DIPASI DA PAULO DI YAKO KA VAROMA

1 Ani Paulo txithumi txa Kristu Jesu ni nga dhanwa kasi kuva mpostoli ni kusawulwa kasi kutxhumayela mahungu a manene a Txizimu, 2 aya txona txi nga ma thembisa ngu kuthumisa vaprofeti ka Mibhalo yo sawuleka, 3 mayelano ni Mwanana wa txona awu a nga ta ngu ka liveleko la Dhavhidha ngu kuya ngu ka nyama. 4 Kambe ngu mtamo wa moya wo sawuleka, ene a zivisilwe ku Mwanana wa Txizimu ngu kuwuswa ngu ka vakufa, ene Jesu Kristu Mkoma wathu. 5 Awu ngu kwakwe hi nga amukela wuxinji wa hombe ni mthumo wa wupostoli, kasiku vathu va otshe matiko ve engisa ngu mhaka ya likholo ka ditina da Jesu, 6 i ku matiko ya hambi anu mi nga dhanwa ka ona kasiku mi lumba Jesu Kristu. 7 Ka motshenu mi ku Roma, mi ku vo randeka ka Txizimu, mi nga dhanwa kasiku mi va vo sawuleka ni bhala ni txi khani:

Wuxinji wa hombe ni kurula si nave ni nanu si txi ta ngu ka Txizimu Tate wathu ni ngu ka Mkoma wathu Jesu Kristu.

8 Kukhata na bonga Txizimu txangu ngu kuthumisa Jesu Kristu ngu mhaka yanu, nguko hamafuni kotshe ma sumwa ngu kuva ni likholo. 9 Nguko Txizimu atxi ni txi khozelako ngu mbilu yangu yotshe ngu kutxhumayela mahungu a manene mayelano ni Mwanana wa txona, i fakazi yangu ya ti to mbimo yotshe na mi pata ka mikombelo yangu ni si karali, 10 ni txi kombela ti to ngako ti txi koteka, i di kuranda ka Txizimu ni ta konku ni ta mi pfuxela. 11 Nguko na ti xuva ku ta mi wona, kasi ku ni ta mi ninga ningo yo kari yo ta ngu ka Txizimu ti to mi tsaniswa, 12 mwendo ku, hi ta tsanisana ngu likholo li hi ku nalo, lanu ni langu.

13 Kambe vanathu, ni lava mi ziva ti to makhambi o tala ni xuvile ku mi pfuxela kasiku ni sikota kubhindula mihando yo txhumayela kheyo kwanu hambi ka matiko mamwani, kambe ni tsivetwe kala kuwa. 14 Ni ni txikweneti ka Vagriki ni ka vawuyi, kumweko ni ka vo gonda ni ka vo mbi gonda, 15 na ti lava ngutu ku ta txhumayela mahungu a manene kwanu mi ku Roma. 16 Nguko kha ni nga ni tingana ngu mhaka ya mahungu a manene. Ngu ditshuri, ona mtamo wa Txizimu kasi kuhanyisa votshe vale va ku ni likholo, kukhata ka M’judha kulondeta M’griki. 17 Txizimu txa kombisa kululama ka txona ka vale va ku ni ku kholwa, ni ku toneto ta tsanisa likholo lawe nga ha Mibhalo yi wombako ngu kona yi txi: “Kambe m’thu wo lulama a na hanya ngu kona ha ka likholo.”

18 Nguko kuhenya ka Txizimu ka ti kombekisa ku txi khukhela nzumani, ku txi wukela votshe vabihi ni vale vo kwa mbi ziva Txizimu, ava ngu nzila ya kwa mbi lulama va vhalelako* vathu ku ve ziva ditshuri, 19 nguko ati ti kotekako kuziwa mayelano ni Txizimu ti to junya hakubasani, nguko Txizimu txi va kombile. 20 Nguko tifanelo ta txona ati ti si wonekiko, i ku mtamo wa txona wo mbi guma ni Wuzimu wa txona, ta woneka kukhukhela txi nga vanga nzuma ni mafu, ni ku ta woneka ka silo si txi nga si vanga, se kha va nga ni nzila ya ku ti emelela ngu yona. 21 Nguko hambiku va nga txi ziva Txizimu, kha va txi dhumisa kota Txizimu hambi ku txi bonga, kambe va pimisa ta kwa mbi vhuna txilo ni ku timbilu tawe ti txidemani. 22 Hambiku va ti gelako ku va ziva, vona siphukuphuku. 23 Vona va txitxisile wudhumo awu wu lumbako Txizimu atxi txi si fiko ve wu ningela ka sithombe so fana ni m’thu wu a fako, ka sinyana, ka sihari sa mune wa minenge ni so tsimbila ngu dibindi.*

24 Ngu toneto, ngu kuya ngu kunavela ka timbilu tawe, Txizimu txi va lekile nzambwani kwawe kasiku ve nyenyezisa mimidi yawe vapune. 25 Va txitxile ditshuri da Txizimu ngu makuhu, ve khozela ni kumaha mthumo wo sawuleka ka sivangwa i si nga ka Mvangi awu a fanelwako ngu kudhumiswa kala kupinduka, Amen. 26 Ngu toneto, Txizimu txi va ningete kunavelani ka manyala, vavasikati va lekile kumaha timhaka ta mataho ngu nzila ya mtumbunuko va txi maha to hambana ni mtumbunuko, 27 vavamna ni vona va lekile kumaha ta mataho ni vavasikati, ve tura ngu wulaka wo navelana ngu txawe, vavamna va maha to yila ni vavamna kulowe, se ve mana txitsayiso atxi txi dinganako sionho sawe.

28 Aku va nga kanyisa wuzivi wa Txizimu, txona txi va lekile ka mialakanyo yawe yo biha, kasiku ve maha ati va nga sa fanela kumaha. 29 Vona va taletwe ngu kwa mbi lulama, tshofu, makolo, va taletwe ngu kumaha ta walo, vo tala ngu mabava, wudayi, mazunga, wukanganyisi, wubihi, malengo, 30 valumbeti, vathu vo nyenya Txizimu, vo mbi na txixonipho, vo ti gela, vo ti themba, vasiki va to biha, vaeyisi va vaveleki, 31 vo mbi na mapimo, va kwa mbi thembeka, vo mbi na wuthu, vo mbi na wuxinji. 32 Hambiku va wu zivako kha kwati mlayo wo lulama wa Txizimu wa ti to ava va mahako timhaka eto va fanelwa ngu kufa, kha va gwiteli ko ti maha dwe, aniko va seketela ni ava va ti mahako.

2 Ngu toneto, ti si nga ni mhaka ni ti to u mani, ngako u txi lamula vamwani khu nga ni nzila yo ti emelela, nguko u txi lamula vamwani wo ti kona upune, nguko awe u lamulako u maha timhaka tiya ta timweto. 2 Nguko ha ti ziva ti to Txizimu txi lamula ngu kuya ngu ditshuri, ni ti to txa lwisana ni ava va mahako timhaka tiya.

3 Awe u lamulako ava va mahako timhaka tiya, kuveti wa ti maha nanawe, u nga pimise ti to u na ta huluka kulamulwa ngu Txizimu. 4 Mwendo wo kanyisa kutala ka wuxinji wa Txizimu, kutimisela ka txona, ni pasiyensiya ya txona. Wo mbi ti ziva ti to Txizimu txi kombisa wuxinji wa txona ngu kulava ti to u ti sola kani? 5 Kambe ngu kona ha ka tikano tako ni kwa mbi lava kutisola, awe wo ti sengeletela txiviti txa ditshiku da kuhenya ni ditshiku da kulamulwa ngu Txizimu. 6 Nguko Txizimu txi na tshumetela mmwani ni mmwani ngu kuya ngu mithumo yakwe. 7 Txona txi na ninga wutomi wo mbi guma ni kwa mbi sina* ava va timiselako ve maha tatinene, ve lava wudhumo, ni txithavo, 8 kambe ava va wusako mazunga ve kanyisa ditshuri ve maha wubihi, va na henyelwa ngu Txizimu ve tshumela ve tsayiswa. 9 Ku na va ni xanisa ka wuhi ni wuhi a mahako wubihi kukhata ka M’judha kulondisela M’griki, 10 kambe ku na va ni wudhumo txithavo ni kurula ka votshe vale va mahako tatinene, kukhata ka M’judha kulondisela M’griki. 11 Nguko Txizimu kha txi na txisawusawu.

12 Nguko votshe vale va nga onha va si nga hahatshi ka mlayo va na fa va si nga ni mlayo, aniko votshe vale va nga onha va di hahatshi ka mlayo, va na lamulwa ngu kuya ngu mlayo. 13 Nguko hi nga vale va engisako mlayo va wonwako i di vo lulama ngu Txizimu, kambe avale va veketako mlayo ngu vona va no wonwa i di vo lulama. 14 Nguko, ngako vathu vamatiko ava va si ngako ni mlayo, va txi maha ati mlayo wu rumako tona, vathu vava, hambiku va si ngako ni mlayo, va kombisa ti to vona mlayo vapune. 15 Vona vapune va kombisa ti to va ni mlayo awu wu nga bhalwa timbiluni kwawe, nguko livhalo lawe la va fakazela ni ku mapimo awe ma va sola mwendo ku va emela. 16 Atiya ti na maheka ditshiku di Txizimu txi no lamula ati vathu va ti mahako kusisalani ngu kuthumisa Jesu Kristu ngu kuya ngu mahungu a manene aya ni ma txhumayelako.

17 Kambe ngako awe u dhanwako ku u M’judha u thembako Mlayo ni ku ti guleta ngu Txizimu, 18 u tshumela u ziva kuranda ka txona ni kupfisisa timhaka to xamalisa, nguko u gondiswa ngu kuya ngu Mlayo, 19 awe u kholwako ti to u mñoli wa lisole ka mabhofu ni liwoningo ka vale va ku txidemani, 20 mlayi wa siphukuphuku, m’gondisi wa sivanatana ni kupfisisa wuzivi ni ditshuri adi di ku ka Mlayo—. 21 Se awe u gondisako vamwani, khu ti gondisi upune kani? Awe u txhumayelako u txi: “U nga pe,” ina khu pi? 22 Awe u ku khawe: “U nga mahe wugango,” ina khu mahi wugango? Awe u nyenyako kukhozela sithombe, ina khu pi mathempeleni? 23 Awe u ti gelako ngu kuziva mlayo, ina khu dhanisi Txizimu ngu kundaka Mlayo? 24 Nguko ti bhatwe ti to: “Ditina da Txizimu da ruketelwa ngu vamatiko ngu mhaka yanu.”

