Sathani e duka Jesu

Msana ka kuva Jesu a di bhabhatisilwe, a tsute eya zumba txitingani. Ene atiya zumba 40 wa masiku a si dyi txilo, se a txi pfa nzala ya hombe. Sathani a tsute eya duka Jesu. Ene a ti khene: ‘Ngaku u di mwanana wa Txizimu gela marigwi yawa me txitxa me maha mapawa.’ Jesu a m’xamute ngu kuthumisa mibhalo a txi khene: ‘Kha ku laveki mndiwo basi kasiku m’thu e hanya. Ene a fanete kuengisa totshe ati Jehovha a ti wombako.’

Se, Sathani a tshumete e m’duka kambe Jesu a txi khene: ‘Ngaku u di Mwanana wa Txizimu ndaka ngu txitimwi ka dithempele diya nguku ti bhatwe ti to Txizimu txi na rumela tingilozi ti txi ta kukhamukela.’ Jesu a tshumete e xamula Sathani ngu kuthumisa mibhalo a txi khene: ‘Khwa fanela ku duka Jehovha Txizimu txako.’

Sathani a tshumete e duka kambe Jesu ngu dikhambi da wuraru. Ene a kombile Jesu yotshe mifumo ya hamafuni ni tithomba ta yona. E gwita e m’gela tiya: ‘Ngaku awe u txo ni khozela kumweko dwe, na kuninga yotshe mifumo yiya.’ Jesu a to tshumela e m’xamula kambe ngu kuthumisa mibhalo a txi khene: ‘Khukha Sathani. Hi fanete kukhozela Jehovha dwe.’

Sathani a to tsula, se tingilozi to kari ti to ta, ti ta ninga sakudya Jesu. Msana ka totshe tiya, Jesu a to khata kumaha mthumo wu Jehovha a nga ti mrumile: i ku kuwombawomba ka votshe vathu mayelano ni Mfumo wa Txizimu.Vathu va txi tidhunda ati Jesu a nga txi va gondisa niku kotshe mu Jesu a nga txi tsula vathu ni vona va txi tsula.