Vaphya—Mi na maha txani ngu wutomi wanu?
“NI LAVA kuthumisa wutomi wangu nguha ni nga kotako ngu kona”. Ku womba mphya wa tanga yo titshotshota. Nawe ngu ditshuri u lava ti to wutomi waku wu humelela. Kambe u nga ti kotisa ku txani toneto? Ngu txitalo sihaxa mahungu, vangana, hambi ni vagondisi va wena va nga womba ti to nzila yo u humelela ngu mana masaka a timale—i ku ti to “se u manyane”!
Hambi keto diBhibhele di bhasopisa vaphya ti to kulwela kumana tithoma ti fana ni “ku tikaratela ku ñola moya”. (Eklesiaste 4:4) Hi nga vangi vaphya va va manako male yo tala ni nduma yi va nga ti yi lavile. Kambe ava va yi manako ngu txitalo va ti mana va di kanganyisekile. Ti “fana ni dikaxa da diphanga”, ku womba mphya wa Britaniya wu a nga ti hingisana ni tigondo ta hombe. “U txi wona ngu mndani ka dona kha ku nga ni txilo”. Ditshuri ti to mithumo yimwane yi holela male yo tala ni nduma. Kambe kha yi enelisi “txilaveko txawe txa moya”. (Matewu 5:3, NM) Ku pinda eto, 1 Johane 2:17 yi womba ti to “mafu ma pinda”. Hambi u txi mana kuhumelela ka mafu awa ko va ka mbimoanyana.
Ngu toneto ti mahako ti to Eklesiaste 12:1 yi kuzetako vaphya ti to: “Khumbula Mvangi wako wa hombe ka masiku a wuphya wako”. Kha ti kanakanisi ti to nzila ya yinene yo thumisa wutomi ngu thumela JehovhaTxizimu. Kambe ti to u ti kota u fanete u faneleka ti to u mthumela. U nga mahisa ku txani? Nji txani txi txi patekako ka ku thumela Txizimu?
Ku Fanelekela ku va Fakazi ya Jehovha
Ti to tikoteka, ti lava u sakulela ku thumela Txizimu—kunavela koneko kha kuti nga nzala, hambi i di ti to vaveleki vako Makristu. Ti lava u ti ningetela ti to u aka wuxaka wako ni Jehovha. “Mkombelo wu nga kuvhuna ti to u aka wuxaka ni Jehovha”.—Masalmu 62:8; Jakobe 4:8.
Varoma 12:2 yi komba timwane ti u nga ti mahako. Yi womba tiya: “Phindukani a mu ka mapimo anu, kasiku mi ziva kuranda ka Txizimu”. Ina u ta nga kanakana ngu timwane ta ti u nga ti gonda? Ngu koneho maha ti diBhibhele di ti kuzetako ni ‘kuphindula mapimo ako’ ti to timhaka toneto ditshuri. Maha wuxolisisi u pune. Lera diBhibhele ni mabhuku aya ma nga seketelwa ka dona. Kugonda mayelana ni Txizimu hi nga mhaka yo themba wusikoti wako basi. Ti xavele mbimo yo alakanyisisa ngu ti u ti lerako, u tumelela ti to madungula oneyo me bela mndani ka mbilu yo fanekisela. Ngu nzila yoneyo lirando la wena ngu Txizimu li na kula.—Masalmu 1:2, 3.
Msana keto, zama kubhulela vamwane ati u ti gondako, u nga gela va u gondako navo txikolwa. Dizambo dimwane ngu txhumayela ngu m’ti ni m’ti. Ti nga maheka u mana va u gondako navo txikolwa mbimo yi u ku kutxhumayelani, ditshiku do khata ti nga maha u thava. Kambe diBhibhele di hi kuzeta ti to ‘hi si vi ni tingana ngu Evhangeli’. (Varoma 1:16) Awe u rwate madungula a wutomi ni themba! Se ngu ku txani u di ni tingana?
I di ti to vaveleki vako Makristu, ti nga maha u txi tsula navo ka mthumo wuwa. Kambe ina awe wa malala mwendo wo ningela marevhista ni siphephana basi? Mwendo awe u pune wa tikota ku thumisa diBhibhele u txi vhuna nyamni wa m’ti? I di ti to u maha toneto kombela txivhuno ka vaveleki mwendo ka Mkristu awu a nga vitwa dibanzani. Ti vekele makungo ya ti to u va mtxhumayeli wu a nga mbi bhabhatiswa wa mahungu a manene!
