DIPASI DO KHATA DA PAULO DI YAKO KA VAKORINTO

1 Ngani Paulo, awu a nga dhanwa kuva mpostoli wa Kristu Jesu ngu kuranda ka Txizimu, ni ni mwanathu Sostene, 2 ni bhalela dibanza da Txizimu adi di ku Korinto, kwanu anu mi nga basiswa mi ku kumweko ni Kristu Jesu mi nga dhanwa kuva vo sawuleka, kumweko ni votshe ava va dhanako ditina da Mkoma Jesu Kristu, i ku Mkoma wathu hotshethu:

3 Wuxinji wa hombe ni kurula si txita ngu ka Txizimu Tate wathu ni ka Mkoma wathu Jesu Kristu, si nave ni nanu.

4 Mbimo yotshe na bonga Txizimu txangu, ngu wuxinji wa hombe awu Txizimu txi nga mi komba ngu kona ha ka Kristu Jesu. 5 Anu mi katekisilwe, ngu ku mi ku ni wumwewo ni Kristu, ni ku a mi vhuni ku mi ziva kuwombawomba ni ku mi ninga kupfisisa ko hetiseka. 6 Kufana ni ku wufakazi mayelano ni Kristu wu nga zima* kwati mikuluti kwanu, 7 kasiku mi si txhotelwi ngu ningo ni ya yimweyo ya Txizimu, na mi txi rinzela ngu maso o bhilivila kuwonekiswa ka Mkoma wathu Jesu Kristu. 8 Ene a na mi tsanisa kala magwito kasiku mi ta maneka mi si nga ni txisolo ka ditshiku da Mkoma wathu Jesu Kristu. 9 Txizimu atxi txi nga mi dhana kasiku mi tava ni wumwewo ni mwanana wa txona Jesu Kristu Mkoma wathu, txi thembekile.

10 Konkuwa, na mi kombela vanathu ngu kuthumisa ditina da Mkoma wathu Jesu Kristu ti to mi va ni kupfana ku si ve ni mibhando hagari kwanu, kambe mi va ni wumwewo ka mapimo ni ka nzila yi mi alakanyako ngu yona. 11 Ni womba tiya nguko va ka Klowe va ni gete ti to ku ni mibhando hagari kwanu vanathu. 12 Ni womba tiya nguko mmwani ni mmwani kwanu a womba tiya: “Ani ni lumba Paulo,” “ani ni lumba Apolosi,” “ani ni lumba Khefasi,” “ani ni lumba Kristu.” 13 Ina Kristu a to abaniswa kani? Ina Paulo a gogotetwe haphandeni ngu mhaka yanu kani? Mwendo ina mi to bhabhatiswa ngu ditina da Paulo kani? 14 Na bonga Txizimu aku ni nga mbi bhabhatisa ni wammweyo kwanu hahanze ka Krispo ni Gayo. 15 Kasiku ni wamweyo a si wombi to ani ni bhabhatisilwe ngu ditina da Paulo. 16 Ni tshumete ni bhabhatisa mwaya wa Stefanasi, kambe ava vamwani kha ni tizivi ti to waho ni nga m’bhabhatisa. 17 Nguko Jesu kha ni rumela kuta bhabhatisa, kambe kuta huwelela mahungu a manene i si nga ngu mapswi a wutxhari, kasiku phande ya xanisa ya Kristu yi si maneki yi si nga ni txivhuno.

18 Nguko mahungu mayelano ni phande ya xanisa wupumbu ka va va yako kuloviswani, kambe mtamo wa Txizimu kwathu hi yako kuhanyiswani. 19 Nguko ti bhatwe ti to: “Na fuvisa wutxhari wa titxhari, ni kulamba wuzivi wa sigondi.” 20 Va hani vale va ku ni wutxhari? Va hani vamabhalani? Va hani vo dhunda kukanetisana ngu sa ditiko diya kani? Txizimu txi mahile wuzivi wa ditiko diya wu va wupumbu. 21 Nguko Txizimu, ngu kona ha ka wutxhari wa txona kha txa leka ditiko diya txi ziva ngu kuthumisa wutxhari wa dona, hahanze keto Txizimu txi tsakete kuhanyisa ava va kholwako ka mahungu aya vamwani va ma wonako i di wupumbu.

22 Nguko Vajudha va kombela sikombiso, Vagriki va xoletela wutxhari, 23 Kambe athu hi txhumayela Kristu awu a nga gogotelwa ka phande, ati i ku txikhuvekiso ka Vajudha ni ku va wupumbu ka vamatiko. 24 Kambe ka va va nga dhanwa, Vajudha ni Vagriki, ka vona, Kristu i mtamo wa Txizimu ni wutxhari wa Txizimu. 25 Silo sa Txizimu asi si wonwako i di wupumbu si ni wutxhari ngutu kupinda vathu, ni ku silo sa Txizimu asi si wonwako si si nga ni mtamo si ni mtamo ngutu kupinda mtamo wa vathu.

26 Vanathu, Txizimu kha txa dhana vathu vo ziva, vathu va mitamo mwendo vathu va timwaya ta ku ganya. 27 Kambe Txizimu txi sawute silo sa ditiko diya asi si wonwako i di sa wupumbu, kasi ku xowokisa titxhari, ni ku Txizimu txi sawute asi ditiko di si wonako si si nga ni mtamo sa haditikoni hawa, kasi ku xowokisa asi si ku ni mtamo. 28 Ni ku Txizimu txi sawute silo sa haditikoni asi si wonwako i di so mbi nyawula, asi si tekelwako hahatshi, asi si wonwako i si nga sa txilo, kasi kufuvisa asi si wonwako i di sa txilo, 29 kasiku ni wamweyo a si ti guleti masoni ka Txizimu. 30 Kambe ngu mhaka yakwe, anu mi kumweko ni Kristu Jesu awu a nga hi tisela wuzivi wa Txizimu ngu kona ha ka Kristu, Txizimu txi hi mahile hi va vo lulama vo sawuleka txi tshumela txi hi khulula ngu kuthumisa mterulo, 31 kasi ti maheka nga ha ti nga bhalwa ngu kona ti to: “Awu a ti guletako, a na ti gulete ngu Jehovha.”*

2 Vanathu, mbimo yi ni nga ta kwanu ni ta txhumayela txihunja txo sawuleka txa Txizimu, kha na thumisa mawombawombelo o tigela mwendo o lava ku kombisa wutxhari. 2 Nguko ni woni i di tshuku kwa mbi womba-womba ni nanu ngu timwani, hahanze ka Jesu Kristu awu a nga dawa haphandeni. 3 Ni ku ni tile kwanu ni di ni dizowa ni ku thava ni ku dhudhumela. 4 Ni ku mawombawombelo angu ni ti ni nga txhumayela, kha na thumisa mapswi o lava ku mi kholwisa mwendo o kombisa wutxhari, kambe mawombawombelo angu ma kombisile mtamo wa moya wo sawuleka, 5 kasiku likholo lanu li si seketelwi ka wutxhari wa vathu, kambe li seketelwa ka mtamo wa Txizimu.

6 Ni womba-womba timhaka ta wuzivi ka va va nga vitwa, kambe hi nga wuzivi wa ditiko diya mwendo wuzivi wa va va fumako ditiko diya ava va no loviswa. 7 Hi womba-womba ngu wuzivi wa Txizimu ngu nzila ya txihunja txo sawuleka, atxi txi nga siswa, atxi Txizimu txi nga txi pimisa kukhukhela kale kasi ku hi dhumisa. 8 Ewo wutxhari awu vafumeli va ditiko diya va si wu ziviko, nguko i di ku vo wu ziva va sa daya Mkoma wathu a ku ni wudhumo. 9 Nga ha ti nga bhalwa ngu kona ti to: “Kha di nga ho diso di nga wona mwendo nzeve yi nga engisa, kha ku na mbilu ya m’thu ayi yi nga ti vekisa ati Txizimu txi nga ti lulamisela ava va txi randako.” 10 Nguko Txizimu txi hi gete ngu kuthumisa moya wa txona wo sawuleka, nguko moya wa xolisisa totshe timhaka hambi timhaka to tshima ta Txizimu.

11 Nguko i mani awu a zivako ati ti ku ka mapimo a mmwani m’thu i si nga mbilu* ya m’thu eneyo kani? Ngu ha kufanako, kha nga ho m’thu awu a nga zivako timhaka ta Txizimu hahanze ka moya wa Txizimu. 12 Kambe athu kha ha amukela moya wa ditiko aniko hi amukete moya awu wu tako ngu ka Txizimu, kasi hi ziva timhaka ati txi nga hi ninga ngu wunene. 13 Timhaka toneto kha hi ti wombawombi ngu kuthumisa mapswi o gondiswa ngu wuzivi wa vathu, kambe hi thumisa mapswi aya hi nga gondiswa ngu moya wo sawuleka, kasi kutxhamusela timhaka ta moya.*

14 Kambe m’thu wa nyama kha tumeli silo sa moya wa Txizimu, nguko kwakwe wupumbu ni ku kha na ku sikota ku si ziva, nguko a fanete kuxolisisa ngu kuvhunwa ngu moya wa Txizimu. 15 Kambe m’thu wa moya a xolisisa totshe timhaka, kambe ene kha xolisiswi ngu m’thu ni wammweyo. 16 Nguko ti bhatwe ti to: “I mani wu a zivako mialakanyo ya Jehovha* kasiku e m’gondisa kani?” Kambe athu hi ni mapimiselo a Kristu.

3 Vanathu, kha na si kota kuwombawomba ni nanu nga vathu va kongomiswako ngu moya wo sawuleka, kambe ni wombawombile ni nanu nga vathu va nyama ni mi fananisa ni vanana amu ka timhaka to ziva Kristu. 2 Ani ni mi ningile masi i si nga sakudya so tsana (banga) nguko mi si se kula, hambi konku kha mi se kula, 3 nguko mi nga di vathu va nyama, hagari kwanu ku ngadi ni mazunga ni mabava. Nguko vathu va nyama va hanyisa toneto. 4 Nguko ngako m’thu a txi khene: “Ani ni lumba Paulo,” mmwani a txi: “Ni lumba Apolosi” mi hanyisa nga ti vathu va ditiko diya va hanyisako tona.

