Mafu ma nava Paradhise

Jehovha a thembisile tiya: ‘Kha ku na mbi swa kambe ku txi maneka kupanda malwati ni lifo. Ani ni na bahulela yotshe mirongo tikhoheni ka vathu. Kha ngaho awu a no khumbula kambe timhaka to biha.’

Jehovha a txi lava ti to Adhamu ni Evha ve hanya va di tsakile ngu kurula ka jaradhi ya Edheni. Vona va ti fanete kukhozela Txizimu ve tshumela ve veleka vanana vavangi ve tata mafu. Adhamu ni Evha kha va engisa Jehovha, kambe Jehovha a ngadi atxi lava ti to mafu me va paradhise. Ka dibhuku diya, athu hi gondile ti to Txizimu txa maha totshe ati txi ti thembisako. Ni ti to Mfumo wa Txizimu wu na tisela vathu timhaka tatinene, ngaha Jehovha a nga thembisa ngu kona Abrahamu.

Sathani, madhimoni ni votshe vathu ava va mahako to biha, va na loviswa i singa kale. Votshe nzumani ni hamafuni va na khozela Jehovha. Kha ngaho wu a no lwala mwendo kufa. Ditshiku ni ditshiku, athu hi na wuka hi ti tsakile hi ti ni wutomi wawunene. Mafu ma nava Paradhise. Votshe vathu va nava ni sakudya sasinene ni miti yo vhikeleka. Vathu kha va na mbi ta maha timhaka to biha nem va na mbi ta dayisa vamwani. Sihari kha si nambi ta hi thava nem athu hi nambi ta si thava.

Hi nga pimisa ati ti no ta tsakisisa tona mbimo yi Jehovha a no khata kuwusa ava va nga fa. Athu hi na ta amukela vathu ava va nga hanya ka timbimo ta kale vo fana ni Abhele, Nowa, Abrahamu, Sara, Mosi, Rute, Dhavhidha ni Esteri. Vona va na ta hi vhuna kutxitxa mafu me va paradhise. Mbimo yotshe hi na ta va ni mthumo wa wunene wo wu maha.

Jehovha a lava ti to awe u ta vaho paradhise. Akheya awe u naya gonda timhaka tatingi mayelano ni Jehovha. Se nda lisima ku konku u tsanisa wungana wako ni Jehovha, ngaku u txi maha toneto, awe u nava mngana wakwe ngu ha ku si gumiko!