MITHUMO YA VAPOSTOLI

1 Tata Teyofilo, ka dibhuku do khata adi ni nga ku bhalela, ni bhate ati Jesu a nga khata kumaha ni kugondisa, 2 kala ka ditshiku di a nga tekwa e ya txitimwi, msana kova a di ningete sileletelo ka vapostoli ava a nga ti va sawute. 3 Msana ko xaniseka, a to woneka kwawe makhambi o tala kasiku ve kholwa ti to ene wa hanya. Vona va m’woni kudingana 40 wa masiku, a txi womba-womba ngu Mfumo wa Txizimu. 4 Mbimo yi va nga ti tshanganile, a to va ninga txirumo txiya: “Mi nga khukheni Jerusalema, aniko simamani mi emela atxi Tate a nga mi thembisa, nga ha ni nga mi gela ngu kona, 5 nguko Johani a bhabhatisile ngu mati, kambe anu mi na bhabhatiswa ngu moya wo sawuleka mndani ka masikunyana.”

6 Mbimo yi va nga ti tshanganile, va to m’wotisa va txi kha vona: “Mkoma, ina ngu yona mbimo yiya u no wuseta mfumo wa Israyeli kani?” 7 Se ene a to va xamula a txi khene: “Kha ti lumbi anu kuziva timbimo mwendo tinguva, eto ti ziwa ngu Tate dwe. 8 Kambe mbimo yi mi no amukela moya wo sawuleka mi na va ni mtamo, ni ku mi na va tifakazi tangu Jerusalema, kotshe Judheya, ni Samariya kala magemeta-mitshi ka ditiko.” 9 Msana ko womba timhaka tiya, ene a to tekwa e ya nzumani va txi m’wona, se a to fenengetwa ngu direfu aha koza va si swi ve m’wona. 10 Va txi ngadi va txi simama kuwonetela nzumani mbimo yi a nga txi tsula, kunuko-kunuko ku to humelela majaha mambidi ma nga ti ambate siambalo so basa 11 ma txi kha ona: “Vavamna va Galileya, ngu kutxani mi di emile mi txi wonetela nzumani? Jesu awu a nga tekwa hagari kwanu e ya nzumani, a na wuya nga ti mi nga m’wonisa tona a txi tsula.”

12 Msana keto va to khukha ka mmango awu wu dhanwako ku Mmango wa Miolivha, awu wu ku hafuhi ni Jerusalema ka mnava wa dikilometro dimwedo.* 13 Mbimo yi va nga hoka, va to tsula ka sala ya hombe ya txitimwi aha va nga txi zumba kona. Koneho ku ti ni Pedro, Johani, Jakobe, Andreya, Filipi, Tomasi, Bhartolomewu, Matewu, Jakobe mwanana wa Alfewu, Simoni awu a nga txi ziwa ngu kuhiseka, ni Judhasi mwanana wa Jakobe. 14 Votshe va txi simama ve maha mikombelo kumweko ni vavasikati vo kari, kupata ni Mariya mame wa Jesu ni vananda va Jesu.

15 Ka ditshiku dimwani va di tshanganile, Pedro a to khukha e ema hagari ka vanawe (votshe i ti kona mu ka 120 wa vathu) a txi khene: 16 “Vanathu, ti ti fanete kuhetiseka ati moya wo sawuleka wu nga profeta a mu ka mibhalo ngu kuthumisa Dhavhidha mayelano ni Judhasi awu a nga ti maha mthangeli wa ava va nga ñola Jesu. 17 Nguko ene i ti mmweyo wathu ni ku a ti sawutwe kasi kupateka ka mthumo wuwa ni nathu. 18 (Se wamwamna wuwa a xavile thembwe ngu male ya to mbi lulama, se e wa ngu msungo e bhandeka ngu hagari, masembe akwe me huma hahanze. 19 Se mhaka eyo yi to ziwa ngu votshe vahanyi va Jerusalema, ngu toneto wukhalo wule wu to dhanwa ngu lidimi lawe to i Hakeldhama ti wombako ku: “Thembwe ya Mnoha.”) 20 Nguko ti bhatwe ka dibhuku da Masalmo ti to: ‘Mti wakwe wu na nava dirumbi, kha ku na mbi ngadi ku va ni m’thu wu a no zumba ka wona’ ni ku ‘mthumo wakwe wo thangela wu na tekwa ngu mmwani.’ 21 Ngu toneto ta laveka ti to mmweyo ka vavamna ava va nga ti tsimbila-tsimbila ni nathu mbimo yi mkoma Jesu a nga txi maha mithumo yakwe hagari kwathu, 22 kukhukhela ditshiku di a nga bhabhatiswa ngu Johani kala ditshiku di a nga tekwa hagari kwathu e tsula txitimwi, e va fakazi kumweko ni nathu ya kuwuswa ka Jesu.”

23 Ngu toneto, va to sawula vavamna vambidi, i ku Josefa a nga ti dhanwa ku i Bharsabha ni ku a txi dhanwa kambe ku i Justo, kumweko ni Matiyasi. 24 Ngu msana va to khongela va txi kha vona: “Jehovha,* awe wa ti ziva timbilu ta votshe se kombisa awu u nga msawula ka vavamna ava vavambidi 25 kasiku e va mpostoli ni kuamukela mthumo, awu Judhasi a nga wu leka e tsula ko zivana ni nene.” 26 Se va to peka tixolo,* yi ya wa ka Matiyasi, kukhukhela koneho a to balwa kumweko ni vapostoli vale va 11.

2 Ka ditshiku da M’buso wa Pentekoxte votshe va ti tshanganile ka wukhalo wumwewo. 2 Ku to pfala diguwa di txi khukhela nzumani ngu txidhukisa, do fana ni moya wa mtamo awu wu nga tata yotshe nyumba yi va nga ti ka yona. 3 Se va to wona so nga tidimi to fana ni mndilo, ati ti nga ti khandamile txitimwi ka mmweyo ni mmweyo wawe, 4 se votshe va to tala ngu moya wo sawuleka ve khata kuwombawomba tidimi to tala, nga ha va nga ti ningwa ngu kona ngu moya wo sawuleka.

5 Ka mbimo yile, Jerusalema ku ti ni makholwa aya i ku Vajudha ma nga txita ngu ka otshe matiko a hamafuni. 6 Mbimo yi ku nga pfala diguwa diya va to tshangana, ve xamala ngutu nguko mmwani ni mmwani a txi va pfa va txi womba-womba ngu tidimi ta ka kwawe. 7 Vona va to xamala ngutu ve womba tiya: “Kasi hi nga va Galileya votshe ava va wombawombako? 8 Ti mahisa kutxani ku mmwani ni mmwani wathu e ti pfa va txi womba-womba ngu lidimi lakwe? 9 Hagari kwathu ku ni Vaparta, Vamedhi, Vaelamita, vahanyi va Mezopotamiya ni va Judheya, va Kapadhokiya, va Ponto ni va khe Aziya, 10 vamwani vo ta ngu Frigiya, Panfiliya ni Egipta, vamwani va ta ngu makhalo a Libhiya hafuhi ni Kirene, vamwani vaendi vo ta ngu Roma, kupatako Vajudha ni vamatiko, 11 va Kreta ni va Arabhiya, hi va pfa va txi womba-womba ngu tidimi ta ka kwathu mayelano ni timhaka to xamalisa ta Txizimu.” 12 Vona va to xamala va txi kayee, ve wotisana va txi: “Ti lava kuwomba txani tonti?” 13 Kambe vamwani va to va seka va txi kha vona: “Va to leva ngu dosi ya vhinya.”

14 Kambe Pedro a to khukha kumweko ni vale va 11, e womba ngu dipswi do guleka a txi khene: “Vavamna va Judheya ni motshenu vahanyi va Jerusalema, riyani kwati nzeve ka ti ni lavako ku mi gela. 15 Phela vathu vava kha va leva nga ha mi pimisako ngu kona, nguko i ngadi mixo ya ma 9 ora. 16 Kuhambana ni eto, atiya ngu ti ti nga wombwa ngu mprofeti Joyeli awu a nga khene: 17 ‘Txizimu txi womba tiya: “Ka masiku a magwito, ni na thela moya wangu ka totshe tixaka ta vathu, vanana vanu va majaha ni va mahorana, va na profeta, vaphya vanu va na wona miwoniso, ni sikosana sanu si na loriswa, 18 ka masiku oneyo, ni na thela moya wangu ka sithumi sangu sa txiwamna hambi ka sithumi sangu sa txisikati, ni ku vona va na profeta. 19 Ni na maha sidiwukiso txitimwi nzumani ni sixamaliso hamafuni, sixamaliso soneso si na va mnoha, mndilo ni marefu a wutshi. 20 Ditambo di na txitxwa di va txidema, mtxima wu na txitxwa wu va mnoha na di si nzi kuta ditshiku da hombe da wudhumo wa Jehovha.* 21 Kambe wuhi ni wuhi a khongelako ngu ditina da Jehovha* a na hulukiswa.”’

22 “Vavamna va Israyeli, engisani ti ni lavako ku mi gela: “Nga ha mi ti zivako ngu kona, Jesu wa Nazareta, ngene wu Txizimu txi nga m’kombisa kwanu ngu kuthumisa mithumo yo xamatisa, sidiwukiso ni sikombiso asi Txizimu txi nga si maha ngu kuthumisa ene mi txi ti wona. 23 Wamwamna wuwa ngene wu a nga ningelwa kasiku ti maheka ati ti nga ti sungilwe ni ku Txizimu se txi ti ti ziva ngu kale, anu mi m’gogotete haphandeni ngu kuthumisa sindaka milayo, mi tshumela mi m’daya. 24 Kambe Txizimu txi m’wusile ngu ka vakufa, txi m’hulukisa ka sixaniso sa lifo,* nguko ti si na kukoteka ku e mleka a di sungilwe ngu lona. 25 Nguko Dhavhidha a wombile tiya mayelano ni nene: ‘Ani ni veka Jehovha* masoni kwangu mbimo yotshe, ene a txineneni kwangu kasiku ni si thuki ni xulwa ngu txilo. 26 Ngu mhaka ya toneto mbilu yangu ya tsaka. Se ni na hanya ni di ni themba, 27 nguko awe khu na mbi ni leka Dithithani,* nem khu na mbi tumelela ti to awu wo thembeka kwako e sina. 28 U ni mahile ni ziva tinzila ta wutomi, u na ni tata ngu litsako masoni kwako.’*

29 Vanathu, ni tumeleleni ti to ni womba-womba ditshuri mayelano ni kokwani wathu Dhavhidha,* ene a fite e tshumela e kelelwa, aniko dithitha dakwe di nga diho hagari kwathu kala nyamsi. 30 Aku i nga ti mprofeti ni ku a nga txi ziva ti to Txizimu txi ti mthembisile ti to mmweyo wa liveleko lakwe a ndi na teka txikhalo txa wukoma, 31 ene a profetile mayelano ni kuwuswa ka Kristu e womba-womba ngu kona ni kutshumela e womba ti to ene a si na kulekwa Dithithani* ni ku mmidi wakwe wu si na kulekwa wu sina. 32 Txizimu txi wusile Jesu ni ku hotshethu hi ti fakazi ta mhaka yiya. 33 Ngu toneto, aku a nga guletwa txineneni ka diwoko da Txizimu ni kuamukela moya wo sawuleka awu a nga ti thembisilwe ngu Tate, ene a wu thete* txitimwi kwathu nga ha mi ti wonako ngu kona ni ku tipfa. 34 Nguko Dhavhidha kha kwela nzumani, kambe ene a ti khene: ‘Jehovha* a womba tiya ka Mfumeli wangu a txi khene: “Khalahatsha txineneni kwangu, 35 kala kuza ni veka valala vako hahatshi ni va maha txikhigeto txa mikondo yako.’” 36 Ngu toneto, motshenu va ka Israyeli, tsanisekani ti to Txizimu txi mmahile Mkoma ni Kristu, ene Jesu awu mi nga m’daya haphandeni.”

37 Mbimo yi va nga pfa timhaka tiya, va to karateka ngutu ve wotisa Pedro ni vapostoli vale vamwani va txi kha vona: “Vanathu hi fanete kumaha txani?” 38 Pedro a to va xamula a txi khene: “Tisoleni, ni ku mmweyo ni mmweyo wanu a na bhabhatiswa ngu ditina da Jesu Kristu kasiku e divalelwa sionho, ti to mi amukela ningo ya mahala ya moya wo sawuleka. 39 Txithembiso txiya txi mahetwe anu ni vanana vanu, kumweko ni votshe vale va ku kule, ava Jehovha* Txizimu txathu a no va dhana.” 40 Ene a txi txhamusela timhaka to tala e ningela wufakazi wo pelela a txi va kuzeta ni ku va gela tiya: “Ti hambaniseni ni vathu vo biha kasiku mi si loviswi.” 41 Se ava va nga amukela dipswi ngu litsako va to bhabhatiswa, ka ditshiku donedo kona mu ka 3.000 wa vathu va to va vagondiswa. 42 Vona va txi ti ningetela ko gondiswa ngu vapostoli, ve tshangana kumweko,* ve dya kumweko ni kumaha mikombelo.

43 Mbimo yi vapostoli va nga khata kumaha sidiwukiso ni sikombiso so tala, votshe vathu va to khata kuthava. 44 Se votshe ava va nga kholwa va ti zumba kumweko ni kuabanelana sotshe si va nga ti naso, 45 va txi xavisa silo sawe ni tithomba tawe, ve abanelana male ya kona ngu txawe ngu kuya ngu txilaveko txa mmwani ni mmwani. 46 Ni ku ditshiku ni ditshiku va txi tshangana dithempeleni va di ni txikongomelo tximwetxo ni ku va txi dhanelana sakudya mitini kwawe ni kuabanelana sakudya ngu litsako ni ngu mbilu yo basa, 47 va txi dhumisa Txizimu ni ku va txi tsakelwa ngu votshe vathu. Se ditshiku ni ditshiku, Jehovha* a txi simama e engetela mtengo wa vale va yako kuhanyiswani.

3 Mbimo yi Pedro ni Johani va nga txi kwelela dithempeleni ngu mbimo yo maha mikombelo ngu ma 15, 2 ku ti gutwe wamwamna awu a nga velekwa i di txilima. Ditshiku ni ditshiku va txi m’veka dithempeleni hafuhi ni txike atxi txi dhanwako ku Txike txo Tshura, kasiku e mana kukombela jimola* ka va va nga txi wulela dithempeleni. 3 Mbimo yi a nga wona Pedro ni Johani va txi bela dithempeleni a to khata ku va kombela jimola. 4 Kambe Pedro ni Johani va to m’wonetela, se Pedro a txi khene: “Hi nga hi wona.” 5 Se ene a to va wonetela a txi pimisa ti to a na ningwa txo kari. 6 Kambe Pedro a to khene: “Ani kha ni nga ni prata nem oru, kambe na kuninga si ni ku naso. Ngu ditina da Jesu Kristu wa Nazareta, khukha u tsimbila.” 7 Se Pedro a to m’ñola ngu diwoko dakwe da txinene e mu emisa. Kunuko-kunuko, minenge yakwe ni mazolo akwe si to hanya. 8 Se a to ndaka e ema, e khata kutsimbila e wulela navo dithempeleni, e tsimbila a txi ndaka-ndaka ni kudhumisa Txizimu. 9 Se votshe vathu va to m’wona a txi tsimbila ni kudhumisa Txizimu. 10 Se va to tumbula to i ti wamwamna wule a nga ti khalahatsha e kombela jimola ka Txike txo Tshura khe dithempeleni, se vona va to xamala ni kutsaka ngutu tatinene ngu ti ti nga m’mahekela.

11 Wamwamna wule a ti ngadi ñote Pedro ni Johani mbimo yi votshe vathu va nga tutuma ve va yela ka wukhalo wu wu dhanwako ku i Vharanda ya Solomoni, va di xamate ngutu. 12 Mbimo yi Pedro a nga wona tiya, a to gela txitshungu a txi khene: “Vavamna va Israyeli, ngu kutxani mi txi xamala ngu tiya, ni ku hi wonisa ku nga hi to maha tiya ngu kuthumisa mtamo wathu, mwendo ngu kuthembeka kwathu ka Txizimu kani? 13 Txizimu txa Abrahamu, Izaki ni Jakobe, Txizimu txa vatate vathu, txi dhumisile Txithumi txa txona, Jesu, awu anu mi nga mningela ni ku m’lamba masoni ka Pilato, hambiku ene a nga txi lava ku m’txhatxha. 14 Anu mi m’lambile wamwamna wule wo sawuleka ni kululama, mi kombela ti to kutxhatxhwa wamwamna wule wa txigevenga, 15 kambe anu mi date Mthangeli wa Wutomi,* Hambiketo Txizimu txi m’wusile ngu ka vakufa, athu hi tifakazi ta mhaka yiya. 16 Ku vite ngu ditina dakwe ni ngu kukholwa kwathu ka ditina dakwe wamwamna wuwa mi m’wonako ni ku m’ziva a nga hanyiswa. Likholo li a ku nalo ka ditina dakwe li m’mahile ti to e hanya nga ha mi ti wonako ngu kona. 17 Kambe vanathu, na ti ziva ti to mi mahile tiya ngu kusisalelwa kufana ni vathangeli vanu. 18 Kambe ngu nzila yiya, Txizimu txi tatisile ati txi nga ti zivisa kale ngu kuthumisa sisofu sa votshe vaprofeti ti to Kristu wakwe a ndi na xaniswa.

19 “Ngu toneto, tisoleni mi txitxa mahanyelo anu, ti to sionho sanu si pfhutwa kasiku mi mana kuhumula aku ku tako ngu ka Jehovha* apune. 20 Ni ku mi rumelela Kristu awu a nga sawulwa, i ku Jesu. 21 Nzuma yi fanete ku m’veketa kala mbimo ya kuwusetwa ka sotshe silo asi Txizimu txi nga si womba ngu kuthumisa sisofu sa vaprofeti va txona va kale. 22 Ngu ditshuri, Mosi a wombile a txi khene: “Jehovha* Txizimu txanu, a na tumbunukisa hagari kwanu mprofeti wo fana ni nani. Mi fanete kuengisa totshe ti a no mi gela. 23 Ngu ditshuri, awu a no mbi engisa Mprofeti eneyo a na fuviswa da magwito hagari ka vathu vakwe. 24 Votshe vaprofeti, kukhukhela ka Samuwele kuya masoni, ni vona va wombile hakubasani ngu mbimo yiya. 25 Anu mi vanana va vaprofeti ni va txitumelelano atxi Txizimu txi nga txi maha ka vakokwani vanu mbimo yi a nga gela Abrahamu a txi khene: ‘Totshe tixaka ta hamafuni* ti na katekiswa ngu kuthumisa liveleko lako.’ 26 Msana kova Txizimu txi di humelelisile Txithumi txa txona, txi to m’rumela kwanu kukhata, kasiku txi mi katekisa ngu kumaha ti to mmwani ni mmwani wanu e leka mahanyelo akwe o biha.”

4 Mbimo yi Pedro ni Johani va nga txi ngadi va txi womba-womba ka txitshungu, vaprista, mthangeli wa dithempele ni Vasadhusi va to va tshuketela. 2 Vona va to swireka ngutu, nguko vapostoli va txi gondisa ni kuhuwelela ti to Jesu Kristu a ti wusilwe ngu ka vakufa. 3 Se va to va ñola ve va beta jele kala mangwanani ka kona, nguko se i ti wusiku. 4 Kambe kutala ka va va nga engisa dhixkursu va to kholwa, se mtengo wa vavamna ava va nga kholwa wu to hoka kona mu ka 5.000.

5 Mangwanani ka kona, vathangeli vawe, madhota ni vamabhalani va to tshangana khe Jerusalema, 6 kupata ni Anasi nduna ya vaprista, Kayifasi, Johani, Alexandre kumweko ni otshe maxaka a nduna ya vaprista. 7 Se vona va to teka Pedro ni Johani ve va veka habanza, ve khata ku va xuxisa va txi kha vona: “Mi mahile tiya ngu mtamo wa mani mwendo ngu ditina da mani kani?” 8 Se Pedro a to talelwa ngu moya wo sawuleka a txi khene kwawe:

“Anu vathangeli ni nanu madhota, 9 nyamsi hiho hi txi thethiswa ngu kuva hi di mahete ta tinene dijaha diya do lemala, se ngako mi txi lava kuziva ti to i mani a nga m’maha e kalamuka, 10 ti ziveni anu ni nanu motshenu va Israyeli ti to wamwamna wuwa a nga hanyiswa mi txi m’wona, a hanyisilwe ngu kuthumisa ditina da Jesu Kristu, wa Nazareta, awu mi nga m’daya haphandeni, kambe Txizimu txi m’wusile ngu ka vakufa. 11 Jesu wuwa ngene ‘dirigwi adiya anu vaaki mi nga di wona i si nga da txilo, kambe di nga va dona dirigwi da lisima ka otshe.’ 12 I si nga eto dwe, kuhanyiswa ku na mbi tiswa ngu mmwani m’thu, nguko kha di ngaho ditina dimwani hamafuni adi vathu va nga ningwa kasiku ve mana kuhanyiswa ngu dona.”

13 Mbimo yi va nga wona txibindi* txa Pedro ni Johani, ni kuziva ti to i ti vathu vo mbi gonda, va to xamala ngutu. Va to gwita ve tumbula ti to va tsimbite ni Jesu. 14 Mbimo yi va nga txi wonetela dijaha dile di nga ti hanyisilwe di di emile navo, va to pwata to womba. 15 Se va to va humisa Sanedri kasiku ve sala ve bhulisana ngu mhaka yiya. 16 Vona va txi wotisana va txi: “Hi na va maha txani vavamna vava? Nguko ngu ditshuri va mahile txidiwukiso txa hombe atxi txi nga ziwa ngu votshe vahanyi va Jerusalema ni ku kha hi na ku txi lamba. 17 Kasiku mhaka yiya yi si engeteli kuhangalaka hagari ka txitshungu, a hi va dhukiseleni ni ku va gela ti to va si swi ve womba-womba kambe mayelano ni ditina diya.”

18 Se va to va dhana ve ta va gela ti to va ti fanete kuema kuwombawomba mwendo kugondisa ngu ditina da Jesu. 19 Kambe Pedro ni Johani va to va xamula va txi kha vona: “Ngu tihi ati ti nga lulama masoni ka Txizimu? Ina ngu engisa anu mwendo ngu engisa Txizimu kani? Lamulani mipune. 20 Kambe athu kha hi na kuema kuwombawomba ngu ti hi nga ti wona ni ti hi nga ti pfa.” 21 Se msana kova va di va dhukisete, va to va leka ve tsula nguko kha va mana txivangelo txo ve va tsayisa ni ku va txi thava txitshungu nguko votshe vathu va txi dhumisa Txizimu, ngu kona ha ka ti ti nga ti mahekile. 22 Nguko wamwamna wule a nga hanyiswa ngu txidiwukiso, a ti ni kona mu ka 40 wa malembe ni kupinda.

23 Msana kova va di humisilwe, va to tsula ka vagondiswa vale vamwani ve ya va geletela totshe tile tinduna ta vaprista ni madhota va nga ti wombetete. 24 Mbimo yi va nga pfa eto, va to patana ngu dipswi dimwedo ve dhumisa Txizimu va txi kha vona:

“Mkoma wo guleka ngutu, Awe ngawe u nga maha nzuma, mafu, linene ni sotshe si si ku ka sona, 25 awe u nga womba ngu moya wako wo sawuleka ngu kuthumisa txisofu txa kokwani wathu Dhavhidha txithumi txako u txi khawe: ‘Ngu kutxani vamatiko va txi nyeka-nyeka kani? Ngu kutxani vathu va txi pimisa timhaka to mba vhuna txilo kani? 26 Vafumeli va hamafuni va lungekile ni ku vakoma va tshanganile kasi kuwukela Jehovha* kumweko ni Kristu wakwe.’ 27 Nguko ngu ditshuri, Herodha ni Ponsio Pilato kumweko ni vavamna vamatiko ni vathu va Israyeli, va tshanganile ka didhoropa diya kasiku ta wukela txithumi txako txo sawuleka Jesu awu awe u nga m’tota, 28 kasi kumaha ati diwoko dako ni kudhunda kwako ku nga ti sunga ku ti maheka kukhukhela kale. 29 Konkuwa awe Jehovha,* wona ti va hi dhukiselisako tona, u ninga mtamo sithumi sako wo womba-womba dipswi dako ngu kutsana, 30 ni kunawuluta diwoko dako kasi kuhanyisa ni kumaha sikombekiso ni sidiwukiso, ngu kuthumisa ditina da txithumi txako txo sawuleka Jesu.”