5 Kasi o va mani Apolosi? Kasi o va mani Paulo kani? Athu hi sithumi dwe hi nga mi vhuna ku mi maha Makristu, athu hi to maha ati hi nga rumwa ngu Mkoma. 6 Ani ni phayile, Apolosi e regara, kambe Txizimu ngu txona txi nga si maha si kula. 7 Ngu toneto, awu a phayako ni awu a theletelako mati hi nga va txilo, nguko Txizimu ngu txona txi si kulisako. 8 Awu a phayako ni wu a theletelako mati vamwevo, kambe mmwani ni mmwani a na amukela hakhelo yakwe ngu kuya ngu mithumo yakwe. 9 Nguko athu hi vathumi kulothi ni Txizimu, anu mi thembwe ayi Txizimu txi yi dimako ni nyumba ya Txizimu ayi txi yi akako.

10 Ngu kona ha ka wuxinji wa hombe awu txi nga ni ninga, ani ni kete fundasawu kambe mmwani a akile txitimwi ka yona, hambi keto mmwani ni mmwani a fanete kuxolisisa nzila yi a akako ngu yona txitimwi ka yona. 11 Nguko kha nga ho mmwani a nga kelako txitimwi ka yona i si nga Jesu Kristu. 12 Ngako m’thu a txi aka txitimwi ka fundasawu ngu oru, prata, marigwi a lisima, mapulango, mwasi mwendo matshanga, 13 ngu magwito mthumo wa mmwani ni mmwani wu na kombiswa to wu zumbisile kutxani, nguko ku na hoka ditshiku aha mndilo wu no kombisa mthumo wa mmwani ni mmwani to wu zumbisile kutxani. 14 Ngako mthumo awu m’thu a nga maha txitimwi ka fundasawu wu txi simama a na mana hakelo, 15 se ngako mthumo wa m’thu eneyo wu txihya ene a na luzekelwa, kambe a na poniswa, hambi keto a na nga kulee ko tshawunyeta ka mndilo.

16 Ina kha mi ti zivi ti to anu mi dithempele da Txizimu ni ti to moya wa Txizimu wa zumba kwanu kani? 17 Nguko awu a haxulelako dithempele da Txizimu, Txizimu ni txona txi na m’haxula, nguko dithempele da Txizimu di sawulekile ni ku anu mi dithempele donedo.

18 Mi nga ti kanganyiseni mipune, nguko ngako m’thu a txi pimisa to a ni wutxhari wa mafu awa a na ti mahe txipumbu, kasiku e mana wutxhari wa ditshuri. 19 Nguko wutxhari wa mafu awa wupumbu masoni ka Txizimu, nga ha ti nga bhalwa ngu kona ti to: “Txona txa zweta titxhari ka tipulani ta tona.” 20 Ni ku ti bhatwe kambe ti to: “Jehovha* wa ti ziva to mialakanyo ya titxhari kha yi nyawuli.” 21 Ngu toneto mi nga vekeni themba yanu ka vathu, nguko sotshe si lumba anu. 22 Hambi Paulo, mwendo Apolosi, mwendo Khefasi, mwendo ditiko, mwendo wutomi, mwendo kufa, mwendo ta nyamsi, mwendo ta mangwana, sotshe si lumba anu. 23 Kambe anu mi lumba Kristu, Kristu nene a lumba Txizimu.

4 Vathu va fanete ku hi wona kota sithumi sa Kristu, ni vawoneleli va sihunja so sawuleka sa Txizimu. 2 Ati ti emelwako ka vawoneleli ngu ti to ve va vo thembeka. 3 Kwangu ti si nga ni mhaka ni ti to ni lamulwa ngu nganu mwendo ni lamulwa ngu vathu, nguko kuwomba ditshuri, hambi ani nipune kha ni ti lamuli. 4 Nguko kha ni ti pfi ni di ni mnando wa txilo, kambe eto kha ti lavi kuwomba ti to ni m’thu wo lulama. Awu a ni lamulako i Jehovha.* 5 Ngu toneto, mi nga lamuleni txilo yi si se hoka mbimo ya kona, emelani kuta ka Mkoma. Ene a na ta woninga asi si nga siswa txidemani ni kumaha ti to ti zivaneka ati ti ku mbiluni ka m’thu, ni ku mmwani ni mmwani a na amukela wudhumo awu wu tako ngu ka Txizimu.

6 Ngu toneto vanathu ni nga mi bhalela timhaka ni txi womba-womba ngu ngani ni Apolosi, kasiku mi vhuneka ni kugonda kwathu ti to: “Mi nga ndakeni m’hingano wa ti ti nga bhalwa.” Ngako mi txi londeta tiya, mi na mbi va vathu vo ti guleta mi txi dhunda vamwani ni kunyenya vamwani. 7 Nguko i mani a ku mahako u hambana ni vamwani? Nji txani u ku natxo txo va u sa ningwa? Se ngako u di ningilwe, ngu kutxani u txi ti guleta nga khu ngo ningwa?

8 Ina mi ni sotshe asi mi si lavako? Ina mi pimisa ti to se mi ganyile? Se mi khatile kufuma mi si nga ni nathu? Ani ni txi ti navela ngutu ti to kala kuwa mi di khatile kufuma kasiku nathu hi kota kufuma ni nanu. 9 Ni ti wona nga Txizimu txi vekile athu vapostoli ka wukhalo wa magwito kufana ni vathu va va yako kudawani, nguko hi mahilwe m’saho wa kuhungata ditiko, tingilozi ni vathu. 10 Athu hi wonwa hi di sipumbu ngu mhaka ya Kristu, kambe anu mi di txharihile ngu ka Kristu. Hi wonwa hi si nga ni mtamo, kambe anu mi di ni mtamo. Anu ma guletwa, kambe athu ho eyiswa. 11 Kala kuwa hi ni nzala ni ditora, kha hi na simaha so enela, ha pekwa,* kha hi nga ni makhalo o zumba ka ona. 12 Ni ku hi thumile ngu ku ti karata ngu manza athu. Mbimo yi hi rukwako, ha katekisa. Mbimo yi hi xaniswako, ha timisela. 13 Mbimo yi hi lumbetwako, hi xamula ngu kurula, athu hi wonwa hi txi fana ni nzambwa ya ditiko, kala nyamsi athu hi wonwa hi di nzambwa ya mafu, ditala da votshe.

14 Kha ni mi bhaleli timhaka tiya kufela ku mi dhanisa, kambe kota vanana vangu ni va dhundako, ni mi bhalela kasi ku mi gondisa. 15 Nguko hambiku anu mi ku ni 1.000 wa vagondisi* ngu ka Kristu, kha mi nga ni va tate vavangi, nguko ngani ni nga va tate wanu ngu ka Kristu Jesu ngu mhaka ya mahungu a manene. 16 Se na mi kombela tiya, etetelani txikombiso txangu. 17 Ngu toneto ni mi rumelelako Timoti, nguko ene mwanana wangu wo randeka ni kuthembeka ka Mkoma. Ene a na ta mi khumbuxeta nzila yi ni mahako ngu yona tomaha ngu ka Kristu Jesu nga ti ni gondisisako tona ka otshe makhalo ni ka otshe mabanza.

18 Vamwani kwanu va ti guleta, nga ni no mbi mi endela kambe. 19 I si nga kale na ta kwanu ngako Jehovha* a txi ti lava, kha ni teli ku ta ziva mapswi ya va vo ti guleta dwe, kambe ni ku ta ziva mtamo wawe. 20 Nguko Mfumo wa Txizimu kha wu kombiswi ngu mapswi, aniko ngu mtamo wa Txizimu. 21 Ngu tihi ti mi ti sawulako? Ku ni mi endela ni limhika, mwendo ni mi endela ngu lirando ni kurula?

5 Ni pfa ti to ka mahwa wubhemba hagari kwanu, wubhemba wo hambi ka matiko kha wu mahwi. Ni pfa ti to ku ni wamwamna a otelako ni msikati wa tate wakwe. 2 Ina eto ta mi tsakisa kani? Ina mi sa fanela kudila kasiku wamwamna eyo a nga maha eto e thaviswa hagari kwanu kani? 3 Hambiku ni si ngaho kheyo ngu nyama, niho ngu moya, ni ku wamwamna eyo se ni m’lamute nga no vaho kheyo ni nanu. 4 Mbimo yi mi tshanganako ngu ditina da Mkoma wathu Jesu Kristu, zivani ti to moya wangu wu ni nanu kumweko ni mtamo wa Mkoma wathu Jesu. 5 Ningelani m’thu eneyo ka Sathani kasi kufuvisa moya ewo wa walo, ti to moya wakwe wu ta hanyiswa ka ditshiku da Mkoma.

6 Txivangelo txanu txo ti guleta hi nga txa txinene. Ina mo mbi ti ziva ti to m’tshumbelo wa wudotho wa kukumukisa yotshe trigu kani? 7 Tshotshani kule mtshumbelo wa kale kasiku mi va trigu ya yiphya ayi yi singako ni mtshumbelo kasiku mi simama mi sa tshumbelwa. Nguko, Kristu txinvutana txathu txa Paxkwa, se a ningetwe kota digandelo. 8 Ngu toneto, he maheni m’buso, i si nga ngu mtshumbelo wa kale hambi ngu mtshumbelo wa txionho ni wubihi, kambe ngu mapawa o mbi tshumbelwa i ku a kuthembeka ni a ditshuri.

9 Ni mi bhalete ka dipasi ti to mi ema ku va ni wuxaka ni wu a mahako wubhemba, 10 kha ni lavi kuwomba ti to ti lava mi wila wuxaka ni vathu va ditiko diya, ava va mahako wubhemba, va makolo, sidambu mwendo vathu va va khozelako sithombe, nguko ti ndi na lava ti to mi khukha ka ditiko diya. 11 Kambe konkuwa ni mi bhalela ti to mi wila wuxaka ni mmwani ni mmwani awu a ti gelako ti to i mwananu kambe a txi maha wubhemba, a di ni makolo, a txi khozela sithombe, i di m’ruketeli, i di didevi mwendo txidambu, hambi kudya mi nga dyeni ni m’thu eneyo. 12 Ni bela hani ani ko lamula vathu va hahanze? Hi nga anu mi lamulako vathu va mndani ka dibanza kani? 13 Ni ku hi nga Txizimu txi lamulako vathu va hahanze kani? “Thavisani hagari kwanu m’thu eyo wo biha.”

