Ka mbimo ya kubhalwa ka Bhiblia vathu va ti wombisa kutxani mkama?

U MAHA txani ngako u txi lava kuziva to mkama muni? Ti nga maha u txi wona ka diwatxhi. U nga wona ti to diwora dimwedo ni 30 wa timeneti eko ni mitshikari. Ngako mngana wako a txo kuwotisa to “Mkama muni?” u nga wombisa kutxani?

Tiya ngu mu u zumbako kona. Ngu txikombiso, u nga khawe, “I 1:30” kumbe ku “I 13:30.” Ka makhalo mamwani u nga khawe “i hafu yo ya ka diwora da wumbidi,” tiwombako ti to kukelela 30 wa timeneti kuya ka diwora da wumbidi.

Ka mbimo ya kubhalwa ka Bhiblia vathu va ti wombisa kutxani mkama? Ku ti ni mawombelo o tala. Ka Mibhalo ya Txihebheru ku ni mapswi o fana ni “mixo,” “dhina,” “mitshikari,” ni “minova.” (Genesisi 8:11; 19:27; 43:16; Dhewuteronome 28:29; 1 Vafumeli 18:26) Kambe ku ni mu Bhiblia yi thumisako mapswi mamwani.

Kale kule ka vaisrayeli, ku ti tolovekile ti to ni wusiku ku va ni wu a pilelako e woneleta. Vaisrayeli va ti abanisa wusiku ngu sikhati siraru, asi si nga ti dhanwa ku ‘ngupilela.’ (Masalmo 119:148) Ka Valamuli 7:19, hi gonda mayelano ni “kupilela dhina ya wusiku.” Mbimo yi Jesu a nga velekwa ngu yona, Vajudha va ti abanisile wusiku ngu mune wa sikhati, kufana ni Vagriki ni Varoma.

Mabhuku a Tievhangeli ma womba-womba ko tala ngu wusiku wa kupilela. Ngu txikombiso, ka Matewu 14:25 ku wombwa ti to “Ngu txikhati txa wumune txa kupilela,” Jesu a tsimbite txitimwi ka mati e yela ngalava yi vagondiswa vakwe va nga ti ka yona. Jesu a wombile txidinganiso txiya: “Idiku nyamne wa m’ti wo yi ziva mbimo ya wusiku, yi di no ta ngu yona dikhokhokho, nga a txi zumba a di rinzete, ti to nyumba yakwe yi si faywi.”​—Matewu 24:43.

Jesu a womba-wombile ngu sikhati sotshe sa mune mbimo yi a nga gela vagondiswa vakwe kuzumba va di wonelete nguko va si “yi zivi mbimo yi a no wuya ngu yona nyamne wa m’ti, mwendo ni minova, mwendo ni hagari ka wusiku, mwendo mbimo yi wu embako mkuku, mwendo ni mixo.” (Marku 13:35) Mbimo yo khata ya kupilela, “ni minova,” yi ti khukhela kuswani ka ditambo kala ma 21:00. Ya wumbidi, i ku “hagari ka wusiku,” yi ti khukhela ma 21:00 kala dhina ya wusiku. Ya wuraru, i ti “mbimo yi wu embako mkuku,” yi ti khukhela ka dhina ya wusiku kala ma 3:00. Ti nga maha i di ka mbimo yiya ya kuemba ka mkuku ni wusiku ayi Jesu a nga ñolwa ngu yona. (Marku 14:72) Ya wumune, “ni mixo,” yi ti khukhela ma 3:00 kala mixo yo huma ditambo.

Ngu toneto, hambiku kale vathu va nga ti si nga ni diwatxhi kufana ni nathu nyamsi, va ti nayo nzila yo womba to mkama muni.