31 Msana kova va di mahile mkombelo,* wukhalo wu va nga ti tshanganile ka wona wu to zinginika, se votshe va to tala ngu moya wo sawuleka ve khata kuwombawomba dipswi da Txizimu ngu kutsana.

32 I si nga eto basi, vathu va va nga kholwa va to va ni txikongomelo tximwetxo* ni ku kha ngaho awu a nga txi womba ti to silo si a nga ti naso i ti sakwe ene ekha, kambe votshe va txi abanelana silo si va nga ti naso. 33 Se vapostoli va txi simama ve fakaza ngu mtamo mayelano ni kuwuswa ka Mkoma Jesu, ni ku votshe va txi katekiswa ngutu ngu wuxinji wa hombe wa Txizimu. 34 Ngu ditshuri, kha ngaho hagari kwawe a nga txi pwata txilo, nguko votshe ava va nga ti ni tithembwe, tinyumba va txi ti xavisa ve teka male ya kona, 35 ve yi ningela ka vapostoli. Ngu msana ku txi abaniselwa ka votshe ngu kuya ngu txilaveko txa mmwani ni mmwani. 36 Se Josefa awu a nga ti dhanwa ngu vapostoli ti to i Bharnabhasi, (ati ti wombako ku “Mwanana wa Kuthavelela”) wa M’levhi wo ta ngu Kipra, 37 a ti ni thembwe, se a to yi xavisa e teka male ya kona e yi ningela ka vapostoli.

5 Se wamwamna wo kari a nga txi dhanwa ku Ananiya a to xavisa thembwe kumweko ni msikati wakwe Safira. 2 Se a to pumba yimwani male e yi veka didhawa, na msikati wakwe a txi ti ziva se e teka yi yi nga sala e yi ningela ka vapostoli. 3 Kambe Pedro a to khene ka Ananiya: “Ngu kutxani u nga tumelela Sathani e ku xengetela kasi kuhembela moya wo sawuleka ni ku sisa male ya thembwe kani? 4 Ina thembwe i si nga yako na u si nzi ku yi xavisa kani? Msana kova u di yi xavisile, male ya kona yi si lumbi awe kani? Se ngu kutxani u di sungile mbiluni kumaha timhaka tiya? Phela khwa hembela vathu dwe, kambe u hembete Txizimu.” 5 Mbimo yi Ananiya a nga pfa mapswi eyo a to wa e fa. Se votshe ava va nga ti ziva timhaka tiya va to thava ngutu. 6 Se ma to ta majaha o kari me ta m’phutela ngu tinguwo, me m’teka me ya m’tshotsha.

7 Ku di pindile kona mu ka ma ora mararu, msikati wakwe a to bela a si ti zivi ati ti nga ti mahekile. 8 Se Pedro a to m’wotisa a txi khene: “Hi nga ni gela, ina anu mi xavisile thembwe ngu mtengo wuwa kani?” Ene a to m’xamula a txi khene: “Ina ngu wona mtengo wo.” 9 Se Pedro a to m’gela ku khene: “Ngu kutxani ngu wumbidi wanu mi nga sunga kuduka moya wa Jehovha* kani? Avale va nga kelela mwamna wako va haditimbani, nanawe va na kuteka.” 10 Kunu-kunuko Safira a to wa masoni ka Pedro e fa. Mbimo yi majaha ale ma nga wulela, ma to ta m’mana a di fite, se ma to m’teka me ya m’tshotsha didhawani ka mwamna wakwe. 11 Se dibanza dotshe ni votshe ava va nga ti pfa timhaka tiya va to thava ngutu.

12 Se vapostoli va txi simama ve maha sikombiso ni sidiwukiso so tala hagari ka vathu, ni ku votshe va txi simama ve tshangana ka Vharanda ya Solomoni. 13 Ditshuri ti to vathu vamwani va txi thava ku ti pata ni vapostoli, kambe txitshungu txi ti womba-womba kwati ngu vona. 14 I si nga eto basi, mtengo wa vavamna ni vavasikati ava va nga ti kholwa ka Mkoma ni ku ti pata navo, wu txi simama wu engetela. 15 Va txi pata ni kuteka valwati ve va veka ka ti ruwa ta hombe ni ku va otelisa ka sibhedhwana ni ka mataho kasiku mtsudi wa Pedro wu gwesa vamwani ka vona. 16 Ku txita kambe vathu vavangi ngu ka madhoropa a hafuhi ni Jerusalema va txi tisa valwati ni ava va nga ti xuphwa ngu mimoya ya nzambwa, se votshe va txi hanyiswa.

17 Se mprista wa hombe ni votshe va va nga ti nayo, i ku mtxawa wa Vasadhusi, va to khukha va di henyile. 18 Se vona va to ñola vapostoli ve va beta jele. 19 Kambe hagari ka wusiku, ngilozi ya Jehovha* yi to tula matimba a jele, yi va teka yi va yisa hahanze, yi va gela yi txi khene: 20 “Tsulani mi ya ti kombekisa dithempeleni, ni ku simamani mi gela txitshungu mayelano ni mahungu o tsakisa a wutomi.” 21 Msana ko engisa mapswi awa, va to bela dithempeleni di txi ya kutxani ve khata kugondisa.

Mbimo yi a nga hoka mprista wa hombe ni votshe va a nga ti navo, a to tshanganisa yotshe Sanedri ni dotshe dibanza da madhota a vanana va Israyeli, e rumisa ti to kutiswa vapostoli ngu jele. 22 Kambe mbimo yi vawoneleli va dithempele va nga hoka jele, kha va va mana. Se va to wuya ve ta womba tiya: 23 “Hi mani jele yi di khotilwe kwati ni ku vawoneleti va ti emile matimbani, kambe mbimo yi hi nga tula kha ha mana m’thu.” 24 Mbimo yi va nga pfa eto, m’woneleti wa dithempele ni tinduna ta vaprista va to karateka, ve ti wotisa ti to va na maha txani. 25 Se ku to ta m’thu wo kari e ta va gela ku khene: “Vavamna va mi nga va beta jele, va dithempeleni vo gondisa txitshungu.” 26 Se m’woneleti wa dithempele a to tsula kumweko ni maphoyisa e ya va teka, na a si va lwisi nguko va txi thava kubaliselwa ngu marigwi ngu txitshungu.

27 Mbimo yi va nga wuya navo, va to va emisa masoni ka Sanedri. Se mprista wa hombe a to va thethisa, 28 a txi khene kwawe: “Hi mi ningile mthetho wa ti to mi si gondisi ngu ditina diya, hambiketo mi tatile Jerusalema ngu gondo yanu ni ku mi sungile kutisa mnando wa mnoha wa wamwamna wuwa txitimwi kwathu.” 29 Se Pedro ni vapostoli vamwani va to xamula va txi kha vona: “Hi fanete kuengisa Txizimu kota Mkoma, kupinda kuengisa vathu. 30 Txizimu txa vatate vathu txi wusile Jesu ngu ka vakufa, awu anu mi nga m’daya mi m’hayeka ka phande. 31 Ngu toneto, Txizimu txi m’guletile kasi ku va Mthangeli wa Hombe ni M’hanyisi, txi m’veka didhawani da txona da txinene kasiku Vaisrayeli ve ti sola ni kudivalelwa sionho sawe. 32 Athu hi tifakazi ta timhaka tiya ni ku moya wo sawuleka awu Txizimu txi ningako ava va txi engisako kota Mkoma, ni wona i fakazi.”

33 Mbimo yi va nga pfa eto, va to henya ngutu ve lava ku va daya. 34 Se ku to khukha ka Sanedri Mfarisi a dhanwako ku i Gamaliyeli, ene i ti mgondisi wa Mlayo ni ku a txi xoniphwa ngu votshe vathu, ene a to rumisa ti to kuhumiswa vapostoli hahanze ta mbimo nyana. 35 E va gela ku khene: “Vavamna va Israyeli, ti woneleni ka ti mi lavako kumaha ka vavamna vava. 36 Ngu txikombiso, hi nga kale ku nga humelela Tewudhasi awu a nga txi ti gela ku i mprofeti, ni ku 400 wa vathu va txi m’londisela, kambe ene a datwe ni ku votshe va va nga txi m’londisela va hangalakile, makungo akwe kha ma ya kule. 37 Msana keto, ku tshumete kuhumelela kambe Judhasi wa Galileya ka masiku ya bhalela ni ku nene a ti ni vathu va nga txi m’londisela. Wamwamna eyo nene a datwe ni ku votshe ava va nga txi m’londisela va hangalakile. 38 Se ka timhaka tiya, na mi gela ku khani, mi nga karateni vavamna vava, va lekeni nguko ngako makungo awe mwendo mthumo wawe i di wa vathu, wu na mbi vhu masani, 39 kambe ngako i di wa Txizimu, kha mi na mbi si kota ku va lekisa. Nguko ngako mi txi va wukela mi nga thuka mi txi lwa ni Txizimu txipune.” 40 Se vona va to mu engisa. Se va to dhana vapostoli, msana kova kwapela ni ku va ninga mthetho wa ti to va si wombawombi ngu ditina da Jesu, va to va leka ve tsula.

41 Se vona va to huma ngu Sanedri va di tsakile, nguko Txizimu txi va woni i di va lisima ngu ku va nga txi xaniswa ngu mhaka ya ditina da Jesu. 42 Ni ku ditshiku ni ditshiku va txi gondisa dithempeleni, ngu mti ni mti, ni kusimama ve huwelela mahungu a manene mayelano ni Kristu Jesu.

6 Ka ona masiku ale, mtengo wa vagondiswa wu txi engeteleka, Vajudha ava va nga txi womba-womba Txigriki va to khata kukhala ngu Vajudha ava va nga txi womba-womba Txihebheru, nguko tinoni* ati ti nga txi womba-womba Txigriki ti txi tonwa sakudya asi si nga txi phakelwa ditshiku ni ditshiku. 2 Se ava va 12 va to sengeleta votshe vagondiswa ve va gela ku kha vona: “Hi nga tatinene ku hi leka kugondisa dipswi da Txizimu hi ya abanisela sakudya. 3 Ngu toneto vanathu, sawulani hagari kwanu 7 wa vavamna vo thembeka,* ava va nga tala ngu moya wo sawuleka ni wutxhari, se athu hi na va avela mthumo wonewo, 4 kasi athu hi na ti ningetela ko maha mikombelo ni ko gondisa dipswi da Txizimu.” 5 Ati va nga womba ti to tsakisa txotshe txitshungu, se va to sawula Sitefani i nga ti wamwamna wa likholo lo tsana ni ku tala ngu moya wo sawuleka, Filipi, Prokoro, Nikanori, Timoni, Parmenasi ni Nikolawu wa matiko, a tako ngu Antiyokiya. 6 Vona va to va teka ve va yisa ka vapostoli, msana ko maha mkombelo, va to va sanzeka manza.

7 Ngu toneto, dipswi da Txizimu di txi simama di hangalaka ni ku mtengo wa vagondiswa wu txi engeteleka ngutu Jerusalema ni ku vaprista vavangi va to kholwa.

8 Se Sitefani awu a nga txi tsakelwa ngu Txizimu ni ku va ni mtamo a txi maha sikombiso sa hombe ni sidiwukiso masoni ka txitshungu. 9 Kambe vavamna vota ngu ka disinagoga di nga txi dhanwa ku Disinagoga da Vatxhuseki, ni vamwani vota ngu Kirene, Alexandriya, kumweko ni vamwani vota ngu Kilikiya, Aziya, va to ta ve ta kanetisana ni Sitefani. 10 Kambe kha va si kota ku m’kona nguko a ti ni wutxhari ni moya wo sawuleka. 11 Se vona va to kuzetela vathu txihunjani va txi kha vona: “Athu hi m’pfite a txi ruketela Mosi ni Txizimu.” 12 Se vona va to kuzetela txitshungu, madhota, vamabhalani ve ta m’ñola ngu kanu ve m’yisa Sanedri. 13 Va to tsula ni tifakazi ta makuho ti txi ya kha tona: “Wamwamna wuwa kha emi kuwombawomba kubiha ngu wukhalo wuwa wo sawuleka ni ngu Mlayo wa Mosi. 14 Ngu txikombiso, hi m’pfite a txi womba ti to Jesu wa Nazareta a na khundumusa wukhalo wuwa ni kutxitxa sihena si hi nga ningwa ngu Mosi.”

15 Mbimo yi votshe va nga ti khalahatshile hale ka Sanedri va txi m’wonetela, va to wona to khohe yakwe yi ti ko nga khohe ya ngilozi.

7 Se mprista wa hombe a to m’wotisa a txi khene: “Ina ditshuri toneto?” 2 Se Sitefani a to xamula a txi khene: “Vanathu, ni nanu vatata, ni engiseni, Txizimu txa wudhumo txi ti wonekisile ka kokwani wathu Abrahamu mbimo yi a nga ti Mezopotamiya, a si se tsula e ya zumba Harani, 3 txi txi m’gela ku khene: ‘Khukha ditikoni kwako, u leka maxaka ako u tsula ka ditiko di ni no kukomba dona.’ 4 Se ene a to khukha ka ditiko da Vakaldheya e ya zumba Harani. Se a di kona kheya, tate wakwe a to fa, se Txizimu txi to m’rurisa e ta ka ditiko di mi zumbako ka dona konku. 5 Aniko kha mninga thembwe, hambi wukhalonyana wo veka mkondo, kambe a mthembisile ku mninga kota thomba yakwe, ene ni liveleko lakwe hambiku a nga si nzi ku va ni mwanana. 6 I si nga eto dwe, Txizimu txi m’gete ti to, liveleko lakwe li na va vawuyi ka ditiko di di si va lumbiko, ni ku va nava tikhumbi ni kuxaniswa kudingana 400 wa malembe. 7 Ni ku Txizimu txi wombile txi txi kha txona: ‘ni na lamula ditiko di di no va maha tikhumbi ni ku msana keto va na huma ve ta ni mahela mthumo wo sawuleka ka ditiko diya.’

8 “Txizimu txi mahile nayo txitumelelano txa wukwera, ene a to va tate wa Izaki, se Izaki e yiswa wukwerani ngu ditshiku da wu 8, Izaki a to va tate wa Jakobe, Jakobe e va tate wa 12 wa misungo ya timwaya.* 9 Se vanana va Jakobe i ku vanyampande vathu, va to bavela Josefa ve m’xavisa ka Vaegipta, kambe Txizimu txi ti ni nene, 10 txi m’hulukisa ka sotshe sikarato sakwe, txi mninga kudhundwa ni wutxhari masoni ka Faro mkoma wa Vaegipta, awu a nga mu emisa kota mfumeli wa Egipta ni wa yotshe nyumba yakwe. 11 Se ku to va ni nzala ya hombe ditikoni ka Egipta ni Kanana, se vakokwani vathu va to pwata ni txilo txo dya. 12 Kambe, Jakobe a to pfa to ku ti ni sakudya khe Egipta, se a to rumela vatate vathu ngu dikhambi do khata. 13 Mbimo yi va nga tshumela da wumbidi, Josefa a to gela vanakwe to i ti mani, se Faro a to ziva maxaka a Josefa. 14 Se Josefa a to rumisa ku ya tekwa Jakobe tate wakwe ni maxaka akwe, mtengo wawe i ti 75 wa vathu. 15 Ngu toneto Jakobe a to relela khe Egipta, akhe a nga ya fela kona kufana ni vakokwani vathu. 16 Va to tekwa ve ya tshotshwa khe Sikemi ka dithitha di Abrahamu a nga ti xavile ka vanana va Hemori ngu male ya silivhela khe Sikemi.

17 “Txikhati txi yi nga ti tshuketela mbimo ni kutatiseka txithembiso atxi Txizimu txi nga maha ka Abrahamu, mtengo wa vathu wu txi engeteleka khe Egipta, 18 ku to humelela mkoma mmwani khe Egipta awu a nga ti si m’zivi Josefa, 19 awu a nga kanganyisa ni kuxanisa vathu va lixaka lathu e sinzisa vatate vathu kutshotsha vanana vawe kasiku va si hanyi. 20 Ka mbimo yoneyo ku to velekwa Mosi awu a nga ti tshurile ngutu, ene a wunjilwe ngu vaveleki vakwe kudingana mitxima yiraru. 21 Kambe mbimo yi a nga sinziseka ku e m’leka, mwanana wa dihorana wa Faro a m’tekile e m’wunja nga mwanana wakwe. 22 Mosi a gondisilwe wotshe wuzivi wa Egipta. Se ene i ti m’thu wa mtamo ngu mapswi ni ngu simaho.

23 “Se mbimo yi a nga tshanganisa 40 wa malembe, mbilu yakwe yi to m’gela* kuya pfuxela vanawe, va ka Israyeli. 24 Mbimo yi a nga wona Muegipta a txi xanisa mmweyo wa vanawe, ene a to phota ngu kudaya Muegipta. 25 Ene a txi pimisa ti to vanawe va na ti pfisisa to Txizimu txi na va hulukisa ngu kuthumisa ene, kambe vona kha va ti pfisisa. 26 Mangwanani ka kona, ene a to va yela mbimo yi va nga txi lwa, e zama ku va khongotela a txi khene: ‘Vanathu, anu mi vamwevo, ngu kutxani mi txi xanisana? 27 Kambe awule a nga txi xanisa mngana a to retha Mosi a txi khene: ‘I mani a nga ku veka ku va mkoma ni mlamuli wathu kani? 28 Ina u lava ku ni daya kufana ni ku u nga daya Muegipta wule nyamnova?’ 29 Mbimo yi Mosi a nga pfa eto, a to tutuma e ya ditikoni da Midhiyani e ya zumba kota m’wuyi, aha a nga ya veleka vanana vambidi va vafana.

30 “Ku di pindile 40 wa malembe ku to woneka kwakwe ngilozi txiwulani ka Sinayi ka dikhukhu di nga txi tura. 31 Mbimo yi Mosi a nga wona tile a to xamala, kambe mbimo yi a nga tshuketa kasi kuwonisisa kha kwati, a to pfa dipswi da Jehovha* di txi: 32 ‘Ani ni Txizimu txa vatate vako, Txizimu txa Abrahamu, Txizimu txa Izaki, ni Txizimu txa Jakobe,’ se Mosi a to khata kudhudhumela ni ku kha tsana kusimama e txi wonisisa. 33 Se Jehovha* a to m’gela ku khene: ‘Thavisa masandaliya mikondoni kwako nguko wukhalo wu u nga ema ka wona, wukhalo wo sawuleka. 34 Ni pfite kuxaniseka ka vathu vangu va ku Egipta, ni pfite kudila kwawe se ni txhikile kasiku ta va hulukisa. Se akuwa na kurumela ku u tsula Egipta.’ 35 Ngene Mosi wuwa va nga m’lamba va txi kha vona: ‘I mani a nga kuveka ku u va mkoma ni mlamuli?’ Ngene awu Txizimu txi nga m’rumela kota mthangeli ni m’hulukisi ngu kuthumisa ngilozi ayi yi nga woneka kwakwe ka dikhukhu di nga txi tura. 36 Ngene wamwamna wuwa a nga va humisa e maha sikombiso ni sidiwukiso khe Egipta, Lineneni ko Bhilivila ni khe txiwulani kudingana 40 wa malembe.

37 Ngene Mosi wuwa a nga gela vanana va ka Israyeli a txi khene: ‘Txizimu txi na tumbunukisa hagari kwanu mprofeti wo fana ni nani.’ 38 Ene a ti navo txiwulani, a ti ni ngilozi ayi yi nga womba-womba nayo mmangoni ka Sinayi kumweko ni vatate vathu ni ku ene a amukete dipswi da Txizimu e hi pindisela dona. 39 Vatate vathu va lambile ku mu engisa, ve xuva kutshumela Egipta, 40 va txi kha vona ka Aroni: ‘Hi mahele sizimu kasiku si hi thangela, nguko Mosi wuwa a nga hi humisa khe Egipta kha hi ti zivi ati ti nga m’humelela.’ 41 Ka masiku ale va to maha dirole ve hisa ka dona magandelo, ve khata kukulungela mithumo ya manza awe. 42 Ngu toneto, Txizimu txi to va tshuralela txi va leka ve khozela ditambo, mtxima ni tinyeleti ta nzuma nga ha ti nga bhalwa ngu kona ka dibhuku da Vaprofeti ti to: ‘Ina anu va ka Israyeli miningelo ni magandelo aya mi nga maha txiwulani kudingana 40 wa malembe mi txi mahela ani kani? 43 Kha ma mahela ani, kambe mi txo rwala ditenda da Moloko ni nyeleti ya Refani i ku sizimu si mi nga si maha kasi ku si khozela, ngu toneto na mi yisa kule ngutu kupinda Bhabhilona.’

44 “Vatate vathu va ti ni ditenda da wufakazi txiwulani, nga ha Txizimu txi nga ruma ngu kona Mosi, txi m’gela ti to e di maha nga ha a nga kombwa ngu kona. 45 Adi vatate vathu va nga di amukela va di ni Joxuwa ve di teka veya nado ka ditiko di di nga txi lumba vamatiko, ava Txizimu txi nga va hinga masoni ka vatate vathu. Dona di simamile kala ka timbimo ta Dhavhidha. 46 Dhavhidha a to mana dithomo masoni ka Txizimu e kombela ti to e va ni lungelo yo aka nyumba ya Txizimu txa Jakobe. 47 Kambe i Solomoni awu a nga mu akela nyumba. 48 Hambiketo, Nyatxitimwi kha zumbi ka tinyumba to akwa ngu vathu, nga ha a wombako ngu kona mprofeti a txi khene: 49 ‘Nguko Jehovha* a khene, nzuma txikhalo txangu txa wukoma, ni ku mafu txikhigetelo txa mikondo yangu. I nyumba muni mi no ni akela kani? Ngu hani ha ni nga humulako kona? 50 Ina hi nga diwoko dangu di nga maha sotshe siya kani?’

51 “Anu va misungo yo banga, ni va timbilu ni tinzeve to mbi engisa,* mbimo yotshe mi kanyisa moya wo sawuleka kufana ni vatate vanu. 52 Ina ku ni mprofeti awu vatate vanu va nga mbi m’xanisa kani? Vona va date ava va nga huwelela ku ta ka mlulami awu anu mi nga m’xavisa ni ku m’daya. 53 Anu mi nga amukela Mlayo awu wu nga tiswa ngu tingilozi, kambe kha ma wu xayisa.”

54 Mbimo yi va nga pfa eto ka Sitefani, va to henya ngutu ve gugurusela ni makwasa ngu txiviti. 55 Kambe a to talelwa ngu moya wo sawuleka e wona nzumani e wona wudhumo wa Txizimu e wona kambe Jesu a di emile txineneni ka Txizimu, 56 a txi khene: “Ni wona nzuma yi di tulekile, ni Mwanana wa M’thu a di emile txineneni ka Txizimu.” 57 Se vona va to kwangula ngutu tatinene ve vhala tinzeve tawe ngu mawoko ve m’yela. 58 Msana kova va di humile nayo ngu didhoropani, va to khata ku m’faya ngu marigwi. Tifakazi tile ti nga ti tiho ti to veka tinguwo tawe hahatshi ka dijaha dimwedo di nga ti dhanwa ku i Sawule. 59 Mbimo yi va nga txi m’fayetela, Sitefani a to kombela a txi khene: “Mkoma Jesu, amukela wutomi wangu.”* 60 A to khizama e kwangula a txi khene: “Jehovha,* u nga va bhali mnando ngu mhaka ya txionho txiya.” Msana ko womba tiya, a to fa.

8 Sawule a txi seketela kudawa ka Sitefani.

Ka ditshiku donedo, dibanza di di nga txi maneka Jerusalema di to khata kuxaniswa ngutu, votshe va to hangalakela ve ya ka matiko ya Judheya ni Samariya kusala vapostoli dwe. 2 Vavamna vo kari vo ti ningetela ngutu ka Txizimu, va to rwala Sitefani ve ya m’tshotsha ve tshumela ve m’dila ngutu. 3 Kambe Sawule a to khata kuxanisa dibanza e bela ngu mti ni mti e ruruvisela vavamna ni vavasikati e va ningela kasiku ve ya betwa jele.

