Mbongola ya Bhalahamu

Vaisrayeli va ti ni 40 wa malembe va di txitingani, ni ku se va ti lwite tiyimbi ni matiko amangi ve tshumela ve ma xula. Konku se va ti gwimbile matenda awe hafuhi ni wukhalo awu wu nga txi dhanwa ku i Mowabhi. Mkoma wa Mowabhi awu a nga txi dhanwa ku i Bhalake a txi thava kuya lwa ni Vaisrayeli, nguku a txi pimisa ti to a va ndi na m’xula. Ngu toneto, ene a kombete dijaha adi va nga txi khona i Bhalahamu kasiku di tsula Mowabhi di ya womba timhaka to biha kasiku ti mahekela Vaisrayeli.

Kambe, Jehovha a gete tiya Bhalahamu: ‘U nga ya womba-womba kubiha ngu Vaisrayeli.’ Bhalahamu kha tsula Mowabhi. Se mkoma Bhalake a rumete dimwani didungula diya m’gela tiya: ‘Ngaku awe u txo ta, ani na thembisa ku kuninga sotshe asi u no si lava. Kambe, Bhalahamu a lambile kutsula Mowabhi. Se Jehovha a to m’gela tiya: ‘Tsula, kambe awe u nda ya womba basi ati ni no kugela.’

Se Bhalahamu a to lungisela mbongola yakwe e tsula Mowabhi. Kambe, ene a to maha txisungo txo ya womba timhaka to biha kasiku ti humelela Vaisrayeli. Ngu toneto, mbimo yi a nga txi tsula kheya, ku to humelela ngilozi hanzila. Bhalahamu a si yi woni ngilozi yile, kambe mbongola yakwe yi txi yi wona. Se kasiku yi vayilela ngilozi yile, mbongola yi to huma hanzila, Bhalahamu a to yi peka. Mbimo yi a nga txi ya masoni e tsimbila, ngilozi yile yi to tshumela yi humelela kambe. Mbimo yi mbongola yile yi nga zama kuvhika ngilozi, yi to ya ti khigeta ka mmuru yi banda mnenge wa Bhalahamu. Bhalahamu a to tshumela e yi peka kambe.

Va di simamile ve tsimbila, ngilozi yi to tshumela yi humelela. Kambe, ka dikhambi diya, mbongola kha ya sikota kuvayilela ngilozi, se yi to khalatsha hanzila. Se Bhalahamu a to yi peka kambe. Ka mbimo yile, Jehovha a mahile ti to mbongola yile yi womba-womba. Yona yi to wotisa Bhalahamu yi txi kha yona: ‘Kasi u ni bungutela ngu txani?’ Bhalahamu a to khene: ‘Ni ku peketela nguku awe wo ni dhanisa. Phela ni do kova ni ditxhari ni ndi na kudaya kona hawa.’ Se mbongola yile yi to khene: ‘Awe wa ni gadha otshe masiku, ina ni khala ku kumaha tonti?’

Se Jehovha a to maha ti to Bhalahamu e wona ngilozi. Ngilozi yile yi to khene: ‘Ina Jehovha kha kugela ti to khwa fanela kuya womba timhaka to biha kasiku ti humelela Vaisrayeli?’ Bhalahamu a to khene: ‘Ni onhile. Ni na tshumela ni tsula mtini.’ Se ngilozi yi to khene: ‘Podhi u simama u tsula Mowabhi, kambe u nda ya womba ati Jehovha a nga kugela.’

Ina Bhalahamu a gondile txo kari? Ahim-him. Mbimo yi a nga hoka Mowabhi, makhambi mararu, ene a zamile kuwomba timhaka to biha kasiku ti humelela Vaisrayeli. Kambe, Jehovha a mahile ti to Bhalahamu, e womba timhaka ta tinene ati ti ndi no mahekela Vaisrayeli. Msana keto, mbimo yi Vaisrayei va nga xasela Mowabhi, Bhalahamu a datwe. Ina ti sa nga va tshuko i di ku Bhalahamu a di ko tekela kuengisa Jehovha?