Mkombelo wa Ana

Dijaha do kari adi di nga ti dhanwa ku i Elikana, di txi enda dilembe ni dilembe ni mwaya dona kasi kuya khozela Jehovha ka didhoropa da Silo, i ku aha di nga ti kona ditenda da msengeletano. Ene a ti ni vasikati vambidi, i nga ti Ana ni Penina, kambe Elikana a txi dhunda ngutu Ana. Penina a ti ni vanana vavangi kambe Ana a si nga ni mwanana. Ngu mhaka ya toneto, Penina a txi zumbela kuxanisa Ana. Dikhambi dimwani, mbimo yi va nga di Silo, Elikana a woni Ana a txi dila. Ene a karatekile ngutu e tsula e ya womba-womba ni Ana, kambe kha ta vhuna txilo.

Ku di pindile mbimonyana, Ana a tsute e ya maha mkombelo. A dite ngutu a txi khene: ‘Jehovha, ngaku awe u txo ni ninga mwanana, na kuthembisa ti to na ta m’ningela kasiku e ta thuma ka ditenda da msengeletano wutomi wakwe wotshe.’

Mprista wa hombe Eli a si ti pimisi ti to Ana a txo maha mkombelo. Ene a txi pimisa ti to a ti ko leva. Ana a gete Eli a txi khene: ‘Ahim-him mkoma, kha na leva, no pfa kupandiseka ka hombe mbiluni kwangu. Ni txo maha mkombelo ka Jehovha.’ Eli a ti woni ti to a ti wombile ta walo, ngu toneto a gete Ana ti to Jehovha a ndi na mninga asi a nga ti m’kombete. Se Ana a to tsula mtini a ti pepile mbiluni kwakwe. Ti sa swela, Ana a velekile mwanana awu a nga mraya ku i Samuwele. Ti nga maha Ana a di tsakile ngutu, hi nga tona?

Ina Ana a ti divate ati a nga di ti thembisile Jehovha? Ahim-him. Mbimo yi Samuwele a nga leka kumama, ene a m’tekile e tsula nayo ka ditenda da msengeletano, e ya m’ningela ka Eli e gwita e womba tiya: ‘Wa ti khumbula ti to ni ti kombete to maha ka Jehovha? Ene a ni engisile e ni ninga mwanana wuwa, ene a na thumela Jehovha wutomi wakwe wotshe.’ Dilembe ni dilembe, Elikana ni Ana va txi tsula ve ya pfuxela mwanana wawe ni ku m’yisela simaha sa siphya. Msana keto, Jehovha a mahile ti to Ana e veleka 5 wa vanana, vafana vararu ni mahorana mambidi.