GONDO 4

I mani Jesu Kristu?

1. Ngu yahi makhato a wutomi wa Jesu?

1. Jesu a di nzumani; 2. Mwanana Jesu a di ni Maria ni Josefa; 3. Jesu a txi gondisa vanana — Tifanelo tihi ati ti nga txi maha Jesu e tshuketeleka?—MATEWU 11:29; MARKU 10:13-16.

Ku hambana ni vathu votshe va nyama, a si nze ku velekwa ha mafuni, Jesu ati hanya nzumani kota txivangwa txa moya. (Johane 8:23) Ene ive txivangwa txo khata txa Txizimu ni ku, a txi vhunetile ko vanga simaha si simwane sotshe. Ngene dwe awu a nga vangwa ngu Jehovha apune ni ku ti fanela ene dwe ku dhanwa ku Mwanana wa Txizimu “wa Mmweyo ekha.” (Johane 1:14) Jesu ati thuma kota M’wombawombeli wa Txizimu, se ngu toneto a dhanwako ku “Dipswi.”—Gonda Mavingwa 8:22, 23, 30; Vakolosa 1:15, 16.

2. Ngu ku txani Jesu a di tile hawa mafuni?

Txizimu txi rumete Mwanana wa txona ha mafuni ngu ku pindisa wutomi wakwe nzumani wu ya ka mrumbu wa mbiri ya Mjudha ditina i ku Maria. Ngu kota yeto Jesu kha va ni tate wa nyama. (Luka 1:30-35) Ha mafuni Jesu a tete (1) ku ta gondisa ditshuri mayelana ni Txizimu, (2) ku ta ningela txikombiso txa nzila yo engisa Txizimu hambi hi txi manana ni siduko, ni (3) ku ta ningela wutomi wakwe wo hetiseka wuva “mterulo.”—Gonda Matewu 20:28.

3. Ngu ku txani hi txi lava mterulo?

Mterulo, mtengo wu wu hakelwako ku na khulula m’thu awu a nga xungametwa ngu lifo. (Eksodha 21:29, 30) Lifo ni ku kumba i si nga ona makungo a Txizimu ku khukhela makhatoni. Hi ti zivisa ku txani? Txizimu txi gete wamwamna wo khata, Adhamu, ti to a txo thuka e maha ati diBhibhele di ti dhanako ti to “txiwonho” a ndi na fa. Ngu toneto, i ti ku Adhamu kha onha, a sa nga fa. (Genesisi 2:16, 17; 5:5) Ngu kuya ngu diBhibhele, lifo li “wulete” ha ditikoni ngu mhaka ya Adhamu. Se, Adhamu a wuletisile txiwonho ni txitsayiso txa kona i ku lifo, ka vathu votshe. Hi lava mterulo ti to hi khululwa ka lifo li hi nga ningwa ngu Adhamu.—Gonda Varoma 5:12; 6:23.

I mani a ndi no hakela mterulo ku na hi khulula ka lifo? Se, hi txifa hi mana txhatxhazelo ya siwonho sathu hipune. A walo m’thu wo mbi hetiseka a nga si kotako ku hakela siwonho sa vamwane.—Gonda Masalmo 49:7-9, NM.

4. Ngu ku txani Jesu a di fite?

Jesu a txi fa ka phande ya xanisa se e gwita e tshumetelwa ka wutomi ni kufuma kota Mkoma nzumani

Ku hambana ni nathu, Jesu ati hetisekile. Ngu toneto, ti si lavi ti to efa ngu mhaka ya siwonho sakwe—ene kha nga za e wonha. Jesu a fite ngu mhaka ya siwonho sa vamwane. Txizimu txi kombisile lirando la hombe ngutu ngu vathu ngu ku rumela Mwanana wa txona ku ta hi fela. Nene Jesu a kombisile lirando lakwe ngu ngathu ngu ku engisa Tate wakwe se e ningela wutomi wakwe ngu mhaka ya siwonho sathu.—Gonda Johane 3:16; Varoma 5:18, 19.

Xalela vhidhiyo Ngu kutxani Jesu a di fite?

5. Jesu a thuma txani konkuwa?

Mbimo yi a nga ti ha mafuni, Jesu a hanyisile vo lwala, e wusa vakufa ni ku khulula vathu ka sikarato. Ngu mamahelo oneyo a kombisile ati a no timaha mbimo yi yi tako ka vathu ava va mu engisako. (Matewu 15:30, 31; Johane 5:28) Msana kova Jesu a di fite, Txizimu txi mu wusile kota m’thu wa moya. (1 Pedro 3:18) Koneho, Jesu a tiya verela a di txinene ka Txizimu kala Jehovha e mu ninga mtamo wo fuma kota Mkoma wa mafu otshelele. (Vahebheru 10:12, 13) Jesu nkonkuwa, Mkoma wa nzumani, se valondeteli vakwe va huwelela “mahungu a manene” ha mafuni kotshe.—Gonda Dhaniele 7:13, 14; Matewu 24:14.

I si nga kale, Jesu ana thumisa mtamo wakwe kota Mkoma ti to e heta ku xaniseka kotshe ni va va ku vangako. Se votshe ava va kombisako likholo ka Jesu ngu ku mu engisa va na tidila ngu wutomi ka paradhesi ha mafuni.—Gonda Masalmo 37:9-11.

A ti to u mana madungula ya ma nga engeteleka, gonda tindima 4 ni 5 ta dibhuku di di ku khene, Bhiblia yi nga hi gondisa txani?