Matimu a Jobe

Kale ku ti ni dijaha adi di nga txi dhanwa ku i Jobe, di nga txi zumba ka ditiko da Uzi. Jobe i ti mngana wa Txizimu. Ene a ti ganyile ngutu ni ku a txi ti dhunda kuvhuna sisiwana, vavasikati vo felwa ngu vavamna vawe ni vanana ava va nga si nga ni vaveleki. Ina aku Jobe a nga txi maha tatinene a si na kumanana ni sikarato? Ahi wone ati ti nga m’humelela.

Jobe asi tizivi ti to Sathani a txi m’wonetela. Kambe, Jehovha a txi tiziva, ngu toneto a wotisile tiya Sathani: ‘Ngu kutxani u txi wonetela Jobe? Kha ku nga ni m’thu hamafuni wo fana ni nene. Ene mbimo yotshe wa ni engisa ni ku a maha ati i ku tatinene.’ Se Sathani a to khene: ‘Ditshuri ti to Jobe wa kuengisa. Nguku awe khu m’leki e humelelwa ngu to biha ni ku wa mninga silo sasingi sasinene so fana ni tithembwe ni sihari. Se thavisa konku sotshe asi aku naso, hi na wona ti to ina a na simama e maha mngana wako.’ Jehovha a to khene: ‘Ngu tona! Maha ati u ti lavako ngu ngene, kambe u nga m’daye.’ Ngu kutxani Jehovha a di lekile Sathani e maha toneto? Nguku Jehovha a ti mthemba ngutu Jobe ni ku a txi tiziva ti to Jobe a di na simama eva mngana wakwe hambi txiemo txi txo karata ngutu.

Sathani a khatile kumaha ti to Jobe e humelelwa ngu timhaka to biha. Kukhata, a mahile ti to sihari sa Jobe si hiswa ni kupiwa e tshumela e maha ti to sithumi asi si nga txi khatalela sihari sa Jobe si dawa. Kambe ti sa enela, Sathani a tshumete e maha timwani to thisa ngutu. Mbimo yi vanana va Jobe va nga di ka fexta, Sathani a mahile ti to nyumba ayi va nga ti ka yona yi va wela se ve fa votshe. Jobe a pandisekile ngutu ngu totshe tiya, kambe ene a simamile eva mngana wa Jehovha.

Sathani a txi lava kuengetela kuxaniseka ka Jobe. Ngu toneto, ene a mahile ti to mmidi wa Jobe wu tala ngu silonda asi si nga txi panda ngutu. Jobe asi ti zivi ti to ngu kutxani a nga txi mahekelwa ngu totshe tile. Hambiketo, ene kha leka kuva mngana wa Jehovha. Ngu toneto, Jehovha a tsakile ngutu.

Ngu msana, Sathani a mahile ti to vangana va Jobe veya m’geletela makuhu. Vangana vonevo va wombile ti to ‘Jobe a ti mahile to biha ni ku Txizimu txi txo mtsayisa.’ Jobe a wombile ti to asi khali kumaha timhaka to biha. Kambe, ene a khatile kupimisa ti to Jehovha ngene a nga txi mmahela sikarato sile, se a sote Jehovha ni kuwomba ti to ati a nga txi mmahela i singa tatinene.

Ahale ku ti ni mfana awu a nga txi dhanwa ku i Elihu, a nga txi engisela dibhulo da Jobe ni vangana vakwe. Ngu msana a to khata kuwombawomba atxi khene: ‘Totshe ti mi wombetelako makuhu. Athu ti nga maha hi si tipfisisi ti to ngu kutxani Jehovha a di lekile timhaka tiya to biha ti maheka, kambe ha tsaniseka ti to ene kha na kuthuka e maha timhaka to biha. Ene wa ti wona totshe ati ti mahekako ni ku wa vhuna vathu mbimo yi va wonisanako ni sikarato.’

Ngu msana keto, Jehovha a wombawombile ni Jobe atxi khene: ‘Ngu kutxani awe u txi ni ninga mnandu? Aku u si ti ziviko ti to ni mahisile kutxani nzuma ni mafu, u na ti zivisa kutxani ti to ngu kutxani u txi mahekelwa ngu tiya?’ Se Jobe a to khene: ‘Jehovha ni divalele, ni phazamile. Ani na ti ziva ti to awe u ni mtamo wa hombe ngutu kupinda votshe, ani no va m’thu nga tonti, nem kha ni zivi txilo. Ni divalele ngu totshe ati ni nga womba.’

Msana ka totshe tiya, Jehovha a hanyisile Jobe ka malwati akwe ni ku a mningile silo sasingi ngutu kupinda asi a nga ti naso kale. Jobe a hanyile malembe amangi ni ku a ti tsakile ngutu. Jehovha a mahile totshe tiya nguku Jobe mbimo yotshe a txi m’engisa, hambi mbimo yi ti nga txi karata. Awe ko? Ina wa ti lava kutsakisa Jehovha kufana ni Jobe? Simama u va mngana wa Jehovha ti singa ni mhaka ni ti ti humelelako.