka a ku a nga txi kupfa ngu kona ha ka litsako li a li pfako ngu ku va a di tisile m’thu hamafuni. 22 Ngu ha kufanako, nananu mi karatekile, kambe na tshumela ni wuya, timbilu tanu ti na tshumela ti tsaka ni ku kha ngaho wu a no mi tekela litsako lonelo. 23 Ka ditshiku donedo kha mi na mbi ni wotisa txilo ni txa tximwetxo. Na mi gela ditshuri ti to totshe ti mi no kombela Tate ngu ditina dangu, ene a na mi ninga. 24 Kala kuwa kha mi se kombela txilo ni txa tximwetxo ngu ditina dangu. Kombelani mi na ningwa, kasiku litsako lanu li tatiseka.

25 “Ni mi gete timhaka tiya ngu kuthumisa sidinganiso. Kambe ya ta mbimo ayi ni no mbi womba-womba kambe ngu kuthumisa sidinganiso, kambe na ta mi gela mayelano ni Tate hakubasani.* 26 Ka donedo ditshiku, anu mi na kombela ka Tate ngu ditina dangu, kambe hi nga ku no womba ti to ni na ta mi kombelela. 27 Nguko Tate apune wa mi randa, nguko nananu ma ni randa ni kukholwa ti to ni tile kota muemeli wa Txizimu. 28 Ni tile haditikoni kota muemeli wa Tate. Konkuwa na leka ditiko ni tsula ka Tate.”

29 Se vagondiswa vakwe va to kha vona: “Wawoo! Akuwa ngu kona se u womba-wombako ti pfala kwati, u si thumisi sidinganiso. 30 Konkuwa ha ti ziva ngu ditshuri ti to awe wa ti ziva totshe ni ku kha ti lavi u wotiswa txilo. Ngu toneto ha kholwa ti to awe u ta ngu ka Txizimu.” 31 Jesu a to va gela ku khene: “Konkuwa ma kholwa kani? 32 Engisani tiya, ya ta mbimo, ngu ditshuri se yi hokile, ayiya motshenu mi no hangalaka mmweyo ni mmweyo e ya mtini kwakwe mi ni leka nokha. Kambe ani kha ni nga nokha, nguko Tate a ni nani. 33 Ani ni mi gete timhaka tiya kasiku ngu kona ha kwangu mi va ni kurula. Haditikoni hawa mi na manana ni sixaniso, kambe tsanani msana. Ani ni xute ditiko.”

17 Jesu a to womba timhaka tiya e gwita e guleta maso e wona nzumani a txi khene: “Tata, mbimo yi hokile. Dhumisa mwanana wako kasiku mwanana wako e ku dhumisa. 2 Kufana ni ku u nga mninga mtamo wo fuma votshe vathu, kasiku e ninga wutomi wo mbi guma ka votshe vale u nga mninga. 3 Kasiku ve mana wutomi wo mbi guma va fanete ku kuziva awe, Txizimu txa tximwetxo dwe txa ditshuri ni wule u nga m’rumela, Jesu Kristu. 4 Ani ni ku dhumisile hamafuni hawa, ni kuhetisa mthumo wu u nga ni ninga wona. 5 Tata ni dhumise kumweko ni nawe, ni va ni wudhumo wu ni nga ti nawo ku si se kuvangwa ditiko.

6 “Ni zivisile ditina dako ka vathu va u nga ni ninga ditikoni muwa. Vona i ti vako, aniko u ni ningile, ni ku vona va engisa dipswi dako. 7 Ni ku vona va ti ziva ti to sotshe si u nga ni ninga, si ta ngu kwako, 8 nguko ani ni va txhamusete totshe timhaka ti u nga ni ninga ni ku vona va ti tumete, ni ku ngu ditshuri va ti ziva ti to ani ni tile kota muemeli wako, ni ku kholwa ti to u ni rumete. 9 Ani na va kombelela, kha ni kombeleli ditiko, kambe ni kombelela avale u nga ni ninga, nguko vona mbako. 10 Sotshe si u ku naso nzangu, ni ku sotshe si ni ku naso nzako, ni ku ani ni dhumisilwe hagari kwawe.