25 Ngu ditshuri, kuyiswa wukwerani kova ni lisima ngako u txi engisa mlayo, kambe ngako u txi ndaka mlayo, wukwera wako kha wu vhuni txilo. 26 Sekoko, ngako awu a nga mbi yiswa wukwerani a txi maha ati Mlayo wu rumako tona, hambiku a nga mbi yiswa wukwerani, ina kha na mbi woneka nga a yisilwe wukwerani kani? 27 Kambe ngako awule a nga mbi yiswa wukwerani a txi engisa Mlayo a na lamula awe u ndakako mlayo hambiku u zivako mlayo ni ku u nga yiswa wukwerani. 28 Nguko M’judha wa ditshuri hi nga wule a ti kombako ngu hahanze dwe, ni wukwera wa ditshuri hi nga wule wu ti kombako ngu hahanze, ka nyama. 29 Kambe ku va M’judha wa ditshuri ngu ti m’thu a ku ngu tona ngu mbiluni ni ku a yisilwe wukwerani ngu mbiluni ngu moya wo sawuleka i si nga ngu kuya ngu mlayo awu wu nga bhalwa. M’thu eneyo a na guletwa ngu Txizimu, i si nga ngu vathu.

3 Ti di nga eto, ngu tihi ti M’judha a palako ngu tona vamwani, mwendo ku ngu lihi lisima la kuyiswa wukwerani kani? 2 Ti ni lisima ngu tinzila totshe, kukhata Vajudha va ningilwe mapswi o sawuleka a Txizimu. 3 Se hi na khathu txani ka Vajudha ava va nga mbi kholwa? Ina kwa mbi kholwa kwawe kumaha ti to kuthembeka ka Txizimu ku si vhuni txilo kani? 4 Ahim-him. Hambi i di ti to votshe vathu va hemba, Txizimu kha txi hembi, nga ha ti nga bhalwa ngu kona ti to: “Mapswi ako ngo lulama ni ku u na humelela kulamulwani.” 5 Se hi na khathu txani ngako kwa mbi lulama kwathu ku txi kombisa kululama ka Txizimu? Ina Txizimu txo kombisa kwa mbi lulama ngako txi txi henya? (Ni womba-womba nga ti vathu va pimisisako tona.) 6 Ahim-him. Nguko ngako i di toneto, Txizimu txi na lamulisa kutxani ditiko?

7 Se ngako makuhu angu ma txi kombekisa ditshuri da Txizimu kasi ku txi pfaliswa ni ngadi ni txi lamulelwa txani nga no va muonhi kani? 8 Nguko athu kha hi thuki hi womba hi txi: “A hi maheni to biha kasiku ti ta tatinene,” nga ha vamwani va hi lumbetako ngu kona ku ha womba.” Kulamulwa ka vathu vonevo ka va fanela.

9 Se hi na khathu txani? Ina athu Vajudha hi va tshuku kupinda vamwani? Ahim-him. Nga ha hi nga womba ngu kona, Vajudha ni Vagriki hotshethu hi vaonhi, 10 nga ha ti nga bhalwa ngu kona ti to: “Kha ngaho wo lulama, hambi ni wammweyo, 11 kha ngaho ni wammweyo wo pfisisa, kha ngaho ni wammweyo a lavako* Txizimu. 12 Nguko votshe va humile hanzila, kha ngaho a ku ni txivhuno, kha ngaho a kombisako wunene hambi ni wammweyo.” 13 “Mawombawombelo awe ngo daya,* va thumisa sisofu sawe kasi kuhemba makuhu.” “Mkanani kwawe kuhuma vheneno ya minyoka.” 14 “Nguko sisofu sawe si tate ngu kuruketela ni mapswi o thola.”* 15 “Vona va taletwe ngu wugevenga.”* 16 “Ka totshe ti va ti mahako vo moxa ni kuvanga wusiwana, 17 kha va yi zivi nzila ya kurula.” 18 “Kha va txi thavi Txizimu.”

19 Phela ha ti ziva ti to totshe ati ti ku ka Mlayo, ti kongoma vale va ku hahatshi ka Mlayo, kasiku sotshe sisofu si malatwa ni ku vathu votshe ve mana kutsayiswa ngu Txizimu ngu ku va ku ni mnando masoni ka txona. 20 Ngu toneto, kha ngaho a no dhanwa ku mbwo lulama masoni ka Txizimu ngu kona ha ko londisa mlayo, nguko mlayo wa hi komba ti to hi vaonhi.

21 Kambe nga ha Mlayo ni Vaprofeti va wombako ngu kona, kuwonekile wululami wa Txizimu i si nga ngu kona ha ka Mlayo. 22 Ava i ku vo lulama masoni ka Txizimu ngu votshe ava va kholwako ka Jesu Kristu, nguko kha di ngaho ditiko da tshuku kupinda dimwani.* 23 Nguko votshe va onhile, ve tandeka kukombisa wudhumo wo xamalisa* wa Txizimu, 24 se kota ningo,* Txizimu txi va dhani ku mbo lulama ngu ku va kombisa wuxinji wa hombe e hi khulula ngu mterulo awu wu nga dihwa ngu Jesu Kristu. 25 Txizimu txi hi ningile Kristu kota mningelo wo divalela sionho ngu kona ha ka kukholwa ka mnoha wakwe, Txizimu txi mahile toneto kasi kukombisa kululama ka txona ni kutimisela ka txona ngu kudivalela sionho si si nga mahwa kale. 26 Txi tshumela txi kombisa kululama ka txona nyamsi ngu kuwomba ti to ava va kholwako ka Jesu va lulamile.

27 Ina hi ni txivangelo txo ti guleta? Ahim-him. Ina hi fanete ku ti guleta ngu ku hi engisako Mlayo? Ahim-him. Kambe hi fanete ku ti guleta ngu kuengisa mlayo awu wu lavako likholo. 28 Nguko athu ha ti ziva ti to m’thu a wonwa a di lulamile ngu mhaka ya likholo i si nga ngu kuya ngu ti mlayo wu rumako tona 29 Mwendo ku Txizimu o va Txizimu txa Vajudha basi kani? Ina hi nga Txizimu txa vamatiko ni vona kani? Txona Txizimu txa vamatiko ni vona. 30 Kota ku Txizimu i ku tximwetxo dwe, txona txi na womba, ti to ava va nga yiswa wukwerani ni ava va nga mbi yiswa wukwerani va lulamile ngu kona ha ka likholo lawe. 31 Ina eto ti lava kuwomba ti to ho fuvisa mlayo ngu kona ha ka likholo lathu? Ahim-him. Kuhambana ni eto, ho tsanisa mlayo.

4 Ti di nga eto, hi nga khathu tate wathu Abrahamu a wuyetwe ngu txani? 2 Ngu txikombiso, i di ku Abrahamu a dhanwi ku mbwo lulama ngu kona ha ka mithumo a ndi nava ni txivangelo txo ti gela, kambe i si nga masoni ka Txizimu. 3 Kasi Mibhalo yi womba txani? Yona yi khene: “Abrahamu a kombisile likholo ka Jehovha,* se ene a dhanwi ku mbwo lulama.” 4 Ka m’thu awu a thumako m’holo wu a ningwako kha wu wonwi kota wuxinji,* kambe ngu dihelwa. 5 Kambe awule a si thumiko, hambi keto e kombisa likholo ka Wule a dhanako muonhi ku a lulamile, ene a na dhanwa ku mbwo lulama ngu kona ha ka likholo lakwe. 6 Nga ha Dhavhidha a nga womba-womba ngu litsako la m’thu awu Txizimu txi m’dhanako ku mbwo lulama i si nga ngu mhaka ya mithumo a txi khene: 7 “Avale tiphazamo tawe ti nga divalelwa ni vale sionho sawe si nga divalwa* va tsaka. 8 Awule txionho txakwe txi no mbi khumbulwa ngu Jehovha* a na tsaka.”

9 Ina litsako liya lo manwa dwe ngu va va nga yiswa wukwerani, mwendo hambi ngu va va nga mbi yiswa wukwerani? Nguko hi khathu: “Abrahamu a dhanwi ku mbwo lulama ngu kona ha ka likholo li a nga ti nalo.” 10 Ku vite ngu mbimo muni a nga dhanwa ku mbwo lulama? Ina ngu mbimo yi a nga yiswa wukwerani mwendo a si se kuyiswa wukwerani? Ene a dhanwi a si se yiswa wukwerani. 11 Ene a amukete txikombiso txa wukwera kota txitambo* txa wululami ngu kona ha ka likholo li a nga ti nalo a si se yiswa wukwerani, kasiku e va tate wa votshe vale va ku ni likholo hambi va sa ya wukwerani kufela ku ve dhanwa ku mbo lulama, 12 ti to e va tate wa liveleko la vale vo yiswa wukwerani, kambe i si nga ka vale va yiswako wukwerani dwe, aniko hambi ni vale va kombisako likholo lo fana ni li tate wathu Abrahamu a nga ti nalo a si se yiswa wukwerani.

13 Nguko Abrahamu kumweko ni liveleko* lakwe kha va thembiswa kuningwa thomba ya mafu ngu mhaka ya mlayo, kambe va dhanwi ku mbwo lulama ngu mhaka ya likholo lawe. 14 I di ti to ava va thembako mlayo ngu vona va amukelako thomba, likholo kha li vhuni txilo ni ku txithembiso txi a nga mahelwa Abrahamu txi txhipile. 15 Nguko kundaka mlayo kutisa txitsayiso,* kambe aha ku singako ni mlayo kha ku ndakwi mlayo.

16 Txithembiso hi txi mana ngu kona ha ka likholo ngu mhaka ya wuxinji wa hombe wa Txizimu kasiku lotshe liveleko la Abrahamu li mana txithembiso, i si nga vale va ku hahatshi ka Mlayo dwe, kambe ni votshe avale va kombisako likholo lo fana ni la Abrahamu i ku tate wa hotshethu. 17 (Nga ha ti nga bhalwa ngu kona ti to: “Ani ni ku mahile tate wa matiko o tala.”) Abrahamu a kombisile likholo ka Txizimu atxi txi wusako vakufa ve hanya ni kuwombawomba ngu timhaka ati ti si se kumaheka nga se ti mahekile.* 18 Hambiku ti nga txi ti komba nga kha ti na kukoteka ku e va ni vanana, kambe ngu mhaka ya likholo Abrahamu a txi themba ti to a ndi na va tate wa matiko o tala nga ha a nga ti getwe ngu kona ti to: “Vanana* vako va na va vavangi ngutu.” 19 Hambiku likholo lakwe li nga mbi hola, ene a txi pimisa ti to a si na kusikota kuveleka vanana (nguko a ti ni kona mu ka 100 wa malembe) ni ku a txi ti ziva ti to Sara se a ti pindetwe ngu mbimo ya kuveleka vanana. 20 Ngu mhaka ya txithembiso txa Txizimu ene kha tshumelela msana, kambe a vite ni mtamo ngu kona ha ka likholo, e dhumisa Txizimu, 21 a txi tsaniseka ti to ati Txizimu txi nga m’thembisa txi ni mtamo wo ti maha. 22 Ngu toneto, “a dhanwi ku mbwo lulama.”

