Adhamu ni Evha kha va engisa Jehovha

Ditshiku do kari Evha a ti sate ekha, se kutile mnyoka wu ta m’wotisa tiya: ‘Ditshuri ti to Txizimu txa mi tsimba kudya yotshe mihando ayi yi ku ka Jaradhi yiya?’ Evha a to xamula mnyoka atxi khene: ‘Nadha, hi nga tona eto. Athu hi nga dya mihando ya yotshe mindonga ayi yi ku ka jaradhi yiya. Kambe Txizimu txi hi gete ti to kha ha fanela kudya mihando ya mndonga wumwewo, nguku hi txo dya, hi na fa.’ Se mnyoka wu to khene: ‘Makuho eyo! Anu kha mi na mbi fa. Kuwomba ditshuri, ngako mi txo dya m’hando wonewo anu mi na fana ni Txizimu.’ Ina eto i ti ditshuri? Ahim-him. Hambiketo, Evha a khotwe ka makuho oneyo. Mbimo yi Evha a nga txi wonetela m’hando wule a txo ya e navela ku wu dya. Se Evha a to wu dya e gwita e ninga Adhamu. Hambiku Adhamu a nga txi tiziva ti to ngaku vona va si engisi Txizimu va ndi na fa, ene a dyite m’hando.

Ni minovanyana, Jehovha a wombawombile ni Adhamu ni Evha, e va wotisa ti to ngu kutxani va di dyite m’hando wule. Evha a lumbetile mnyoka, se Adhamu a lumbetile Evha. Ditshuri ngu di do Adhamu ni Evha kha va engisa Txizimu. Ngu toneto, Txizimu txi va hingile ka jaradhi ya Edheni. Ni ku Txizimu txi vekile tingilozi ni ditxhari adi di nga txi tura ku nga mndilo ka txike atxi va nga txi bela ngu txona ka jaradhi ya Edheni. Ngu toneto, Adhamu ni Evha va si na kusikota kutshumela ve bela ka jaradhi ya Edheni.

Se kumahekile txani ngu mnyoka? Mnyoka kha wa tsayiswa nguku nga ha u ti zivako ngu kona, minyoka kha yi wombawombi. Kuwomba ditshuri, i Sathani a nga maha ti to mnyoka wule wu womba-womba kasiku wu khanganyisa Evha. Wa tiziva ti to i mani Sathani? I ngilozi yo biha ayi yi tshumelako yi dhanwa ti to i Dhawulosi. Jehovha a wombile ti to Sathani nene a ndi na tsayiswa. Ka mbimo ayi yi tako, Jehovha a na ta lovisa Sathani. Ngu toneto, Sathani kha mbi swa e kuzetela kambe vathu kumaha to biha.