4 Se ava va nga ti hangalakile ka matiko oneyo va to tsimbila ve huwelela mahungu a manene a dipswi da Txizimu. 5 Filipi a to relela e ya didhoropani ka Samariya e ya txhumayela mayelano ni Kristu. 6 Ngu wumwewo txitshungu txi txi riya nzeve txi engisela ati Filipi a nga txi ti womba ni kuwona sikombiso asi a nga txi si maha. 7 Kutala ka vona va ti ni mimoya ya nzambwa, se yona yi txi kwangula yi huma ni ku vavangi ava va nga ti ni maparaliziya ni silima va txi hanyiswa. 8 Atiya ti mahile ti to kuva ni litsako la hombe ka didhoropa dile.

9 Ka didhoropa dile ku ti ni wamwamna a nga ti dhanwa ku i Simoni, awu kale kwakwe a nga ti thumisa masonika. Ene a txi xamalisa vathu va Samariya a txi ti gela ku m’thu wa hombe. 10 Votshe vathu, ku khukhela ka vavadotho kala ka va hombe va txi m’engisela va txi kha vona: “M’thu wuwa a ni mtamo wa Txizimu.” 11 Vona va txi m’engisa nguko kudingana mbimo yo lapha ene a txi va xamatisa ngu masonika akwe. 12 Kambe votshe va to kholwa mbimo yi va nga pfa Filipi a txi txhumayela mahungu a manene a Mfumo wa Txizimu ni kutxhumayela ditina da Jesu Kristu, se vavamna ni vavasikati va to bhabhatiswa. 13 Se Simoni nene a to kholwa, msana ko bhabhatiswa a to simama ni Filipi ni ku a txi xamatiswa ngu kuwona sikombiso ni mithumo yo xamalisa.

14 Mbimo yi vapostoli va khe Jerusalema va nga pfa ti to Vasamariya va amukete dipswi da Txizimu, va to va rumelela Pedro ni Johani, 15 se vona va to relela ve ya va khongelela kasiku ve amukela moya wo sawuleka. 16 Nguko va si nzi kuamukela moya wo sawuleka, kambe va ti ko bhabhatiswa ngu ditina da Mkoma Jesu. 17 Se va to va sanzeka manza ve khata kuamukela moya wo sawuleka.

18 Mbimo yi Simoni a nga wona ti to vagondiswa va amukela moya wo sawuleka ngu kusanzekwa manza ngu vapostoli, a to va ninga male, 19 a txi khene: “Ni ningeni nani mtamowo, kasiku wuhi ni wuhi ni no m’sanzeka manza e amukela moya wo sawuleka.” 20 Se Pedro a to khene kwakwe: “Loviswa awe ni male yako nguko u pimisa ti to u nga mana ningo ya mahala ya Txizimu ngu kuxava ngu male. 21 Kambe awe khu na mbi va ni txiavelo ka mhaka yiya nguko awe khwa lulama masoni ka Txizimu. 22 Ngu toneto, ti sole u kombela divalelo ka Jehovha,* kasiku ngako ti txi koteka u divalelwa wubihi awu u ku nawo mbiluni kwako, 23 nguko na ti wona ti to awe u vheneno ni ku u txikarawa* txa wubihi.” 24 Se Simoni a to m’xamula a txi khene: “Ni kombeleleni ka Jehovha* kasiku ni tatimweto ka ti mi ti wombako ti si ni humeleli.”

25 Msana ko txhumayela ngu kupelela mahungu a manene a dipswi da Jehovha,* va to tshumela Jerusalema va txi huwelela mahungu a manene ka sidhoropana sa Samariya.

26 Se ngilozi ya Jehovha* yi to gela Filipi yi txi kha yona: “Ti lulamisele, tsula didhawa da wulambwe, ka txitarato txi txi relelako ngu Jerusalema txi ya Gaza.” (Txitarato txiya txi txi maneka txiwulani.) 27 Ti di ngeto, a to ti lulamisela e tsula, ene a to manana ni m’thenwa* wa Muetiopiya i nga ti mthangeli wa hombe ni m’woneleli wa yotshe thomba ya Kandake wa mfumeli wa txisikati wa ditiko da Etiyopiya. Ene a ti tsute Jerusalema kasi kuya khozela, 28 ene a ti khalahatshile ka txikotxikani txakwe mbimo yi a nga txi wuya, a txi lera ngu dipswi do guleka wuprofeti wa Isaya. 29 Se moya wo sawuleka wu to gela Filipi wu txi: “Tshuketela txikotxikani txile.” 30 Filipi a to tutuma eya ka txikotxikani txile, awule wa m’thenwa a txo lera wuprofeti wa Isaya ngu dipswi do guleka, se a njo ku khene: “Ina wa ti pfisisa ati u lerako?” 31 Ene a to khene kwakwe: “Ni nga ti pfisisa kutxani na ku si nga ni wo ni txhamusela kani?” Ngu toneto ene a to mkombela ku e bela ka txikotxikani e khalahatsha nayo. 32 Parte ya m’bhalo awu a nga txi wu lera ngu yi yi ku: “Kufana ni nvuta yi tsulako kudawani, ni txinvutana txi txi malalako txi di kuthaviswani ka matoya, ene kha tula txisofu txakwe. 33 Mbimo yi a nga ti xaniswa, vona kha va m’lamulela. I mani a no xawutela matimu akwe? Nguko wutomi wakwe wu fuvisilwe hamafuni.”

34 M’thenwa wule wu to gela Filipi wu txi kha wona: “No kombela u ni gela tiya, mprofeti a womba mani? A womba ene apune mwendo m’thu mmwani?” 35 Filipi a to khata kuwombawomba, a txi khatela ka wona m’bhalo wule a to m’txhumayela mahungu a manene mayelano ni Jesu. 36 Mbimo yi va nga txi tsimbila va to hoka ka wukhalo ku nga ti ni mati, se awule wa m’thenwa a to khene: “Hi nga wona! Mati ndiya, njitxani txi ni vhalelako kubhabhatiswa kani?” 37* —— 38 A to rumisa ku txi emiswa txikotxikani, se Filipi ni m’thenwa wule va to relela ve ya matini, e ya m’bhabhatisa. 39 Msana ko huma ngu matini, moya wa Jehovha* wu to tekela kuthavisa Filipi, awule wa m’thenwa kha swa e m’wona kambe, kambe a to simama e ya amu a nga txi ya kona a di tsakile ngutu. 40 Kambe Filipi a to ya maneka a di Asidhodhi,* mbimo yi a nga txi tsimbila ngu makhalo ale, a to simama e txhumayela mahungu a manene ka otshe madhoropa kala kuya hoka Khezareya.

9 Kambe Sawule a txi ngadi a txi tura ngu txiviti txo lava kuxanisa ni kudaya vagondiswa va Mkoma. Se a to tsula ka mprista wa hombe, 2 e ya m’kombela mapasi a kuya ka masinagoga a Dhamasku, ngu txikongomelo txo va tisa Jerusalema va di sungilwe votshe ava va nga txi lumba Nzila ya Mkoma, vavamna kumweko ni vavasikati.

3 Mbimo yi a nga ti hanzila a di hafuhi ni Dhamasku a to xokarwa* ngu liwoningo lo ta ngu nzumani, 4 se a to wa hahatshi e pfa dipswi di txi m’gela ku: “Sawule, Sawule, u ni xanisela txani?” 5 Sawule a to wotisa a txi khene: “Ngawe mani Mkoma?” Ene a njo kuxamula a txi khene: “Ngani Jesu, awu awe u m’xanisako. 6 Kambe khukha u bela didhoropani, va na kugela ati u fanelako kumaha.” 7 Vavamna ava a nga ti navo va to ema ve wika msana nguko va ti pfite dipswi kambe kha va wona m’thu. 8 Se Sawule a to wuka, kambe ene a si woni txilo hambiku a nga ti tute maso, se va to m’ñoleta ngu diwoko ve m’yisa Dhamasku. 9 Kudingana masiku mararu ene a si woni, a si dyi nem a si seli txilo.

10 Khe Dhamasku ku ti ni m’gondiswa a nga ti dhanwa ku i Ananiya, se Mkoma a to m’gela ka m’woniso a txi khene: “Ananiya!” Ene a to xamula a txi khene: “Ngani wuwa Mkoma.” 11 Mkoma a to m’gela ku khene: “Ti lulamisele u tsula ka ruwa ayi yi dhanwako ku njo Lulama,* nda xola mtini ka Judhasi wamwamna wu a dhanwako ku i Sawule wa Tarso, nguko ka yona mbimo yiya o khongela, 12 ni ku a woni wamwamna wu a dhanwako ku i Ananiya ka m’woniso a txi ta kwakwe e ta m’sanzeka manza kasiku e kota kutshumela e wona.” 13 Kambe Ananiya a to xamula a txi khene: “Mkoma, ni pfite vathu vo tala va txi womba-womba ngu wubihi awu wamwamna wuwa a nga wu mahela vasawuleki vako va Jerusalema. 14 A tshumete e ningwa mtamo ngu tinduna ta vaprista kasi kuñola* votshe avale va dhumisako ditina dako.” 15 Kambe Mkoma a to m’gela ku khene: “Tsula nguko wamwamna wuwa, txiya atxi ni nga txi sawula kasi kutxhumayela ditina dangu ka vamatiko, ka vakoma ni ka vanana va Israyeli. 16 Nguko ni na mkomba sotshe sixaniso asi a no wonisana naso ngu mhaka ya ditina dangu.”

17 Ananiya a to tsula e ya wulela mtini e ya m’sanzeka manza e m’gela ku khene: “Sawule, mwanathu, Mkoma Jesu awu a nga humelela kwako ka nzila yi u nga txita ngu yona, a ni rumete kasiku u ta tshumela u wona ni kutala ngu moya wo sawuleka.” 18 Kunu-kunuko ku to wa so nga manyamba* ngu ka maso akwe, se e tshumela e wona. E gwita e khukha e ya kubhabhatiswani, 19 ene a to dya e mana mtamo.

Ene a to zumba masiku o kari ni vagondiswa khe Dhamasku. 20 Sawule a to tekela kukhata kutxhumayela masinagogani mayelano ni Jesu, ti to ene Mwanana wa Txizimu. 21 Kambe votshe avale va nga txi mu engisa va txo xamala ngutu va txi kha vona: “Wamwamna wuwa hi nga ene wu a nga txi xanisa ava va nga txi dhumisa ditina diya Jerusalema? Ina kha tela ku ta va ñola* e va yisa ka tinduna ta vaprista?” 22 Kambe Sawule a txiya e mana mtamo ni kuxamalisa Vajudha vale va nga txi zumba Dhamasku, ngu nzila yi a nga txi kombisa ngu yona ti to Jesu ngene Kristu.

23 Se ku di pindile masiku a mangi, Vajudha va to luka tipulani to lava ku m’daya. 24 Aniko Sawule a to ziva ati va nga ti langanile nguko vona va ti wonelela sike sa didhoropa wusiku ni mitshikari va txi lava ku m’daya. 25 Ni hagari ka wusiku vangodiswa vakwe va to m’teka ve m’txhikisa ngu mu ka thavango, ve mu hulumeta ka ditshoko di nga diho ka diseta.

26 A di hokile Jerusalema a to zama ku ti patanisa ni vagondiswa, kambe votshe va txi m’thava nguko va si kholwi ti to ene i ti mgondiswa. 27 Se Bharnabhasi a to tsula e ya m’vhuna ngu ku m’teka e m’yisa ka vapostoli, e gwita e va txhamusela ti to Sawule mbimo yi a nga ti hanzila a woni Mkoma ni ku a wombawombile nayo ni ti to ene a txhumayete ngu kutsana ditina da Jesu khe Dhamasku. 28 Se ene a to simama nayo va txi tsimbila-tsimbila Jerusalema, ni kutxhumayela ngu ditina da Jesu va si thavi txilo. 29 Ene a txi womba-womba ni kukanetisana ni Vajudha ava va nga txi womba-womba Txigriki, kambe vona va txi zama ku m’daya. 30 Mbimo yi vanakwe va nga pfa mhaka yiya, va to relela nayo Khezareya ve gwita ve m’rumela Tarso.

31 Se mabanza a kotshe Judheya, Galileya ni Samariya ma to va ni kurula ni kutsaniswa, se aku va nga txi thava Jehovha* ni kuthavelelwa ngu moya wo sawuleka ma txi simama me kula.

32 Aku Pedro a nga txi endela otshe makhalo, a to relela kasi kuya pfuxela vasawuleki ava va nga txi zumba Lidha. 33 Kona kheya a to ya mana wamwamna awu a nga ti dhanwa ku i Eneyasi, awu a nga ti ni 8 wa malembe a di otete haditahoni, nguko a ti ni paraliziya. 34 Pedro a to m’gela ku khene: “Eneyasi, Jesu Kristu wa kuhanyisa. Wuka u peta ditaho dako.” Se ene a to tekela ku khukha. 35 Mbimo yi votshe ava va nga txi zumba Lidha ni Libalani ka Saroni va nga m’wona va to kholwa ka Mkoma.

36 Akhe Jopa ku ti ni m’gondiswa awu a nga txi dhanwa ku i Tabhita, ngu Txigriki i ku, “Dhorkasi.” Ene a txi maha mithumo yo tala ya yinene ni kuvhuna sisiwana. 37 Kambe ka masiku oneyo ene a to lwala e fa. Se vona va to m’sambisa ve ya m’veka ka kwartu ya txitimwi. 38 Aku Jopa i nga ti hafuhi ni Lidha, mbimo yi vagondiswa va nga pfa ti to Pedro ati ka didhoropa dile, va to rumela majaha mabimdi me ya mkombela ma txi: “Hi kombela u ta ngu txikuluveka.” 39 Se Pedro a to khukha e tsula navo. Mbimo yi a nga hoka, a to ya ka kwartu ya txitimwi, votshe vavasikati vo felwa ngu vavamna va to ta kwakwe va txi dila ve ta m’komba siambalo si Dhorkasi a nga va mahela a txi ngadi a txi hanya. 40 Pedro a to humisa votshe vathu vale hahanze, e khizama e khongela. Se a to tshembereka e wona txirumbi a txi khene: “Tabhita, wuka.” Se ene a to tula maso, mbimo yi a nga wona Pedro, a to khalahatsha. 41 A to m’ñola ngu diwoko e mu emisa. Se e dhana vasawuleki ni vavasikati vo felwa, e henjeleta Dhorkasi a txi hanya. 42 Mhaka yiya yi to ziwa ka dotshe didhoropa da Jopa, se vathu vo tala va to kholwa ka Mkoma. 43 Ene a ti ya zumba masiku a mangi Jopa kumweko ni m’txhuki wa madhowo* a nga ti dhanwa ku i Simoni.

10 Khe Khezareya ku ti ni wamwamna a nga ti dhanwa ku i Korneliyo, i nga ti mthangeli* wa mtxawa wa masotxhwa wu nga txi dhanwa ku Txikwata txa Italiya.* 2 Ene a txi thava Txizimu ni kutshumela e txi khozela kumweko ni va mwaya wakwe. A txi vhuna ngutu sisiwana ni ku yotshe mbimo a txi maha mikombelo ka Txizimu. 3 Kona mu ka ma 15, a to wona ngilozi ya Txizimu ngu ka m’woniso yi txi m’tshuketela, yi txi kha yona: “Korneliyo!” 4 Korneliyo a to wonetela ngilozi a txi thava ngutu, e yi wotisa ku khene: “Nji txani Mkoma?” Yona yi to m’xamula yi txi kha yona: “Mikombelo yako yi hokile ka Txizimu, ni ku txi woni ti to wa vhuna sisiwana, se txona txi ku khumbute. 5 Sekoko rumela vathu khe Jopa ve ya dhana Simoni awu a ziwako ngu ku i Pedro. 6 Wamwamna wuwa a mtini ka Simoni m’txhuki* wa madhowo, awu mti wakwe wu ku hafuhi ni linene.” 7 Neti ngilozi ayi yi nga ti womba-womba nayo yi nga tsula, Korneliyo a to dhana sithumi sakwe sa simbidi kumweko ni disotxhwa adi di nga txi ti ningetela ka Txizimu hagari ka sithumi sakwe, 8 e va leleta totshe e gwita e va rumela Jopa.

9 Mangwanani ka kona mbimo yi va nga ti hafuhi ni kuhoka didhoropani, Pedro a to kwela ka vharanda ya txitimwi ngu ma 12 kasi kuya khongela. 10 Se ene a to pfa nzala e lava kudya. Va di ngadi va txi lulamisela sakudya, ene a to wona m’woniso. 11 A to wona nzuma yi di tulekile e wona txo fana ni nguwo ya hombe yo basa txi di sungilwe ka mune wa titshoka txi txi relela hamafuni, 12 mndani ka txona ku ti ni sotshe sihari sa mune wa minenge, so tsimbila ngu dibindi* ni sinyana sa nzuma. 13 Se ku to pfala dipswi di txi kha dona: “Pedro khukha u txi ema. Daya u txi dya.” 14 Kambe Pedro a to m’xamula a txi khene: “Kha ni nge mahi eto Mkoma, nguko ani kha ni khali kudya tximaha txo yila ni txo nyama.” 15 A to tshumela e pfa dipswi ngu dikhambi da wumbidi di txi kha dona: “Leka kuwomba ti to si nyamile silo si Txizimu txi nga si basisa.” 16 Ene a pfite eto kudingana makhambi mararu, se nguwo yi a nga yi wona yi to tshumetwa ngu txikuluveta nzumani.

17 Pedro a to xamala e ti wotisa ti to m’woniso awu a nga wu wona wu txi lava kuwomba txani. Ka mbimo yoneyo, vavamna ava va nga rumelwa ngu Korneliyo va to wotisa to ngu hani mtini ka Simoni, vona va ti emile haditimbani. 18 Va to dhana m’thu wo kari ve m’wotisa ku, ina Simoni awu a dhanwako ku i Pedro a endete mtini muleya kani. 19 Pedro a txi ngadi a txi alakanyisisa ngu muwoniso wule, moya wo sawuleka wu to m’gela ku kha wona: “Ku ni vavamna vararu va ku lavako. 20 U nga kanakani, khukha u tsula navo nguko ngani ni nga va rumela.” 21 Se Pedro a to txhika e va yela e ya va gela ku khene: “Ngani awu mi ni lavako. Mi lava txani kani?” 22 Va to m’xamula va txi kha vona: “Korneliyo mthangeli wa masotxhwa, wamwamna wo lulama awu a thavako Txizimu, a ziwako ditikoni kotshe ka Vajudha ngu wunene wakwe, a rumilwe ngu Txizimu ngu kuthumisa ngilozi yo sawuleka ku ta kudhana u tsula mtini kwakwe u ya m’gela totshe ati u ku nato.” 23 Pedro a to va gela ku ve bela, e va ninga wukhalo wo zumba.

Mangwanani ka kona, a to wuka e tsula navo ni vanathu vamwani va khe Jopa. 24 Msana keto a to hoka Khezareya, se Korneliyo a ti tshanganisile maxaka ni vangana vakwe. 25 Mbimo yi Pedro a nga hoka mtini ka Korneliyo, ene a to m’hingeta e ya khizama masoni kwakwe e bayetha. 26 Kambe Pedro a to m’khukhisa a txi khene: “Khukha u txi ema, nguko nani ni m’thu wo fana ni nawe.” 27 A txi ngadi a txi bhula nayo, a to wulela nyumbani e ya mana vamwani va di tshanganile. 28 Ene a to va gela ku khene: “Anu ma ti ziva ti to kha ti tumelelwi ku Mjudha e va ni wuxaka mwendo kutshangana ni m’thu wa ditiko dimwani, kambe Txizimu txi ni kombile ti to kha na fanela kudhana m’thu ni txi khani wa yila mwendo ku a nyamile. 29 Ngu toneto, mbimo yi ni nga dhanwa ni to ta ni si kanakani. Se ni kombela kuziva ti to mi ni dhanete txani.”

30 Se Korneliyo a to khene: “Mune wa masiku msana, ni txi khongela nyumbani kwangu ka mbimo ya ma 15, wamwamna wo kari a to ta ema masoni kwangu a di ambate siyambalo so khetima, 31 a txi khene: ‘Korneliyo, mkombelo wako wu engisilwe ni ku Txizimu txi woni ti to wa vhuna sisiwana, se txi ku khumbute. 32 Se konku, rumela vathu khe Jopa ve ya dhana Simoni awu a ziwako ku i Pedro. Wamwamna wuwa a mtini ka Simoni m’txhuki wa madhowo awu mti wakwe wu ku hafuhi ni linene.’ 33 Ngu toneto, ni nga tekela kurumisa vathu ve ta kudhana, se awe u mahile wunene ngu kuva u di tile, hotshethu hiho hawa masoni ka Txizimu kasiku ta pfa totshe ati Jehovha* a nga kuruma ku ta hi gela.”

34 Ngu toneto Pedro a to womba a txi khene: “Konkuwa na ti pfisisa ti to Txizimu kha txi na txisawusawu, 35 kambe ka otshe matiko, ene wa amukela votshe avale va mthavako ni kumaha ati i ku to lulama. 36 A rumete dipswi dakwe ka va Israyeli ngu kutxhumayela mahungu a manene a kurula ngu Jesu Kristu Mkoma wa votshe. 37 Anu ma yi ziva mhaka ayi yi nga huwelelwa ka dotshe ditiko da Judheya kukhukhela Galileya, msana ka bhabhatiso ayi Johani a nga txhumayela, 38 mayelano ni Jesu wa Nazareta, awu Txizimu txi nga m’tota ngu moya wo sawuleka ni ku mninga mtamo, awu a nga tsimbila ni dotshe ditiko a txi maha wunene ni kuhanyisa votshe ava va nga txi dyisetwa ngu Dhawulosi, nguko Txizimu txi ti ni nene. 39 Kambe athu hi tifakazi ta totshe a ti a nga ti maha ka ditiko da Vajudha ni Jerusalema, kambe vona va m’date ngu ku m’gogotela ka phande. 40 Ngu ditshiku da wuraru, Txizimu txi m’wusile txi m’tumelela ku e ti kombekisa, 41 i si nga ka votshe vathu, kambe ka tifakazi ti ti nga sawulwa ngu Txizimu, i ku athu hi nga dya ni kusela kumweko nayo msana ka kuva a di wusilwe ngu ka vakufa. 42 Ene a hi rumile ti to hi txhumayela vathu votshe ni kuningela wufakazi wo pelela wa ti to ene a emisilwe ngu Txizimu kasi kuva mlamuli wa ava va hanyako ni ava va nga fa. 43 Ngene wuwa vaprofeti va wombawombako ngu ngene, to wuhi ni wuhi wu a no kholwa kwakwe a na divalelwa sionho sakwe ngu kona ha ka ditina dakwe.”

44 Na Pedro a txi ngadi a txi womba-womba, moya wo sawuleka wu to ta ka votshe ava va nga txi engisela ati a nga txi womba. 45 Makholwa aya ma nga ti yisilwe wukwerani ma nga ti tile ni Pedro ma to xamala, nguko ni vamatiko va txi amukela ningo ya moya wo sawuleka. 46 Nguko va txi va pfa va txi womba-womba ngu tidimi timwani va txi dhumisa Txizimu. Se Pedro a to khene: 47 “Vavamna vava va amukete moya wo sawuleka kufana ni nathu, se i mani awu a nga lambako ti to ve bhabhatiswa?” 48 Se ene a to rumisa ti to ve bhabhatiswa ngu ditina da Jesu Kristu. Se vona va to mkombela ku e zumba navo kudingana masiku o kari.