23 Kambe mapswi aya ma ku “a dhanwi ku mbwo lulama” kha ma bhalwa ngu mhaka yakwe dwe, 24 kambe ma bhaletwe ni nathu, athu hi no dhanwa ku hi vo lulama, nguko ha kholwa ka Wule a nga wusa Mkoma wathu Jesu ngu ka vakufa. 25 Ene a ningetwe ku e dawa ngu mhaka ya sionho sathu e tshumela e wuswa kasiku hi dhanwa ku hi vo lulama.

5 Ngu toneto, aku hi nga dhanwa ku hi vo lulama ngu mhaka ya likholo, he ti dileni ngu kurula ni Txizimu ngu kona ha ka Mkoma wathu Jesu Kristu, 2 ngu kona ha ka likholo lathu ka Jesu Kristu ha sikota kutshuketela ka Txizimu hi mana kuamukela wuxinji wa txona wa hombe. He tsakeni ngu themba yi hi ku nayo yo guletwa ngu Txizimu. 3 I singa eto dwe, he tsakeni kambe ngako hi txi wonisana ni kuxaniseka, nguko kuxaniseka ku hi maha hi timisela, 4 kutimisela ku hi maha hi amukeleka ka Txizimu, kuamukeleka ku hi maha hi va ni themba, 5 themba kha yi wisi tingana, nguko Txizimu txi hi kombile ti to txa hi randa ngu ku hi ninga moya wa txona wo sawuleka.

6 Mbimo yi hi nga ti ngadi vaonhi, Kristu a fete vathu va va si engisiko Txizimu ngu mbimo ya kona. 7 Ti nga karata ku m’thu e fela mmwani wo lulama, kambe m’thu a nga xinyata e fela m’thu wamnene. 8 Hambi keto, Txizimu txi kombisile ti to txa hi randa, nguko Jesu a hi fete hi di ngadi vaonhi. 9 Aku hi nga dhanwa ku hi vo lulama ngu kona ha ka mnoha wa Jesu, ha tsaniseka ti to ngu mhaka yakwe hi na huluka ka kuhenya ka Txizimu. 10 Hambiku hi nga ti valala va Txizimu hi tshumelelanile natxo ngu kona ha ka lifo la Mwanana wa txona, se ha tsaniseka ngutu ti to hi na poniswa ngu kona ha ka lifo lakwe, nguko konku hi tshumelelanile ni Txizimu. 11 I si nga eto basi, ha tsaka ngutu ka Txizimu ngu kona ha ka Mkoma wathu Jesu Kristu, nguko ngu kona ha kwakwe ha mana kutshumelelana ni Txizimu.

12 Ngu toneto, kufana ni ku txionho txi nga bela hamafuni ngu kona ha ka m’thu wammweyo, lifo ni lona li bete ngu kona ha ka txionho, ngu toneto, lifo li tshapete votshe vathu, nguko votshe va onhile. 13 Nguko txionho se txi ti tiho wu si se ku vaho Mlayo, hambi keto, aha ku singako ni mlayo kha ngaho a ningwako mnando wa ku va a di onhile. 14 Hambiketo, lifo li fumile kukhukhela ka Adhamu kala ka Mosi, hambi ni ka vale va nga sa maha txionho txo fana ni txi txi nga ti mahilwe ngu Adhamu, awu i ku txifananiso txa wule a ndi no ta.

15 Kambe ningo ya Txizimu kha yi fani ni txionho, nguko vathu vo tala va fite ngu mhaka ya txionho txa m’thu wammweyo, kambe wuxinji wa hombe ni ningo ya Txizimu ayi yi tako ngu kona ha ka wuxinji wa m’thu wammweyo i ku Jesu Kristu nza hombe ngutu. Ngu kona ha ka ningo yoneyo, Txizimu txa ninga makatekwa vathu vo tala. 16 Ningo ya Txizimu yi tshumela yi hambana kambe ni txionho txa m’thu wammweyo ngu nzila yiya, txionho txa m’thu wammweyo txi maha ti to votshe vathu ve va ni mnando, kambe ningo yiya yi maha ti to votshe vaonhi ve va vo lulama. 17 Aku lifo li nga fuma ngu kona ha ka txionho txa m’thu wammweyo, ha tsaniseka ngutu ti to hi na amukela wuxinji wa hombe ngutu ni ningo yo dhanwa ku hi vo lulama ngu kona ha ka m’thu wammweyo i ku Jesu Kristu.

18 Kufana ni ku txionho txa m’thu wammweyo txi nga maha ti to votshe vathu ve va ni mnando, ngu toneto, tximaho tximwetxo txa wululami txi na maha ti to votshe vathu ve dhanwa ku mbo lulama kasiku ve mana wutomi. 19 Kufana ni kwa mbi engisa ka m’thu wammweyo ku nga maha ti to vathu vo tala ve va sionhi, ngu toneto ngu kona ha ka kuengisa ka m’thu wammweyo ku na maha ti to vathu vo tala ve va vo lulama. 20 Mlayo wu veho kasi kukombisa ti to vathu va onhile ngutu, kambe aha txionho txi andako, wuxinji wa hombe ni wona wa anda ngu kupindisa. 21 Ngu txikongomelo muni? Kasiku kufana ni ku txionho txi nga fuma kumweko ni lifo, wuxinji wa hombe ni wona wu fuma ngu kona ha ko lulama aku ku yisako ka wutomi wo mbi guma ngu kona ha ka Jesu Kristu Mkoma wathu.

6 Se hi na khathu txani? Ina hi na simama ka txionho, kasiku wuxinji wa hombe wu anda? 2 Ahim-him! Aku hi si fumwiko ngu txionho, ti nga kotekisa kutxani ku hi simama hi hanya ka txona? 3 Ina kha mi ti zivi to hotshethu hi nga bhabhatiswa ngu ka Kristu Jesu hi bhabhatisilwe ka lifo lakwe? 4 Ngu toneto, mbimo yi hi nga bhabhatiswa ka lifo lakwe, hi to kelelwa kumweko nayo, kasiku aku Kristu a nga wuswa ngu ka vakufa ngu mtamo wa wudhumo wa Tate wakwe, nathu hi hanya wutomi wa wuphya. 5 Aku hi nga tshanganiswa nayo ngu lifo lo fana ni lakwe, hi na tshumela hi tshanganiswa nayo ngu kuwuswa ko fana ni kwakwe. 6 Nguko ha ti ziva ti to wuthu wathu wa kale wu gogotetwe nayo haphandeni, kasiku mmidi wathu awu ku ni txionho wu guma mtamo ti to hi si tshumeli hi va tikhumbi ta txionho. 7 Nguko awu a nga fa a khulutwe* ka txionho txakwe.

8 I si nga eto basi, ngako hi txi fa ka Kristu ha kholwa ti to hi na ta hanya kumweko nayo. 9 Nguko ha tiziva ti to, aku Kristu a nga wuswa ngu ka vakufa, kha na mbi fa kambe ni ku lifo kha li nga ni mtamo kwakwe. 10 Nguko a fite kumweko dwe e fela txionho ni ku kha na mbi tshumela e fa, kambe wutomi awu a hanyako konkuwa a wu hanyela kumaha kuranda ka Txizimu. 11 Ti woneni mi di fite ti txi ta ka txionho, kambe mi hanyela Txizimu ngu kona ha ka Jesu Kristu.

12 Ngu toneto, mi nga tumeleni ku txionho txi simama txi fuma mimidi yanu txi mi maha mi engisa kunavela ka yona. 13 Mi nga ningeleni mimidi yanu ka txionho ngu kumaha to biha, kambe ti ningeteleni ka Txizimu kufana ni vathu ava va nga wuswa ngu ka vakufa, aniko ningelani mimidi* yanu ka Txizimu kasiku mi maha to lulama. 14 Txionho kha txa fanela ku mi fuma, nguko anu kha mi nga hahatshi ka mlayo, aniko mi hahatshi ka wuxinji wa hombe wa Txizimu.

15 Se hi na khathu txani? Hi na maha txionho ngu ku hi si ngako hahatshi ka mlayo, kambe hi ku hahatshi ka wuxinji wa hombe wa Txizimu? Ahim-him! 16 Mo mbi ti ziva to ngako mi txi ti ningetela ko thumela m’thu, ni ku mu engisa mi ti maha tikhumbi ta wu mi mu engisako kani? Ngako mi di tikhumbi ta txionho mi na fa, aniko mi di tikhumbi ta Txizimu mi tshumela mi txi engisa mi na va vo lulama. 17 Kambe txi na bongwe Txizimu, nguko hambiku mi nga ti tikhumbi ta txionho, mi sikoti kuengisa ngu mbilu yanu yotshe gondo yi mi nga ningwa. 18 Kambe aku mi nga khululwa ka txionho mi ti mahile tikhumbi ta wululami. 19 Ni womba-womba ngu mapswi aya vathu va ma zivako ngu mhaka yo mbi pelela kwanu, nguko kale mi txi ningela siro sanu kota tikhumbi ta mahanyelo a nzambwa ni o biha, ati ti si yelaniko ni kuranda ka Txizimu. Kambe konkuwa, ningelani siro sanu kota tikhumbi ta wululami, kasiku mithumo yanu yi amukeleka ka Txizimu. 20 Nguko mbimo yi mu nga di tikhumbi ta txionho mi ti txhatxhekile kumaha ati i singako to lulama.

21 Ngu yihi wuyelo* ya mithumo yi mi nga txi yi maha kale kani? Ngu yi konku mi thelekako tingana ngu yona, nguko magwito ya kona lifo. 22 Kambe aku konku mi nga khululwa ka txionho, mahani ati i ku to sawuleka kota tikhumbi ta Txizimu, nguko wuyelo ya kona i na va wutomi wo mbi guma. 23 Nguko txhatxhazelo ya txionho lifo, kambe ningo yi Txizimu txi hi ningako wutomi wo mbi guma ngu konaha ka Kristu Jesu, Mkoma wathu.

