U nga tshuketisa ku txani ka Txizimu?

1. Ina Txizimu txi engisa mikombelo yotshe?

Txizimu txi ramba vathu va matiko otshe ti to ve tshuketa ka txona ngu mkombelo. (Masalmo 65:2, NM) Hambi keto, kha txi engiseli mwendo ku tumela yotshe mikombelo. Ngu txikombiso, mikombelo ya wamwamna awu a xanisako msikati wakwe kha yi na ku amukelwa. (1 Pedro 3:7) Txikombiso txa toneto, mbimo yi Vaisrayeli va nga ti ya masoni ni wubihi, Txizimu txi si engisi mikombelo yawe. Ti ha ku basani ti to mkombelo i lungelo. Hambi keto, Txizimu txa engisela mikombelo ya va va ku ni siwonho sa hombe ku nga ti va txi hunduka.​—Gonda Isaya 1:15; 55:7.

2. Hi nga wu mahisa ku txani mkombelo?

Mkombelo txienge txa wukhozeli wathu, ngu koneho hi fanela ku khongela ka Jehovha dwe. (Matewu 4:10; 6:9) Aku hi nga mbi hetiseka, hi fanete hi kombela ngu ditina da Jesu, ngu ku a nga fa ngu mhaka ya siwonho sathu. (Johane 14:6) Jehovha kha ti lavi ti to hi wuyeletela mikombelo yo bhalwa mwendo yo nga ndando. A lava ti to hi kombela ti txi ta ngu mbiluni.​—Gonda Matewu 6:7, Vafilipiya 4:6, 7.

Mvangi wathu wa engisa hambi mikombelo ya mbiluni. (1 Samueli 1:12, 13) Ene a hi ramba ti to hi maha mkombelo mbimo yihi ni yihi, ku fana ni mbimo yo otela ni yo wuka, hi txi lava ku dya ni ku nga ti hi di ka sikarato.​—Gonda Masalmo 55:22, NM; Matewu 15:36.

3. Ngu kona hawa ka txani Makristu me sengeletana?

Ku tshuketa ka Txizimu kha ti hehuki aku hi hanyako ka mafu o randelwa ngu vathu ava va kwa mbi na likholo ka Txizimu ni ku poyila makungo a txona o tisa ku dikha ha mafuni. (2 Timoti 3:1, 4; 2 Pedro 3:3, 13) Ngu toneto, hi lava ku tsaniselana ni vanathu.​—Gonda Vahebheru 10:24, 25.

Ku sengeletana ni vathu ava va dhundako Txizimu ti hi vhuna kuva vangana va wa Txizimu. Mitshangano ya Tifakazi ta Jehovha i lungelo ya yinene yo mana ku tsaniswa ngu likholo la vamwane.​—Gonda Varoma 1:11, 12.

4. U nga tshuketisa ku txani ka Txizimu?

U nga tshuketa ka Jehovha ngu ku alakanyisisa ngu ti u ti gondako ka Dipswi dakwe. Alakanyisisa ngu mithumo, sialakanyiso ni sithembiso sakwe. Ku alakanyisisa ngu mkombelo ti hi vhuna ku amukela lirando la Jehovha ni wutxhari wakwe ngu mbilu yotshe.​—Gonda Joxuwa 1:8; Masalmo 1:1-3.

Awe u nga tshuketa ka Txizimu ku nga ti u txi txi themba ni ku va ni likholo ka txona. Awe u fanete u khatalela likholo lako mbimo yotshe ngu ku alakanyisisa ngu ti u ti tumelako.​—Gonda Matewu 4:4; Vahebheru 11:1, 6.

5. Ku tshuketa ka Txizimu ti ku vhuna txani?

Jehovha wa khatala ngu va va mu randako. Ene a nga ku vhikela ka ti ti ndi no dayisa likholo lako ni themba yo hanya ngu ha ku si gumiko. (Masalmo 91:1, 2, 7-10) Ene a hi alakanyisa ngu mahanyelo aya ma nga hi tiselako dikhombo ka dihanyo dathu ni ku hi tekela litsako. Jehovha a hi gondisa ti to hi va ni wutomi wa wunene.​—Gonda Masalmo 73:27, 28; Jakobe 4:4, 8.