“Ti hambaniseni ni sizimu sa walo”

Jakobe a ti ti ziva to Jehovha ngene a ku ni fanelo yo khozelwa hambiku Ene a nga si khali kuwomba txilo ngu tona. (Eks 20:3-5) Ngu toneto, mbimo yi Jehovha a nga gela Jakobe ti to eya Bheteli, ene a gete vathu va mtini kwakwe ti to ve tshotsha sizimu sa walo. Ngu msana e kelela sotshe si si nga ti thumiswa ka wukhozeli wa makuhu, kupata ni masinda o ti vhikela ka mimoya yo biha. (Gen 35:1-4) Kha ti kanakanisi ti to Jehovha a tsakete ati Jakobe a nga timaha.

Nyamsi wa ditshiku ko, hi nga khozelisa kutxani Jehovha ekha? Ngu kuvayilela totshe ti ti yelanako ni mimoya yo biha. Eto ti la kuwomba to hi fanete kutshotsha sotshe si si tsimbitisanako ni wukhozeli wa makuho, ni kuziva kusawula tifilimi ti hi nga ti xalelako. Ngu txikombiso, ti wotise: ‘Ina na hungala ngu mabhuku mwendo tivhidhiyo ati ti kombisako mavhampiro, mazumbi i ku vathu vofa ve gwita ve wuka, mwendo vathu va va mahako to mba toloveleka ka vathu? Ina ni wona nga misakano yi yi kombisako matiloti, wuloyi ni to fana ni toneto nga kha si nga ni phango?’ Hi fanete kuvayilela totshe ti Jehovha a ti vengako.—Mas 97:10.

XALELA VHIDHIYO YI YI KU: “LAMBANI KU TININGETELA KA SATHANI,” U GWITA U XAMULA SIWOTISO SIYA:

• 

  Ngu txihi txikarato txi txi nga humelela txigondo txi txi dhanwako ku i Paula?

• 

  Ngu kutxani i di wutxhari kulava txivhuno txa madhota ngako u txi ziva to txigondo txako txi ni txikarato txiya?

• 

  Ava va lavako txivhuno txa Jehovha va fanete ku ti hambanisa ni txani?

• Paula a sungile kumaha txani?

• Ka wukhalo wanu ngu tihi ti nga toloveleka to yelana ni madhimoni?