6 Ngako mmweyo wanu a di ni mhaka ni mmwani, ngu kutxani a txi yi yisa ka tribhunali ya vathu vo mbi lulama, a si yi yisi ka vathu vo sawuleka kani? 2 Ina mo mbi ti ziva ti to vasawuleki va na lamula ditiko? I di ti to ditiko di na lamulwa ngu nganu, ina kha mi nga ni wusikoti wo lamula timhaka ta tidotho? 3 Ina mo mbi ti ziva ti to hi na lamula hambi tingilozi kani? Se ina hi nga tandwa ngu ta wutomi wuwa? 4 Se ngako mi di ni timhaka to lava kuthethwa ta wutomi wuwa, ngu kutxani mi txi sawula ku ti thethwa ngu vavamna ava va si lumbiko dibanza? 5 Ni wombisa tiya kasiku mi pfa tingana. Ina hagari kwanu kha ku nga ni wamwamna wu a ku ni wusikoti wo thetha timhaka? 6 Kambe ati ti mahekako ngu ti to mwanathu e ya mangalela mmwani mwanathu ka vathu vo mbi kholwa!

7 Mi na wuyelwa ngu txani ngako mi txi yisana wukomani ngu txanu? Ina hi nga tshuku kudyelelwa? Ina hi nga tshuku kuluzekelwa? 8 Aniko anu mi dyelela ni kumoxa vamwani, ni ku eto mi ti mahela vananu!

9 Ina mo mbi ti ziva ti to vathu vo mbi lulama kha va na mbi dya thomba ya Mfumo wa Txizimu? Mi nga ti kanganyiseni, ava va mahako wubhemba, ava va khozelako sithombe, ava va mahako wugango, ava va ti mahako vavasikati i di vavamna, vavamna va va otelako ni vavamna kulowe, 10 makhamba, va makolo, madevi, va ruketeli ni sidambu, kha va na mbi dya thomba ya Mfumo wa Txizimu. 11 Vamwani kwanu mi txi hanyisa toneto. Kambe mi basisilwe, mi sawulekiswa mi dhanwa ku mi vo lulama ngu ditina da Mkoma Jesu Kristu ni ngu moya wa Txizimu txathu.

12 Sotshe na tumelelwa kumaha, kambe hi nga sotshe si vhunako. Sotshe na tumelelwa kumaha, kambe na mbi tumelela kurumwa ngu sona. 13 Sakudya si lumba mrumbu ni ku mrumbu wu lumba sakudya. Mmidi kha wa mahelwa kumaha wubhemba, kambe wu mahetwe kumaha mthumo wa Txizimu ni ku Txizimu txi na ninga mmidi asi wu si lavako. 14 Txizimu txi wusile Mkoma ni ku nathu txi na hi wusa ngu ka vakufa ngu kuthumisa mtamo wa txona.

15 Ina kha mi ti zivi ti to mimidi yanu sihango* sa Kristu? Ina ni fanete kuthavisa sihango sa Kristu ni si ningela ka digelegele kani? Ahim-him. 16 Ina kha mi ti zivi ti to mmwani ni mmwani awu a ti patako ni digelegele a maha nyama yimweyo nado kani? Nguko ti bhatwe ti to, “vona vavambidi va na va nyama yimweyo.” 17 Kambe ava va ti patako ni Mkoma, va kumweko nayo moyani. 18 Thavani wubhemba! Txionho tximwani ni tximwani atxi m’thu a txi mahako txi hahanze ka mmidi wakwe, kambe awu a mahako wubhemba a onhela mmidi wakwe apune. 19 Ina kha mi ti zivi ti to mimidi yanu dithempele da moya wo sawuleka wa Txizimu kani? I si nga eto dwe, anu kha mi ti lumbi mipune, 20 nguko ene a mi xavile. Ngu toneto, dhumisani Txizimu ngu mimidi yanu.

7 Mayelano ni ti ni nga mi bhalela, ni khani i tshuku ku wamwamna a si gwesi wamsikati, 2 kambe ngu kona ha ka wubhemba wu wu nga tala, wamwamna mmwani ni mmwani a na ve ni msikati wakwe ni wamsikati a na ve ni mwamna wakwe. 3 Wamwamna a na ninge msikati wakwe asi si m’fanelako,* wamsikati nene a na ninge mwamna wakwe asi si m’fanelako. 4 Wamsikati kha rumi mmidi wakwe, kambe wu rumwa ngu mwamna wakwe. Ngu ha kufanako, wamwamna nene kha rumi mmidi wakwe, kambe wu rumwa ngu msikati wakwe. 5 Mi nga tonaneni i si nga ngu kuva mi di pfani ngu mbimo yo kari, kasiku mi thumisa mbimo yoneyo ko maha mikombelo mi tshumela mi wuyelelana kambe, kasiku Sathani a si mi duki ngu kona ha ka kutanda ku ti ñola. 6 Ni womba tiya nguko ta tumelelwa, hi nga ti to o va txirumo. 7 Kambe ni navela ti to votshe vavamna ve fana ni nani. Hambi ka toneto, mmwani ni mmwani a ni ningo yakwe ayi a nga ningwa ngu Txizimu ngu tinzila to hambana-hambana.

8 Ni gela va va nga mbi txhadha ni tinoni ti to i tshuku kwa mbi txhadha ve zumbisa toneto va ku ngu tona kufana ni nani. 9 Kambe ngako mi txi tanda ku ti ñola, txhadhani, nguko i tshuku kutxhadha kupinda kutura ngu kunavela.

10 Ka va va nga txhadha ni va gela tiya, i si nga ani, kambe Mkoma, ti to wamsikati a nga leke mwamna wakwe. 11 Kambe ngako a txi lekana nayo, a na simame a sa txhadha mwendo ku a na wuyelelani ni mwamna wakwe, ni ku wamwamna kha fanela kuleka msikati wakwe.

12 Ka vamwani na va gela ani, i si nga Mkoma, ni txi khani: Ngako mwanathu a di ni wamsikati wo mbi kholwa a txi tumela kuzumba nayo, a nga lekani nayo. 13 Se ngako wamsikati a di ni wamwamna wo mbi kholwa, kambe a di ti emisete kuzumba nayo, a nga lekani nayo. 14 Nguko wamwamna wo mbi kholwa a basile ngu kona ha ka msikati wakwe, ni ku wamsikati wo mbi kholwa a basile ngu kona ha ka mwamna wakwe. I si nga eto, vanana vawe va si na kumaneka va sa basa, kambe konkuwa va basile. 15 Se ngako wo mbi kholwa a txi sunga ku m’leka, a na m’leke, vanathu vonevo kha va sinziseki ka siemo soneso, kambe Txizimu txi va dhani kasi ku ta hanya kurulani. 16 Awe wamsikati, ina wa ti ziva ti to u nga ponisa mwamna wako? Awe wamwamna, ina wa ti ziva ti to u nga ponisa msikati wako?

17 Hambi keto, mmwani ni mmwani a na hanye nga ti a nga ningiswa tona ngu Jehovha Txizimu. Mkongomiso wuwa ni wu ningela ka otshe mabanza. 18 Ina waho wu a nga dhanwa a di yisilwe wukwerani? Kha ti sungi ku e txhatxhwa wukwera wakwe. Ina waho wu a nga dhanwa a si se yiswa wukwerani? Kha ti sungi ku e yiswa wukwerani. 19 Kuyiswa wukwerani ni kwa mbi yiswa wukwerani kha ti wombi txilo, txa lisima ngu vekisa sirumo sa Txizimu. 20 Mmwani ni mmwani a na simame a di ka txiemo txi a nga dhanwa a di ka txona. 21 I di ti to mbimo yi u nga dhanwa u ti khumbi, u nga karateki ngu tona, kambe ngako u di mani mkhululeko, londola. 22 Nguko awule a nga dhanwa ka Mkoma i di txithumi, konkuwa a khululekile ni ku a lumba Mkoma. Ni ku awule a nga dhanwa a di khululekile konkuwa txithumi txa Kristu. 23 Lekani kuva tikhumbi ta vathu, nguko mi xavilwe. 24 Vanathu, mmwani ni mmwani a na simame masoni ka Txizimu a di ka txiemo txi a nga dhanwa a di ka txona.

25 Ti txita ka va va si se kuteka mwendo kutekwa, kha ni nga ni txirumo txo ta ngu ka Mkoma, kambe ni womba mawonelo angu kota m’thu wo thembeka awu a nga kombwa wuxinji ngu Mkoma. 26 Ngu toneto, ngu mhaka ya timbimo tiya to karata, ni wona i di tshuku ku m’thu e simama a di ka txiemo txi a ku ka txona. 27 U ni wamsikati? U nga lavi tinzila to m’leka. U si nga ni wamsikati, u nga m’xoletele. 28 Ngako u txi txhadha khu mahi txionho. Ngako m’thu a txi teka mwendo kutekwa kha mahi txionho. Kambe ava va txhadhako va na va ni sikarato ka wutomi. Ani ni zama ku mi vhikela ka sikarato soneso.

