Jesu atxi tsimbila txitimwi ka mati

Hahanze ko hanyisa valwati ni kuwusa vathu vofa, Jesu a txi tikota kukontrolara moya ni mati. Msana kova a di kwete mmangoni kasi kuya maha mkombelo, Jesu a to wonetela Linene ka Galileya e wona to ku ti ni moya wa hombe. Se a woni vapostoli vakwe va di mu ka ngalava, kambe va si sikoti ni kutxunga ngu mhaka ya moya. Jesu a to txhika ngu mmangoni e relela Linene e tsimbila txitimwi ka mati eya amu ngalava yi nga ti kona. Mbimo yi vapostoli va nga wona m’thu a txi tsimbila txitimwi ka mati va to thava. Kambe Jesu ava gete tiya: ‘Ngani. Mi nga thaveni.’

Se Pedro a to khene: ‘Mkoma ngaku i di awe, ni gele ni ta kheyo u ku kona.’ Jesu a to gela Pedro a txi khene: ‘Ngono.’ Pedro a to tekela kuhuma ngalavani e khata kutsimbila txitimwi ka mati e tsula amu Jesu a nga ti kona. Kambe a di hafuhi ni kuhoka aha Jesu a nga ti kona, Pedro a to wona ti to moya i ti wa hombe se e khata kuthava. Se a to khata kubhwabhwamela. Pedro a to kwangula atxi khene: ‘Mkoma, ni hulukise!’ Jesu a to ñola diwoko da Pedro e m’gela tiya: ‘Ngu kutxani u nga thava kani? Wo mbina likholo kani?’

Mbimo yi Jesu ni Pedro va nga bela ngalavani moya wu to ema. Hi nga pimisa ati vapostoli va nga tipfisa tona mbimo yi va nga wona totshe tile. Vona va to kha vona: “Mkoma awe ngu ditshuri u mwanana wa Txizimu.”

Adiya hi nga dona basi dikhambi di Jesu a nga emisa moya. Ditshiku dimwani, Jesu ni vapostoli vakwe va txo txhatuka linene, se ene a to otela ngalavani mule. Mbimo yi a nga ti otete, ku to khata kupheka moya wa hombe ngutu. Mavimbi ma to khata kupeketela ngalava aha koza yi khata kutala ngu mati. Vapostoli va to wusa Jesu, va txi kha vona: ‘Mkoma! Phela hi nafa. Hi vhune!’ Jesu to wuka e gela tiya Linene: “Malala!” Ka yona mbimo yile, moya wu to ema. Se Jesu a to wotisa vapostoli vakwe a txi khene: ‘Anu kha mi nga ni likholo?’ Vapostoli va to gelana tiya ngu txawe: “Hambi moya ni linene sa maha ati asi gelako.” Vapostoli va gondile ti to ngaku va txi themba Jesu, va sa fanela kuthava txilo.