Rebheka a ti lava kutsakisa Jehovha

Rebheka i ti dihorana di di nga ti dhunda Jehovha. Mwamna wakwe i ti Isaake. Nene a ti mu dhunda Jehovha. Rebheka ni Isaake va mananisile kutxani? A ti kombisile kutxani ti to a ti lava kutsakisa Jehovha? Konkuwa he gonde ngu ngene.

Isaake i ti mwanana wa Abrahamu ni Sara. Vona va ti zumba ka ditiko da Kanana. Vathu va Kanana va ti si dhundi Jehovha. Kambe Abrahamu a ti lava ti to Isaake e txhadha ni wu a dhundako Jehovha. Abrahamu a ti ni maxaka ma nga ti zumba Harani. Se ene a to ruma txithumi txakwe ku ya lavela msikati Isaake. Ti nga maha i di Eliyezeri a nga rumwa.

Eliyezeri a tsute ni sithumi simwani sa Abrahamu. Va ti ya wukhalo wa kule. Se vona va to teka 10 wa makamelu ni sakudya ni simwani. Eliyezeri a ndina m’zivisa kutxani msikati wu a lawako ngu Isaake? Mbimo yi va nga hoka Harani va ti ya ema hafuhi ni txisima. Nguko va ti ti ziva ti to mahorana ma ndina ta me ta reka mati. Ene a to khongela ka Jehovha a txi khene: ‘Ngako ni txi kombela dihorana ti to di ni ninga mati, se di ni ninga di tshumela di ninga ni makamelu, na ti wona to ngu dona dihorana di u nga di sawula.’

Koneho ku to humelela Rebheka a txi ta reka mati. Bhiblia yi khene a ti tshurile ngutu. Eliyezeri a to mu kombela mati, se ene a nje khene: ‘Ngu tona. Ni na kuninga ni tshumela ni ninga ni makamelu ako.’ Hi nga wona! Phela makamelu ma ti sela ngutu mati. Se ti lavile ti to Rebheka e wuyeletela kuya reka mati. U txi wona ha ka mfota, Rebheka a maha txani?— Eliyezeri a tsakile ngutu a txi wona to Jehovha a xamute mkombelo wakwe.

Eliyezeri a ningile Rebheka simaha so tshura ngutu. Se ene a rambile Eliyezeri ni sithumi simwani ti to e tsula navo m’tini kwawe. Eliyezeri a va gete ti to ngu kutxani a di rumilwe ngu Abrahamu. Ni ti Jehovha a nga xamulisa tona mkombelo wakwe. Maxaka a Rebheka ma tsakile nguko a nga ti lava kutxhadha ni Isaake.

U pimisa ti to Rebheka a ti ti lava kutxhadha ni Isaake?— Rebheka a ti ti ziva ti to Eliyezeri a ti rumilwe ngu Jehovha. Se mbimo yi maxaka akwe ma nga mu wotisa ti to wa ti lava kutsula Kanana, ene a ti khene: ‘Ina, na tsula.’ Ene a to tsula ni Eliyezeri. Mbimo yi a nga hoka Kanana, a to txhadha ni Isaake.

Jehovha a katekisile Rebheka nguko a nga maha ti a nga ti ti lava. Ngu kutsimbila ka malembe, Jesu a humile ka lixaka lawe! Nawe u txi maha ta tinene kufana ni Rebheka, Jehovha a na tsaka e tshumela e kukatekisa.