29 I si nga eto dwe, ni mi gela tiya vanathu, mbimo yi yi nga sala yidotho. Ava va ku ni vavasikati va na hanye nga kha va nga navo, 30 ava va dilako va na ti mahe nga kha va dili, ava va tsakako va na ti mahe nga kha va tsaka, ava va xavako va na ti mahe nga kha va xavi, 31 ava va thumisako silo sa ditiko va na mahe nga kha va si thumisi ngutu, nguko mazumbelo ya ditiko ma txitxa. 32 Nguko ani ni lava ku mi si karateki, nguko awu a nga mbi txhadha a karatekela timhaka ta Mkoma ti to a na m’tsakisisa kutxani. 33 Kambe wamwamna wu a nga txhadha a karatekela silo sa ditiko diya, ni ti to a nga m’tsakisisa kutxani msikati wakwe, 34 ni ku a ndindwa khe ni kheya. I si nga eto dwe, divhirjem* ni wamsikati wu a nga mbi txhadha va ti karatela kutsakisa Mkoma kasiku ve sawuleka mu ka mmidi ni ka moya. Kambe wamsikati wu a nga txhadha a ti karatela silo sa ditiko ni nzila yo tsakisa mwamna wakwe. 35 Ni womba tiya kasi ku mi vhuna, i si nga ku mi tsimba, nguko ni lava ku mi maha ti i ku ta tinene kasiku mi ti ningetela ka Mkoma mi si tsulupetwi ngu txilo.

36 Ngako m’thu a sa txhadha, kambe a si ti koti ku ti ñola ni kuva se a di pindile ka tanga yo rumbuka,* atiya ngu ti ti fanelako kumaheka. Ene ngako a txi ti lava, a na txhadhe, kha mahi txionho. 37 Ngu toneto, ngako m’thu a di mahile txisungo mbiluni kwakwe ni ku a si na txilaveko na a txi ti kota ku ti ñola ka kunavela kwakwe, ni ku a di mahile txisungo mbiluni kwakwe txo zumba a sa txhadha, a maha kwati. 38 Hambi keto, awu a txhadhako, a maha kwati, kambe awule a si txhadhiko a maha ta tinene ngutu.

39 Wamsikati a sungilwe ka mwamna wakwe a txi ngadi a txi hanya. Kambe ngako a txi fa, ene a txhusekile kutxhadha ni wuhi wu a m’lavako, a txi nga txhadha ka Mkoma. 40 Ka mawonelo angu, ni pimisa ti to a na simama e tsaka ngako a sa txhadha. Na tsaniseka ti to nanani ni ni moya wa Txizimu.

8 Ti txita ka mhaka ya sakudya siya si ningelwako ka sithombe: Ha ti ziva ti to hotshethu hi ni wuzivi, kambe wuzivi wa maha ti to m’thu e ti guleta, aniko lirando la aka. 2 Ngako m’thu a txi pimisa ti to wa ziva, ene kha ti pfisisi totshe nga ti a nga ti fanete ku ti pfisisisa tona. 3 Kambe ngako m’thu a txi randa Txizimu, txona txa m’ziva.

4 Ti txita ka mhaka yo dya asi si nga ningelwa ka sithombe, athu ha ti ziva ti to sithombe hi nga sa txilo hamafuni ni ku kha ku nga ni tximwani Txizimu ova tximwetxo dwe. 5 Nguko hambiku ku ku ni va va dhanwako ku sizimu, ova nzumani mwendo hamafuni, kufana ni ku ku ku ni “sizimu” sa singi ni “vakoma” vavangi, 6 kwathu kova ni Txizimu tximwetxo dwe, i ku Tate, awu sotshe si tako ngu kwakwe, athu hi hanyela ene. Ni ku ho va ni Mkoma mmweyo i ku Jesu Kristu awu a nga thumiswa kasi kumaha sotshe silo ni ku athu hi hanya ngu kona ha kwakwe.

7 Kambe hi nga votshe va ku ni wuzivi wuwa. Vamwani ngu mhaka ya ku va nga txi thumisana naso sithombe siya, ngako va txi dya sakudya asi si nga ningelwa ka sithombe, livhalo lawe lo mbi tsana la peka. 8 Sakudya kha si hi tshuketisi ka Txizimu, kha hi luzi txilo ngako hi sidyi ni ku kha hi ganyi txilo ngako hi txi dya. 9 Ti wonele ti to fanelo yako yo sawula ati u ti lavako yi si khuvekisi* ava vo mbi tsana. 10 Ngako va txi kuwona awe u ku ni wuzivi u txi dya dithempeleni ka sithombe, ina awu a ku ni livhalo lo mbi tsana kha na mbi kuzetelwa ku nene e lava kudya sakudya si si nga ningelwa ka sithombe kani? 11 Kambe ngu kona ha ka wuzivi wako u hoxota likholo la wule wo mbi tsana, khumbula ti to ene i mwananu awu Kristu a nga m’fela. 12 Ngako mi txi onhela vananu mi khuvekisa livhalo la va vo mbi tsana, mi onhela Kristu. 13 Ngu toneto, ngako sakudya so kari si txi khuvekisa mwanathu, na mbi dya kambe nyama kasiku ni si m’khuvekisi.

9 Ina kha na khululeka? Ina kha ni nga mpostoli? Kha na wona Jesu Mkoma wathu? Ina anu kha mi nga mihando ya mthumo wangu ka Mkoma? 2 Hambi i di ti to kha ni nga mpostoli ka vamwani, ani ni mpostoli kwanu, nguko anu mi txitambo atxi txi tsanisekisako mthumo wangu wa wupostoli ka Mkoma.

3 Ka vale va ni solasolako ni khani: 4 Ina kha hi nga ni fanelo yo dya ni kusela kani? 5 Ina kha hi nga ni fanelo yo tsimbila-tsimbila ni wamsikati wu a kholwako kufana ni vamwani vapostoli, vananda va Mkoma ni Khefasi kani? 6 Ina ngani ni Bharnabhasi dwe hi fanelako kuthuma kasiku hi ti hanyisa? 7 Ina disotxhwa di di yimbini ngu dona di ti hakelelako dipune kani? Ina ku ni wu a phayako mvhinya e gwita a si dyi m’hando wa kona kani? Mwendo ku ni wu a dyisako sihari e gwita a si seli masi ya kona?

8 Ina ni womba toneto ngu kuya ngu mawonelo a vathu? Ina hi nga toneto Mlayo wu wombako tona kani? 9 Nguko ti bhatwe ka Mlayo wa Mosi ti to: “U nga vhale txisofu txa homu mbimo yi yi hulako.” Ina mi pimisa ti to Txizimu txa karateka ngu sihari? 10 Ina Txizimu kha txa bhala tiya ngu mhaka yathu? Phela txi bhalete athu, nguko m’thu wu a dimako ni wu a hulako a fanete kuthuma va di ni themba ya ti to va na mana txo kari.

11 Ngako hi di phayile kwati mahungu a manene, ina ti bihile ku mi ni vhuna ka si ni si pwatako kani? 12 Aku vathu vamwani va ku ni fanelo eyo kwanu, ina nanathu kha hi nga ni fanelo yoneyo kani? Hambi keto, athu kha hi londoli fanelo yoneyo, kambe hi timisela ka totshe kasiku hi si ve txikhuvekiso ka vale va kholwako ka mahungu a manene mayelano ni Kristu. 13 Ina mo mbi ti ziva ti to ava va mahako mithumo yo sawuleka va dya asi si ku dithempeleni kani? Ni vale va thumako mbimo yotshe altarini va dya ka si si ningelwako altarini kani? 14 Ngu ha kufanako, Mkoma a ningete txirumo txa ti to votshe vale va huwelelako mahungu a manene ve hanya ngu ona.

15 Kambe ani kha thumisa ni ya yimweyo ya tifanelo tiya. Ngu ditshuri ani kha na mi bhalela kasiku mi ni mahela txo kari, nguko i tshuku ku ni fa kupinda ku—kha ngaho wu a nga ni tekelako sivangelo sa ku ti guleta kwangu. 16 Se ngako ni txi huwelela mahungu a manene, etxo hi nga txivangelo txa ti to ni ti guleta ngu txona nguko to sunga ku ni maha toneto. Mihumbo yangu ngako ni si huweleli mahungu a manene! 17 Se ngako ni txi maha ngu kuranda kwangu, ni na mana hakelo. Kambe hambi ngako ni txi maha i si nga ngu kuranda kwangu, ti nga txi fana nguko ni ningilwe mrwalo wo maha toneto. 18 Se ngu yihi wuyelo ayi ni no yi mana? Ngu yi yo, ngako ni txi huwelela mahungu a manene, ni huwelela mahungu oneyo mahala, kasiku ni si thumisi ngu nzila ya walo fanelo ayi ni ku nayo yo huwelela mahungu a manene.

19 Hambiku ni si ngako khumbi ya m’thu, ni ti mahile khumbi ka votshe kasi kumana vathu vavangi. 20 Ka Vajudha ni ti mahile M’judha, kasiku ni mana Vajudha. Ka va va ku hahatshi ka mlayo ni ti mahile nga no va hahatshi ka mlayo, hambiku ni si ngako hahatshi ka mlayo, kasiku ni mana vale va ku hahatshi ka mlayo. 21 Ka va vo mbi na mlayo ni vite nga no mbi na mlayo, hambiku ni londisako mlayo wa Txizimu ni wa Kristu, kasiku ni mana vale vo mbi na mlayo. 22 Ka va vo mbi tsana ni vite nga wo mbi tsana, kasiku ni mana vale vo mbi tsana. Ni ti mahile totshe tixaka ta vathu, kasiku ngu totshe tinzila ni mana kuponisa vo kari. 23 Ani ni maha totshe tiya ngu mhaka ya mahungu a manene, kasiku ni mana kutxhumayela vamwani.

24 Ina anu mo mbi ti ziva ti to ka mapalisana votshe vatutumi va tutuma, kambe mmweyo dwe a amukelako premiyo kani? Tutumani ngu txikongomelo txo mi ganya premiyo. 25 Votshe ava va patekako ka mapalisana va ti ñola ka totshe. Ditshuri ti to vona va maha toneto kasi kuamukela korowa* ayi yi no gwita yi sina, kambe ayi yathu kha yi sini. 26 Ngu toneto, ani kha ni ti mahi nyamtutume, kha ni kwevi sibhakela sangu kasi kupeka moya. 27 Ani ni tsayisa mmidi wangu, ni wu maha khumbi kasiku msana kova ni di txhumayete vamwani, ani ni si ta maneka ni di repwete.