11 Se vapostoli kumweko ni vanathu vamwani ava va nga ti Judheya va to pfa ti to vathu va matiko ni vona va ti amukete dipswi da Txizimu. 2 Se mbimo yi Pedro a nga kwelela e ya Jerusalema, ava va nga ti ema ni mhaka ya kuyiswa wukwerani* va to khata kukanetisana* nayo, 3 va txi kha vona: “Awe u wulete mtini ka vavamna vo mbi yiswa wukwerani u ya dya navo.” 4 Se ti di nge to, Pedro a to khata ku va txhamusela totshe ati ti nga ti mahekile, a txi khene:

5 “Ni ti didhoropani ka Jopa ni txi khongela, se ni to wona m’woniso aha ni nga wona txo fana ni nguwo txi txi txhika ngu nzumani, txi di sungilwe ngu ka mune wa titshoka ta txona txi txita ha ni nga ti kona. 6 Ni to wonisisa kha kwati mndani ka txona, ni wona sihari sa mune wa minenge, sihari sa txitinga, sihari so tsimbila ngu dibindi* ni sinyana. 7 Ni to tshumela ni pfa dipswi di txi kha dona: ‘Pedro, khukha u txi ema, daya u txi dya.’ 8 Kambe ani ni ti khani: ‘Na mbi maha eto Mkoma, nguko kha ni khali kubeta txilo txo yila ni txo nyama mkanani kwangu.’ 9 Ni to tshumela ni pfa dipswi do ta ngu nzumani ngu dikhambi da wumbidi di txi kha dona: ‘Leka kuwomba ti to si nyamile asi Txizimu txi nga si basisa.’ 10 Eto ti to tshumela ti maheka ngu dikhambi da wuraru, se sotshe si to ndindwa si tshumela si tsula nzumani. 11 I si nga eto basi, ka yona mbimo yile, vavamna vararu ava va nga ti rumetwe kukhukhela Khezareya kasi kuta ni dhana, va to hoka mtini mu ni nga ti zumbile kona. 12 Se moya wo sawuleka wu to ni gela ti to ni tsula navo ni si kanakani, se vanathu vava va 6 kumweko ni nani hi to tsula mtini ka wamwamna wule.

13 “Ene a hi gete ti to a tetwe ngu ngilozi mtini kwakwe yi ta m’gela ku khene: ‘Ruma vathu ve tsula Jopa veya dhana Simoni awu a ziwako ku i Pedro, 14 ene a na ta mi gela ati awe ni va u zumbako navo mtini kwako mi fanelako ku ti maha kasiku mi poniswa.’ 15 Mbimo yi ni nga khata kuwombawomba, moya wo sawuleka wu to txhika txitimwi kwawe kufana ni ti wu nga txhikisa tona kwathu makhatoni. 16 Se ti di nge to ni to khumbula mapswi a Mkoma, aya ma ku khene: ‘Johani a bhabhatisile ngu mati, kambe anu mi na bhabhatiswa ngu moya wo sawuleka.’ 17 Se aku Txizimu txi nga va ninga ningo* yo fana ni yi txi nga hi ninga nathu hi kholwako ka Mkoma Jesu Kristu, no va mani ani wo ni nga tsimbisa Txizimu kani?”

18 Mbimo yi va nga pfa timhaka tiya, kha va tatela to womba,* va to dhumisa Txizimu va txi kha vona: “Ngu ditshuri, Txizimu txi lava ti to hambi vathu vamatiko ve ti sola kasiku ve mana wutomi.”

19 Se votshe ava va nga ti hangalakile ngu mhaka ya kuxaniswa aku ku nga ti humelete ngu kona ha ka Sitefani, va to tsula kala Fenikiya, Kipra ni Antiyokiya, kambe vona va ti txhumayela dipswi ka Vajudha dwe. 20 Kambe vavamna vo kari va nga txita ngu Kipra ni Kirene, va to tsula Antiyokiya ve ya khata kuwombawomba ni vathu ava va nga ti womba-womba lidimi la Txigriki, ve va txhumayela mahungu a manene a Mkoma Jesu. 21 Se diwoko da Jehovha di ti navo, ni ku vathu vo tala va to hunduka ve kholwa ka Mkoma.

22 Se mhaka yiya yi to ziwa ngu dibanza da khe Jerusalema, se va to rumela Bharnabhasi e ya Antiyokiya. 23 Mbimo yi a nga hoka e ya wona wuxinji wa hombe wa Txizimu, ene a to tsaka ngutu e khata kutsanisa votshe ti to ve simama ve thumela Mkoma ngu mbilu yotshe, 24 nguko ene i ti wamwamna wamnene wo tala ngu moya wo sawuleka ni likholo. Se txitshungu txo tala txi to khata kukholwa ka Mkoma. 25 Se ene a to khukha e tsula Tarso e ya lavetela Sawule. 26 Msana ko m’mana a to m’teka e ya nayo Antiyokiya. Kona kheya va ti ya heta dilembe va txi tshangana ni dibanza va txi gondisa txitshungu. Ngu kona kheya Antiyokiya vagondiswa va nga khata kudhanwa ngu kukongomiswa ngu moya wo sawuleka ti to Makristu.

27 Ka masiku oneyo, ku tile vaprofeti vo kari ngu Jerusalema veya Antiyokiya. 28 Mmweyo wawe a txi dhanwa ku i Agabho, ene a to khukha e profeta ngu kuthumiswa ngu moya wo sawuleka ti to ku nava ni nzala ya hombe hamafuni kotshe. Ngu ditshuri, nzala eyo yi humelete ka timbimo ta Klawudhiyo. 29 Se vagondiswa va to maha txisungo txa ti to mmwani ni mmwani e rumela asi a sikotako ka vanawe ava va nga ti hanya Judheya, 30 se vona va to maha toneto, ve rumela asi va nga ti naso ka madhota ngu kuthumisa Bharnabhasi ni Sawule.

12 Ka mbimo yoneyo, mkoma Herodha a to khata kuxanisa vamwani dibanzani. 2 Ene a to daya Jakobe mkoma wa Johani ngu ditxhari. 3 Mbimo yi a nga wona ti to atiya ta tsakisa Vajudha, a to ñola Pedro nene. (Atiya ti mahekile ka masiku a M’buso wa Mapawa o mbi Tshumbelwa.) 4 A to m’ñola e m’beta jele e mningela ka mune wa mitxawa ya masotxhwa, kadha mtxawa wu ti ni mune wa masotxhwa, ngu txikongomelo txo mningela* ka vathu msana ka Paxkwa. 5 Ati ti nga maha ku Pedro e khotelwa, kambe dibanza di txi khongela ngutu ka Txizimu ngu mhaka yoneyo.

6 A txi ngadi e pimisa kuhenjeleta Pedro masoni ka vathu, ka wona wusiku wule Pedro a ti otete hagari ka masotxhwa mambidi na a di sungilwe ngu titxhini timbidi. Ngu masoni ku ti ni tigwardha ti nga ti wonelela jele. 7 Ngilozi ya Jehovha* yi to humelela ta kona ha ni kona ha, se jele ku to woninga. Yona yi to gwesa Pedro yi txi khene: “Wuka ngu txikuluveta!” Se titxhini ati ti nga ti mawokoni kwakwe ti to wa. 8 Ngilozi yi to m’gela ku kha yona: “Lungeka, u ambala masandaliya ako.” Ene a to maha toneto. Ngu magwito yi to m’gela ku kha yona: “Ambala siambalo sako u ni londisa.” 9 Se ene a to huma e yi londisa, kambe a si kholwi ti to atile ti txo maheka ngu ditshuri, ene a txi pimisa ti to o wona m’woniso. 10 Va to pinda mtxawa wo khata wa tigwardha ni wa wumbidi ve hoka ka digedhe da simbi adi di kongomako didhoropani, digedhe donedo di to tuleka dipune. Va to tsimbila ngu ruwa yo kari, se kunu-kunuko ngilozi yi to nyamalala yi m’siya. 11 Mbimo yi Pedro a nga ti pfisisa ati ti nga txi maheka a to khene: “Konkuwa na ti wona ti to Jehovha* a rumete ngilozi yakwe kasiku ku ta ni hulukisa ka Herodha ni ka totshe ati Vajudha va nga txi lava ku ti maheka.”

12 Mbimo yi a nga ti pfisisa eto, ene a to tsula mtini ka Mariya mame wa Johani awu a ziwako ku i Marku, aha ku nga ti tshanganile vagondiswa vavangi va txi maha mikombelo. 13 Mbimo yi a nga peka ditimba, ku to huma txithumi txa txisikati txi dhanwako ku i Rodha txiya m’tendera. 14 Mbimo yi a nga tumbula ti to i ti dipswi da Pedro a to tsaka ngutu ha koza a si gwenti ni kutula ditimba, se a to tutuma e ya nyumbani e ya gela ava va nga tiho ti to Pedro a ti emile haditimbani. 15 Kambe vona va to kha vona: “U ni majevejeve mwananawe.” Kambe ene a txi tsanisa ti to ditshuri eto. Se vona va to kha vona: “I ngilozi yakwe.” 16 Kambe Pedro a to simama e peka ditimba. Mbimo yi va nga tula ve wona ti to ngene, va to xamala ngutu! 17 A to va gela ngu diwoko ti to ve malala ni ku va txhamusela totshe ati Jehovha* a nga mahisa tona kasi ku m’humisa jele, a txi khene: “Ni kombela mi gela timhaka tiya Jakobe kumweko ni vanathu.” Msana keto a to huma e tsula wukhalo wumwani.

18 Kambe mbimo yi di nga txa, ku to va ni nyima-nyima ya hombe hagari ka masotxhwa ngu mhaka ya ti ti nga ti humelete Pedro. 19 Herodha a to m’xoletela, se aku a nga m’pwata a to xuxisa tigwardha e rumisa ti to ti tsayiswa. Msana keto, Herodha a to khukha ngu Judheya e ya Khezareya e ya zumba masiku o kari.

20 Herodha a to henyela vathu va Tiro ni Sidhoni. Msana ko bhula ni Blasto, mthangeli wa nyumba ya mkoma, vona va to langana ku ve maha kurula nguko ditiko dawe di ti ningwa sakudya ngu mkoma Herodha. 21 Ka ditshiku do kari, Herodha a to ambala siambalo sa wukoma e khalahatsha tribhunali e khata kumaha dhixkursu masoni ka vathu. 22 Se vathu ava va nga ti tshanganile hale va to khata kukwangula va txi kha vona: “Adiya dipswi da txizimu, hi nga da m’thu!” 23 Kunu-kunuko, ngilozi ya Jehovha* yi to m’peka, nguko ene kha dhumisa Txizimu, se ene a to fa ngu kudyiwa ngu timbungu.

24 Kambe dipswi da Jehovha* di txi kula ni kuhangalaka.

25 Mbimo yi Bharnabhasi ni Sawule, va nga gwita kuvhuna vanawe khe Jerusalema, va to tshumela Antiyokiya va di ni Johani, awu a ziwako kambe ku i Marku.

13 Ka dibanza da Antiyokiya ku ti ni vaprofeti ni vagondisi i ku Bharnabhasi, Simiyoni a nga ti dhanwa ku i Nijere, Lukiyo wa Kirene, Manahene a nga ti gondile kumweko ni mkoma Herodha, ni Sawule. 2 Mbimo yi va nga txi thumela Jehovha* ni kujejuwara, moya wo sawuleka wu to kha wona: “Ni sawuleleni Bharnabhasi ni Sawule kasiku ve maha mthumo wu ni nga va dhanela wona.” 3 Msana ko jejuwara ni kumaha mikombelo, va to va sanzeka manza ve va leka ve tsula.

4 Se vavamna vava ngu kurumwa ngu moya wo sawuleka va to relela ve tsula Selewukiya, ve gwita ve jika ve ya Kipra. 5 Mbimo yi va nga hoka Salamina, va to khata kutxhumayela dipswi da Txizimu masinagogani ka Vajudha, se Johani nene a ti navo a txi va vhunetela.

6 Msana ko tshawunyeta txotshe txitondolo ve hoka Pafo, va to ya mana Mjudha wo kari a nga txi dhanwa ku i Bhari-Jesu, i nga ti m’loyi ni mprofeti wa makuhu. 7 Ene a ti ni govhernadhori Serjiyo Paulosi, dijaha do ziva. Ene a to dhana Bharnabhasi ni Sawule nguko a txi ti lava ngutu kupfa dipswi da Txizimu. 8 Kambe Elima* (ati ti wombako ku m’loyi), a to khata ku va kaneta a txi zama kutimeta govhernadhori kasiku a si kholwi. 9 Se Sawule awu a nga txi ziwa ti to i Paulo, a to tala ngu moya wo sawuleka e m’wonisisa 10 e m’gela ku khene: “Tatewe u nga tala ngu lotshe lixaka la wubihi ni wukanganyisi, mwanana wa Dhawulosi, mlala wa totshe ati i ku to lulama, khu leki kusoholota tinzila to lulama ta Jehovha* kani? 11 Diwoko da Jehovha* di txitimwi kwako, u na maha dibhofu u si woni kuwoninga ka ditambo ngu mbimo yo kari.” Kunu-kunuko a to welwa ngu hunguva ni mphume, e khata kutenderukela e xola wo m’ñoleta lisole. 12 Mbimo yi govhernadhori a nga wona ati ti nga maheka, a to kholwa nguko a xamatisilwe ngu tigondo ta Jehovha.*

13 Paulo ni vangana vakwe, va to khukha Pafo ngu txitimela txa matini ve hoka Perga khe Panfiliya, kambe Johani a to va leka e tshumela Jerusalema. 14 Kambe vona va to tshawunyeta ve pinda Perga ve hoka Antiyokiya ka Pisidhiya. Se va to ya bela disinagogani ko kari ngu Sabata ve khalahatsha. 15 Msana ko lera Mlayo ni dibhuku da Vaprofeti, vathangeli va disinagoga va to rumela dipswi va txi kha vona: “Vanathu, ngako mi di ni dipswi do tsanisa txitshungu, wombani.” 16 Se Paulo a to khukha e va kweseta ngu diwoko a txi khene:

“Vanathu, Vaisrayeli ni motshenu mi thavako Txizimu, engisani. 17 Txizimu txa vathu vava i ku Txizimu txa Israyeli txi sawute vatate vathu txi tshumela txi va guleta va txi ngadi va txi hanya kota vawuyi khe Egipta ni ku va humisa ngu diwoko da txona da mtamo. 18 Kudingana 40 wa malembe txi va timiselete va di txiwulani. 19 A lovisile 7 wa mifumo ya Kanana, e ningela ditiko dile kota thomba yawe. 20 Totshe tiya ti mahekile kudingana 450 wa malembe.

“Ngu msana a va ningile valamuli kala ka mprofeti Samuwele. 21 Kambe vona va to sinzisa va txi kha vona va lava mkoma, se Txizimu txi to va ninga Sawule, mwanana wa Kixi wa lihunzu la Bhejamini, awu a nga fuma kudingana 40 wa malembe. 22 Msana ko m’thavisa, ene a vekile Dhavhidha kota mkoma i ku awu txi nga womba ngu ngene ti to: ‘Ni mani Dhavhidha mwanana wa Jese, wamwamna wu a tsakisako mbilu yangu, awu a no maha ati ti ni tsakisako.’ 23 Nga ha ti nga thembiswa ngu kona, ngu ka liveleko la wamwamna wuwa, Txizimu txi tisile m’hanyisi Israyeli i ku Jesu. 24 Na Jesu a si nzi kuhoka, Johani a txhumayete votshe vathu va Israyeli ku ve bhabhatiswa kasiku ve ti sola ka sionho sawe. 25 Kambe mbimo yi a nga ti hafuhi ni kuheta mthumo wakwe, Johani a ti khene: ‘Mi pimisa ti to ngani mani? Ani kha ni nga ene. Ngu ditshuri, msana kwangu wa ta m’thu awu ni si faneliko kutxhatxha masandaliya akwe.’

26 “Vanathu, anu va lixaka la Abrahamu, ni nanu motshenu mi thavako Txizimu, dipswi da kuhanyisa di rumetwe kwathu. 27 Nguko vahanyi va Jerusalema ni vathangeli vawe kha va kholwa kwakwe, kambe mbimo yi va nga m’lamula ma tatisekile mapswi a Vaprofeti aya ma lerwako Sabata ni Sabata. 28 Kambe hambiku va nga mbi mana txivangelo txo m’daya, va sinzisile Pilato ku e rumisa ti to e dawa. 29 Se msana ko maha totshe ati ti nga ti bhaletwe ene, va to mthavisa haphandeni ve ya m’veka dithithani. 30 Kambe Txizimu txi m’wusile ngu ka vakufa, 31 nguko kudingana masiku o tala, ene a humelete ka vale a nga ti kwelete navo ngu Galileya ve ya Jerusalema. Vonevo konkuwa tifakazi takwe ka vathu.

32 “Se athu hi mi txhumayela mahungu a manene mayelano ni txithembiso atxi txi nga mahelwa vatate vathu. 33 Ti tatisekile ati Txizimu txi nga ti womba kwathu vanana va txona, ngu kuwusa Jesu, nga ha ti nga bhalwa ngu kona ka disalmo da wumbidi di ku: ‘Awe u mwanana wangu, nyamsi ni ku velekile.’ 34 Ngu ditshuri Txona txi m’wusile ngu ka vakufa ni ku txi mningile mmidi wo mba sina, txi tshumela txi txi kha txona: ‘Na kukomba lirando langu lo mbi guma, lo tsana nga li ni nga thembisa Dhavhidha. 35 Ni ku ka dimwani disalmo kubhatwe ti to: ‘Khu na mba tumelela ti to awu wo thembeka kwako e sina.’ 36 Dhavhidha a thumete* Txizimu ka timbimo takwe* e fa,* e tshotshwa kumweko ni vatate vakwe e sina. 37 Kambe awule Txizimu txi nga m’wusa kha sina.

38 “Ngu toneto vanathu, ti ziveni ti to kudivalelwa ka sionho ka txhumayelwa ngu kona ha ka vavamna vava, 39 ngu kona ha ka Jesu, wuhi ni wuhi a kholwako kwakwe a na divalelwa sionho a si ti nga si koteki ku e divalelwa ngu kuya ngu Mlayo wa Mosi. 40 Ngu toneto, ti woneleni ti to ti si maheki kwanu ati ti nga wombwa ngu Vaprofeti to kha vona: 41 ‘Wonani anu vatseketseli, xamalani ni kufuviswa, nguko ni maha mithumo yo xamalisa ka masiku anu, mithumo ayi hambi va txo mi txhamusela khakwati totshe, kha mi na mbi kholwa.’”

42 Mbimo yi va nga txi huma, vathu va to va kombela ti to ve ta womba-womba kambe ngu timhaka tile ka Sabata yi yi londiselako. 43 Msana kova mtshangano wu di gumile disinagogani, Vajudha ni vamatiko ava va nga txi khozela Txizimu, va to londisa Paulo ni Bharnabhasi va txi womba-womba navo ve va kuzeta kusimama ka wuxinji wa hombe wa Txizimu.

44 Ka Sabata ayi yi nga londisela, dotshe ditiko di to tshangana kasi ku ya engisela dipswi da Jehovha.* 45 Mbimo yi Vajudha va nga wona txitshungu va to va bavela, ve khata ku va ruka ni kukaneta ati Paulo a nga ti womba. 46 Se Paulo ni Bharnabhasi va to va gela ngu txibindi va txi kha vona: “Ti ti fanete kukhata ngu kwanu hi txhumayela dipswi da Txizimu, se aku mi nga di lamba, mo ti lamula mipune ti to kha mi fanelwi ngu wutomi wo mbi guma. Wonani kuwa, ha tsula hi ya txhumayela vamatiko. 47 Nguko Jehovha* a hi rumile a txi khene: ‘Ni ku vekile kasiku u va liwoningo ka vamatiko ni kutxhumayela kuhanyiswa kala magemeta-mitshi ka mafu.’”

48 Mbimo yi vathu vamatiko va nga pfa tiya, va to tsaka ve khata kudhumisa dipswi da Jehovha,* se votshe avale timbilu tawe ti nga ti ti emisete kuengisa dipswi adi di yisako ka wutomi wo mbi guma va to kholwa. 49 I si nga eto basi, dipswi da Jehovha* di txi huwelelwa ka dotshe ditiko dile. 50 Kambe Vajudha va to kuzetela vavasikati va nduma, vo thava Txizimu ni vavamna va situlu ka didhoropa dile, se va to khata kuxanisa Paulo ni Bharnabhasi ve va hinga ditikoni kwawe. 51 Se vona va to huphuta lithulu mikondoni kwawe kasiku ti va wufakazi kwawe, se ve khukha ve tsula Ikoniyo. 52 Se vagondiswa va to simama ve tsaka ni kutala ngu moya wo sawuleka.

14 Khe Ikoniyo Paulo ni Bharnabhasi va to bela disinagogani ka Vajudha ve txhumayela ha koza Vajudha vo tala ni Vagriki ve kholwa. 2 Aniko Vajudha ava va nga mbi kholwa va to kuzetela vathu kasiku ve wukela vanathu. 3 Ngu toneto, Paulo ni Bharnabhasi va zumbile mkama wo lapha khe Ikoniyo, nguko Jehovha* a ti va ningile mtamo wo txhumayela na va si thavi txilo ni ku a va thumisile kasi kumaha sikombiso ni sidiwukiso kasi kukombisa ti to mahungu ya va nga ti ma txhumayela ngu mhaka ya wuxinji wakwe wa hombe i ti a ditshuri. 4 Kambe vathu va didhoropa dile va si pfani, vamwani va txi ema kumweko ni Vajudha, vamwani va txi ema kumweko ni vapostoli. 5 Ngu toneto, vathu vamatiko kumweko ni Vajudha ni vathangeli vawe, va to langana ku va xanisa ni ku va balisela* ngu marigwi. 6 Mbimo yi va nga ti ziva va to tutuma ve thavela Listra ni Dherbhe, i ku madhoropa ya Likawoniya, ni makhalo mamwani a hafuhi. 7 Koneyo va to simama ve txhumayela mahungu a manene.

8 Khe Listra ku ti ni wamwamna a nga ti si tsimbili. Ene a ti khalahatshile, i ti txidiya a si khali kutsimbila. 9 Ene a txi engisela Paulo a txi womba-womba, Paulo a to m’wonetela e wona ti to a ti ni likholo la ti to a nga hanyiswa, 10 se a to m’gela ngu dipswi do guleka a txi khene: “Khukha u ema.” Se wamwamna wule a to ndaka e khata kutsimbila. 11 Mbimo yi txitshungu txi nga wona ti Paulo a nga maha, txi to kwangula ngu lidimi la Txilawukoniya txi txi kha txona: “Sizimu si ti mahile vathu si txhika kwathu!” 12 Vona va to khata kudhana Bharnabhasi ti to i Zewusi ni Paulo ti to i Herme, nguko i ti ene a nga txi thangela ko txhumayela. 13 Mprista wa Zewusi awu dithempele dakwe di nga txi maneka masoni ka didhoropa, a to teka dirole ni m’bhoti wa siluva e tsula naso hadipangoni ka didhoropa kasi kuya maha magandelo ni txotshe txitshungu.

14 Mbimo yi mpostoli Bharnabhasi ni mpostoli Paulo va nga ti ziva, va to bhanda siambalo sawe ve tutuma ve ya hagari ka txitshungu ve ya kwangula va txi kha vona: 15 “Ngu kutxani mi txi maha toneto kani? Nathu hi vathu vo fana ni nanu. Hiho hawa kasi kutxhumayela mahungu a manene, kasiku mi leka silo so mbi vhuna txilo kambe mi khozela Txizimu txi txi hanyako, atxi txi nga maha nzuma, mafu, linene ni sotshe asi si ku ka sona. 16 Ka timbimo ti ti nga pinda, ene a lekile vathu ve ti mahela kuranda kwawe, 17 hambiketo, txona kha txa leka ku ti zivisa kwanu ngu ku mi mahela wunene, ngu ku mi wisela mati, txi mi ninga tinguva to pfuna ni sakudya so tala ni kutata timbilu tanu ngu litsako.” 18 Hambiku va nga txi va gela tiya, ti si va hehukeli kulekisa txitshungu ku txi va hisela magandelo.

19 Kambe ku to hoka Vajudha vo ta ngu Antiyokiya ni Ikoniyo ve kuzetela txitshungu, se txona txi to balisela Paulo ngu marigwi txi m’humisa hahanze ka didhoropa txi txi pimisa ti to a fite. 20 Kambe mbimo yi vagondiswa va nga m’randela a to khukha e bela didhoropani. Mangwanani ka kona, a to khukha ni Bharnabhasi ve ya Dherbhe. 21 Msana ko huwelela mahungu a manene ni kumaha vagondiswa vo tala ka didhoropa dile, va to tshumela ve ya Listra, Ikoniyo ni Antiyokiya. 22 Kona kheya va to ya tsanisa vagondiswa kulowe, va txi va tsanisa ti to ve simama ka likholo va txi kha vona: “Hi fanete kupinda ngu ka sixaniso so tala kasiku hi wulela ka Mfumo wa Txizimu.” 23 I si nga eto basi, va to veka madhota ka otshe mabanza. Msana ko maha mikombelo ni kujejuwara va to va ningela manzani ka Jehovha* awu va nga ti khotwe kwakwe.

