Ene a tsakisile Tate wakwe ni Jehovha

Wa di wona dihorana di di ku ha ka mfota?— I mwanana wa Jefte. Ditina dakwe kha di ngaho ka Bhiblia. Kambe a ti hi ti zivako ngu ti to di tsakisile tate wa dona ni Jehovha. Konkuwa he gonde ngu dona ni tate wa dona Jefte.

Jefte i ti wamwamna wamnene ni ku mbimo yotshe a ti gondisa mwanana wakwe ngu Jehovha. Ene a ti ni mtamo ni ku i ti mthangeli wamnene. Se Vaisrayeli va m’kombete ti to eva mthangeli va txi ya lwa ni valala vawe.

Jefte a kombete ka Txizimu ti to txi m’vhuna ti to e ya xula. Ene a thembisile ti to ngako a txi ya xula, awu a ndino khata ene e mu hingeta a ndina mu ningela ka Jehovha. M’thu wa kona a ndina thuma ni kuzumba ka ditenda da Txizimu mbimo yotshe. Ditenda i ti wukhalo wu vathu va nga ti thumela ka wona Txizimu. Se Jefte a ti ya xula! Wa m’ziva wu a nga khata ene e mu hingeta?—

Ina, i mwanana wa Jefte! Phela i ti ene ekha mwanana wa Jefte, kambe a ti fanete e mu ningela. Toneto kha ta m’tsakisa Jefte. Kambe u nga divali ti to ene a ti mahile txithembiso ka Jehovha. Se mwanana wakwe a ti khene: ‘Papa, maha ti u nga thembisa Jehovha.’

Mwanana wa Jefte nene a ti sa tsaka. Phela ku ya zumba ditendani ti ndina mmaha a si txhadhi nem ku va ni vanana. Kambe a ti ti lava ngutu kuhetisisa txithembiso txa tate wakwe ni kutsakisa Jehovha. Nguko eto i ti ta tinene ngutu kupinda kutxhadha ni ku va ni vanana. Se ene a khukhile m’tini kwawe e ya zumba ditendani.

U pimisa ti to ene a m’tsakisile tate wakwe ni Jehovha?— Ina! U txi m’dhunda Jehovha ni ku mu engisa, u na fana ni mwanana wa Jefte. Nawe u na tsakisa vaveleki vako ni Jehovha.