10 Vanathu, ni lava mi khumbuka ti to vakokwani vanu va vile hahatshi ka direfu ni ku va pindile ngu hagari ka linene. 2 Votshe va bhabhatisilwe ngu ka Mosi, ngu direfu ni ngu linene. 3 Votshe va dyite sakudya sa simweso sa moya, 4 ni ku votshe va txi sela mati a mamwewo o huma ngu ka dirigwi da moya, di nga ti vekilwe ngu Txizimu adi di nga ti va londisela, dirigwi donedo di emelako Kristu. 5 Hambi keto, kutala kwawe Txizimu kha txa va tsakela nguko va fete txiwulani.

6 Atiya ti mahekile kasi kuva txikombiso kwathu kasiku hi si naveli timhaka to biha kufana ni vona. 7 Mi nga ti maheleni sithombe nga ha vamwani va nga maha ngu kona, nga ha ti nga bhalwa ngu kona: “Vathu va to khalahatsha ve dya ve sela. Ve gwita ve ya kuhungalani.” 8 Mi nga maheni wubhemba nga ha vamwani va nga maha ngu kona, ati ti nga maha ti to kufa 23.000 wa vathu ngu ditshiku da dimwedo. 9 Mi nga dukeni Jehovha* nga ha vamwani va nga maha ngu kona, ati ti nga maha ti to ve fa ngu kulumwa ngu minyoka. 10 Mi nga ngura-ngureni nga ha vamwani va nga maha ngu kona, ati ti nga maha ti to ve dawa ngu m’lovisi. 11 Atiya ti mahekile kasiku ti va txikombiso kwathu ni ku ti bhatwe kasiku ti hi gondisa athu hi hanyako ka timbimo ta magwito.

12 Awu a pimisako ti to a tsani, a na ti wonele ti to a si wi. 13 Kha mi khali ku nga telwa ngu txiduko txo mbi toloveleka ka vathu, kambe Txizimu txi thembekile ni ku txona kha txi na mbi mi leka mi dukwa ha ko za mi tanda kutimisela, kambe ngako mi txi telwa ngu txiduko, txona txi na mi vhuna kasiku mi si kota kutsanisela.*

14 Ngu toneto, vanathu vo randeka, vayilelani kukhozela sizimu sa walo. 15 Anu mi vathu vo pfisisa, ngu toneto lamulani mipune ati ni wombako. 16 Ina mbimo yi hi selako ngu kopo yiya ya makatekwa ayi hi yi katekisako, hi nga kona kusengela ka mnoha wa Kristu kani? Ina mbimo yi hi khemako dipawa diya hi dya, hi nga ho sengela ka mmidi wa Kristu kani? 17 Aku ku kova ni dipawa da dimwedo, hambiku hi ku vavangi, hi mmidi wumwewo, nguko hotshethu hi dya dipawa dona diya da dimwedo.

18 Alakanyani ngu Israyeli wa nyama: Ina ava va patekako ko ningela magandelo altarini kha va pateki kodya miningelo eyo kani? 19 Ni lava kuwomba txani ngu toneto? Ina asi si ningelwako ka sithombe nza lisima, mwendo ku sona sithombe nza lisima kani? 20 Ahim-him, kambe ni womba ti to miningelo ayi vamatiko va yi mahako, va yi mahela madhimoni i si nga Txizimu. Kambe ani kha ni lavi ti to anu mi ti pata ni madhimoni. 21 Anu mi nge sikoti kusela ka kopo ya Jehovha* ni ka kopo ya madhimoni, mi nge sikoti kudya ka meza ya Jehovha* ni ka meza ya madhimoni. 22 Ina ‘ho wusela txiluse Jehovha’?* Mwendo ku ho va ni mtamo ku m’pala?

23 Totshe ta tumelelwa, kambe hi nga totshe ti vhunako. Totshe ta tumelelwa, kambe hi nga totshe ti akako. 24 M’thu ni m’thu a nga ti karatele kulava ati ti no vhuna ene, kambe ati ti no vhuna vamwani.

25 Dyanani sotshe asi si xaviswako merkadhu, na mi si ti mahi siwotiso ngu kona ha ka livhalo lanu, 26 nguko mafu ni sotshe asi si ku ka ona si lumba Jehovha.”* 27 Ngako wo mbi kholwa a txi mi ramba ku mi ya dya mi tumela kutsula, dyanani sotshe asi a no mi servhira, mi si mahi siwotiso ngu kona ha ka livhalo lanu. 28 Kambe ngako m’thu a txi khene: “Eso si ningetwe kota magandelo,” mi nga dyeni, ngu mhaka ya wu a nga womba toneto ni ngu mhaka ya livhalo. 29 Kha ni wombi livhalo lako upune, kambe la vamwani. Nguko ni nge thumisi mkhululeko wangu ni gwita ni lamulwa ngu livhalo la vamwani. 30 Ani na bonga ngu si ni dyako, ngu kutxani ni txi sola-solwa ngu si ni bongako kani?

31 Ngu toneto, timwani ni timwani mi ti mahako, mwendo ngu dya mwendo ngu sela, ti maheni ngu nzila yo dhumisa Txizimu. 32 Mi nga veni txikhuvekiso ka Vajudha, ka Vagriki ni ka dibanza da Txizimu, 33 ngu toneto ni zamako kumaha, i ku kutsakisa votshe vathu ni si lweli ati ti vhunako ani, kambe ati ti vhunako vamwani kasiku ve mana kuponiswa.

11 Vanani vaeteteli vangu, kufana ni nani ni etetelako Kristu.

2 Mbimo yotshe na mi bonga nguko ka totshe anu ma ni khumbuka, ni ku ma veketa sileleto nga ti ni nga mi gondisisa tona. 3 Kambe ni lava mi ziva ti to msungo wa wamwamna i Kristu, msungo wa wamsikati ngu wamwamna, msungo wa Kristu ngene Txizimu. 4 Wamwamna mmwani ni mmwani awu a mahako mkombelo, mwendo kuprofeta a di fenengetile msungo o thavisa lisima awu i ku msungo wakwe. 5 Kambe wamsikati mmwani ni mmwani wu a mahako mkombelo mwendo kuprofeta a sa fenengeta msungo wakwe, o thavisa lisima awu i ku msungo wakwe, nguko ti fana ni loko a ti ko kaya misisi. 6 Nguko ngako wamsikati a si fenengeti msungo wakwe, a fanete kuwila misisi, kambe ngako ti txi dhanisa ku wamsikati e ti wila misisi mwendo kukaya misisi, a fanete ku wu fenengeta.

7 Kambe wamwamna kha fanela kufenengeta msungo wakwe, nguko ene txifananiso ni wudhumo wa Txizimu, kambe wamsikati wudhumo wa wamwamna. 8 Nguko wamwamna kha khukheli ka wamsikati, kambe mbwa wamsikati a khukhelako ka wamwamna. 9 I si nga eto dwe, wamwamna kha mahelwa wamsikati, kambe mbwa wamsikati a nga mahelwa wamwamna. 10 Ngu toneto wamsikati a fanete e va ni txikombiso hamsungo txa ku ti veka hahatshi, ni ngu mhaka ya tingilozi.

11 Hagari ka va va thumelako Mkoma, kha ku nga ni wamsikati ku si nga ni wamwamna, ni ku kha ku nga ni wamwamna ku si nga ni wamsikati. 12 Nguko wamsikati a ta ngu ka wamwamna ni wamwamna a velekilwe ngu wamsikati, kambe sotshe silo si vangilwe ngu Txizimu. 13 Lamulani anu mipune: Ina ta faneleka ku wamsikati e khongela ka Txizimu a sa fenengeta hamsungo? 14 Ina mtumbunuko kha wu mi gondisi ti to ngako wamwamna a txi fuya misisi ya hombe eto ti m’thavisa lisima kani? 15 Kambe ngako wamsikati a txi fuya misisi yo lapha, eto ta mninga lisima. Nguko a ningilwe misisi kasi kuvhaleta txivhikelo txa msungo. 16 Ngako ku di ni wo kari awu a lavako kukaneta mahungu yawa e seketela mamwani, athu kumweko ni dibanza da Txizimu kha hi nga ni timwani to pinda tiya.

17 Kambe hambiku ni mi ningako sileletelo siya, kha ni mi bongi, nguko hambiku mi tshanganako, eto kha ti mi vhuni, kambe to mi hoxota. 18 Nguko txo khata, ni pfa ti to ngako mi txi tshangana kota dibanza, ku ni mibhando hagari kwanu, eto ni nga kholwa ka tona. 19 Nguko ta laveka ti to kuva ni mitxawa hagari kwanu, kasi kuziwa ti to i mani a tsakelwako ngu Txizimu.

20 Nguko mbimo yi mi tshanganako, txikongomelo hi nga kuta dya Txilalelo txa Mkoma. 21 Nguko yi txi hoka mbimo yo dya Txilalelo txa Mkoma, mi khata ngu kujantara, i ku ti ti mahako ti to vamwani ve ta maneka va di ni nzala kasi vamwani va di levile. 22 Ina kha mi nga ni miti yo dya ni kusela ka yona? Mwendo mo kanyisa dibanza da Txizimu mi maha ti to ava va si nga ku ni txilo ve pfa tingana? Ni nga womba txani kwanu? Ina ni fanete ku mi bonga? Ni nge mi bongi ka toneto.

23 Nguko ati ni mi gondisako ngu ti ni nga gondiswa ngu Mkoma, ti to ka wusiku wu Mkoma Jesu a nga ningelwa ngu wona a to teka dipawa, 24 msana ko bonga a to di khema a txi khene: “Dipawa diya di emela mmidi wangu awu wu no ningelwa ngu mhaka yanu. Simamani mi maha tiya kasi ku ni khumbula ngu tona.” 25 Msana kova va di dyite, a to mahisa toneto kambe ngu kopo, a txi khene: “Kopo yiya yi emela mnoha wangu wa txitumelelano txa txiphya. Mbimo yi mi selako, mahani tiya kasi ku ni khumbula.” 26 Nguko yotshe mbimo yi mi dyako ni kusela kopo yiya, mi huwelela kufa ka Mkoma kala kuza e wuya.