24 Se va to pinda ngu Pisidhiya ve bela Panfiliya. 25 Msana ko huwelela dipswi da Txizimu Perga va to relela ve ya Ataliya. 26 Va to khukha ngu hale ve bela ngalava ve tsula Antiyokiya i ku ha Txizimu txi nga va komba wuxinji wa hombe ngu mhaka ya mthumo awu va nga di ngadi ku wu maha.

27 Mbimo yi va nga hoka va to tshanganisa dotshe dibanza ve di gela totshe ati Txizimu txi nga maha ngu kuthumisa vona ni ti to txi tulete ditimba vamatiko ti to ve kholwa kwakwe. 28 Ngu toneto va to zumba mbimo yo lapha ni vagondiswa.

15 Vavamna vo kari va to relela ngu Judheya ve ya gondisa vathu va txi kha vona: “Mi si njo yiswa wukwerani ngu kuya ngu mlayo wa Mosi kha mi na mbi hanyiswa.” 2 Kambe msana ko Paulo ni Bharnabhasi va di wombawombile ni kukanetisana navo, ku to sungwa ti to Paulo, Bharnabhasi ni vamwani va ti fanete kukwelela Jerusalema kasi kuya lulamisa mhaka yiya kumweko ni vapostoli ni madhota.

3 Se msana kova dibanza di di va heleketile, va to pinda ngu Fenikiya ni Samariya va txi va txhamusela ati vamatiko va nga hundulukisa tona, se vanathu votshe va to tsaka ngu kupfa eto. 4 Mbimo yi va nga hoka Jerusalema, va amuketwe ngu manza mambidi ngu dibanza, vapostoli ni ngu madhota, va txi va txhamusela ati Txizimu txi nga ti mahile ngu kuthumisa vona. 5 Aniko vamwani va mtxawa wo kari va nga ti khotwe, va to khukha va txi kha vona: “Ta laveka ku ve yiswa wukwerani ni ku va gela ti to ve londisa Mlayo wa Mosi.”

6 Se vapostoli ni madhota va to tshangana kasi kubhula ngu mhaka yiya. 7 Msana ko ningetisana ngu mawonelo, Pedro a to khukha e va gela ku khene: “Vanathu, na mi gela ti to kukhukhela ka masiku o khata, Txizimu txi ni sawute hagari kwanu kasiku vathu vamatiko ve engisa mahungu a manene ngu txisofu txangu ve kholwa. 8 Se Txizimu txi zivako ta mbiluni, txi kombisile ti to txa va tsakela ngu ku va ninga moya wo sawuleka kufana ni ku txi nga hi ninga nathu. 9 Kha txa hambanisa txilo hagari kwawe ni nathu, kambe txi basisile timbilu tawe ngu likholo. 10 Se ngu kutxani mi txi duka Txizimu ngu kurweka vagondiswa mrwalo wo nem vatate vathu nem athu kha ha sikota ku wu rwala? 11 Kuhambana ni eto, ha kholwa ti to hi hanyiswa ngu wuxinji wa hombe wa Mkoma Jesu kufana ni vona.”

12 Se votshe va to malala ve engisela Bharnabhasi ni Paulo va txi txhamusela sotshe sikombiso ni sidiwukiso si Txizimu txi nga ti mahile ka vamatiko ngu kuthumisa vona. 13 Mbimo yi va nga gwita, Jakobe a to khata kuwombawomba a txi khene: “Vanathu, ni engiseni. 14 Simiyoni a wombawombile ngu nzila yi Txizimu txi nga khumbula ngu yona vamatiko ni ku va sawula kasiku ve dhanwa ngu ditina da Txona. 15 Atiya ta yelana ni mapswi a Vaprofeti aya ma ku: 16 ‘Msana ka tiya ni na wuya ni ta wuseta ditenda* da Dhavhidha di nga wa, ni na di aketa ni di emisa, 17 kasiku vathu ava va nga sala ve lava Jehovha* ngu mbilu yotshe kumweko ni vathu va otshe matiko ava va dhanwako ngu ditina dangu, kuwomba Jehovha,* awu i ku ene a mahako timhaka tiya, 18 ati ti ziwako kukhukhela kale.’ 19 Ngu toneto, mawonelo angu ngu kwa mbi nemetisela vathu vava vamatiko va lavako kukhozela Txizimu, 20 kambe va na bhalelwe ti to ve vayilela silo si nga nyamiswa ngu sifaniso, wubhemba,* nyama ya sihari si si nga fa ngu kukamwa mkolo* ni mnoha. 21 Nguko kukhukhela kale, ku ni vathu ava va txhumayelako mapswi a Mosi ka otshe madhoropa ngu kulera ngu dipswi do guleka mabhuku akwe masinagogani Sabata ni Sabata.”

22 Se vapostoli, madhota kumweko ni dotshe dibanza, va to sunga kurumela Antiyokiya vavamna ava va nga ti sawutwe hagari kwawe kumweko ni Paulo ni Bharnabhasi, va rumete kambe Judhasi awu a nga ti dhanwa ku i Bharsabha ni Silasi, i ku vavamna ava va nga ti thangela hagari ka vanawe. 23 Va to bhala dipasi va txi di rumela ngu kwawe, va txi kha vona:

“Athu vapostoli ni madhota, hi ku vananu, ha mi losa! Motshenu vanathu mi humako ngu ka matiko mi ku Antiyokiya, Siriya ni Kilikiya. 24 Hi engiseli ti to vamwani kwathu va hambanile ni nathu ni ku va mi wusela diguwa ngu ti va ti wombako ni kuzama ku mi jikisa, kambe kha va rumelwa ngu ngathu, 25 ngu toneto, msana kova hi di pfani hi sungile kurumela vavamna kumweko ni vanathu vo randeka Bharnabhasi ni Paulo, 26 i ku vavamna ava va nga veka wutomi wawe haphangoni ngu mhaka ya ditina da Mkoma wathu Jesu Kristu. 27 Ngu toneto, hi rumete Judhasi ni Silasi kasiku ve ta mi txhamusela timhaka tiya. 28 Nguko ti wonekile i di tatinene ka moya wo sawuleka ni kwathu ku hi si mi rweki mrwalo hahanze ka timhaka tiya i ku ta lisima: 29 Ti to mi simama mi vayilela silo si si nga ningelwa kota magandelo ka sifananiso, mnoha, nyama ya sihari si si nga fa ngu kukamwa mkolo* ni wubhemba,* ngako mi txi vekisa khakwati totshe tiya mi na humelela. Salani!”

30 Ngu msana va to relela ve ya Antiyokiya ve ya sengeleta vagondiswa ve va ningeta dipasi. 31 Se msana ko lera dipasi va to tsaka, nguko va ti tsanisilwe. 32 Aku Judhasi ni Silasi i nga ti vaprofeti va to tsanisa vanathu ngu madhixkursu ve va ninga mtamo. 33 Msana ko zumba masiku o kari haleya, vathu va to va tshumeta ngu kurula ka vanathu ava va nga ti va rumete. 34* —— 35 Kambe Paulo ni Bharnabhasi va to zumba Antiyokiya va txi gondisa ni kutxhumayela mahungu a manene ngu dipswi da Jehovha* kumweko ni vamwani vo tala.

36 Msana ka masiku o kari, Paulo a to gela Bharnabhasi a txi khene: “A hi tshumele hi ya pfuxela vanathu ka otshe madhoropa aya hi nga huwelela dipswi da Jehovha,* hi ya va wona ti to va njani.” 37 Bharnabhasi a di tiemisete kuteka Johani awu a nga txi ziwa ku i Marku. 38 Kambe Paulo a si ti lavi ku ve tsula nayo nguko ene a ti hambanile navo khe Panfiliya ni ku a sa tsula navo ka mthumo wo txhumayela. 39 Ngu toneto, ku to wuka dizunga da hombe hagari ka Paulo ni Bharnabhasi aha koza ve hambana, se Bharnabhasi a to teka Marku ve kwela ngalava ve ya Kipra. 40 Paulo a to langa Silasi e tsula nayo, msana kova vanathu va di m’khongelete kasiku Jehovha* e mkomba wuxinji wakwe wa hombe. 41 Se va to pinda ngu Siriya ni Kilikiya va txi tsanisa mabanza.

16 Ene a to hoka Dherbhe ni Listra kona kheya ku ti ni m’gondiswa a nga txi dhanwa ku i Timoti, i ti mwanana wa wamsikati wa Mjudha i nga ti dikholwa, kambe tate wakwe i ti M’griki. 2 Vanathu va Listra ni Ikoniyo va txi womba-womba ta tinene ngu khene. 3 Paulo a txi lava kuteka Timoti kasi kutsimbila nayo, se a to m’teka e m’yisa wukwerani, ngu mhaka ya Vajudha ava va nga diho ka makhalo ale ngu ku votshe va txi tiziva ti to tate wakwe i ti M’griki. 4 Mbimo yi va nga txi tsimbila ka madhoropa, va txi txhamusela vanathu sisungo asi si nga ti mahilwe ngu vapostoli ni madhota kheya Jerusalema, kasi ku ve vekisa sirumo soneso. 5 Ngu toneto mabanza ma txi simama me tsana amu ka likholo ni ku kula ditshiku ni ditshiku.

6 I si nga eto basi vona va to enda ve pinda ngu Frigiya, ni ditikoni ka Galatiya, ngu ku moya wo sawuleka wu ti va tsimbili kutxhumayela dipswi ka provinsiya ya Aziya. 7 Mbimo yi va nga relela ve ya Misiya va to zama kuhoka ni Bhitiniya, kambe moya* wa Jesu kha wa va tumelela kumaha toneto. 8 Ngu toneto va to pinda* ngu Misiya ve relela ve ya Trowasi. 9 Se ni wusiku Paulo a to va ni m’woniso a ha a nga wona wamwamna wa Makedhoniya a di emile a txi m’kombela a txi khene: “Ngono Makedhoniya u ta hi vhuna.” 10 Msana ko wona m’woniso, hi to tekela kuya Makedhoniya ngu kupfisisa ti to Txizimu txi ti hi rumile, kasi kuya va txhumayela mahungu a manene.

11 Se hi to bela ngalava ngu Trowasi hi wulela hi ya Somatraka, kambe mangwanani ka kona hi to tsula Neyapoli. 12 Hi to khukha ngu haleya hi ya Filipiya i ku ditiko di nga txi fumwa ngu Roma i ku didhoropa da hombe da Makedhoniya, hi zumba kona kheya kudingana masiku o kari. 13 Ngu Sabata hi to khukha hi huma ngu dipangu da didhoropa hi ya ka wukhalo wu nga ti hafuhi ni mnambo, nguko hi txi pimisa ti to ku ni wukhalo wo maha mikombelo, se hi to khalahatsha hi khata kuwombawomba ni vavasikati ava va nga ti zumbile hale. 14 Se wamsikati wo kari a nga ti dhanwa ku i Lidhiya, i nga ti mxavisi wa tinguwo to dhula wa didhoropa da Tiyatira i nga ti mkhozeli wa Txizimu a txi engisela, se Jehovha a to tula mbilu yakwe kasi ku e riya kwati nzeve ka ti Paulo a nga txi ti womba. 15 Se mbimo yi ene ni va hamwayani kwakwe va nga bhabhatiswa, a to hi kombela a txi khene: “Ngako mi txi ni wona ni di thembekile ka Jehovha, ngonani mi ta zumba mtini kwangu.” Se ene a to hi kurumeta ku hi tsula.

16 Ditshiku dimwani hi txi ya ka wukhalo wo ya maha mikombelo, hi to manana ni txithumi txo kari txa dihorana txi nga ti moya, i nga ti didhimoni da kuhuta, txona txi txi beta male ya yingi ka vanyamne va txona, ngu kona ha ka mthumo wa txona wo huta. 17 Dihorana diya di txi simama di londisela Paulo kumweko ni nathu di txi kwangula di txi kha dona: “Majaha yawa sithumi sa Txizimu Nyatxitimwi ni ku va huwelela nzila ya kuhanyiswa.” 18 Dona di to simama di maha tile kudingana masiku o tala, ngu magwito Paulo a to karala e tshembereka e gela moya wule a txi khene: “Ngu ditina da Jesu Kristu na ku ruma ti to u huma kwakwe.” Se dona di to huma ka yona mbimo yile.

19 Se mbimo yi vanyamne va dihorana dile, va nga wona ti to themba ya dibhindu dawe yi ti gumile, va to nõla Paulo ni Silasi ve va ruruvisa ve va yisa habanza* ve ya va ningela ka vakoma. 20 Va to va teka ve va yisa ka vahombe va didhoropa va txi ya kha vona: “Majaha yawa ma wusa vhilinganya didhoropani muwa, vona Vajudha. 21 Vona va huwelela mikhuva ayi yi si tumelelwiko kumahwa, mwendo ku yi londeta a ku hi ku Varoma.” 22 Se txotshe txitshungu txi do khukha txi va wukela. Se vahombe va didhoropa va to va tshambula tinguwo ve rumisa ti to ve kwapelwa ngu timhika. 23 Msana ko va kwapela va to va beta jele ve gela m’woneleli wa jele ti to e va wonelela khakwati. 24 Mbimo yi va nga m’gela eto, ene a to va rinza ka txikwartwana* txi manekako mndani ka jele, e sunga mikondo yawe ka mapulango.

25 Ni hagari ka wusiku, Paulo ni Silasi va txi khongela ni kudhumisa Txizimu ngu ndando, ni ku sibotxhwa si txi engisela. 26 Ku to va ni kuzinginikela ka mafu ngu txidhukisa, se jele yi to zinginika, i si nga eto dwe otshe matimba ma to tekela kutuleka, se titxhini ati va nga ti sungilwe ngu tona ti to txhatxheka. 27 Mbimo yi muwoneleli wa jele a nga wuka a to wona to otshe matimba ma ti tulekile, se a to humisa ditxhari dakwe e lava ku ti daya, nguko a txi pimisa ti to sotshe sibotxhwa si ti thavile. 28 Kambe Paulo a to kwangula a txi khene: “U nga ti daye nguko hotshethu hiho muwa.” 29 Se a to kombela ti to ve m’tisela dilambu, se ene a to bela jele a txi tutuma ni kundendemela* e ta khizama masoni ka Paulo ni Silasi. 30 Ene a to va humisa hahanze e ta khene: “Vahombe, ni fanete kumaha txani kasi ku ni hulukiswa?” 31 Ene a to m’gela ku khene: “Kholwa ka Mkoma Jesu awe ni mwaya wako mi na hulukiswa.” 32 Ene a to m’txhumayela dipswi da Jehovha* kumweko ni va hamwayani kwakwe. 33 Ene a to va teka ka wona wusiku wule e ya va kuwulela silonda sawe, se ene ni votshe va hamwayani kwakwe va to bhabhatiswa nem kuswela. 34 Se a to va teka e ya navo mtini kwakwe e ya va lungisela sakudya, ene ni votshe va hamwayani kwakwe va to tsaka ngutu ngu ku va nga ti khotwe ka Txizimu.

35 Mbimo yi di nga txa vahombe va didhoropa va to rumela tigwardha kasi ku ya gela muwoneleli wa jele va txi kha vona: “Humisa majaha eyo jele.” 36 Muwoneleli wa jele a to gela Paulo mhaka yiya a txi khene: “Vahombe va didhoropa va rumisile ti to anu vavambidi mi humiswa jele, se humani mi tsula ngu kurula.” 37 Kambe, Paulo a to khene: “Va hi kwapete masoni ka vathu na hi sa xuxiswa, va gwita va hi beta jele hambiku hi ku Varoma. Se konku va lava ku hi humisa txihunjani! Ahim-him, va nate va ta hi teka vona vapune, va hi humisa hahanze.” 38 Tigwardha ti to tsula ti ya gela timhaka tiya vahombe va didhoropa, se vona va to thava mbimo yi va nga ziva to vona i ti Varoma. 39 Se va to va yela ve ya va kombela divalelo, se msana ko va teka ve huma navo hahanze va to va kombela ti to ve huma ka didhoropa dile. 40 Kambe mbimo yi Paulo ni Silasi va nga huma ngu jele va to tsula mtini ka Lidhiya, mbimo yi va nga wona vanathu va to va tsanisa ve gwita ve tsula.

17 Paulo ni Silasi va to pinda ngu Amfipoli ni Apoloniya ve hoka Tesalonika aha ku nga ti ni disinagoga da Vajudha. 2 Se ngu kuya ngu mtolovelo wakwe, Paulo a to bela e ya womba-womba navo, se kudingana Masabata mararu a va vhuni kupfisisa Mibhalo, 3 a txi va txhamusela ni kukombisa ngu kuthumisa Mibhalo ti to Kristu a ti fanete kuxaniseka ni kuwuswa ngu ka vakufa, a txi va gela ku khene: “Jesu awu ni wombawombako ngu ngene kwanu ngene Kristu.” 4 Se vamwani kwawe va to kholwa, ve ti pata ni Paulo kumweko ni Silasi. Ni ku txitshungu txa hombe txa Vagriki txi nga txi khozela Txizimu kumweko ni mtengo wa hombe wa vavasikati vo xonipheka ni vona va khotwe.

5 Se Vajudha va to telwa ngu mabava ve sengeleta migewu* yi nga txi tsimbila-tsimbila merkadhu, ve maha mtxawa ve wusa guje-guje didhoropani, ve dhumela mti wa Jasoni va txi xola Paulo ni Silasi kasiku va tisa hahanze ve va ningela ka txitshungu. 6 Aku va nga mbi va mana va to ruruvisa Jasoni ni vanathu vo kari ve va yisa ka vakoma va ditiko va txi ya kha vona: “Vavamna va va wusako nyima-nyima hamafuni kotshe va hokile muwa ni kona, 7 ni ku Jasoni a va amukete mtini kwakwe. Vavamna vava kha va engisi Khezari, vona va womba ti to ku ni mmwani mkoma i ku Jesu.” 8 Mbimo yi va nga pfa eto, txitshungu ni vakoma va didhoropa va to henya ngutu. 9 Msana kova Jasoni ni vamwani va di humisile multa* va to va leka ve tsula.

10 Mbimo yi di nga swa, vanathu va to rumela Paulo ni Silasi ve ya Bhereya. Mbimo yi va nga hoka va to bela disinagogani ka Vajudha. 11 Vathu va Bhereya va txi ti dhunda ngutu kugonda kupinda va Tesalonika, nguko va amukete dipswi ngu litsako la hombe ni ku va txi xolisisa kha kwati Mibhalo ditshiku ni ditshiku kasi kuwona ti to ati va nga ti pfa i ti ditshuri kani. 12 Se kutala kwawe va to kholwa, kupata ni mtalo wa vavasikati vo xonipheka ni vavamna vo kari va Vagriki. 13 Kambe mbimo yi Vajudha va Tesalonika va nga ziva ti to Paulo a txi txhumayela dipswi da Txizimu Bhereya, va to tsula kasi kuya wusa guje-guje ka txitshungu. 14 Se vanathu va to yisa Paulo txithoni ka sitimela, kambe Silasi ni Timoti va to simama kona hale. 15 Kambe ava va nga txi heleketa Paulo va to tsula nayo kala Atena, ve gwita ve tshumela. Paulo a to va leleta ti to ve ya gela Silasi ni Timoti ti to va ti fanete kuyela Paulo ngu txikuluveta.

16 Mbimo yi a nga txi va verela khe Atena, Paulo a to swireka ngutu ngu kuwona to didhoropa di ti tate ngu sifananiso. 17 Se a to khata kutxhumayela Vajudha ni vathu vamwani ava va nga txi khozela Txizimu masinagogani kwawe, kumweko ni vale a nga txi va mana mamerkadhu ditshiku ni ditshiku. 18 Kambe Vaepikorewu ni Vaestoyike i nga ti vagondi vo kari va filozofiya, va to khata kukanetisana nayo. Vamwani va txi kha vona: “Di lava kuwomba txani dijaha diya da nyamombe?” Kambe vamwani va txi kha vona: “Ti tikomba i di m’gondisi wa sizimu simwani.” Va txi womba eto nguko a txi txhumayela mahungu a manene mayelano ni Jesu ni kuwuswa ka vafi. 19 Se va to m’ñola ve m’yisa Areyopago va txi kha vona: “Hi nga hi gela, gondo yiya ya yiphya ayi u yi gondisako i gondo muni? 20 Nguko u womba-womba ngu timhaka ati hi si ti ziviko, se athu hi lava kuziva ti to ti lava kuwomba txani.” 21 Ngu ditshuri, votshe vahanyi va Atena ni votshe vawuyi ava va nga ti tiho kona hale va txi heta mbimo ayi va nga si thumi txilo va txi kontarelana ta tiphya.* 22 Se Paulo a to khukha a txi ema hagari ka Areyopago a txi khene:

“Vavamna va Atena, ti ti komba mi di vakhongeli vahombe kupinda vamwani. 23 Mbimo yi ni nga txi pinda ni wona sithombe sa wukhozeli wanu, ni woni altari ayi yi nga bhalwa ti to: ‘Ka Txizimu atxi txi si ziwiko.’ Ngu toneto, awu anu mi m’kozelako mi si m’zivi, ngene awu ni mi txhumayelako. 24 Txizimu txi txi nga maha mafu ni sotshe asi si ku ka ona, i Nyamne wa nzuma ni mafu, kha zumbi ka mathempele o mahwa ngu manza a vathu, 25 nem kha emeli kuvhunwa ngu vathu nga o pwata txilo, nguko ene apune wa va ninga wutomi, moya awu va wu hefemulako ni sotshe silo. 26 Ngu kuthumisa m’thu mmweyo, txona txi mahile vathu va totshe tixaka kasiku ve zumba hamafuni, txi va vekela tinguva ati ti nga sawulwa ngu txona ni mihingano ya ha vathu va fanelako kuhanya kona. 27 Kasiku ve lavetela Txizimu, ve mbumbutela ve txi mana ngu ditshuri, nguko kuwomba ditshuri, txona kha txi nga kule ni mmweyo ni mmweyo wathu. 28 Nguko ngu kona ha ka txona hi ni wutomi, ha tsimbila-tsimbila, hiho, nga ha va nga womba ngu kona vamwani va vabhali vanu va txi kha vona: ‘Nguko nathu hi vanana* va txona.’

29 “Ngu toneto, aku hi ku vanana* va Txizimu kha ha fanela kupimisa to Txizimu txi fana ni oru, prata mwendo dirigwi mwendo tximwani txo vatwa ngu wutxhari ni mapimo a vathu. 30 Ditshuri ti to kale, Txizimu txi si va ningi mnando nguko va txi maha eto ngu mhaka ya kusisalelwa, kambe konku txi gela vathu ka otshe matiko ti to ve tisola. 31 Nguko txi vekile ditshiku adi txi no lamula ditiko dotshe ngu kululama ngu kuthumisa m’thu awu txi nga m’sawula. Txi tsanisile mhaka yiya ka votshe vathu ngu ku m’wusa ka vakufa.”

32 Mbimo yi va nga pfa Paulo a txi womba-womba ngu kuwuswa ka vafi, vamwani va to khata ku m’seka, aniko vamwani va to kha vona: “Hi na ta ku engisela u txi womba-womba kambe ngu tiya.” 33 Se Paulo a to khukha e tsula, 34 kambe vamwani va to ti pata nayo ve kholwa. Hagari kwawe ku ti ni Dhiyoniziyo i nga ti juwiji wa tribhunali ya Areyopago ni wamsikati a nga txi dhanwa ku i Dhamarisi ni vamwani.

18 Msana keto, Paulo a to khukha Atena e tsula Korinto. 2 Koneyo a ti ya mana Mjudha wo kari a dhanwako ku i Akila a nga velekelwa Ponto, a nga ti ngadi kona kuhoka ngu Italiya ni msikati wakwe Prisila, nguko Klawudhiyo a ti vekile mthetho wa ti to votshe Vajudha va ti fanete kukhukha Roma, se Paulo a to va endela. 3 Se aku va nga ti ni mthumo wumwewo, i nga ti wo maha matenda, ene a to zumba mtini kwawe a txi thuma navo. 4 Otshe Masabata ene a txi veka dhixkursu masinagogani a txi kholwisa Vajudha ni Vagriki.