Ngu ku tsimbila ka mbimo, u nga navela ku ti ningetela ka Txizimu—i ku txisungo txa ku khukhela koneho kuya masoni. (Varoma 12:1) Kambe txisungo txonetxo hi nga mhaka yi yi gwitelako kwako wekha. Txizimu txi lava ti to votshe ve “fakaza ha kubasani ngu txisofu kasi ve mana ku hanyiswa”. (Varoma 10:10) Ka ditshiku da kubhabhatiswa, ti lava u khata ngu ku kombisa likholo lako ngu dipswi do guleka. U gwita u ya bhabhatiswa matini. (Matewu 28:19, 20) Ditshuri ti to kubhabhatiswa txisungo txa hombe. Kuthava ti to ngu ku tsimbila ka mbimo u nga maha to biha, kha ta fanela ku ku tsivela kumaha txisungo txonetxo. U txi themba mtamo wa Txizimu txona txi na ku ninga “mtamo wa hombe” wu wu no kuvhuna ku u tsana.—2 Vakorinto 4:7; 1 Pedro 5:10.
Msana ka m’bhabhatiso, awe u nava Fakazi ya Jehovha. (Isaya 43:10) Eto ti nga susumetela ngutu mahanyelo awena. Ku ti ningetela ti pata ‘ku u ti leka’. (Matewu 16:24, NM) Ti lava u veka didhawa minavelo ya wena u pune, u ‘lava kukhata mfumo wa Txizimu’. (Matewu 6:33) Ku ti ningetela ni m’bhabhatiso ti ku tulela mikhanjo yo maha toneto. A hi xolisiseni yimwane ya yona.
Mikhanjo yo Thumela Txizimu ka Mthumo wa Mbimo yotshe
● Mthumo wa Wunyaphandule wumwane wa mikhanjo yoneyo. Muhuweleli wu i ku nyaphandule i Mkristu wu a nga bhabhatiswa wu i ku txikombiso txa txinene wu a nga teka dizambo da dinene ti to e hete mawora ya 70 ni ku pinda a di ku txhumayelani ka mahungu a manene mtxima ni mtxima. Mbimo yi u hetako mbimo yo tala ku txhumayelani u ya u txi tshukwatisa wusikoti wako wo txhumayela ni ku gondisa. Wungi wa vanyaphandule va mani litsako ngu kuvhuna va va gondako navo diBhibhele ti to ve bhabhatiswa ve va Tifakazi ta Jehovha. Ngu wuhi mthumo wo ti hanyisa awu wu nga tisako litsako ni ku enelisa ku nga wuwa?
Ti to ve hetisisa wutixamuleli wonewo, wungi wa vanyaphandule va ti lavela mthumo wo ti hanyisa wa mbimo ya yidotho. Vamwane va va ku ni makungo yo va vanyaphandule va gondela mthumo wa mawoko txikolwani mwendo m’tini. Ngu magwito ko va u di bhute ni vaveleki, ina u ti woni i di tshuko ku maha kurso ya mthumo wa mawoko u di pasile 10a kalasi, kambe u nga susumetwe ngu kulava ngutu male kambe ku va kulava male yo ku khatalela ka mthumo wa mbimo yotshe.
Nyaphandule a khatalela ngutu wuthumeli wakwe ku pinda mthumo wo tihanyisa—e vhuna vamwane ti to ve mana wutomi wo mbi guma! Ngu ku txani u si ti vekeli makungo o va nyaphandule? Ngu txitalo mthumo wuwa wa wunyaphandule wu nga ku tulela malungelo mamwane. Ngu txikombiso vanyaphandule vamwane va rurete ka makhalo ya ku ku ni txilaveko txa vatxhumayeli va Mfumo. Vamwane va gondela lidimi limwane ti to ve thuma ka dibanza da ha va zumbako kona mwendo da wukhalo wumwane. Tsaniseka ti to mthumo wa wunyaphandule i nzila ya yinene yi yi wuyelisako!
● Txikolwa txa Vatxhumayeli va Mfumo wumwane wa mikhanjo. Txikolwa txonetxo txa mitxima yimbidi txi lulamisetwe vanyaphandule va va nga vitwa ava va tsakelako kusiya miti yawe ti to ve ya thuma ka wukhalo wu ku ku ni txilaveko. Vona va womba va di tsanisile, va txi khona, “Ngani wuwa! Ni rume!” ngu ku eteta nzila ya Mtxhumayeli wa hombe awu a nga ta thuma ha mafuni, Jesu Kristu. (Isaya 6:8; Johane 7:29) Kururela ka wukhalo wa kule ni m’tini ti pata ku tolovela kuhehukisa wutomi. Mndawuko, matxelo ni sakudya, sotshe eso si na va siemo so hambana. Eto ti nga pata kambe ni kugondela lidimi limwane. Txikolwa txiya txi vhuna vanathu va txiwamna ni va txisikati ni vatekani ava va ku hagari ka 23 kuya ka 65 wa malembe ti to ve sakulela tifanelo tawe ta moya ti va no ya ti lava ku tithumisa ka siavelo sawe ni wusikoti awu ti no va hehukela ti to ve thumiswa ngutu ngu Jehovha ni sengeletano yakwe.
