TXIWOTISO 4
Ni nga maha txani ti to ni lulamisa tiphazamu tangu?
U NGA MAHA TXANI?
Ti wone u di ka txiemo txiya: Jothamo a ni vangana vakwe va khava bhola hafuhi ni ha ku nga ema mmovha. Mbimo yi bhola yi kensako, Jothamo e yi khava yi ya faya divhidro da mmovha wule wu nga emiswa.
I ti ku awe u Jothamo, u ndina maha txani?
ALAKANYISISA NGU TIYA!
U NI TINZILA TIRARU ATI U NGA TI TEKAKO:
Kupeka livilo.
Kulamba se u lumbeta mmwane.
Kutumela ti u nga maha ni kukombela divalelo, se u m’gela ti to u na ya gela vaveleki vako.
Ti nga maha mbilu yako yi kugela ti to sawula Nzila yo khata. Kambe tizive ti to awu a tumelako mnando wakwe kha dawi. U nga maha toneto ni loko u txo thuka u humelelwa ngu timwane.
SIVANGELO SA SIRARU ASI SI MAHAKO TI TO U TUMELA SIWONHO SAKO
Nguko nda tinene.
Bhiblia yi womba tiya: “Na hi txi navela ngu yotshe mbilu kutsimbila ngu nzila ya yinene yotshe mbimo.”—Vahebheru 13:18.
Ta hehuka kudivalela awu a tumelako siwonho sakwe.
Bhiblia yi womba ti to: “Awu a sisako siwonho sakwe kha na mbi kateka, kasi awule a ti tshanzisako a na mana wumbilu.”—Mavingwa 28:13.
Txa lisima ngutu, nguku ti tsakisako Txizimu.
Bhiblia yi womba tiya: “Nguko Mkoma wa henyela wule i ku m’bihi, kambe ene a engisana ni vale vo lulama.”—Mavingwa 3:32.
Karina a ku ni 20 wa malembe wa Estados Unidos, a bhaletwe multa ngu mhaka yo tutumisa ngutu mmovha, egwita e sisela tate wakwe. Kambe ngu kutsimbila ka mbimo a ti khene: “Papa a ti tumbute ti to ni ni multa. Toneto ti wusile txivhunye txa hombe!”
Hi gonda txani? Karina a khene: “Kusisa siwonho sako kha ti vhuni txilo. Nguko ngu kutsimbila ka mbimo ti na tumbuleka!”
U NGA GONDA TXANI KA SIWONHO SAKO
Bhiblia yi womba tiya: “Hotshethu ha wonha sikhati so tala.” (Jakobe 3:2) Ngako u txi tumela txiwonho txako, u na kombisa ti to m’thu wu u ti vekako hahatshi ni ku u ni wutxamuleli.
Nzila yimwane ngu gonda ka siwonho sako. Dihorana di va ku i Vera di khene: “Ngako ni txi maha txiwonho, ni zama kugonda txo kari ka txiwonho txangu. Eto ti ni vhuna ku ni va m’thu wa mnene ni kuziva to ni maha txani makhambi ya ma londiselako.” He wone ti to u nga timahisa ku txani toneto.
U nga maha txani u txo thuka u goha bhasikeni wa tate wako?
Kumalala, se tate wako kha na mbi ti tumbula.
Kugela tate wako ati ti nga maheka.
Kuwomba ati ti nga maheka, kambe u teka mnado wako u bhameka mmwane.
U nga maha txani u txo tanda sikambelo sa txikolwani ngu mhaka ya kwa mbi wuseta?
U na khawe si txo karata.
U na tumela ti to khwa wuseta.
U na khawe mgondisi o ku nyenya.
U nga zumbeli kualakanya ngu siwonho sa kale nguko eto, ti fana ni m’thu awu a tsimbitisako mmovha a txi wonetela ha ka txibuko
Konkuwa tshumela u alakanya ngu mhaka yile ya bhasikeni ni ya sikambelo, se u tiveka ka wukhalo wa tate ni mgondisi wako. I di ti to u tumete siwonho sako u alakanya ti to va di tipfisile ku txani? Va di tipfisile ku txani i di ti to u sisile siwonho sako?
Konkuwa khumbula txiwonho txi u nga maha ka dilembe di nga pinda se u xamula siwotiso si si londiselako.
U wonhile txani? Nji txani txi u nga maha ngu txiwonho txonetxo?
Ni to malala natxo.
Ni to lumbeta mmwane.
Ni tumete txiwonho txangu.
I di ti to khwa tumela txiwonho txako, u ti pfisile ku txani?
Ni pepile, nguko ni humile ka nyaka-nyaka!
Ti txi lava ni di wombile ditshuri, ni tisote.
U di mahile txani ti to u kota kululamisa txikarato txiya?
U gondile txani ka txiwonho txako?
U ALAKANYA TXANI?
Ngu ku txani vathu vamwane va si si tumeli siwonho sawe?
Vathu va na pimisa txani ngu ngawe ngako u txi zumbela ku sisa siwonho sako kambe u txi tumela siwonho sako, vathu va na pimisa txani ngu ngawe?—Luka 16:10.