Rahabhi e sisa sipiyawu

Mbimo yi sipiyawu si nga hoka ka didhoropa da Jeriko si diya zumba mtini ka wamsikati awu va nga txi khona i Rahabhi. Mbimo yi mkoma wa Jeriko a nga tiziva eto, a rumile masotxhwa me tsula mtini ka Rahabhi kasiku me ya ñola sipiyawu sile. Mbimo yi masotxhwa ma nga hoka mtini ka Rahabhi, ene a to gela sipiyawu sile ti to siya barama. E gwita e gela tiya masotxhwa yale: ‘Sipiyawu si tiho hawa, kambe si tsute, tutumani ti nga maha mi si mana.’ Msana kova masotxhwa yale ma di tsute, Rahabhi a to dhana sipiyawu sile e gwita e womba tiya: ‘Ani na ti ziva ti to Jehovha a lava ku ningela didhoropa da Jeriko ka Vaisrayeli. Kambe, ani ni na mi vhuna. Ngu toneto, no kombela, ni thembiseni ti to mi na ni hulukisa ni mwaya wangu.’

Se sipiyawu sile si to kha sona: ‘Athu ha kuthembisa ti to votshe ava va nova va di nyumbani muwa kwako va na mbi fa. Kambe, u fanete kusunga ngoti yiya yo bhilivila ka dijanela dako.’

Sipiyawu sile si humile ngu dona dijanela dile, si pfhuka siya barama mimangoni kudingana masiku mararu. Msana keto, si tshumete si tsula ka Joxuwa. Ive msana ka toneto, Vaisrayeli va nga txhatuka Mnambu wa Jordhani. Didhoropa do khata adi Vaisrayeli va nga di dhumela i ve Jeriko. Jehovha a gete Vaisrayeli ti to ve horoloka didhoropa dile kumweko ngu ditshiku. Vona va ti fanete kumaha toneto kudingana 6 wa masiku. Ngu ditshiku da wu 7, va horolokile didhoropa dile 7 wa makhambi. Vaprista va to veta mipundu se Vaisrayeli ve kwangula ngutu, koneho mimuru ya Jeriko yi to wa. Kambe, hambiku mti wa Rahabhi wu nga txi maneka txitimwi ka mmuru wa didhoropa, kha wa nga wa. Rahabhi a thembile Jehovha ni ku a mahile a ti sipiyawu si nga m’gela, ngu toneto, ene ni mwaya wakwe va hulukile.