7 Ina kha mi ti zivi vanathu, (ni womba-womba ni nanu mi wu zivako mlayo) ti to Mlayo wu fuma ka m’thu ngako a txi ngadi a txi hanya? 2 Ngu txikombiso, wamsikati wu a nga txhadha a sungilwe ngu mlayo ka mwamna wakwe a txi ngadi a txi hanya, kambe ngako mwamna wakwe a txi fa, a khululekile ka mlayo wa mwamna wakwe. 3 Se ngako a txi txhadha ni wamwamna mmwani kuveti mwamna wakwe a ngadi a txi hanya, ene o maha wugango. Kambe ngako mwamna wakwe a txi fa, ene a khululekile ka mlayo wa mwamna wakwe, se ngako a txi txhadha ni wamwamna mmwani, ene kha njo maha wugango.

4 Ngu ha kufanako vanathu, mmidi wa Kristu wu hi khulute ka Mlayo wa Mosi, ti to hi lumba mmwani, awu a nga wuswa ngu ka vakufa kasiku hi thumela Txizimu.* 5 Nguko mbimo yi hi nga txi hanya ngu kuya ngu txionho, Mlayo wu hi mahile hi pfisisa ti to kunavela kwathu ka nyama ku hi maha hi onha ni ku txionho txonetxo txi ti hi yisa kufani. 6 Kambe, se hi khulutwe ka Mlayo nguko kha wu ngadi wu hi fuma, se hi fanete ku hi va tikhumbi ta Txizimu nguko hi kongomiswa ngu moya wa txona wo sawuleka i si nga ngu mlayo awu wu nga bhalwa.

7 Se hi na khathu txani? Ina Mlayo txionho? Ahim-him. Ani ni sa nga za ni di txi zivile txionho i si nga ngu mhaka ya Mlayo. Ngu txikombiso, ni sa nga za ni di ti zivile ti to ti bihile kunavela sa vane, i si nga ngu ku Mlayo wu wombako tiya: “U nga navele sa vane.” 8 Kambe ngu mhaka ya mlayo txionho txi ni wusete totshe tixaka ta makolo, nguko i si nga ngu mhaka ya mlayo, txionho kha txi nga ni mtamo.* 9 Phela mbimo yi ni nga si londisi mlayo, ni txi hanya. Hambiketo, mbimo yi ku nga hoka mlayo, txionho txi tshumete txi hanya, kambe ani ni fa. 10 Ni woni ti to mlayo wu wu nga ti fanete ku ni yisa ka wutomi wu ni yisa kufani. 11 Se txionho txi thumisile mlayo kasiku txi ni kanganyisa ni ku ni daya. 12 Mlayo wupune wu sawulekile, ni ku ati wu ti wombako ti lulamile ni ku ndinene.

13 Ina eto ti lava kuwomba ti to tatinene ngu tona ti nga ni tisela lifo? Ahim-him. Txionho ngu txona txi nga ni tisela lifo. Mlayo mbwa wunene ni ku wu vekile hakubasani ti to txionho ngu txona txi nga ni tisela lifo, mlayo wu kombisile hakubasani ti to ngu ditshuri txionho txi bihile. 14 Nguko ha ti ziva ti to Mlayo wuta ngu ka Txizimu, kambe ani ni m’thu wa nyama ni nga xaviswa ka txionho kota khumbi. 15 Nguko kha ni ti pfisisi ti to ngu kutxani ni txi maha ati ni mahako. Hahanze ko maha ati ni ti navelako ni maha ati ni ti nyenyako. 16 Hambiketo, ngako ni txi maha ati ni si ti naveliko, na tumelelana ni ti to Mlayo mbwa wunene. 17 Kambe hi nga ngadi ani ni mahako timhaka tiya to biha, aniko txionho atxi ni ku natxo. 18 Na ti ziva ti to kha ku na tatinene kwangu, i ku tiya, ka mmidi wangu wa txionho. Hambiku ni ku ni minavelo yo maha ati i ku tatinene, kha ni sikoti ku ti maha. 19 Nguko kha ni mahi tatinene ati ni ti lavako kumaha, kambe ni maha to biha ati ni si ti laviko ku ti maha. 20 Se ngako ni txi maha timhaka ati ni si ti laviko, hi nga ani nipune ni ti mahako, kambe txionho atxi ni ku natxo.

21 Ni mani ditshuri* diya kwangu: “Mbimo yi ni lavako kumaha ati i ku tatinene, no maha ati i ku to biha.” 22 Nguko ani na tsaniseka ti to na wu dhunda mlayo wa Txizimu ngu mbilu yangu yotshe, 23 kambe ni wona ti to mmidini kwangu ni ni wumwani mlayo awu wu lwako ni mipimiso yangu, awu wu ni mahako ni va khumbi ya mlayo wa txionho awu wu ku mmidini* kwangu. 24 Mihumbo yangu! I mani a no ni khulula ka mmidi wu wu ni yisako kufani kani? 25 Ni bonga Txizimu txi nga ni hanyisa ngu kona ka Jesu Kristu Mkoma wathu. Mapimoni kwangu ni khumbi ya mlayo wa Txizimu, kambe ka nyama ni khumbi ya mlayo wa txionho.

8 Ngu toneto ka vale va ku kumweko ni Kristu Jesu kha va bhalwi mnando. 2 Nguko mlayo wa moya wo sawuleka awu wu ningako wutomi ngu kona ha ka Kristu Jesu, wu ku khulute ka mlayo wa txionho ni lifo. 3 Mlayo wu si nga ni mtamo wo khulula vathu nguko kha va hetiseka ni ku sionhi, se Txizimu txi ti kotile kukhulula vathu ngu kurumela mwanana wa txona, a di ni mmidi wo fana ni wa vathu kasi kuta fuvisa txionho, ngu toneto ene a tsayisile txionho atxi txi nga ti ka vathu,* 4 kasiku ati Mlayo wu rumako tona ti tatiseka kwathu hi si tsimbiliko ngu kunavela ka nyama, kambe hi tsimbilako ngu moya wo sawuleka. 5 Nguko ava va hanyako ngu kunavela ka nyama, va veka mapimo ka timhaka ta nyama, kambe ava va hanyako ngu moya wo sawuleka va veka mapimo ka timhaka ta moya. 6 Nguko kuveka mapimo ka timhaka ta nyama ti womba lifo, kambe kuveka mapimo ka timhaka ta moya ti womba wutomi ni kurula. 7 Ava va vekako mapimo ka timhaka ta nyama va timaha valala va Txizimu, nguko nyama kha yi engisi mlayo wa Txizimu ni ku txima* ti di kotekile toneto. 8 Nguko ava va rumwako ngu kunavela ka nyama kha va na kutsakisa Txizimu.

9 Ngako moya wa Txizimu wu txi zumba kwanu ngu ditshuri kha mi na mbi rumwa ngu kunavela ka nyama, kambe mi na rumwa ngu moya wo sawuleka, aniko ngako m’thu asi nga ni moya wa Kristu m’thu eneyo kha lumbi ene. 10 Ngako Kristu a di kumweko ni nanu, hambi mimidi yanu yi di fite ngu kona ha ka txionho, moya wo sawuleka wu mi ninga wutomi ngu mhaka ya wululami. 11 Se ngako mtamo* wa Txizimu atxi txi nga wusa Jesu ngu ka vakufa wu txi zumba kwanu, Txizimu atxi txi nga wusa Jesu ngu ka vakufa txi na tshumela txi wusa mimidi yanu ayi yi fako ngu kuthumisa moya wa txona awu wu ku kwanu.

12 Ngu toneto vanathu, kha ha fanela kulondisa minavelo ya nyama. 13 Ngako mi txi hanya ngu kuya ngu minavelo ya nyama mi na fa, kambe ngako mi txi tumelela moya wo sawuleka wu mi vhuna kudaya minavelo ya nyama mi na hanya. 14 Nguko vanana va Txizimu ngu ditshuri ngu votshe ava va kongomiswako ngu moya wa Txizimu. 15 Nguko anu kha ma amukela moya wa wukhumbi awu wu mi mahako mi thava, kambe mi amukete moya awu wu mi mahako mi va vanana va Txizimu. Ngu wona moya wu hi mahako hi kwangula hi txi: “Abha, Tata!” 16 Moya wa Txizimu wa hi fakazela wupune ti to hi vanana va txona. 17 Ngako hi di vanana va Txizimu nanathu hi sidya-thomba ya Txizimu a yi txi nga ninga Kristu, kambe hi fanete kukhata hi xaniseka kufana ni Kristu kasiku hi guletwa kumweko nayo.

18 Ngu toneto, ni wona kuxaniseka ka mbimo yiya i si nga ka txilo ku txi dinganiswa ni wudhumo awu hi no wu amukela. 19 Nguko sotshe sivangwa si rinzete ngu maso o bhilivila kuwonekiswa ka vanana va Txizimu. 20 Nguko hi nga ti to sivangwa si to ti lava kuhanya wutomi wo mbi na themba, kambe Txizimu txi to tumelela, hambi keto Txizimu txi hi ningile themba. 21 I ku ti to sotshe sivangwa ni sona si na khululwa ka wukhumbi si mana mkhululeko wo xamatisa wa vanana va Txizimu. 22 Nguko ha tiziva ti to sotshe sivangwa sa keta ni kuxaniseka kala nyamsi. 23 I si nga eto dwe, nanathu hipune hi ku ni mihando yo khata, i ku moya wo sawuleka ha keta mbiluni kwathu, na hi txi rinzela ngu maso o bhilivila kumahwa vanana va Txizimu hi khululwa ka mimidi yathu ngu kona ha ka mterulo. 24 Nguko hi ponisilwe ngu mhaka ya themba yoneyo, kambe themba yi yi wonekako hi nga themba. Ina m’thu a nga veka themba ka asi a si wonako? 25 Kambe ngako hi txi rinzela asi hi si si woniko, hi simama hi si rinzela ngu maso o bhilivila hi txi timisela.

26 Ngu ha kufanako, moya wo sawuleka ni wona wa hi vhuna mbimo yi hi rerekako. Nguko txikarato ngu txi txo mbimo yimwani kha hi ti zivi to hi na kombela txani, kambe mbimo yi hi kumako hi txi pwata to womba moya wo sawuleka wa hi kombelela. 27 Kambe awule a xolisisako timbilu wa ti ziva ati moya wu ti lavako, nguko wa kombelela vasawuleki ngu kuya ngu kuranda ka Txizimu.

