Ina wa ti pfisisa tifanelo ta Txizimu ati ti si wonekiko?

Mbimo yi u wonako mvala wa txiluva, nzuma yo tala ngu tinyeleti mwendo aha txi khukhelako kona txinambwana, ina wa kupfisisa kuxamalisa ka mtamo wa Jehovha? Mtumbuluko wu kombisa tifanelo ta Jehovha ati ti si wonekiko. (Var 1:20) Ngu ku ti ninga mbimo yo alakanyisisa ngu silo si hi si wonako madhawani kwathu, hi nga sikota kupfisisa mtamo, lirando wuzivi, wululami ni wuha wa Txizimu.—Mas 104:24.

Ngu sihi sivangwa sa Jehovha asi u si wonako ditshiku ni ditshiku? Hambi u txi hanya dhoropani u nga si wona sinyana ni mindonga. Kuwonisisa khakwati mtumbuluko wa Jehovha ti nga hi vhuna kuhunguta kuvilela, hi va ni mawonelo a manene ngu sikarato sathu ni ku engetela likholo lathu ka wusikoti wa Jehovha wo hi khatalela ngu ha ku si gwitiko. (Mat 6:25-32) Ngako u di ni vanana, va vhune ve wona tifanelo ta Jehovha to xamalisa. Mbimo yi hi yako hi wonisisa kwati mtumbuluko a wu wu nga hi ranganyeta, hi na tshuketa ngutu hafuhi ni M’vangi.—Mas 8:3, 4.

XALELA VHIDHIYU YI YI KU: KUTSHURA KA MTUMBULUKO KU KOMBISA WUDHUMO WA TXIZIMU—KUWONINGA NI MIVALA, U GWITA U XAMULA SIWOTISO SIYA:

• Ngu kutxani mivala yimwani yi txi txitxa loko hi txi yi wona ngu makhalo mamwani?

• Ngu kutxani hi txi wona mivala yo hambana-hambana nzumani?

• Ngu yihi mivala yo tshura ayi u yi wonako hafuhi ni mtini kwako?

• Ngu kutxani hi di fanete kuteka mbimo hi txi wonisisa khakwati mtumbuluko?

• Ngu tihi tifanelo ta Jehovha ati ti kombiswako ngu kuwoninga ni mivala?