5 Mbimo yi Silasi ni Timoti va nga ta ngu Makedhoniya, Paulo a to ti ningetela ko txhumayela dipswi ngu kuhiseka, a txi txhumayela Vajudha ni ku kombisa ti to Jesu ngene Kristu. 6 Kambe, mbimo yi a nga wona ti to va txi simama va txi m’kaneta ni ku m’ruketela a to gubhuta siambalo sakwe a txi khene: “Mnoha wanu wu nave txitimwi ka misungo yanu ani kha ni nga ni mnando, kukhukhela konkuwa ni ya ka vamatiko.” 7 Se a to huma hale* e wulela mtini ka wamwamna wo kari a dhanwako ku Titiyo Justo, mkhozeli wa Txizimu, mti wakwe wu ti gwatamile ni disinagoga. 8 Kambe Krispo, mthangeli wa disinagoga a to kholwa ka Mkoma kumweko ni votshe va mwaya wakwe, kumweko ni vahanyi vavangi va Korinto, ava va nga ti pfite dipswi, va to kholwa ve tshumela ve bhabhatiswa. 9 I si nga eto basi, Mkoma a to gela Paulo ngu muwoniso ni wusiku atxi khene: “U nga thavi simama u txhumayela, u nga malale, 10 nguko ani ni ni nawe ni ku kha ngaho awu a no kumaha txilo, ni ku vathu vo tala va didhoropa diya va ni lumba.” 11 Se a to zumba kona hale dilembe ni hafu a txi va gondisa dipswi da Txizimu.

12 Mbimo yi Galiyo i nga ti govhernadhori wa Akaya, Vajudha va to langana kuwukela Paulo ve m’teka ve m’yisa tribhunali, 13 va txi ya kha vona: “Wamwamna wuwa a kuzetela vathu kukhozela Txizimu ngu nzila yi yi si yelaniko ni mlayo.” 14 Kambe mbimo yi Paulo a nga txi lava kukhata kuwombawomba, Galiyo a to gela Vajudha atxi khene: “I ti ku ku ti mahilwe wubihi mwendo kundaka mlayo ni ndi na ti ninga mkama wo mi engisela, 15 kambe a ku i ku ku kanetisana ngu mhaka ya mapswi, matina ni mlayo wanu eto ti lava anu, ani kha ni lavi kuva m’xuxisi wa timhaka to nga tiya.” 16 Se a to va hinga tribhunali. 17 Se va to nõla Sostene mthangeli wa disinagoga ve khata ku m’peketela masoni ka tribhunali, kambe Galiyo a si lavi ku ti beta ka timhaka tile.

18 Msana ko zumba masiku o tala haleya, Paulo a to satisa vanathu e bela ngalava e ya Siriya a di ni Prisila ni Akila. Mbimo a nga ti Kenkreya, a to kuyula* misisi nguko a ti mahile txixambanyo. 19 Mbimo yi a nga khukha Efesu ene a to va siya kona hale e bela disinagogani e gondisa Vajudha. 20 Hambiku va nga m’kombela ku e zumba mbimonyana, ene kha tumela. 21 Kambe a to va satisa a txi khene: “Ngako Jehovha a txi ti lava, na tshumela ni wuya kwanu.” Se a to bela ngalava e ya Efesu. 22 A to hoka Khezareya, se a to kwelela* e ya losa dibanza e gwita e sala Antiyokiya.

23 Msana ko zumba mbimo yo kari haleya, a to khukha e ya ditikoni ka Galatiya ni Frigiya a txi tsanisa votshe vagondiswa.

24 Ka mbimo yoneyo, Mjudha wo kari a dhanwako ku i Apolosi, a nga velekelwa Alexandriya a to hoka Efesu, ene i ti m’thu wo ziva kuwombawomba ni ku a txi yi ziva kwati mibhalo. 25 Ene a ti gondisilwe nzilani ka Jehovha,* ni ku a txi tura moyani. Ene a txi womba-womba ni ku gondisa ditshuri mayelano ni Jesu, kambe a txo ziva bhabhatiso ya Johani dwe. 26 Ene a to khata kuwombawomba ngu txibindi disinagogani, se mbimo yi Prisila ni Akila va nga m’pfa, va to m’dhana ngu didhawa ve ya m’gondisa tinzila ta Txizimu ngu kupelela. 27 I si nga eto basi aku a nga txi lava kutsula Akaya, vanathu va to bhalela dipasi vagondiswa ve va kombela ti to ve mu amukela kwati. Mbimo yi a nga hoka Akaya a vhuni ngutu ava va nga ti khotwe ngu konaha ka wuxinji wa hombe wa Txizimu. 28 Nguko a ti ti emisete ku va komba ti to Vajudha va si gondisi ditshuri, e va komba ngu Mibhalo ti to Jesu ngene Kristu.

19 Mbimo yi Apolosi a nga ti Korinto, Paulo a to tshawunyeta madhoropa a Aziya e relela Efesu, kona khe a ti ya mana vagondiswa vo kari. 2 Se a to va wotisa ku khene: “Ina mi amukete moya wo sawuleka mbimo yi mi nga kholwa?” Vona va to m’xamula va txi kha vona: “Athu kha hi khali kupfa to ku ni moya wo sawuleka.” 3 Ene a to va wotisa a txi khene: “Mi bhabhatisilwe ngu bhabhatiso ya mani.” Va to xamula va txi kha vona: “Ngu bhabhatiso ya Johani.” 4 Paulo a to va gela ku khene: “Bhabhatiso ya Johani i ti txikombiso txa kutisola, ene a txi gela vathu ku ve kholwa ka wule a ndi no ta msana kwakwe i ku Jesu.” 5 Msana kova va di engisile tiya va to bhabhatiswa ngu ditina da Mkoma Jesu. 6 Se mbimo yi Paulo a nga va sanzeka manza vona va to amukela moya wo sawuleka, se ve khata kuwombawomba tidimi timwani ni kuprofeta. 7 Votshe i ti kona mu ka 12 wa vavamna.

8 Kudingana mitxima yiraru, ene a txi tsula disinagogani e ya womba-womba ngu txibindi a txi veka madhixkursu a txi gondisa ngu nzila yo kholwisa mayelano ni Mfumo wa Txizimu. 9 Mbimo yi Paulo a nga wona ti to vamwani va txi lamba kukholwa* ni ku va txi womba-womba kubiha ngu Nzila masoni ka txitshungu, ene a to va leka e teka vagondiswa, se ditshiku ni ditshiku a txi veka madhixkursu ka sala ya txikolwani ka Tirano. 10 Ene a mahile toneto kudingana malembe mambidi, se Vajudha ni Vagriki ava va nga txi hanya ka provinsiya ya Aziya va pfite dipswi da Mkoma.

11 Txizimu txi txi maha mithumo yo xamalisa ngutu ngu kuthumisa Paulo, 12 aha koza hambi tipanu mwendo simaha simwani si nga txi gwesa mmidi wakwe si txi tekwa si yiswa ka valwati, se vona va txi hanyiswa ka malwati awe, ni mimoya yo biha yi txi huma kwawe. 13 Kambe Vajudha vamwani va nga txi tsimbila-tsimbila va txi hinga madhimoni va txi zama kuthumisa ditina da Mkoma Jesu ka vale va nga ti ni mimoya yo biha va txi kha vona: “Ngu ditina da Jesu, awu Paulo a txhumayelako, ni khani humani.” 14 Ku ti ni 7 wa vanana va mmweyo wa tinduna ta vaprista ta Vajudha a nga txi dhanwa ku i Skevha va nga txi maha toneto. 15 Kambe moya wule wo biha wu to va xamula wu txi kha wona: “Ani na m’ziva Jesu ni Paulo. Se anu ko, nganu va mani?” 16 Se wamwamna wule a nga ti ni moya wo biha a to va ndakela e dhamarela mmweyo ngu mmweyo wawe aha koza ve huma nyumbani mule va sa ambala txilo na va di dawisetwe. 17 Eto ti to ziwa ngu votshe Vajudha ni Vagriki ava va nga txi zumba Efesu ni ku votshe va to thava, se ditina da Mkoma Jesu di txi simama di guletwa. 18 Kutala ka va va nga ti khotwe va txi ta ve ta landula* ni kuxawutela mithumo yi va nga txi yi maha kale. 19 Mtengo wa hombe wa ava va nga txi maha masonika wu to sengeleta mabhuku awe wu ma hisa masoni ka vathu, mbimo yi va nga lava kuziva mtengo wa ona va to mana to wu txi teka 50.000 wa male ya prata. 20 Ngu toneto, dipswi da Jehovha* di txi simama di kula ni kumana mtamo.

21 Msana kova totshe tiya ti di mahekile, Paulo a to sunga to msana kova a di wile ngu Makedhoniya ni Akaya a na ya Jerusalema, a txi khene: “Ni txi wuya ngu Jerusalema ni fanete kuya Roma ni kona.” 22 Se ene a to rumela vavhuneteli vakwe vavambidi i ku Timoti ni Erasto khe Makedhoniya, kambe ene a simamile ka provinsiya ya Aziya ngu mbimonyana.

23 Ka mbimo yoneyo, ku to wuka guje-guje ya hombe ngu mhaka ya Nzila.* 24 Wamwamna wo kari a nga txi dhanwa ku i Dhemetriyo a nga txi tshula* sithempelana ngu prata so fana ni dithempele da Artemi a txi ganyisa vatshuli kulowe ava a nga txi thumisana navo. 25 Ene a to va tshanganisa kumweko ni ava va nga txi maha mthumo awu wu fanako e va gela ku khene: “Vandoni, anu ma ti ziva ti to dibhindu dathu di ta ngu ka negosiyo yiya. 26 Se ma ti wona ti to Paulo a kuzetete txitshungu txa hombe ngu gondo ya yiphya amu Efesu ni provinsiya yotshe ya Aziya. Ngu ku va gela ku khene: Sizimu so vatwa ngu vathu hi nga sa txilo. 27 I si nga eto dwe, hi nga ti to dibhindu dathu di no wa dwe, kambe ni dithempele da txizimu txa hombe txa txisikati Artemi di na wonwa i si nga da txilo ni ku txizimu atxi txi khozelwako ka yotshe provinsiya ya Aziya ni hamafuni kotshe kha txi na mbi swa txi khozelwa mwendo kudhumiswa.” 28 Mbimo yi vavamna vale va nga pfa eto va to kwangula va txi kha vona: “Artemi wa Vaefesu ngene i ku wa hombe!”

29 Se guje-guje yi to hangalaka ni dotshe didhoropa se votshe va to bela va txi tutuma ka wukhalo wa misakano va txi ruruvisela Gayo ni Aristarkusi va nga txi ta ngu Makedhoniya ava va nga txi tsimbila ni Paulo. 30 Paulo a txi lava kuwulela e ya ti kombekisa ka txitshungu, kambe vagondiswa kha va m’tumelela. 31 Hambi vathangeli vo kari va nga txi lulamisela mafexta ni misakano ava va nga txi zivana ni Paulo va to m’rumelela dipswi va txi m’kombela ti to a si beli ka wukhalo wule wa misakano. 32 Ku ti ni diguwa da hombe hagari ka txitshungu ni ku mmwani ni mmwani a txi kwangula, kambe kutala kwawe va si ti zivi to ngu kutxani va di tshanganile. 33 Se va to humisa Alexandre hagari ka txitshungu, Vajudha va to m’txhovha e ya masoni, kambe Alexandre a to gula diwoko a txi lava ku ti emela hagari ka txitshungu. 34 Kambe mbimo yi va nga tumbula ti to ene i ti Mjudha votshe va to kwangula ngu dipswi dimwedo kudingana maora mambidi va txi kha vona: “Artemi wa Vaefesu ngene i ku wa hombe!”

35 Mbimo yi adhimixtradhori wa didhoropa a nga ya malata txitshungu a to khene: “Vavamna va Efesu, i mani hamafuni awu a si ti ziviko to didhoropa da Vaefesu ngu dona muwoneleti wa dithempele da Artemi wa hombe ni txifananiso atxi txi nga wa ngu nzumani kani? 36 Aku a si ngaho awu a nga kanetako timhaka tiya, anu rengani mi si mahi txilo ngu magwava. 37 Nguko vavamna ava mi nga va tisa hawa hi nga makhamba a mathempele, nem kha va tela ku ta ruketela txizimu txathu txa txisikati. 38 Ngu toneto, ngako Dhemetriyo ni va tshuli kulowe va di ni mhaka ni m’thu wuwa, ma ho masiku aya matribhunali ma xuxako timhaka, hambi vagovhernadhori vaho, se va na tsule ve ya mangalelana. 39 Kambe, ngako mi txi lava to pinda eto, mhaka yanu yi fanete kuxuxwa ngu vathu ava va nga emiswa ngu kuya ngu mlayo. 40 Nguko hi nga maneka hi di ni mnando wo wukela wukoma ngu mhaka ya ti ti nga maheka nyamsi, nguko ku si nga ni txivangelo txo pfala txo wusa guje-guje yiya.” 41 Msana ko womba eto a to hangalasa vathu.

20 Mbimo yi guje-guje yi nga renga, Paulo a to dhana vagondiswa, se msana ko va tsanisa ni ku va satisa a to khukha e tsula Makedhoniya. 2 Ene a to tsula ka txidhoropana tximwani ni tximwani a txi tsanisa vagondiswa, se a to hoka Gresiya. 3 Koneyo a ti ya zumba mitxima yiraru, kambe aku Vajudha va nga ti mahile tipulani to m’daya, mbimo yi a nga txi lava kuenda e ya Siriya a to sunga kutshumela e ya Makedhoniya. 4 Ene a ti ni Sopateri mwanana wa Pirusi wa khe Bhereya, ni Aristarkusi, ni Sekundo wa khe Tesalonika, ni Gayo wa Dherbhe, ni Timoti, ni Tikiku ni Trofimo va provhinsiya ya Aziya. 5 Vavamna vava va to khata vona ve tsula ve ya hi verela Trowasi. 6 Msana ka ditshiku da M’buso wa mapawa o mbi tshumbelwa, hi khukhile Filipiya ngu ngalava, msana ka mtxhanu wa masiku hi to hoka Trowasi amu hi nga ya va manela kona. Se hi to zumba hale kudingana 7 wa masiku.

7 Ka ditshiku do khata da divhiki, mbimo yi hi nga ti tshanganile kasi kudya sakudya, Paulo a to khata kuwombawomba ka vale va nga ti tiho hale nguko mangwanani ka kona a ndi na khukha. Ene a to womba-womba navo kudingana mbimo yo lapha kala kuza kuva hagari ka wusiku. 8 Ku ti ni malambu a mangi ka sala ya txitimwi amu hi nga ti tshanganile kona. 9 Mfana wo kari a nga txi dhanwa ku i Eutiko a ti khalahatshile dijanelani ka sala ya wuraru,* se a to ñolwa ngu wukohe e wa mbimo yi Paulo a nga txi womba-womba. Mbimo yi va nga m’gula, se a ti fite. 10 Kambe Paulo a to txhika e ta otela txitimwi kwakwe e m’wukarela* a txi khene: “Mi nga karatekeni nguko wa hanya.” 11 Paulo a to kwelela e ya dya sakudya* e simama e bhula navo kudingana mbimo yo lapha di za di txa, msana keto a to tsula. 12 Se va to teka mfana wule a txi hanya ve tsula nayo va di tsakile ngutu.

13 Athu hi to thangela hi tsula Asosi, aha hi ndi no ya emela Paulo. Ene a ti hi gete ku hi maha toneto nguko a txi lava kutsula ngu minenge. 14 Mbimo yi a nga ta hi mana Asosi, hi mu amukete hi tsula Mitilene. 15 Mangwanani ka kona hi to hoka hafuhi ni Kiyo, ka ditshiku adi di nga londisela hi to hoka Samosi, se ngu ditshiku da wuraru hi to hoka Mileto. 16 Paulo a si lavi kuema Efesu kasiku a si heti mbimo yakwe ka provhinsiya ya Aziya, nguko a txi lava kuhoka Jerusalema ngu txikuluveta, ngako ti txi koteka ka ditshiku da M’buso wa Pentekoste.

17 Mbimo yi a nga ti Mileto, a to rumisa to kudhanwa madhota a dibanza da Efesu. 18 Ma di hokile, a to ma gela ku khene: “Anu ma ti ziva ti ni nga hanyisa tona kukhukhela ditshiku di ni nga hoka ka provhinsiya ya Aziya, 19 ni thumete Mkoma kota txithumi ngu ku ti veka hahatshi,* ni kudila mirongo ngu mhaka yo lava kudawa ngu Vajudha, 20 kambe kha na leka ku mi gela ati ti mi vhunako* mwendo kuleka ku mi gondisa masoni ka vathu ni ngu mti ni mti. 21 Kambe ni ningete wufakazi wo pelela ka Vajudha ni Vagriki wa ti to va fanete kutisola ve tshumela ve khozela Txizimu, ni kukholwa ka Mkoma wathu Jesu. 22 Se konku, ngu kukongomiswa ngu moya wo sawuleka ni ya Jerusalema, hambiku ni si ti ziviko ati ti no ni humelela, 23 a txi ni txi zivako ngu ti to ka didhoropa ni didhoropa, moya wo sawuleka wu ni gela ti to ni na betwa jele ni kuxaniswa. 24 Kambe ani kha ni woni wutomi wangu i di wa lisima, a txi ni txi lavako ngu tutuma kala magwito ni kuhetisa mthumo wu ni nga ningwa ngu Mkoma Jesu, wo ningela wufakazi wo pelela wa mahungu a manene a wuxinji wa hombe wa Txizimu.

25 “Konkuwa na ti ziva ti to kha nga ho ni wammweyo kwanu ni nga m’txhumayela Mfumo wa Txizimu a no tshumela e wona khohe yangu. 26 Se anu nyamsi mi ti fakazi ta ti to ni basile ka mnoha wa vathu votshe, 27 nguko kha na leka ku mi gela totshe ati ti tako ngu ka Txizimu.* 28 Ti woneleni mi txi wonelela ni wotshe mtxhambi, awu mi nga vekwa kota vawoneleli ngu moya wo sawuleka kasiku mi txi dyisa dibanza da Txizimu a di txi nga di xava ngu mnoha wa Mwanana wa txona. 29 Na ti ziva ti to msana kova ni di tsute, ku na humelela maxolwa* hagari kwanu aya ma no xanisa mtxhambi, 30 ni ku hagari kwanu ku na humelela vathu va no womba-womba timhaka to soholoka kasi ku ti lavela vagondiswa.

31 “Ngu toneto, wonelelani mi txi khumbula ti to kudingana malembe mararu kha na leka ku mi laya ni txi dila mirongo. 32 Se konkuwa na mi ningela manzani ka Txizimu, ka dipswi da wuxinji wa txona wa hombe, dipswi di di no mi aka ni ku mi ninga thomba hagari ka votshe ava va nga sawulwa. 33 Kha na navela prata, oru nem siambalo sanu. 34 Anu ma ti ziva ti to ni to ti thumela ngu manza angu kasi ku ti xayisa kumweko ni vathumi kulothi. 35 Ka totshe ni mi kombile ti to ngu kuthumisa tiya, mi fanete kuvhuna ava va nga mbi tsana, ni ku khumbula mapswi a Mkoma Jesu a nga khene: ‘Kuha ka ninga ngutu litsako kupinda kuhiwa.’”

36 Msana ko womba tiya, a to khizama kumweko ni votshe e maha mkombelo. 37 Votshe va to khata kudila ngutu ve wukarela* Paulo ve m’nyuta, 38 nguko va ti pandisekile, ngutu-ngutu aku a nga ti va gete ti to va na mbiswa ve wona kambe khohe yakwe. Msana keto, va to m’heleketa ka txitimela txa matini.

21 Mbimo yi hi nga hambana navo, hi to bela txitimela* hi tsula Kose, mangwanani ka kona hi to tsula Rodhe hi gwita hi tsula Patara. 2 Mbimo yi hi nga mana txitimela txa matini txo ya Fenikiya, hi to bela hi tsula nayo. 3 Msana ko wona txitondolo txa Kipra hi to pinda ngu didhawa da txona da txibhabha* hi tsula Siriya, hi ya ema Tiro aha txitimela txi nga ya txhikisa kona mithwalo. 4 Hi to lavetela vagondiswa hi za hi va mana, se hi to zumba kona hale kudingana 7 wa masiku. Kambe ngu kuthumiswa ngu moya wo sawuleka, vona va txi gela Paulo ti to a si kandi Jerusalema. 5 Ngako ma di gumile masiku athu, hi to khukha hi simama ni liendo lathu, se votshe kumweko ni vavasikati ni vanana va to hi heleketa kala kuza hi huma didhoropani. Kona khe hi to ya khizama mabambe ka linene hi khongela. 6 Se hi to satisana navo. Ngu msana, hi to ya bela txitimela txa matini hi tsula, kambe vona va to tshumela mtini.

7 Hi to khukha Tiro hi hoka Pitolomayi, hi di hokile khe, hi to losa vanathu hi zumba navo ditshiku dimwedo. 8 Mangwanani ka kona hi to khukha hi tsula Khezareya, kona khe hi to ya bela mtini ka Filipi awu wa mtxhumayeli, i nga ti mmweyo wa vavamna vale va 7, se hi to zumba nayo. 9 Ene a ti ni mune wa mahorana ma nga sa txhadha,* aya ma nga ti profeta. 10 Msana ko zumba hale masiku a manginyana, ku to hoka mprofeti awu a dhanwako ku i Agabho a txi ta ngu Judheya. 11 Ene a to hi tshuketela e ta teka libhandi la Paulo e ti sunga ngu lona minenge ni mawoko a txi khene: “Moya wo sawuleka wu womba tiya: ‘Nyamne wa libhande liya, a na sungwa ngu Vajudha khe Jerusalema, vona va na mningela manzani ka vathu va matiko.’” 12 Mbimo yi hi nga pfa eto, athu ni vale va nga ti tiho hale hi to khata kukombela Paulo ku a si kweleli e ya Jerusalema. 13 Paulo a to hi gela a txi khene: “Ngu kutxani mi txi dila mi txi zama ku ni maha ni guma mtamo* kani? Tsanisekani ti to ni ti emisete, i si nga kusungwa dwe, kambe hambi kuya fa khe Jerusalema ngu mhaka ya ditina da Mkoma Jesu.” 14 Aku hi nga mbi sikota ku m’thindekisa, hi to ema ku m’sinzisa* hi txi khathu: “Ku na maheke kudhunda ka Jehovha.”*

15 Msana ka tile, hi to ti lulamisela kuya Jerusalema. 16 Vagondiswa vo kari va Khezareya va to tsula ni nathu, ve hi heleketa mtini ka Minasoni wa Kipra, mmweyo wa vagondiswa vo khata, aha hi nga ya zumba kona. 17 Mbimo yi hi nga hoka Jerusalema, vanathu va to hi amukela va di tsakile. 18 Mangwanani ka kona, Paulo a to tsula ni nathu ka Jakobe, ni ku otshe madhota ma ti tile. 19 Ene a to va losa e gwita e va xawutela tximwetxo ngu tximwetxo txa si Txizimu txi nga maha ngu kuthumisa mthumo wakwe wo txhumayela ka vamatiko.

20 Mbimo yi va nga pfa eto, va to khata kudhumisa Txizimu, ve m’gela ku kha vona: “Mwanathu awe wa ti ziva ti to Vajudha vavangi va kholwa ni ku va wu engisa* Mlayo. 21 Kambe va pfite ti to awe u gondisa votshe Vajudha ni vathu vamatiko ku ve leka Mlayo wa Mosi, va si yi si wukwerani vanana vawe nem va si londisi sihena sawe. 22 Se hi fanete kumaha txani? Nguko vona va na ti ziva ti to u hokile. 23 Sekoko, maha ati hi no kugela: Ku ni mune wa vavamna hawa ava va nga maha txixambanyo ka Txizimu. 24 Ngu toneto, teka vavamna vava mi ya ti basisa ngu kuya ngu mlayo, ni ku va hakelela kasiku ve kuyula* misisi. Se votshe va na ti ziva ti to ati va wombako ngu ngawe hi nga ditshuri, kambe awe wa londeta Mlayo ni kutshumela u wu engisa. 25 Ka vamatiko ava va nga kholwa hi va rumete dipasi adi hi nga bhala txisungo txathu txa ti to va fanete kuvayilela asi si nga ningelwa ka sifaniso, mnoha, nyama ya sihari si si nga fa ngu kukamwa mkolo* ni wubhemba.”*

26 Se mangwanani ka kona, Paulo a to teka vavamna vale ve ya ti basisa ngu kuya ngu mlayo, ngu msana e bela dithempeleni e zivisa ti to masiku ya ku ti basisa ma ndi na gwita ditshiku, ni ku mmwani ni mmwani wawe a ti fanete kumahelwa mningelo.