11 “Kha ni swi ni vaho haditikoni, kambe vona vaho haditikoni, nguko ni ta kwako. Tate wo Sawuleka, va wonelele ngu mhaka ya ditina dako, adi u nga ni ninga kasiku vona ve va ni wumwewo kufana ni nathu hi ku ni wumwewo. 12 Mbimo yi ni nga ti navo, ani ni txi va wonelela ngu mhaka ya ditina dako adi u nga ni ninga, ni va vhikete ni ku kha ngaho wu a nga loviswa hahanze ka wule a yako kuloviswani, kasiku ti tatiseka ati ti nga wombwa ka mibhalo. 13 Kambe konkuwa ni ta kwako, ni womba timhaka tiya haditikoni kasiku ve pfa litsako lo hetiseka ali ni li pfako. 14 Ani ni va ningile dipswi dako, kambe ditiko da va nyenya nguko vona kha va lumbi ditiko, kufana ni nani ni si lumbiko ditiko diya.

15 “Kha ni ku kombeli ti to u va thavisa haditikoni, kambe ti to u va wonelela ngu mhaka ya M’bihi. 16 Vona kha va lumbi ditiko diya, kufana ni ku ani ni si lumbiko ditiko diya. 17 Va basise* ngu ditshuri, dipswi dako ditshuri. 18 Kufana ni ku u nga ni rumela haditikoni, nanani ni va rumete haditikoni. 19 Ani na ti basisa ti to ve wuyelwa, kasiku ni vona ve basiswa ngu kona ha ka ditshuri.

20 Kha ni kombeleli vava dwe, kambe ni vale va kholwako kwangu ngu kona ha ka ti va ti gondisako, 21 kasiku vona ve va ni wumwewo kufana ni nawe Tata u ku ni wumwewo ni nani ni ku nani ni ku ni wumwewo ni nawe, ti to ve va ni wumwewo ni nathu, kasiku ditiko di kholwa ti to ngawe u nga ni rumela. 22 Ani ni va ningile wudhumo awu u nga ni ninga, kasiku ve va ni wumwewo kufana ni nathu hi ku ni wumwewo. 23 Ti to ni va ni wumwewo navo ni ku awe u va ni wumwewo ni nani kasiku ve va ni wumwewo wo hetiseka, ti to ditiko di ti ziva ti to ngawe u nga ni rumela ni ku u va randile kufana ni ku u nga ni randa. 24 Tata, ni lava ti to ava u nga ni ninga ve va ni nani amu ni ku kona, kasiku ve wona wudhumo awu u nga ni ninga nguko awe u ni randile ku si se kuvangwa ditiko. 25 Tata wo Lulama, kuwomba ditshuri ditiko diya kha di ku zivi, kambe ani na ku ziva ni ku ava ni vona va ti ziva ti to ngawe u nga ni rumela. 26 Ani ni zivisile ditina dako kwawe, ni ku na simama ni di zivisa kasiku lirando li u nga ni randa ngu lona li ti komba kwawe ni ku ani ni va ni wumwewo navo.”

18 Msana ko womba timhaka tiya, Jesu a to khukha ni vagondiswa vakwe veya ka didhawa dimwani da mkova wa Kedroni, kona hale ku ti ni jaradhi, se ene ni vagondiswa vakwe va to wulela ka yona. 2 Judhasi awu a nga m’xavisa a txi wu ziva wukhalo wule, nguko Jesu a txi tolovela kutshangana kona ni vagondiswa vakwe. 3 Se Judhasi a to ta ni mtxawa wa masotxhwa kumweko ni maphoyisa,* aya ma nga rumelwa ngu tinduna ta vaprista ni Vafarisi, va to hoka kona hale ni so wona ngu sona* ni matxhari. 4 Aku Jesu a nga txi ti ziva ati ti ndi no m’humelela, a to va yela a txi ya khene: “Mi lava mani?” 5 Vona va to m’xamula va txi kha vona: “Hi lava Jesu wa Nazareta.” Ene a njo ku khene: “Ngani.” Judhasi awu a nga m’xavisa a ti kumweko navo.

6 Kambe mbimo yi Jesu a nga va gela ku khene: “Ngani,” va to xexa ve wa ngu nyatxisane. 7 Ene a to tshumela e va wotisa a txi khene: “Kasi mi lava mani?” Vona va njo ku kha vona: “Hi lava Jesu wa Nazareta.” 8 Jesu a to va xamula a txi khene: “Ani se ni mi gete ti to ngani. Ngako i di ani mi ni lavako, lekani vavamna vava ve tsula.” 9 Eto ti mahekile kasiku ti tatiseka ati a nga ti wombile to khene: “Kha na mwalata ni wammweyo ka vale u nga ni ninga.”

10 Simoni Pedro a ti ni ditxhari, se a to di swomola e wila nzeve ya txinene* ya txithumi txa mprista wa hombe. Ditina da txithumi txonetxo i ti Malkusi. 11 Kambe Jesu a to gela Pedro a txi khene: “Tshumeta ditxhari txikhwamani ka dona. Ina kha na fanela kusela kopo yi Tate wangu a nga ni ninga kani?”

