Mfumo wu wu no ta Fuma mafu otshe

Ina wa ti ziva ti to kuwomba-wombwa ngu Mfumo wuhi?— Ina. I Mfumo wa Txizimu, i ku Mfumo wu wu no ta txitxa mafu me va paradhise. Ina khu ti tsakeli kuziva to tala ngu Mfumo wuwa?—

Phela mfumo wumwani ni wumwani wu ni mkoma. Ni ku mkoma eneyo a fuma votshe va ditiko donedo. Wa m’ziva Mkoma wa Mfumo wa Txizimu?— I Jesu Kristu. Ene a zumba nzumani. I singa kale a na ta va Mkoma wa vathu votshe ha mafuni! U pimisa ti to hi na ta tsaka mbimo yi Jesu a no ta fuma mafu otshe?—

Hi na ta tsaka ngutu! Ka Paradhise yoneyo vathu va na mbi ta lwa mwendo kuya yimbini. Vona va na ta dhundana. Awalo wu a no ta lwala. Mabhofu ma na ta wona, maphanzeve ma na ta engisa, ava va si tsimbiliko va na ta tutuma ve tshumela ve ndaka. Ku na ta va ni sakudya so tala. Sihari si na ta zumba sotshe ni ku athu hi na ta sakana naso. Ava va nga fa va na ta wuswa. Vavamna ni vavasikati va hi nga gonda ngu vona ka dibroxura diya vo fana ni Rebheka, Rahabhi, Dhavhidha ni Elija ni vona va na ta wuswa! Ina khu tsakeli ku ta va hoyozela mbimo yi va no wuswa?—

Jehovha wa kudhunda ni ku a lava ti to u tsaka. Ngako u txi simama u gonda ngu ngene ni ku mu engisa, u na ta hanya ngu ha ku si gumiko ka paradhise yo tshura! Ina khu ti tsakeli ku ta hanya ka wukhalo wo nga tiya?—