28 Nguko athu ha ti ziva ti to mithumo ya Txizimu ya tsimbitisana kasi kumahela ta tinene* avale va txi randako, i ku vale txi nga va dhana ngu kuya ngu txikongomelo txa txona. 29 Nguko avale Txizimu txi nga va sawula kukhata, txi tshumete txi va sikela ti to ve fana ni mwanana wa txona, kasiku e va matiwula hagari ka vanawe. 30 Se ene, a to dhana ava a nga va sawula ni ku ava a nga va dhana a tshumete e va dhana ku mbo lulama. Ngu magwito ava a nga va dhana ku mbo lulama ngu vona a nga tshumela e va guleta.

31 Se hi na khathu txani ka mhaka yiya? Ngako Txizimu txi di ni nathu, i mani a no hi wukela? 32 Aku txi nga mbi hi tona hambi Mwanana wa txona, kambe txi m’ningete ngu mhaka yathu hotshethu ina kha txi na mbi hi ninga silo simwani kuengetela ka ku txi nga hi ninga mwanana wa txona kani? 33 I mani a no bhala mnando vasawuleki va Txizimu kani? Nguko Txizimu ngu txona txi nga va dhana ku mbo lulama. 34 Se i mani a no hi abanisa kani? Kha ngaho a no hi abanisa, Kristu Jesu ene wu a nga fa e tshumela e wuswa ngu ka vakufa a txineneni ka Txizimu e tshumela e hi kombelela.

35 I mani a no hi hambanisa ni lirando la Kristu kani? Ina i sikarato, ngu karateka, ngu xaniswa, tinzala, wusakato, tiphango, mwendo ditxhari kani? 36 Nga ha ti nga bhalwa ngu kona ti to: “Ngu mhaka yako ditshiku ni ditshiku ha dawa hi fana ni tinvuta ati ti nga vekiselwa kuya dawa.” 37 Kuhambana ni eto, ka totshe tiya ha xula, ngu kona ha ka wule a nga hi randa. 38 Nguko na tsaniseka ti to hambi lifo, hambi wutomi, hambi tingilozi, hambi mifumo, hambi silo sa konkuwa, hambi silo si tako, hambi mitamo, 39 hambi kudemba, hambi kutshima mwendo txivangwa txihi ni txihi, kha si na kusikota ku hi hambanisa lirandoni la Txizimu, ali li ku ka Jesu Kristu Mkoma wathu.

9 Ni womba ngu ka Kristu, kha ni hembi nguko hambi livhalo langu la ni fakazela li txi kongomiswa ngu moya wo sawuleka. 2 Ti to na pfa kukarateka ka hombe ni kupandiseka mbiluni kwangu. 3 I ti ku to koteka ni ndi na tumela kuruketelwa ni kuhambaniswa ni Kristu, kasi kuvhuna va lixaka la ka kwathu ava i ku vamwevo ni nani ngu kuvelekwa, 4 i ku va Israyeli nguko vona va sawutwe ngu Txizimu ti to ve va vanana va txona ve amukela wudhumo, txitumelelano, Mlayo, mthumo wo sawuleka ni sithembiso. 5 Ava i ku vatukulo va vakokwani vathu aha Kristu nene a nga velekelwa kona, txi na dhumiswe Txizimu a txi i ku txa hombe ka sotshe kala kupinduka. Amen.

6 Kambe hi nga ti to dipswi da Txizimu di to mbi tatiseka, nguko hi nga votshe vale va tako ka liveleko la Israyeli i ku va Israyeli va ditshuri. 7 Ni ku hi nga votshe va humako ngu ka Abrahamu i ku vanana vakwe va ditshuri, nguko ti bhatwe ti to: “Vanana va Izaki ngu vona va no dhanwa ku liveleko* lako.” 8 Ti lavako ku womba tiya: Vanana ava va nga velekwa ngu Abrahamu hi nga vona vanana va ditshuri va Txizimu, kambe vanana ava va nga velekwa ngu kuya ngu txithembiso txa Txizimu ngu vona i ku liveleko* la ditshuri. 9 Nguko Txizimu txi thembisile tiya: “Ni na wuya kwako dilembe di di tako ngu yona mbimo yiya, se Sara a na va a di ni mwanana wa mfana.” 10 Eto ti mahekile, mbimo yi Rabheka a nga va ni mimba* ya mahasa ya wamwamna mmweyo, i ku tate wathu Izaki. 11 Nguko na vanana va sinzi kuvelekwa ni ku va si zivi txilo txa txinene mwendo txo biha, Txizimu txi wombile ti to txi na sawula mani nguko txona txi sawula awu txi m’lavako, kha txi sawuli ngu kuwona mithumo ya m’thu. 12 Rabheka a getwe ku khene: “Awu wa mkoma a na va txithumi txa mnanda wakwe.” 13 Nga ha mibhalo yi wombako ngu kona yi txi: “Ni randile Jakobe ni venga Esawu.”

14 Se ina hi lava kuwomba ti to Txizimu kha txa lulama? Ahim-him. 15 Nguko Txizimu txi gete Mosi txi txi kha txona: “Ni na pfela wusiwana awu ni lavako ku m’pfela wusiwana, ni ku na mahela wumbilu awu ni lavako ku mmahela wumbilu.” 16 Nguko eto kha ti ti ngu kunavela ka m’thu mwendo ku ti karata kwakwe, kambe ti ta ngu ka Txizimu atxi txi ku ni mpfela-wusiwana. 17 Ngu toneto Mibhalo yi wombako mayelano ni Faro yi txi: “Ni ku lekile u txi hanya kasi kukombisa mtamo wangu ngu kona ha kwako, ni ku ditina dangu di pfaliswa hamafuni kotshe. 18 Ngu toneto, Txizimu txi pfela wusiwana awule txi lavako ku m’pfela wusiwana, kambe txi leka mmwani ni mmwani awu a ti bangisako msungo.

19 Se u nga khawe kwangu: “Ngu kutxani Txizimu txi txi ninga mnando vathu? Ina waho wu a nga kanyisako kuranda ka txona?” 20 Kambe u mani awe ti to u nga kanetisana ni Txizimu kani? Ina txiya txo mahwa ngu dibumba txi nga gela awule a nga txi wumba txi txi kha txona: “Ngu kutxani u di ni mahisile tiya kani?” 21 Ina mwumbi kha nga ni mtamo wo maha ngu dona dibumba* dile da dimwedo txiya txi txi no thumiselwa ka timhaka ta lisima ni tximwani txi thumiselwa ka timhaka to mbi na lisima kani? 22 Ti ngu kufana ni Txizimu, txona txi kombisile kuhenya ni mtamo wa txona mbimo yi txi nga tumelela ngu kutimisela ka hombe, ka vale va nga txi henyisa ni ka vale va nga ti fanete kuloviswa. 23 Txi mahile eto kasi kukombisa wudhumo wa txona wa hombe ka vale a va kombako mpfela-wusiwana, ava a nga va lulamisela i di nga di kale kasi ku va ninga wudhumo. 24 I ku athu hi nga sawulwa ngu Txizimu i si nga ka Vajudha dwe, kambe ni ka matiko mamwani. 25 Ngu toneto Txizimu txi nga womba ka dibhuku da Hoseya txi txi kha txona: “Avale i nga si nga vathu vangu na va dhana ku vathu vangu, ni vale va nga si randwi ni na va dhana ku mbo randeka.” 26 Ni ka wukhalo wu ti nga wombwa ti to: ‘Anu kha mi nga vathu vangu,’ va na dhanwa ku ‘vanana va Txizimu txi txi hanyako.’”

27 I si nga eto basi Isaya a huwelete mayelano ni Vaisrayeli a txi khene: “Hambiku mtengo wa vanana va ka Israyeli wu fanako ni mtxhefa wa lineneni, vadotho ava va no poniswa. 28 Nguko Jehovha* a na ta lamula ditiko ngu txi kuluveta.” 29 Ni ku Isaya a profetile a txi khene: “I di ku Jehovha* wa Mabutho a Tiyimbi a sa hi siyela liveleko* hi di lovile kufana ni Sodhoma ni Gomora.”

30 Hi na khathu txani kani? Hi na khathu hambiku vamatiko va nga mbi xola kululama, va ku mani ngu mhaka ya likholo lawe. 31 Kambe hambiku Vaisrayeli va nga txi xota mlayo wo lulama kha va si kota kuhanya ngu wona. 32 Ngu kutxani? Nguko vona va txi pimisa ti to va na mana kululama ngu mhaka ya mithumo i si nga ngu mhaka ya likholo. “Ngu toneto va wite ka dirigwi adi di wisako vathu.”* 33 Nga ha mibhalo yi wombako ngu kona yi txi: “Wonani! Na veka akhe Siyoni dirigwi adi di wisako vathu ni txiwindi atxi txi henyisako, kambe awule a no kholwa ka dona kha na mbi wiswa tingana.”

10 Vanathu, ati ni ti navelako ni ti ni va kombelelako tona ka Txizimu ngu ti to ve hanyiswa, 2 nguko na va fakazela ti to va khutala ngu Txizimu, aniko kukhutala kwawe hi nga ka wuzivi wa ditshuri. 3 Nguko aku va si ku ziviko kululama ka Txizimu, va ti vekete kululama kwawe vapune, ngu toneto kha va engisi milayo yo lulama ya Txizimu. 4 Nguko Kristu ngene magwito a Mlayo, kasiku wuhi ni wuhi wu a kholwako kwakwe e dhanwa ku mbwo lulama.

5 Nguko Mosi a bhate mayelano ni kululama ngu kuya ngu Mlayo a txi khene: “Awu a mahako timhaka tiya a na hanya ngu konaha ka tona.” 6 Kambe kululama aku ku tako ngu ka likholo ku womba tiya: “U nga wombe mbiluni kwako u txi khawe: ‘I mani a nga kwelako nzumani’ kasi kuya wuya ni Kristu? 7 Mwendo ku: ‘I mani a nga relelako diphalani ko hokoma’ kasi kuya wusa Kristu ngu ka vakufa kani?” 8 Kambe m’bhalo wu khene txani? Wona wu khene: “Dipswi di hafuhi ni nawe, di hatxisofuni kwako ni mbiluni kwako i ku dipswi da likholo adi hi di txhumayelako. 9 Nguko, ngako u txi womba ngu txisofu txako ti to Jesu Mkoma ni kukholwa ngu mbilu yako ti to Txizimu txi m’wusile ngu ka vakufa, u na hanyiswa. 10 Nguko, kasiku m’thu e dhanwa ku mbwo lulama a fanete kukholwa mbiluni kwakwe, ni ku kasiku e hanyiswa a fanete kutumela ngu txisofu txakwe masoni ka vathu.