27 Ngu toneto, mmwani ni mmwani awu a dyako ni kusela kopo ya Mkoma ti sa fanela, a na va ni mnando ka mmidi ni mnoha wa Jesu. 28 Kukhata m’thu ni m’thu a na ti xole apune, ngu kona a no dya dipawa ni kusela kopo. 29 Nguko awu a dyako ni kusela a si ti pfisisi ti to wu emela txani mmidi wa Mkoma, o ti lamula apune. 30 Ngu toneto, wungi wanu kha ma tsana ni ku ma lwala, ni ku mi fite.* 31 Kambe ngako hi txo ti xolisisa athu hipune hi tumbula ti to hi va mani, hi si na kulamulwa. 32 Hambi ka toneto, mbimo yi hi lamulwako, hi va hi txi kawukwa ngu Jehovha* kasiku hi si tsayiswe kumweko ni ditiko. 33 Ngu toneto vanathu, mbimo yi mi tshanganako kasiku mi dya Txilalelo txa Mkoma, emelanani. 34 Se ngako wo kari a txi pfa nzala a na dye mtini kwakwe, kasiku mbimo yi mi tshanganako, a si wi kulamulwani. Kambe ati timwani ti nga sala, na ta ti lulamisa mbimo yi ni no ta kheyo.

12 Vanathu ti txi ta ka tiningo ta moya, kha ni lavi ku mi sisalelwa ngu timhaka tiya. 2 Anu ma ti ziva ti to mbimo yi mi nga ti ngadi vamatiko mi txi khozela ni ku timetwa ngu sithombe so mbi ziva ni kwa mbi womba-womba, si txi mi timeta o va ha si nga txi mi yisa kona. 3 Ngu toneto, ti ziveni ti to kha ngaho awu a wombako ti to: “Jesu a ruketetwe” a txi womba-womba ngu moya wa Txizimu, ni ku kha ngaho awu a nga wombako ti to: “Jesu Mkoma” i si nga ngu moya wo sawuleka.

4 Ku ni tiningo to hambana-hambana, kambe moya wo sawuleka wumwewo, 5 ku ni tinzila to hambana-hambana to thumela vamwani, kambe kova ni Mkoma mmweyo, 6 ku ni mithumo yo hambana-hambana, kambe Txizimu ngu txona txi mahako totshe ka votshe. 7 Kambe moya wo sawuleka wu ti kombekisa ka mmwani ni mmwani kasi kuvhuna vamwani. 8 Nguko mmwani a ningwa wutxhari ngu moya wo sawuleka, mmwani a ningwa wuzivi ngu wona moya wo sawuleka, 9 mmwani a ningwa likholo ngu wona moya wo sawuleka, mmwani a ningwa kuhanyisa ngu wona moya wo sawuleka, 10 vamwani kumaha mithumo yo xamalisa, vamwani kuprofeta, vamwani kupfisisa timhaka to ta ngu ka moya wo sawuleka, vamwani kuwombawomba tidimi to hambana-hambana, vamwani kutxhamusela tidimi. 11 Totshe eto ti mahwa ngu wona moya wu wa wumwewo awu wu ningako m’thu ni m’thu ngu kuya ngu kuranda ka wona.

12 Kufana ni ku mmidi i ku wumwewo wu ku ni sihango sasingi, ni ku sotshe sihango sa mmidi hambiku i ku sasingi si lumba mmidi wumwewo, ngu toneto ni Kristu. 13 Hotshethu hi bhabhatisilwe ngu wona moya wu wa wumwewo, kasiku hi va mmidi wumwewo, mwendo hi Vajudha, mwendo hi Vagriki, mwendo hi tikhumbi, mwendo hi vathu vo khululeka, hotshethu hi amukete moya wo sawuleka.

14 Nguko mmidi kha wu wumbwi ngu txihango tximwetxo, kambe ngu sihango sasingi. 15 Ngako mkondo wu txi womba wu txi kha wona: “Akuwa ni singako dianza, kha ni lumbi mmidi,” eto kha ti wombi ti to wu na leka kulumba mmidi. 16 Ngako nzeve yi txi womba yi txi kha yona: “Akuwa ni singako diso, kha ni lumbi mmidi,” eto kha ti wombi ti to yi na leka kulumba mmidi. 17 I ti ku mmidi wotshe wova diso, hi ndi na engisisa kutxani kani? I ti ku mmidi wotshe ova nzeve, hi ndi na ku pfisa kutxani kunungela kani? 18 Kambe Txizimu txi vekile txihango tximwani ni tximwani ka mmidi nga ti txi nga ti lavisa tona.

19 I ti ku sotshe sihango o va txihango tximwetxo, mmidi wu ndi na va hani? 20 Kambe ditshuri ngu ti to ku ni sihango sasingi, kambe mmidi wumwewo. 21 Diso di nge sikoti kugela dianza di txi kha dona: “Kha ni ku lavi,” hambi msungo kha wu nge sikoti kugela mikondo wu txi kha wona: “Kha ni mi lavi.” 22 Kuhambana ni eto, sihango sa mmidi asi si wonekako nga kha si nga ni lisima sa laveka, 23 sihango si hi si wonako nga kha si nga ni lisima, ngu sona hi si ningako ngutu lisima, ni sihango si so soleka, ngu sona hi si khatalelako ngutu. 24 Kambe sihango si hi si wonako si di ni lisima kha si lavi kukhatalelwa ngutu. Kambe Txizimu txi mahile mmidi ngu nzila yo sihango so soleka si ningwa lisima, 25 kasiku ku si vi ni mibhando ka mmidi, kambe sihango sotshe si mana ku khatalelwa ngu nzila yo fana ni simwani. 26 Ngako txihango txo kari txi txi karateka, sihango simwani sa karateka kumweko natxo, ngako txihango txo kari txi txi guletwa, sotshe sihango sa tsaka kumweko natxo.

27 Anu mi mmidi wa Kristu, kambe mmweyo ni mmweyo wanu mi sihango asi si lumbako mkwanu. 28 Txizimu txi vekile sihango so hambana-hambana dibanzani, txo khata vapostoli, txa wumbidi vaprofeti, txa wuraru vagondisi, ngu msana ku ta mithumo yo xamalisa, kulondisa tiningo to hanyisa, kuvhuna vamwani, wusikoti wo thangela, kuwomba-womba tidimi to hambana-hambana. 29 Ina votshe vapostoli? Ina votshe vaprofeti? Ina votshe vagondisi? Ina votshe va maha mithumo yo xamalisa? 30 Ina votshe va ni ningo yo sikota kuhanyisa? Ina votshe va womba-womba ngu tiningo to hambana-hambana? Ina votshe vatxhamuseli va tidimi? 31 Kambe lwelani tiningo ta hombe. Ni ngadi ni txi na mi komba nzila ya yinene ngutu.

13 Ngako ni txi womba-womba tidimi ta vathu mwendo ta tingilozi, kambe ni si nga ni lirando, ni fana ni simbi ayi yi ngelengetako mwendo ngoma ayi yi mahako diguwa. 2 Hambi ni di ni ningo yo profeta ni kupfisisa sihunja so sawuleka, ni va ni likholo lo retha mimango, kambe ngako ni si nga ni lirando kha ni nga wa txilo. 3 Hambi ni txo teketela silo sangu ni ninga vamwani ve dya, ni ku ti guleta ngu kuningela mmidi wangu, kambe ngako ni si nga ni lirando kha ni vhuni txilo.

4 Lirando li ni pasiyensiya, li ni wumbilu. Lirando kha li nga ni mabava, kha li ti geli, kha li ti guleti, 5 lirando kha li mahi timhaka ta tingana, kha li lavi ati ti vhunako lona basi, kha li na txihenyelani, kha li nga ni txiviti. 6 Kha li tsaki ngu ti i ku to biha, kambe li tsaka ngu ti i ku ta ditshuri. 7 La tsanisela totshe, la kholwa totshe, la emela totshe, la timisela totshe.

8 Lirando kha li gumi. Ningo yo profeta yi na guma, ningo yo womba-womba tidimi to hambana-hambana yi na fuviswa, ningo ya wuzivi yi na fuviswa. 9 Nguko kha hi nga ni wuzivi wo hetiseka ni ku kha hi profeti ngu kuhetiseka, 10 ni ku mbimo yi ti no hoka to hetiseka, ati ti nga mbi hetiseka ti na fuviswa. 11 Mbimo yi ni nga ti mwanana, ni txi womba-womba nga mwanana, ni pimisa nga mwanana, ni alakanya nga mwanana, kambe aku ni ku wa hombe ni lekile wuwanana. 12 Nguko konku kha hi woni kwati,* ti fana ni ku hi txi ti buka ka txibuko txo mahwa ngu simbi, kambe eto ti na pinda ni ku hi na wona kha kwati. Konku kha ni zivi kha kwati, kambe ni na ta ti ziva kwati nga ti Txizimu txi ni zivisako tona. 13 Kambe konku kusala silo siya sa siraru: Likholo, themba, lirando, kambe txa hombe ka sotshe, lirando.

14 Ti karateleni kuva ni lirando, kambe simamani mi khutalela tiningo ta moya ngutu-ngutu yo profeta. 2 Nguko awu a wombawombako tidimi to hambana-hambana kha wombawombeli vathu, kambe a gela Txizimu nguko kha nga ho a ti pfisisako, hambi a txi womba-womba sihunja so sawuleka ngu kuthumiswa ngu moya wo sawuleka. 3 Nguko awu a profetako, wa aka, wa tsanisa, wa thavelela vamwani ngu mapswi akwe. 4 Nguko awu a wombawombako tidimi to hambana-hambana a ti aka ene apune, kambe awu a profetako a aka dibanza. 5 Ni txi navela ku motshenu mi womba-womba tidimi to hambana-hambana, kambe ngutu-ngutu ni lava to mi profeta. Nguko kuwomba ditshuri, awu a profetako mbwa hombe kupinda awule a wombawombako tidimi to hambana-hambana, hahanze ko e txhamusela kasi kuaka dibanza. 6 Kambe vanathu, ngako ni txo mi endela ni txi womba-womba tidimi to hambana-hambana ti na ni vhuna ngu txani toneto i si nga kuwombawomba ngu mtuletelo wa Txizimu, wuzivi, wuprofeti mwendo gondo?