● Mthumo wa Bhetele wu pata ku thuma ka dimwane da madhavi a hofisi ya Tifakazi ta Jehovha. Siro simwane sa mwaya wa Bhetele si thuma ngu ku kongoma ko maha mabhuku. Vamwane va avelwa ka mthumo wo vhuneta, ngu txikombiso ka mthumo wo lungisa nyumba ni simwane mwendo ku khatalela silaveko sa nyama sa siro sa mwaya wa Bhetele. Sotshe siavelo siya i lungelo yo sawuleka ya mthumo wa Jehovha. Ku pinda eto, vathuni va Bhetele ku si nga ni mhaka ti to va thuma hayi va tsaka ngu kuziva ti to mthumo wawe wu wuyelisa vanathu va ha mafuni kotshe.
Mbimo yimwane ku rambwa vanathu va va ku ni malungelo o sawuleka ti to ve ya thumela Bhetele. Kambe wungi wa vona va mana kurso va di ngadi ku khata. Vathumi va Bhetele kha va thumi ngu txikongomelo txo mana tithomba kambe va eneliseka ngu sakudya si va si manako, wukhalo wa ku otela ni simaleana so vhuna silaveko sawe. Mphya mmwane wu a thumako Bhetele a wu txhamusela ngu nzila yiya mthumo wakwe: “Wa tsakisa! Kha wu hehuki kambe ni katekisilwe ngutu ka mthumo wa Bhetele”.
● Mthumo wo aka wu tumelela vathu ti to ve maneka ko aka madhavi a ti hofisi ni Tinyumba ta Mfumo. Vathu va va thumako ka txienge txiya va dhanwa ku vathumi va ta wuaki. Awuwa mthumo wo sawuleka wo fana ni mthumo wa ku akwa ka dithepela da Salomoni. (1 Vafumeli 8:13-18) Vathumi va ta wuaki va mana mkhatalelo wo fana ni wu wu manwako ngu vathumi va Bhetele. Hi nga wona lungelo yi vanathu va vatxisikati ni vatxiwamna va ku nayo yo maha mthumo wu wu dhumisako Jehovha!
Thumela Jehovha ngu Moya Wako Wotshe
Kha ti kanakanisi ti to ku thumela Jehovha ngu yona nzila ya tshuko yo thumisa wutomi wako. Ti ngo txani u tivekela makungo o thumela Txizimu ka mthumo wa mbimo yotshe? Wombawomba ngu mthumo wonewo ni vaveleki vako, madhota a dibanza mwendo muwoneleli wa txigava. U txi alakanya ngu kuya thumela Bhetele mwendo ku ya Txikolwani txa Vatxhumayeli va Mfumo maneka ka mtshangano wa va va tsakelako ku ya thuma ka sienge soneso ka mtshangano wa m’ganga.
Ditshuri ti to hi nga votshe va va nga fanelekako ku belela mthumo wa mbimo yotshe. Mbimo yimwane wulwati, txiemo txa timale mwendo txiemo txa mwaya ti nga tsivela m’thu kumaha ti ti nga engeteleka. Hambi keto Makristu otshe ya ma nga ti ningetela ma fanete ku engisa txirumo txa diBhibhele: “Randa Mkoma Txizimu txako ngu yotshe mbilu yako ngu wotshe moya wako ni otshe mapimo ako”. (Matewu 22:37) Jehovha a lava ti to awe u maha ti u nga ti kotako ngu kuya ngu siemo sako. Ku si nga ni mhaka ti to siemo sako ngu sihi, thangetisa mthumo wa Jehovha ka wutomi wako. Tivekele makungo ya u nga ma hokelako a timhaka ta txitimwi. “Khumbula Mvangi wako ka masiku a wuphya wako”—u na katekiswa ngu ha ku si gumiko!
Hahanze ka mkongomiso wumwane, mibhalo ya Txihebheru yi thavislwe ka Tradução do Novo Mundo; Mibhalo ya Masalmo ni ya Txigriki yi thavisilwe ka Testamentu ya Yiphya ni Masalmo.
4/14