11 Nguko ti bhatwe ka Mibhalo ti to: “Ni wamweyo awu a kholwako kwakwe a no wiswa tingana.” 12 Nguko kha ku ngaho kuhambana ka Vajudha ni Vagriki, Mkoma ngene wu wamweyo ni ku wa katekisa votshe vale va m’kombelako. 13 Nguko “wuhi ni wuhi a khongelako ngu ditina da Jehovha* a na hulukiswa.” 14 Kambe va nga khongelisa kutxani* na va sa kombisa kukholwa kwakwe? Ni ku va nga kombisisa kutxani kukholwa ka wule va si khaliko kupfa txilo ngu ngene? Ni ku va nga ti pfisa kutxani na ku si nga ni ava va txhumayelako? 15 Ngu ha kufanako, va nga txhumayelisa kutxani na va sa rumwa? Nga ha mibhalo yi wombako ngu kona ti to: “Eto yi nga tshurisa tona mikondo ya vale va txhumayelako mahungu a manene a timhaka to tsakisa.”

16 Aniko hi nga votshe va nga engisa mahungu a manene. Nguko Isaya a wombile a txi khene: “Jehovha,* i mani a nga kholwa ka ti hi nga ti womba? 17 Nguko m’thu a khata ngu kuengisa, i di kona a kholwako. Ni ku ati ti engiswako ti ta ngu kona ha ka dipswi mayelano ni Kristu. 18 Se na ti wotisa ti to Vaisrayeli kha va engisa kani? Vona va engisile, nguko Mibhalo yi kha yona: “Dipswi dawe di pfate hamafuni kotshe ni ku didungula dawe di hokile kala magemeta-mitshi ka mafu. 19 Na tshumela ni wotisa: Ina Vaisrayeli kha va pfisisa? Txo khata, nguko Mosi a ti khene: “Ni na mi wusela txiluse ngu kuthumisa vathu va matiko, ni na mi maha mi henya ngutu ngu kuthumisa ditiko do mbi na kupfisisa.” 20 Isaya nene a wombile ngu txibindi a txi khene: “Ni mani vale va nga si ni xoleteli, ni zivilwe ngu vale va nga si zivi txilo ngu ngani.” 21 Kambe a womba tiya mayelano ni Israyeli: “Ni nawulutile mawoko ditshiku dotshe ka vathu vo mbi engisa ni kubanga misungo.”

11 Se na wotisa to: Ina ti lava kuwomba ti to Txizimu txi to tsukula vathu va txona? Ahim-him, nguko nani ni mu Israyeli, wa liveleko* la Abrahamu wa lihunzu la Bhejamini. 2 Txizimu kha txa tsukula vathu va txona ava txi nga va sawula makhatoni. Ina kha mi ti zivi ati Mibhalo yi wombako tona mayelano ni Elija mbimo yi a nga khongela ka Txizimu a txi mangalela Vaisrayeli? A txi khene: 3 “Jehovha,* va dayete vaprofeti vako, va khundumusete maaltari ako, ku to sala ani nokha, se konku va zama ku ni daya.” 4 Kambe Txizimu txi m’xamulisile kutxani? Txona txi ti khene: “Ni ngadi ni 7.000 wa vathu ava va nga mbi khozela* Bhali. 5 Ti ngu kufana ni nyamsi, ku ngadi ni mtxawa wa wudotho awu wu nga sawulwa ngu mhaka ya wuxinji wa hombe wa Txizimu. 6 Kambe ngako ti txiya ngu wuxinji wa hombe kha ti swi tiya ngu mithumo, nguko ngako ti txiya ngu mithumo, wuxinji wa hombe hi nga ngadi kambe wuxinji wa hombe.

7 Se hi nga khathu txani? Asile Vaisrayeli va nga ti si xota ngu mbilu yotshe kha va si mana, si manwi ngu vale va nga langwa, aniko vamwani va ti bangisile misungo. 8 Txizimu txi va mahile ve otela ka wukohe wa hombe ti to maso awe ma si woni txilo ni tinzeve tawe ti si engisi txilo, kala ditshiku da nyamsi.” 9 Dhavhidha nene a ti khene: “Timeza tawe ti nave mlawu, txitsha txi txi va humbako ni txitsayiso kwawe. 10 Maso awe ma na phumale kasiku ma si ti koti kuwona ni ku maha ti to misana yawe yi zumba yi di dombekile.”

11 Na wotisa ni txi: Ina Vaisrayeli va to wa da magwito? Ahim-him. Kambe kuwa kwawe kumahile ti to vathu va matiko ve hanyiswa ni kuwusa mabava ka Vajudha. 12 Se ngako kuwa kwawe ku txi tisa makatekwa hamafuni ni kupumbeka kwawe ku txi tisa makatekwa ka vathu va matiko, ti womba ti to makatekwa ma na tala ngutu, ngako mtengo wawe wu txi ya wu engeteleka.

13 Konku ni womba-womba ni nanu mi ku vathu va matiko, kota ku ni ku mpostoli wa va matiko, na ninga lisima* mthumo wu ni wu mahelako Txizimu. 14 Kufela ku ngu nzila yo kari ni wusela mabava lixaka langu kasi kuhanyisa vamwani kwawe. 15 Nguko kutsukulwa kwawe kuvhunile vamwani ditikoni kasiku ve tshumela ve va ni wungana ni Txizimu, se ngako a txi va amukela ti na fana ni loko va di wusilwe ngu ka vakufa. 16 I si nga eto basi, ngako mpupu* awu wu ningelwako wo khata wu di sawulekile, awu wu salako ni wona wu sawulekile, ni ku ngako mkoloti* wu di sawulekile, madhavi ni ona ma sawulekile.

17 Kambe ngako mamwani madhavi ma di phatutwe, se awe hambiku u ku muolivha wa txitinga u txhomekilwe hagari ka ya ma nga sala, u na ti busa ngu ndome* ya mikoloti* ya muolivha. 18 Awe u nga pimisi ti to u wa tshuku kupinda mamwani madhavi. Ngako u txi pimisa ti to u wa tshuku, khumbula ti to hi nga awe u nga rwala mkoloti,* kambe mkoloti* ngu wona wu nga kurwala. 19 Kambe awe u nga khawe: “Madhavi mamwani ma phatutwe kasiku ni txhomekwa wukhaloni wa ona.” 20 Eto ditshuri! Ona ma phatutwe nguko kha ma va ni likholo, kambe awe u txhomekilwe ngu mhaka ya likholo, ngu toneto u nga ti guleti aniko va na ni txithavo. 21 Nguko aku Txizimu txi nga mbi leka kuphatula madhavi ya muolivha kha txi na mbi leka kukuphatula nawe. 22 Khumbula wunene ni kutsayisa ka Txizimu. Txona txa tsayisa avale va nga wa nguko kha va va ni likholo, kambe txi ni wunene kwako ngako u txi simama wuneneni ka txona, ngako u si mahe toneto, nawe u na gangwa u tshotshwa kule. 23 Se ngako Vajudha va txi kombisa likholo, vona va nga tshumela ve txhomwa ka mndonga, nguko Txizimu txi ni mtamo wo maha toneto. 24 Se ngako awe u di phatutwe ka muolivha wa txitinga u ta txhomwa ka muolivha awu wu ku thembweni, i ku timhaka ti nga mbi toloveleka, ti nga tandekisa kutxani ku madhavi a muolivha awu wu ku thembweni me txhomwa ka muolivha wa ona?

25 Ngu toneto vanathu, ni lava ti to mi txi ziva txihunja txiya txo sawuleka kasiku mi si pimisi ti to mi txharihile. Vamwani ka va ka Israyeli va ti bangisile misungo kala kuza mtengo wa vathu va matiko ava va nga sawulwa ve wulela. 26 Se ngu nzila yoneyo, dotshe ditiko da Israyeli di nga hanyiswa nga ha ti nga bhalwa ngu kona ti to: “Ku na humelela m’hanyisi ngu Siyoni, ene a na ta maha ti to liveleko la Jakobe li leka mithumo ya lona yo biha. 27 Atxiya ngu txona txitumelelano txi ni no maha navo, mbimo yi ni no thavisa sionho sawe.” 28 Ditshuri ti to vona valala va mahungu a manene, kambe eto ti wuyelisa anu ni ku Txizimu txi va sawute ni ku txa va randa ngu mhaka ya vatate vawe. 29 Nguko Txizimu kha txi na mbi ti laya ngu tiningo ti txi nga mi ninga, ni ku kha txi na mbi ti laya ngu mhaka ya vale txi nga va dhana. 30 Anu kale mi si engisi Txizimu, kambe mi kombilwe wuxinji ngu mhaka ya kwa mbi engisa kwawe. 31 Txizimu txi mi kombile wuxinji ngu mhaka ya kwa mbi engisa kwawe, kasiku ni vona ve kombwa wuxinji kufana ni nanu. 32 Nguko Txizimu txi mahile ti to votshe ve va tikhumbi ta kwa mbi engisa, kasiku e komba wuxinji votshelele.

33 Hi nga wona kutala ka makatekwa, wutxhari ni wuzivi wa Txizimu! Kulamula ka Txizimu ni tinzila ta txona kha ti nge koteki ku ti pfisisa ngu kupelela! 34 Nguko “i mani awu a zivako mialakanyo ya Jehovha* mwendo ku i mani wu a nga mningako sialakanyiso?” 35 Mwendo ku “i mani wu a nga thanga e mninga txo kari kasiku e m’tshumetela?” 36 Nguko sotshe si lumba ene, si vangilwe ngu ngene, ni ku siho ngu mhaka yakwe. A na dhumiswe kala kupinduka. Amen.

12 Ngu toneto vanathu, na mi kombela ngu wuxinji wa Txizimu ti to mi henjeleta* mimidi yanu kota digandelo do hanya, do sawuleka ni kuamukeleka ka Txizimu, mi maha mthumo wo sawuleka ngu kuthumisa wusikoti wanu wo pimisa. 2 Lekani kuetetela mahanyelo a vathu va ditiko diya, kambe tisoleni mi txitxa mapimiselo anu kasiku mi tsaniseka ti to kuranda ka Txizimu ngunene, ka amukeleka ni ku kupelete.

