GONDO 8

Ngu ku txani hi txi ambala ngu nzila ya yinene hi txi ya ka mitshangano yathu?

Tate ni mwanana va txi ambala ti to veya mitshanganoni ka Dibanza — Islandiya

Mame ni mwanana va txi ti lulamiselela ku ya mitshanganoni ya Dibanza — Mexiko

Tifakazi ta Jehovha ta Guine-Bhissau ati ti nga ambala ngu nzila ya yinene — Guine-Bhissau

Mwaya wumwane wa Filipina wu txi ya mitshanganoni — Filipina

Ka mifota ayi yi ku ha ka dibroxura diya ina u yi woni nzila yi Tifakazi ta Jehovha ti nga ambala ngu yona ti di ka mitshangano ya tona ya dibanza? Ngu ku txani hi txi khatala ngutu ngu maambalelo ni ku ti lungisa kwathu?

Ti to hi kombisa txithavo ka Txizimu txathu. Ditshuri ti to Txizimu txi wona to pinda ati hi wonekisako tona. (1 Samuele 16:7) Ngu toneto, mbimo yi hi tshanganako ti to hi txi khozela, minavelo ya mbilu yathu ngu kombisa txithavo ka txona ni ka makristu kulothi. Hi txi tshuka hi maneka hi di masoni ka mlamuli wa wukomani ka hombe, hi nga karateka ngu ti hi nga ambalisa tona nga ku i ku wa txiemo txo guleka. Ngu toneto, nzila yi hi ambalako ngu yona ka mitshangano yathu yi fanete yi kombisa txithavo “ka mlamuli wa mafu otshe” Jehovha Txizimu, ni wukhalo awu hi mu khozelako ka wona.—Genesisi 18:25.

Ti to hi kombisa mahanyelo athu. Bhiblia yi laya Makristu ti to me ambala ngu “txithavo ni ku ti ñola”. (1 Timoti 2:9, 10) Kuambala ngu “ku ti ñola” ti womba kuvayilela siambalo asi si mahako hi wonwa hi di va nombwe, asi si wuselako vamwani minavelo ya timhaka ta mataho mwendo so wonekela. Ku va ni “txithavo” ti hi vhuna ti to hi sawula siambalo sa lisima asi si si dhuliko ngutu mwendo sa nduma. Matshina oneyo kha ma tsiveli ati m’thu a ti tsakelako. Hahanze ko womba to kari ngu txisofu, ma ambalelo athu ni ku ti lungisa ti nga “tshurisa gondo ya Mponisi wathu” ni ku “dhumisa Txizimu”. (Titosi 2:10; 1 Pedro 2:12) Ngu ku ambala ngu nzila ya yinene ka mitshangano yathu, hi nga vhuna vamwani ti to ve va ni mawonelo a manene ngu wokhozeli wa Jehovha.

U nga leke ku ya mitshanganoni ngu ku u ku singa ni siambalo asi si nga toloveleka mitshanganoni. Kha ti sungi ti to siambalo sathu si va so dhula mwendo so xamalisa ngutu, kasi si txa nga va si di basile ni ku si di ka mazumbelo a manene.

Hi txi ya khozela Txizimu, ngu ku txani ti di ni lisima kuambala kwati?
Ngu yihi milayo ayi yi hi kongomisako kusawula siambalo ni kutilungisa?