Ina U Ti Ti Ziva?

Ka mbimo ya kale, vathu va ti wu layithisa kutxani mndilo va di txitingani?

KA Genesisi ndima 22, Bhiblia yi womba ti to Txizimu txi gete Abrahamu ti to e khukha eya kule ni m’tini kwakwe ti to eya ningela digandelo. Yi khene: “Abrahamu a to teka tikhuni ta kuya hisa ngu tona mhamba, e rweka mwanana wakwe Isake, na ene a di tekile mndilo ni txikhwa e ñola manzani, se ve tsula vona vokha vavambidi.”—Genesisi 22:6.

Aku Bhiblia yi si txhamuseliko a ti vathu va nga ti wu layithisa tona mndilo, se ti la kuwomba ti to Abrahamu ni Isake va to teka mndilo ve tsula nawo? Mtxhamuseli mmwane wa Bhiblia a wombile ti to ti si na ku koteka ti to mndilo wu wu turako “ve tsimbila nawo mpfhuka wo lapha ngutu”. Kambe Abrahamu ni mwanana wakwe va tekile sotshe asi va ndino ya si thumisa kudhivela ngu sona mndilo.

Kambe vamwane va womba ti to mbimoni ya kale ti txi karata kudhivela mndilo. Hambiko ti nga ti si hehuki, va ti lava txo maha ve thela ka txona makala a mndilo. Sigondi simwane si womba ti to Abrahamu a to teka makala a mndilo va si nzi ku khukha. Ene a to ma beta ka txikadyana e ñola va txiya txitingani. (Isaya 30:14) Ti nga maha a di thumisile makala a madotho ni tikhuni ti to ve layitha ngu tona mndilo.