3 Ngu kona ha ka wuxinji wa hombe awu mi nga ningwa, ni gela mmwani ni mmwani kwanu ti to a si pimisi ngutu ngu ngene kupinda mpimo, kambe a na ve ni mapimo a ku ti veka hahatshi ngu kuya ngu likholo ali mmwani ni mmwani a nga ningwa ngu Txizimu. 4 Kufana ni ku mmidi wumwewo wu ku ni siro* so tala, kambe siro soneso si si mahiko mthumo wo fana, 5 nanathu, hambiku hi ku vangi, hi mmidi wumwewo kumweko ni Kristu, kambe mmweyo ni mmweyo wathu hi siro* asi si lumbako mkwanu. 6 Se aku hi ku ni tiningo to hambana ngu kuya ngu wuxinji wa hombe awu hi nga ningwa, hi di ni ningo yo profeta a hi profeteni ngu kuya ngu likholo lathu. 7 Awu a nga ningwa ningo yo thumela vamwani a na va thumele, awu a nga ningwa ningo yo gondisa a na gondise, 8 awu a nga ningwa ningo yo tsanisa a na tsanise, awu a nga ningwa ningo yo abanisela a na ti mahe a di khululekile, awu a nga ningwa kuthangela a na thangele ngu kuhiseka, awu a nga ningwa ningo yo kombisa wuxinji a na mahe toneto a di henemene.*

9 Lirando lanu li ngave lo xengetela, nyenyani ati i ku to biha mi namarela ka i ku ta tinene. 10 Randanani nga vanana va m’thu mmweyo. Vanani vo khata kukombisa txithavo. 11 Thumani ngu kuhiseka mi si ti mahi mikara. Tumelelani moya wo sawuleka wu mi maha mi hiseka. Thumelani Jehovha* ngu mbilu yotshe. 12 Tsakani ngu mhaka ya themba, mi timisela kuxaniswa. Khongelani mi si emi. 13 Abanani ni vasawuleki asi mi ku naso ngu kuya ngu silaveko sawe. Amukelani vapfhumba ngu manza mambidi. 14 Katekisani avale va mi xanisako, mi nga wombawombeni kubiha ngu vona, kambe va katekiseni. 15 Tsakani ni va va tsakako, mi dila ni va va dilako. 16 Wonani vamwani nga ti mi ti wonisako tona anu mipune, mi nga vekeni mapimo ka silo so guleka, kambe ti vekeni hahatshi, mi nga ti woneni mi di txharihile kupinda vamwani.

17 Mi nga tshumeteleni wubihi ngu wubihi. Kambe ti karateleni kumaha ati i ku tatinene masoni ka vathu votshe. 18 Ngako ti txi koteka ni loko mi txi ti kota, hanyani ngu kurula ni vathu votshe. 19 Vo randeka, mi nga ti photeleni mipune, kambe lekani Txizimu txi ti photela, nguko ti bhatwe ti to: “‘Kuphota kulumba ani, ni na ti photela,’ kuwomba Jehovha.”* 20 Kambe “ngako mlala wako a di ni nzala, mninge sakudya, ngako a di ni ditora, mninge so sela, u txi maha eto, wo hembenyetela makala o hisa* hamsungo kwakwe.” 21 Mi nga xulweni ngu wubihi, kambe simamani mi xula wubihi ngu wunene.

13 M’thu ni m’thu a na engise wukoma, nguko kha wu ngaho wukoma awu wu kuho i si nga ngu kutumelelwa ngu Txizimu, nguko wukoma awu wu kuho wu vekilwe ngu Txizimu ka txikhalo txa wona txi txi nga pimelwa. 2 Ngu toneto, awu a si engisiko wukoma a lwisana ni Txizimu, se ava va si engisiko va na lamulwa. 3 Nguko vakoma kha va thawi ngu vale va mahako ta tinene, aniko va thawa ngu vale va mahako to biha. Ina wa ti lava kuhanya u si thavi wukoma? Maha ta tinene, u na dhundwa ngu wukoma. 4 Nguko vakoma va thumela Txizimu kasiku mi mahela ati i ku ta tinene. Kambe ngako u txi maha to biha, u ni txivangelo txo va thava. Vona va ningilwe mtamo kasi kutsayisa avale va mahako to biha. Vona va thumela Txizimu kasi kutsayisa awule a mahako to biha.

5 Ngu toneto, mi fanete ku ti veka hahatshi ka wukoma, i si nga ngu mhaka ya kuthava kutsayiswa dwe, kambe ngu mhaka ya livhalo lanu. 6 Ngu toneto, nanu mi hakelako resa, nguko Txizimu txi va thumisa kasiku mbimo yotshe ve thumela vathu. 7 Ningani votshe asi si va fanelako: Awu a fanelwako ngu resa mningeni resa, awu a fanelwako ngu nduwo mningeni nduwo,* awu a fanelwako ngu kuthawa m’thaveni, awu a fanelwako ngu txithavo mningeni txithavo.

8 Mi nga dhevheni txilo m’thu hahanze ka lirando, nguko awule a randako muakelani a hetisisa mlayo. 9 Nguko sirumo asi si ku: “U nga mahe wugango, u nga daye, u nga pe, u nga navele sa vane,” hambi ni sile simwani sirumo, sotshe si tshanganiswa ngu mapswi ya ma ku: “Randa muakelani wako nga ti u ti randisako tona awe upune.” 10 Lirando kha li maheli to biha vamwani, ngu toneto, lirando li hetisisa ti mlayo wu wombako.

11 Mahani tiya nguko ma yi ziva mbimo yi hi ku ka yona, i mbimo yo wuka wukoheni, konku kuhanyiswa kwathu ku hafuhi ngutu kupinda mbimo yi hi nga khata ku va makholwa ngu yona. 12 Wusiku wu hafuhi ni kuguma, se kuya kuambulukani. Ngu toneto, a hi lekeni kumaha mithumo ya txidema hi xoma matxhari a liwoningo. 13 A hi veni ni mahanyelo a manene, nga o va mitshikari, hi hambana ni mafexta a vhilinganya, wudevi, wubhemba, mahanyelo a tingana, maguwa ni mabava. 14 Kambe etetelani* Mkoma Jesu Kristu, mi nga zumbeni mi txi pimisa ngu makungo o lava kutsakisa kunavela ka nyama.

14 Amukelani awu a ku ni likholo lo mbi tsana, aniko mi nga lamuleni m’thu ngu mhaka ya kuva a di ni mawonelo o hambana ni anu. 2 Nguko likholo la mmwani la m’tumelela kudya sotshe silo, aniko awule wo mbi tsana, a dya mndiwo wa mazokoro dwe. 3 Awu a dyako sotshe a nga wonele hahatshi awule a si dyiko, ni wule a si dyiko sotshe a nga lamule awule a dyako, nguko Txizimu txi amukete votshe. 4 Wo va mani awe wo u nga lamula txithumi txa mmwani kani? Phela i nyamne wa txona awu a nga wombako ti to txi lulamile mwendo ahim-him. Ngako Jehovha* a txi txi vhuna, ti na tsimbila kwati.*

5 Vamwani vathu va pimisa ti to ku ni ditshiku da lisima kupinda mamwani, aniko vamwani vathu va pimisa ti to otshe masiku ma fana, mmwani ni mmwani a na tsaniseke ngu ti a ti kholwako. 6 Awule a xayisako ditshiku do kari a maha eto kasi kudhumisa Jehovha.* Ni wule a dyako, a dya kasi kudhumisa Jehovha,* nguko a bonga Txizimu. Awule a si dyiko kha dyi kasi kudhumisa Jehovha,* hambiketo nene wa bonga Txizimu. 7 Kha ngaho ni wamweyo a ti hanyelako apune ni ku kha ngaho ni wammweyo a ti felako apune. 8 Nguko, ngako hi txi hanya hi hanyela Jehovha,* ngako hi txi fa, hi fela Jehovha.* Mwendo ha hanya mwendo ha fa, hi lumba Jehovha.* 9 Nguko Kristu a fite e tshumela e wuswa kasiku e va Mkoma wa va va nga fa.

10 Ngu kutxani awe u txi lamula mwananu? Ni ku ngu kutxani u txi wonela hahatshi mwananu kani? Nguko hotshethu hi na ema masoni ka Txizimu kasiku txi hi lamula. 11 Nguko ti bhatwe ti to: “‘Na xambanya ngu ngani nipune, vathu votshe va na ta khoza ni ku ni dhumisa ve tshumela ve ti ziva ti to ani ni Txizimu kuwomba Jehovha.’”* 12 Ngu toneto, mmwani ni mmwani wathu a na ti xamulela ka Txizimu.

13 Ngu toneto, a hi lekeni kulamulana, aniko a hi ti emiseleni kwa mbi maha txilo atxi txi no holisa likholo* la mmwani mwendo ku m’maha e onha. 14 Na ti ziva ni ku na tsaniseka ka Mkoma Jesu ti to kha txi ngaho txi hi dyako txi nga nyama ngu mtumbunuko wa txona, kambe ngako m’thu a txi txi wona txi di nyamile, kwakwe txi nyamile. 15 Ngako mwananu a txi khuveka ngu mhaka ya si u dyako, khu swi u tsimbila ngu lirando, ngu toneto u nga daye awu Kristu a nga m’fela ngu mhaka ya sakudya. 16 Ngu toneto, mi nga maheni ti to kuwombwawombwa kubiha ngu wunene wu mi wu mahako. 17 Nguko Mfumo wa Txizimu hi nga kudya ni kusela, aniko wululami, kurula ni litsako ngu kuvhunwa ngu moya wo sawuleka. 18 Nguko awu a thumelako Kristu ngu nzila yiya wa amukelwa ngu Txizimu ni ku wa tsakelwa ngu vathu.

19 Ngu toneto, he maheni totshe ati hi nga ti kotako kasi kumaha kurula ni ku hi tsanisana ngu txathu. 20 Lekani kuhasamula* mthumo wa Txizimu ngu mhaka ya sakudya. Ditshuri ti to sotshe sakudya si basile, aniko si bihile ngako m’thu a txi dya kambe a txi khuvekisa mmwani. 21 I tshuku kwa mbi dya nyama mwendo kusela vhinya hambi kumaha timwani ngako ti txi khuvekisa mwananu. 22 Ati u ti kholwako, ndako ni Txizimu. Awu a si ti lamuliko apune ngu mhaka ya ti a ti wonako ti di lulamile, a na tsaka. 23 Kambe awu a kanakanako, aniko e lamba e dya a ni mnando nguko kha dyi a txi seketela ka likholo. Totshe ti ti mahwako ti sa seketelwa ka likholo, txionho.

