Txizimu txi vangile nzuma ni mafu

Jehovha Txizimu i Mvangi wathu. Ene a mahile sotshe asi si kuho, asi hi si wonako ni si hi si kotiko ku si wona. Ene a khatile ngu kumaha tingilozi tatingi. Wa tiziva ti to njitxani ngilozi? Ngilozi m’thu wo fana ni Txizimu ni ku a zumba nzumani. Aku hi si tikotiko kuwona Txizimu, tingilozi ni tona kha hi na ku ti wona. Ngilozi yo khata ayi Jehovha a nga yi vanga yi ve m’vhuneteli wakwe. Ngilozi yoneyo, yi vhuni Jehovha kumaha silo sotshe asi si kuho so fana ni tinyeleti ni maplaneta. Yimweyo ya maplaneta oneyo i mafu, i ku wukhalo wo tshura awu hi zumbako ka wona.

Jehovha a lulamisete mafu kasiku vathu ni sihari si zumba ka ona. Jehovha a mahile ti to kuwoninga ka ditambo ku hoka hamafuni, ni ku a mahile mimango, tinene ni minambu.

Se a mahile txani msana keto? Jehovha a wombile tiya: ‘Ani ni na milisa mwasi ni mindonga.’ Se Jehovha a to milisa matawa, mafilori ni mindonga yayingi ayi yi velekako mihandu yo hambanelana. Msana keto, Jehovha a mahile sotshe sihari asi si kuho hamafuni. Awe wa si dhunda sihari? Ngu txihi txihari atxi u txi dhundako ngutu? Phela, Jehovha ngene a nga maha sihari asi si tsimbilako ngu minenge, asi si purumako, asi si sambelako ni si si tsimbilako ngu mrumbu. Ene a mahile sihari sa sidotho, so fana ni sinvunza ni sihari sa hombe, so fana ni maelefante.

Ngu msana, Jehovha a wombawombile ni ngilozi yo khata ayi a nga yi vanga a txi khene: ‘Ahi mahi vathu kasiku ve zumba mafuni.’ Vathu vonevo va ndi na hambana ni sihari, nguku vona va ndi na va ni wusikoti wo maha so maha, wo womba-womba, wo seka ni kutshumela ve bhula ni Txizimu. Ni ku vona va ndi na xayisa mafu ni sihari. Ina wa diziva ditina da wamwamna wo khata awu Jehovha a nga mmaha? Hi na ti wona ka gondo ayi yi londiselako.