12 Se masotxhwa, komandante wa tiyimbi kumweko ni tigwardha ta Vajudha va to ñola Jesu ve m’sunga. 13 Vona va to khata ngu ku m’yisa ka Anasi, ngu ku i nga ti Tate wa msikati wa Kayifasi, i nga ti mprista wa hombe dilembe donedo. 14 Phela i ti Kayifasi a nga ti gete Vajudha to khene: Ti ti vhuna vona ku m’thu wammweyo e fa ngu mhaka ya votshe vathu.

15 Simoni Pedro kumweko ni mmwani mgondiswa va txi londetela Jesu, mgondiswa wuwa a txi ziwa ngu mprista wa hombe ni ku a bete ni Jesu mthandani ka mprista wa hombe, 16 kambe Pedro a ti emile hahanze hafuhi ni ditimba. Se mgondiswa wule a nga txi ziwa ngu mprista wa hombe a to huma e ya womba-womba ni txithumi atxi txi nga ti wonelela ditimba ni kuteka Pedro e bela nayo. 17 Txithumi txa txisikati atxi txi nga ti wonelela ditimba txi to wotisa Pedro txi txi kha txona: “Ina awe khu nga mmweyo wa vagondiswa va wamwamna wule?” Ene a to xamula a txi khene: “Ahim-him.” 18 Se sithumi kumweko ni maphoyisa va ti emile va txi ora mndilo wu va nga ti dhivete, nguko ku ti titila se va txi ti futumeta. Pedro nene a ti emile kona hale a txi ti futumeta.

19 Se nduna ya vaprista yi to maha siwotiso Jesu mayelano ni vagondiswa vakwe ni ti a nga txi ti gondisa. 20 Jesu a to m’xamula a txi khene: “Ni wombawombile masoni ka votshe vathu. Yotshe mbimo ni txi gondisa masinagogani ni dithempeleni, aha Vajudha va tshanganako kona, ni ku kha ti ngaho ti ni nga sisa. 21 Ngu kutxani u txi ni maha siwotiso? Wotisa ava va nga engisa ati ni nga womba. Vona va ti ziva ati ni nga womba.” 22 Msana kova a di wombile timhaka tiya, mmweyo wa maphoyisa a to peka mpama Jesu, e m’gela ku khene: “Ina va xamulisa toneto nduna ya vaprista?” 23 Se Jesu a to m’xamula a txi khene: “Ngako ni di wombile to biha, ni gele ti to ngu hayi ha ni nga phazama kona, kambe ni di wombile ta tinene, u ni pekela txani?” 24 Se Anasi a to m’rumela a di sungilwe ka Kayifasi, mprista wa hombe.

25 Simoni Pedro a ti kona hale a txi ora mndilo. Se va to m’wotisa ku kha vona: “Ina awe khu nga mmweyo wa va vagondiswa vakwe?” Ene a to lamba a txi khene: “Ahim-him.” 26 Mmweyo wa txithumi txa mprista wa hombe, awu i nga ti dixaka da wamwamna wule Pedro a nga m’wila nzeve, a to m’gela ku khene: “Awe ni ku woni nayo ka jaradhi, no hemba?” 27 Kambe Pedro a to tshumela e lamba, kunukunuko mkuku wu to emba.

28 Se vona va to teka Jesu ngu ka Kayifasi ve m’yisa nyumbani ka mkoma. I ti ni mixo ngutu, kambe vona vapune kha va wulela nyumbani ka mkoma, ngu kuthava kunyama kasiku ve sikota ku ya dya Paxkwa. 29 Se Pilato a to huma hahanze e va wotisa ku khene: “Ngu tihi ti wamwamna wuwa a nga onha?” 30 Vona va to m’xamula va txi kha vona: “I ti ku wamwamna wuwa i si nga txigevenga, athu hi sa m’tisa kwako.” 31 Se Pilato a to va gela ku khene: “M’tekeni mi m’lamula anu mipune ngu ku ya ngu mlayo wanu.” Se Vajudha va to m’gela ku kha vona: “Athu kha hi tumelelwi kudaya m’thu.” 32 Atiya ti mahekile kasiku ti tatiseka ati Jesu a nga ti wombile mayelano ni nzila yi a no fa ngu yona.

