Txizimu txi womba-womba ni Mosi

Mosi a zumbile Midhiyani kudingana 40 wa malembe. A kheya ene a tiya txhadha e va ni vanana. Ditshiku dimwani, ene a ti hafuhi ni Mmango wa Sinayi a txi dyisa tinvuta, se a woni timhaka to mbi toloveleka. Ku ti ni mndonga wa wudotho wu nga txi tura kambe wu si hyi! Mosi a to tshuketa ngu hafuhi kasiku eya wona bhem ati ti nga txi maheka. Mbimo yi a nga hoka hafuhi ni mndonga wule a to pfa dipswi di txi kha dona: ‘Mosi! Ema koneho u ku kona, xonipha wukhalo wu u ku ka wona, ambula masandaliya.’ Phela i ti Jehovha awu a nga txi womba-womba ni Mosi ngu kuthumisa ngilozi.

Mosi a to thava e fenengeta khohe yakwe. Jehovha a to khene: ‘Ani ni wona to Vaisrayeli va xaniseka ngutu khe Egipta. Se ni lava ku va humisa kheya kasiku veya zumba ka wukhalo wawunene. Ni sawute awe kasiku u ya humisa vathu vangu Egipta.’ Ti nga maha Mosi a di thavile mbimo yi Jehovha a nga m’gela tile.

Ngu toneto, Mosi a wotisile tiya: ‘Se ni na va gela txani ngaku va txo ya ni wotisa ti to i mani a nga ni ruma kuya va vhuna?’ Jehovha a to khene: ‘U na ya va gela ti to ni rumilwe ngu Jehovha, Txizimu txa Abrahamu, Txizimu txa Izaki ni Txizimu txa Jakobe.’ Se Mosi a to khene: ‘Ni na txani ngaku va si kholwi ati ni noya va gela?’ Aku Mosi a nga txi ngadi a txi thava, Jehovha a mmahete txikombiso txa ti to a ndi na mvhuna. Ene a rumile Mosi ti to e rinza ndonga yakwe hahatshi. Mbimo yi ndonga yakwe yi nga wa hahatshi yi to txitxa yi maha mnyoka. Mbimo yi Mosi a nga nõla mtxila wa mnyoka wule, wona wu to tshumela wu txitxa wu maha ndonga. Jehovha a m’gete tiya: ‘Mbimo yi Vaisrayeli va no kuwona u txi maha tiya, va na kholwa ti to ngani ni nga kuruma.’

Mosi a to khene: ‘Mkoma ta ni karatela kuwombawomba masoni ka vathu.’ Se Jehovha a to thembisa tiya Mosi: ‘Ani ni na kugela ati i ku para u ya womba, mkomwako Aroni a na tsula ni nawe.’ Koneho, Mosi a to tsaniseka ti to Jehovha a ndi na mvhuna, se ene a to tsula ni msikati wakwe ni vanana vakwe Egipta.