15 Kambe athu hi nga tsana hi fanete kutimisela kutandeka ka va vo mbi tsana, i si nga kulwela ku ti tsakisa hipune. 2 Mmwani ni mmwani kwathu a na mahele vamwani tatinene kasiku va aka. 3 Nguko hambi Kristu kha lwela ku ti tsakisa apune, nga ha ti nga bhalwa ngu kona ti to: “Avale va ku ruketelako va ruketela ni nani.” 4 Nguko totshe ati ti nga bhalwa kale ti bhaletwe athu kasiku hi gondisa, ti hi ninga themba ngu kona ha ka kutimisela kwathu, ni kuthavelelwa ngu Mibhalo. 5 Txizimu atxi txi ningako kutimisela ni kuthavelela, txi na mi vhuni ti to mi va ni mapimiselo o fana ni aya Jesu Kristu a nga ti nawo, 6 kasiku mi sikota kudhumisa Txizimu ni Tate wa Mkoma wathu Jesu Kristu ngu wumwewo ni ngu dipswi dimwedo.

7 Ngu toneto, amukelanani kufana ni ku Kristu a nga mi amukela kasi kudhumisa Txizimu. 8 Nguko na mi gela ti to Kristu a vile txithumi txa vale va nga yiswa wukwerani, kasi kukombisa ti to Txizimu txi ni ditshuri, ni kutsanisekisa sithembiso asi txona txi nga si maha ka vakokwani vawe, 9 kufela ku vamatiko ve dhumisa Txizimu ngu kona ha ka wuxinji wa txona nga ha ti nga bhalwa ngu kona ti to: “Ngu toneto, ni na kudhumisa hagari ka vamatiko ni kuembelela tindando to dhumisa ditina dako.” 10 E tshumela a txi khene: “Anu va matiko, tsakani kumweko ni vathu vakwe.” 11 A engeta a txi: “Otshe matiko ma na dhumise Jehovha* ni ku votshe vathu va na m’dhumise.” 12 Ni ku Isaya nene a khene: “Ku na va ni mkuluti* wa Jese, awu wu no vekwa kasi kufuma matiko ni ku matiko ma na veka themba ya ona kwakwe. 13 Txizimu atxi txi ningako themba txi na mi tate ngu litsako ni kurula, ngu kona ha ka themba ayi mi ku nayo kwakwe, kasiku mi talelwa ngu themba ngu kuvhunwa ngu moya wo sawuleka.

14 Vanathu, ani nipune na tsaniseka ti to anu mi taletwe ngu wunene, ngu wuzivi ni ku ma sikota kulayana ngu txanu. 15 Hambiketo ni tsani ni mi bhalela timhaka tiya, kasiku mi ninga txialakanyiso tximwani ngu mhaka ya wuxinji wa hombe awu ni nga kombwa ngu Txizimu. 16 Kasiku ni va txithumi txa Jesu Kristu ka vamatiko. Ni ñolekile ka mthumo wo sawuleka wo txhumayela mahungu a manene a Txizimu, kasiku vamatiko ve va mningelo awu wu amukelwako wu nga basiswa ngu moya wo sawuleka.

17 Ngu toneto, ni ni txivangelo txo ti guleta ngu ka Kristu Jesu ngu mhaka ya mthumo wangu ka Txizimu. 18 Kha ni na mbi womba timwani hahanze ka ti Kristu a nga maha ngu kona ha kwanu, kasiku va matiko ve engisa ngu ti ni ti wombako ni ku ti maha, 19 ngu mtamo wa sikombiso ni sidiwukiso ni ngu mtamo wa moya wa Txizimu. Ngu toneto, kukhukhela Jerusalema kala Liriya ni txhumayete mahungu a manene mayelano ni Kristu ngu kupelela. 20 Ngu toneto, ni ti karatete kwa mbi txhumayela mahungu a manene makhalo aya ditina da Kristu se di ziwako, kasiku ni si aki txitimwi ka makhato aya ma nga vekwa ngu mmwani. 21 Nga ha ti nga bhalwa ngu kona ti to: “Avale va nga si khali kupfa madungula akwe va na woningwa, ni vale va nga si khali kuengisa, va na pfisisa.”

22 Ngu toneto, ti nga maha ti to makhambi o tala hi tandeka ku ta mi pfuxela. 23 Se konkuwa kha ni swi ni va ni wukhalo wo lava kutxhumayela, ngu toneto i kale ni txi ti lava ku ta mi pfuxela. 24 Se, mbimo yi ni no endela Expanya, ni navela ku mi wona ni tshumela ni heleketwa ngu nganu, msana kova ni di londote kuva kumweko ni nanu. 25 Kambe konkuwa ni lava kuenda ni ya Jerusalema kasi kuya thumela vasawuleki. 26 Nguko vanathu va khe Makedhoniya ni Akaya va tsakete kumaha misengo kasi kuvhuna vasawuleki ava i ku sisiwana khe Jerusalema. 27 Ina, vanathu va mahile tiya va di tsakile ni ku va ti ni txikweneti, txikweneti txa kona ngu txi txo vanathu va ku Jerusalema va va gete timhaka ta Txizimu, se vona va txi dhevha vanathu va Jerusalema kuabana navo silo sawe. 28 Msana kova ni di mahile tiya ni kuya ningela misengo, na pinda ni mi wona ni txi ya Expanya. 29 I si nga eto basi, mbimo yi ni no hoka ni ta mi pfuxela, na mi tisela makatekwa aya ma tako ngu ka Kristu.

30 Na mi kombela ti to mi si leki ku ni kombelela ka Txizimu nga ti nani ni mahako ngu kona ha ka Mkoma wathu Jesu Kristu ni ngu mhaka ya lirando hi kombwako ngu kuthumisa moya wo sawuleka, 31 kasi ku ni hulukiswa ka va vo mbi kholwa va ku Judheya ti to mthumo* wangu khe Jerusalema wu amukelwa ngu vasawuleki. 32 Ngu toneto, ngako Txizimu txi txi ti lava ni na ta mi pfuxela ni di tsakile ni kutshumela hi tsanisana. 33 Txizimu atxi txi ningako kurula txi nave ni nanu motshenu. Amen.

16 Na mi bikela ndiyathu Febhe, a thumelako dibanza da Kenkreya, 2 Ni kombela ku mi mu amukela ngu ditina da Mkoma ngu nzila ayi yi fanelako vasawuleki, mi m’vhuna m’ningeni sotshe si a no si lava, nguko ene a vhunile vo tala kupata ni nani.

3 Dungulani Priska* ni Akila, vathumi kulothi ka Kristu Jesu, 4 ava va nga veka wutomi wawe haphangoni ngu mhaka yangu, i si nga ngu ngani nokha dwe, kambe mabanza otshe o hambana-hambana ma va bonga. 5 Dungulani dibanza adi di tshanganako mtini kwawe. Dungulani Epenetusi awu ni m’randako, i ku mmweyo wa va vo khata kukholwa khe Aziya. 6 Dungulani Mariya awu a nga mi thumela ngutu. 7 Dungulani Andronikusi ni Juniyasi, maxaka angu ni sibotxhwa kulothi, vavamna vava va ziwa ngutu ngu vapostoli ni ku i kale va di kumweko ni Kristu kupinda ani.

8 Dungulani Ampliyatusi i ku wo randeka ka Mkoma. 9 Dungulani Urbhanu txithumi kulothi ka Kristu ni Estaku mwanathu wo randeka. 10 Dungulani Apelesi awu amukelekako ka Kristu. Dungulani va mwaya wa Aristobhulu. 11 Dungulani Herodhiya dixaka dangu. Dungulani va mwaya wa Narsizo ava va kholwako ka Mkoma. 12 Dungulani Trifena ni Trifosa ava va thumako ngu kuhiseka ka Mkoma. Dungulani Persidha, mwanathu wo randeka, nguko wa thuma ngu kuhiseka ka Mkoma. 13 Dungulani Rufo awu a nga sawulwa ka Mkoma ni mame wakwe, i ku mame wangu nani. 14 Dungulani Asinkritu, Flegoni, Herme, Patrobhasi, Herma ni votshe vasawuleki ava va ku navo. 15 Dungulani Filologo ni Juliya, Nerewusi ni ndiyakwe, Olimpu ni votshe vasawuleki ava va ku kumweko navo. 16 Losanani ngu kupswopswana ko sawuleka. Otshe mabanza a Kristu ma mi losa.

17 Vanathu, na mi kombela ti to mi ti wonela ka vale va vangako mibhando ni kukhuvekisa ngu kugondisa timhaka to hambana ni ti mi nga gonda, va vayileleni vathuvo. 18 Nguko vathu evo hi nga sithumi sa Kristu Mkoma wathu, aniko sithumi sa kunavela kwawe,* ni ku va hambukisa ava vo divala ngu mapswi o tshamba ni kukanganyisa. 19 Votshe vathu va ti ziva ti to anu ma engisa ni ku ani na tsaka ngu toneto. Kambe ni lava ti to mi va vo txhariha ka ti i ku ta tinene, mi va vo mbi na mnando ka ti i ku to biha. 20 I si nga kale, Txizimu txi txi ningako kurula txi na mi ninga mtamo wo phwarasa Sathani. Wuxinji wa hombe wa Mkoma wathu Jesu wu nave ni nanu.

21 Ma dungulelwa ngu mthumi kulothi Timoti, kumweko ni maxaka angu Lukiyo, Jasoni ni Sosipateri.

22 Ani Tertiyusi m’bhali wa dipasi diya, na mi dungulela ngu ka Mkoma.

23 Gayo awu a nga amukela ani ni dotshe dibanza mtini kwakwe, wa mi dungula. Erasto mñoli wa male ya didhoropa wa mi dungula, ni nene Kwartu mwanakwe. 24 ——

25 Txizimu atxi txi nga mi ninga mtamo ngu kona ha ka mahungu a manene aya ni txhumayelako, i ku mahungu mayelano ni Jesu Kristu, mahungu oneyo ma kombisilwe ngu kuthumisa txihunja txo sawuleka atxi txi nga ti sisilwe kukhukhela kale. 26 Kambe txihunja txiya konkuwa txi zivisilwe ka otshe matiko ngu kuthumisa wuprofeti wa mu ka Mibhalo, Txizimu txathu txa kala kupinduka txi rumisile ti to txihunja txiya txi ziviswa ka va matiko kasiku ve txi engisa ni ku va ni likholo ka txona. 27 Txizimu i ku txona txokha txi zivako, txi na ningwe wudhumo ngu kuthumisa Jesu Kristu kala kupinduka. Amen.