33 Se Pilato a to wulela kambe nyumbani ka mkoma, e dhana Jesu e m’wotisa ku khene: “Ina awe u Mkoma wa Vajudha?” 34 Jesu a to m’xamula a txi khene: “Ina eto u ti wotisako ti khukhela hamsungo kwako mwendo vathu vamwani va nga kugela mayelano ni nani?” 35 Pilato a to xamula a txi khene: “No va M’judha ani? Vathu va ditiko dako ni tinduna ta vaprista va nga ta kuningela kwangu. Se u ni dipswi?” 36 Jesu a to xamula a txi khene: “Mfumo wangu kha wu lumbi ditiko diya, i ti ku Mfumo wangu wo lumba ditiko diya valondeteli vangu va di ni lwete kasiku ni si ningelwi ka va Vajudha. Kambe ditshuri ngu diya, Mfumo wangu hi nga wa muwa.” 37 Pilato a to m’wotisa a txi khene: “Ti ti komba u di mkoma hi nga tona?” Jesu a to m’xamula a txi khene: “Awe upune ngawe u wombako ti to ni mkoma. Nguko ani ni veleketwe tonti ni ku ni tete tonti hamafuni, kasiku ni ta ningela wufakazi mayelano ni ditshuri. Votshe va va emako ni ditshuri va engisa dipswi dangu.” 38 Pilato a to m’wotisa ku khene: “Njitxani ditshuri?”

Msana ko womba tiya a to huma hahanze e yela Vajudha e ya va gela ku khene: “Kha ni woni mnando ka wamwamna wuwa. 39 I si nga eto dwe, anu mi ni mkhuva wo txhatxha txibotxhwa ngu mbimo ya Paxkwa. Se mi lava ti to ni txhatxha Mkoma wa Vajudha kani?” 40 Vona va to kwangula va txi: “Ahim-him, txhatxha Bharabhasi!” Bharabhasi i ti dikhamba.

19 Pilato a to teka Jesu e rumisa ti to ve m’kwapela. 2 Masotxhwa ma to luka korowa* ya mipa ve m’sanzeka hamsungo kwakwe ve tshumela ve m’fenengeta ngu nguwo ya kori ya mkhure.* 3 Ona ma txi m’tshuketela ma txi m’gela ku kha ona: “Xeweni, Mkoma wa Vajudha!” Va txi pata ni ku m’peka mipama. 4 Pilato a to huma kambe hahanze e va gela ku khene: “Engisani! Ani na m’humisa hahanze kasiku mi ta wona ti to ani kha ni woni mnando ka wamwamna wuwa.” 5 Jesu a to huma hahanze a di ni korowa* ya mipa ni nguwo yile ya kori ya mkhure.* Se Pilato a to khene kwawe: “Ndiyoyoni.” 6 Kambe mbimo yi tinduna ta vaprista ni maphoyisa va nga m’wona, va to kwangula va txi kha vona: “A na gogotelwe haphandeni eyo! A na gogotelwe haphandeni eyo!” Pilato a to va gela ku khene: “M’tekeni anu mipune mi ya m’daya, nguko kha ni woni mnando kwakwe.” 7 Se Vajudha va to m’xamula va txi kha vona: “Athu hi ni mlayo se ngu kuya ngu mlayo wonewo, ene a fanete kufa, nguko a ti mahile mwanana wa Txizimu.”

8 Mbimo yi Pilato a nga pfa ati va nga txi womba, a to engetela kuthava, 9 ene a to tshumela kambe e bela nyumbani ka mkoma e wotisa Jesu ku khene: “Kasi u ta ngu hani? Kambe Jesu kha m’xamula txilo. 10 Pilato a to m’wotisa ku khene: “U lamba ku ni xamula ngu txani? Wo mbi ti ziva ti to ni ni mtamo wo kutxhatxha ni mtamo wo kudaya kani?” 11 Jesu a to m’xamula a txi khene: “Awe u si na ku va ni mtamo txitimwi kwangu ngako u sa ningwa ngu Txizimu. Ngu toneto awule a nga ni ningela kwako a ni mnando wa hombe.”

12 Ngu toneto, Pilato a ti lava tinzila to m’txhatxha, kambe Vajudha va txi kwangula va txi kha vona: “Ngako u txo m’txhatxha mamo wuwa, awe khu nga mngana wa Khezari. Nguko wuhi ni wuhi a ti mahako mkoma a wukela Khezari.” 13 Msana kova Pilato a di engisile timhaka tiya, a to humisa Jesu hahanze e ya khalahatsha ka wukhalo awu wu dhanwako ku Marigwini, ngu Txihebheru i ku Gabhatha, kasi kuxuxisa Jesu. 14 I ti ditshiku da kululamisela Paxkwa, i ti kona mu ka ma 12. Se ene a to gela Vajudha a txi khene: “Ndiyo Mkoma wanu.” 15 Kambe vona va to kwangula va txi kha vona: “A na dawe eyo! A na dawe eyo! A na yiswe haphandeni eyo!” Se Pilato a to va wotisa ku khene: “Mi lava ku ni daya mkoma wanu kani?” Tinduna ta vaprista ti to xamula ti txi kha tona: “Athu kha hi nga ni mmwani mkoma hahanze ka Khezari.” 16 Se Pilato a to teka Jesu e ya mningela kwawe ti to e ya dawa ka phande.