7 Ti maheka ti ti fanako ni sitxhayatxhaya so fana ni msengele mwendo txitende, ngako si txo txhaywa ngu nzila yo fana, ti na zivanekisa kutxani ku atxi txi txhaywako msengele mwendo txitende? 8 Ngako mpundu wu si vetwi kwati* i mani a no ti lulamisela kuya yimbini? 9 Ngu ha kufanako, ngako mi si wombawombi mapswi aya ti hehukako ku ma pfisisa, vathu va na ti pfisisa kutxani ati mi ti wombako? Ti fana ni ku mi txi womba-womba ni moya. 10 Hamafuni ka wombwa-wombwa tidimi to hambana-hambana, kambe totshe ti ni titxhamuselo ta tona. 11 Ngako ni si ti pfisisi ti a wombako, na va m’wuyi ka ti a wombako, ni wule nene a wombawombako a na va m’wuyi ka ti ni wombako. 12 Ngu toneto, nananu aku mi lavako tiningo ta moya, lavetelani kutalelwa ngu tiningo ati ti no aka dibanza.

13 Awu a ku ni ningo yo womba-womba limwani lidimi, a na kombele ti to e si kota ku li txhamusela. 14 Ngako ni txi maha mkombelo ngu lidimi limwani hi ngani ni wombawombako, kambe i ningo yi ni nga ningwa ngu moya wo sawuleka, kambe mapimo angu kha ma wuyelwi. 15 Se ni na maha txani? Ni na maha mkombelo ngu kuya ngu ningo yi ni nga ningwa ngu moya wo sawuleka, ni gwita ni maha mkombelo ngu mapimo angu. Ni na embelela tindando ngu kuya ngu ningo yi ni nga ningwa ngu moya wo sawuleka, ni gwita ni embelela ngu mapimo angu. 16 Nguko, ngako u txi embelela ngu kuthumiswa ngu ningo ya moya wo sawuleka, vathu va ku hagari kwanu va na wombisa kutxani ku “Amen,” kuveti kha va ti pfisisi ti u wombako? 17 Ditshuri ti to awe wa kombisa kubonga ngu nzila ya yinene, kambe vamwani kha va akwi. 18 Na txi bonga Txizimu nguko ni ti kotako kuwombawomba tidimi to hambana-hambana kupinda motshenu. 19 Dibanzani ni wona i di tshuku kuwombawomba mtxhanu wa mapswi ngu mapimo angu kasi kugondisa vamwani, kupinda kuwombawomba 10.000 wa mapswi ngu lidimi limwani.

20 Vanathu mi nga ti maheni vanana ko pfisisa, kambe ti maheni vanana ka to biha mi ti maha vahombe ko pfisisa. 21 Nguko ti bhatwe ka mlayo ti to: “Ni womba-womba ka vathu vava ngu tidimi ta vawuyi ni sisofu sa vawuyi hambi keto kha va na mbi ni engisa kuwomba Jehovha.”* 22 Nguko kuwombawomba ngu tidimi to hambana-hambana kha ti thumi kota txikombiso ka va vo kholwa, kambe ka va vo mbi kholwa, aniko wuprofeti hi nga para vale vo mbi kholwa, kambe mbwa vale va kholwako. 23 Se ngako dibanza dotshe di txi tshangana wukhalo wumwewo ve khata kuwombawomba ngu tidimi to hambana-hambana, kubela vathu vo mbi kholwa, ina kha va na mbi pimisa ti to mi to xanga? 24 Se ngako motshenu mi txi profeta, se ku ta m’thu wo mbi kholwa a na ta kawukwa e tshumela e xolisiswa ngu votshe. 25 Sihunja sa mbiluni kwakwe si na ti komba aha ko e za e khizama e khozela Txizimu a txi: “Txizimu ngu ditshuri txiho hagari kwanu.”

26 Ti di ngeto vanathu, nji txani txi mi fanelako kumaha? Ngako mi txi tshangana, mmwani wa embelela, mmwani wa gondisa, mmwani a ni kutuletelwa ngu Txizimu, mmwani wa womba-womba ngu tidimi to hambana-hambana, mmwani wa txhamusela, totshelele ti na mahwe kasi ku mi akana ngu txanu. 27 Ngako ku di ni va va wombawombako tidimi to hambana-hambana va nga pindi vambidi mwendo vararu, mmwani ni mmwani a na wombawombe ngu dikhambi dakwe, kambe ku na maneke wo txhamusela. 28 Kambe ngako ku si nga ni wo txhamusela, a fanete ku e malala e ti wombawombela ene apune ni Txizimu. 29 Ngako vaprofeti vambidi mwendo vararu va txi womba-womba, ava vamwani ti lava ve pfisisa txhamuselo ya kona. 30 Ngako mmwani a txi amukela kutuletelwa ka Txizimu a di khalahatshile koneho, awule a wombawombako a fanete ku malala. 31 Nguko motshe mi nga profeta, kambe i si nga ngu mbimo yimweyo kasi ku votshe ve gonda ni ku tshumela ve tsaniswa. 32 Tiningo ta Txizimu ta kuprofeta ti fanete ti wonelelwa ngu vaprofeti. 33 Nguko Txizimu hi nga Txizimu txa vhilinganya, aniko Txizimu txa kurula kufana ni ti ti mahekako ka otshe mabanza a vasawuleki. 34 Vavasikati, va na malale mabanzani nguko kha va tumelelwi kuwomba-womba, hahanze keto va na ti veke hahatshi nga ha Mlayo wu wombako ngu kona. 35 Ngako va txi lava kugonda to kari va na wotise vavamna vawe mtini, nguko nda tingana ku wamsikati e womba-womba dibanzani.

36 Ina dipswi da Txizimu di tumbulukile kwanu? Ina nganu mokha mi nga di amukela?

37 Ngako m’thu a txi alakanya to mprofeti, mwendo ku a ni ningo ya moya wo sawuleka , ene a fanete kutumela ti to timhaka ti ni m’bhalelako sirumo sa Mkoma. 38 Kambe, ngako m’thu a txi kanyisa nene a na kanyiswa. 39 Ngu toneto vanathu, ti karateleni kuprofeta kambe mi nga tsimbeni vamwani kuwomba-womba ngu tidimi to hambana-hambana. 40 Aniko totshe ti na mahwe ngu fanelo ni mlayo.

15 Vanathu, ni lava ku mi khumbuxeta mayelano ni mahungu a manene aya ni nga mi txhumayela, aya mi nga ma tumela ni ku ema mi di tsani ka ona. 2 Ngu kona ha ka ona ma hulukiswa, ngako mi txi tsana ka mahungu aya ni nga txhumayela, hahanze kova kukholwa kwanu i di ka mahala.

3 Nguko kukhata, ni mi gondisile tiya nani ni nga gondiswa, ti to Kristu a fite ngu kona ha ka sionho sathu nga ha Mibhalo yi wombako ngu kona, 4 awu a nga kelelwa e tshumela e wuswa ngu ditshiku da wuraru nga ti Mibhalo yi wombisako tona, 5 ene a humelete ka Khefasi, e tshumela e humelela ka va va 12. 6 Ngu msana, a humelete ka 500 wa vanathu ngu mbimo ya yimweyo ava kutala kwawe va ku ngadi va txi hanya, hambi ku vamwani se va nga fa. 7 E gwita e humelela ka Jakobe ni ka votshe vapostoli. 8 Kambe, ngu magwito ka votshe, a ti wonekisile kwangu kota wu a nga velekiswa kuhawulwa.*

9 Nguko ni wa m’dotho ka votshe vapostoli ni ku kha ni faneleki kudhanwa ku ni mpostoli nguko ni xanisile dibanza da Txizimu. 10 Kambe, ngu kona ha ka wuxinji wa hombe wa Txizimu ni ni lungelo yo va mpostoli, ni ku wuxinji wuwa wa hombe hi nga wa mahala, nguko ni thumile ngutu kupinda votshe. Hambi keto hi nga ngu mtamo wangu, kambe ngu wuxinji wo mbi ni fanela wa Txizimu awu wu ku kwangu. 11 Mwendo ngani ni nga mi gondisa mwendo vamwani, mahungu ya hi ma txhumayelako ngu ona awa, ni ku ngu ona ya mi nga kholwa ka ona.

12 Aku hi txhumayelako ti to Kristu a wusilwe ka vakufa, ngu kutxani vamwani hagari kwanu va txi womba to kha ku nga ho kuwuswa ka vakufa? 13 Se ngako ku si ngaho kuwuswa ka vakufa, Jesu nene kha wuswa. 14 Se i di ti to Jesu kha wuswa, ho txhumayela mahala, ni ku likholo li hi ku nalo nda mahala. 15 I si nga eto dwe, hi tshumela hi va tifakazi ta makuhu ta Txizimu, nguko hi ningela wufakazi wa makuhu mayelano ni Txizimu, wa ti to txona txi wusile Kristu ka vakufa, kuve txona kha txa m’wusa i di ti to ngu ditshuri kha ku na mbi va ni kuwuswa ka vakufa. 16 Nguko i di ti to vafi kha va na mbi wuswa, Kristu nene kha wuswa. 17 I si nga eto dwe, ngako Kristu a sa wuswa likholo lanu kha li vhuni txilo ni ku mi simama ka sionho sanu. 18 Ni ku ava ni vona va nga fa va di ka Kristu va lovile da magwito. 19 Ngako themba yathu ka wutomi wuwa yi di ka Kristu ha tsetsisa* ngutu kupinda vathu votshe.

