Vavasikati vambidi va txibindi

Joxuwa a khatalete vathu va Jehovha kudingana mbimo yo lapha kala efa a di ni 110 wa malembe. Mbimo yi Joxuwa a nga ti ngadi a txi hanya, Vaisrayeli va txi khozela Jehovha. Kambe, mbimo yi a nga fa, vona va khatile ku etetela Vakanana ve khozela sizimu sa makuhu. Ngu toneto, Jehovha a lekile Vaisrayeli ve xaniswa ngutu ngu mkoma wa Mukanana, awu a nga txi dhanwa ku i Jabhini. Se Vaisrayeli va kombete txivhuno ka Jehovha. Ngu toneto, Jehovha a sawute dijaha adi di nga txi dhanwa ku i Bharake, kasiku di khatalela Vaisrayeli ni kuva vhuna ti to ve tshumela ve maha ati i ku tatinene.

Bharake a txi lava kuziva ati a nga ti fanete ku ti maha. Ngu toneto, Jehovha a rumete mprofeti wa txisikati awu a nga txi dhanwa ku i Dhebhora ti to eya womba-womba nayo. Dhebhora a gete tiya Bharake: ‘Sawula 10.000 wa majaha u tsula nawo ka Mmango wa Tabhori. U na gwita u txhika u lwa ni masotxhwa a mkoma Jabhini, ka mnambu wa Kixoni. Ngu kona hale, awe u no ya xula Sisera mthangeli wa masotxhwa a Jabhini.’ Bharake a to khene: ‘Ani ni no tsula ngako awe u txi tsula ni nani.’ Se Debhora a to khene: ‘Ngu tona, hi na tsula hotshe. Kambe Jehovha a wombile ti to hi nga awe u no daya Sisera, kambe a na dawa ngu wamsikati.’

Se Debhora ni Bharake kumweko ni majaha yale a 10.000 va kwete ka Mmango wa Tabhori kasiku ve ti lulamisela kulwa yimbi. Mbimo yi Sisera a nga tiziva, a to lulamisela dibutho dakwe da mtamo adi di nga di ni masotxhwa amangi ni sikarinyana sa yimbi. Se, a to tsula eya manana ni Vaisrayeli ka mnambu wa Kixoni. Dhebhora gete tiya Bharake: ‘Nyamsi anu mi na xula yimbi nguku Jehovha a ni nanu.’ Se Bharake ni majaha yale a 10.000 va to txhika ngu kututuma ngu mmangoni veya lwa ni Sisera ni masotxhwa akwe.

Jehovha a mahile ti to mnambu wa Kixoni wu tala ngutu ngu mati. Se sikarinyana sa yimbi sa Sisera si to txhibela amu ka madhaka si si tsimbili. Bharake ni masotxhwa akwe va xute dibutho da Sisera! Kambe, Sisera a to txhika ngu ka txikarinyana txakwe txa yimbi e tutuma e ya bharama ka ditenda da wamsikati awu a nga txi dhanwa ku i Jayeli. Jayeli a to ninga leiti Sisera kasiku e sela e gwita e mu fenengeta ngu didhamba. Aku Sisera a nga di karate a to mana wukohe wa hombe. Se Jayeli a to nzwingamela eya aha Sisera a nga ti otete kona eya mkhokhotela txikhongwani hamsungo e m’daya.

Bharake a to xoletela Sisera. Se Jayeli a to huma ditendani kwakwe e hingeta Bharake a txi khene: ‘Wamwamna awu u m’lavetelako ndiyo hawa.’ Se Bharake a to bela ditendani ka Jayeli e wona Sisera a di fite. Ngu magwito, Vaisrayeli se va ti xute valala vawe. Se Bharake ni Dhebhora va to khata kuembelela tindando to bonga Jehovha ngu ku a nga va vhuna. Msana keto, Vaisrayeli va hanyile ngu kurula kudingana 40 wa malembe.