Se vona va to teka Jesu ve tsula nayo. 17 Se a to rwala phande ya xanisa e tsula ha kudhanwako ku Wukhalo wa Txikwakwa, ngu Txihebheru i ku Golgota. 18 Kona khe va ti ya m’gogotela ka phande. Ngu madhawani kwakwe ku ti ni majaha mambidi, ene a ti ngu hagari. 19 Pilato a to bhala mapswi e ma veka txitimwi ka phande ya xanisa.* Kona ku ti bhatwe to: “Jesu wa Nazareta, Mkoma wa Vajudha.” 20 Vajudha vo tala va lerile mapswi onewo, nguko wukhalo wu Jesu a nga ti gogotetwe ka wona wu ti hafuhi ni didhoropa, ni ku mapswi onewo ma ti bhatwe ngu Txihebheru, Txilatina ni Txigriki. 21 Kambe tinduna ta vaprista ni Vajudha ti to gela Pilato ti txi kha tona: “U nga bhali ku khawe: ‘Mkoma wa Vajudha,’ kambe bhala ku khawe: ‘Ene a ti khene, ani ni Mkoma wa Vajudha.’” 22 Pilato a to xamula a txi khene: “Ati ni nga bhala, ni bhate.”

23 Msana kova masotxhwa ma di gogotete Jesu haphandeni, ma to teka siambalo sakwe me si bhanda ngu mune wa mapedhasu, ve abanelana ngu wumune wawe. Va to teka dibhaji dakwe ni dona, kambe dona di sa rungwa, di ti ko lukwa kukhukhela txitimwi kuya hahatshi. 24 Se vona va to gelana va txi kha vona: “Hi nga di bhandeni, kambe he xaxuveni tixolo kasi kuziva ti to di na lumba mani.” Atiya ti mahekile kasiku ti tatiseka ati ti nga bhalwa ka mibhalo to khene: “Vona va abanile siambalo sangu ngu txawe, ve si xaxuvela tixolo.” Ngu tontiya masotxhwa ma nga maha ngu ditshuri.

25 Hafuhi ni ha Jesu a nga ti gogotetwe kona, ku ti emile mame wakwe ni mnanda wa mame wakwe, a ti ti ho kambe Mariya kata Klopasi ni Mariya Magdhala. 26 Mbimo yi Jesu a nga wona mame wakwe ni mgondiswa wu a nga txi m’randa a di emile hafuhi hale, a to gela mame wakwe a txi khene: “Awuwa, konku mwanana wako.” 27 A to gwita e gela mgondiswa wule a txi khene: “Kukhukhela kuwa, awuwa i mame wako.” Kukhukhela koneho, mgondiswa wule a to m’teka e tsula nayo mtini kwakwe.

28 Msana ko wona ti to totshe se ti ti mahekile, Jesu a to womba ku khene: “Ni pfa ditora.” Kasiku ti tatiseka ati ti nga wombwa mu ka mibhalo. 29 Ku ti ni dijaru adi di nga ti tate ngu vhinya yo tsavela. Se va to teka txiponja atxi txi nga ti sete vhinya yoneyo yo tsavela ve txi txhoma ka ndonga ya isopo ve txi tisa hatxisofuni kwakwe. 30 Msana ko duka vhinya yile yo tsavela, Jesu a to khene: “Se ti hetisekile.” A to namisa msungo wakwe e fa.*

31 Aku i nga ti ditshiku da Kululamisela, va to kombela Pilato e rumisa ti to kufunywa minenge ya vale va nga ti gogotetwe haphandeni ni kuthavisa sirumbi sawe, kasiku sirumbi sawe si si simami haphandeni ngu ditshiku da Sabata (Sabata yile, i ti Sabata ya hombe ngutu). 32 Se masotxhwa ma to funya minenge ya wamwamna wo khata a nga ti gogotetwe ngu didhawa dimwani da Jesu. 33 Kambe mbimo yi va nga hokela Jesu va to wona ti to ene se a ti fite, ngu toneto kha va funya minenge yakwe. 34 Mmweyo wa masotxhwa a to m’thola didhawa ngu ditxhari, se ku to tekela kuhuma mnoha ni mati. 35 Awule a nga ti wona wa fakaza ni ku wufakazi wakwe mbwa ditshuri, ni ku wa ti ziva ti to a womba ditshuri kasiku nanu mi kholwa. 36 Atiya ti mahekile kasiku wu tatiseka m’bhalo awu wu ku: “Kha na mbi funywa dirambu dakwe ni da dimwedo.” 37 Wumwani m’bhalo wu kha wona: “Va na wonetela awule va nga m’thola.”

