Jesu ni wamsikati wa Msamariya

Msana ka kuva fexta ya Paxkwa yi di gumile, Jesu ni vagondiswa vakwe va tsute Galileya. Mbimo yi va nga txi tsula kheya va pindile ngu Samariya, se Jesu a to ema hafuhi ni txisima kasiku e humula. Se vagondiswa vakwe va to tsula didhoropani veya xava sakudya.

Ku to humelela wamsikati wa Msamariya a nga txi ta reka mati txisimani haleya. Jesu a to mkombela mati o sela. Se awule wamsikati a to xamala a txi khene: ‘Ani ni Msamariya, Vajudha kha va wombawombi ni Vasamariya.’ Jesu a to mxamula a txi khene: ‘Awe khu ti zivi ti to ani ni mani. I di ku wo tiziva, u di na ni kombela mati, se ani ni di na kuninga mati a wutomi.’ Awule wamsikati a to khene: ‘U kho txani? Awe nem khu na txibhakitiyana para kureka mati.’ Jesu a to khene: ‘Awu a selako mati angu kha na mbi thuka e pfa ditora.’ Se awule wamsikati a to khene: ‘Tata ni ninge mati eyo.’

Jesu a to gela wule wamsikati ti to e tsula e ya dhana mwamna wakwe e ta nayo txisimani hale. Kambe awule wamsikati a m’gete ti to kha nga ni wamwamna. Jesu a wombile to a txi tiziva ti to awule wamsikati a di txhadhile 5 wa makhambi niku wamwamna wu a nga txi zumba nayo konku i singa mwamna wakwe. Awule wamsikati a xamate niku a ti tumbute ti to Jesu i ti mprofeti. Se ati khene: ‘Vasamariya va kholwa ti to va nga khozela Jehovha kona hawa Samariya kambe Vajudha va womba ti to hi fanete ku tsula Jerusalema. Ani na tiziva ti to a na ta Mesiya, ni ti to ene a na ta hi gondisa nzila ya yinene yo khozela Txizimu.’ Se Jesu a to m’gela timhaka ti a nga si khali ku gela mmwani m’thu, a txi khene: ‘Ani ngani Mesiya.’

Awule wamsikati a to tutuma e tsula didhoropani kwakwe eya gela tiya Vasamariya: ‘Ni wombawombile ni dijaha adi di zivako totshe ta wutomi wangu, ni pimisa ti to i Mesiya. Tsimbilani mi ya m’wona.’ Vasamariya vale va to tsula ni wule wamsikati txisimani kasiku ve ya engisela Jesu.

Se, Vasamariya vale va to kombela Jesu ti to e zumba didhoropani kwawe. Jesu a zumbile kona khe masiku mambidi a txi gondisa vathu, ni ku vathu vavangi va khatile kukholwa ti to ene i ti Mesiya. Msana ko engisela Jesu a txi gondisa, vathu va didhoropa dile va to gela wule wamsikati wa Msamariya va txi khona: ‘Konku ha tiziva ti to dijaha diya, ngu dona di no hulukisa ditiko.’