Jeremiya kha leka kuwomba-womba ngu Jehovha

Mbimo yimwani vathu va nga hi seka mwendo ku hi henyela mbimo yi hi bhulako navo ngu Jehovha. Eto ti nga hi maha hi leka kuwomba-womba ngu Txizimu. Ina nawe u ta nga tipfisa toneto?— Bhiblia yi womba-womba ngu mfana wu a nga ti dhunda Jehovha awu mbimo yimwani a nga ti lava kuleka kuwomba-womba ngu ngene. Ditina dakwe i Jeremiya. Konkuwa he bhuli to tala ngu ngene.

Mbimo yi Jeremiya i ngadi mfana, Jehovha a m’gete ti to e khumbulisa vathu ti to ve leka kumaha to biha. Kambe eto ti txikarata ka Jeremiya, nguko ene a ti thava. A gete Jehovha a txi khene: ‘Kha ni sikoti kuwomba-womba. Nguko ni mwanana.’ Kambe Jehovha ati khene: ‘U nga thave. Ni na kuvhuna.’

Se Jeremiya a gete vathu ti to Jehovha a ndina va tsayisa ngako va si txitxi mahanyelo awe. U pimisa ti to vathu va mahile ti va nga gelwa ngu Jeremiya?— Nadha. Vona va to mu seka ni ku mu henyela. Vamwani va ti lava ku m’daya! U pimisa ti to Jeremiya a ti pfisile kutxani?— Ene a ti thava. A ti khene: ‘Kha ni nambi wombawomba kambe ngu ditina dakwe.’ Kambe ina a lekile ngu ditshuri?— Ahim-him. Ene a ti mu dhunda ngutu Jehovha ni ku kha leka kuwombawomba ngu ngene. Se ngu mhaka ya ku a nga mbi karala, Jehovha a mu hulukisile.

Ngu txikombiso, majaha mamwani ma betile Jeremiya a mu ka txisima txi txi nga ti ni madhaka. Ene a singa ni mndiwo nem mati. Majaha onewo ma ti lava ti to Jeremiya e fa kona txisimani mule. Kambe a hulukile ngu kuvhunwa ngu Jehovha!

U gonda txani ka txikombiso txa Jeremiya?— Hambiku mbimo yimwani a nga ti thava, kambe kha leka kuwomba-womba ngu Jehovha. Mbimo yi u bhulako ngu Jehovha, ti nga maha vathu ve ku seka mwendo ku kuhenyela. Ti nga maha u va ni tingana mwendo u thava. kambe khwa fanela kuleka kuwomba-womba ngu Jehovha. Ene mbimo yotshe a na kuvhuna, nga ti a nga vhunisa tona Jeremiya.