38 Msana ka tiya, Josefa wa Arimateya i nga ti mgondiswa wa Jesu ngu kusisalani ngu kuthava Vajudha, a to ya kombela Pilato ti to e ya thavisa txirumbi txa Jesu, se Pilato a to m’tumelela. Ngu toneto a to tsula e ya thavisa txirumbi. 39 Nikodhemo wamwamna wu a nga ti yete Jesu ngu dikhambi do khata ni wusiku, nene a tsute a di ni mira yi nga ti patanisilwe ni mbangani yi nga txi peza kona mu ka 33 wa makilo. 40 Va to teka txirumbi txa Jesu ve txi phutela ngu tinguwo to basa, ve m’totela mafura o bhumula, nga ti Vajudha va nga ti lulamiselisa tona txirumbi to txi ya tshotshwa. 41 Se ka wukhalo wu a nga dawelwa ka wona ku ti ni jaradhi, ka jaradhi yoneyo ku ti ni dithitha da diphya, adi ku nga si khali kutshotshwa m’thu ka dona. 42 Kota ku i nga ti ditshiku da Kululamisela da Vajudha ni ku dithitha di nga ti hafuhi, vona va to veka Jesu kona hale.

20 Ka ditshiku do khata da divhiki, Mariya Magdhala a to tsula dithithani ni mixo ku di ngadi phumile, ene a to wona ti to dirigwi dile se di ti thavisilwe dithithani. 2 Se a to tutuma eya ka Simoni Pedro ni mgondiswa wule mmwani, awule Jesu a nga txi m’randa e ya va gela ku khene: “Va thavisile Mkoma dithithani, se kha hi ti zivi ti to va ti ya m’veka hani.”

3 Pedro kumweko ni mgondiswa wule mmwani va to khukha ve kongoma dithithani. 4 Se votshe ngu wumbidi wawe va to khata kututuma, kambe mgondiswa wule mmwani a to tutuma ngutu e siya Pedro e khata ene e hoka dithithani. 5 Ene a to nama e xolela e wona tinguwo ti di hahatshi, kambe kha bela. 6 Ngu msana, Simoni Pedro awu a nga txi mlondisa a to hoka nene, e bela dithithani, se e wona tinguwo ti di vekilwe hahatshi. 7 Difadhuko di di nga ti tombetetwe hamsungo kwakwe di si nga ho ka tinguwo timwani, dona di ti phutetwe ngu didhawa. 8 Se mgondiswa wule mmwani a nga ti khatile ene e hoka dithithani, a to bela e ti wona e tshumela e kholwa. 9 Nguko vona va si se ku wu pfisisa m’bhalo wu wu wombako to ene a ti fanete kuwuswa ngu ka vakufa. 10 Se vagondiswa va to tshumela ve wuya mtini.

11 Kambe Mariya a to sala hafuhi ni dithitha a txi dila. Mbimo yi a nga txi dila, a to nama e xolela mndani ka dithitha. 12 Se a to wona tingilozi timbidi ti di ambate siambalo so basa, aha mmidi wa Jesu wu nga ti vekilwe kona, yimweyo yi di ngu misungoni yimwani yi ti ngu minengeni. 13 Tona ti to m’wotisa ti txi kha tona: “Wamsikati, u dilela txani?” Ene a to xamula tingilozi tile a txi khene: “Va thavisile Mkoma wangu ni ku kha ni kuzivi mu va nga m’veka kona.” 14 Msana ko womba eto, ene a to tshembereka e wona Jesu a di emile, kambe kha m’ziva ti to i ti Jesu. 15 Jesu a to m’wotisa ku khene: “Wamsikati, u dilela txani? U lava mani?” Ngu kupimisa ti to i ti m’khataleli wa jaradhi, ene a to m’gela ku khene: “Ngako i di awe u nga m’thavisa, ni gele mu u nga m’veka kona, na ya mteka ni tsula nayo.” 16 Jesu a to m’gela ku khene: “Mariya!” Ene a to tshembereka e m’wona, e womba ngu Txihebheru ku khene: “Rabhoni!” (Ti wombako ku: “Mgondisi.”) 17 Jesu a to m’gela ku khene: “U nga ni ñole nguko kha ni se kukwela ni ya ka Tate. Kambe tsula ka vafowethu vangu u ya va gela ti to: ‘Na kwela ni ya ka Tate wangu, i ku Tate wanu, ni ka Txizimu txangu i ku Txizimu txanu.’” 18 Mariya Magdhala a to tsula e ya gela vagondiswa a txi khene: “Ani ni woni Mkoma!” Ni ku va gela ati Jesu a nga ti m’leletile.