27 Mbimo yi ma nga txi ya kugumani masiku ale a 7, Vajudha va khe Aziya va to m’wona dithempeleni, se va to kuzetela txitshungu ve ya m’ñola, 28 ve kwangula va txi kha vona: “Vavamna va Israyeli hi vhuneni! Ndiyo wamwamna wu a gondisako votshe ka makhalo otshe timhaka ati ti lwisanako ni va ka kwathu, Mlayo wathu ni wukhalo wuwa. I si nga eto basi, ene a tshumete e tisa Vagriki dithempeleni e tshumela e nyamisa wukhalo wuwa wo sawuleka.” 29 Nguko vona va ti m’woni didhoropani a di ni Trofimo wa khe Efesu, se va txi pimisa ti to Paulo a ti m’tekile e tsula nayo dithempeleni. 30 Ku to wuka guje-guje kotshe didhoropani, se vathu va to ta ngu kututuma ve ta ñola Paulo ve m’ruruvisa ve m’humisa hahanze ka dithempele, se ngu txikuluveta ku to vhalwa matimba. 31 Mbimo yi va nga txi zama ku m’daya, komandante wa masotxhwa a to gelwa ti to ku ti ni guje-guje ka dotshe didhoropa da Jerusalema, 32 ngu txikuluveta a to teka vathangeli va masotxhwa e relela e tsula ka txitshungu. Mbimo yi txitshungu txi nga wona komandante wa masotxhwa ni vathangeli va masotxhwa txi to ema kupeketela Paulo.

33 Se komandante a to tshuketa e m’ñola, e rumisa ti to e sungwa ngu titxhini timbidi, e gwita e m’wotisa ti to ngene mani ni ku nji txani a nga ti onhile. 34 Kambe vamwani hagari ka txitshungu va txi kwangula va txi womba tiya, aniko vamwani va txi womba tile. Se aku komandante a nga si ti pfisisi ngu mhaka ya diguwa a to rumisa ti to Paulo e tekwa e yiswa kwarteli.* 35 Kambe mbimo yi a nga hoka ka txikadha, ti lavile e gulwa ngu mhaka ya txitshungu txi nga ti lava ku m’ñola, 36 nguko ku txi londisa txitshungu txi txi kwangula txi txi: “M’dayeni!”

37 Mbimo yi va nga ti hafuhi ni kuhoka kwarteli,* Paulo a to wotisa komandante wa masotxhwa a txi khene: “Ni nga womba to kari?” Ene a to m’xamula a txi khene: “Kasi wa sikota kuwombawomba Txigriki? 38 Kasi awe khu nga Muegipta wule masiku msana a nga wukela wukoma, e teka 4.000 wa sigevenga e tsula naso txiwulani kani?” 39 Paulo a to xamula txi khene: “Ani ni Mjudha wo ta ngu Tarso, didhoropa da Kilikiya di ku ni nduma ngutu. Ngu toneto ni kombela u ni tumelela kuwombawomba ni txitshungu.” 40 Msana ko m’tumelela, Paulo a to guleta diwoko a di emile ka txikadha, a txi kombekisa ti to a lava kuwombawomba. Se txitshungu txi to zwee, Paulo a to khata kuwombawomba navo ngu lidimi la Txihebheru a txi khene:

22 “Vanathu, engisani ni txi mi txhamusela mhaka yangu.” 2 Mbimo yi va nga wona ti to a txi womba-womba navo ngu Txihebheru, vona va to malala va txi zwee, se Paulo a to khene: 3 “Ani ni Mjudha wo velekwa Tarso khe Kilikiya, kambe ni gondisilwe ka didhoropa diya ngu Gamaliyeli, ni gondisilwe kulondeta kwati Mlayo wa vatate vathu ni kuranda ngutu Txizimu kufana ni ti motshenu mi mahisako tona nyamsi. 4 Ani ni txi xanisa valondeteli va Nzila yiya kala kuza ve dawa, ni txi sunga vavamna ni vavasikati ni va ningela ti to ve betwa jele, 5 mprista wa hombe ni dotshe dibanza da madhota va nga fakaza timhaka tiya. Ngu vona va nga ni ninga mapasi ya ti to ni ya ñola vanathu va ku Dhamasku, ni ku ni txi tsula ngu txikongomelo txo va tisa kheno Jerusalema va di sungilwe kasiku ve ta tsayiswa.

6 “Kambe ni di ngadi hanzila ni mitshikari ni di hafuhi ni kuhoka Dhamasku, kunu-kunuko ni to ranganyetwa ngu kuphatima ka hombe ko ta ngu nzumani, 7 se ni to wa hahatshi, ni pfa dipswi di txi khene: ‘Sawule, Sawule, u ni xanisela txani?’ 8 Ni to xamula ni txi khani: ‘Ngawe mani Mkoma? Se ene a to ni gela ku khene: ‘Ani ngani Jesu wa Nazareta, awu awe u m’xanisako.’ 9 Vavamna va ni nga ti navo ni vona va ku woni kuphatima ka liwoningo, kambe kha va dipfa dipswi da wule a nga txi womba-womba ni nani. 10 Se ni to m’wotisa ni txi khani: ‘Ni fanete kumaha txani Mkoma?’ Se Mkoma a to ni xamula a txi khene: ‘Khukha u tsula Dhamasku, kona kheyo va na kugela totshe ti u fanelako kumaha.’ 11 Kambe aku ni nga si ti koti kuwona ngu mhaka ya kuphatima ka liwoningo, ni hokile Dhamasku ni di ñoletilwe ngu diwoko ngu vale ni nga ti navo.

12 “Se wamwamna wu a dhanwako ku i Ananiya, a nga txi thava Txizimu e tshumela e londeta Mlayo, awu votshe Vajudha va wukhalo wule va nga txi womba-womba kwati ngu ngene, 13 a to ta ni xoletela. Mbimo yi a nga ni mana a to ni gela ku khene: ‘Sawule, mwanathu, tshumela u wona!’ Se ka yona mbimo yile ni to tuleka maso ni wona. 14 A to ni gela ku khene: ‘Txizimu txa vatate vathu txi ku sawute kasiku u ziva kuranda ka txona ni kuwona awule wo lulama ni kupfa ati ti humako ngu ka txisofu txakwe, 15 nguko u na va fakazi yakwe ya ti u nga ti wona ni ku ti pfa. 16 Se u nga txi emela txani kani? Tsula u ya bhabhatiswa u kuwula sionho sako ngu kukhongela ngu ditina dakwe.’

17 “Se ni to tshumela ni ya Jerusalema, mbimo yi ni nga txi khongela dithempeleni ni to wona muwoniso, 18 se ni to wona Mkoma a txi ni gela ku khene: ‘Kuluveta u khukha Jerusalema nguko va na mbi amukela wufakazi awu u no wu ningela mayelano ni nani.’ 19 Se ni to m’gela ni txi khani: ‘Mkoma vona va ti ziva ti to ka disinagoga dimwani ni dimwani ni txi ñola ni ku kwapela avale va kholwako kwako, 20 ni mbimo yi va nga txi daya Sitefani fakazi yako, ani ni txi seketela ni tshumela ni ñola tinguwo ta vale va nga txi m’daya.’ 21 Ene a to ni gela ku khene: ‘Tsula, nguko na kurumela ka matiko a kule.’

22 Vona va to m’engisela kala hawa. Msana keto, va to kwangula va txi kha vona: “A na fuviswi hamafuni mamoyo, nguko kha nga ni fanelo yo hanya!” 23 Aku va nga txi kwangula, va to vinza tinguwo tawe hahatshi ve paletela lithulu. 24 Komandante wa masotxhwa a to rumisa ku Paulo e yiswa kwarteli* e tshumela e rumisa ti to e thethiswa a txi kwapelwa, kasi kuziva ti to ngu kutxani Vajudha va nga txi kwangula ngu mhaka yakwe. 25 Kambe msana kova va di m’sungile kasiku m’kwapela ngu txisepu, Paulo a to wotisa mthangeli wa masotxhwa awu a nga ti tiho kona hale a txi khene: “Ina mlayo wa mi tumelela ku mi kwapela Mroma a si se thethiswa kani?” 26 Mbimo yi mthangeli wa masotxhwa a nga pfa eto, a to tsula e ya gela komandante a txi khene: “U na maha txani? Nguko wamwamna wuwa Mroma.” 27 Se komandante a to tshuketela Paulo e m’gela ku khene: “Hi nga ni gela, awe u Mroma kani? Ene a to m’xamula a txi khene: “Ina.” 28 Se komandante a to m’gela ku khene: “Ni hakete male ya yingi kasiku ni va ni tifanelo to va Mroma.” Kambe Paulo a to m’gela ku khene: “Ani ni velekilwe ni di Mroma.”

29 Se vavamna ava va nga ti lava ku m’thethisa ni ku m’peka va to tekela ku m’leka, se komandante a to thava ngu ku a nga ti sungile Paulo kuveti i ti Mroma.

30 Mangwanani ka kona ngu kulava kuziva ti to ngu kutxani Vajudha va di m’mangalete, va to m’txhatxha e rumisa ti to tinduna ta vaprista ni yotshe Sanedri ve tshangana. Se ene a to tisa Paulo e ta mu emisa masoni kwawe.

23 Paulo a to wonetela yotshe Sanedri a txi khene: “Vanathu, livhalo langu la ni tsanisekisa masoni ka Txizimu ti to kha na maha txilo txo biha kala nyamsi.” 2 Mbimo yi mprista wa hombe Ananiya a nga pfa eto a to rumisa ti to ava va nga ti hafuhi nayo ve m’peka txisofu, 3 se Paulo a to m’gela ku khene: “Txizimu txi na ku peka nawe m’kanganyisiwe,* u ni lamula ngu kuya ngu Mlayo kuveti u tshumela u wu ndaka ngu kurumisa ku ni pekwa?” 4 Ava va nga ti ti ho haleya va to m’gela ku kha vona: “U ti kotisa kutxani kuruka mprista wa hombe wa Txizimu?” 5 Se Paulo a to xamula a txi khene: “Vanathu, ani ni si ti zivi ti to ene mprista wa hombe, nguko ti bhatwe ti to: ‘U nga thuke u womba-womba kubiha ngu mthangeli wa ditiko dako.’”

6 Mbimo yi Paulo a nga ziva ti to vamwani kwawe i ti Vasadhusi ni ku vamwani i ti Vafarisi, a to womba ngu dipswi do guleka ka yotshe Sanedri a txi khene: “Vanathu, ani ni Mfarisi, mwanana wa Vafarisi. Ni xuxiswa ngu mhaka ya ku ni kholwako ka themba ya kuwuswa ka vafi.” 7 Mbimo yi a nga womba eto ku to va ni dizunga hagari ka Vafarisi ni Vasadhusi, se kha va swa ve pfana. 8 Nguko Vasadhusi va kha vona kha ku nga ni kuwuswa ka vafi, nem kha ku nga ni tingilozi,* kambe Vafarisi va kholwa ka totshe timhaka eto. 9 Ngu toneto, ku to khata kuvangwa diguwa da hombe, se vamabhalani vo kari va mtxawa wa Vafarisi va to khukha ve tereka va txi kha vona: “Kha ha wona mnando ka wamwamna wuwa, ni ku ngako ngilozi yi di wombawombile nayo —.” 10 Se dizunga di to engeteleka, se komandante wa masotxhwa, ngu kuthava to va nga thuka ve phatulela Paulo, a to ruma masotxhwa me relela me ya m’honyola manzani kwawe me m’yisa kwarteli.

11 Se Mkoma a to humelela didhawani ka Paulo a txi khene: “Tsana nguko nga ha u nga ningela wufakazi wo pelela ngu ngani Jerusalema u fanete kumaha toneto kambe ni Roma.”

12 Mbimo yi di nga txa, Vajudha va to funga va txi kha vona kha va na mbi dya mwendo kusela txilo va si nzi kudaya Paulo. 13 Vavamna ava va nga ti fungile kumaha toneto va txi pinda kona mu ka 40 wa vona. 14 Vona va to yela tinduna ta vaprista ni madhota va txi ya kha vona: “Hi fungile kwa mbi dya txilo hi sinzi kudaya Paulo. 15 Ngu toneto, anu kumweko ni Sanedri mi fanete kugela komandante wa masotxhwa ti to e m’tisa hahatshi khenu, kasiku e ta masoni kwanu mi txi nga mo lava kuxolisisa kha kwati mhaka yakwe, kambe athu hi na va hi di lungile ku m’daya a si nzi kuhoka.”

16 Kambe, mwanana wa ndiya ya Paulo a to ti ziva tipulano ati va nga txi ti luka, se a to bela kwarteli* e ya gela Paulo mhaka yiya. 17 Se Paulo a to dhana mmweyo wa vathangeli wa masotxhwa e m’gela ku khene: “Teka mfana wuwa u m’yisa ka komandante nguko a ni to kari a lavako ku m’gela.” 18 Ene a to m’teka e m’yisa ka komandante wa masotxhwa e ya m’gela ku khene: “Paulo awu wa txibotxhwa a ni dhani e ni kombela ti to ni tisa mfana wuwa kwako nguko a ni to kari a lavako ku ku gela.” 19 Komandante wa masotxhwa a to m’ñola ngu diwoko e m’yisa didhawa e m’wotisa ku khene: “Nji txani u lavako ku ni gela?” 20 Ene a to xamula a txi khene: “Vajudha va langanile ku ku kombela ti to u yisa Paulo ka Sanedri mangwana, va txi nga vo lava kuziva khakwati mhaka yakwe. 21 Kambe u nga tumeli, nguko vavamna ava va pindako 40 va langanile kuriyela Paulo ni ku va fungile kwa mbi dya mwendo kusela txilo va si nzi ku m’daya. Akuwa va lungile vo verela ku u tumela txikombelo txawe.” 22 Se komandante wule wa masotxwa a to laya mfana wule ngu ku m’gela tiya: “U nga gele m’thu to u ni zivisile mhaka yiya,” se e gwita e m’leka e tsula.

23 Se a to dhana vathangeli vambidi va masotxhwa e va gela ku khene: “Lungiselani 200 wa masotxwa, 70 wa vagadhi va makavhalo ni 200 wa masotxwa ma ku ni matxhari, kasiku mi tsula Khezareya ngu ma 21 ora. 24 Lungisela kambe makavhalo kasiku Paulo e hoka a di vhikelekile ka govhernadhori Felekisi.” 25 Se a to bhala dipasi a txi khene:

26 “Bayethi wa hombe govhernadhori Felekisi! Ngani Klawudhiyo Lisiya, na ku losa! 27 Wamwamna wuwa a ñotwe ngu Vajudha ni ku kudotho va txi lava ku m’daya, kambe ni tile ngu txikuluveta ni masotxwa ni ta m’lamulela, nguko ni pfite ti to ene Mroma. 28 Se ngu kulava kuziva ti to va txi mmangalela txani ni to m’yisa ka Sanedri yawe. 29 Ni mani ti to va m’mangalete ngu timhaka ati ti yelanako ni Mlayo wawe, kambe kha maha txilo txo fanelwa ngu lifo mwendo kubetwa jele. 30 Se aku ni nga ziva makungo awe o lava ku m’daya, na m’rumela kwako wa hombe, ni tshumete ni gela ava va mmangalelako ku ve ta womba-womba masoni kwako.”

31 Se masotxhwa ma to maha ati ma nga gelwa, me teka Paulo ni wusiku me tsula nayo Antipateri. 32 Mangwanani ka kona, masotxhwa ma to leka vagadhi va makavhalo ve simama ve tsula ni Paulo, ona me tshumela me ya kwarteli. 33 Vagadhi va makavhalo va to bela Khezareya ve ningela dipasi ka govhernadhori ve tshumela ve siya Paulo. 34 Se govhernadhori a to lera dipasi e tshumela e wotisa ti to Paulo i ti wa provhinsiya yihi, se a to gelwa ti to i ti wa Kilikiya. 35 A txi khene: “Ni na ku engisela mbimo yi va no hoka ava va nga ku mangalela.” Se a to rumisa ti to e ya khotelwa nyumbani ka wukoma ka Herodha.

24 Msana ka mtxhanu wa masiku, mprista wa hombe Ananiya a to relela kumweko ni madhota ni adhivhogadhu a nga txi dhanwa ku i Tertulo, se va to ya mangalela Paulo masoni ka mkoma. 2 Mbimo yi Tertulo a nga dhanwa, a to khata kulumbeta Paulo a txi khene:

“Athu ha ti dila ngu kurula ka hombe ngu kona ha kwako wa hombe wathu, ni ku ngu mhaka ya wuzivi wako ku mahekile kutxitxa ka hombe ditikoni muwa. 3 Yotshe mbimo ni ka otshe makhalo, athu ha ku bonga ngutu ni ku ha kholwa ka mhakeyo wa hombe wathu Felekisi. 4 Kambe kasiku ni si ku tekeli mbimo ni na komisa mahungu, na kombela ngu kona ha ka wunene wako ti to u hi engisa. 5 Nguko athu hi tumbute ti to wamwamna wuwa mtungu,* nguko a wusa mazunga hagari ka votshe Vajudha ni kotshe hamafuni, ni ku ene mmweyo wa vathangeli wa wukhongeli wa Vanazareta. 6 Ni ku ene a txi lava kunyamisa dithempele se athu hi so m’nõla. 7 —— 8 Se wa hombe, mbimo yi u no m’xuxisa, u na wona ti to totshe ti hi ti wombako ngu ngene ditshuri.”

9 Se Vajudha ni vona va to va seketela, ve tsanisa ti to a ti a nga txi ti womba ditshuri. 10 Mbimo yi mkoma a nga ningela dipswi, Paulo a to khene:

“Ngu kuziva ti to awe u m’xuxisi wa ditiko diya kukhukhela kale, ni ti emisete ku ti angulela nipune. 11 Kha kupindi 12 wa masiku ni di kwelete ni ya khozela Jerusalema ngako u txi lava kukholwa ka tiya u nga wotisa. 12 Vona kha va ni mana ni txi kanetisana ni m’thu dithempeleni, mwendo kuwusa mazunga masinagogani nem wumwani wukhalo amuwa didhoropani. 13 Nem kha va na kukombisa ti to atiya va ni lumbetako tona ditshuri. 14 Kambe na tumela tiya masoni kwako, ti to ni khozela Txizimu txa vatate vangu ngu kuya ngu wukhongeli awu vona va wu dhanako ku wukhongeli wa wuphya, nguko na kholwa ka totshe ati ti nga bhalwa ka Mlayo ni ka Vaprofeti. 15 Ni ku, ni ni kuthemba masoni ka Txizimu, kuthemba aku vavamna vava ni vona va ku nako, ti to ku na va ni kuwuswa ka vakufa ava vo lulama ni va vo mbi lulama. 16 Ngu toneto, ni maha totshe ati ni ti kotako kasi ku ni simama ni va ni livhalo lo basa, ka ti to kha ni nga ni mnando masoni ka Txizimu ni ka vathu. 17 Msana ka malembe o tala ni tile Jerusalema kasi kuta maha miningelo ka ditiko dangu kumweko ni ku ningela magandelo. 18 Se mbimo yi ni nga txi maha mithumo yoneyo, vona va ni mani dithempeleni ni di basile ngu kuya ngu mlayo ni ku ni si nga hagari ka txitshungu ni txi wusa mazunga. Hambiketo, ku ti ni Vajudha vo kari va nga txi ta ngu Aziya. 19 Ni vona va ti fanete kuva ho hawa masoni kwako wa hombe kasi ku va ta ni mangalela i di ku ngu ditshuri ni onhile. 20 Ni vona vavamna vava va na wombe mnando wu va nga wu mana mbimo yi ni nga ema masoni ka Sanedri. 21 I si nga ngu mhaka ya ti ni nga womba mbimo yi ni nga ema hagari kwawe ni txi khani: ‘Ni xuxiswa ngu ku ni kholwako ka kuwuswa ka vakufa!’”

22 Ngu toneto, aku Felekisi a nga txi yi ziva kwati Nzila a to sewukisa mhaka yiya a txi khene: “Mbimo yi mthangeli wa masotxhwa Lisiya a no wuya a na ta mi xuxela timhaka tiya.” 23 Se ene a to rumisa ti to mthangeli wa masotxhwa e m’beta jele, kambe e m’ninganyana mkhululeko wo kari kasi ku maxaka akwe me ta m’vhuna ka silaveko sakwe.

24 Ku di pindile masiku o kari, Felekisi a to ta kumweko ni msikati wakwe Drusila, i nga ti Mjudha e rumisa ti to kuhumiswa Paulo, kasi ku ta mu engisa mbimo yi a nga txi womba-womba ngu likholo lakwe ka Kristu Jesu. 25 Kambe Paulo a to khata kuwombawomba ngu wululami, kuziva kutiñola ni wulamuli a wu wu tako, se Felekisi a to thava a txi khene: “Konkuwa tsula, kambe ni txi mana mkhanjo na rumisa ti to u wuya kambe.” 26 Ene a txi rinzela ti to Paulo a na m’ninga male, ngu toneto a txi rumisa ku ve ya m’teka makhambi o tala kasiku e ta bhula nayo. 27 Kambe ku di pindile malembe mambidi Felekisi a to vhaletwa ngu Porkiyo Festo, se aku Felekisi a nga txi lava kutsakelwa ngu Vajudha a to leka Paulo jele.

25 Se msana ka masiku mararu, Festo a to hoka Judheya kasi kuya teka txikhalo txa wukoma, a to kwelela a txi khukhela Khezareya e relela Jerusalema. 2 Tinduna ta vaprista kumweko ni vavamna va situlu so guleka va Vajudha va to ya mangalela Paulo, ve khata ku kombela Festo, 3 ti to e va mahela wuxinji wo tisa Paulo Jerusalema, kambe vona va ti ko m’riyela kasiku ve m’daya hanzila. 4 Festo a to womba to Paulo a ti fanete kusimama kona khe Khezareya ni ku ene apune a ndi na tshumela ngu txikuluveta. 5 Se Festo a to khene: “Ngu toneto, lekani vathangeli vanu ve relela kumweko ni nani kasiku ve ya mmangalela i di ti to ngu ditshuri a ni mnando.”

6 Msana kova a di hetile kona mu ka 8 mwendo 10 wa masiku a di navo, ene a to relela Khezareya, mangwanani ka kona a to khalahatsha tribhunali e rumisa ti to ku ti swa Paulo. 7 Mbimo yi Paulo a nga wulela, Vajudha ava va nga ti tile ngu Jerusalema va to m’randela ve m’lumbeta timhaka to tala ati va nga si ti koti kukombisa ti to i ti ditshuri.

8 Kambe Paulo a to ti angulela a txi khene: “Ani kha na maha txionho txo wukela Mlayo wa Vajudha, dithempele hambi kuwukela Khezari.” 9 Aku Festo a nga txi lava kutsakelwa ngu Vajudha a to wotisa Paulo a txi khene: “U lava kukwelela u ya Jerusalema kasiku u ya xuxiswa masoni kwangu mayelano ni timhaka tiya?” 10 Se Paulo a to khene: “Ani ni masoni ka wukoma wa Khezari, ngu hawa ni fanelako kuxuxiswa kona, kha na maha txilo txo biha ka Vajudha nga ha nanawe u ti wonako ngu kona. 11 I di ti to ngu ditshuri ni muonhi ni ku ngako ni di mahile to fanelwa ngu kudawa, kha ni kombeli ti to ni si dawi, kambe i di ti to ati va ni lumbetako va to ti sukela, kha ngaho a ku ni fanelo yo ni ningela kwawe kasi ku va tsakisa. Ni kombela kuya xuxiswa ngu Khezari.” 12 Msana kova Festo a di xolisisile* mhaka yiya ni madhota, a to gela Paulo a txi khene: “Aku u kombelako kuya xuxiswa ngu Khezari u na tsula ka Khezari.”

