Jehovha e sawula Joxuwa

Mosi a khatalete Vaisrayeli kudingana malembe amangi, kambe se a ti hafuhi ni ku fa. Ngu toneto, Jehovha a m’gete tiya: ‘Awe khu nambi hokisa Vaisrayeli Kanana i ku ditiko di ni nga va thembisa. Kambe ni na kuleka u wona ditiko donedo ngu kule.’ Se Mosi a kombete Jehovha ti to e sawula dijaha dimwani kasiku di khatalela Vaisrayeli. Se Jehovha a sawute Joxuwa.

Mosi a gete Vaisrayeli ti to aku ene a nga ti hafuhi ni ku fa, Jehovha a ti sawute Joxuwa kasiku eva thangela kala ve hoka Kanana. Se Mosi a gete tiya Joxuwa: ‘U nga thave! Jehovha a na kuvhuna.’ Ngu msana keto, Mosi a kwete ka mmango awu wu nga txi dhanwa ku i Nebho. Ahale Jehovha a kombile Mosi dotshe ditiko di a nga di thembisile kuninga Abrahamu, Izaki ni Jakobe. Se Mosi a fite adi ni 120 wa malembe.

Jehovha a gete tiya Joxuwa: ‘Txhatuka mnambu wa Jordhani u bela Kanana. Ani ni na kuvhuna kufana ni ti ni nga vhunisa tona Mosi. Se ditshiku ni ditshiku u fanete kulera yotshe milayo ayi ni nga ninga Vaisrayeli. U nga thavi, va na ni txibindi. Tsula u ya maha totshe ati ni nga kugela.’

Se, Joxuwa a rumile sipiyawu simbidi si tsula ka didhoropa da Jeriko, adi di nga ti maneka ka ditiko da Kanana. Ka matimu aya ma londiselako hi na ta wona to tala ati ti nga maheka kheya. Mbimo yi Sipiyawu si nga wuya, si di ta womba ti to ayile i ti mbimo ya yinene kasiku ve bela ka ditiko da Kanana. Ngu toneto, Joxuwa a gete Vaisrayeli ti to ve ti lulamisela nguku va ndi na txhatuka mnambu wa Jordhani. A tshumete e gela vaprista ava va nga txi rwala Dibhokiso da Txitumelelano ti to ve thangela. Mbimo yi va nga hoka ka mnambu wa Jordhani, va woni ti to va si na ku sikota kutxhatuka nguku mnambu wu ti ni mati amangi. Kambe, mbimo yi vaprista va nga beta minenge ka mati, mnambu wu to phwa! Vaprista va to ema hagari ka mnambu va txi emela ti to votshe Vaisrayeli ve pinda. Ngu ditshuri, atile ti khumbuxetile Vaisrayeli a ti Jehovha a nga va mahela ka Linene lo Bhilivila.

Ngu magwito, msana kova ku di pindile masiku amangi, Vaisrayeli va hokile ka ditiko adi Jehovha a nga di va thembisile. Vona va ndi na aka tinyumba ni madhoropa ni ku va ndina phaya asi va ndi no si lava. I ti ditiko do pfuna ngutu ni ku di ti tshurile.