Mimoya hi nga vathu ava va khalako kuhanya ve gwita ve fa ha mafuni

Mimoya, ina yi ho? Ka wukhalo wa moya ku ni mimoya ya yinene ni yo biha. Ina yona mbathu ava va khalako kuhanya ve gwita ve fa ha mafuni?

Ahim him, hi nga tona. Mbimo yi vathu va fako, vona kha va pindi ditikoni muwa ve ya ka wukhalo wa moya, ngu ha va vangi va alakanyako toneto. Hi tizivisa ku txani toneto? Nguko diBhibhele di womba toneto. Dona dibhuku da ditshuri adi di tako ngu ka Txizimu txa ditshuri, i ku Jehovha. Ngene a nga maha vathu; wa tiziva ti to kumaheka txani loko vathu va txi fa.—2 Timoti 3:16.

DiBhibhele di womba ti to Txizimu txi mahile Adhamu, iku m’thu wo khata, “ngu lithulu la mafu”. (Genesa 2:7) Txizimu txi m’vekile ka paradhise, iku jaradhi ya Edheni. Idiku Adhamu a to engisa mlayo wa Jehovha, a sa nga fa; atxi ngadi e hanya kala nyamsi. Kambe mbimo yi ene a nga funya kha kwenye mlayo wa Txizimu, txona txi mgete tiya: “U na tshumelela mafuni, aya u nga humiswa ka ona. U lithulu u na tshumelela lithuloni.”—Genesa 3:19.

Ti womba txani toneto? Kasi Adhamu a ti hanya hayi a si se wumbwa ngu lithulu? A singa wukhalo. Ene i singa moya wa nzumani. Ene a singa ho. Kambe mbimo yi Jehovha a nga womba ti to Adhamu a ndina “tshumelela mafuni”, ene a ti womba ti to Adhamu a na fa. I singa ku ya ka wukhalo wa moya. Ka lifo, Adhamu a ndina va asi hanyi, eva adi walo. Kufa ngu pwateka ka wutomi.

Kambe ku wombwa txani ngu vamwane ava va nga fa? Ina ni vona va walo? Ndiye xamulo ya diBhibhele:

• “Sotshe [vathu ni sihari, ngu wumbidi ka sona] si ya ka wukhalo wa wumwewo. Sotshe si mahilwe ngu lithulu, se sotshe si tshumelela lithuloni.”—Eklesiasta 3:20.

• “Vafi kha va zivi txilo ni ka kudotho.”—Eklesiasta 9:5.

• “Lirando lawe, livengo lawe ni mabewu awe se si gumile.”—Eklesiasta 9:6.

• “Kha ku na mthumo hambi makungo, wuzivi mwendo wutxhari dithithani, wukhalo awu u yako ka wona.”—Eklesiasta 9:10.

• ‘[M’thu] a hinduka e maha lithulu la mafu; ka donedo ditshiku makungo akwe ma guma.’—Masalmo 146:4.

Ina u wona nga ta karata kupfisisa mibhalo yoneyo? Ti txi karata, alakanya ngu tiya: Ka timwaya to tala, vavamna va humisa male ti to ve xayisa mwaya. Kambe, ngako wamwamna a txi fa, mwaya wu sala wu xaniseka. Ti nga maheka msikati ni vanana va singa ni male yo xava sakudya. Ti nga maheka vavangi ve va dyiseta. Se konkuwa ti wotise: ‘Idi ti to wule wamwamna wa hanya ka wukhalo wa moya, ngu ku txani atxi leka mwaya wakwe wu xaniseka? A lekela txani kuvhikela mwaya wakwe ka vathu vo biha?’ Eto ti maheka nguko mibhalo yi womba ditshuri. Wamwamna eneyo kha ngadi ni wutomi, txi walo a kotako ku txi maha.—Masalmo 115:17.

Ina eto ti womba ti to vafi va na mbi ngadi ve tshumela ve hanya kambe? Ahim him, kha ti wombi tona. U nga karateke, hi na bhula ngu ta ku wuswa ka vakufa mbimo yi yi tako. Kambe eto ti womba ti to vathu vakufa kha va ti zivi ati awe u ti mahako. Vona kha va koti ku kuwona, ku kupfa mwendo kubhula ni nawe. Khu na ku va thava. Vona kha va na ku kuvhuna nem ku kuxanisa.—Eklesiasta 9:4; Esaya 26:14.