13 Msana ka masiku o kari, mkoma Agripa ni Bhernike va to teka liendo la wukoma ve ya Khezareya kasi kuya hoyozela Festo. 14 Aku va ndi no heta masiku o kari va di kheya, Festo a to txhamusela mhaka ya Paulo ka mkoma, a txi khene:

“Ku ni wamwamna wo kari awu Felekisi a nga m’siya a di khotetwe jele. 15 Mbimo yi ni nga ti Jerusalema, tinduna ta vaprista ni madhota a Vajudha va to mmangalela ve kombela ti to e tsayiswa. 16 Kambe ni to va xamula, to kha ti nga ha mlayoni ka Varoma kuningela m’thu a sinzi kuwonana ni ava va mmangalelako, kasiku e va ni mkhanjo wo ti wombawombela ka ti va m’lumbetako tona. 17 Ngu toneto, mbimo yi va nga hoka kha na swela, mangwanani ka kona ni to khalahatsha tribhunali ni rumisa ti to wamwamna eneyo e tiswa. 18 Mbimo yi va nga khata kuwombawomba, kha na mmana a di ni mnando ka totshe timhaka to biha ati ni nga txi pimisa ti to a ti mahile. 19 Vona vo kanetisana ngu ta wukhongeli wawe ni ngu mhaka ya wamwamna wo kari awu a dhanwako ku i Jesu, awu a nga fa, kambe Paulo a sinzisako ti to wa hanya. 20 Ngu kuva ni si ti zivi ti to ni na maha txani ka mhaka yiya, ni m’wotisile ti to ina a nga tsula Jerusalema kasi kuya xuxiswa kona mayelano ni mhaka yiya. 21 Se mbimo yi Paulo a nga kombela kusimama a di jele a txi verela txisungo txa Augusto* ni rumisile ti to e simama a di jele kala kuza ni m’rumela ka Khezari.”

22 Ngu toneto, Agripa a to gela Festo a txi khene: “Ni lava ku ta womba-womba nipune ni wamwamna wuwa.” Se Festo a to khene: “U na ta mu engisela mangwana.” 23 Mangwanani ka kona, Agripa ni Bhernike va to ta va di bombile ni kugwira, ve bela ka sala ya kuxuxiswa kumweko ni komandante wa masotxhwa ni vavamna va tinduma va didhoropani. Se Festo a to rumisa ti to kutiswa Paulo. 24 Se Festo a to khene: “Awe mkoma Agripa ni nanu motshenu, wamwamna wuwa ngu wu votshe Vajudha va nga kombela khe Jerusalema ni kona muwa ti to a sa fanela kuhanya. 25 Kambe ani ni woni ti to a sa maha txilo txo fanelwa ngu kudawa, se mbimo yi a nga kombela ku ya xuxiswa ka Augusto ni to m’rumela kona. 26 Kambe, kha ti ngaho ati ni nga bhalako mayelano ni nene, se ni m’tisile kwanu, ngutu-ngutu kwako mkoma Agripa, kasiku msana ko m’xuxisa ni na mana kubhala txo kari ngu ngene. 27 Nguko kha ni ti woni ti txi pfala kurumela txibotxhwa kambe ni si wombi mnando wa txona.”

26 Agripa a to gela Paulo a txi khene: “Konkuwa wa tumelelwa kuwombawomba.” Se Paulo a to nawuluta diwoko dakwe e khata ku womba-womba a txi khene:

2 “Na tsaka ngutu mkoma Agripa, kuema masoni kwako kasi ku ni ti xamulela ka totshe ti Vajudha va ni lumbetako tona, 3 ngutu-ngutu awe u si zivako sihena ni ku kanetisana aku ku kuho hagari ka Vajudha. Ngu toneto ni kombela u ni pasiyentarela u txi ni engisela.

4 “Ngu ditshuri Vajudha votshe va ti ziva ati ni nga hanyisa tona kukhukhela ni di nga di mfana, ka Vajudha kulothi ni Jerusalema. 5 Vona va ni ziva kukhukhela kale, va nga fakaza ti to ni txi lumba mtxawa wa Vafarisi awu wu nga txi hanya ngu mlayo wo karata ngutu wa wukhongeli wathu. 6 Konku ni lamulwa ngu mhaka ya themba ayi ni ku nayo ya txithembiso atxi Txizimu, txi nga ninga va tate vathu. 7 I ku txithembiso atxi tihunzu ta 12 txi emelako ku txi wona txi txi tatiseka, va txi thumela Txizimu ngu kuhiseka wusiku ni mitshikari, i mhaka ya txona txithembiso txiya Vajudha va ni lumbetako.

8 “Ngu kutxani anu mi txi ti wona ti si koteki ku Txizimu, txi wusa vakufa? 9 Ani nipune ni ti khotwe to ni nga maha totshe ti ni ti kotako kasi kufuvisa ditina da Jesu wa Nazareta. 10 Ngu toneto ni nga maha Jerusalema, ni betile vasawuleki vo tala jele, ani ni ti ningilwe mtamo ngu vathangeli va Vajudha kasi kumaha toneto, ni ku mbimo yi ti nga txi lava ku ve dawa ni txi seketela. 11 Ka otshe masinagoga ni va tsayisile kasi ku ve leka likholo lawe, aku ni nga ti va henyete ko pindisa mpimo, ni hokile ni madhoropani ka kule kasi ku ya va xanisa.

12 “Ngu toneto ti nga ni maha ni ya Dhamasku ngu kurumwa ni ku ningwa mtamo ngu tinduna ta vaprista. 13 Mkoma, mbimo yi ni nga ti hanzila ni mitshikari ni woni kuphatima ka hombe ko pinda ni kuwoninga ka ditambo ku txi phatima kwangu ni ka va ni nga ti navo. 14 Hotshethu hi to wa hahatshi, se di to pfala dipswi ngu Txihebheru di txi kha dona: ‘Sawule, Sawule, u ni xanisela txani? Ngako u txo simama u ni xanisa wo ti dayisa upune.’ 15 Se ni to m’wotisa ni txi khani: ‘Ngawe mani Mkoma?’ Ene a njo kuxamula a txi khene: ‘Ngani Jesu awu awe u m’xanisako. 16 Kambe khukha u txi ema, nguko ni humelete kwako kasi ku kusawula to u va txithumi txangu ni fakazi yangu ka timhaka ti u nga ti wona, ni ti u no ti wona mayelano ni nani. 17 Na ku hulukisa ka vathu vava ni ka matiko ya ni no ku rumela ka ona. 18 Kasi kutula maso awe u va humisa txidemani ve ta kuwonekelani, ni ku ve txhatxhiswa ka mtamo wa Sathani ve ta ka Txizimu, ti to ve divalelwa sionho sawe kasiku ve va ni thomba hagari ka ava va nga basiswa ngu kukholwa kwangu.’

19 “Ngu toneto mkoma Agripa, ani kha na kanyisa muwoniso, 20 kukhata ni to txhumayela Dhamasku, Jerusalema ni ka dotshe ditiko da Judheya ni ka vamatiko ti to va ti fanete kutisola ve hunduluka ve tshumelela ka Txizimu, ve maha mithumo ayi yi kombisako kutisola. 21 Ngu toneto ti nga maha Vajudha ve ni nõla dithempeleni ve zama ku ni daya. 22 Ngu toneto, aku Txizimu txi ni vhunako na simama ni nyamsi ni ningela wufakazi ka va vadotho ni va hombe, ni womba timhaka ta timweto ati vaprofeti ni Mosi va nga womba to ti na maheka. 23 To Kristu a na xaniseka ni ku aku i ku wo khata kuwuswa ka vakufa a ndi na txhumayela ni kutisa kuwonekela ka vathu vava ni ka vamatiko.”

24 Mbimo yi Paulo a nga txi txhamusela mhaka yakwe, Festo a to kwangula a txi khene: “Wa xanga mo Paulo, wuzivi wu wako wa wungi wa ku xangisa.” 25 Kambe Paulo a to xamula a txi khene: “Kha na xanga wa hombe, kambe ni womba-womba timhaka ta ditshuri ni mapimo. 26 Kuwomba ditshuri mkoma, ni womba-womba ni nawe ni di khululekile nguko wa tiziva totshe timhaka tiya. Na tsaniseka to kha ti ngaho ati u si tiziviko nguko kha ti ngaho ati ti nga mahwa kusisalani. 27 Ani na tiziva mkoma Agripa to awe wa kholwa ka vaprofeti.” 28 Kambe Agripa a to gela Paulo a txi khene: “Ngu mbimonyana ya yidotho u txi lava ku ni kholwisa ni va Mkristu.” 29 Kambe Paulo a to xamula a txi khene: “Ni kombela ka Txizimu, to konkuwa mwendo mbimo ayi yi tako i si nga awe dwe mkoma, kambe ni votshe ava va ni engisako nyamsi to ve fana ni nani, kambe va singa ni titxhini ati ti nga ni sunga.”

30 Se mkoma Agripa a to khukha kumweko ni govhernadhori ni Bhernike ni va a nga ti khalahatshile navo. 31 Mbimo yi va nga ti huma va to bhula ngu txawe va txi kha vona: “Wamwamna wuwa kha maha to biha to fanelwa ngu kudawa mwendo kukhotelwa.” 32 Se Agripa a to khene ka Festo: “I ti ku a sa kombela ku mhaka yakwe yi ya xuxwa ngu Khezari nga a di txhusilwe.”

27 Aku ku nga ti sungilwe ti to hi ti fanete kubela txitimela hi tsula Italiya, va to teka Paulo ni sibotxhwa simwani ve si ningela ka mthangeli wa masotxhwa a nga txi dhanwa ku i Juliyo wa mtxawa wa Augusto. 2 Se hi to bela txitimela txa matini txo khukhela Adramita atxi txi nga ti hafuhi ni kukhukha txi tsimbilela txithoni* ka sitimela madhawa a khe Aziya, se hi to khata liendo lathu ni Aristarkusi i nga ti wa Tesalonika ka didhoropa da Makedhoniya. 3 Mangwanani ka kona hi to hoka Sidhoni, se Juliyo a to kombisa wunene* ka Paulo e m’tumelela ku e ya pfuxela vangana vakwe ni kukhatalelwa ngu vona.

4 Hi to khukha ngu hale hi tsimbila ngu didhawa da Kipra, nguko moya wu txi peka wu ya didhawa do hambana ni mu hi nga txi ya kona. 5 Se hi to tshawunyeta linene hi pinda ngu hafuhi ni Kilikiya ni Panfiliya hi ya humela txithoni* ka Mira ku manekako Likiya. 6 Mthangeli wa masotxwa a to ya mana txitimela txi nga txi khukhela Alexandriya txi txi ya Italiya, se a to hi beta ka txona. 7 Hi to tsimbila kudotho-kudotho kudingana masiku o tala hi za hi hoka Kinidha, nguko moya wu txi hi lambela, se hi to tsimbilela hafuhi ni Kreta khe Salmona. 8 Hi to tsimbila ngu ligungusa hi za hi ya hoka ka wukhalo awu wu dhanwako ku Txithoni* ko Tshura, ku manekako hafuhi ni didhoropa da Lasiya.

9 Se ku ti pindile mbimo yo lapha, ngu toneto, ti ti ni phango kutsimbila ngu txitimela txa matini, nguko hambi ditshiku da jejuwa* se di ti pindile, se Paulo a to va gela ku khene: 10 “He manuweno, ni wona to liendo liya li na gwitisa kuva ni phango, ni ku hi na luzekelwa, i si nga ngu thundo yathu mwendo txitimela dwe, kambe ni wona wutomi wathu.” 11 Kambe mthangeli wule wa masotxwa kha nga lava kuengisa Paulo, a to engisa mtsimbitisi wa txitimela ni nyamne wa txona. 12 Aku txithoni* hale ka sitimela ti nga si koteki ku hi zumba kona ngu ku i nga ti mbimo ya wuxika, vavangi va to wona ti to i ti tshuku ku hi khukha hale hi duketa kutsula Fenikisi, i ku txitho txa Kreta atxi txi kongomisako wuphemba ni mswa-ditambo kasiku hi ya zumba kona ngu mbimo ya wuxika.*

13 Mbimo yi ku nga khata kupeka moya wa wulambwe, vona va to pimisa to ati va nga txi ti lava ti na maheka, se va to humisa rikhiso ve khata kutsimbila ngu ligungusa la Kreta. 14 Msana ka mbimonyana, ku to khata kupeka moya wa hombe awu wu dhanwako ku i Eurakiloni,* 15 awu wu nga ruruvisa txitimela ngu mtamo aha koza hi tandeka ku txi jikisa, se hi to yi leka hi londeta moya. 16 Hi to tsimbilela madhawani ka txitondolo nyana txi dhanwako ku i Kawudha, hambiku ti nga txi karata, hi zile hi sikota kundinda txingalavana txo lamulela phango hi txi beta mu ka txitimela. 17 Msana ko txi beta amu ka txitimela, hi to sunga txitimela ngu majoke, ni ku ngu kuthava ku hi nga thuka hi ya txhibela* khe Siriti, hi to phutela matanga* hi ya masoni ngu kulondeta moya. 18 Aku hi nga txi gubhutwa ngu moya, mangwanani ka kona hi to khata kuhumisela thundo ka txitimela. 19 Se ngu ditshiku da wuraru va to khata kutshotshela materiyali a txitimela ngu manza awe.

20 Aku ku nga pinda masiku o tala hi si woni ditambo mwendo tinyeleti kuveti ku txi peka moya wa hombe hi si thembi ti to hi na hanya. 21 Msana kova hi di zumbile mbimo yo lapha hi si dyi, Paulo a to khukha e ema hagari kwawe a txi khene: “He manuweno, i ti ku mi di ni engisile mi si khukhi Kreta mi sa luzekelwa ngutu nga tiya. 22 Kambe, mi nga thaveni, kha ngaho ni wammweyo kwanu a no fa, ku no luzeka txitimela dwe. 23 Nguko ngilozi ya Txizimu atxi ni txi khozelako ni ku txi thumela yi humelete kwangu hawusiku, 24 yi txi kha yona: “U nga thave Paulo nguko u fanete kuya ti kombekisa ka Khezari, i si nga eto basi, Txizimu txi na hulukisa votshe ava u ku navo txitimelani. 25 Ngu toneto, tsanani, nguko ani na kholwa ka Txizimu ti to ti na maheka nga ti txi nga ni gelisa tona. 26 Hambi keto, hi fanete kuya rinzwa ka txitondolo txo kari.”

27 Hagari ka wusiku wa ditshiku da wu 14 hi txi penga-pengiswa ka linene la Adriya, vatsimbitisi va txitimela va to khata kupimisa ti to hi ti hafuhi ni tikasa.* 28 Va to pima kutshima ka mati, ve wona ti to i ti konamu ka 36 wa mametro, se va to tsimbilanyana kuya masoni ve tshumela ve pima kambe ve wona ti to i ti kona mu ka 27 wa mametro. 29 Aku va nga txi thava ku txitimela txi nga thuka txi khwekela, va to rinza mune wa tirikhiso ati ti nga ti msana ka txitimela va txi rinzela ti to di txa. 30 Kambe mbimo yi vatsimbitisi va txitimela va nga txi zama kuhuma amu ka txitimela va to txhikisa txingalavana matini, va txi nga vo lava kutxhikisa tirikhiso ta masoni. 31 Paulo a to gela mthangeli wa masotxhwa ni masotxhwa a txi khene: “Ngako vavamna vava va si zumbi amu ka txitimela, kha mi na mbi huluka.” 32 Se masotxwa ma to wila majoke a txingalavana me txi leka txi wa.

33 Di txi ya kutxani, Paulo a to kuzeta votshe ti to ve dya, e va gela ku khene: “Nyamsi ditshiku da wu 14 mi txi ngadi mi txi rinzela, kambe kha mi se kudya txilo. 34 Ngu toneto, na mi kuzeta ti to mi dya, nguko atiya ti na vhuna anu nguko hambi msisi wumwewo wanu kha wu na mbi luzeka. 35 Msana ko womba tiya, Paulo a to teka dipawa, e bonga Txizimu masoni ka votshe, e di khema e khata kudya, 36 se votshe va to hefu! Ve khata kudya ni vona. 37 Hotshethu hi nga ti di ka txitimela hi ti 276 wa vathu. 38 Msana ko dya ve khura va to hungula thundo ayi yi nga ti ka txitimela ngu kuhungula thundo ya trigu ve yi rinza matini.

39 Mbimo yi di nga txa, vona kha va ti tumbula ti to va ti hani, hambi keto va woni lidhavi la linene kumweko ni mtxhefa, se va to maha txisungo txo ngako ti txi koteka va nga siya txitimela hale. 40 Se va to wila majoke a tirikhiso ve ti leka ti wa matini, va to tshumela ve txhatxha majoke aya ma nga ti sungile makhasiya,* ve gwimba matanga ve tsimbila ve kongoma tikasa. 41 Se txitimela txi to peka ka txitunga txa mafu atxi txi nga ti ranganyetilwe ngu mati ngu otshe madhawa, se txitimela txi to txhibela, txi khwekela ngu masoni txi si tsimbile, txi khata kuhaxulelwa ngu mavimbi ngu msana. 42 Ngu toneto, masotxhwa ma to sunga kudayela sotshe sibotxhwa kasiku si si sambeli si pfhuka.* 43 Kambe mthangeli wa masotxwa a ti ti emisete kuhulukisa Paulo se a to va tsimba kumaha toneto, ene a to rumisa ti to votshe avale va ti kotako kusambela ve ndaka ve sambela ve huma hahanze, 44 se kulondisa ava va nga ti sate, vamwani va thumisile mapulango, aniko vamwani va thumisile siphemu sa txitimela. Se votshe va to huma hahanze.

28 Msana kova hi di hulukile, hi zivile ti to txitondolo txile txi txi dhanwa ku i Malta. 2 Vathu va va nga velekwa ka txitondolo txile va to hi amukela ngu manza mambidi,* aku ku nga txi wa mati ni ku titila va to hi dhivelela mndilo. 3 Mbimo yi Paulo a nga teka tihale tile e ti veka hatxikho, ku to huma mnyoka wa vheneno ngu kupfa ku hisa wu namarela ka diwoko dakwe. 4 Mbimo yi va nga wona mnyoka wule wu nga ti namarete ka diwoko da Paulo, vahanyi va txitondolo txile va to gelana va txi kha vona: “Wamwamna wuwa ngu ditshuri m’dayi, hambi ku a nga huluka matini txizimu txa wululami* kha txa m’tumelela ti to e simama e hanya.” 5 Kambe ene a to huphuta mnyoka wule wuwa hamndiloni ni ku kha wa m’maha txilo. 6 Kambe vona va txi rinzela ti to e simbela mwendo e fa, msana ko rinzela mbimo yo lapha va to wona ti to asi humelelwi ngu txilo, se va to txitxa mawonelo awe ve khata ku kha vona, ene txizimu.

7 Hafuhinyana hale, ku ti ni tithembwe ti nga txi lumba mthangeli wa txitondolo txile a nga txi dhanwa ku i Publiyo, ene a hi amukete e tshumela e hi ninga wukhalo wo zumba kudingana masiku mararu. 8 Se ku to maheka ti to tate wa Publiyo a ti otete ngu feveri ni malwati a mndani,* se Paulo a to tsula e ya m’wona e m’mahela mikombelo e m’sanzeka manza e m’hanyisa. 9 Msana ko maheka tiya, vahanyi vamwani va txitondolo txile va nga txi lwala va to lavetela Paulo, se ni vona va to hanyiswa. 10 I si nga eto basi, vona va to hi bonga ngu maprezenti o tala, ni ku mbimo yi hi nga txi tsula vona va to hi ninga sotshe asi hi nga txi si lava.

11 Msana ka mitxima yiraru, hi to khukha ngu txitimela txa khe Alexandriya, txi nga ti ka txitondolo txile ngu mbimo ya wuxika, masoni ka txona ku ti bhatwe mapswi ya ma ku: “Vanana va Zewusi.” 12 Se hi to hoka txithoni* ka sitimela ka Sirakusa, se hi to fungala* masiku mararu kona kheya. 13 Hi to khukha ngu koneyo hi simama hi ya Regiyo, mangwanani ka kona ku to peka moya wa hombe wu txi khukhela wulambwe, se hi to tsimbila hi hoka Puteyoli ngu ditshiku da wumbidi. 14 Kona kheya hi ti ya mana vanathu, vona va to hi kombela ti to hi zumba navo kudingana 7 wa masiku se hi to gwita hi khukha hi tsula Roma. 15 Mbimo yi vanathu va nga ti ziva ti to hi hokile, va to hi hingeta merkadhu ka Apiyo ni wukhalo awu wu dhanwako ku i Mawetela a Mararu. Mbimo yi Paulo a nga va wona a to bonga Txizimu, e tsana msana. 16 Mbimo yi hi nga hoka Roma, Paulo a tumeletwe ti to e zumba ekha a txi wonelelwa ngu disotxhwa.

17 Kambe ku di pindile masiku mararu, Paulo a to dhana vavamna va situlu so guleka va va Vajudha, mbimo yi va nga tshangana ene a to va gela ku khene: “Vanathu, hambi ku ni nga mbi maha txilo txo biha ka txitshungu, mwendo kumaha txo kari txi lwisanako ni sihena sa vatate vathu ni khotetwe khe Jerusalema ni ku ni ningelwa manzani ka Varoma. 18 Msana ko ni thethisa va txi lava ku ni leka ni tsula nguko kha va mana txivangelo txo ni daya. 19 Kambe aku Vajudha va nga lamba ni sungekile kukombela kuxuxiswa ngu Khezari, kambe i si nga ngu kulava ku mangalela ditiko dangu. 20 Ngu toneto ni nga kombela ti to ni mi wona ni kuwombawomba ni nanu, ngu ku ni sungwa ngu mhaka ya themba ayi Israyeli a ku nayo.” 21 Vona va to m’gela va txi kha vona: “Athu kha ha amukela mapasi yo ta ngu Judheya mayelano ni nawe, nem kha ngaho mwanathu a khukhelako kheya a nga womba-womba kubiha ngu ngawe. 22 Ngu toneto hi ti woni i di tinene ku hi ta pfa ngu ngawe ti to u ti wonisa kutxani, nguko kuwomba ditshuri votshe vathu va womba-womba kubiha ngu wukhongeli wuwa wa wuphya.”

23 Se vona va to mana ditshiku kasiku ve ya manana nayo, va to tsula i di vangi ngutu aha a nga txi zumba kona, kukhukhela mixo kala minova ene a txi va txhamusela e ningela wufakazi wo pelela mayelano ni Mfumo wa Txizimu, e va vhuna ti to ve kholwa ka Jesu ngu kuthumisa Mlayo wa Mosi ni vaprofeti. 24 Vamwani va txi kholwa ka ti a nga txi ti womba, kambe vamwani va txi lamba ku kholwa. 25 Aku va nga ti si pfani ngu txawe va to khata kuhangalakela, se Paulo a to womba mapswi yawa a mamwewo a txi khene:

“Moya wo sawuleka wu wombile ditshuri ka vatate vathu ngu kuthumisa mprofeti Isaya wu txi kha wona: 26 ‘Tsula ka vathu vava u txi ya khawe: “Mi na engisa kambe kha mi na mbi pfisisa txilo, mi na khanu mo wona, kuve kha mi woni txilo. 27 Nguko timbilu tawe ti mahile marigwi. Vona va ti vhate tinzeve ni maso, kasiku va si woni ngu maso awe nem va si engisi ngu tinzeve tawe. Nem timbilu tawe kha ti pfisisi txilo kasiku ve ti sola ve mana kuhanyiswa.”’ 28 Zivani ti to nzila yi Txizimu txi ponisako ngu yona txi yi rumete ka vamatiko ni ku vona va na engisa.” 29* ——

30 Se ene a simamile kona hale kudingana malembe mambidi ka nyumba yi a nga ti lugarile ni ku a txi amukela ngu manza mambidi votshe ava va nga txi ya mpfuxela. 31 E va txhumayela mayelano ni Mfumo wa Txizimu e va gondisa mayelano ni Mkoma Jesu Kristu ngu txibindi a si vhalelwi* ngu txilo.