19 Se i ti minova ya ditshiku do khata ka divhiki, ni ku matimba a wukhalo wu vagondiswa va nga ti tshanganile ka wona ma ti khotilwe ngu kuthava Vajudha, se Jesu a to humelela hagari kwawe a txi va gela ku khene: “Kurula ku nave ni nanu.” 20 Msana ko womba eto, a to va komba manza akwe ni ku va komba didhawa dile a nga ti thotwe. Se vagondiswa va to tsaka ngu kuwona Mkoma. 21 Jesu a to tshumela e va gela ku khene: “Kurula ku nave ni nanu. Kufana ni ku Tate a nga ni rumela, nanani na mi rumela.” 22 Msana ko womba tiya, a to va futeta e va gela ku khene: “Amukelani moya wo sawuleka. 23 Ngako mi txi divalela sionho sa vamwani, sona si na divalelwa, aniko ngako mi si divaleli sionho sa vamwani, sona kha si na mbi divalelwa.”

24 Kambe Tomasi mmweyo wa vale va 12, a nga txi dhanwa ku Dihasa, a si nga navo mbimo yi Jesu a nga humelela. 25 Se vagondiswa vale vamwani va to m’gela ku kha vona: “Athu hi woni Mkoma!” Kambe ene a to va gela ku khene: “Ngako ni si woni timbowo ta sipikiri manzani kwakwe, ni si veki litiho ka timbowo ta sipikiri ni kugwesa hale a nga tholwa, kha ni na mbi kholwa.”

26 Msana ka 8 wa masiku, vagondiswa vakwe va ti tshanganile kambe, se Tomasi a ti navo. Hambiku matimba ma nga ti khotilwe, Jesu a to humelela hagari kwawe e va gela ku khene: “Kurula ku nave ni nanu.” 27 Ngu msana a to gela Tomasi a txi khene: “Veka litiho lako hawa u wona manza angu, veka diwoko dako aha ni nga tholwa, leka kukana-kana u kholwa.” 28 Tomasi a to m’xamula a txi khene: “Mkoma wangu ni Txizimu txangu!” 29 Jesu a to m’gela ku khene: “U kholwa ngu ku u nga ni wona kani? Ava va kholwako hambiku va nga mbi ni wona, va tsaka.”

30 Ngu ditshuri, Jesu a mahile simwani sidiwukiso so tala masoni ka vagondiswa vakwe, asi si nga mbi bhalwa ka dibhuku diya. 31 Kambe asiya si bhatwe kasiku mi kholwa ti to Jesu ngene Kristu, Mwanana wa Txizimu, ni ti to ngako mi txi kholwa mi na mana wutomi ngu ditina dakwe.

21 Msana ka tiya, Jesu a to ti kombekisa kambe ka vagondiswa vakwe khe lineneni ka Tibheriya. Ene a ti kombekisile ngu nzila yiya. 2 Ku ti ni Simoni Pedro, Tomasi (awu a dhanwako ku Dihasa), Nataniyeli wa Kana khe Galileya, vanana va Zebhedhewu ni vagondiswa vamwani vavambidi. 3 Simoni Pedro a to va gela ku khene: “Ni nga txi ya kudotani.” Se ni vona va to m’gela ku khene: “Nathu hi na tsula ni nawe.” Se vona va to tsula ve ya bela ngalavani, kambe kha va mana txilo wusiku wule.

4 Kambe mbimo yi di nga txa, Jesu a ti emile mabambe ka linene, hambiketo vagondiswa kha va m’tumbula ti to i ti ene. 5 Jesu a to va wotisa ku khene: “Vanangu, ina mi ni so dya?” Vona va to xamula va txi kha vona: “Ahim-him.” 6 Ene a to va gela ku khene: “Rinzani likoka ngu didhawa da txinene ka ngalava mi na si mana.” Se vona va to rinza likoka kambe vona kha va si kota ku li humisa nguko li ti zwetile sihaka sa singi. 7 Mgondiswa wu Jesu a nga txi m’randa a to gela Pedro a txi khene: “I Mkoma.” Se Simoni Pedro mbimo yi a nga wona ti to i ti Mkoma, a to ambala siambalo sakwe nguko a sa ambala txilo, e dumwaka matini. 8 Kambe vagondiswa vamwani ava va nga ti sate ngalavani, va to m’yela va txi ndinda likoka ali li nga ti tate ngu sihaka, nguko va si nga kule ni mabambe ka linene, i ti ka mpfuka wa 90 wa mametro dwe.