20 Kambe ditshuri ngu ti to Kristu a wusilwe kota ene wo khata kuwuswa ka vakufa. 21 Kufana ni ku lifo li nga wulela ngu mhaka ya m’thu wammweyo, kuwuswa ka vakufa ni kona ku na ta ngu kona ha ka m’thu wammweyo. 22 Nguko kufana ni ku vathu votshe va fako ngu mhaka ya Adhamu, votshe va na mana wutomi ngu ka Kristu. 23 Kambe mmwani ni mmwani a na wuswa ngu mbimo yakwe, kukhata i Kristu ngu msana kulondisa votshe ava va lumbako Kristu ka mbimo ya kuwuya kwakwe. 24 Msana kova a di fuvisile mifumo, wukoma ni mtamo, ngu magwito a na tshumeta mfumo ka Txizimu Tate. 25 Nguko, ene a fanete kufuma kala kuza Txizimu txi veka valala hahatshi ka mikondo yakwe. 26 M’lala wo gwita awu a fanelako kufuviswa lifo. 27 Nguko, “Txizimu txi vekile sotshe hahatshi ka mikondo yakwe,” kambe ngako ku txi wombwa ti to Txizimu txi vekile sotshe ka mikondo yakwe, kha kupatwi ni Txizimu a txi i ku txona txi nga veka sotshe hahatshi ka mikondo ya Kristu. 28 Ngu toneto, msana ka kuva sotshe si di vekilwe hahatshi ka mikondo yakwe, Mwanana nene a na ti veka hahatshi ka Wule a nga mninga mtamo wa kufuma sotshe, kasiku Txizimu txi va sotshe ka votshe.

29 Ngako i si nga toneto, va na txani ava va bhabhatiselwako kufa kani? Nguko i di ti to ava va bhabhatiswako kha va na mbi wuswa, ngu kutxani va txibhabhatiswa ngu txikongomelo txonetxo? 30 Hambi athu ngu kutxani mbimo yotshe hi txi wonisana ni tiphango? 31 Ditshiku ni ditshiku na wonisana ni phango yo lava kudawa. Vanathu, atiya ditshuri ngutu kufana ni ku i ku ditshuri ti to na tsaka ngutu ngu wuxaka wu mi ku nawo ni Jesu Kristu Mkoma wathu. 32 Kufana ni vathu vamwani, ani ni lwite ni sikakaka khe Efesu, se i di ti to vafi kha va na mbi wuswa “he dyeni hi sela nguko mangwana hi na fa.” 33 Mi nga ti kanganyiseni: “Vangana vo biha va onha mahanyelo a manene.” 34 Vanani ni mapimo mi maha ati i ku to lulama mi si mahi sionho, nguko vamwani kha va nga ni wuzivi wa Txizimu ni womba tiya kasi ku mi pfa tingana.

35 Vamwani va nga wotisa va txi: “Va na wusiswa kutxani vakufa? Va na va ni mmidi wo zumbisa kutxani?” 36 Dibhembawe! Mbewu kha yi na ku mila yi sa khata ngu kufa. 37 Atxi u phayako, hi nga mndonga wu wu nga kula, kambe i nyingi ya yidotho, yi nga va trigu, mwendo ya mbewu yimwani. 38 Kambe, Txizimu txi ninga mbewu mmidi ngu kuya ngu kuranda ka txona, mbewu yimwani ni yimwani yi ningwa mmidi wu wu dinganako yona. 39 Hi nga yotshe mimidi yi fanako, ku ni mimidi ya vathu, mimidi ya tihomu, mimidi ya sinyana ni mimidi ya sihaka. 40 Ku ni mimidi ya nzumani ni mimidi ya hamafuni, kambe wudhumo wa mimidi ya nzumani wa hambana ni ya hamafuni. 41 Wudhumo wa ditambo wa hambana ni wudhumo wa mtxima, wudhumo wa tinyeleti wumwani, nyeleti yimwani ni yimwani yi ni wudhumo wa yona.

42 Kumaheka ati ti fanako ngu kuwuswa ka vakufa, kuphaywa mmidi wu wu sinako wu txi wuswa mmidi wu wu si siniko. 43 Hi phaywa hi si nga ni wudhumo hi wuswa hi di ni wudhumo, hi phaywa hi si nga ni mtamo hi wuswa hi di ni mtamo. 44 Kuphaywa mmidi wa nyama kuwuswa mmidi wa moya. Aku ku ku ni mmidi wa nyama ku ni mmidi wa moya. 45 Nguko ti bhatwe ti to: “Adhamu wo khata a to va m’thu wu a hanyako,” Adhamu wo gwita a to va moya wu wu ningako wutomi. 46 Nguko hi nga m’thu wa mmidi wa moya a nga khata ene e ta, ku khatile m’thu wa nyama e ta, e gwita e ta m’thu wa moya. 47 M’thu wo khata a ta ngu hamafuni ni ku a mahilwe ngu lithulu, wa wumbidi a ta ngu nzumani. 48 Ava va nga mahwa ngu lithulu va fana ni m’thu wo khata awu a nga mahwa ngu lithulu, ava i ku va nzumani va fana ni wu i ku wa nzumani. 49 Aku hi fanako ni m’thu wu a nga mahwa ngu lithulu nanathu hi na fana ni wu a tako ngu nzumani.

50 Vanathu, na mi gela ti to, nyama ni mnoha kha si na kudya thomba ya Mfumo wa Txizimu, ni txi txi sinako kha txi na kusikota ku amukela kwa mbi sina. 51 Engisani! Ni lava ku mi gela txihunja txo sawuleka, hi nga votshe va no fa, kambe hotshethu hi na txitxwa. 52 Ngu mbimonyana yo fana ni kutsopeta ka diso ngu mbimo ya kuvetwa ka mpundu wo gwita. Nguko mpundu wu na pfala, se ava va nga fa va na wuswa va di ni mmidi wa kwa mbi sina ni ku athu hi txitxwa. 53 Nguko mmidi wu wu sinako, wu fanete kutxitxwa kasiku wu si sini ni ku mmidi wu wu fako wu fanete kutxitxwa kasiku wu va awu wu si siniko. 54 Kambe mbimo yi mmidi wu wu sinako wu no txitxwa wu va wu wu si siniko ni mmidi wu wu fako wu txitxwa wu va wu wu si fiko ku na hetiseka mapswi ya ma ku: “Lifo li na fuviswa da magwito.” 55 “Awe lifo ku hani kuxula kwako kani? Awe lifo yi hani vheneno yako kani”? 56 Vheneno yi yi tisako lifo txionho, ni ku txionho txi mana mtamo ngu mhaka ya Mlayo. 57 Txi na bongwe Txizimu, nguko txona txa hi ninga mtamo ngu kuthumisa Mkoma wathu Jesu Kristu.

58 Ngu toneto vanathu vo randeka, zumbani mi di tsani mi si nyekanyeki, mbimo yotshe mi va ni to tala to ti maha ka mthumo wa Mkoma, mi txi ti ziva ti to ka Mkoma mthumo wanu hi nga wa mahala.

16 Mayelano ni misengo yo vhuna vasawuleki, londiselani sileleto asi ni nga ninga dibanza da Galatiya. 2 Ngu ditshiku do khata ka divhiki, mmwani ni mmwani a na phawuse txo kari ngu kuya ngu si a ku naso, kasiku misengo yi si mahwi mbimo yi ni no hoka. 3 Ngu toneto, mbimo yi ni no hoka kheyo, ni na rumela vavamna ava mi nga va sawula ka mapasi aya mi nga bhala, kasiku ve heleketa misengo yanu Jerusalema. 4 Se ngako ti txi laveka to nanani ni tsula na tsula navo.

5 Kambe ni na ta kwanu ngako ni di pindile ngu Makedhoniya, nguko ni na pinda ngu kona, 6 kutilava na ta zumba ni nanu, mwendo ku ta heta mbimo ya wuxika* ni di kheyo, kasiku mi ni heleketa mbimo yi ni no khukha ni ya mu ni yako kona. 7 Nguko kha ni lavi kumaha ngu kupinda dwe, kambe na ta zumba ni nanu, ngako Jehovha* a txi ti tumelela. 8 Ngu toneto, na zumba khe Efesu kala kuhoka m’buso wa Pentekoste, 9 nguko ni tuletwe ditimba da hombe da mthumo, kambe ku ni vakaneti vo tala.

10 Mbimo yi Timoti a no hoka, thumani kwati nayo kasiku a si thavi hagari kwanu, nguko a maha mthumo wa Jehovha* kufana ni nani. 11 Ngu toneto ku nga vi ni m’thu wo m’kanyisa. M’heleketeni ngu kurula ka dipfhumba dakwe do ta kheno kwangu, nguko ani ni vanathu hi mu emete.

12 Mayelano ni mwanathu Apolosi, hi m’kuzetile ngutu ku e ta ni vanathu, kambe ene kha tiemisela kuta konku, kambe a na ta a txi mana mkhanjo.

13 Zumbani mi txi wonelela, mi tsana ka likholo, mi va ni txibindi,* ni mtamo. 14 Totshe ati mi ti mahako ti maheni ngu lirando.

15 Konkuwa vanathu ni lava ku mi kuzeta tiya, anu ma ti ziva ti to mwaya wa Stefanasi ngu wona wo khata kukholwa ka Kristu khe Akaya, vona va ti karata ngutu ko thumela vasawuleki. 16 Ngu toneto, ti vekeni hahatshi ka vathu vo nga evo, ni votshe ava va ti karatelako kuthuma kumweko navo. 17 Kambe na tsaka ngutu ngu ku ni ku ni Stefanasi, Fortunato, Akayiko nguko va vhaleta wukhalo wangu. 18 Nguko vona va tangalisile mbilu yangu ni yanu. Ngu toneto ningani lisima vathu vo nga evo.

19 Mabanza ya khe Aziya ma mi dungulela. Akila ni Priska, kumweko ni dibanza a di di tshanganako mtini kwawe, da mi rumela madungula ngu ka Mkoma. 20 Votshe vanathu va mi dungulela. Losanani ngu kupswopswana ko sawuleka.

21 Ani Paulo na mi rumelela madungula aya ni nga bhala ngu manza angu.

22 Awu a si randiko Mkoma a na ruketelwe. A na te Mkoma wathu! 23 Wuxinji wa hombe wa Mkoma wathu Jesu wu na ve ni nanu motshenu. 24 Lirando langu li na ve ni nanu motshenu mi ku kumweko ni Jesu Kristu.