9 Mbimo yi va nga huma hahanze va to wona makala a mndilo, ngu txitimwi ka ona ku ti ni txihaka ni dipawa. 10 Jesu a to va gela ku khene: “Tisani sihaka asi mi nga si mana.” 11 Simoni Pedro a to bela ngalavani e ya ndinda likoka li nga ti tate ngu sihaka sa hombe, i ti 153 wa sona. Hambiku i nga ti sa singi, lona kha la vharuka. 12 Jesu a to va gela ku khene: “Ngonani mi ta dya.” Kambe kha nga ho mgondiswa ni wammweyo a nga tsana ku m’wotisa ku khene: “Ngawe mani?” Nguko va txi ti ziva ti to i ti ene Mkoma. 13 Jesu a to teka dipawa ni txihaka e va ninga. 14 Adiya dikhambi da wuraru adi Jesu a nga ti kombekisa ka vagondiswa vakwe msana ko wuswa ngu ka vakufa.

15 Msana kova va di gwitile kudya, Jesu a to wotisa Simoni Pedro a txi khene: “Simoni mwanana wa Johani, ina wa ni randa kupinda siya?” Ene a to xamula a txi khene: “Ina Mkoma, awe wa ti ziva ti to na ku randa.” Jesu a to m’gela ku khene: “Dyisa tinvuta tangu.” 16 Jesu a to tshumela ngu dikhambi da wumbidi e m’wotisa ku khene: “Simoni mwanana wa Johani, ina wa ni randa? Ene a to xamula a txi khene: “Ina Mkoma, awe wa ti ziva ti to na ku randa.” Se Jesu a to m’gela ku khene: “Dyisa sinvutana sangu.” 17 A to tshumela e m’wotisa ngu dikhambi da wuraru a txi khene: “Simoni mwanana wa Johani, ina wa ni randa? Pedro a to karateka ngu ku va a di m’wotisile ngu dikhambi da wuraru ku khene: “Ina wa ni randa kani?” Se ene a to m’xamula a txi khene: “Mkoma, awe wa ti ziva totshe ni ku wa ti ziva ti to na ku randa.” Se Jesu a to m’gela ku khene: “Dyisa sinvutana sangu.” 18 Ani na kugela ditshuri ti to mbimo yi u nga ti ngadi mfana awe u txi ambala u tsula mu u nga txi kulava. Kambe mbimo yi u no kumba u na nawuluta mawoko ako, m’thu mmwani e ku ambeka siambalo e tshumela e ku yisa amu u si ku laviko.” 19 A wombile tiya kasi kukombetela nzila yi Pedro a no xaniswa ngu yona ti to e dhumisa Txizimu. Msana ko womba tiya, ene a to m’gela ku khene: “Simama u ni londisa.”

20 Pedro a to tshembereka e wona ti to mgondiswa wule Jesu a nga txi m’randa a txi va londisa, i ku mgondiswa wule a nga khigela hakhana ka Jesu va di kususulani a txi m’wotisa ku khene: “Mkoma, i mani a no kuxavisa?” 21 Mbimo yi Pedro a nga m’wona, a to wotisa Jesu a txi khene: “Mkoma, ku na maheka txani ngu wu a hi londisako?” 22 Jesu a to m’xamula a txi khene: “Ngako ni txi ti lava ku e simama a txi hanya kala kuza ni wuya, u bela hayi ka toneto? Awe simama u ni londisa.” 23 Se mhaka ya ti to mgondiswa wule kha na mbi fa, yi to hangalaka ka vanawe. Kambe Jesu a sa womba ti to kha na mbi fa, kambe ene a ti wombile ti to khene: “Ngako ni txi ti lava ku e simama a txi hanya kala kuza ni wuya, u bela hayi ka toneto?”

24 Ani ngani mgondiswa wuwa a nga bhala timhaka tiya ni kutshumela ni ningela wufakazi wa tona, ni ku na ti ziva ti to wufakazi wu ni ningelako mbwa ditshuri.

25 Phela ku ni timhaka timwani to tala ati Jesu a nga maha ta ku i di ku ti to bhalwa totshe, ni pimisa ti to ditiko diya di si nga ni wukhalo wo enela kasi kuveka mabhuku oneyo.